Author: G.O.

Në seancën e mbajtur këtë të premte në Gjykatën Themelore në Prishtinë u dëgjua fjala përfundimtare në rastin kundër ish-gardianit Dragisha Milenkoviq, i akuzuar për krime lufte kundër popullsisë gjatë luftës së fundit në Kosovë.

Sipas aktakuzës, Milenkoviq, në cilësinë e gardianit në burgjet e Prishtinës dhe Lipjanit, ka torturuar në mënyrë çnjerëzore të burgosurit, raporton “Betimi për Drejtësi”.

Prokurori i rastit, Atdhe Dema, deklaroi se Prokuroria Speciale ka vërtetuar plotësisht fajësinë dhe përgjegjësinë e të akuzuarit.

Ai theksoi se gjatë shqyrtimit gjyqësor janë dëgjuar dëshmitarë, shumica e të cilëve kanë deklaruar se “ky është ai Dragisha që na ka maltretuar, qoftë psikologjikisht, qoftë fizikisht.”

“I njëjti me dashje i ka kryer këto veprime për të cilat akuzohet, sepse nuk janë veprime që mund të kryhen pa dashje. Prandaj, janë plotësuar të gjitha kushtet që ai të dënohet sipas ligjit”, tha prokurori Dema.

Ai i propozi gjykatës ta shpallë të akuzuarin fajtor dhe ta dënojë sipas ligjit.

Për sa i përket rrethanave lehtësuese dhe rënduese, Dema tha se “marrë parasysh mënyrën e vrazhdë dhe vendosmërinë me të cilën është kryer vepra penale, nuk ka rrethana lehtësuese që mund të merren parasysh.”

Mbrojtësja e të akuzuarit, avokatja Jovana Filipovic, deklaroi se në këtë proces mungojnë provat materiale dhe se as akuza dhe as gjykimi nuk mund të qëndrojnë pa to.

“Ne kemi pasur prova që kemi dorëzuar, por ato janë shpallur të paligjshme për arsye politike e jo juridike”, tha avokatja Filipovic.

Sipas saj, në asnjë mënyrë nuk është provuar se Dragisha Milenkoviq ka kryer veprën penale për të cilën akuzohet.

Avokati Djean Vasiq tha se, përveç dëshmitarëve të palës së dëmtuar, në këtë proces është dëgjuar edhe i mbrojturi i tij, Dragisha Milenkoviq, i cili ka dhënë një pasqyrë të qartë të ngjarjeve në burgun e qarkut të Prishtinës.

“Të burgosurit nuk janë maltretuar nga gardianët e burgut, por nga pjesëtarët e sigurimit shtetëror”, tha Vasiq, duke mbështetur propozimin e koleges së tij, avokates Jovana Filipovic, për një aktgjykim lirues.

Në të njëjtën linjë ishte edhe avokati Zivojin Jokanovic, i cili deklaroi se pajtohet me kolegët e tij dhe kërkoi një aktgjykim lirues për Milenkoviqin.

Në fjalën e tij, i akuzuari Dragisha Milenkoviq tha se nuk ka kryer asjnë krim.

Ai ka deklaruar se po ta kishte kryer këtë vepër nuk do të ishte betuar në fëmijët dhe nuk do ta kishte përfshirë familjen.

Aktakuza e ngritur më 26 dhjetor 2023 nga Prokuroria Speciale e Republikës së Kosovës, ngarkon Dragisha Milenkoviqin se në cilësinë e gardianit të Burgut të Prishtinës dhe Lipjanit, gjatë periudhës së luftës në Kosovë 1998-1999, në Burgun e Prishtinës dhe të Lipjanit, në bashkëkryerje në mënyrë sistematike i kishin maltretuar të burgosurit shqiptarë.

Më 10 janar 2024, në seancën fillestare Milenkoviq ishte deklaruar i pafajshëm për krime lufte, ndërsa kishte pranuar fajësinë për armëmbajtje pa leje. /BetimipërDrejtësi

ShBA-ja e jugut është prekur nga stuhitë të forta dhe tornadot, duke lënë të paktën shtatë njerëz të vdekur dhe mijëra familje pa energji elektrike.

