ATV

Author: G.O.

  • Shtatë qytete të Kosovës mund të mbesin pa rrymë gjatë festës së ndërrimit të moteve

    Shtatë qytete të Kosovës mund të mbesin pa rrymë gjatë festës së ndërrimit të moteve

    KEDS ka njoftuar se për festën e ndërrimit të vitit 2025-2026 janë marrë të gjitha masat e nevojshme si në aspektin organizativ, teknik dhe logjistik për të garantuar furnizim të qëndrueshëm me energji elektrike, pavarësisht rritjes së konsumit gjatë periudhës së festave.

    Ata tutje njoftuan se për këtë periudhë do të jenë të angazhuar rreth 500 punëtorë, të cilët do të jenë në terren dhe do të sigurojnë shërbime të tjera për të intervenuar menjëherë në rast të ndonjë avarie.

    “Janë bërë të gjitha përgatitjet paraprake në mënyrë që natën e ndërrimit të vitit të ketë furnizim stabil me energji elektrike, përkundër ngarkesës së lartë në rrjet, e cila këtë vit është në nivele të papara krahasuar me vitet e kaluara”, thanë nga KEDS.

    Pavarësisht përgatitjeve, KEDS ka paralajmëruar se disa rajone mund të kenë vështirësi për shkak të kapaciteteve të kufizuara të transmisionit. Këto zona janë Prizreni, Dragashi, Rahoveci, Shtimja, Xërxa, Malisheva, Suhareka dhe Lipjani.

    Për këtë arsye, është punuar intensivisht në përgatitjet e planit operativ për të siguruar furnizim të qëndrueshëm me energji elektrike gjatë ndërrimit të moteve. KEDS është i angazhuar për të siguruar që qytetarët të kenë energji elektrike pa ndërprerje gjatë festave të fundvitit, duke ndërhyrë shpejt në çdo situatë që mund të lindë.

  • SMS mashtruese në emër të Postës së Kosovës, Policia u bën thirrje qytetarëve për kujdes: Përmbajnë linqe mashtruese

    SMS mashtruese në emër të Postës së Kosovës, Policia u bën thirrje qytetarëve për kujdes: Përmbajnë linqe mashtruese

    Policia e Kosovës ka dalë me një njoftim për qytetarët, duke paralajmëruar për një fushatë mashtruese (phishing) që po qarkullon aktualisht përmes mesazheve SMS.

    Sipas Policisë, qytetarët po pranojnë mesazhe të rreme që pretendojnë se janë dërguar nga Posta e Kosovës dhe që përmbajnë linqe mashtruese.

    Qëllimi i këtyre mesazheve është mashtrimi i qytetarëve për të siguruar të dhëna personale dhe informacione të kartelave bankare, me synim keqpërdorimin financiar.

    “Policia e Kosovës thekson se Posta e Kosovës nuk ka dërguar mesazhe të tilla dhe se faqet e përfshira në këto SMS nuk janë domene zyrtare.”, thuhet në njoftimin e PK-së.

    Në këtë drejtim, Policia u bën thirrje qytetarëve:

    të mos klikojnë në asnjë link të dyshimtë;

    të mos japin të dhëna personale apo të kartelave bankare;

    të mos kryejnë pagesa përmes këtyre linqeve;

    të fshijnë menjëherë mesazhet mashtruese;

    dhe, në rast se kanë kryer ndonjë pagesë përmes këtyre linqeve, të raportojnë menjëherë rastin në bankën ku janë klientë dhe të kërkojnë anulimin e pagesës, si dhe ta paraqesin rastin në stacionin policor më të afërt.

    Policia e Kosovës thekson se mbetet e përkushtuar në parandalimin dhe luftimin e mashtrimeve dhe fton qytetarët për bashkëpunim dhe vigjilencë të shtuar.

  • Si ta parandaloni dehjen e Vitit të Ri?

    Si ta parandaloni dehjen e Vitit të Ri?

