Author: G.O.

Sekretari amerikan i Shtetit, Marko Rubio, ka thënë se veprimet e presidentit të Republikës Sërpska (RS), Millorad Dodik, përbëjnë kërcënim për sigurinë dhe stabilitetin e Bosnje e Hercegovinës, si dhe i minojnë institucionet shtetërore të saj.

Ai bëri thirrje për liderët atje që të dialogojnë, ndërsa nga partnerët në rajon kërkoi që ta kundërshtojnë këtë sjellje.

“Qeveria jonë u bën thirrje liderëve politikë në Bosnje e Hercegovinë për t’u angazhuar në dialog konstruktiv dhe të përgjegjshëm. Ne u bëjmë thirrje partnerëve tanë në rajon të bashkohen me ne për ta kundërshtuar këtë sjellje të rrezikshme dhe përshkallëzuese”, shkroi Rubio.

Dodiku i dekretoi më 5 mars ligjet e miratuara nga Kuvendi i Republikës Sërpska – entiteti serb i Bosnjës – të cilat ndalojnë punën e Gjykatës, Prokurorisë, Agjencisë Shtetërore të Hetimeve (SIPA) si dhe Këshillit të Lartë Gjyqësor e Prokurorial të Bosnjës në territorin e këtij entiteti.

Më 7 mars, Gjykata Kushtetuese e Bosnje e Hercegovinës vendosi masë të përkohshme dhe ndaloi zbatimin e këtyre ligjeve të entitetit serb.

Gjykata, Prokuroria e Bosnjës dhe SIPA janë formuar në bazë të ligjeve të miratuara nga Kuvendi i Bosnje dhe Hercegovinës dhe ato ligje janë konfirmuar nga Dhoma shtetërore e Popullit. Për t’u zhbërë, sipas Kushtetutës së shtetit, duhet që votimi i Kuvendit të Bosnje e Hercegovinës.

Kuvendi i Republikës Sërpska miratoi ligjet më 27 shkurt, pasi Gjykata e Bosnjës e dënoi Dodikun me një vit burgim dhe ia ndaloi ushtrimin e detyrës së presidentit të RS-së për gjashtë vjet.

Presidentja e vendit, Vjosa Osmani ka uruar sot të gjitha gratë që shërbejnë në uniformë dhe kanë përgjegjësi të mëdha për shoqërinë, raporton Ekonomia Online.

“Me gratë që mbrojnë dhe që shërbejnë, në Ditën Ndërkombëtare të Gruas. Përkushtimi, profesionalizmi dhe sakrifica e grave police janë shembull frymëzimi për të gjithë ne”, ka thënë Osmani.

Presidentja ka thënë se uron veçanërisht gratë që mbajnë mbi supe përgjegjësi të mëdha për shoqërinë tonë.

“Në këtë ditë, riafirmojmë angazhimin tonë për mbështetjen dhe fuqizimin e grave në çdo sektor, veçanërisht atyre që mbajnë mbi supe përgjegjësi të mëdha për shoqërinë tonë.  Gëzuar 8 Marsin për të gjitha gratë në uniformë të cilat shërbejnë me nder, krenari dhe guxim!”, ka shkruar Osmani.

Me moton “Marshojmë për njana-tjetrën”, Kolektivi “Marshojmë S’Festojmë”, ka filluar marshin tradicional që shënon Ditën e Gruas në sheshi “Zahir Pajaziti”, në Prishtinë.

Dhjetëra gra, në mes tyre edhe disa burra me pankarta në duar kanë filluar ecjen e tyre, duke kërkuar liri dhe barazi për të drejtat e grave.

“Grua”, “Nata s’ka ispat”, “Jetë”, “Liri”, “Drejtësia e vonuar është padrejtësi”, “Punët e shtëpisë nuk janë punët e grave”, janë mbishkrimet që gratë dhe burrat po mbajnë në duart e tyre, në marshin tradicional.

Gjithashtu, ata po fishkëllojnë si shenjë për të protestuar për të drejtat e grave. Në sheshin “Zahir Pajaziti” po qëndrojnë edhe pjesëtarë të Policisë së Kosovës.

Filatelia e Postës së Kosovës, me rastin e shënimit të Ditës Ndërkombëtare të Gruas, përmes pullës postare, ka nderuar figurën e veprimtares së shquar për të drejtat e njeriut dhe ish-ministres së Drejtësisë, Nekibe Kelmendi.

