Punëtorët e Kompanisë “Pastrimi” kanë vazhduar edhe sot grevën e nisur dje pranë objektit të Komunës së Prishtinës.
Ata po e shprehin pakënaqësinë e tyre përmes vendosjes së kamionëve të punës si shenjë revolte përpara Komunës.
Sipas punëtorëve qëllimi i grevës është paga më të mira, kushte të dinjitetshme pune dhe furnizim me derivate për mjetet e punës.
Pas raportimeve se inteligjenca amerikane beson se Izraeli po shqyrton mundësinë e një sulmi ndaj objekteve bërthamore të Iranit, Garda Revolucionare iraniane ka lëshuar një paralajmërim të ashpër, shkruan Gazeta Sinjali.
Zëdhënësi i Gardës, Alimohammad Naini, përmes mediave shtetërore, tha se “Izraeli po gabon rëndë” dhe paralajmëroi se çdo sulm ndaj Republikës Islamike “do të marrë përgjigje shkatërruese dhe vendimtare”.
“Përpjekjet e tyre për të na frikësuar me luftë janë të kota. Ata nuk janë të vetëdijshëm për mbështetjen e fortë popullore dhe kapacitetet tona ushtarake”, deklaroi ai, sipas Reuters.
Ndërkohë, të premten në Romë, Teherani dhe Uashingtoni pritet të zhvillojnë raundin e pestë të bisedimeve për çështjen bërthamore iraniane, mes tensioneve për pasurimin e uraniumit — një zhvillim që SHBA e konsideron si potencial për ndërtimin e armës bërthamore. Irani ka mohuar vazhdimisht se programi i tij ka qëllime ushtarake, duke theksuar përdorimin civil të tij.
Nuk ka ende konfirmim nëse Izraeli ka marrë një vendim përfundimtar mbi një ndërhyrje ushtarake, por tensionet mes dy vendeve mbeten të larta, sidomos pas përplasjeve të drejtpërdrejta ushtarake të ndodhura në prill dhe tetor të vitit të kaluar. Këto zhvillime po rrisin frikën për një përshkallëzim të ri në Lindjen e Mesme.
Ekipet e OKB-së kanë mbledhur mbi 90 kamionë me ndihma humanitare brenda Rripit të Gazës, vetëm tre ditë pasi Izraeli lehtësoi bllokadën 11-javore, raporton Gazeta Sinjali.
Ndihmat përfshijnë miell, ushqim për fëmijë dhe pajisje mjekësore, të cilat u transportuan nga pika kaluese e Kerem Shalom dhe u dërguan në depo për shpërndarje. Fotografitë treguan një furrë buke që po prodhonte bukë me një pjesë të miellit të ardhur, transmeton BBC.
Megjithatë, OKB ka paralajmëruar se vonesat ishin për shkak të pasigurisë përgjatë rrugës së vetme të aksesit të miratuar nga ushtria izraelite, ndërsa autoritetet izraelite lejuan 100 kamionë shtesë përmes Kerem Shalom.
Organizatat humanitare theksojnë se ndihmat nuk janë “as afër për të përmbushur nevojat e mëdha në Gaza”, ku 2.1 milionë banorë përballen me nivele akute të urisë, mungesa të mëdha ushqimore dhe rritje çmimesh, përfshirë një rritje të kequshqyerjes akute tek fëmijët.
Prej dekadash, mushkonjat kanë qenë në qendër të përpjekjeve globale për kontrollin e sëmundjeve infektive. Por ndërsa përfitimet shëndetësore nga zhdukja e një pjese të tyre janë të qarta, pasojat për ekosistemin mbeten një pikë debati mes shkencëtarëve.
Në vitin 1958, një lajm shpresëdhënës doli nga Brazili: Organizata Pan-Amerikane e Shëndetësisë (PAHO) shpalli zhdukjen e mushkonjës ‘Aedes aegypti’, vektorit të etheve të dengut dhe etheve të verdha, pas një fushate intensive që përfshinte heqjen e ujërave të ndenjura dhe përdorimin e insekticidit DDT.
Suksesi i fushatës shtrihej përtej kufijve të Brazilit, edhe vende si Argjentina, Paraguai dhe Bolivia e zhdukën përkohësisht këtë specie.
Megjithatë, fitorja rezultoi jetëshkurtër ‘aegypti’ nuk u zhduk kurrë plotësisht nga vende si Kolumbia dhe Gujana, dhe shpejt u rikthye, duke sjellë me vete një valë të re të sëmundjeve tropikale, përfshirë dengun dhe virusin Zika.
