Author: G.O.

Sot në vendin tonë pritet të mbajë mot paksa më i freskët, me intervale kohore me diell dhe vranësira të cilat do të zhvillohen duke kushtëzuar rrebeshe lokale shiu me vetëtima dhe bubullimë.

Temperaturat do të shënojnë ulje të lehta dhe ajo maksimale parashihet të arrijë deri në 27 apo 28 gradë Celsius.

Në Shqipëri, Maqedoninë Veriore, Luginë të Preshevës dhe Mal të Zi e enjtja sjellë mot me intervale kohore me diell dhe vranësira lokale.

Temperaturat do të shënojnë ulje kryesisht të lehta, ndërsa priten zhvillime të rrebesheve lokale të shiut me vetëtima dhe bubullimë, më pak në Maqedoni. Reshjet ende nuk do të jenë gjithëpërfshirëse.

Ambasada e Francës në Kosovë ka ripërsëritur thirrjen që autorët e sulmit të Banjskës të dalin para drejtësisë.

Thirrja e Francës erdhi në përvjetorin e dytë të këtij sulmi ku vdiq polici Afrim Bunjaku.

“Dy vjet pas sulmit kriminal në Banjskë i cili mori jetën e rreshterit Afrim Bunjaku, mendimet tona janë me familjen e tij. Franca vazhdon të bëjë thirrje që autorët e këtij sulmi vdekjeprurës të sillen para drejtësisë”, thuhet në postimin e kësaj ambasade.

Në këtë përvjetor edhe ambasada gjermane dhe ajo britanike kërkuan që autorët e sulmit të para dy vjetëve të përballen me drejtësinë.

Ukraina së shpejti do të sqarojë detajet ligjore të një sipërmarrjeje të përbashkët prodhimi armësh me SHBA-në.

Kështu ka thënë të mërkurën ambasadorja e Kievit në Uashington, duke treguar se bëhet fjalë për një proces, si pjesë e një përpjekjeje kritike për të forcuar industrinë e mbrojtjes së Ukrainës.

Zyrtarët shpresojnë të rrisin prodhimin vendas të armëve me ndihmën perëndimore, ndërsa ushtria po i kundërvihet forcave ruse më të mëdha dhe më të armatosura në vitin e katërt të luftës.

Olha Stefanishyna tha se një delegacion ukrainas do të vizitojë SHBA-në më 30 shtator, pasi mori një “sinjal pozitiv” nga presidenti Donald Trump, i cili u takua me udhëheqësin ukrainas Volodymyr Zelensky në Nju Jork të martën.

“Pati një reagim shumë të gjallë nga presidenti amerikan. Ai kaloi disa minuta duke admiruar inovacionin (dhe) aftësitë e Ukrainës”, tha ajo në televizionin ukrainas.

Të dy udhëheqësit kishin diskutuar më parë konturet e një marrëveshjeje të përbashkët prodhimi që përfshinte dronë, për të cilën Zelensky tha se kanë marrë mbështetje politike nga Trump.

Trump të martën shprehu gjithashtu mbështetje të re për përpjekjet e luftës së Kievit, duke sugjeruar se duhet të vazhdojë të luftojë për të rimarrë më shumë territor të tij. /Telegrafi/

Në Prishtinë po mbahet një akademi përkujtimore në nderim të policit të vrarë në sulmin në Banjskë, Afrim Bunajku.

Para të pranishmëve, një fjalim mbajti edhe djali i vogël i Afrim Bunjakut, Fatlumi,

Ai deklaroi se plagët e mungesës së babait të tij nuk shërohen kurrë.

“Jemi mbledhur këtu për ta kujtuar, babain, heroin, Afrim Bunjaku. Kanë kaluar dy vite nga ajo ditë e dhimbshme, kur ai ra heroikisht, por plagët e mungesës së tij nuk shërohen kurrë. Çdo mëngjes kur zgjohem e ndjej boshllëkun që ka lënë, e kujtoj buzëqeshjen dhe fjalë e tij”, ka deklaruar ai.

Ai shtoi më tej, se bashkë me mallin që ka, ai e di se babai i tij ra për një ideal më të madh, për atdheun, kufijtë, e Kosovën.

“Është e rëndë ta them, por edhe pse nuk është pranë meje, unë ndihem krenar që pata një baba si ai. Sa herë që i takoj kolegët e tij, e di që babai nuk ishte vetëm i imi, por i gjithë Kosovës. Babai im prehu i qetë, ne do të kujtojmë gjithmonë”, tha ai.

Heroi Afrim Bunjaku u vra nga forca terroriste serbe më 24 shtator në Banjskë të Zveçanit.

Rusia i mohoi pretendimet e NATO-s se Moska ka shkelur hapësirën ajrore të aleancës, duke i cilësuar si “histeri”.

Këto deklarata vijnë një ditë pasi presidenti amerikan, Donald Trump, tha se aleatët duhet të rrëzojnë avionë rusë nëse ata shkelin hapësirën ajrore të tyre.

Shtetet e NATO-s kanë thënë se disa avionë luftarakë dhe dronë rusë kanë shkelur hapësirat ajrore të shteteve evropiane gjatë javëve të fundit, duke e akuzuar Moskën se po teston kufijtë e aleancës ushtarake perëndimore.

“Ne po dëgjojmë një histeri të ekzagjeruar lidhur me pilotët tanë ushtarakë që gjoja po shkelin disa rregulla dhe po shkelin hapësirën ajrore të ndonjë shteti”, tha zëdhënësi i Kremlinit, Dmitry Peskov, duke shtuar se këto pretendime ishin “të pabaza”.

Më 23 shtator, Trump tha se shtetet e NATO-s duhet të rrëzojnë avionët rusë nëse ata shkelin hapësirat e tyre ajrore.

Avionët e NATO-s kanë detektuar tre avionë luftarakë rusë MiG-31 javën e kaluar, pasi ata hynë në hapësirën ajrore estoneze mbi Gjirin e Finlandës.

Më 22 shtator, Danimarka u detyrua të mbyllë një aeroport në Kopenhagë pasi tha se dronë të paidentifikuar detyruan dhjetëra fluturime të anuloheshin apo të ndryshonin itinerarin, duke prekur mijëra pasagjerë.

“Aviacioni ynë ushtarak respekton të gjitha rregullat e fluturimeve, udhëhiqet nga to dhe iu përmbahet në mënyrë të rreptë”, tha Peskov gjatë një konference për media për gazetarët.

NATO tha një ditë më parë se “është ende herët të thuhet” nëse dronët që fluturuan mbi Danimarkë lidhen me shkeljet e fundit të hapësirës ajrore të aleancës nga Rusia.

Incidentet pasojnë inkursionet me dronë në Rumani dhe Poloni. Në Poloni, disa fluturake pa pilot u rrëzuan nga avionët e NATO-s.