Disa shtete, nga Arkansas (jug) deri në Ohio (veri), janë përballur me stuhi ere, tornado dhe shira të dendur që nga e mërkura e djeshme.

Autoritetet në Tenesi (në jug) thanë të enjten në mëngjes se të paktën pesë persona vdiqën për shkak të motit ekstrem.

Një baba dhe vajza u vranë në kontenë Fayette, Tennessee, kur shtëpia e tyre parafabrikat u godit nga një tornado, sipas raporteve të mediave.

Tre persona të tjerë u dërguan në spital.

Vdekje të tjera u raportuan në Indiana, ku një burrë u godit nga rryma kur një linjë elektrike ra në makinën e tij, dhe në Misuri, transmeton RTSh.

Shkollat u vendosën të mbyllen në disa nga zonat e prekura, veçanërisht në Nashville, kryeqyteti i Tenesit.

Guvernatori i Kentakit Lindor Andy Beshear paralajmëroi përmes X kundër “një prej ngjarjeve më të rënda të motit të parashikuara ndonjëherë” në rajon.

Meteorologët amerikanë parashikojnë se ngjarjet ekstreme, të cilat ka rrezik të shkaktojnë përmbytje katastrofike, do të vazhdojnë deri nesër të shtunën.

Rreth 230,000 konsumatorë ishin ende pa energji në shtetet e prekura dje, sipas të dhënave të fundit nga poëeroutage.

Administrata Kombëtare Oqeanike dhe Atmosferike (NOAA) regjistroi gati 1800 tornado vitin e kaluar në të gjithë territorin e SHBA, numri i dytë më i lartë që nga viti 2004. Ata lanë gjithsej 54 të vdekur.

Komiteti Olimpik i Kosovës ka reaguar ashpër në lidhje me atë që ndodhi të enjten në Kongresin e UEFA-s që u mbajt në Beograd.

KOK-u ka bërë thirrje nga UEFA që të jap sqarime për heqjen dhe djegien e flamurit, e njëkohësisht marrjen e masave ndaj mikpritësit të këtij Kongresi, i cili sipas pamjeve të publikuara edhe gjatë punimeve të Kongresit u përfshi në aktet e heqjes së flamurit.

“Komiteti Olimpik i Kosovës shpreh shqetësimin dhe indinjatën e thellë për veprimin e papranueshëm të heqjes së flamurit të Republikës së Kosovës nga ambientet e Kongresit të UEFA-s, i cili u mbajt në Beograd të Serbisë. Edhe më shqetësues dhe i turpshëm është fakti që flamuri i vendosur në mesin e flamujve të shteteve tjera përfundoi në duart e huliganëve, të cilët më pas e dogjën përpara ambienteve ku po mbahej Kongresi. Ky akt përbën një sulm të drejtpërdrejtë jo vetëm ndaj simboleve shtetërore të Kosovës, por edhe ndaj vlerave themelore të sportit: respektit, barazisë dhe përfshirjes. KOK kërkon sqarime nga organizatori i Kongresit, në këtë rast UEFA, për heqjen dhe djegien e flamurit, e njëkohësisht kërkojmë marrjen e masave të mikpritësit të këtij Kongresi, i cili sipas pamjeve të publikuara edhe gjatë punimeve të Kongresit u përfshi në aktet e heqjes së flamurit. Kosova dhe institucionet tona sportive janë anëtare të barabarta në të gjitha organizatat përkatëse ndërkombëtare dhe, si të tilla, duhet të trajtohen me dinjitet dhe respekt në çdo ngjarje sportive, pavarësisht se kush është vendi mikpritës”, thuhet në reagimin e KOK-ut.