Për më tepër, përdorimi masiv i DDT pati pasoja të rënda mjedisore, duke dëmtuar biodiversitetin dhe ekosistemet ku ai u spërkat.
Në vend që të synojë eliminimin e mushkonjave, Programi Botëror i Mushkonjave (WMP), nën drejtimin e Scott O’Neill, po përdor një qasje inovative: infektimin e mushkonjave me bakterin simbiotik Wolbachia. Ky bakter pengon përhapjen e viruseve brenda trupit të mushkonjës, duke ulur aftësinë e saj për të transmetuar sëmundje.
“Pasi mushkonjat me Wolbachia lirohen në mjedis, ato e përhapin bakterin natyrshëm dhe nuk kërkohet më ndërhyrje njerëzore,” shpjegon O’Neill. Rezultatet janë premtuese: në Indonezi, kjo teknikë uli rastet e etheve të dengut me 77%, ndërsa në Australi dhe Kolumbi, përhapja e sëmundjes ra ndjeshëm.
Edhe pse zhdukja e A. aegypti mund të mos trondiste ekosistemet, pasi jeton në qytete dhe ka pak lidhje me zinxhirin ushqimor, zhdukja totale e të gjitha specieve të mushkonjave do të kishte ndikim, sidomos në ushqimin e shpendëve, bretkosave dhe peshqve.
Disa lloje mushkonjash madje ndihmojnë në pjalmimin e bimëve, edhe pse pak specie varen vetëm nga to. Megjithatë, shkencëtarët bien dakord se ndikimi nuk do të ishte aq i madh sa humbja e bletëve, të cilat janë pjalmues jetësorë.
“A. aegypti është buburreci i botës së mushkonjave”, thotë O’Neill, duke nënvizuar qëndrueshmërinë dhe aftësinë e jashtëzakonshme të përshtatjes së këtij insekti, i cili e ka bërë të pamundur eliminimin e tij.
Ndërsa shkenca përparon me qasje të reja biologjike si Wolbachia, lufta kundër mushkonjave si A. aegypti mbetet një sfidë afatgjatë. Qëllimi nuk është më zhdukja totale, por kontrolli inteligjent, që respekton balancat natyrore pa sakrifikuar shëndetin publik. Në këtë betejë delikate, inovacioni, bashkëpunimi ndërkombëtar dhe respekti për natyrën janë armët më të forta që kemi.
Shumica e njerëzve mund të përjetojnë fryrje barku herë pas here. Te disa ndodh ndonjëherë pasi të kenë ngrënë ndonjë shujtë të madhe, por për disa tjerë mund të jetë ndodhi e zakonshme
Fryrja e barkut zakonisht është rezultat i konsumimit të ushqimit që me vështirësi tretet.
Kjo mund të përfshijë ushqimet e pashëndetshme, por edhe disa më të shëndetshme mund ta shkaktojnë këtë, si lakra, brokoli, etj. Edhe qepët me hudhrat dhe fasulet janë shkaktarë të zakonshëm të barkut.
Kur flasim për pijet, ato të karbonizuarat si birra dhe pijet e ëmbla mund të shkaktojnë fryrje me dhembje, pasi që krijojnë gaz të tepërt.
Megjithatë, një pije e zakonshme dhe e përditshme mund të jetë gjithashtu shkaktar i fryrjes së barkut – kafja! – transmeton Telegrafi.
Kafja është pija më e popullarizuar anë e mbanë botës, ku 2 miliardë kafe besohet të konsumohen çdo ditë.
Ndonëse kafeina që gjendet në kafe i rritë nivelet e acidit në lukth, që faktikisht e ndihmojnë tretjen, lëngjet gastrike mund t’i irritojnë disa organe të brendshme nëse jeni duke konsumuar kafe në lukth bosh.
Pra, shumica e njerëzve pinë kafe posa të zgjohen në mëngjes, por kjo gjë vetëm sa mund t’ua fryjë barkun.
Fryrja e barkut mund të keqësohet nëse i shtoni qumësht apo krem kafesë, sepse shumë njerëz kanë probleme ta tretin laktozën.
Thonë se ‘heshtja është flori’ dhe tashmë shkenca duket se e mbështet këtë ‘urti të lashtë’ me të dhëna konkrete. Një studim i ri ka zbuluar se vetëm tre ditë heshtjeje të qëllimshme janë të mjaftueshme për të shkaktuar ndryshime të thella në trurin e njeriut, të krahasueshme me ato që ndodhin pas muajsh meditimi apo trajnimi intensiv kognitiv.
