Në raportin 24-orësh të policisë thuhet se i ndjeri ishte sigurim fizik.
Me vendim të prokurorit, trupi i pa jetë i viktimës është dërguar në Institutin Mjekësor Ligjor për obduksion.
Transformimi i Forcës së Sigurisë së Kosovës në ushtri me kapacitete të plota është duke u bërë më shpejt seç ka qenë e planifikuar, sipas ministrit të Mbrojtjes, Ejup Maqedonci.
Ministri konfirmon se numri i pjesëtarëve të FSK-së tashmë ka kaluar 4.300 dhe se, brenda vitit të ardhshëm, pritet të arrijë mbi 5.000.
FSK-ja është në proces të transformimit në ushtri që nga viti 2018.
Në fund të tranzicionit, më 2028, ajo parashihet t’i ketë mbi 7.500 pjesëtarë – prej tyre 5.000 aktivë, të tjerët rezervistë.
“Objektivat tona po realizohen më shpejt seç ka qenë e planifikuar fillimisht – gjë që tregon përkushtimin tonë ndaj zhvillimit të FSK-së”, thotë Maqedonci për Radio Evropa e Lirë.
Sipas tij, forca ushtarake është duke u ngritur sipas standardeve të NATO-s – aleancës 32-anëtarëshe, ku Kosova mëton të anëtarësohet.
Ai thotë se pjesëtarët e saj janë duke u trajnuar në akademitë ushtarake të NATO-s dhe duke zbatuar doktrinën e saj.
Për më tepër, shton Maqedonci, “të gjitha blerjet tona ushtarake realizohen nga vendet anëtare të NATO-s”.
“Ky është një standard, i cili garanton pajisje cilësore dhe përputhshmëri të plotë me sistemet e aleancës”, thekson ai.
Sa i përket mbrojtjes dhe sigurisë kombëtare, ministri vlerëson se Kosova ka kapacitete shumë më të avancuara, krahasuar me disa vite më parë.
Për shkak të ndjeshmërisë së informacionit, ai nuk jep detaje se çka prej armatimit posedon vendi, por, mes tjerash, përmend “një flotë të dronëve Bayraktar” dhe “sisteme të tjera të fluturakeve pa pilotë”.
“Ne kemi prokuruar sisteme të ndryshme nga vende të ndryshme dhe disa prej tyre janë të përafërta me Javelin-in”, thotë Maqedonci, duke iu referuar sistemit kundërajror amerikan, i cili ka aftësi të avancuara kundër mjeteve të blinduara.
Vitin e kaluar, Kosova ka bërë kërkesë për blerjen e 200 kundërajrorëve të tillë dhe Maqedonci thotë se, aktualisht, është duke u bërë pagesa e tyre.
“Departamenti i Mbrojtjes i SHBA-së i ka zbatuar të gjitha procedurat e prokurimit dhe ne jemi tashmë në fazën e ekzekutimit të pagesave. Gjatë këtij viti, pritet të arrijë një sasi e konsiderueshme e këtyre raketave”, thotë ministri Maqedonci.
Shtetet e Bashkuara e kanë mbështetur nga fillimi transformimin e FSK-së në ushtri, por jo edhe NATO-ja, e cila insiston që FSK-ja t’u përmbahet detyrave të saj fillestare, si: reagimi ndaj krizave apo mbrojtja civile.
Në këtë organizatë, ku vendimet merren në mënyrë unanime, janë katër vende që nuk e njohin pavarësinë e Kosovës: Greqia, Spanja, Sllovakia dhe Rumania.
Por, Maqedonci thotë se “shumica e vendeve anëtare të NATO-s e njohin FSK-në me mandatin e saj ushtarak”.
“Ne po punojmë që në të ardhmen e afërt, NATO-ja t’i njohë ndryshimet tona ligjore – çfarë do të mundësonte edhe një përfshirje më të madhe të FSK-së në operacionet e përbashkëta të NATO-s”, thotë ai.
“Për ne është thelbësore që SHBA-ja – si partneri ynë kryesor strategjik – së bashku me vendet kryesore të NATO-s, të kontribuojnë në ndërtimin dhe forcimin e kapaciteteve tona mbrojtëse”, shton ministri kosovar i Mbrojtjes.