Administrata Trump ka shkarkuar Gjeneralin Timothy Haugh, kreun e Agjencisë Kombëtare të Sigurisë (NSA) dhe Komandës së Sigurisë Kibernetike të SHBA-së, pas një takimi me aktivisten e krahut të djathtë, Laura Loomer. Ajo ka kërkuar që Trump të largoje disa punonjës që dyshonte se nuk mbështesnin plotësisht agjendën e tij. Në një postim në X, Loomer ka akuzuar Haugh dhe zëvendësen e tij, Wendy Noble, për pabesi ndaj presidentit Trump, duke thënë se ky ishte arsyeja e shkarkimit të tyre.

Shkarkimet e raportuara janë të lidhura me një incident të muajit të kaluar, kur një gazetar u shtua aksidentalisht në një bisedë të Sigalit për sulmet ushtarake në Jemen, raporton BBC News, transmeton KosovaPress.

Pavarësisht se Gjenerali Haugh nuk ishte pjesë e bisedës, ai dëshmoi për këtë çështje para Kongresit. Disa funksionarë të tjerë, si Brian Walsh dhe Thomas Boodry nga Këshilli i Sigurisë Kombëtare të Shtëpisë së Bardhë, gjithashtu u shkarkuan.

Trump ka mbështetur Loomer dhe ka thënë se e dëgjon atë dhe merr vendime pas këshillave të saj. Në një intervistë telefonike, Loomer tha se takimi me Trump ishte konfidencial dhe e kritikon prishjen e besimit përmes rrjedhjes së informacionit. Ajo po ashtu theksoi rëndësinë e kontrollit të fortë të sigurisë për të mbrojtur presidentin dhe sigurinë kombëtare.

Mbetjet mortore të 10 viktimave të luftës, të cilat ishin në Listën e Personave të Zhdukur, do të rivarrosen sot, më 4 prill 2025, në përvjetorin e Masakrës së Kralanit, viktima të cilat ishin identifikuar së fundmi nga mbetjet mortore të zhvarrosura nga një varrezë masive në Bishtazhin, do të prehen përfundimisht në varrezat e destinuara, sipas kërkesave të familjarëve të tyre.

Kështu është bërë e ditur nga Komisioni Qeveritar për Persona të Zhdukur, i cili shprehu ngushëllimet dhe mbështetjen e tij për familjet, në këtë ditë të dhimbjes, duke mbetur me përkushtimin e vazhdueshëm në zbardhjen e fatit të të gjithë personave të zhdukur me forcë gjatë luftës.

Postimi i plotë:

Duke filluar

– nga ora 12:00 – 13:00, me Homazhet në Sallën e Sporteve “Adem Jashari”, Klinë

– ora 13:00 – Akademia Përkujtimore , në Sallën e Sporteve Klinë.

Ndërsa nga ora 14:30 – Ceremonia e rivarrimit në Kompleksin Memorial “Kodra e Kuqe” në Grabanicë, të viktimave :

Adem (Hazir) Gashi, Klinë

Sahit(Ahmet) Gashi, Klinë

Bekim(Hashim) Hasani , Klinë

Sheremet(Brahim) Ismajli , Klinë

Osman(Kadri)Fejza , Klinë

Shkelzen Rifat Hajdaraj , Klinë

Bekim (Muharrem) Gashi, Klinë.

Për të vazhduar nga ora 16:30 me ceremoninë e rivarrimit në varrezat në Jashanicë (Klinë) , të viktimës së luftës Mentor (Xhemajl) Myrtaj.

Ceremonitë e rivarrimit në Malishevë:

– Rivarrimi i viktimës së luftës Vehbi (Pajazit) Halilaj

ora 13:00 – Homazhet në Shkollën “Petro Nini Luarasi”, në fshatin Llapqevë,

ora 14:00 – Rivarrimi në varrezat e fshatit Llapqevë .

– Rivarrimi i viktimës së luftës Mentor (Maliq) Kryeziu

ora 15:00 – Homazhe te Oda e Fshatit (pranë shkollës) në Bubavec

ora 16:30 – rivarrimi në varrezat e fshatit Bubavec.

Ndërsa rivarrimi i mbetjeve mortore të viktimës Sabedin (Kadri) Kryeziu, është organizuar më 21 mars 2025 në varrezat e fshatit Mleqan, Malishevë.

