Author: G.O.

Në Prishtinë është mbajtur Parada e Krenarisë 2026 me moton “Barazi ose Revoltë”, ku pjesëtarë dhe mbështetës të komunitetit LGBTI marshuan nëpër sheshet kryesore të kryeqytetit.

Pjesëmarrësit mbanin pankarta dhe flamuj shumëngjyrësh, ndërsa gjatë marshimit u bënë thirrje për barazi, mbrojtje të të drejtave dhe trajtim dinjitoz për komunitetin LGBTI në Kosovë.

Në paradë morën pjesë aktivistë të shoqërisë civile, përfaqësues të organizatave për të drejtat e njeriut, qytetarë si dhe ambasadorë të huaj të akredituar në Kosovë.

Ndryshe nga vitet e kaluara, në aktivitet nuk u panë përfaqësues të institucioneve qendrore, përfshirë kryeministrin në detyrë, Albin Kurti.

Marshimi u zhvillua nën masa të shtuara sigurie dhe pa incidente të raportuara.

Presidentja e Komisioni Evropian, Ursula von der Leyen, ka deklaruar se Mali i Zi është shumë afër realizimit të objektivit për t’u bërë anëtar i Bashkimi Evropian.

Në prag të Samitit BE–Ballkani Perëndimor, ajo vlerësoi progresin e Malit të Zi, duke theksuar se vendi po arrin rezultate të shkëlqyera në rrugën evropiane.

Von der Leyen nënvizoi se procesi i anëtarësimit bazohet në meritë dhe se përmbushja e reformave mbetet kushti kryesor për integrimin në BE.

“Vazhdoni në këtë rrugë, ne jemi këtu për t’ju mbështetur. Mendoj se jeni afër qëllimit”, deklaroi ajo, duke shtuar se reformat sjellin investime dhe përfitime konkrete për qytetarët.

Dy persona kanë mbetur të lënduar si pasojë e një vetaksidenti që ka ndodhur mbrëmë në rrugën Prishtinë–Ferizaj, ku një veturë ka dalë nga rruga dhe ka përfunduar brenda një lokali.

Sipas Policisë së Kosovës, aksidenti ka ndodhur rreth orës 23:30, ndërsa njësitë policore dhe ekipet emergjente kanë dalë menjëherë në vendin e ngjarjes për të ofruar ndihmë.

Të lënduarit janë dërguar për trajtim mjekësor, ndërsa ende nuk dihen shkaqet e sakta që kanë çuar deri te humbja e kontrollit të automjetit.

Autoritetet po e hetojnë rastin për të sqaruar rrethanat e aksidentit.

Qeveria e Hungaria ka vendosur të ndalojë lëshimin e vizave të punës për shtetasit nga Filipinet, Gjeorgjia dhe Armenia, duke nisur nga dita e premte.

Sipas autoriteteve hungareze, masa është pjesë e një politike të re për rregullimin e hyrjes së punëtorëve të huaj, me arsyetimin se prania e tyre mund të ndikojë në nivelin e pagave në tregun lokal të punës.

Qeveria thekson se vendimi nuk prek punëtorët që tashmë ndodhen në Hungari, të cilët do të mund të aplikojnë për zgjatje të lejeve të qëndrimit, ndërsa aplikimet ekzistuese do të vazhdojnë të shqyrtohen.

Megjithatë, disa sektorë të ekonomisë, përfshirë prodhimin dhe shërbimet, kanë shprehur shqetësime se kufizimi mund të ndikojë në mungesën e fuqisë punëtore dhe në funksionimin e bizneseve.

Autoritetet e cilësojnë këtë si një hap të parë drejt një rregullimi më të gjerë të politikave të migracionit për punë në të ardhmen.

Forca e Sigurisë së Kosovës (Forca e Sigurisë së Kosovës) ka zhvilluar ushtrimin fushor validues “Ujku i Pamposhtur 01”, në kuadër të ngritjes së kapaciteteve dhe avancimit të aftësive operacionale.

Sipas njoftimit zyrtar, ushtrimi është realizuar në zonat e Aeroportit të Gjakovës dhe Babaj të Bokës, ku kanë marrë pjesë njësi të ndryshme të FSK-së, përfshirë Komandën e Forcave Tokësore, njësi logjistike dhe Policinë Ushtarake.

Qëllimi i stërvitjes ka qenë validimi i aftësive operacionale, rritja e gatishmërisë luftarake, si dhe forcimi i koordinimit ndërmjet njësive në përputhje me standardet profesionale.

FSK thekson se ushtrime të tilla janë të rëndësishme për përgatitjen dhe zhvillimin e kapaciteteve të saj në detyra të ndryshme operacionale.

Policia e Kosovës, sot me datën 05.06.2026 ka pranuar vendimin e komunës së Mitrovicës Veri për largim të mbishkrimit ‘I Love Mitrovica’.

Në vend të ngjarjes menjëherë kanë dalë njësitet policore, si dhe sipas procedurave të parapara ligjore janë njoftuar inspektorët komunalë, që vendimi në fjalë duhet të shtyhet derisa të pranohet vendimi nga Ministria e Administrimit të Pushtetit Lokal (MAPL).

