Author: G.O.

Një burrë në Fushë-Kosovë ka raportuar në polici se e bija e tij ka dalë nga banesa dhe se nuk kanë informacione për vendndodhjen e saj.

Hetimet e policisë janë ende në vazhdim.

“Ankuesi mashkull kosovar me 30.05.2025 ka raportuar se vajza e tij ka dalë nga banesa dhe nuk dihet vend ndodhja e saj. Rasti është duke u hetuar”, thuhet në raportin e policisë.

Oda Ekonomike e Kosovës sot nga ora 12:00 do të mbajë konferencë për media.

Të premten e 29 majit, Oda Ekonomike bashkë me bizneset e shumta kosovare, e gjithashtu me odat e tjera, dolën dhe protestuan në Prishtinë, për shkak të vendimit të ZRrE-së për liberalizimin e tregut të energjisë.

Në protestën që bllokoi rrugët kryesore të kryeqytetit, u paralajmërua se nëse nuk plotësohen kërkesat e parashtruara të bizneseve, ato nuk do të ndalen.

Sot, e shtunë parashihet të mbajë mot me diell dhe vranësira të shpërndara.

Sipas Institutit Hidrometeorologjik të Kosovës, temperaturat minimale do të lëvizin ndërmjet 6-8 gradë Celsius, ndërsa maksimalet e ditës parashihen të lëvizin ndërmjet 20- 24gradë Celsius.

Do të fryjë erë kryesisht nga jugperëndimi me shpejtësi 1-5m/s. 

Shefi i kabinetit të kryeministrit Albin Kurti, Luan Dalipi, ka reaguar pasi që zyrtarë të Partisë Demokratike e Kosovës, kanë thënë se njëra nga kompanitë që ka aplikuar për licencim për shitblerje të energjisë është e themeluar nga Dalipi.

Në një postim në Facebook, ai ka shkruar se kompania është e vëllait të tij, i cili para një viti ka vendosur ta provoj fatin në tregun e liberalizuar të energjisë, si çdo qytetar tjetër në këtë vend.

Ministria e Financave e ka quajtur të pasaktë deklaratën e institucionit të Avokatit të Popullit lidhur me kërkesën për verifikimin e rezidencës për përfituesit e shtesave për fëmijë.

Avokati i Popullit ka konstatuar se veprimet e MF-së kanë mundur të mos kenë qëllim shkeljen e të drejtave të qytetarëve, por se i gjithë procesi i verifikimit “ka qenë në kundërshtim me parimet e procedurës administrative”.

Ministria ka thënë se verifikimi është bërë për t’u siguruar se nga shtesat përfitojnë familjet që jetojnë në Kosovë, për çka edhe ka pezulluar përkohësisht pagesat për një numër të kufizuar të përfituesve, duke kërkuar dokumentacion shtesë me qëllimin e verifikimit të vendbanimit të tyre.

Pezullimi i shtesave për disa fëmijë, Avokati i Popullit i drejtohet Ministrisë së Financave

Kreu i LDK-së, Lumir Abdixhiku, ka pritur sot në selinë e LDK-së, Ambasadorin e Francës, Olivier Guerot, me të cilin kanë biseduar rreth zhvillimeve politike në vend, krizës institucionale dhe për qëndrimin e LDK-së karshi kësaj situate.

Abdixhiku në takim ka ritheksuar propozimin e LDK-së për themelimin e një Qeverie të Unitetit si rrugë për dalje nga kriza institucionale.

“Ai edhe njëherë tha se një qeveri e tillë përbën një zgjidhje të përkohshme, por të domosdoshme për të tejkaluar ngërçin politik dhe për të rikthyer funksionalitetin e institucioneve demokratike në vend”, thuhet në njoftimin e LDK-së, shkruan Express.

Abdixhiku tutje ka thënë se bllokada politike dhe institucionale është e papranueshme.

“Dështimi për të 23-tën herë radhazi është rezultat i paaftësisë së partisë fituese për të krijuar shumicë parlamentare funksionale dhe se ky bllokim përbën një rrezik serioz për mirëqenien e qytetarëve, zhvillimin institucional të vendit dhe rrjedhën normale të proceseve shtetërore”, ka thënë Abdixhiku.

Presidentja e Kosovës, Vjosa Osmani, ka pranuar sot letrat kredenciale nga ambasadori i ri i Hungarisë në Kosovë, z. László István Dux.

Ceremonia u zhvillua në institucionin e presidencës, ku Osmani i uroi mirëseardhjen ambasadorit dhe vlerësoi marrëdhëniet e mira ndërmjet dy vendeve.

Në postimin e presidencës në Facebook, theksohet se Hungaria ishte ndër vendet e para që njohu pavarësinë e Kosovës, duke theksuar rëndësinë e bashkëpunimit të mëtejshëm. Presidentja Osmani shprehu përkushtim për zgjerimin e marrëdhënieve në fusha me interes të përbashkët, duke përfshirë arsim dhe ekonomi.