Author: G.O.

Erion Veliaj ka reaguar nga qelia pas shkarkimit të tij nga detyra e kryetarit të Bashkisë së Tiranës, marrë nga qeveria.

Në një reagim të gjatë në rrjetet sociale Veliaj deklaron ndër të tjera se është “më i fortë se kurrë në betejë me të ligën”.

Veliaj thotë se Shqipëria nuk është një “koloni penale dhe s’duhet lejuar kurrë kjo re e zezë frike që ka kapluar vendin në emër të drejtësisë së re”.

Reagimi i Erion Veliajt:

Uroj të jeni mirë! Mirënjohje për qindra letrat tuaja, që më japin kurajë çdo ditë. Jam mirë, më i fortë e më i vendosur se kurrë në betejë me të ligën!

Po postoj për të gjithë, rrëfimin e parë të një serie rrëfimesh, nga ata që, me ose pa dashje, kontribuan në kurthin e ngritur ndaj meje, që prodhoi një hetim të paligjshëm nga anonimati, një vetting 20 vjeçar të të gjithë jetës sime nga rinia, një Kryeqytet të sabotuar teksa ishte në kulmin e suksesit, një persekutim çnjerëzor të familjes sime, e një izolim grotesk, si të isha kriminel lufte apo drejtues kartelesh.

Lexojeni, se prej kësaj gënjeshtre të parë nisën protestat e rreme, u amplifikuan me kallëzime anonime, u ngjizën akuza me kërcënim dëshmitarësh e u bitis me shkallmimin e Kryeqytetit tonë Tiranës. Ndaj, secili duhet ta lexojë apologjinë noteriale të Gabriele Tarroni Longinotti-t, si leksion për të ardhmen.

E bëj këtë për disa grupe:

– [ ] Për italianin, që as më njeh e as e njoh, por që nisi një zinxhir jetëshkatërrues ngjarjesh, që të kuptojë se nuk jam hakmarrës, por ai dhe kushdo tjetër këtu në Shqipëri, duhet të kuptojë që fjalët kanë peshë, e kur janë të rreme thyejnë karriera, qytete e familje, që do duan dekada të rikuperohen.

– [ ] Për të tjerët, që u bënë me vetëdije apo me zell politik pjesë e këtij fabrikimi. Dua t’u them se unë jam i burgosur, por nuk jam në burg. Jam i qetë dhe i çliruar në ndërgjegjen time. Shpresoj që të keni fuqi të çliroheni nga burgu i ligësisë suaj ku keni mbyllur veten, pasi e vërteta e rrëfimi do t’ju bëjë të lirë!

– [ ] Por, më e rëndësishmja e bëj për çdo shqiptar që jeton me frikë mos përgjohet, kërkon linjë të sigurt të flasë me të shtëpisë, kthen kokën pas mos po e ndjekin, vë gishtin mbi buzë se mos dëgjohet, apo fsheh telefonin poshtë vitheve në karrike! Shqipëria nuk është një koloni penale dhe s’duhet lejuar kurrë kjo re e zezë frike që ka kapluar vendin në emër të drejtësisë së re.

Ju përqafoj me mall të gjithëve! Do të luftoj për vete dhe për secilin prej jush!

Pjesë nga rrëfimi noterial më poshtë:

(1) Nuk kam parë kurrë z. Erion Veliaj të udhëtojë, vetëm apo në prani të personave të tjerë, në Itali apo të takojë dikë, aq më pak që qëllimi i një vizite të tillë të kishte lidhje me inceneratorin;

(2) Nuk e kam takuar kurrë z. Erion Veliaj, as personalisht as në prani të personave të tjerë, as në Itali as në Shqipëri, në “Cioccolati Italiani” apo “Tribe”, dhe as nuk kam komunikuar me të, as personalisht as përmes personave të tjerë, me telefonata, mesazhe apo në ndonjë formë tjetër komunikimi;

(3) Nuk kam as njohuri e as prova që z. Erion Veliaj të ketë marrë pjesë apo të ketë qenë i përfshirë në blerjen e inceneratorit që kishim në Rumani;

(4) Të gjitha deklaratat që kam dhënë në lidhje me z. Erion Veliaj, në intervistat e mia për programin “Piranjat” në “Syri TV”, si edhe ato që kam lënë të kuptohet, janë të pavërteta dhe janë bërë prej meje në këmbim të premtimeve nga ana e këtyre mediave televizive dhe personave të afërt me to, për përfitime financiare.

