Dije Agushi, një stjuardese shqiptare ishte e ftuar në emisionin “STUDIO A” në ATV, e cila foli gjerë e gjatë për jetën e saj profesionale, private dhe jo vetëm.
Dija tha se ajo ka kalur 8 vite mes qiejve, duke udhëtuar nëpër botë dhe duke përfaqësuar profesionalizmin, përkushtimin dhe elegancën që kërkon profesioni i një stjuardeseje.
Ndër të tjera ajo tregoi se si dallohet që një pasagjer është shqiptar, pa treguar që është shqiptar.
“Një shqiptar duartroket për gjithçka ose për shembull të pyet se kush është pilot se mendon se mos është ndonjë familjar i tij”, tha ajo.
Këshilli për Mbrojtjen e të Drejtave dhe Lirive të Njeriut (KMDLNj), ka reaguar ndaj kërcënimeve me jetë që i janë drejtuar Presidentes së Kosovës, Vjosa Osmani përmes postës elektronike.
Në reagimin e KMDLNj-së thuhet se kërcënimet, ndonëse me përmbajtje të paqartë, “nuk ndërlidhen me detyrimet kushtetuese që i ka presidentja”, duke lënë të nënkuptohet se motivet e mundshme mund të jenë politike.
Organizata e të drejtave të njeriut ngre alarmin për një trend në rritje të përdorimit të kërcënimeve si mjet politik.
“Kohëve të fundit, shkaku i një eskalimi të raporteve ndërpartiake, është sforcuar kërcënimi si mjet për arritjen e qëllimeve politike”, thuhet në reagimin e KMDLNj-së.
KMDLNj thekson se përveç figurave politike dhe publike, “cak i vazhdueshëm i sulmeve dhe kërcënimeve janë gazetarët”, ndërkohë që dënimet për këto raste vazhdojnë të jenë “thuaja simbolike”.
Në deklaratën e saj, KMDLNj e dënon fuqishëm aktin ndaj Presidentes Osmani dhe bën thirrje për hetim të menjëhershëm.
“KMDLNj e dënon kërcënimin ndaj Presidentes Osmani dhe kërkon nga Policia që ta trajtojë këtë dhe rastet e ngjashme me urgjencë, në mënyrë që të parandalojnë pasoja më të rënda. Policia e Kosovës ka kapacitet të mjaftueshëm profesional dhe përvojë të suksesshme në trajtimin e këtyre rasteve, andaj pritet që kërcënuesi të arrestohet shpejt dhe të japë përgjegjësi para ligjit”, thuhet në fund të reagimit.
Kryetari i Lidhjes Demokratike të Kosovës, Lumir Abdixhiku, priti sot në takim Ambasadorin e ri të Italisë në Kosovë, Maurizio Antonini.
Gjatë takimit Abdixhiku e informoi ambasadorin Antonini për qëndrimet e LDK-së lidhur me zhvillimet aktuale politike në vend.
Ai ritheksoi se kriza institucionale me të cilën po përballet vendi është rezultat i paaftësisë së partisë së parë për të krijuar një shumicë parlamentare funksionale, për të zgjedhur Kryetarin e Kuvendit dhe për të konstituar institucionet.
Në këtë kontekst, Abdixhiku po ashtu ritheksoi qëndrimin e qartë të LDK-së se bllokada aktuale politike dhe institucionale është e papranueshme dhe është duke i shkaktuar dëm të drejtpërdrejtë interesit të qytetarëve tanë si dhe po e cenon mirëqenien e tyre.
Kryetari i LDK-së e njoftoi ambasadorin Antonini edhe për propozimin e LDK-së për krijimin e një qeverie gjithëpërfshirëse kalimtare, me mandat dhe detyrime të përcaktuara qartë. Ai theksoi se ky propozim është zgjidhja më e mirë e përkohshme dhe e domosdoshme për të tejkaluar ngërçin aktual dhe për të kthyer funksionalitetin e shtetit.