Komisioni Qeveritar për Persona të Zhdukur shpreh ngushëllimet dhe mbështetjen familjeve, në këtë ditë të dhimbjes, duke mbetur me përkushtimin e vazhdueshëm në zbardhjen e fatit te të gjithë personave të zhdukur me forcë gjatë luftës.

Britania dhe Franca e kanë akuzuar presidentin rus, Vladimir Putin, se po i zvarrit bisedimet për një armëpushim, që synojnë ndaljen e pushtimit të Ukrainës nga Rusia, dhe kanë kërkuar përgjigje të shpejtë nga Moska pas përpjekjeve të Shteteve të Bashkuara për të siguruar një armëpushim.

Rusia në mënyrë efektive ka refuzuar një propozim amerikan për një ndalje të plotë të luftimeve për 30 ditë, teksa Ukraina e ka pranuar planin e Uashingtonit.

“Sipas mendimit tonë, Putini po vazhdon të mjegullojë situatën, po vazhdon ta zvarrisë procesin”, tha sekretari i Jashtëm britanik, David Lammy, për gazetarët në selinë e NATO-s, duke qëndruar përkrahë homologut të tij francez, Jean-Noel Barrot.

I dërguari i Kremlinit, që ka vizituar Uashingtonin gjatë kësaj jave për të zhvilluar bisedime me zyrtarët e administratës së presidentit amerikan, Donald Trump, tha se do të duhej edhe takime të tjera për të zgjidhur çështjet e hapura.

Kirill Dmitriev tha për gazetarët rusë “se për dialogun duhet kohë, por është duke shkuar në mënyrë pozitive dhe konstruktive”.

Ai kritikoi atë që e quajti “fushatë të koordinuar mediale dhe përpjekje nga disa politikanë për të prishur raportet Rusi-SHBA, për të shtrembëruar atë që e thotë Rusia dhe për të paraqitur Rusinë dhe udhëheqësit e saj në një mënyrë negative”.

Britania dhe Franca po udhëheqin përpjekjen shumëkombëshe të njohur si “koalicioni i vullnetit”, duke synuar krijimin e një force të sigurisë e cila do të dislokohej në Ukrainë në rast se në të ardhmen arrihet një marrëveshje armëpushimi.

Një zyrtar i lartë ukrainas tha më herët gjatë javës tha se midis dhjetë deri në 12 vende deri më tani kanë thënë se do t’i bashkohen këtij koalicioni, raporton REL.

Lammy tha se përderisa Putini duhet të pranojë një marrëveshje armëpushimi, “ai po vazhdon ta bombardojë Ukrainën. Po bombardon popullatën e saj civile, furnizimet e energjisë. Ne po e shohim se si po vepron Putini, e dimë se çfarë po bën”.

Barrot tha se Ukraina para tre javësh ka pranuar kushtet për armëpushim, dhe tani Rusia “tani ia ka borxh SHBA-së një përgjigje”.

“Rusia po e zvarrit procesin, po vazhdon sulmet ndaj infrastrukturës së energjisë, po vazhdon krimet e luftës”, tha Barrot. “Duhet të thotë ‘po’ dhe duhet të japë një përgjigje shpejt”.

Sipas ministrit francez, Rusia nuk ka shfaqur asnjë sinjal se dëshiron të ndalë fushatën e saj ushtarake, duke kujtuar se të hënën Putini urdhëroi rekrutimin e 160.000 ushtarëve të rinj për shërbim të detyrueshëm ushtarak për një vit.

Dy ministrat u zotuan se do të vazhdojnë të ndihmojnë Ukrainën që të forcojë ushtrinë e saj, teksa Kievi që nga viti 2022 është duke u përballur me pushtimin e nisur nga Moska.

Ushtria izraelite njoftoi se ka nisur një ofensivë të re tokësore në lindje të Qytetit të Gazës më 4 prill, me qëllim që të zgjerojë zonë e sigurisë që ka krijuar brenda enklavës palestineze.