Nga sot pezullohet marrëveshja e lëvizjes së lirë në kufirin Kosovë–Shqipëri. Nga data 1 tetor deri në fillim të nëntorit, marrëveshja e lëvizjes së lirë mes pikave kufitare të Vërmicës dhe Morinës do të pushojë së funksionuari.

Në këtë periudhë, pikat kufitare të Kosovës dhe Shqipërisë do të kryejnë përpunimin e të dhënave të udhëtarëve dhe drejtuesve të automjeteve përmes një procedure të përshpejtuar, me qëllim që të shmangen radhët dhe pritjet e gjata për shkak të fluksit të lartë të lëvizjeve.

Megjithatë, gjatë fundjavave dhe festave zyrtare, qytetarët që udhëtojnë me automjete me targa të Shqipërisë dhe Kosovës do të vazhdojnë të kalojnë pa kontrolle kufitare, shkruan A2 CNN.

Marrëveshja e lëvizjes së lirë mes dy shteteve, e cila u nënshkrua për të lehtësuar qarkullimin dhe shmangur trafikun e rënduar, ka dhënë rezultate të dukshme gjatë sezonit veror, kur numri i udhëtimeve arrin kulmin. Periudhat e kalimit pa kontrolle ose me kontrolle të reduktuara janë. Nga 1 maj deri më 30 Shtator.

Në total 9 muaj gjatë vitit qytetarët e Shqipërisë dhe Kosovës përfitojnë nga një regjim i lehtësuar lëvizjeje në kufi ndërkohë qe 3 muaj me kontrolle.

Ka filluar vaksinimi i qytetarëve kundër gripit sezonal. Profesionistët shëndetësorë u kanë bërë thirrje qytetarëve që të vaksinohen, duke theksuar se ajo nuk ka efekte anësore..

Drejtori i Shëndetësisë në Komunën e Prishtinës, Izet Sadiku e mori edhe vetë këtë vaksinë, derisa tregoi edhe rëndësinë për t’u vaksinuar.

“Është hera e dytë që marr vaksinë e gripit, një nga arsyet që e marr është për me dhënë motivim për të tjerët që është e rëndësishme vaksina dhe nuk ka efekte anësore dhe sigurisht që sot kam ardhë me përcjellë sepse është dita e parë e fillimit edhe me falënderu punën që e bëjnë se ka hy një fazë që stafi i vaksinimit është më i ngarkuar pasi sot dita e parë. Mirëpo një punë që e kemi bërë gjatë këtyre viteve që është distrubuimin e qendrave të vaksinimit dhe tash krijon mundësi që qytetarët me ardhë me marr në lagjen e vet për arsye se para disa viteve e kemi pasë rastin kur ditën e parë nuk kemi mundur me hy prej njerëzve ndërsa sot sigurisht nuk është ai fluks sepse secili e merr në lagjen e vet dhe i ftoj qytetarët sidomos këto kategoritë me rrezikshmëri më të lartë që janë të moshuarit, ata që kanë sëmundjet kronike, fëmijët që të vaksinohen për arsye që vaksinimi e tyre mund të kaloj në mbrojtje, që mbron vetën dhe të tjerët”, tha Sadiku për Ekonomia Online.

Xhevrije Canolli, mjeke familjare në Qendrën Kryesore të Mjekësisë Familjare (QKMF) tha se kjo periudhë është më e mira për tu vaksinuar pasi është mbrojtje për stinën e dimrit.

“Sot ka filluar vaksinimi kundër gripit sezonal. Kjo është koha më e mirë për të vaksinuar meqenëse fillon edhe sezona e gripit. Qytetarët mund ta marrin këtë shërbim përveç në Qendrën kryesore të Mjekësisë Familjare edhe në qendrat tjera më të afërta që kanë njësitë e vaksinimit. Grupet prioritare për të vaksinuar janë kundër gripit sipas OBSH-së janë punonjësit shëndetësor për të mbrojtur vetën e tyre, pacientët e tyre, për të ruajtur shërbimet shëndetësore, gratë shtatzëna dhe vaksinimi në gratë shtatzëna përveç se mbrohet nëna mbrohet edhe foshnjet e tyre të posalinduara, të cilat  në muajt e parë nuk mund të vaksinohen me vaksinën kundër gripit, personat me sëmundje kronike kardiovaskulare, respiratore me sëmundje kronike të mëlqisë, veshkave, personat me imunitet të dobësuar qoftë për shkak të kalimit të ndonjë sëmundje apo përdorimit të terapisë, personat e moshuar mbi 65 vjec si dhe fëmijët e vegjël mbi 6 muaj deri në 5 vjec me rekomandim të mjekut”, tha ajo.