Prokuroria Speciale ka dorëzuar në Gjykatën Themelore në Prishtinë aktakuzë kundër të pandehurit I.P. për veprën penale “Nxitja e përçarjes dhe mosdurimit”, duke e grisur librin e shenjtë të myslimanëve, Kuranin.
Në njoftim thuhet se është ngritur aktakuzë me propozim për shqiptimin e masës së trajtimit të detyrueshëm psikiatrik në liri ndaj të pandehurit.
Me këtë rast, thuhet se i pandehuri ka shkaktuar mllef të madh te komuniteti islam dhe duke cenuar bashkëjetesën ndërmjet grupeve me ideologji të ndryshme fetare.
Bashkimi Evropian dhe Qeveria e Britanisë së Madhe kanë njoftuar të martën për vendosjen e sanksioneve të reja ndaj Rusisë, duke përfshirë masa që synojnë flotën nën hije të Moskës, shkeljet e të drejtave të njeriut dhe kërcënimet hibride.
Kryediplomatja evropiane, Kaja Kallas, lajmëroi përmes një postimi në rrjetin social X se Bashkimi Evropian ka miratuar paketën e 17-të të sanksioneve, që përfshin shënjestrimin e afërsisht 200 anijeve të flotës nën hije të Rusisë.
“Masat e reja gjithashtu trajtojnë kërcënimet hibride dhe të drejtat e njeriut”, ka thënë Kallas. Ajo gjithashtu paralajmëroi se sanksione të tjera janë në proces dhe se “sa më gjatë që Rusia vazhdon luftën, aq më e ashpër do të jetë përgjigjja jonë”.
Nga ana tjetër, Qeveria e Britanisë së Madhe njoftoi 100 sanksione të reja ndaj Rusisë, që shtrihen në disa sektorë, përfshirë ushtrinë, energjinë dhe sektorët financiarë, si dhe ata që zhvillojnë luftën informative të Putinit kundër Ukrainës.
Në një njoftim për shtyp, Qeveria e Britanisë ka theksuar se po punon së bashku me partnerët për të forcuar tavanin e çmimit të naftës, në mënyrë që të kufizohet më tej të ardhurat për makinerinë e luftës së Putinit.
Profesori Naim Telaku, dekan i Departamentit të Psikologjisë në Kolegjin AAB, ka promovuar librin e tij të fundit me titull “AETOS: Reflektime meditative” më 19 maj, në Teatrin Kamertal të Kolegjit AAB.
Ai ka treguar se ky libër është rezultat i një procesi të gjatë meditimi dhe reflektimi personal, ku janë trajtuar tema të ndryshme psikologjike, filozofike dhe ekzistenciale.
Libri është konceptuar si një udhërrëfyes meditativ që i fton lexuesit të thellohen në mendimet e tyre dhe të zbulojnë aspekte të reja të vetes përmes çdo faqeje.
Synimi kryesor i AETOS është që lexuesi të reflektojë mbi jetën, marrëdhëniet dhe natyrën njerëzore, duke krijuar një lidhje personale me përmbajtjen e librit.
Për Telakun, “AETOS” nuk është vetëm një vepër letrare, por edhe një thirrje për introspeksion dhe vetëzhvillim, ku çdo lexues mund të gjejë një pasqyrim të mendimeve dhe përvojave të veta.
Ahmet Konjusha i përket një brezi të vjetër të xhiruesve në Kosovë, që ka punuar shumë brenda vendit dhe në diasporë, duke dokumentuar jetën dhe përvojat e shqiptarëve jashtë atdheut.
Ai ka ndjekur ngjarje historike në mbarë botën dhe ka ndihmuar në ruajtjen dhe transmetimin e historisë për brezat që do të vijnë.
Gjatë karrierës ka kaluar periudha të vështira, ku dhuna dhe represioni i Serbisë ndaj Kosovës ishin pjesë e përditshmërisë, duke i dhënë punës së tij një rëndësi dhe përgjegjësi të veçantë.
Z. Konjusha, si xhirues ishte gjithmonë i përfshirë në mënyrë aktive në temë. Xhiruesi zgjedh se ku fillon dhe përfundon storia, vendos kuadrin dhe është pjesë e procesit të tregimit, në një mënyrë që ngjan me rolin e një gazetari.
