Author: G.O.

Këto ditë kanë qenë të kobshme për tri familjet Morina, Rama dhe Mehmetaj në fshatin Jabllanicë të Gjakovës pasi humbën tre fëmijë të mitur, që vdiqën tragjikisht si pasojë e shembjes së një objekti të vjetër, raporton Gazeta Sinjali.

Vdekja e Vetonit, Idealit dhe Ramës, ka tronditur Gjakovën dhe krejt Kosovën, ndërsa sot pritet t’u jepet lamtumira e fundit.

Familjarët kanë bërë të ditur se trupat e tre djemve do të varrosen sot në varrezat e fshatit Jabllanicë, në orën 14:00.

Bazuar në informacionet zyrtare, objekti është shembur në rrethana të panjohura, ndërsa tre djemtë – dy 15 vjeç dhe tjetri 13 vjeç – kanë qenë brenda kur janë zënë nga pllaka.

Objekti i shembur ka qenë ndërtesë e vjetër, e pabanuar, e mbetur pas luftës së vitit 1999 në Kosovë.

Familjari i viktimave, Përparim Ademaj, ka thënë të dielën për mediat lokale se të rinjtë kanë dalë disa orë para incidentit për të luajtur së bashku, ndërsa familjarët e kanë zbuluar se ata kanë qenë në objektin e rrënuar nga dridhjet e telefonave, sa kanë qenë duke i kërkuar në rrethinë.

Sipas tij, kamerat e shtëpive në afërsi tregojnë se objekti i pabanuar është shembur rreth orës 16:35 të shtunën, ndërsa trupat e viktimave janë gjetur pas gati gjashtë orëve.

Zyra e Prokurorit të Shtetit ka bërë të ditur se në vendin e ngjarjes ka dalë Kryeprokurori, prokurori kujdestar dhe të gjitha njësitet tjera përkatëse të Policisë së Kosovës, dhe që janë duke u ndërmarrë të gjitha masat për zbardhjen e rastit.

Një aksident i rëndë ka ndodhur sot te Zona Industriale, ku të përfshira kanë qenë të përfshira tri vetura.

Në vendin e ngjarjes shihet të kenë mbërritur policia që po merren me rastin.

Në pamjet e ka siguruar nga ATV-ja shihet se në vendin e ngjarjes kanë mbërritur edhe dy autoambulanca që po i japin ndihmën e parë të lënduarve.

Në kuadër të ngritjes dhe forcimit të kapaciteteve operacionale të Forcës së Sigurisë së Kosovës (FSK), Kompania B e Regjimentit të dytë të Forcave Tokësore ka realizuar me sukses ushtrimin fushor “Shqiponja 1”.

Sipas FSK-së, ky ushtrim ka pasur për qëllim vlerësimin dhe testimin e aftësive, me synimin që të sigurohet gatishmëria e lartë për përmbushjen e detyrave të planifikuara dhe arritjen e objektivave për vitin 2025.

“Përmes skenarëve të ndryshëm taktikë, pjesëtarët e FSK-së kanë demonstruar aftësi të avancuara në menaxhimin e situatave sfiduese, duke dëshmuar profesionalizëm dhe përkushtim në realizimin e misionit të tyre”, ka shkruar ai.

Presidentja e Kosovës, Vjosa Osmani nuk ka dashur të komentoj deklaratën “gjeneral i vetëshpallur” të ministres së Punëve të Jashtme, Donika Gërvalla për kreun e Aleancës së Ardhmërisë së Kosovës, Ramush Haradinaj.

“Nuk përcjelli deklarata të tilla”, tha shkurt Osmani kur u pyet nga KosovaPress se si e vlerëson deklarimin e Gërvallës.

Etiketimi i liderit të AAK-së, Ramush Haradinaj si “gjeneral i vetëshpallur” të cilin ia bëri ministrja e Punëve të Jashtme, Donika Gërvalla, Lëvizjes Vetëvendosje i kushtoi 10 mijë euro.

Ajo gjatë fjalimit të saj tha se opozita “nuk dinë dhe nuk duan të qeverisin në Kosovë,” teksa kandidatin për kryeministër nga koalicioni për Kosovën Fituese Ramush Haradinaj e ka quajtur “hero të Çakorrit” dhe “gjeneral të vetëshpallur”.

