Author: G.O.

Reformat institucionale të Republikës së Kosovës në fushën e parandalimit të korrupsionit janë vlerësuar edhe ndërkombëtarisht gjatë një punëtorie të nivelit të lartë të organizuar nga Këshilli i Evropës në Strasburg. Agjencia për Parandalimin e Korrupsionit (APK), ka prezantuar qasjen dhe përvojën e saj në hartëzimin e rreziqeve të korrupsionit, duke theksuar rëndësinë e këtyre reformave për forcimin e integritetit dhe transparencës në institucionet publike.

Siç njofton APK, në punëtorinë ndërkombëtare me temën “Hartimi i rreziqeve të korrupsionit: Mësime të nxjerra dhe mundësi aplikimi”, përfaqësues nga vendet e Ballkanit Perëndimor, Evropa dhe Afrika e Veriut u mblodhën për të diskutuar strategjitë më efektive në identifikimin dhe menaxhimin e rreziqeve të korrupsionit.

Në emër të Republikës së Kosovës, drejtori i APK-së, Yll Buleshkaj, ndau përvojën e Agjencisë në realizimin e një procesi gjithëpërfshirës të vlerësimit të rreziqeve të korrupsionit.

Sipas tij, ky proces ka përfshirë 159 institucione publike, përfshirë 115 institucione shtetërore dhe 44 ndërmarrje publike.

“Korrupsioni nuk është vetëm çështje ligjore – është sfidë e kulturës institucionale. Ndryshimi fillon me diagnostikim të saktë dhe vullnet për të vepruar aty ku rreziku është real”, citohet në komunikatë Buleshkaj gjatë fjalës së tij para përfaqësuesve në këtë punëtori.

Siç njofton AKP, ai theksoi rëndësinë e vullnetit politik në të gjitha nivelet, formalizimit të përgjegjësive, përfshirjes së hershme të institucioneve të targetuara dhe ruajtjes së komunikimit të vazhdueshëm gjatë procesit të vlerësimit.

Buleshkaj gjithashtu ngriti shqetësime për sfidat aktuale, si mungesa e një baze të dhënash të konsoliduar që i bëjnë vlerësimet kundër korrupsionit më të vështira.

Për më tepër, Buleshkaj theksoi rëndësinë që teknologjia – përmes analizës së të dhënave, inteligjencës artificiale dhe mjeteve digjitale, në të ardhmen të vihet në shërbim të detektimit dhe parandalimit të korrupsionit në mënyrë më efektive.

Gjatë punëtorisë në Strasburg, detajet e përvojës, sfidave dhe mundësive që kanë shoqëruar zbatimin e procesit të hartëzimit të korrupsionit nëpër institucionet e Kosovës, janë prezantuar nga z. Blerim Kelmendi, Drejtor i Departamentit në APK.

Ndërsa në këtë ngjarje të rëndësishme morën pjesë edhe të gjithë anëtarët e Agjencisë që kanë zbatuar këtë proces në Kosovë, duke përfaqësuar një qasje kolektive dhe teknike të mirëkoordinuar.

Punëtoria u organizua nga Këshilli i Evropës dhe Projekti i përbashkët i BE-së dhe Këshillit të Evropës kundër krimit ekonomik në Kosovë (PECK III), si pjesë e Platformës horizontale për Ballkanin Perëndimor dhe Turqinë.

“Pjesëmarrja e Kosovës në këtë format jo vetëm që e rikonfirmon angazhimin e saj për reforma të thella në fushën e integritetit dhe sundimit të ligjit, por gjithashtu e paraqet vendin tonë si një shembull pozitiv në nivel Evropian dhe më gjerë”, thuhet në njoftim.

Gjykata Kushtetuese i ka dhënë dritën e gjelbër Ligjit për Zyrtarët Publikë, meqë ka gjetur se nenet e kontestuara nuk janë në kundërshtim me Kushtetutën.

Në njoftimin e Kushtetueses thuhet se është vendosur që Ligji t’i dërgohet Presidentes Vjosa Osmani për shpallje.

Ky ligj ishte dërguar në gjykatë nga Partia Demokratike e Kosovës dhe Lidhja Demokratike e Kosovës.

Më 23 janar të vitit të kaluar, Gjykata Kushtetuese kishte shpallur të pavlefshme disa nene të këtij ligji dhe obligonte Kuvendin që brenda 6 muajve t’i bënte ndryshimet e nevojshme në këtë ligj.

Deputetët kishin miratuar ndryshimet në Ligj gjatë seancës së Kuvendit të Kosovës më 30 tetor 2024.