Izraeli tha se trupat e tij në orët e fundit kanë nisur të kryejnë aktivitete ushtarake në zonën Shejaija, në veri të Gazës, shkruan Radio Evropa e Lirë.

“Trupat kanë eliminuar një numër të terroristëve dhe kanë shkatërruar infrastrukturë të Hamasit, përfshirë një qendër komanduese që terroristët e Hamasit përdornin për të planifikuar dhe kryer sulme terroriste”, u tha në njoftimin e ushtrisë.

Izraeli tha se civilët do të lejohen të evakuohen nga zonat e luftimeve përmes “rrugëve të organizuara për sigurinë e tyre”.

Ministri izraelit i Mbrojtjes, Israel Katz, tha një ditë më parë se shteti i tij do të rrisë praninë ushtarake brenda Rripit të Gazës për të “shkatërruar dhe pastruar zonën nga terroristët dhe infrastruktura terroriste”.

Operacioni synon të marrë “nën kontroll zona të mëdha dhe t’i inkorporojë në zonën izraelite të sigurisë”, tha ai, pa dhënë detaje të tjera.

Izraeli ka thënë se do të vazhdojë ofensivën në Gazë, me qëllim që ta detyrojë Hamasin – grupin palestinez të shpallur organizatë terroriste nga Shtetet e Bashkuara dhe Bashkimi Evropian – të lirojë pengjet që mori gjatë sulmit ndaj Izraelit në tetor të vitit 2023, që nxiti luftën në Gazë.

Gjatë sulmit të 7 tetorit 2023, Hamasi vrau afër 1.200 persona dhe rrëmbeu afër 250 të tjerë. Si pasojë e ofensivës izraelite, në Gazë janë vrarë më shumë se 50.000 palestinezë./REL

Ajola Xoxa, bashkëshortja e kryebashkiakut Erion Veliaj sot është paraqitur në SPAK në zbatim të masës së sigurisë detyrim paraqitjeje të vendosur nga GJKKO.

Xoxa akuzohet nga SPAK për korrupsion në 9 raste, pastrim parash, fshehje pasurie.

Në seancën e zhvilluar në 12 shkurt GJKKO ndryshoi masën e sigurisë për Xoxën nga arrest shtëpie në detyrim paraqitjeje dhe ndalim për largim jashtë vendit.

Bernard Nikaj i PDK-së tha se Qeveria e Kosovës duhet të veprojë pa vonesa në heqjen e tarifës prej 10% ndaj mallrave të SHBA-së.

Ai tha se mbajtja e kësaj tarife ndaj produkteve amerikane nuk ka domethënie ekonomike “e aq më pak arsyetim politik”.

“Për Kosovën, partneriteti me Shtetet e Bashkuara të Amerikës përfaqëson një bosht strategjik dhe ekonomik të pazëvendësueshëm — shumë më të rëndësishëm sesa pesha që ka tregu i Kosovës për ekonominë amerikane. Në këtë kontekst, mbajtja e tarifës prej 10% ndaj produkteve amerikane nuk ka domethënie ekonomike, e aq më pak arsyetim politik. Në këtë moment ajo dëmton drejtpërdrejt interesat afatgjata të shtetit të Kosovës dhe cenon lidhjet me aleatin tonë kryesor. Heqja e menjëhershme e kësaj tarife është jo vetëm një veprim racional, por edhe një sinjal i qartë politik se Kosova mbetet e përkushtuar ndaj thellimit të marrëdhënieve me SHBA-në”, tha ai.

Nikaj tha se çdo vonesë në këtë drejtim duhet të interpretohet si “mungesë vizioni dhe joseriozitet nga ana e Qeverisë së Kosovës në raport me aleancat kyçe të vendit”.

Administrata Trump i vendosi Kosovës një tarifë prej 10% – minimalja e tarifës së vendosur krahasuar me tarifat që i vendosi për disa shtete të tjera, të cilët presidenti Trump i quajti “shkelësit më të këqij”.