Praninë e misionit paqeruajtës të NATO-s, KFOR, në Kosovë, ai e përshkruan si një faktor kyç në “zhvillimin e kapaciteteve mbrojtëse të vendit”.
“Ne do të vazhdojmë të bashkëpunojmë dhe t’i bashkërendojmë veprimet tona me KFOR-in dhe NATO-n për të siguruar zhvillimin e duhur të sektorit të mbrojtjes”, thekson ai.
Në vazhdën e zhvillimeve të fundit gjeopolitike, ministri thotë se për katër vjetët e ardhshëm, parashikohet një buxhet prej mbi 1 miliard eurosh për mbrojtjen e Kosovës.
Edhe në katër vjetët e kaluar, buxheti për këtë sektor ka shkuar duke u rritur – nga 67.3 milionë euro në vitin 2021, në 207.8 milionë euro këtë vit.
Presidenti i ShBA-së, Donald Trump, i ka vlerësuar si “të mira dhe produktive” bisedimet e zhvilluara me presidentin rus, Vladimir Putin mbi marrëveshjen e armëpushimit të propozuar nga ShBA-ja në Ukrainë.
Kjo vjen pasi Putini dhe i dërguari i ShBA-së, Steve Witkoff, u takuan në Moskë të enjten në mbrëmje, pas së cilës Kremlini tha se ndante “optimizmin e kujdesshëm” të SHBA-së mbi një proces paqeje.
Trump tha në një postim të Truth Social se bisedimet dhanë “një shans shumë të mirë që kjo luftë e tmerrshme, e përgjakshme më në fund mund të marrë fund”.
Presidenti ukrainas, Volodymyr Zelensky, megjithatë, akuzoi Putinin se po përpiqet të zvarritë bisedimet për të vazhduar luftën, ndërsa kryeministri britanik Keir Starmer tha se presidenti rus nuk mund të lejohet të “luaj lojëra” me propozimet e armëpushimit.
Në fillim të kësaj jave, Ukraina pranoi marrëveshjen e armëpushimit të propozuar nga ShBA-ja, për të cilën Rusia ende nuk ka rënë dakord.
Të enjten, Putin kishte thënë se ideja e një armëpushimi ishte “e drejtë dhe ne e mbështesim atë… por ka nuanca” dhe ai vendosi një sërë kushtesh të vështira për paqen, një përgjigje e quajtur “manipuluese” nga Zelensky, shkruan BBC.
Presidenti serb, Aleksandar Vuçiq, mbrëmë iu drejtua publikut një ditë para protestës së madhe të paralajmëruar për sot në Beograd në lidhje me planet e supozuara “për të provokuar konflikt gjatë demonstratave”.
Vuçiq tha se shteti serb do të sigurojë burime që, siç ka theksuar ai, tubimi i paregjistruar të vazhdojë në mënyrë paqësore.
Sipas tij, kushdo që sulmon pjesëmarrësit në demonstrata do të arrestohet, si dhe kushdo që sulmon dikë tjetër apo ndonjë institucion, siç shkruan mediumi publik serb “RTS”.
“U bëj thirrje të gjithë qytetarëve të Serbisë që të qëndrojnë të qetë. U kërkoj prindërve, pasi kemi shumë indikacione, shumë grupe që paralajmërojnë dhunë, të mos i nxjerrin fëmijët në rrugë nëse nuk duhet. Po flas vetëm për fëmijët, që askush të mos thotë se po i pengojmë të tjerët të vijnë. Dhe sigurisht që do të sigurohemi që të garantojmë paqen, sigurinë për të gjithë”, tha Vuçiq në fjalimin e tij drejtuar qytetarëve.
Ai paralajmëroi dhe kërkoi nga ata që mendojnë se po sulmojnë ata që mendojnë ndryshe, veçanërisht fëmijët në parkun Pionieri, veçanërisht institucionet, “të mos e bëjnë këtë”.
“Jo pse kam frikë se mos bëjnë diçka, as më së paku, dhe këtë po jua them një ditë më parë. Këtë po ju kërkoj për hir tuaj, sepse nesër do të më luteni për falje. Nuk do të ketë falje, atë gabim të madh e kam bërë një herë”, tha ai.