Tomë Dodaj është dënuar nga Gjykata Themelore e Prishtinës me 5 vite burg dhe 5 mijë euro gjobë.

Dodaj është dënuar me pesë vjet burgim e 5 mijë euro gjobë, i cili akuzohet se ia kishte shitur Naim Murselit e Granit Plavës, armën me të cilën ishte kryer vrasja e Liridona Ademajt, në nëntor të vitit 2023.

Gjatë shqyrtimit fillestar më 31 janar, Prokuroria ka lexuar aktakuzën që rëndon ndaj katër të akuzuarve.

Aty thuhet se Naim Murseli kishte premtuar 30.000 kompensim për vrasjen e bashkëshortes së tij, Liridonës, dhe madje e kishte mbajtur me njërën dorë, që ajo të mos shmangte plumbin.

Lexoni edhe:

Naim Murseli deklarohet i pafajshëm për vrasjen e Liridona Ademajt

Ministri i Shëndetësisë, Arben Vitia, ka thënë se më 1 shkurt do të hyjë në fuqi lista zyrtare e çmimeve të produkteve medicinale.

Ai tha se përmes kësaj qytetarët do të kenë barna me çmime më të lira dhe çmime të njëjta.

Megjithatë, Vitia në konferencën për media pas mbledhjes së qeverisë të premten, tha se pret që në muajt e parë të ketë një rezistencë dhe një tronditje të lehtë të tregut farmaceutik, mirëpo nënvizoi se janë të vendosur mos të tërhiqen nga zbatimi i Ligjit për unifikimin e çmimit të produkteve medicinale.

“Më në fund i mundësohet qytetarëve të Kosovës që të kenë qasje të drejt dhe me çmime korrekte për barnat. Kanë qenë të njoftuar të gjithë akterët pa dallim dhe ligji do të fillojë të zbatohet. Të gjitha takimet që kemi pasur, jo vetëm me barnatore por edhe më herët gjatë përpilimit të ligjit dhe faza të tjera. Tani nga 1 shkurti kjo do të hyjë në fuqi ligji. Unë sot do të kem takim me Inspektoratin Farmaceutik dhe ftojë të gjitha subjektet që të zbatojnë ligjin, përkundër sfidave që mund t’i kenë në fillim. Ky është një ligj për qytetarët dhe është një ligj i drejt. Natyrisht ata që nuk e zbatojnë do të merren masat adekuate. Është një grup i kompanive të cilët s’kanë paraqitur barnat e caktuara për aplikim për çmimet e barnave të tyre sipas kërkesave ligjore. Ndaj tyre do të merren masat dhe sanksionet bazuar në ligjin aktual. Ky është një proces i pandalshëm dhe jemi të determinuar t’i shkojmë deri në fund”, theksoi Vitia.

Në anën tjetër, ministri i Financave, Punës dhe Transfereve, Hekuran Murati, tha se nuk e di nëse është pezulluar ndonjë mbështetje me vlerë financiare të lartë nga vendimi i Shteteve të Bashkuara të Amerikës për të ndaluar implementimin e programeve të asistencës ndërkombëtare.

Megjithatë, ai u shpreh optimist se pas rishqyrtimit apo rivlerësimeve të konstatohet se Kosova është një prej aleatëve më të mirë të ShBA-së.

“Nuk e di që ka ndonjë mbështetje voluminoze apo me vlerë financiare të lartë që do të krijojë ndonjë hendek. Por, gjithsesi ne do të vazhdojmë bashkëpunimin siç kemi bërë deri tani dhe shpresojmë që pas rishqyrtimit dhe rivlerësimit të konstatohet ajo çka ka qenë çdo herë se Kosova është një prej aleatëve më të mirë të ShBA-së”, theksoi Murati.

Politikani nga Danimarka Peter Sorensen i cili u zgjodh nga përfaqësuesja e lartë e BE-së për politikë të jashtme dhe siguri, Kaja Kallas, për ta zëvendësuar Mirosllav Lajçakun në këtë post nga nesër, më 1 shkurt do ta marr mandatin e tij.

