Author: G.O.

Një person është arrestuar pasi i njëjti kishte tentuar që ta kryente grabitjen në një argjendari.

Sipas raportit 24 orësh të Policisë së Kosovës bëhet e ditur se rasti ka ndodhur të hënën rreth orës 14:09 në rrugën “Shatërvani”, në Gjilani.

Tutje thuhet se nga i dyshuari janë konfiskuar: një revole, një kapelë e zezë, një skuter dhe një çantë krahu.

“Raportohet se është arrestuar i dyshuari mashkull kosovar, pasi që i njëjti kishte tentuar që ta kryente grabitjen në një argjendari. Nga i dyshuari janë konfiskuar: një revole, një kapelë e zezë, një skuter dhe një çantë krahu. Me vendim të prokurorit, i dyshuari pas intervistimit dërgohet në mbajtje”, thuhet në njoftim. /Telegrafi/

Deputetja e LDK-së, Hykmete Bajrami, ka reaguar lidhur me situatën në sistemin shëndetësor në Kosovë, duke adresuar kritika ndaj qeverisë aktuale për mënyrën e menaxhimit të këtij sektori.

Bajrami ka deklaruar se problemet në shëndetësi janë pasojë e keqmenaxhimit dhe mungesës së përgjegjësisë institucionale. Ajo ka kërkuar që gjendja reale të shihet përmes përvojës së pacientëve në klinika, listave të pritjes dhe mungesave me të cilat përballen institucionet shëndetësore.

Sipas saj, mjekët dhe infermierët nuk duhet të fajësohen për vështirësitë në sistem, pasi ata punojnë në kushte të rënda dhe vazhdojnë të ofrojnë shërbime pavarësisht mungesave.

Deputetja opozitare ka ngritur shqetësime edhe për proceset e tenderimit në shëndetësi, duke pretenduar se fondet e mëdha nuk po përkthehen në përmirësim të shërbimeve për qytetarët. Ajo ka përmendur mungesa të barnave, pajisjeve dhe materialeve të nevojshme në klinika.

“Gjendja në shëndetësi ka emër: emri i saj është korrupsion”, ka shkruar Bajrami në reagimin e saj, duke e bërë përgjegjës pushtetin për situatën aktuale.

Ajo ka theksuar se pas disa vitesh qeverisje dhe me buxhete të mëdha në dispozicion, gjendja në këtë sektor mbetet shqetësuese dhe ka kërkuar përgjegjësi institucionale për problemet e vazhdueshme.

Deri tani, nga institucionet qeveritare nuk ka pasur një reagim ndaj deklaratave të deputetes së LDK-së.

Policia e Kosovës ka arrestuar një person të dyshuar për veprën penale “Sulm seksual”, pas raportimit të një rasti që ka ndodhur në Prishtinë.

Sipas njoftimit policor, viktima ka deklaruar se është sulmuar seksualisht nga një burrë.

I dyshuari është arrestuar nga Policia dhe është intervistuar në prani të avokatit mbrojtës.

Me vendim të prokurorit, atij i është caktuar masa e ndalimit prej 48 orësh, ndërsa hetimet lidhur me rastin janë duke vazhduar.

Një person është arrestuar në Fushë Kosovë pasi dyshohet se ushtroi dhunë fizike ndaj nënës dhe motrës së tij, pas një mosmarrëveshjeje familjare.

Ngjarja ka ndodhur më 12 korrik 2026, rreth orës 17:20. Si pasojë e sulmit, të dyja viktimat kanë pësuar lëndime të lehta trupore dhe kanë pranuar trajtim mjekësor.

Pas arrestimit dhe intervistimit me vendim të prokurorit, i dyshuari është liruar në procedurë të rregullt, ndërsa rasti vazhdon të hetohet.

“Fushë Kosovë 12.07.2026 – 17:20. Është arrestuar i dyshuari mashkull kosovar,  pasi që i njëjti pas një mosmarrëveshje ka sulmuar fizikisht nënën dhe motrën e tij. Viktimat kanë pranuar tretman mjekësor. I dyshuari pas intervistimit, me vendim të prokurorit lirohet në procedurë të rregullt”, thuhet në raportin e policisë së Kosovës.