Mijëra qytetarë dolën në rrugët e Beogradit mbrëmjen e së premtes për t’i mirëpritur studentët që po mbërrijnë në kryeqytetin e Serbisë në këmbë nga skajet e largëta të Serbisë.
Ndërkaq, një kundër-protestë është organizuar në Parkun e Pionierëve në mes të Presidencës së Serbisë dhe Kuvendit të Serbisë, ku janë vendosur në kampe një grup tjetër studentësh që kundërshtojnë bllokadat e fakulteteve. Ata kanë vendosur traktorë përreth tyre.
Për këtë, Vuçiq iu tha se ata duhet “të përpiqen të kuptojnë se ne duhet të jetojmë me njëri-tjetrin, pavarësisht nga mendimet e ndryshme”.
Protestat në Beograd shpërthyen pas incidentit në stacionin hekurudhor të Novi Sadit më 1 nëntor 2024 ku humbën jetën 15 njerëz.
Studentët në këto protesta po kërkojnë përgjegjësi penale dhe politike për vdekjen e tyre dhe po protestojnë kundër korrupsionit.
Pak orë pasi ZRRE-ja njoftoi se ka propozuar shtrenjtimin e rrymës për 15 për qind duke filluar nga muaji prill, ka nisur një fushatë kundër këtij propozimi.
“Asnjecentmeshume” është slogani i kësaj fushate që do të nisë për të kundërshtuar shtrenjtimin e rrymës.
Iniciatori i kësaj fushate është Luan Hasanaj, i cili tha se shumica e qytetarëve nuk mund të përballojnë rritjen e çmimeve.
“Miq, po e nisim një fushatë #ascnjecentmeshume për të e kundërshtuar propopzimin e ZRRE-së për shtrenjtimin e energjisë elektrike. Arsyet janë të bollshme, secili prej nesh i dinë. Shumica e qytetarëve të Kosovës nuk mund të e përballojnë rritjen e çmimeve”, ka thënë Hasanaj.
Vitin e kaluar, ZRRE-ja e uli çmimin për konsumatorët komercialë dhe industrialë për 3 për qind. Por, një vit më herët, më 2023, tarifat u rritën për 15 për qind për të gjitha kategoritë e konsumatorëve.
Aktualisht, për konsumatorët që shpenzojnë deri në 800 kilovatë në orë brenda një muaji, çmimi i rrymës gjatë ditës është 7.79 centë për kilovat, ndërsa për ata që shpenzojnë më shumë se 800 kilovatë, pjesa mbi këtë u llogaritet me çmim prej 14.45 centësh.
Nga ora 22:00 deri në 7:00 të mëngjesit, çmimi për kilovat është 3.34 centë për ata që shpenzojnë deri në 800 kilovatë dhe 6.81 centë për ata që shpenzojnë më shumë.
Komisioni Qendror i Zgjedhjeve pritet që sot t’i shpall rezultatet përfundimtare, pasi deri sot ato ishin preliminare.
Gjykata Supreme ka marrë vendimin për ankesën e fundit të parashtruar nga Partia Demokratike e Ashkalinjëve (PDAK)-LPB.
Supremja ka refuzuar ankesën e PDAK-së lidhur me manipulimet e votave me postë, duke e quajtur edhe si të “pathemeltë”.
Pas që kjo ishte ankesa e fundit në Supreme, Komisionit Qendror të Zgjedhjeve, iu hap rruga për t’i shpallur rezultatet përfundimtare të zgjedhjeve të 9 shkurtit 2025.
Në një njoftim të lëshuar nga KQZ, u bë e ditur se sot do ta bëjë shpalljen e rezultateve përfundimtare të zgjedhjeve të 9 shkurtit.
Kështu ka konfirmuar zëdhënësi i KQZ-së, Valmir Elezi.
“Mund t’iu konfirmoj se të shtunën, më 15 mars 2025, Komisioni Qendror i Zgjedhjeve do të mbajë mbledhjen e radhës dhe në rend dite është shpallja e rezultateve përfundimtare të Zgjedhjeve për Kuvendin e Republikës së Kosovës, 9 shkurt 2025” – ka thënë ai.
