Author: G.O.

Kryeministri në detyrë i Kosovës, Albin Kurti ka njoftuar për tetë shërbime të reja digjitale të rëndësishme në e-Kosova, që sipas tij e rritin numrin e shërbimeve elektronike në mbi 230 sosh.

Platforma tashmë është e qasshme edhe përmes aplikacionit mobil në sistemet iOS dhe Android, duke e bërë më të lehtë për qytetarët aksesin në shërbime të ndryshme publike.

Me mbi 1 milion përdorues të regjistruar, e-Kosova vazhdon të zgjerojë kapacitetet e saj dhe të sjellë administratën më afër qytetarëve.

“Me më shumë shërbime digjitale, po e bëjmë shtetin më efikas dhe qytetarin më të përfshirë,” ka shkruar Kurti.

Përdoruesit e platformës mund të kryejnë shërbime të ndryshme si aplikime për dokumente zyrtare, pagesa administrative, dhe kërkesa për informata, pa pasur nevojë të paraqiten fizikisht në institucionet përkatëse.

Presidentja e Kosovës, Vjosa Osmani, ka reaguar ashpër pas dhunës fizike dhe verbale që është ushtruar ndaj futbollistit të ri, Belgin Jashari, duke e cilësuar këtë si një akt të papranueshëm dhe të patolerueshëm në shoqërinë tonë.

Përmes një reagimi në ‘Facebook’, Osmani ka theksuar se sporti duhet të shërbejë si urë lidhëse mes njerëzve, e jo si mur ndarës.

“Sporti, urë që lidh njerëzit, jo mur që i ndan! Dhuna dhe diskriminimi në sport janë sulm i drejtpërdrejtë ndaj vlerave tona më të shtrenjta: respektit, barazisë dhe dinjitetit njerëzor. Dënoj ashpër dhunën fizike dhe verbale ndaj futbollistit të ri, Belgin Jashari. Ky është akt i papranueshëm dhe i patolerueshëm në shoqërinë tonë“, ka shkruar Presidentja.

Në reagimin e saj, ajo ka theksuar se çdo i ri duhet të ndjehet i sigurt dhe i respektuar, pavarësisht prejardhjes apo identitetit të tij.

Reagimi i plotë:

Presidentja Osmani dënon ashpër dhunën fizike dhe verbale ndaj futbollistit të ri, Belgin Jashari: Ky është akt i papranueshëm dhe i patolerueshëm në shoqërinë tonë

Reagimi i plotë i Presidentes së Republikës së Kosovës, Vjosa Osmani:

Sporti, urë që lidh njerëzit, jo mur që i ndan!

Dhuna dhe diskriminimi në sport janë sulm i drejtpërdrejtë ndaj vlerave tona më të shtrenjta: respektit, barazisë dhe dinjitetit njerëzor. Dënoj ashpër dhunën fizike dhe verbale ndaj futbollistit të ri, Belgin Jashari. Ky është akt i papranueshëm dhe i patolerueshëm në shoqërinë tonë.

Çdo i ri duhet të ndjehet i sigurt, i respektuar dhe i barabartë, pa dallim prejardhjeje apo identiteti.

Akte të tilla nuk mund dhe nuk duhet të mbeten pa përgjegjësi. Institucionet përkatëse duhet të ndërmarrin të gjitha masat e nevojshme për ta hetuar rastin dhe për t’i ndëshkuar të përfshirët në dhunë dhe fyerje.

Kosova është vend i lirë e demokratik. Dhuna dhe urrejtja nuk do të kenë vend në fushat tona të sportit, as në shoqërinë tonë. Askush nuk mund të qëndrojë mbi ligjin kur cenon dinjitetin dhe sigurinë e të rinjve tanë.

Belgin, ti je pjesë e të tashmes dhe të ardhmes sonë! Kosova është krenare me ty!

Apeli kthen në rivendosje vendimin e Themelores, duke anuluar gjobën ndaj avokatit të Naim Murselit.

