Author: G.O.

Një sulm me dron ka goditur një qendër tregtare në qytetin izraelit të Eilatit, duke lënë të plagosur 24 persona, dy prej të cilëve në gjendje të rëndë.

Ngjarja ndodhi pasditen e së mërkurës në qytetin strategjik në Detin e Kuq.

Ushtria izraelite ia ka atribuuar sulmin rebelëve Houthi të Jemenit, të cilët veprojnë në mbështetje të Hamasit. Ndërkaq, është bërë e ditur se sistemi i mbrojtjes ajrore “Kupola e Hekurt” dështoi të neutralizonte dronin që kishte hyrë në hapësirën izraelite.

Ky sulm pason një seri tensionesh të shtuara, ku rebelët Houthi, të mbështetur nga Irani, kanë intensifikuar lëshimin e dronëve drejt Izraelit. Si kundërpërgjigje, forcat izraelite kanë bombarduar infrastrukturën ushtarake në Jemen.

Një rast i zhdukjes së një personi është raportuar në Polici gjatë mbrëmjes të së martës në Prishtinë.

Familjarët kanë njoftuar autoritetet se kanë humbur kontaktet me të afërmin e tyre dhe nuk kanë asnjë informacion për vendndodhjen e tij aktuale.

Sipas njoftimit zyrtar, ankuesi ka deklaruar në polici se vëllai i tij është larguar nga shtëpia e tyre në rrugën “Mon Balaj” dhe që atëherë nuk është kthyer.

Menjëherë pas pranimit të informacionit, Policia ka nisur procedurat standarde hetimore dhe ka hapur rastin si “Person i zhdukur”, ndërkohë njësitet përkatëse janë vënë në kërkim për gjetjen e tij.

Policia në rajonin e Pejës ka iniciuar dy raste të ndara për posedim të paautorizuar të armëve gjatë dy ditëve të fundit.

Një rast përfshin kontrollin në një pronë private në qytetin e Pejës, ndërsa tjetri ka ndodhur brenda një institucioni arsimor në fshatin Jabllanicë e Vogël.

Në rastin e parë, të mërkurën në mëngjes, njësitet policore kanë gjetur dhe konfiskuar pesëmbëdhjetë gëzhoja të kalibrave të ndryshëm gjatë kontrollit në shtëpinë e një të dyshuari.

Ndërkohë, një ditë më parë, një mjet i mprehtë i llojit brisk i ishte konfiskuar një nxënësi të shkollës së mesme nga ana e mësimdhënësit të tij

Të dyshuarit në të dyja rastet janë shoqëruar në në stacionin policor për intervistim, ndërsa me vendim të prokurorit kompetente, ata janë liruar në procedurë të rregullt.

Xhandarmëria kombëtare franceze është dislokuar në Kosovë si pjesë e një njësie rezervë të EULEX-it.

Sipas Ambasadës së Francës, ky dislokim synon të mbështesë stabilitetin, veçanërisht në prag të mbajtjes së zgjedhjeve lokale në vend.

Në njoftimin zyrtar, ambasada thekson se xhandarmëria është krenare që po jep kontributin e saj, së bashku me partnerët evropianë, në forcimin e sigurisë në vend për të gjitha komunitetet.

Forcat franceze do t’i shërbejnë misionit të EULEX-it si njësi mbështetëse, e gatshme të intervenojë sipas nevojës.

Aeroportet në Danimarkën perëndimore janë rihapur mëngjesin e së enjtes, pasi kishin qëndruar të mbyllura për disa orë, kur dronë të paidentifikuar hynë gjatë natës në hapësirën e tyre ajrore.

Ky ishte incidenti i dytë i tillë i sigurisë në vendin nordik këtë javë.

Billund, aeroporti i dytë më i madh në Danimarkë, u mbyll për një orë, ndërsa ai i Aalborgut, i përdorur si për fluturime civile ashtu edhe për ato ushtarake, u mbyll për tri orë për shkak të futjes së dronëve të mërkurën natën, tha Policia daneze, transmeton Radio Evropa e Lirë.

Dronë u vunë re gjithashtu pranë aeroporteve në Esbjerg dhe Sonderborg, si dhe në bazën ajrore Skrydstrup, ku mbahen disa prej avionëve luftarakë F-16 dhe F-35 të Danimarkës.

Që të pesë këto pika ndodhen në gadishullin Jutland në perëndim të Danimarkës.

Morten Skov, banor i kësaj pjese, i tha agjencisë së lajmeve Reuters se pa drita të gjelbra që pulsonin nga perëndimi i aeroportit Aalborg, të cilat “qëndronin pezull pikërisht mbi” objektin. Në një video të ndarë me Reuters nga Skov, shihet një dritë që largohet nga aeroporti drejt perëndimit.

Policia kombëtare daneze tha se dronët ndoqën një model të ngjashëm me ata që kishin ndalur fluturimet në aeroportin e Kopenhagenit të hënën natën dhe të martën në mëngjes.

Policia e përshkroi incidentin si “sulmin” më serioz deri tani ndaj infrastrukturës kritike dhe e lidhi me një sërë shkeljesh të dyshuara të hapësirës ajrore nga dronë rusë dhe pengesa të tjera nëpër Evropë, pa dhënë prova konkrete.

Ambasadori i Rusisë në Danimarkë, Vladimir Barbin, mohoi çdo përfshirje të vendit të tij në incidentin e Kopenhagenit./REL

Policia e Kosovës ka njoftuar për një rast të lëndimit të rëndë trupor.

Rasti ka ndodhur në Kijevë të Malishevës, të mërkurën në ora 15:39.

“Është arrestuar i dyshuari mashkull kosovar, pasi dyshohet se ka shtënë me armë zjarri në drejtim të viktimës mashkull kosovar, duke e qëlluar në këmbë”, thuhet në raport.

Nga i dyshuari është konfiskuar arma pistoletë dhe i njëjti pas intervistimit me vendim të prokurorit është dërguar në mbajtje.

Një person 32 vjeçar është arrestuar sot nën dyshimi për “Dhënie ndihmë kryesit pas kryerjes së veprës së penale” në Fushë Kosovë.

Sipas njoftimit të Policisë së Kosovës bëhet e ditur se dyshohet se ka strehuar dhe ndihmuar një person tjetër të dyshuar për “Vrasje e rëndë në tentativë”.

“Hetuesit e Sektorit Rajonal të Hetimeve në Mitrovicën e Jugut, si rezultat i hetimeve dhe veprimeve të ndërmarra gjatë ditës së sotme, kanë arrestuar një person të dyshuar për veprën penale ‘Dhënie ndihme kryesit pas kryerjes së veprës penale’. I dyshuari, mashkull kosovar 32-vjeçar, është arrestuar në qytetin e Fushë-Kosovës, pasi dyshohet se ka strehuar dhe ndihmuar një person tjetër të dyshuar për veprën penale ‘Vrasje e rëndë në tentativë’, e cila kishte ndodhur në muajin korrik 2025 në fshatin Stanovcë të Vushtrrisë”, thuhet në njoftim.

Ndërkaq, siç bëhet e ditur në njoftim pas intervistimit, me aktvendim të prokurorit, të dyshuarit i është caktuar masa e ndalimit policor. /Telegrafi/