    Për shumë njerëz, nata e Vitit të Ri shoqërohet me konsumimin e alkoolit gjatë festimeve, çka për shumëkënd përfundon me dhimbje koke dhe lodhje ditën pasuese. Megjithatë, mjekët kanë ndarë disa këshilla të thjeshta që mund të ndihmojnë në zbutjen e efekteve negative të alkoolit, pa ndryshuar përmbajtjen thelbësore të organizmit.

    Sipas specialistëve, arsyeja kryesore pse ndihemi të dehur pas pirjes së alkoolit është dehidratimi. Alkooli vepron si diuretik, duke nxitur humbjen e lëngjeve dhe mineraleve të rëndësishme nga trupi. Për këtë arsye, hapi i parë dhe më i rëndësishëm është konsumimi i ujit. Por, krahas ujit, mjekët sugjerojnë edhe diçka shtesë që ndihmon ndjeshëm në përmirësimin e gjendjes – elektrolitet.

    Elektrolitet janë minerale thelbësore për funksionimin normal të trupit, pasi ndihmojnë muskujt dhe nervat të punojnë siç duhet. Gjatë konsumimit të alkoolit, një pjesë e madhe e tyre humbet, duke shkaktuar lodhje, dhimbje koke dhe marramendje.

    Dr. Sanjay Mehta, mjek i përgjithshëm në një klinikë në Londër, ka shpjeguar për Express.co.uk se dehidratimi është efekti kryesor i alkoolit. “Efekti më i madh është dehidratimi, dhe kjo ndodh sepse alkooli është një diuretik, i cili shkakton humbje të lëngjeve dhe elektroliteve, duke çuar shpesh në lodhjen tipike të dehjes, dhimbjen e kokës dhe marramendjen. Pra, është ideale të siguroheni që jeni të hidratuar mirë para, gjatë dhe pas periudhave të pirjes së alkoolit,” ka thënë ai.

    Sipas tij, për të zëvendësuar elektrolitet e humbura, rekomandohet konsumimi i pijeve të pasura me elektrolite ose marrja e tabletave elektrolite pa recetë. “Idealja është që ato të merren para gjumit, në mënyrë që përthithja të ndodhë ndërsa flini,” ka shtuar Mehta.

    Ndërkohë, ekspertët paralajmërojnë se zëvendësimi i ujit me kafe, edhe pse mund të duket joshës për shkak të lodhjes, në fakt mund ta përkeqësojë gjendjen. Kafeina gjithashtu ndikon në dehidratim dhe mund të rrisë ndjesinë e parehatisë.

    Edhe Dr. Tamsin Lewis nga Reborne Longevity rekomandon pije elektrolitike, veçanërisht në rastet kur shfaqen të përziera ose marramendje pas pirjes së alkoolit. Ajo thekson se marrja e gllënjkave të vogla është shumë e rëndësishme. “Alkooli irriton mukozën e stomakut. Xhenxhefili ndihmon në qetësimin e të përzierave, elektrolitet parandalojnë dehidratimin dhe antacidet zvogëlojnë shqetësimin e lidhur me acidin,” shpjegon ajo.

    Sipas mjekëve, dehidratimi ndikon edhe në uljen e tensionit të gjakut, gjë që mund të shkaktojë marramendje. Në këto raste, pijet me elektrolite mund të ndihmojnë në stabilizimin e gjendjes.

    Elektrolitet nuk merren vetëm përmes pijeve ose suplementeve. Ato mund të përthithen edhe përmes ushqimit. Dr. Ross Perry, mjek i përgjithshëm dhe drejtor mjekësor i Cosmedics, rekomandon konsumimin e ushqimeve të pasura me kalium një ditë pas pirjes së alkoolit.

    “Konsumimi i ushqimeve që përmbajnë kalium të nesërmen, siç janë bananet, portokajtë, kajsitë, zarzavatet me gjethe, spinaqi, brokoli, patatet, kërpudhat dhe bizelet, do të ndihmojë në uljen e dehjes dhe në rimbushjen e humbjeve të elektroliteve, duke ju bërë të ndiheni më mirë më shpejt,” ka thënë Perry.