Administrata Tatimore e Kosovës (ATK) ka intensifikuar aktivitetet për identifikimin e të ardhurave të padeklaruara nga dhënia me qira e pronave, duke u bërë thirrje të gjithë personave fizikë që realizojnë të ardhura nga qiraja – përfshirë edhe përmes platformave elektronike si Airbnb – t’i deklarojnë ato dhe të përmbushin detyrimet tatimore në përputhje me legjislacionin në fuqi.

Përmes këtij njoftimi, ATK synon të nxisë përmbushjen vullnetare të obligimeve tatimore dhe të sigurojë trajtim të barabartë për të gjithë tatimpaguesit.

ATK u bën thirrje të gjithë personave që realizojnë të ardhura nga dhënia me qira e pronave dhe që ende nuk i kanë deklaruar ato, që sa më parë t’i përmbushin vullnetarisht detyrimet e tyre tatimore, duke:

• u pajisur me Numër Fiskal pranë ATK-së, nëse nuk janë të regjistruar;

• deklaruar të ardhurat e realizuara; dhe

• paguar detyrimet tatimore sipas legjislacionit në fuqi.

Njoftimi i plotë:

Deklarimi dhe tatimi i të ardhurave nga dhënia me qira e pronave

Administrata Tatimore e Kosovës (ATK) njofton të gjithë personat fizikë që realizojnë të ardhura nga dhënia me qira e banesave, shtëpive ose pronave të tjera, përfshirë edhe përmes platformave elektronike, si Airbnb dhe platforma të tjera të ngjashme, se këto të ardhura duhet të deklarohen dhe i nënshtrohen tatimit në përputhje me legjislacionin tatimor në fuqi.

ATK, në kuadër të aktiviteteve të saj për identifikimin e ekonomisë joformale, ka analizuar të dhënat dhe informacionet që disponon dhe ka konstatuar se një numër personash kanë realizuar të ardhura nga dhënia me qira e pronave, por nuk janë regjistruar në ATK, nuk kanë deklaruar këto të ardhura dhe nuk kanë përmbushur detyrimet e tyre tatimore.

Për këtë arsye, ATK u bën thirrje të gjithë personave që realizojnë të ardhura nga dhënia me qira e pronave dhe që ende nuk i kanë deklaruar ato, që sa më parë t’i përmbushin vullnetarisht detyrimet e tyre tatimore, duke:

• u pajisur me Numër Fiskal pranë ATK-së, nëse nuk janë të regjistruar;

• deklaruar të ardhurat e realizuara; dhe

• paguar detyrimet tatimore sipas legjislacionit në fuqi.

ATK rikujton se disponon informacione, të dhëna dhe prova që mundësojnë identifikimin e personave që realizojnë të ardhura nga dhënia me qira e pronave. Nëse këta persona nuk përmbushin vullnetarisht detyrimet e tyre, ATK do të ndërmarrë veprimet e parapara me legjislacionin në fuqi, duke përfshirë:

• regjistrimin sipas detyrës zyrtare, kur plotësohen kushtet ligjore;

• vlerësimin e detyrimeve tatimore bazuar në informacionet, të dhënat dhe provat që disponon;

• ngarkimin e interesave dhe gjobave; si dhe

• ndërmarrjen e masave të tjera administrative dhe ligjore të parashikuara nga legjislacioni tatimor.

ATK mbetet e përkushtuar në promovimin e përmbushjes vullnetare të detyrimeve tatimore dhe sigurimin e trajtimit të barabartë të të gjithë tatimpaguesve, në përputhje me legjislacionin në fuqi.

Për informata shtesë lidhur me regjistrimin, deklarimin dhe pagesën e tatimeve, tatimpaguesit mund të kontaktojnë Administratën Tatimore të Kosovës përmes kanaleve zyrtare të komunikimit ose të vizitojnë zyrat më të afërta të ATK-së.

Përmbushja vullnetare është zgjedhja më e mirë.

Administrata Tatimore e Kosovës

Kanë zgjatur 5 orë sulmet intensive ajrore të Shteteve të Bashkuara ndaj Iranit në natën e sotme, gjatë të cilave avionët amerikanë goditën disa objektiva ushtarake. Sipas raportimeve, ndër zonat e goditura janë përfshirë Bushehr, Chabahar dhe Bandar Abbas.

residenti amerikan Donald Trump, i cili kishte paralajmëruar më herët mundësinë e ndërmarrjes së këtyre sulmeve, deklaroi nga Shtëpia e Bardhë se nuk e përjashton mundësinë e arritjes së një marrëveshjeje të re me Teheranin në të ardhmen. Ai gjithashtu u bëri thirrje aleatëve të SHBA-së që të kontribuojnë financiarisht për mbështetjen amerikane, duke deklaruar: “Dua të rimbursohem nga vendet që po ndihmojmë”.

