Shtatori pritet të jetë një nga muajt më të rëndësishëm në proceset gjyqësore që po zhvillohen në Dhomat e Specializuara në Hagë.
Më 16 shtator 2026 është caktuar shpallja e aktgjykimit në rastin ndaj ish-krerëve të Ushtrisë Çlirimtare të Kosovës, Hashim Thaçi, Kadri Veseli, Rexhep Selimi dhe Jakup Krasniqi.
Kryetari i Partisë Demokratike të Kosovës, Bedri Hamza para mijëra qytetarëve në Marshin për Liri tha se në këtë shesh të Prishtinës po e sheh Kosovën që kanë mbajtur këtë vend gjallë në ditët më të vështira, po sheh familje që kanë paguar çmim të lartë për liri.
“Kemi ardhur për të dëshmuar se Kosova kujton, nderon dhe mbron UÇK-në”, tha ai.
Hamza tha tutje se Kosova pret drejtësi. /Telegrafi/
Një koment i publikuar në Facebook i ka kushtuar me arrestim dhe ndalim 48-orësh një 47-vjeçari në Prishtinë, i cili dyshohet se përmes profilit të tij personal ka bërë kanosje në drejtim të institucioneve të Republikës së Kosovës.
Sinjali mëson se i dyshuari, Jeton Selmani, është arrestuar sot, më 12 shtator, rreth orës 00:20, lidhur me dyshimet për kryerjen e veprës penale “Kanosje”.
Sipas informacioneve të para, rasti lidhet me një koment të publikuar nga profili personal i të dyshuarit në rrjetin social Facebook, përmbajtja e të cilit është vlerësuar si kërcënuese ndaj institucioneve të Republikës së Kosovës.
Pas identifikimit dhe arrestimit të tij, për rastin është njoftuar Prokurori kujdestar në Prokurorinë Themelore në Prishtinë.
Me vendim të prokurorit, ndaj Selmanit është caktuar masa e ndalimit për 48 orë, ndërsa rasti po procedohet nën dyshimin për veprën penale “Kanosje”.
Hetimet lidhur me përmbajtjen e postimit dhe rrethanat e rastit po vazhdojnë.
Një shpërthim ka shkaktuar zjarr në një depo armësh në Bullgarinë qendrore gjatë natës, ndërsa ky është rasti i dytë i zjarrit në një objekt municionesh në vend brenda pak javësh. Nuk raportohet për persona të lënduar.
Ngjarja ka ndodhur pranë fshatit Tsareva Livada, ndërsa zjarri është përhapur në disa depo të një baze magazinimi.
“Për momentin, zjarri ndodhet në territorin e bazës së magazinimit të fabrikës. Ai po përhapet nga njëra depo në tjetrën,” u ka thënë gazetarëve në orët e para të së shtunës Kristina Sidorova, guvernatorja rajonale e Gabrovos.
Sipas mediave vendase, duke cituar një zyrtar të kompanisë EMCO, zjarri ka përfshirë një objekt të menaxhuar nga kjo kompani, e cila muajin e kaluar ishte përballur me një shpërthim në një objekt tjetër.
EMCO drejtohet nga tregtari bullgar i armëve Emilian Gebrev. Prokurorët bullgarë kanë pretenduar më herët se Gebrev ka qenë shënjestër e sulmeve ndaj objekteve të tij nga agjentë rusë.
Në vitin 2024, Bullgaria lëshoi urdhërarreste për gjashtë shtetas rusë, të dyshuar për përfshirje në shpërthimet në depot e EMCO-s, ku ruheshin municione për eksport në Ukrainë dhe Gjeorgji gjatë periudhës 2011–2020.
Prokurorët bullgarë kanë deklaruar atëherë se ekzistojnë dyshime për lidhje mes shpërthimeve në Bullgari, një tentative për helmimin e Gebrevit në vitin 2015 dhe shpërthimeve në depot e municioneve në Republikën Çeke në vitin 2014.
Një grua ka raportuar se është sulmuar fizikisht dhe grabitur nga dy persona të panjohur në Rahovec.
Sipas raportit të Policisë së Kosovës, rasti ka ndodhur më 11 shtator, rreth orës 23:25. Të dyshuarit, të cilët dyshohet se ishin të maskuar dhe të armatosur me pistoletë, i kanë marrë viktimës çantën e dorës, në të cilën kishte para të gatshme.
Pas grabitjes, të dyshuarit janë larguar nga vendi i ngjarjes, ndërsa viktima ka pranuar trajtim mjekësor.
Policia ka bërë të ditur se rasti është nën hetime.
“Rahovec 11.09.2026 -23:25. Viktima femër kosovare raporton se dy persona të dyshuar të panjohur me maska dhe te armatosur me pistoletë kanë sulmuar fizikisht dhe nën kërcënimin e armës i kane grabitur çantën e dorës në të cilën kishte para të gatshme dhe janë larguar nga vendi i ngjarjes. Viktima ne vend ngjarje ka pranuar trajtim mjekësor. Rasti nën hetime”. /Telegrafi/
Një grua është gjetur e vdekur në Fushë Kosovë dje pasdite.
Policia tha se u njoftua për një grua të shtrirë në tokë, ndërsa në vendngjarje tha se dolën njësitë policore bashkë me ekipin mjekësor, i cili ka konfirmuar vdekjen.
Për rastin kanë nisur hetimet.