    Sipas mjekëve, kombinimi i hidratimit të mirë, elektroliteve dhe ushqimit të duhur është çelësi për të kaluar më lehtë pasojat e konsumimit të alkoolit gjatë festave.

  • Kiribati bëhet vendi i parë që mirëpret vitin 2026

    Kiribati bëhet vendi i parë që mirëpret vitin 2026

    Ishulli i vogël i Kiritimati, u bë vendi i parë në Tokë që priti Vitin e Ri 2026. Ishulli është pjesë e shtetit të Kiribatit, që ndodhet ne Oqeanin Paqësor. Mikroshteti përbëhet nga disa ishuj të vegjël që ndodhen në jug të Havait dhe në verilindje të Australisë.

    Kiribati shpalli pavarësinë nga Mbretëria e Bashkuar në vitin 1979. Sot shumë prej ishujve, që janë të pabanuar, janë në rrezik zhdukjeje, nga rritja e nivelit të detit.

    Arkipelagu ka një popullsi prej rreth 116 mijë banorësh. Edhe pse ndodhet shumë pranë Havait, Kiribati e feston Vitin e Ri thuajse një ditë më përpara se shteti amerikan.

  • Ukraina s’gjen qetësi as sot, sulme të reja ruse godasin Odesën

    Ukraina s’gjen qetësi as sot, sulme të reja ruse godasin Odesën

    Edhe në ditët e fundit të vitit, presidenti rus Vladimir Putin nuk i ka kursyer sulmet në Ukrainë, këtë herë duke goditur rajonin e Odesës.

    Rusia ka sulmuar ndërtesa banimi në Odesë, dhe Shërbimi Shtetëror i Emergjencave të Ukrainës ka publikuar pamje ku shfaqen ndërtesa në flakë dhe të shkatërruara si pasojë e sulmeve me dronë rusë.

    Guvernatori rajonal i Odesës, Oleh Kiper, bëri të ditur se zjarrfikësit punuan gjatë gjithë natës për të shuar zjarret, ndërsa disa banorë u strehuan në tenda emergjence. Autoritetet rajonale raportojnë se katër persona u plagosën, përfshirë një foshnjë 7-muajshe.

    Odesa ka qenë shënjestra e vazhdueshme e raketave dhe dronëve rusë gjatë gati katër viteve të luftës, me sulme që shpesh godasin infrastrukturën e energjisë, transportit dhe portit, si dhe zonat e banuara.

    Ndërkohë, Ukraina është në diskutime me presidentin amerikan, Donald Trump, për praninë e mundshme të trupave amerikane si pjesë e garancive të sigurisë.

    Presidenti ukrainas, Volodymyr Zelensky, ka deklaruar se Ukraina mbetet e përkushtuar për të vazhduar bisedimet që synojnë dhënien e fundi të luftës. Ai gjithashtu shprehu gatishmërinë që të takohet me presidentin rus, Vladimir Putin.

  • Kurti thotë se punëtorët e sektorit publik do ta marrin pagën e 13-të në fillim të vitit

    Kurti thotë se punëtorët e sektorit publik do ta marrin pagën e 13-të në fillim të vitit

    Punëtorët e administratës publike në Kosovë do të marrin pagën e 13-të në fillim të vitit 2026, ka konfirmuar Kryeministri në detyrë, Albin Kurti, gjatë një vizite në Telekomin e Kosovës.

    Ai ka sqaruar se vendimi për buxhetin e vitit të ardhshëm, që përfshin edhe këtë pagesë, do të dërgohet për miratim në mbledhjen e parë të Qeverisë së re.

    “Për të gjithë punëtorët e administratës publike me ligjin e buxhetit për vitin 2026-të, të cilin e kaluam njëherë në mbledhjen e Qeverisë më 31 tetor sivjet, pra të cilin tash në legjislaturën e 10 kur të konstituohet Kuvendi do ta kalojmë në dy lexime,” tha Kurti.