Ndërkohë, Irani, me mbështetjen e grupeve të armatosura aleate, përfshirë rebelët Houthi në Jemen, ka intensifikuar sulmet me raketa dhe dronë ndaj vendeve të Gjirit Persik. Raportimet flasin për shpërthime në Arabinë Saudite, Kuvajt dhe Bahrein.

Po ashtu, sipas burimeve të cituara, dy anije cisterna nafte të Emirateve të Bashkuara Arabe janë goditur teksa po përpiqeshin të kalonin Ngushticën e Hormuzit përgjatë një rruge që autoritetet iraniane e konsideronin të palejuar.

Në zhvillimet më të fundit, Donald Trump thuhet se ka vendosur një bllokadë të re detare në Ngushticën e Hormuzit, duke deklaruar se kontrolli mbi kalimin strategjik do të jetë nën administrimin amerikan dhe se do të vendoset një tarifë për anijet që kalojnë nëpër Gjirin Persik, shkruan Tch.

Situata në Lindjen e Mesme mbetet tepër e tensionuar, ndërsa komuniteti ndërkombëtar po ndjek me shqetësim zhvillimet që mund të kenë ndikim të gjerë në sigurinë rajonale dhe tregjet globale të energjisë.

Një 62-vjeçar ka humbur jetën në rrethana tragjike në Prizren, ku dyshohet se ka rënë nga kulmi i shtëpisë së tij.

Ngjarja është raportuar gjatë ditës së 13 korrikut në rrugën “Kalaja e Krujës”, pasi Emergjenca e Prizrenit ka njoftuar Policinë për një person të gjetur pa shenja jete.

Siç mësohet dëshmitari B.M. (63 vjeç), i cili ishte duke punuar në shtëpinë e viktimës, e ka gjetur atë të shtrirë në tokë dhe ka njoftuar menjëherë ekipet emergjente.

Mjeku që ka dalë i pari në vendin e ngjarjes ka konstatuar vdekjen e 62-vjeçarit.

Burimet e Sinjalit bëjnë të ditur se dyshohet që viktima ka rënë nga kulmi i shtëpisë, nga një lartësi prej rreth 8 deri në 9 metrash.

Në vendin e ngjarjes kanë dalë njësitë policore, hetuesit e stacionit, Hetimet Rajonale, si dhe Prokurori i Shtetit, i cili ka urdhëruar ndërmarrjen e të gjitha veprimeve të nevojshme hetimore për zbardhjen e plotë të rrethanave të rastit.

Rasti është iniciuar si “Hetim i vdekjes” dhe mbetet nën hetime.

Prokuroria Themelore në Pejë njofton opinionin publik se lidhur me rastin e të shtënave me armë zjarri që ka ndodhur mbrëmë në qytetin e Pejës, ku si pasojë një person ka mbetur i plagosur, me urdhër të Prokurorit të Shtetit është ndaluar për 48 orë personi i dyshuar me inicialet B.K., për shkak të dyshimit të bazuar se ka kryer veprën penale “Vrasja në tentativë”.

Sipas një njoftimi për media thuhet se menjëherë pas pranimit të informatës për rastin, në vendin e ngjarjes kanë dalë Prokurori i Shtetit, njësitet relevante të Policisë së Kosovës dhe ekipet e forenzikës, të cilat kanë ndërmarrë të gjitha veprimet e nevojshme procedurale.

“Gjatë ekzaminimit të vendit të ngjarjes janë grumbulluar prova materiale që do të shërbejnë në zhvillimin e procedurës penale. Prokurori i Shtetit, brenda afatit ligjor, do të parashtrojë në Gjykatën kompetente kërkesën për caktimin e masës së paraburgimit ndaj të dyshuarit”, thuhet në njoftim.

Prokuroria Themelore në Pejë njofton se, në koordinim të ngushtë me Policinë e Kosovës, janë duke u ndërmarrë të gjitha veprimet e nevojshme hetimore me qëllim të ndriçimit të plotë të rrethanave të këtij rasti dhe sigurimit të provave për zhvillimin e mëtejshëm të procedurës penale. /Telegrafi/