Sorensen është konfirmuar përfundimisht emisar për dialogun Kosovë-Serbi nga ministrat e Jashtëm të Bashkimit Evropian.

Deri më tani këtë post e ka ushtruar emisari Miroslav Lajçak, i cili ditë më parë gjatë qëndrimit në Davos e kishte konfirmuar se është java e fundit e tij.

Lajçak po ashtu tha se dialogu është më vendimtar se kurrë në botën e sotme.

“Dialogu është më vendimtar se kurrë në botën e sotme. U takova gjithashtu me liderë nga Ballkani dhe mora pjesë në Dialogun tradicional të Diplomacisë për rajonin. Në ndërhyrjen time, theksova se BE-ja është serioze për zgjerimin e Bashkimit, por kjo nuk do të ndodhë si parazgjedhje dhe i kërkova rajonit të qëndrojë në kurs. Ndërsa filloj javën e fundit të gati pesë viteve të mia në rolin tim aktual, ditët në vijim do të fokusohen në informimet përfundimtare dhe procedurat e dorëzimit”, kishte shkruar Lajçak.

Lajçak do të pasohet nga diplomati Sorensen i cili ka përvojë të gjatë diplomatike në strukturat e BE-së.

Të zemëruar nga rritja e vazhdueshme e çmimeve, qytetarë të disa vendeve të Ballkanit Perëndimor u ftuan t’i bojkotojnë më 31 janar blerjet në disa dyqane të mëdha ushqimore.

Nisma u ndërmor fillimisht në Kroaci, më 24 janar, dhe rezultoi me rënie prej më shumë se 50% të shitjeve në të gjithë vendin.

Pas thirrjes së përfaqësuesve të konsumatorëve, kroatët nisën më 30 janar edhe një aksion të ngjashëm, por që do të zgjasë një javë, trasnsmeton REL.

Në shënjestër të bojkotimit janë disa zinxhirë të mëdhenj tregtarë, për shkak të dyshimeve se çmimet e tyre nuk përputhen me ato në vendet e tjera të BE-së.

Thirrje për bojkotime të ngjashme – kryesisht nëpër mediat sociale – u bënë edhe në vende të tjera të Ballkanit Perëndimor.

Përgjigje pozitive ato morën në Serbi, Maqedoni të Veriut, në Mal të Zi, në Bosnje e Hercegovinë dhe në Slloveni.

Kjo, edhe përkundër faktit se çmimet e ushqimeve në Kosovë kanë shkuar duke u rritur, viteve të fundit.

Maqedoni e Veriut: “Çmimet janë shumë të larta”

Në Maqedoninë e Veriut, Sasho Ristoski thotë se rritja e çmimeve po rëndon jetesën, veçanërisht për pensionistët dhe familjet me të ardhura të ulëta.

“Po, po, kam dëgjuar për bojkotimin dhe do ta mbështes, sepse çmimet janë shumë të larta. Me këto çmime që kanë vënë marketet, nuk mund të mbijetosh”, thotë ky banor i Shkupit për REL.

Sipas tij, produktet bazë, të cilat kërkohen më shumë, janë ndër më të shtrenjtat.

“Thuajse të gjitha produktet e mishit, qumështi, vaji, sheqeri… Ne me të ardhura më të ulëta, mezi arrijmë ta përballojmë muajin”, shton pensionisti.

“Do t’i bojkotoj marketet nëse nuk kam para, por nëse më duhet bukë, do të shkoj ta blej”, thotë Lile Silanovska, po ashtu nga Shkupi.

Sipas analizave të Rrjetit të Biznesit, shtatë zinxhirët më të mëdhenj të tregut në Maqedoninë e Veriut gjeneruan të ardhura prej 930 milionë eurosh gjatë vitit 2023.

Në krye të listës është Vero, i cili regjistroi fitime mbi 10 milionë euro – një rritje prej gati 13% krahasuar me vitin paraprak. Në vend të dytë u rendit Kam Market me fitime neto prej 7.3 milionë eurosh. Në mesin e kompanive më fitimprurëse është edhe Kipper, me 5.5 milionë euro fitim, i ndjekur nga Stokomak me një fitim prej 4 milionë eurosh.