    Ai shtoi se paga e 13-të nuk do të ndahet në fund të vitit, por në fillim të vitit të ardhshëm:

    “Kam thënë që me këtë ligj të buxhetit parashihet paga e 13-të; kush punon 12 muaj në administratën shtetërore i ka 13 paga, por paga e 13-të nuk merret në fund të vitit, në dhjetorin e vitit 2026, por në vitin që do të nisë nesër”.

    Kurti bëri të ditur gjithashtu se shpërndarja e saj do të bëhet menjëherë pas formimit të Qeverisë së re:

    “Do të merret në fillim të vitit, varësisht kur konstituohet Kuvendi dhe sa shpejt e formojmë Qeverinë. Pra në mbledhjen e parë, përveç vendimit për ligjin për buxhetin 2026, gjithashtu do ta kemi edhe vendimin që pagën e 13-të e jep në fillim të vitit, do t’i kemi edhe tri të tjera”.

    Duke iu përgjigjur pyetjeve të gazetarëve për lidhjen me fushatën zgjedhore, Kurti theksoi: “Por, mos ta përsëris veten nga fushata pra zgjedhjeve sepse ato përfunduan të dielën”.

  • KQZ: Aktivitetet e numërimit janë përmbyllur në 27 komuna, numërimi vazhdon më 1 janar në 11 komuna

    KQZ: Aktivitetet e numërimit janë përmbyllur në 27 komuna, numërimi vazhdon më 1 janar në 11 komuna

    Zëdhënësi i Komisionit Qendror të Zgjedhjeve (KQZ), Valmir Elezi, ka bërë të ditur se procesi i numërimit të votave në Qendrat Komunale të Numërimit po vazhdon me intensitet të shtuar dhe se deri më tani janë procesuar mbi 74 për qind e vendvotimeve në nivel vendi.

    Në një konferencë për media, Elezi tha se aktivitetet e numërimit janë përmbyllur tashmë në 27 komuna.

    “Njoftojmë se deri më sot, aktivitetet e numërimit janë përmbyllur në 27 komuna, përkatësisht në Mamushë, Shtërpcë, Junik, Hani i Elezit, Kllokot, Partesh, Mitrovicë e Veriut, Novobërdë, Zveçan, Viti, Zubin Potok, Ranillug, Dragash, Istog, Obiliq, Gllogoc, Deçan, Shtime, Klinë, Kamenicë, Fushë Kosovë, Leposaviq, Graçanicë, Vushtrri, Rahovec, Skënderaj dhe Kaçanik”, tha Elezi.

    Ai sqaroi se procesi i numërimit do të vazhdojë pas një ndërprerjeje të përkohshme, duke bërë të ditur se rifillimi do të ndodhë më 1 janar 2026, nga ora 16:00, në 11 Qendra Komunale të Numërimit.

    “Procesi i numërimit do të vazhdojë të martën, më 1 janar 2026, në orën 16:00, në QKN-të e komunave: Prishtinë, Pejë, Prizren, Podujevë, Mitrovicë e Jugut, Gjakovë, Malishevë, Lipjan, Gjilan, Ferizaj dhe Suharekë”, deklaroi Elezi.

    Sipas tij, deri të mërkurën, më 31 dhjetor 2025, në orën 12:00, janë procesuar mbi 1,900 vendvotime nga gjithsej 2,557.

    “Deri më tani, numri i përgjithshëm i vendvotimeve të procesuara nga të gjitha Qendrat Komunale të Numërimit është mbi 1,900 nga 2,557 vendvotime, apo më shumë se 74 për qind. Pas përfundimit të numërimit të çdo vendvotimi, të dhënat transmetohen në platformën e KQZ-së për rezultate”, u shpreh ai.

    Elezi njoftoi se sot në mesditë procesi i numërimit do të ndërpritet përkohësisht, pas përfundimit të procedimit të kutive të hapura.