Gjykata e Apelit të Kosovës ka kthyer në rivendosje vendimin e Gjykatës Themelore në Prishtinë përmes të cilit gjykatësja, Fatime Dermaku me rastin e mbajtjes së shqyrtimit fillestar ndaj Naim Murselit dhe të tjerëve e kishte dënuar me gjobë prej 500 euro avokatin e Murseli, Shemsedin Piraj.

‘APROVOHET si e bazuar ankesa e avokatit Shemsedin Piraj, ANULOHET aktvendimi i Gjykatës Themelore në Prishtinë-Departamenti për Krime të Rënda,…, dt.31.01.2025, dhe çështja i kthehet gjykatës së shkallës së parë në rivendosje” thuhet në vendim.

Sipas vendimit, avokatit Shemsedin Piraj i ishte shqiptuar një gjobë prej 500 euro nga gjykatësja e rastit, Fatime Dermaku, me arsyetimin se pa ndonjë arsye kishte tentuar të vononte procesin gjyqësor.

Më tej thuhet se gjykatësja Dermaku kishte marrë këtë vendim pasi Piraj, duke mos respektuar urdhrat e saj, nuk e kishte lejuar vazhdimin e shqyrtimit fillestar.

Kundër këtij vendimi, Piraj kishte ushtruar ankesë, të cilën Gjykata e Apelit e ka gjetur të bazuar.

“Gjykata e Apelit e Kosovës – Departamenti për Krime të Rënda, në seancën e kolegjit shqyrtoi shkresat e lëndës, vlerësoi pretendimet ankimore dhe konstatoi se ankesa është e bazuar”, thuhet në vendim.

Sipas vlerësimeve të Gjykatës së Apelit, Gjykata Themelore nuk ka dhënë arsye të mjaftueshme dhe bindëse për të konstatuar se veprimet e avokatit Shemsedin Piraj e kanë penguar gjykatësen Fatime Dermaku në udhëheqjen e seancës fillestare.

Në vendimin e saj, Apeli ka sqaruar se Themelorja, përveç pohimit se Piraj ka penguar punën e gjyqtares, nuk ka ofruar asnjë arsye të qartë dhe të mbështetur ligjërisht që vërteton se ai me të vërtetë ka penguar punën e gjykatës.

Gjithashtu, sipas Apelit, kërkesa e avokatit Piraj që të mos anashkalohej kërkesa e të akuzuarit Kushtrim Kokalla — i cili kishte kërkuar të mos deklarohej lidhur me fajësinë pa u konsultuar me avokatin e tij, Ndrec Dodaj — nuk mund të anashkalohej, pasi Kokalla dhe Naim Murseli po akuzohen për bashkëkryerje së bashku me të mbrojturin e Pirajt, Naim Murselin.

“Betimi për Drejtësi” ka kontaktuar avokatin Shemsedin Piraj për të kuptuar nëse Gjykata Themelore ka vendosur në rivendosje dhe cili është vendimi, mirëpo ai ka deklaruar se ende nuk ka pranuar asnjë vendim nga Themelorja.

Ndryshe, Prokuroria Themelore në Prishtinë më 15 janar 2025 ka ngritur aktakuzë ndaj Naim Murselit, Granit Plavës, Kushtrim Kokallës dhe Tom Dodajt.

“Betimi për Drejtësi” kishte siguruar aktakuzën e Prokurorisë, në të cilën thuhet se Murseli, Plava dhe Kokalla ishin dakorduar paraprakisht që vrasja të kryhej nga i akuzuari Plava me marrëveshje që Murseli t’ia paguante atij 30 mijë euro. I gjithë plani për vrasjen e Liridonës, thuhet se u bë nga bashkëshorti i saj, tani i akuzuari Naim Murseli, si pasojë e çrregullimit të raporteve familjare e martesore, ku edhe lindi dëshira e tij për hakmarrje.

Të paktën 516 njerëz janë lënduar si pasojë e një shpërthimi të fuqishëm në qytetin port të Iranit, Bandar Abbas, të shtunën, sipas televizionit shtetëror iranian.

Dogana e Iranit tha se shpërthimi ndodhi në terminalin e kontejnerëve Sina, që është i lidhur me Organizatën e Porteve dhe Transportit Detar, shkruan Radio Evropa e Lirë.

