Author: G.O.

Zëdhënësi i Bashkimit Evropian, Peter Stano, ka përsëritur se çështja e hapjes së Urës së Ibrit duhet të zgjidhet përmes dialogut në Bruksel, ndërsa i ka bërë thirrje kryeministri të Kosovës, Albin Kurti, të mos vazhdojë me veprime të njëanshme që mund të rrisin tensionet.

Në një intervistë për “N1” të shtunën, Stano paralajmëroi se hapja e Urës së Ibrit mund t’i rrisë tensionet në veri.

“BE-ja, së bashku me partnerët e tjerë kyç, i ka kërkuar kryeministrit të Kosovës Kurti që të mos vazhdojë me veprime të njëanshme, duke theksuar se çështjet duhet të zgjidhen me dialog”, ka thënë Stano.

Zëdhënësi i BE-së ka shprehur shqetësimin për krizën e vazhdueshme në dialogun Beograd-Prishtinë. Ai kritikoi “veprimet e njëanshme”, veçanërisht nga Kosova, siç është mbyllja e postave serbe në veri, të cilat i përshkroi si fatkeqe dhe të dëmshme për komunitetet lokale. Ai bëri thirrje për kthim në dialog konstruktiv.

Stano në intervistë ka thënë se BE-ja është ndërmjetëse, jo zbatuese dhe se mund të lehtësojë vetëm dialogun. Ai pranoi se dialogu ka ngecur për shkak të mungesës së angazhimit nga të dyja palët, por theksoi se është bërë përparim në disa fusha. Ai theksoi rëndësinë e lidershipit politik lokal në arritjen e kompromiseve të nevojshme.

Autoritetet e Kosovës i kanë ndërmarrë disa veprime gjatë kësaj jave në veri të vendit për ta hapur Urën e Ibrit, të cilat janë kundërshtuar nga Serbia dhe serbët e Kosovës, si dhe nga bashkësia ndërkombëtare.

Ura, aktualisht, është e hapur vetëm për këmbësorë, edhe pse në kuadër të dialogut mes Kosovës dhe Serbisë është rënë dakord që të hapet edhe për qarkullimin e automjeteve – por s’u zbatua.

Ushtarët italianë të KFOR-it ndodhen në urën mbi lumin Ibër, ndërsa afër ndodhen edhe pjesëtarët e Policisë së Kosovës.

Deputetja e AAK-së, Time Kadrijaj ka komentuar paralajmërimet e Bashkimit Evropian për shtimin e masave ndaj Kosovës, në qoftë se Qeveria vazhdon të ndërmarr veprime në veri pakoordinim.

Kadrijaj ka thënë se çdo herë kur jemi paralajmëruar dhe qeveria nuk e ka marrë seriozisht ne jemi ndëshkuar.

“Sa herë jemi paralajmëruar e qeveria nuk e ka marrë seriozisht paralajmërimin ne jemi ndëshkuar, e në fakt Kosova veç ka sanksione e me këto sanksione Kosova ka humb shumë projekte por edhe besimin e miqve tonë. Ne jemi për shtrirje te sovranitetit e integritetit në tërë territorin e Kosovës por jo me standardin që Kosova po dëmtohet në imazh e në besim nga aleatët”, tha ajo.

Ndër të tjera, deputetja e AAK-së ka thënë se jemi në vit zgjedhor, dhe sipas saj Kurti ka për synim të bëjë veprime eskaluese në veri, që ta mbajë besimin e qytetarëve për ti fituar zgjedhjet.

“Po meqenëse jemi në vit zgjedhor Kurti ka synim për veprime eskaluese në veri për të mbajt besimin e militantëve veç për të fituar zgjedhjet me kushtin që edhe Kosova me humb. Me këto agjenda të Kurtit, ministrave, deputeteve të mazhorances që kush nuk mendon si Kurti duhet të sulmohet e të degradohet nga ushtria e Facebook-ut, bile bile edhe aleatët tonë amerikan ka pasoja për vendin”, u shpreh ajo për Gazetën Blic.

“Dhe nëse vazhdohet me sanksione të tjera vendin po e dërgojmë nga mbyllja e po e humbim perspektiven evropiane. E gjithë kjo shkon në favor të Serbisë. E zoti Kurti gjithë këtë po e bënë qëllimshëm”, përfundoi Kadrijaj.

Kryetari i Partisë Demokratike të Kosovës, Memli Krasniqi ka ka kujtuar heroin Bekim Berisha-Abeja, në përvjetorin e rënies.

Ai përveç Bekim Berishës, ka kujtuar edhe të rënët tjerë të 10 gushtit 1998.