    “Sot në mesditë, sapo të përfundojë procedimi i kutive që janë të hapura, do të ndërpresim procesin e numërimit të fletëvotimeve dhe do të rikthehemi sërish më 1 janar në orën 16:00”, tha zëdhënësi i KQZ-së.

    Sa i përket votimit jashtë Kosovës, Elezi bëri të ditur se në Qendrën e Numërimit dhe Rezultateve po vazhdon vlerësimi i pakove me fletëvotime nga votimi përmes postës.

    “Nga votimi me postë, numri i shtetasve të regjistruar ka qenë rreth 58 mijë. Ende nuk është përmbyllur procesi i tërheqjes së fletëvotimeve nga kutitë postare, andaj në këtë fazë nuk e dijmë se sa prej këtyre votuesve kanë ushtruar të drejtën e votës”, theksoi ai.

    Sipas Elezit, deri më tani nga kutitë postare janë tërhequr mbi 28 mijë e 500 pako, të cilat janë vlerësuar dhe verifikuar nga shërbimi votues i KQZ-së.

    “Pas vlerësimit dhe verifikimit, nga më shumë se 28 mijë pako të pranuara, janë aprovuar 27,600, ndërkaq janë refuzuar më shumë se 950 pako. Arsyeja më e shprehur për refuzim është se në pakon me fletëvotim mungon dëftesa e regjistrimit të votuesit”, deklaroi ai.

    Në fund, Elezi njoftoi se numërimi i fletëvotimeve nga votimi jashtë Kosovës do të nisë gjatë kësaj jave, ndërsa data dhe ora e saktë do të bëhen të ditura përmes një njoftimi zyrtar nga KQZ-ja.

  • Aktakuzë për krime lufte ndaj një ish-gardiani të Burgut të Prishtinës, kishte rrahur të burgosurit shqiptarë

    Aktakuzë për krime lufte ndaj një ish-gardiani të Burgut të Prishtinës, kishte rrahur të burgosurit shqiptarë

    Prokuroria Speciale e Kosovës ka ngritur aktakuzë ndaj B.T., i akuzuar për krime lufte kundër popullsisë civile gjatë viteve 1998-1999.

    Sipas aktakuzës, B.T., në cilësinë e gardianit në Burgun e Prishtinës dhe në një institucion paralel në Lipjan, së bashku me gardianë të tjerë, ka maltretuar sistematikisht të burgosurit shqiptarë.

    Ata dyshohet se kanë përdorur mjete të ndryshme për të torturuar të burgosurit, duke përfshirë shkopinj gome, shufra metalike, shqelma dhe grushte, çka ka shkaktuar lëndime trupore dhe dhunë psikike.

    Gjithashtu, i pandehuri dhe bashkëpunëtorët e tij dyshohet se i kanë lënë të burgosurit pa ushqim për ditë të tëra dhe i kanë kërcënuar me jetë, duke i krijuar një gjendje ankthi dhe frike të vazhdueshme.

    Prokuroria Speciale thekson se veprimet e tyre shkelin ligjet vendore, zakonet e luftës, Konventat Ndërkombëtare të Gjenevës dhe protokollet shtesë që mbrojnë popullatën civile gjatë konfliktit të armatosur.

  • Limaj reagon për herë të parë pasi s’e kaloi pragun: S’kemi arsye ta ulim kokën

    Limaj reagon për herë të parë pasi s’e kaloi pragun: S’kemi arsye ta ulim kokën

    Kryetari i Nismës, Fatmir Limaj, ka falënderuar votuesit e tij për mbështetjen, duke theksuar se rruga që ka ndjekur ka qenë “e drejtë”.

    Sipas rezultateve aktuale, Nisma e Limajt nuk arriti të kalojë pragun për t’u bërë pjesë e Parlamentit.

    Limaj ka vlerësuar garën si një proces të zhvilluar “në rrethana të veçanta dhe me një mobilizim të jashtëzakonshëm”, duke shtuar se viti i ardhshëm do të sjellë më shumë punë për partinë e tij.