Nekibe Kelmendi (1944–2011) ishte një juriste dhe politikane e përkushtuar, e cila gjithë jetën e saj ia kushtoi mbrojtjes së të drejtave të njeriut. E njohur si një nga zërat më të fuqishëm në mbrojtjen e viktimave të dhunës, ajo la një gjurmë të pashlyeshme në historinë e Kosovës.

Pas luftës, si ministre e Drejtësisë, dha një kontribut të jashtëzakonshëm në ndërtimin e institucioneve të Republikës së Kosovës, duke punuar pa u lodhur për forcimin e sistemit të drejtësisë dhe garantimin e të drejtave të qytetarëve.

Në vitin 1999, përjetoi njërën nga tragjeditë më të rënda familjare, kur forcat serbe rrëmbyen dhe ekzekutuan bashkëshortin dhe dy djemtë e saj.

Megjithatë, ajo e shndërroi dhembjen në forcë, duke vazhduar me përkushtim të palëkundur mbrojtjen e viktimave të dhunës dhe ndërtimin e një shoqërie më të drejtë.

Jeta dhe vepra e Nekibe Kelmendit mbeten një frymëzim për brezat e rinj, si një simbol i forcës, guximit dhe përkushtimit për drejtësi.

“Ky emision përbëhet nga pulla postare me nominale €1.30, si dhe Zarfi i Ditës së Parë, ndërkaq në dispozicion të qytetarëve do të jetë nga sot deri në konsum të plotë”, njofton Posta e Kosovës.

Sot, në Klinikën e Kirurgjisë Vaskulare në QKUK, për herë të parë do të bëhet stentimi i arterieve karotide.

Kjo arritje është bërë e mundshme falë bashkëpunimit qe ka Klinika e Kirurgjisë Vaskulare me doktor Dimitrios Nikas nga Universiteti i Janinës në Greqi.

Mediat mund të marrin pamje nga salla e operacionit në ora 11:30, ndërsa në 14:00 do të ketë deklarim për media.

Policia ka arrestuar një person në Ferizaj, pasi i njëjti dyshohet se ka ngacmuar seksualisht dy djem të mitur.

Rasti ka ndodhur të premten, rreth orës 15:00.

“Është arrestuar i dyshuari mashkull kosovar, nën dyshimin se i njëjti i ka ngacmuar seksualisht dy viktimat meshkuj kosovarë-të mitur.

Palët janë intervistuar dhe me vendim të prokurorit, i dyshuari është dërguar në mbajte, rasti nën hetime.

Rusia i është kundërpërgjigjur kërcënimit të Donald Trump për më shumë sanksione ndaj tyre duke thënë se asgjë nuk do ta ndalë Moskën të arrijë qëllimet e saj në Ukrainë.

Trump reagoi pas sulmeve që lanë 5 persona të vrarë dhe mbi 18 të tjerë të plagosur në Ukrainë dhe shkroi se palët duhet të ulen në tryezën e negociatave përpara se të jetë tepër vonë.

Zëdhënësja e ministrisë së Jashtme ruse, Maria Zakharova në një prononcim për CNN u shpreh se Shtetet e Bashkuara kanë qenë mbështetësi më i madh i Kievit në këtë luftë dhe e kanë kuptuar se Ukraina nuk mund ta fitojë këtë luftë në fushëbetejë.

Zakharova u shpreh se Rusia ka duruar kaq shumë sanksione dhe se asgjë nuk do ta ndalë atë.

Presidenti Amerikan i cili vijon këmbënguljen e tij për të mbyllur sa më parë luftën në Europën Lindore u shpreh këtë të premte nga Zyra Ovale se për të është e më e lehtë të komunikojë me Rusinë për fundin e luftës sesa me Ukrainën.

Trump shtoi se është Moska ajo që ka kartat e kësaj lufte në duar ndërsa deklaroi se beson që Putin dëshiron paqe.

Sot në Ditën e Gruas në Prishtinë do të mbahet marshi tradicional.

Kolektivi “Marshojmë s’festojmë” ka njoftuar se marshi do të mbahet me fillim nga ora 12:00.

Nisja do të bëhet nga sheshi “Zahir Pajaziti” për të vazhduar deri te Sheshi “Skënderbeu”.

“Marshojmë për njëra-tjetrën” është motoja e kësaj proteste.