PËRGATITI: DRITON SADIKU
Lirinë e privuar e kërkojnë me falje.
22 të burgosur që vuajnë dënimet në burgjet e Kosovës, kanë kërkuar amnisti nga presidentja që nga janari e deri tash.
Ani pse presidentja Vjosa Osmani, e shfrytëzoi fare pak këtë të drejtë kushtetuese deri tash, nga Shërbimi Korrektuese, presin që presidenca të jetë më aktive, për shumë arsye.
“Po presim që të ketë rezultate pozitive sepse në rastet kur personat kanë sjellje pozitive, kanë marrë pjesë në programe rehabilituese, janë shfrytëzues të vikendit, janë barrë për shërbimin korrektues”, deklaroi drejtori i përgjithshëm i ShKK-së, Ismail Dibrani.
Hezitimin e presidentes për t’i falë disa të burgosur, thonë se nuk po kuptojnë, as nga Këshilli për Mbrojtjen e të Drejtave dhe Lirive të Njeriut.
“Nuk e shoh të logjikshme që e themelon vetë komisionin, komisioni ia dërgon propozimet, ndërkaq nuk i beson vlerësimit të komisionit. Në anën tjetër është e drejtë e të burgosurve që të presin mëshirë nga shteti”, tha Behxhet Shala nga KMDLNj.
Aktualisht në të gjitha burgjet apo qendrat korrektuese dënimin e vuajnë 1720 persona por nga KMDLNj-ja thonë se shumica prej tyre meritojnë lirimin.
Sidoqoftë për një të burgosur shteti paguan mbi 800 euro në baza mujore, teksa për një vit, të burgosurit shtetit i kushtojnë afër 1.4 milion euro.
PËRGATITI:DIELLËZA KRASNIQI
Nga 206 premtimet e fushatës zgjedhore, Përparim Rama dhe kabineti i tij udhëheqës në Prishtinën, nuk i kanë nisur ende 75 prej tyre.
Në premtimet e tij të bëra 4 vjet më parë, ishte edhe ndërtimi I një shkolle në lagjen Kodra e Trimave. Mirëpo, as për këtë projekt nuk është bërë asnjë lëvizje.
Në listë është edhe një tjetër projekt infrastrukturor, në një tjetër zonë të kryeqytetit.
Ndërtimi I rrugës nga gjimnazi Sami Frasheri ne drejtim te tregut te gjelbert, projekt ky që parashihte përfshirjen e rrjetit të ujësjellësit atë të kanalizimit si dhe infrastrukturën elektrike edhe telekomunikuese nuk ka filluar ende.
Komuna e Prishtinës ka vendosur të mos kthejë përgjigje për ATV-në, të premten, lidhur me këto projekte.
Ndërsa opozita ka akuza për mënyrën e qeverisjes së Ramës.
“Ne bëjmë thirrje kryetarit mos te ankohet mos te gjunjë fajin te opozita po le te punoj edhe pse ska ma kohe me ni fjale qeverisja Rama nuk është përparim por është prapakthim’’, tha asamblisti në LV, Besart Krasniqi.
Disa qytetarë thonë se do të duhej që këto punë të kryheshin më shpejt.
‘’50 me 50 as qe ka ba pune të mdhaja as t vogla , nuk është punu qysh duhet për popull ma tepër ka punu për interesa te veti se për popull’’, deklaroi një qytetar.
‘’Na sjena t kënaqtë as me ni qeveri deri tash as me Perparimin aj mashum I ka ba do bllokada do pune t vogla I ka kry po nuk shihen me sy , jo sa ka premtu ky ka pas premtime t mdhaja’’, tha një tjetër qytetar.
Në anën tjetër, pushteti në Prishtinë në vazhdimësi është ankuar ndaj atij qendror, që udhëhiqet nga Lëvizja Vetëvendosje, për pengesa në realizim të projekteve.
Një përplasje e tillë ndodhi edhe së fundmi, kur u ndaluan punimet në sheshin “Xhorxh Bush”, nga Inspektorati i Trashëgimisë Kulturore.
PËRGATITI: ARIAN HAJDARAJ
Që nga ri-funksionalizimi në platformën e-prokurimi dominojnë procedurat e nisura nga komunat.