Canolli tregoi për kategoritë që nuk rekomandohet vaksinimi derisa ftoi qytetarët që të vaksinohen.

“Nuk rekomandohet në rastet e alergjisë në ndonjë komponent të vaksinës, të sëmundjet e rënda akute me ose pa temperaturë  si dhe te fëmijët nën moshën 6 muajshe. Vaksina kundër gripit përvec se të mbron nga forma aktuale e gripit sezonal njëkohësisht e zvogëlon mundësinë e koeinfeksionit në mes të gripit dhe virozave tjera sezonale. Është me rëndësi që te personat e moshuar vaksina kundër gripit redukton komplikimet si dhe vdekshmërinë  e shkaktuar nga gripi. Vaksinen të cilen e kemi ne në dispozicion, me të cilën jemi furnizuar nga Instituti Kombëtar, është vaksina katërvalente, të mbron nga katër tipe të virusit, dy nëntipe të tipit A dhe dy nëntipe të tipit B të virusit.

Ftoj qytetarët që të vaksinohen pasi vaksinat janë të sigurta dhe efektive dhe është mënyra më e mirë për parandalimin e sëmundjeve efektive. Numri i tanishëm i qytetarëve prej orës 7:00 kanë qenë rreth 50. Numri më i interesuar kanë qenë kategoria e të moshuarit”, shtoi ajo.

Qytetari Maliq Gërbeshi, i cili ka marr vaksinën tha se nuk ka pasur ndonjë komplikim nga vaksina.

“Prej që jepen këto vaksina që disa vite rregullisht e kam marr edhe nuk kam pasur ndonjë problem deri në pranverë. Nuk më ka munduar kurrë”, tha ai.

Kryeministrja e Danimarkës, Mette Frederiksen, ka paralajmëruar se pamjet e fundit të dronëve në hapësirën ajrore daneze janë “vetëm fillimi” dhe se situata “do të përkeqësohet dhe do të bëhet më serioze”.

Në dy intervista të rëndësishme, me gazetën daneze Berlingske dhe me Financial Times, Frederiksen i ka kërkuar Evropës të diskutojë “më thellësisht” se çfarë do të thotë situata e re e sigurisë për kontinentin dhe si duhet të përgjigjet për t’iu kundërvënë kërcënimit, raporton The Guardian.

Ajo ka shtuar se situata në Evropë i kujton asaj periudhën midis dy luftërave botërore në shekullin e 20-të, ndërsa kontinenti përballet me kërcënimet që rrjedhin nga “lufta e vërtetë” në Ukrainë dhe nga lufta e re, më e gjerë hibride e zhvilluar kundër saj.

“Ideja e një lufte hibride është të na kërcënojë, të na ndajë, të na destabilizojë. Të përdorë dronë një ditë, sulme kibernetike të nesërmen, sabotim të tretën. Pra, kjo nuk do të përfundojë vetëm duke rritur aftësitë”, ka thënë ajo për FT.

Komentet e saj vijnë teksa udhëheqësit e BE-së janë mbledhur në Kopenhagë të mërkurën për një takim informal të Këshillit Evropian, i cili do të përqendrohet kryesisht në sigurinë dhe Ukrainën.

Presidenti ukrainas, Volodymyr Zelensky, do të marrë pjesë nëpërmjet videolidhjes. Mbledhja do të pasohet nga një takim më i gjerë i Komunitetit Politik Evropian të enjten.

Agjencia Ndërkombëtare për Energji Bërthamore (IAEA) po punon për rikthimin e furnizimit me energji në centralin bërthamor të Zaporizhjës, në juglindje të Ukrainës, tha kreu i kësaj agjencie të Kombeve të Bashkuara.

Sekretari i Përgjithshëm i IAEA-s, Rafael Grossi, tha se po punon me të dyja palët në konfliktin e armatosur për ta zgjidhur këtë çështje sa më shpejt, transmeton Radio Evropa e Lirë.