Një nga zbulimet më befasuese të studimit ka të bëjë me hipokampusin, zonën e trurit që merret me kujtesën. Pas vetëm tre ditësh heshtjeje të vazhdueshme, u vu re rritje e qelizave të reja nervore në këtë zonë, një fenomen që deri më sot mendohej se kërkonte ndërhyrje afatgjata. Ky proces i njohur si neurogjenezë është thelbësor për funksionin mendor dhe mbajtjen e memories në formë.
Efektet pozitive ishin edhe më të theksuara tek individët që ekspozohen rregullisht ndaj zhurmës ambientale, si banorët e qyteteve të mëdha apo punonjësit në mjedise me tinguj të fortë. Për këta persona, heshtja funksionoi si një detoksifikim i trurit, duke rikthyer balancën e brendshme dhe qartësinë mendore.
Në aspektin neurologjik, heshtja ndryshon aktivitetin e valëve të trurit, duke kaluar nga valët e shpejta beta (të lidhura me vigjilencën dhe stresin) në valët më të ngadalta alfa dhe teta, të cilat përkojnë me qetësinë, kreativitetin dhe përqendrimin. Brenda tre ditëve, pjesëmarrësit arritën në këto gjendje më lehtë dhe më shpejt.
Heshtja nuk ndikon vetëm në trurin racional, por edhe në atë emocional. Sipas studiuesve, ajo forcon komunikimin mes qendrave emocionale të trurit, duke rritur vetëdijen për shenjat e stresit dhe aftësinë për të reaguar më matur. Pjesëmarrësit raportuan humor më të qëndrueshëm, më pak shpërthime emocionale dhe rritje të qëndrueshmërisë, me efekte që vijuan edhe javë pas përfundimit të periudhës së heshtur.
Një tjetër efekt i habitshëm ishte mprehtësia shqisore. Gjatë testimeve, pjesëmarrësit treguan përmirësim të dukshëm në shikim, nuhatje, shije dhe ndjeshmëri ndaj prekjes. Sipas ekspertëve, kjo vjen si rezultat i rialokimit të burimeve të trurit, i cili në mungesë të stimujve të vazhdueshëm auditivë, i përqendron kapacitetet në perceptimin shqisor.
Një nga përfitimet më të qarta të heshtjes ishte rritja e performancës njohëse. Kujtesa e punës, aftësia për të mbajtur dhe përpunuar informacion në kohë reale – u përmirësua ndjeshëm. Pjesëmarrësit i zgjidhnin më shpejt problemet, kujtonin më lehtë detajet dhe bënin më pak gabime mendore.
Studime afatgjata pohojnë se periudhat e rregullta të heshtjes mund të ngadalësojnë plakjen e trurit dhe të zvogëlojnë dëmtimin nervor të shkaktuar nga stresi kronik.
Sipas studiuesve, dy orë qetësi në ditë, të ndara mes mëngjesit, pasditeve dhe mbrëmjeve, janë të mjaftueshme për të prodhuar efekte të matshme në funksionin e trurit dhe mirëqenien emocionale.
Gjykata Themelore në Prishtinë ka caktuar seancën gjyqësore ndaj Naim Murselit, Kushtrim Kokallës dhe Granit Plavës për 4 qershor 2025. Kështu konfirmoi zëdhënësja e kësaj Gjykate, Mirlinda Gashi.
Naim Murseli, Granit Plava, Kushtrim Kokalla dhe Tom Dodaj, ngarkohen për rastin e vrasjes së Liridona Ademajt më 29 nëntor 2023. Ajo ishte duke u kthyer në shtëpinë e saj, e shoqëruar nga bashkëshorti dhe dy fëmijët, teksa u qëllua për vdekje me plumb në qafë.
Në seancën fillestare të mbajtur më 31 janar 2025, Naim Murseli u deklarua i pafajshëm për vrasjen e bashkëshortes së tij Liridona Ademajt, Granit Plava nuk u deklarua rreth fajësisë, kurse Kushtrim Kokalla tha se nuk deklarohet pa u konsultuar me mbrojtjen. Ndërsa, fajtor u deklarua i akuzuari Tom Dodaj. Ky i fundit, pasi pranoi fajësinë u dënua me 5 vjet burgim dhe 5 mijë euro gjobë.
Kadetët nga Qendra për Studime Universitare e Forcës së Sigurisë së Kosovës kanë marrë pjesë në një stërvitje të rëndësishme ndërkombëtare “Eagle Strike 2025”, e cila u zhvillua në Rreth-Greth të Shqipërisë.