Të mërkurën e 14 marsit, komuna e Podujevës, publikoi njoftimin për kontratë, për ndërtimin e pishinës gjysmë-olimpike në Podujevë, me vlerë prej 4 milionë euro.
Një ditë më herët, komuna e Ferizajt po ashtu njoftoi se ka nisur procedurat e prokurimit, për ndërtimin e qendrës multifunksionale, me vlerë prej 3.3 milionë euro.
Ndërsa, Gjakova nisi procedurën për rikonstruktimin e një rruge, në vlerë prej 640 mijë euro. Këto në fakt ishin vetëm disa nga projektet me vlerë më të madhe, derisa janë dhjetëra të tjera me shuma më të vogla.
Fillimi I procedurave për projektet që konsiderohen me rëndësi, sipas njohësve të punës së nivelit lokal, tregojnë joseriozitet në raport me besimin e qytetarëve.
“Është vërejtur se autoritete kontraktuese/komunat kanë rritur numrin e procedurave të prokurimit. Kjo është shqetësuese për shoqërinë civile, sepse ata kur zhvillojnë projekte të rëndësishme në fund të mandatit, tregon qasjen e tyre, rreth përgatitjen e tyre për të zhvilluar një fushatë në vititn e fundit të mandatit”, tha Kenan Gashi nga AVONET.
Po ashtu fillimi i projekteve vetëm disa muaj para përfundimit të mandatit, vlerësohet se krijon pasiguri nëse do të përfundohen.
“Kto praktika janë potencial edhe për një proces të padrejtë, që rrezikon cilësinë e projekteve. Këto planifikime shpeshherë nuk përkojnë me kërkesat e qytetarëve”, deklaroi tutje Gashi.
Zgjedhjet komunale do të zhvillohen në nëntor të këtij viti.
PËRGATITI: SARA MULLIQI
Qe më shumë se një muaj, asnjë pikë uji nuk rrodhi nga ujësjellësi në fshatin Cërnillë të Ferizajt.
Sikur familja Morana, edhe të tjerat po duhet të gjejnë tjera alternativa që të furnizohen.
“Marrim ujë nëpër markete për pije. Për pastrim si më përpara me hidrofora e kësi sende… Ende e kemi problem për ujë sepse s’kemi ujë, vetëm përmes bunarëve, por nuk është i pastër për pije”, deklaroi Naim Morana, banor i Cënillës.
Kryetari i fshatit, Agon Zhinipotoku, e cilëson alarmante këtë gjendje, për të cilën ankohet se institucionet nuk kanë gjetur zgjidhje.
“Puna e ujit të pijes nuk është aq problem, se çdo ditë dikush qarkullon me veturë në qytet, mirëpo problemi që njerëzit kanë bagëti, kanë pastrim të shtëpive, rrugëve të gjitha që janë këtu, domethënë është një gjendje tejet alarmante me mbet një fshat pa ujë”, tha Zhinipotoku.
Komuna e Ferizajt thotë se nuk ka kompetencë në këtë çështje, meqë punët e veta i ka kryer para 11 vjetësh.
“Ajo çka ka qenë në domenën e Komunës së Ferizajit sa i përket problematikës në fjalë dhe investimit në fshatin Cërnillë, mund të themi në vitin 2012-2013 vetëm rrjeti i ujësjellësit është përfunduar sa i përket këtij lokaliteti”, deklaroi Selim Marevci zëdhënës në Komunën e Ferizajt.
Ndërkaq Kompania Rajonale e Ujësjellësit “Bifurkacioni” arsyetohet se janë në proces të prokurimit për blerjen e një pompe të re të ujit për Cërnillën.
“Për ta rritur kapacitetin e ujit ne kemi hapur një pus (bunar) të ri dhe jemi munduar të funksionalizojmë duke vendosur një pompë, mirëpo nuk ka qenë e përshtatshme për këtë pus. Tani jemi në proces të prokurimit për blerjen e një pompe tjetër adekuate.”, tha Valdet Syla, menaxher operativ KRU“Bifurkacioni”
Mirëpo banorët duan zgjidhje të shpejtë, sepse thonë se kjo periudhë një muaj pa ujë ua ka vështirësuar jetën.