Kryeministri i Maqedonisë së Veriut, Hristijan Mickoski, paralajmëroi më 29 janar kontrolle të rrepta dhe sanksione për supermarketet që shkelin Ligjin për çmimet e produkteve.

“Gjatë konferencës për shtyp u përmendën dy zinxhirë marketesh, që mund të luajnë lojëra me ligjet dhe procedurat. Ata do t’i nënshtrohen një kontrolli rigoroz”, tha Mickoski.

Autoritetet, gjithashtu, shprehën mbështetje për bojkotimin e dyqaneve të mëdha, duke e cilësuar atë si një sinjal të qartë të pakënaqësisë së qytetarëve me situatën ekonomike në vend.

“Ne i mbështesim qytetarët në bojkotim, mbi të gjitha të tregjeve që, viteve të fundit, kanë rritur jashtëzakonisht çmimet e produkteve pa asnjë logjikë ekonomike”, tha ministri i Ekonomisë dhe Punës i Maqedonisë së Veriut, Besar Durmishi.

“Ne, si Ministri e Ekonomisë dhe Punës, kemi miratuar masa për të mbrojtur standardin e jetesës së qytetarëve, duke ngrirë marzhën e produkteve ushqimore bazë, në mënyrë që të mos çojë në rritje enorme të çmimeve”, shtoi ai.

Shumë qytetarë, organizata joqeveritare dhe të punës edhe në Mal të Zi bënë thirrje për bojkotimin e rrjeteve të mëdha tregtare, më 31 janar, për shkak të, siç thanë, çmimeve jashtëzakonisht të larta të ushqimeve bazë.

Komisioni për Punët e Jashtme i Parlamentit Evropian miratoi Draft Rezolutën e PE-së për Zbatimin e Politikës së Përbashkët të Jashtme dhe të Sigurisë të BE-së, ku u bë thirrje për përafrimin e kandidatëve për anëtarësim me këtë politikë dhe u theksua se zgjerimi i BE-së është një investimi gjeostrategjik.

Në draft-raportin e autorizuar nga kryetari i këtij Komisioni, David McAllister, për të cilin parlamenti ende nuk ka shprehur mendimin e tij, ai mirëpret “vazhdimin e suksesshëm të dialogut” për CSDP midis BE-së dhe partnerëve të saj në Ballkanin Perëndimor.

Po ashtu theksohet rëndësia e partneriteteve për paqen dhe sigurinë, si dhe nevoja për reforma në aspektin e shtetit të së drejtës, të drejtave themelore dhe administratës publike, si dhe përafrimi me Kodin Civil, duke përfshirë sanksionet.

Ndërkaq, kur është fjala për dialogun ndërmjet Kosovës dhe Serbisë, progresi në atë proces është i mirëpritur, veçanërisht në fushën e lirisë së lëvizjes dhe energjisë, por shprehet keqardhje për mungesën e progresit në zbatimin e rrugës për normalizimin e marrëdhënieve dhe bëhet thirrje për investimin e përpjekjeve dhe kapaciteteve në normalizimin e marrëdhënieve.

Në amendamentet e miratuara, Përfaqësuesja e Lartë e BE-së për Punë të Jashtme dhe Politikë të Sigurisë i kërkohet të kapërcejë ngërçin dhe t’i japë një vrull të ri dialogut, si dhe të hartojë një qasje të re, novatore dhe të balancuar në ndërmjetësimin mes dy palëve.

Kosova dhe Serbia janë të ftuar të angazhohen në dialog për të arritur një marrëveshje gjithëpërfshirëse, ligjërisht të detyrueshme për normalizimin e marrëdhënieve, “të bazuar në njohjen reciproke, në përputhje me të drejtën ndërkombëtare dhe pa vonesa të mëtejshme”, ndërsa PE merr përsipër të punojë ngushtë me të dërguarin special të BE-së në largim dhe atë në ardhje për dialogun ndërmjet Kosovës dhe Serbisë.

Amendamentet dënojnë sulmet në infrastrukturën kritike pranë Zubin Potokut dhe sulmin në Banjskë në vitin 2023 dhe bëjnë thirrje që autorët e këtyre sulmeve të dalin para drejtësisë.