Policia në Sarajevë ka arrestuar Enda Paviq-Peçenkoviq, ministre e Punës dhe Politikës Sociale, Personave të Zhvendosur dhe Refugjatëve, nën dyshimet për punësim të paligjshëm, konfirmuan nga Zyra e Prokurorit në Kantonin e Sarajevës.

Policia ka bastisur zyrat e Ministrisë së Punës dhe Ministrisë së Shkencës, Arsimit dhe Rinisë në Kantonin e Sarajevës, shkruan Radio Evropa e Lirë.

Bastisjet dhe arrestimi i ministres së Punës janë në kuadër të vazhdimit të operacionit të quajtur “Zarfi”. Në kuadër të këtij operacioni, më 10 prill u arrestua ministrja e Shkencës, Adna Mesihoviq, po ashtu nën dyshime për punësim të paligjshëm.

Zyra e Prokurorit në Kantonin e Sarajevës i akuzon ministren Paviq-Peçenkoviq (nga Partia Socialdemokrate e Bosnje e Hercegovinës) që së bashku me ministren Mesihoviq (nga partia Për Gjeneratën e Re) se me ndërmjetësimin e Ibrahim Obhoxhash, kanë favorizuar motrën e Obhoxhashit për t’ia mundësuar punësimin asaj në Ministrinë e Punës.

Obhoxhash është anëtar i Bordit të Drejtorëve në Agjencinë e Punësimit në Kantonin e Sarajevës dhe ishte anëtar i Komisionit që kreu procedurën e punësimit.

Ai u arrestua më 11 prill dhe dyshohet për veprën penale të pranimit të dhuratave apo formave të tjera të përfitimit apo të ndërmjetësimit në emërimin e drejtorit të Qendrës Studentore në Sarajevë./REL

I dërguari special i Bashkimit Evropian për dialogun Kosovë-Serbi, Peter Sorensen, ka përfunduar një vizitë në Beograd, ku u takua me disa figura kyçe të qeverisë serbe, përfshirë ministrin e Punëve të Jashtme Marko Gjuriq dhe kryenegociatorin për dialogun, Petar Petkoviq.

Gjatë takimeve, u diskutua për zhvillimet më të fundit në dialog dhe përpjekjet për përparim në fushat e ndryshme që janë thelbësore për avancimin e procesit.

Në një postim të tij në platformën X, Sorensen ndau disa fotografi nga takimet dhe shprehu vlerësimet për diskutimet që zhvilloi.

“Vazhdova vizitën time pune në Beograd me takime me Ministrin e Punëve të Jashtme Marko Djuric, Ministrin për Integrim Evropian @nstarovic dhe Kryenegociatorin @PetkovicPetar. Patëm diskutime të mira rreth përpjekjeve të fundit dhe fushave ku mund të ketë përparim në Dialog”, tha ai.

Hashim Thaçi ka deklaruar se është i pafajshëm për akuzën e re të formës së përgjegjësisë për “nxitje”, e cila i është shtuar pas një vendimi të Apelit në rastin e tij kundër administratës së drejtësisë. Thaçi është i akuzuar bashkë me Bashkim Smakajn, Fadil Fazliun, Isni Kilajn dhe Hajredin Kuçin.

Deklarata e dorëzuar me shkrim më 24 prill 2025 thekson se ai nuk pranon fajësinë për asnjë pikë të aktakuzës së rikonfirmuar, duke përfshirë edhe formën e shtesë të nxitjes për Pikat 1 deri 3.

“Në përputhje me Rregullën 92 të Rregullores së Procedurës dhe Provave, deklarata me shkrim e z. Thaçi për mospranim të fajësisë për secilën pikë dhe akuzë në Aktakuzën e Rikonfirmuar të ndryshuar, përfshirë edhe formën shtesë të nxitjes për Pikat 1 deri në 3, është e bashkangjitur me këto parashtresa”, thuhet në njoftimin e mbrojtjes së Thaçit.

Vendimi i gjyqtares Marjorie Masselot, i marrë më 14 prill 2025, ka ndryshuar aktakuzën e mëparshme, duke konfirmuar një përgjegjësi penale shtesë për Thaçin.

Presidentja Vjosa Osmani, ka njoftuar se Malajzia do t’i heq vizat për Kosovën në periudhë 30 ditore.

Ajo ka paralajmëruar po ashtu se javën e ardhshëm do të qëndrojë për një vizitë zyrtare në këtë shtet aziatik, Malajzi ku do të bëhet edhe hapja e ambasadës së Republikës së Kosovës në Kuala Lumpur.

“Është shenjë e qartë se lidhjet midis dy vendeve tona po forcohen çdo ditë.” Ka thënë Osmani në një postim në X.