Në vendin e ngjarjes, ka ardhur kryetari i komunës së Mitrovicës së Veriut me rreth njëzetë (20) persona, ku në mesin e tyre ka qenë edhe kryesuesi i Kuvendit Komunal Mitrovicë Veri, të cilët pasi janë njoftuar nga komandanti i stacionit policor rreth situatës, kryetari pas dhënies së intervistës për media, iu është drejtuar zyrtarëve policorë me fjalë “tani do të ngjyrosim me ngjyrë emblemën “.

Derisa zyrtarët policorë kanë njoftuar se një gjë e tillë nuk lejohet të ndodhë, njëherit kanë kërkuar dhe tentuar të ndalojnë dëmtimin/ngjyrosjen e objektit publik.

Edhe përkundër kërkesës dhe urdhrit që të ndalohet dëmtimi/ngjyrosja e objektit publik, të njëjtit kanë filluar ta ngjyrosin atë, me ç’rast është dashur intervenimi i zyrtarëve policorë të cilët kanë shoqëruar dy personat në stacion policor.

Sipas procedurave të parapara të njëjtëve iu është shqiptuar kundërvajtje për vandalizëm. Me urdhër të prokurorit kompetent janë liruar, për të vazhduar me procedurat e mëtejme.

Që nga 1 qershori e deri tani, në platformën online kanë aplikuar rreth 8 mijë maturantë nga 18 mijë sa pritet të aplikojnë për testin e maturës shtetërore, i cili do të mbahet më 20 qershor. Kështu kanë bërë të ditur drejtues të Ministrisë së Arsimit. Ndërkaq, njohës të fushës së arsimit vlerësojnë se ligji i ri i maturës do të rrisë kontrollin sa i përket mbarëvajtjes së testit. Rezultatet e testit do të shpallen, më 29 qershor.

Më 20 qershor rreth 18 mijë maturantë do t’i nënshtrohen testit të maturës shtetërore. Edhe këtë vit aplikimi po bëhet në platformën online eKosova. Udhëheqësi i divizionit për vlerësim, standarde dhe monitorim në Ministrinë e Arsimit, Fatmir Elezi, në një përgjigje për Radio Kosovën dha detaje rreth zhvillimit të këtij procesi.

“Që nga 1 qershori ka filluar aplikimi për testin e maturës përmes platformës eKosova dhe deri tani kanë aplikuar rreth 8 mijë maturantë. Koordinatorët e shkollave kanë filluar aprovimin e këtyre aplikimeve, që do të thotë se përgjegjës për aprovimin janë koordinatorët e shkollave. Aplikimi do të zgjasë deri më 12 qershor. Testi i maturës, siç e dini, do të organizohet më 20 qershor, kurse rezultatet pritet të publikohen më 29 qershor”, tha Elezi.

Elezi bëri thirrje që të gjithë maturantët që hasin probleme gjatë aplikimit të kontaktojnë koordinatorët e shkollave, në mënyrë që të mos e lënë aplikimin për ditën e fundit.

“Të gjithë nxënësit që ende nuk e kanë kryer aplikimin, nëse kanë probleme me llogarinë në eKosova, të kontaktojnë koordinatorët e shkollave dhe sigurisht do të gjejnë zgjidhje, në mënyrë që të mos e lënë për ditën e fundit aplikimin për maturë”, theksoi ai.

Ndërkaq, sa i përket ligjit të ri të maturës, që këtë vit i jep kompetenca më të mëdha Inspektoratit Arsimor, njohës të fushës së arsimit vlerësojnë se ai do të ketë efekt pozitiv në menaxhimin e testit.

Xhavit Rexhaj, në një përgjigje për Radio Kosovën, e vlerësoi si të nevojshëm ligjin e ri të maturës, por tha se është e domosdoshme të ndryshohet tërësisht koncepti i testit të maturës.

“Ligji i ri i maturës besoj që ndihmon shumë, sepse ata që dëshirojnë t’i thyejnë rregullat tash e kanë parasysh çka mund t’i gjejë dhe se mund të ketë sanksione. Sanksionet janë ato që kanë munguar më parë. Mirëpo, unë konsideroj që ministria duhet ta rimendojë krejt konceptin e maturës, në mënyrë që të bëhet ashtu siç duhet për të reflektuar dijen dhe shkathtësitë e vërteta të nxënësve, duke i rishikuar pyetjet, duke i riformuluar ato dhe duke e rishikuar administrimin e testit”, theksoi Rexhaj.

Në testin e maturës shtetërore, nxënësit do t’i nënshtrohen testit në tri lëndë të përgjithshme: Gjuhë shqipe, Matematikë, Gjuhë angleze, si edhe në një lëndë me zgjedhje që përzgjidhet nga nxënësi. Rezultatet e testit të maturës shtetërore do të shpallen më 29 qershor.

Brenda 24 orëve të fundit në vend janë regjistruar gjithsej 65 aksidente trafiku, prej të cilave 26 me persona të lënduar dhe 39 me dëme materiale.

Sipas të dhënave zyrtare, në të njëjtën periudhë janë shqiptuar 2,132 gjoba për shkelje të rregullave të komunikacionit rrugor, në kuadër të kontrolleve të shtuara në terren.

Po ashtu, policia ka arrestuar 14 persona, ndërsa 12 prej tyre janë dërguar në mbajtje për shkelje të ndryshme ligjore në trafik.

Autoritetet kanë bërë të ditur se kontrollet do të vazhdojnë me qëllim rritjen e sigurisë rrugore dhe parandalimin e aksidenteve.