Shërbimet e emergjencës dhe ekipet e ndihmës së parë iraniane ndodhen në vendngjarje dhe numri i të plagosurve është rritur me kalimin e orëve pas shpërthimit.

Autoritetet nuk kanë treguar ende shkaktarin e shpërthimit.

Mehrdad Hasanzadeh, zyrtar për menaxhimin e fatkeqësive, i tha televizionit shtetëror iranian se shpërthimi erdhi nga kontejnerët në portin Rajaei të qytetit.

Pamjet në rrjetet sociale treguan një re të madhe tymi të zi.

Video të tjera treguan dëme në ndërtesa dhe automjete. Disa persona u panë gjithashtu në zonë duke ndihmuar të plagosurit dhe duke kontrolluar dëmet në pronat e tyre.

Porti Rajaei është kryesisht vend i trafikut të kontejnerëve, por gjithashtu ka rezervuarë nafte dhe objekte të tjera petrokimike.

Porti Rajaei ndodhet rreth 1.050 kilometra në juglindje të kryeqytetit Teheran, në ngushticën e Hormuzit, gryka e ngushtë e Gjirit Persik përmes së cilës kalon 20 për qind e gjithë naftës që tregtohet globalisht.

Izraeli ishte akuzuar për kryerjen e një sulmi të madh kibernetik ndaj të njëjtit port në maj të vitit 2020, duke shkaktuar kaos në transport për disa ditë pas rrëzimit të sistemit kompjuterik të portit./REL

Zelensky ka dhënë komentet e para pas takimit të tij me presidentin amerikan Donald Trump në Romë.

Ai thotë se “takimi shumë simbolik” ka “potencialin për t’u bërë historik, nëse arrijmë rezultate të përbashkëta”.

“Duke shpresuar për rezultate në gjithçka që kemi mbuluar. Mbrojtja e jetëve të njerëzve tanë. Armëpushimi i plotë dhe i pakushtëzuar. Paqe e besueshme dhe e qëndrueshme që do të parandalojë shpërthimin e një lufte tjetër.”

Ai e përfundon postimin e tij në X duke falënderuar presidentin amerikan.

Kryeqyteti i Kosovës, Prishtina, edhe sot është në mesin e qyteteve me ajrin më të ndotur në botë.

Sipas matjeve të “IQ Air” Prishtina renditet e 63-ta në botë.

Vlera e nivelit të grimcave të dëmshme PM është 55, e që janë mesatarisht të dëmshme për njerëzit.

Policia e Kosovës ka bërë të ditur për disa raste të vjedhjes së tabelave sinjalizuese në zonat kufitare të Kosovës.

Vjedhjet janë raportuar në periudha të ndryshme kohore.

Raporti i Policisë:

Zona Kufitare 25.04.2025 – 10:00. Raportohet se nga persona të panjohur është vjedhur tabela sinjalizuese për zonën kufitare për banorët Brezne–Bardhoc. Lidhur me rastin është njoftuar prokurori. Rasti në hetime.

Zona Kufitare 22.04.2025 – 12:00. Raportohet se nga persona të panjohur është vjedhur tabela sinjalizuese për zonën kufitare për banorët Restelicë–Çajë. Lidhur me rastin është njoftuar prokurori. Rasti në hetime.

Zona Kufitare 01.03-25.04.2025 – NN. Raportohet se nga persona të panjohur është vjedhur tabela sinjalizuese për zonën kufitare për banorët Gorozhub–Pogaj. Lidhur me rastin është njoftuar prokurori. Rasti në hetime.

Presidentja Vjosa Osmani tashmë ka arritur në bazilikën “Shën Pjetri” në Vatikan.

E para e shtetit të Kosovës para fillimit të ceremonisë së varrimit të Papa Françeskut është përshëndetur me presidentin amerikan Donald Trump dhe Zonjën e Parë Melania Trump, para fillimit të ceremonisë së varrimit të Papës.

Papa Françesku vdiq në moshën 88 vjeç pasi pësoi një goditje në tru të hënën e Pashkëve, vetëm një ditë pasi u shfaq në të njëjtin shesh për t’u ofruar një bekim besimtarëve në pikën kulmore të kalendarit të krishterë.