Kjo stërvitje u organizua nën drejtimin e Gardës Kombëtare të New Jersey-it nga Shtetet e Bashkuara të Amerikës dhe përfshiu pjesëmarrës nga disa shtete partnere.
“Pjesë e këtij trajnimi ishin gjithashtu kadetë nga Kursi i Përgatitjes për Oficerë i FARSH-së dhe kandidatë për oficerë nga Garda Kombëtare e New Jersey-it, duke forcuar bashkëpunimin, zhvillimin e lidershipit dhe ndërveprimin ndërmjet forcave partnere”, thuhet në njoftim.
Postimi i plotë:
Qendra për Studime Universitare pjesë e stërvitjes “Eagle Strike 2025”
Në kuadër të bashkëpunimit ndërkombëtar në fushën e trajnimeve ushtarake, kadetë nga Qendra për Studime Universitare e FSK-së, morën pjesë në stërvitjen “Eagle Strike 2025”, e cila u zhvillua në Rreth-Greth, Shqipëri, nën drejtimin e Gardës Kombëtare të New Jersey-it nga Shtetet e Bashkuara të Amerikës.
Pjesë e këtij trajnimi ishin gjithashtu kadetë nga Kursi i Përgatitjes për Oficerë i FARSH-së dhe kandidatë për oficerë nga Garda Kombëtare e New Jersey-it, duke forcuar bashkëpunimin, zhvillimin e lidershipit dhe ndërveprimin ndërmjet forcave partnere.
Gjatë këtij trajnimi, kadetët u angazhuan në skenarë realë të nivelit taktik, duke përfshirë planifikim ushtarak, manovrime në terrene të vështira dhe kapërcimin e pengesave ujore. Një përgatitje e plotë për përballje me sfida komplekse në operacione të ardhshme.
Dy zyrtarë policorë të Njësitit të Trafikut në Pejë po përballen me drejtësinë, pasi Prokuroria Themelore në Pejë ka ngritur aktakuzë ndaj tyre për veprën penale të marrjes së ryshfetit.
Në aktakuzën e ngritur nga Prokuroria, bëhet e ditur se ngjarja ka ndodhur më 20 prill 2025 në fshatin Poterq të Klinës, ku zyrtarët A.Sh. dhe S.K. kishin ndaluar një veturë të tipit Golf 8 për tejkalim të shpejtësisë. Në vend se të vepronin sipas procedurave ligjore dhe t’i shqiptonin gjobë shoferit, ata dyshohet se i kërkuan 20 euro, të cilat i kërkuan t’ua dërgonte përmes një pompe të derivateve në Pejë.
Dëshmitari, që është punonjës i pompës së derivateve, kishte pranuar kartëmonedhën dhe më pas ia kishte dorëzuar atë zyrtarit policor A.Sh.
“Me këto veprime ekziston dyshimi i bazuar mirë se të pandehurit kanë përmbushur elementet e veprës penale të përshkruar si me lartë. Prokurori i çështjes me rastin e ngritjes se aktakuzës, i ka propozuar gjykatës që të pandehurit të shpallën fajtore dhe të dënohen sipas ligjit për veprën penale e cila ju vihet në barrë. Po ashtu, prokurori i shteti me rastin e ngritjes se aktakuzës , ka propozuar gjykatës që të pandehurve t’ju shqiptohet edhe ndalimi i ushtrimit të profesionit”, thuhet nga Prokuroria Themelore e Pejës.
Dije Agushi, një stjuardesë shqiptare ishte e ftuar në emisionin “STUDIO A” në ATV, e cila foli gjerë e gjatë për jetën e saj profesionale, private dhe jo vetëm.
Duke qenë se jeta si stjuardesë ka disa sakrifica, për shembull mungesat në ngjarje të rëndësishme familjare, Dija foli për shumë raste të shumta që ajo ka munguar, derisa mes lotësh rrëfeu për humbjen e babait të saj, gjatë kohës së pandemisë.
“Më ka ndodhur të mungoj për raste apo ngjarje të rëndësishme për neve si shqiptar që jemi, si për shembull për natën e Vitit të ri, për festën e Bajramit etj., por rasti që më së shumti që më dhemb që unë kam munguar është kur më vdiq babi. Ishte koha e COVID-it
dhe unë isha në Kuvait edhe të gjitha aeroportit ishin të mbyllura dhe akoma vazhdoj ta kem si dhimbje këtë rast që nuk arrita te jem pranë babait kur ai humbi jetën”, tregoi ajo.
Për më shumë ndiqni videon e mëposhtme:
LEXONI EDHE:
Stjuardesja tregon si i dallon shqiptarët në avion gjatë fluturimit hiç pa folur