“Fushë Kosovë, 11.09.2026-19:57. Polica është njoftuar se një person femër kosovare është e shtrirë në tokë, njësitë relevante duke përfshirë edhe ato mjekësore kanë dalë në vendngjarje të cilët kanë konstatuar se vdekjen e viktimës. Trupi i pajete është dërguar ne IML”.
Platforma Liria ka Emër ka publikuar skenarin e Marshit për Liri që mbahet sot në Prishtinë, në ora 14:00.
Në mesin e folësve kryesorë të këtij organizimi do të jenë kryetari i PDK-së, Bedri Hamza, dhe kryetari i AAK-së, Ardian Gjini.
Pjesë e programit do të jenë edhe performancat muzikore të dy prej emrave të njohur të muzikës shqiptare, Shkurte Fejzës dhe Arif Vladit.
Marshi do të nisë nga ora 14:00.
SKENARI – MARSHI PËR LIRI
Moderator: Berat Miftari
12 shtator | Sheshi “Skënderbeu”, Prishtinë
1. HAPJA ARTISTIKE
Arbnora Zogiani interpreton:
“Pa duvak s’ka me u ba nuse”
2. HAPJA ZYRTARE E MARSHIT
BERAT MIFTARI
Ftoj në skenë dy përfaqësuesit e platformës qytetare “Liria Ka Emër”:
Ismail Tashollin dhe Eliza Hoxhën!
3. HYSNI GUCATI
[Flet Hysni Gucati.]
4. LIRJONA SYLEJMANI – vajza e dëshmorit të kombit Bajram Sylejmani
[Flet Lirjona Sylejmani.]
5. ARIF VLADI – “MARSHI I UÇK-së”
[Interpreton Arif Vladi.]
6. ARDIAN GJINI – kryetari i Aleancës për Kosovën
[Flet Ardian Gjini.]
7. BEDRI HAMZA – kryetari i Partisë Demokratike të Kosovës
[Flet Bedri Hamza.]
8. BUNA MUSTAFA – vajza e Sali Mustafës – Calit
[Flet Buna Mustafa.]
9. SHKURTE FEJZA
SHKURTE FEJZA me himin e shqiptarëve “Mora Fjalë”
Në mbështetje të marshit kombëtar që zhvillohet sot në Prishtinë, në solidaritet me drejtuesit e Ushtrisë Çlirimtare të Kosovës që po përballen me procesin gjyqësor në Hagë, qytetarë nga Shqipëria dhe diaspora janë nisur drejt Kosovës.
Dhjetëra qytetarë, të ardhur nga qytete të ndryshme të Shqipërisë, por edhe nga diaspora, kanë kaluar përmes pikës kufitare të Morinit për t’iu bashkuar marshit në Prishtinë.
Mes tyre ka edhe emigrantë të ardhur nga Zvicra, të cilët kanë udhëtuar drejt Kosovës për të qenë pjesë e këtij tubimi. /Tch/
Kuvendi Komunal i Prishtinës ka miratuar projektin për transformimin e hapësirës së Tulltores në Qendër për Zhvillimin e Artit, Kulturës dhe Teknologjisë.
Rendi i ditës është miratuar me 31 vota për, 13 kundër dhe asnjë abstenim.
Kryetari i Prishtinës, Përparim Rama, ka deklaruar se projekti synon që një hapësirë e mbuluar me bërllog, e pazhvilluar dhe pa funksion për qytetin, të shndërrohet në një hapësirë të re për artin, kulturën dhe teknologjinë.
Rama në Kuvendin e Prishtinës: Tulltorja nuk po falet, Kryeqyteti përfiton mbi 50 milionë euro
“Ky projekt votohet sot. Tulltoren, nga hapësirë e mbuluar me bërllog, e pazhvilluar, e pasigurt dhe pa funksion për qytetin, po e kthejmë në Qendër për Zhvillimin e Artit, Kulturës dhe Teknologjisë”, ka deklaruar Rama.
Rama ka theksuar se toka nuk do të kalojë në pronësi private, por do të mbetet pronë e Kryeqytetit dhe do të jepet në shfrytëzim për një periudhë prej 50 vjetësh.
“Kjo tokë nuk falet. Toka mbetet pronë e Kryeqytetit. Jepet në shfrytëzim për 50 vjet për me u zhvillu dhe, për këtë shfrytëzim, Kryeqyteti përfiton 1 milion euro çdo vit. Për 50 vjet, mbi 50 milionë euro për Kryeqytetin”, ka thënë ai.
Sipas Ramës, përmes këtij projekti një hapësirë aktualisht e pashfrytëzuar synohet të shndërrohet në një qendër me funksion për qytetarët dhe zhvillimin e kryeqytetit. /Telegrafi/
Kryetari i PDK-së, Bedri Hamza është deklaruar sërish para mediave, pas dështimit të seancës konstituive të Kuvendit, meqenëse Vlora Çitaku nuk u votua për nënkryetare, raporton Ekonomia Online.
Para gazetarëve, Hamza tha se për çdo shkelje kushtetuese që është përcjellë ky proces, PDK do të dërgojë lëndë në Kushtetuese.
“Brenda afateve ligjore dhe kushtetuese.
Këtu ka përfunduar pjesëmarrja jonë në seancat e Kuvendit, deri në përgjigjen e plotë nga Gjykata Kushtetuese”, u shpreh Hamza.