Z. Konjusha ka punuar në Radio Televizionin e Prishtinës, në Radio Televizion Kroat dhe në Radio Televizionin e Kosovës, duke kontribuar me profesionalizmin dhe përkushtimin e tij në krijimin e materialeve cilësore.
Përveç angazhimit të tij profesional, Ahmet Konjusha është njohur edhe për përkushtimin ndaj paqes dhe harmonisë ndërkombëtare. Ai është nderuar me titullin ‘Ambasador i Paqes’ nga Universal Peace Federation, si një vlerësim për përkushtimin dhe veprimtarinë e tij në promovimin e vlerave morale dhe harmonisë ndërfetare.
Para pesë ditësh, ai u pensionua, duke përmbyllur një rrugëtim profesional që ka lënë gjurmë në historinë e gazetarisë vizuale në Kosovë. Ahmet Konjusha mbetet një shembull frymëzimi për të gjithë ata që aspirojnë të ndjekin pasionin për xhirimin dhe të punojnë me përkushtim në fushën e medias.
Janë këto gra që kanë një rol të jashtëzakonshëm në sukseset e kompanive të tyre dhe në zhvillimin e përgjithshëm teknik e teknologjik në botë.
Ato janë pronare ose menaxhere të kompanive shumë të suksesshme. Të arriturat e tyre personale ose të kompanive që i drejtojnë ato, janë të njohura në mbarë botën.
Marissa Mayer
Marissa Mayer është Drejtoreshë e kompanisë “Yahoo”. Vetë pozicioni që ka dëshmon për dijen dhe aftësitë e saj. Ajo ka vizion të qartë dhe di çfarë dëshiron. Ajo ka marrë shumë vendime të shkëlqyeshme për zhvillimin e kompanisë. Detyrë e saj ka qenë fuqizimi i kulturës afariste të kompanisë dhe të krijojë një menaxhment që mund të përmbushte kërkesat e saj për zhvillim dhe duket se ia ka dalë.
Meg Witman
Meg Witman është drejtoreshë ekzekutive e kompanisë HP. Më parë ajo ka qenë zëvendëspresidente për planifikim strategjik e Kompanisë “The Walt Disney” dhe ka dhënë kontribut të rëndësishëm në zhvillimin e kompanisë në vitet e 80-ta. Pasuria e saj sot llogaritet 1.9 miliardë dollarë.
Susan Wojcicki
Suzan Wojcicki konsiderohet grua për të cilën nuk ka “mision të pamundur”. Njeriu i parë i Googles, Larry Page thotë se për Susanën “nuk ekziston e pamundura”.
Ndonëse është vetëm 45-vjeçe, ajo ka arritur suksese të mëdha afariste. Susan tani është shefe e kompanisë “YouTube”. Por, kjo nuk e pengon fare të kujdeset për katër fëmijët e saj.
Safra Catz
Safra Catz konsiderohet si gruaja më e fuqishme në botën e biznesit. Aktualisht është Presidente dhe Drejtoreshë Ekzekutive e kompanisë “Oracle”. Asaj i atribuohen vendime shumë të rëndësishme dhe veprime shumë të suksesshme. Ajo është përgjegjëse për transaksione të shumta fitimprurëse. Me profesion është avokate dhe ka përpara një kontest të vështirë dhe një mision tjetër të rëndësishëm.
Ursula Burns
Ursula Burns është Presidente dhe Drejtoreshë Ekzekutive e Kompanisë “Xerox”. Ajo është meritore për ristrukturimin e suksesshëm të kompanisë, në tri vitet e fundit. Ursula e ka filluar punën në vitin 1980. Atëherë as nuk ka mundur ta imagjinojë se vetëm 30 vjet më vonë do të arrinte në pozitën e Presidentes së këtij gjiganti.