“Ata që e kanë njohur dhe kanë luftuar krah tij – kanë thënë se vlen sa 1 mijë ushtarë. Ndërkaq, për armikun, ai ishte vetë makthi.
Bekim Berisha – Abeja, është një nga shqiptarët e rrallë që nuk humbi asnjë mundësi për të luftuar kundër regjimit gjenocidal serb. Në Kroaci, Bosnje e Kosovë – ai ka vetëm një emër dhe një epitet: Hero! 25 vite më parë, në betejën e tij t’fundit, atë të Junikut, Abeja i dha Atdheut edhe të vetmen gjë që i kishte mbetur: Jetën e tij! Me bashkëluftëtarët Bedri Shala, Elton Zherka dhe Përmet Vula – ata u përjetësuan në altarin e shenjtë të lirisë. Dritë e pashuar mbi qiellin e lirë t’Kosovës. Lavdi e përjetshme”, ka shkruar Krasniqi.

Policia e Kosovës, konkretisht  njësitet e hetimeve të Drejtorisë së Kryeqytetit, kanë arrestuar dy persona të dyshuar për veprën grabitje.

Përmes një komunikate për media, rasti i grabitjes ka ndodhur më 26 korrik të këtij viti në rrugën “Luigj Gurakuqi” në Prishtinë.

Sipas PK-së, personat e dyshuar kanë sulmuar me mjet të mprehtë (thikë), ankuesen dhe të njëjtës i kanë grabitur një zingjirë ari.

“Puna e hetuesve policor,  është finalizuar mbrëmë, ku pas marrjes së disa veprimeve operative  kanë arrit që të identifikojnë dhe arrestojnë  personat e dyshuar: T.I, femër, 26 vjeç, shtetase e  Republikës së Kosovës dhe R.A, mashkull, 29 vjeç, shtetas i Republikës së Kosovës. Personat e dyshuar me vendim prokurorit të shtetit, janë dërguar në qendrën e mbajtjes për 48 orë”, thuhet në komunikatë.

62 personat në bordin e aeroplanit të kompanisë Voepass që u rrëzua në qytetin e Vinedo të Brazilit , kanë humbur jetën.

ATR-72 me dy motorë po fluturonte nga Cascavel, shteti Parana, në aeroportin Guarulos në Sao Paulo. Sipas një deklarate të kompanisë Voepass, në bordin e avionit ndodheshin 58 udhëtarë dhe 4 anëtarë të ekuipazhit , por nuk dihet se si ka ndodhur aksidenti. “Nuk ka ende asnjë përditësim se si ndodhi,” tha linja ajrore në një deklaratë.

Faqja e internetit Flightradar24 raporton se avioni fatal është PS-VPB, një ATR72-500 14-vjeçar i ndërtuar në vitin 2010. Sinjali i fundit i marrë nga avioni ishte rreth një orë e gjysmë pas ngritjes. Gjatë 60 sekondave të fundit të fluturimit, transponderi i tij transmetoi kursin vertikal në tokë ndërsa humbi lartësinë nga 2.4384 në 7.3152 km në minutë.

Bëhet e ditur se avioni ka rënë në oborrin e një shtëpie, por nga rënia nuk ka pasur banorë të lënduar. Vetëm një shtëpi u dëmtua në zonën e banimit ku ndodhi përplasja, thanë zyrtarët e qytetit në Valinhos fqinje.

Gjithashtu, presidenti brazilian Luiz Inacio Lula da Silva u kërkoi të pranishmëve të mbanin një minutë heshtje në kujtim të viktimave të tragjedisë së avionit.

Videot e transmetuara nga rrjetet televizive tregojnë rrotullimin e pakontrolluar të avionit dhe rrëzimin e tij në tokë. Në pamjet nga skena e tragjedisë ajrore, shihet një tym i dendur që ngrihet në qiell nga vendi ku është rrëzuar avioni.

Shërbimi Spitalor dhe Klinik Universitar i Kosovës ka njoftuar për vdekjen në moshë të re të infermierit, Bujar Vitija.

Në njoftimin e SHSKUK thuhet se ai ishte punëtor i shquar, i zellshëm dhe  me përkushtim shërbeu në Klinikën e Syve, të Qendrës Klinike dhe Universitare të Kosovës.

“I ri dhe plot energji, gjithmonë ishte i gatshëm të ndihmonte të tjerë, pa e kursyer veten në asnjë moment. Përkushtimi dhe përkujdesja e tij për pacientët do të mbesin të paharrueshme në kujtimet tona. Ngushëllimet më të sinqerta familjes, të afërmve të tij, për këtë humbje dhe zbrazëti të madhe që la pas”, thuhet në njoftim.

Një patrullë e Policisë së Kosovës në Dragash është sulmuar fizikisht nga dy të dyshuar, të cilët janë arrestuar dhe dërguar në mbajtje për 48 orë.

Në raportin 24 orësh, bëhet e ditur se zyrtarët policorë kanë marrë edhe trajtim mjekësor.

“Patrulla e Policisë, derisa ka qenë duke punuar në një aksident trafiku në rrugën e lartcekur, është sulmuar nga dy të dyshuar meshkuj. Zyrtarët policorë kanë pranuar tretman mjekësor. Lidhur me rastin janë arrestuar të dyshuarit dhe pas intervistimit me vendim të prokurorit kujdestar të dyshuarve iu është caktuar masa e ndalimit policorë për 48 orë”, thuhet në njoftim.