Presidenti ukrainas, Volodymyr Zelensky, ka thënë më herët se situata në centralin bërthamor është kritike pasi ka hyrë në ditën e shtatë të emergjencës. Furnizimi me energji në central po mundësohet përmes gjeneratorëve me naftë, deklaroi Zelensky, duke shtuar se granatimet ruse po parandalojnë riparimin e linjave të energjisë në central dhe rikthimin e masave bazë të sigurisë.

“Për shkak të granatimeve ruse, centrali ka mbetur pa energji, është shkëputur nga rrjeti elektrik dhe po furnizohet me rrymë përmes gjeneratorëve me naftë”, shkroi ai në X. “Kjo është situatë e jashtëzakonshme. Gjeneratorët në central nuk janë të dizajnuar për këtë gjë, nuk kanë operuar kurrë kaq gjatë dhe ne veçse kemi informacione se një gjenerator është prishur”.

Zelensky tha se ka kërcënim “për të gjithë” dhe asnjë terrorist “nuk ka guxuar asnjëherë t’ia bëjë këtë që Rusia po ja bën këtij centrali bërthamor”.

Grossi tha se ai ishte “në kontakt të vazhdueshëm me dy palët me qëllim që të mundësohet rilidhja e shpejtë e centralit në rrjetin elektrik”.

“Ndërsa centrali aktualisht po e përballon situatën falë gjeneratorëve emergjentë me naftë – linja e fundit e mbrojtjes — dhe nuk ka rrezik të menjëhershëm për sa kohë që ata vazhdojnë të funksionojnë, kjo qartë nuk është një situatë e qëndrueshme nga pikëpamja e sigurisë bërthamore”, tha ai në një deklaratë, sipas Reuters.

“Asnjëra palë nuk do të përfitonte nga një incident bërthamor”, shtoi ai.

Grossi tha se të dyja palët kanë thënë se aktiviteti bërthamor i ka parandaluar që të kryejnë riparimet e nevojshme.

Autoriteti ukrainas për energji bërthamore, Enerhoatom, njoftoi për ndërprerjen e dhjetë në centralin e Zaporizhjës më 23 shtator, duke thënë se linja e fundit e energjisë që lidhte centralin me sistemin elektrik ukrainas ishte shkëputur.

Përfaqësuesit e IAEA-s në central konfirmuan se gjeneratorët emergjentë kishin filluar të funksionojnë për të furnizuar centralin me energji elektrike.

Zaporizhja është centrali më i madh bërthamor në Evropë. Ai ra nën kontrollin rus pak pasi Moska nisi pushtimin e Ukrainës më 2022. Reaktorët e centralit janë ndalur, por centralit i duhet energji që të mbajë funksionet e sigurisë, sikurse është ftohja e reaktorëve.

Ish-zëvendës udhëheqësi i OKB-së, James Peter Covey po vazhdon dëshminë në Hagë.

Ai ka kritikuar Prokurorinë për mënyrën se si po ia bëjnë pyetjet.

“Përsëri po e them që unë nuk jam rehat dhe nuk ndihem mirë për bazën se si po ndërtohen pyetjet. Duket sikur prokurori po përpiqet që të vërtetojë si fakt gjëra që në një mënyrë mbështesin gjykime që janë shprehur në një deklaratë në libër. Mendoj që kjo është keqkuptim i rolit të diplomatit dhe se si ne arrijmë në vlerësimet që japim”, tha ai.

Nëntë persona, përfshirë një fëmijë, kanë vdekur në Odesa, në jug të Ukrainës, si pasojë e kushteve ekstreme të motit dhe përmbytjeve, njofton shërbimi shtetëror i emergjencave.

“I gjithë qyteti është nën ujë”, thanë vendasit në videot e postuara në mediat sociale, ndërsa reshjet ekstreme të shiut përmbytën qytetin dhe lanë periferitë pa energji elektrike.

“Brenda shtatë orësh, Odesa mori pothuajse një normë dy-mujore reshjesh. Asnjë sistem kanalizimesh stuhie nuk mund t’i rezistojë një ngarkese të tillë”, tha kryebashkiaku i Odesës, Gennadiy Trukhanov, në Telegram.

Meteorologët paralajmërojnë se reshjet kanë kaluar 80 mm, duke thyer të gjitha rekordet. Rrugët janë paralizuar, makinat janë të palëvizshme dhe banorët janë të bllokuar, ndërsa ekipet e emergjencës po punojnë në të gjithë qytetin. Pothuajse 24,000 njerëz mbeten pa energji elektrike.