Cher Wang
Cher Wang cilësohet si krenaria e Tajvanit. Ajo është bashkëthemeluese dhe Presidente e gjigantit të smartfonëve HTC. Ajo, së bashku me burrin e saj, e kanë themeluar këtë kompani në vitin 1997 dhe kanë arritur ta shndërrojnë atë në njërin prej prodhuesve më të mëdhenj të telefonave të mençur. Pasuria e Cher Wang vlerësohet mbi 8 miliardë dollarë.
Mary Meeker
Mary Meeker është e njohur për arritjet në fushën e internetit. Në mbarë botën njihet për njohuritë e saj në fushën e teknologjisë dhe zhvillimit të internetit. Ajo është përfshirë në investimet për zhvillimin e kompanive: Twitter, Groupon, Spotify, Jawbone.
Mary Meeker sot renditet në pozitën e 42-të të listës së Forbs-it.
San Jafang
San Jafang është Presidente e kompanisë R&D dhe punon për përmirësimin e marketingut. Në vitin 2012 ishte fituese e çmimit dhe mirënjohjes për arritjet e saj në këtë kompani. Ajo është një prej mbështetësve të fuqishëm të projektit për rrjetizimin global.
Cheryl Sandberg
Cheryl Sandberg është Drejtoreshë Operative e Facebookut dhe “dora e djathtë” e Marc Zuckerbergut. Njeriu kryesor i Facebook-ut është njohur me Cheryl-in në festën e Kërshëndellave të vitit 2007, kur ajo punonte për “Google”. Një vit më vonë ai ia ofroi asaj pozitën e Drejtoreshës Operative dhe sot konsiderohet më meritorja për rritjen e numrit të shfrytëzuesve të këtij rrjeti social gjigant.
Cheryl Sandberg e ka mbaruar ekonominë në Universitetin e Harvardit. Ajo është e martuar dhe i ka dy fëmijë.
Jenny Rometty
Jenny Rometty renditet e fundit në listën e dhjetë grave më të suksesshme në botën e biznesit e teknologjisë. Por, ajo është njësoj e suksesshme dhe njësoj e rëndësishme për zhvillimin e progresin në këtë fushë.
Stacioni Policor i Graçanicës ka shpallur në kërkim një grua të dyshuar për vjedhje në një qendër tregtare.
Siç njofton Policia, kjo kërkesë është e mbështetur në autorizimin e nxjerrë nga Prokuroria Themelore – Departamenti i Përgjithshëm në Prishtinë.
“Me qëllim të zbatimit efikas të procedurës, në hetimin që po zhvillohet për rastin “Vjedhja ” të ndodhur më 05.01.2025, në një qendër tregtare, kërkojmë nga publiku i gjerë kontributin qytetar që me informacionet e tyre të ndihmojnë në identifikimin e të dyshuarës sipas tipareve fizike apo lokalizimin e vendndodhjes së saj.
Ne vlerësojmë lartë bashkëpunimin me komunitetin për një shoqëri pa krim, andaj presim që informacionet tuaja t’i kontribuojnë identifikimit dhe arrestimit sa më të shpejtë të saj”, thuhet tutje në njoftimin e policisë në Facebook.
Trupat ajrore nga ShBA-ja, Zvicra dhe Hungaria, pjesë e Komandës Rajonale Lindje në kuadër të misionit të KFOR-it të udhëhequr nga NATO, realizuan një fluturim ndërkombëtar të përbashkët në Kampin Bondsteel të Ferizajt.
Gjatë kësaj stërvitjeje, trupat amerikane pilotuan helikopterin UH-60 Blackhawk, hungarezët përdorën H-145M, ndërsa zviceranët fluturuan me AS-532 Cougar.
“KFOR thekson se vazhdon të zbatojë mandatin e tij, të bazuar në Rezolutën 1244 të Këshillit të Sigurimit të OKB-së, për të kontribuar në një ambient të sigurt për të gjitha komunitetet në Kosovë dhe për të garantuar lirinë e lëvizjes. Misioni operon në bashkëpunim të ngushtë me Policinë e Kosovës dhe EULEX-in”, shkruhet tutje në njoftimin e KFOR-it në Facebook.
