Author: G.O.

Të dyshuarit për përfshirjen në vrasjen e Triumf Rizës, Ilir Abdullahu, i është vazhduar masa e paraburgimit edhe për dy muaj.

Lajmi është konfirmuar nga zëdhënësja e Gjykatës Themelore në Prishtinë, Mirlinda Gashi.

“Ju njoftojmë se pas kërkesës së Prokurorisë Speciale të Republikës së Kosovës për vazhdimin e masës së paraburgimit në çështjen penale kundër të pandehurit I.A, Gjykata Themelore në Prishtinë – Departamenti Special me datë 29.07.2024 ka marr Aktvendim dhe duke aprovuar kërkesën e Prokurorisë Speciale të Republikës së Kosovës, ashtu që masa e paraburgimit të pandehurit I.A iu është vazhduar në kohëzgjatje prej 2 (dy) muaj”, tha ajo.

Pas 16 viteve kërkim, Policia e Kosovës e kishte arrestuar Abdullahun, i njohur me nofkën “Liza”, në korrik të vitit 2023.

“Liza” njihet si bashkëpunëtori i Enver Sekiraqës në kohën kur kishte ndodhur tragjedia më 2007 dhe prej atëherë kishin nisur hetimet.

Ambasada e Kosovës në Maqedoninë e Veriut përmes një reagimi në llogarinë zyrtare në “X” kanë demantuar lajmin e publikuar në disa media në Maqedoni të Veriut referuar një prononcimi për incidentin e ndodhur në aeroportin e Shkupit që i është atribuuar Ambasadës dhe notën e protestës së dërguar nga MPJ e Kosovës për autoritetet maqedonase.

Nga Ambasada e Kosovës në reagim kanë thënë se s’janë deklaruar për një gjë të tillë.

“Ambasada e Republikës së Kosovës në Shkup përgënjeshtron në termat më të fuqishëm lajmin në disa portale të RMV se është prononcuar lidhur me incidentin në Aeroportin e Shkupit dhe se kinse ka konfirmuar se kjo është nota e parë dërguar autoriteteve”, thuhet në reagim.

Nga Ambasada e Kosovës thonë se lajmi ku pretendohet se Ambasada e Kosovës ka pohuar se është hera e parë që Kosova dërgon notë proteste, është i pasaktë dhe në reagim bëjnë thirrje të mos përdoret emri i ambasadës dhe incidenti në aeroport për qëllime të brendshme politike në Maqedoninë e Veriut.

„Informacioni i plasuar është i pasaktë edhe substancialisht. Ambasada bën thirrje që të mos keqpërdoret emri i saj dhe mos të shfrytëzohet incidenti i paprecedent dhe i paligjshëm ndaj Presidentës së Republikës së Kosovës për qëllime të politikës së brendshme në RMV“, thuhet në reagim.

Sekretari amerikan i Mbrojtjes  Lloyd Austin, ka revokuar një marrëveshje për pranimin e fajësisë, e cila do t’i kishte bërë të akuzuarit për komplotin e sulmeve të 11 shtatorit në vitin 2001, të shmangnin dënimet me vdekje.

Të mërkurën, u njoftua se prokurorët kishin arritur një marrëveshje që Khalid Sheikh Mohammed, Walid bin Attash dhe Mustafa al-Hawsawi të pranoheshin fajtorë për akuzat për konspiracion.

Austin ka vënë veton ndaj marrëveshjes, e cila tërhoqi polemika pasi treshja do të përballej me një dënim të përjetshëm në vend të dënimit me vdekje në Gjirin e Guantanamos.

Mohammedi, i cili akuzohet se ishte organizatori i sulmeve të 11 shtatorit , ku u vranë 2 mijë 977 njerëz, u kap në Pakistan në vitin 2003.

Ai është mbajtur në Gjirin e Guantanamos së bashku me Walid bin Attash dhe Mustafa al-Hawsawi që nga dhjetori 2006, shkruan Sky News.

Marrëveshja për pranimin e fajësisë, e cila do t’i kishte parë të dyshuarit të shmangnin dënimin me vdekje, u kritikua nga familjet e viktimave të 11 shtatorit.

Prokuroria Speciale në bashkëpunim me Policinë e Kosovës, pas hetimeve disa mujore, ka zhvilluar një aksion, ku ka arrestuar pesë persona të dyshuar për veprën penale “Krime Lufte”.

Personat ndaluar janë: D.C., D.N., N.S., S.J., M.Sh. Ata dyshohen se me qëllim dhe dashje kishin vrarë, plagosur, djegur për së gjalli viktimat civile shqiptare, marrë peng, dhunuar, rrahur, maltretuar, torturuar fizikisht dhe psiqikisht, plaçkitur, shkatërruar pronat e shqiptarëve dhe djegien e tyre, dëbuar popullatën civile shqiptare, shkatërruar dhe abuzuar objektet kulturore dhe fetare.

Sipas Prokurorisë, “dyshohet se të njëjtit në bashkëkryerje edhe me pjesëtar tjerë të paidentifikuar të këtij grupi, të armatosur dhe të veshur me uniforma të kamufluara dhe uniforma jo të rregullta të policisë apo ushtrisë serbe, më 05.04.1999, në orët e para të mëngjesit, kishin ndërmarrë një aksion në fshatrat Inatoc (Kokaj), Llovcë, Pogragjë dhe Uglar, ku me qëllim dhe dashje kishin vrarë, plagosur, djegur për së gjalli viktimat civile shqiptare, marrë peng, dhunuar, rrahur, maltretuar, torturuar fizikisht dhe psiqikisht, plaçkitur, shkatërruar pronat e shqiptarëve dhe djegien e tyre, dëbuar popullatën civile shqiptare, shkatërruar dhe abuzuar objektet kulturore dhe fetare, veprime këto të sanksionuara sipas ligjeve vendore, zakoneve të luftës dhe Konventave Ndërkombëtare të Gjenevës dhe Protokolleve Shtesë.”

Prokuroria ka bërë me dije do t’i ndërmarrë veprime e mëtejme procedurale ligjore, derisa ndaj kësaj çështjeje penale do të vazhdojë me zhvillimin e hetimeve.

Qytetarët në katër komunat në veri të Kosovës vazhdojnë t’i konvertojnë patentë shoferët ilegalë të lëshuar nga strukturat paralele serbe në RKS.

Zëvendësdrejtori i Policisë së Kosovës për rajonin e veriut, Veton Elshani, ka thënë për teve1 se deri më 2 gusht janë konvertuar 4836 patentë shoferë.

“Në Leposaviq janë konvertuar 1435 patentë shoferë, në Mitrovicën Veriore 1208, në Zubin Potok 758, në Zveçan 880, në Graçanicë 177, në Kamenicë 69, në Shtërpcë 53 etj”, tha Elshani.

Ndërkaq, në maj të këtij viti ka filluar procesi i aplikimit për konvertim të patentë shoferëve. Afati për ndryshimin e patentë shoferëve skadon më 9 gusht.

Pas kësaj date nuk do të jetë më i mundur përdorimi i patentë shoferëve ilegalë që janë lëshuar për qytetarët e Kosovës.

Policia e Kosovës njofton se për 24 orë, ka shqiptuar 1860 gjoba në trafik.

Sipas policisë, gjatë 24 orëve të fundit janë evidentuar disa aksidente në trafikun rrugor,  33 aksidente kanë qenë me lëndime, ndërsa 93 me dëme materiale.

Policia njofton se janë arrestuar 16 persona, ndërkaq 14 të tjerë janë dërguar në mbajtje, kurse 1 persona është në ndalim policor.