    “Çdo votë është amanet. Çdo përkrahës është forcë. Kjo është një etapë që na obligon të jemi edhe më të përgatitur. Ajo që kemi ndërtuar deri këtu nuk ndalet, por forcohet”, ka deklaruar Limaj.

    Postimi i plotë:

    Të dashur qytetarë të Kosovës, miq, përkrahës dhe bashkëudhëtarë të kësaj rruge,

    Në këtë fundvit, ju falënderoj nga zemra për çdo votë, për çdo mbështetje dhe për çdo rreshtim të ndershëm në këtë rrugë që e bëmë bashkë.

    Kjo nuk ka qenë një rrugë e lehtë.

    Por ka qenë e drejtë.

    Dhe ajo që ka më shumë vlerë se çdo rezultat është fakti se kemi qëndruar drejt, me kokën lart dhe me besim në atë që përfaqësojmë.

    Kjo garë u zhvillua në rrethana të veçanta dhe me një mobilizim të jashtëzakonshëm.

    Por përtej çdo shifre, ajo që mbetet është mbështetja juaj dhe bindja jonë se kjo rrugë ka kuptim dhe vazhdimësi.

    Teksa mbyllim një vit të vështirë dhe hyjmë në një vit të ri, dua ta them qartë: viti që vjen na pret me punë, me organizim dhe me përgjegjësi edhe më të madhe.

    Na pret me përkushtim dhe me ecje të sigurt drejt qëllimeve tona.

    Ne mbetemi të bindur se Kosova ecën përpara vetëm me bashkim, me pjekuri dhe me një vizion të qartë për të ardhmen.

    Prandaj, nuk kemi asnjë arsye të ulim kokën.

    Çdo votë është amanet.

    Çdo përkrahës është forcë.

    Kjo është një etapë që na obligon të jemi edhe më të përgatitur.

    Ajo që kemi ndërtuar deri këtu nuk ndalet, por forcohet.

    Ju uroj shëndet, paqe dhe mbarësi në familjet tuaja.

    Ju uroj një Vit të Ri me shpresë, energji të re dhe besim në Kosovën tonë.

    Ne vazhdojmë. Bashkë.

    Me vendosmëri!

    Gëzuar Vitin e Ri!

    F.L

  • Zelensky: Disa dokumente për zgjidhjen e luftës do të jenë gati për nënshkrim në janar

    Zelensky: Disa dokumente për zgjidhjen e luftës do të jenë gati për nënshkrim në janar

    Presidenti ukrainas, Volodymyr Zelensky, ka bërë të ditur se disa nga dokumentet që synojnë zgjidhjen e luftës, të zhvilluara gjatë procesit të negociatave, do të jenë gati për t’u nënshkruar në janar.

    Gjatë një konference për shtyp online më 30 dhjetor, siç raportohet nga European Pravda, Zelensky foli për hapat diplomatikë të planifikuar për muajin e ardhshëm.

    “Ne propozojmë këtë: këshilltarët takohen në janar, udhëheqësit takohen në janar. Ne besojmë se janari ofron mundësinë që udhëheqësit e Evropës, Shteteve të Bashkuara dhe Ukrainës të takohen të gjithë së bashku. Ka dokumente që patjetër do të jenë gati në janar për nënshkrim”, tha presidenti ukrainas.

    Ai nuk specifikoi se për cilat dokumente bëhet fjalë, duke shtuar se “tani varet nga aftësia dhe gatishmëria e palëve për të nënshkruar”.

    Zelensky gjithashtu tha se i kishte përcjellë presidentit të SHBA-së, Donald Trump, dhe udhëheqësve evropianë gatishmërinë e tij për “çdo format takimi me Putinin”.

    “Nuk kam frikë nga asnjë format i takimit tonë. Gjëja kryesore është që rusët të mos kenë frikë të takohen”, përfundoi ai.