Policia e Kosovës njofton se është raportuar se janë vjedhur kabllo elektrike dhe vegla nga një objekt në Mitrovicë.
Sipas raportit 24 orësh të Policisë, rasti ka ndodhur të hënën dhe u iniciua si “Vjedhje e rëndë”.
“Mitrovicë / 09.02.2026 – 3:47.Është raportuar se nga një objekt janë vjedhur kabllo elektrike dhe vegla. Lidhur me rastin njësitë përkatëse policore kanë dalë në vendin e ngjarjes dhe janë duke hetuar rastin”, njofton Policia.
Një tërmet me magnitudë rreth 4.8 sipas shkallës Rihter ka goditur zonën Prizren–Shtërpcë mbrëmjen e së martës, rreth orës 22:05 me orën lokale, ndërsa lëkundjet janë ndjerë në pjesë të ndryshme të Kosovës dhe rajonit.
Pas këtij rasti, Ministria e Mjedisit, Planifikimit Hapësinor dhe Infrastrukturës ka dalë me një njoftim për qytetarët, duke apeluar për qetësi dhe respektim të udhëzimeve të sigurisë në rast të tërmeteve.
Në njoftimin e saj, ministria u bën thirrje qytetarëve që gjatë tërmetit të ruajnë qetësinë dhe të mos panikosen.
Qytetarët këshillohen që të futen menjëherë nën një tavolinë të fortë ose pranë një muri mbajtës, të mbrojnë kokën dhe qafën me duar dhe të qëndrojnë larg dritareve, rafteve dhe objekteve që mund të bien.
Po ashtu, theksohet se nuk duhet përdorur ashensori gjatë lëkundjeve.
“Nëse ndodheni jashtë, rekomandohet të qëndroni larg ndërtesave, shtyllave elektrike dhe pemëve, ndërsa nëse jeni duke vozitur, duhet të ndaloni në një vend të sigurt dhe të qëndroni brenda automjetit derisa të përfundojnë lëkundjet”, njofton ministria.
Pas tërmetit, ministria këshillon që të dilet me kujdes nga objekti vetëm nëse ai është i dëmtuar, të kontrollohet për persona të lënduar dhe të njoftohen shërbimet emergjente nëse është e nevojshme.
Qytetarët duhet të duhet të ndjekin vetëm njoftimet zyrtare nga institucionet përkatëse dhe të jenë të përgatitur për lëkundje pasuese.
“Siguria fillon me vetëdije dhe veprim të shpejtë. Respektimi i këtyre udhëzimeve ndihmon në zvogëlimin e rrezikut për ju dhe familjen tuaj”, thuhet në njoftimin e ministrisë.
Nëntë persona u vranë dhe 27 të tjerë u plagosën nga të shtënat me armë në Kanada, në një shkollë të mesme. Vrasjet ndodhën në Tumbler Ridge, British Columbia, rrëzë Maleve Shkëmbore.
Sipas mediave kanadeze, vrasësi ishte një grua, por policia refuzoi të jepte detaje mbi identitetin e të dyshuarit.
Gjatë një kontrolli në shkollë, policia gjeti gjashtë persona të vrarë me armë zjarri; një i shtatë, i plagosur, vdiq gjatë rrugës për në spital. Më vete, policia gjeti dy trupa të tjerë në Tumbler Ridge, në një shtëpi që besohet të jetë “e lidhur me incidentin”.
Oficerët po kontrollojnë shtëpi dhe prona të tjera në komunitet për të përcaktuar nëse ka vende të tjera të lidhura me incidentin.
Sot zhvillohen dy ndeshje të tjera të vlefshme për 1/8 e finales së Kupës së Kosovës.
Ndeshja e parë e ditës luhet nga ora 13:00 në stadiumin “18 qershori” në klinë, ku përballen dukagjini dhe prishtina e re. Ndërkohë, vëmendja kryesore do të jetë në kryeqytet, ku nga ora 18:00 në stadiumin Fadil Vokrri” përballen Prishtina dhe Ballkani.
Ndërkaq, tri ndeshje të tjera të kësaj faze zhvillohen të enjten: Gjilani – Liria, Vushtrria – Vëllaznimi dhe Trepç ’89 – Malisheva. Takimi Feronikeli ’74 – Dinamo është paraparë të luhet të mërkurën e ardhshme, më 18 shkurt.
Kujtojmë se dje, Llapi dhe Ferizaji siguruan kualifikimin në çerekfinale, pasi eliminuan respektivisht dritën dhe Drenicën.
Presidenti Donald Trump do të presë të mërkurën në Shtëpinë e Bardhë kryeministrin izraelit Benjamin Netanyahu, ndërsa tensionet vazhdojnë të rriten në të gjithë Lindjen e Mesme dhe negociatat po intensifikohen për frenimin e programit bërthamor të Iranit.
Netanyahu pritet t’i bëjë presion Trumpit që të ndjekë një marrëveshje që do të ndalonte pasurimin e uraniumit nga Irani dhe do të kufizonte mbështetjen e tij për grupet aleate si Hamasi dhe Hezbollahu.
“Do t’ia paraqes presidentit pikëpamjen tonë lidhur me parimet e këtyre negociatave,” u tha Netanyahu gazetarëve para se të nisej për në SHBA.
Irani ka thënë se nuk do ta kufizojë pasurimin e uraniumit nëse vendet perëndimore nuk i zbusin sanksionet që kanë rënduar rëndë ekonominë e tij.
Vizita e së mërkurës shënon udhëtimin e gjashtë të Netanyahut në SHBA që nga rikthimi i Trumpit në detyrë – më shumë se çdo lider tjetër botëror, raporton BBC, transmeton Sinjali.
Një aleat i afërt i Trumpit, Netanyahu prej kohësh ka argumentuar se Irani përbën një kërcënim ekzistencial për sigurinë e Izraelit dhe ka shtyrë SHBA-në të kufizojë ndikimin e Teheranit në rajon.
“Kryeministri beson se çdo negociatë duhet të përfshijë kufizimin e raketave balistike dhe përfundimin e mbështetjes për boshtin iranian,” thuhet në një deklaratë të zyrës së Netanyahut para udhëtimit.
Vizita vjen në një kohë kur SHBA-ja po rrit praninë e saj ushtarake në Lindjen e Mesme, ndërsa Trump ka paralajmëruar Teheranin për veprime nëse nuk arrihet një marrëveshje bërthamore.
Të martën, presidenti tha se po “mendonte” për dërgimin e një grupi të dytë goditës me aeroplanmbajtëse në Lindjen e Mesme.
Aeroplanmbajtësja USS Abraham Lincoln u dërgua në rajon muajin e kaluar pasi Trump kërcënoi se do të godiste Iranin për të ndalur një shtypje qeveritare ndaj protestave masive, në të cilat u vranë mijëra njerëz.
“Ne kemi një armadë që po shkon atje dhe një tjetër mund të jetë në rrugë,” tha Trump në një intervistë për Axios. Trump tha se Irani “dëshiron shumë të bëjë një marrëveshje”, duke shtuar se një zgjidhje diplomatike mbetet e mundur.
Zyrtarët izraelitë kanë thënë gjithashtu se vendi rezervon të drejtën të ndërmarrë veprime ushtarake kundër Iranit nëse nuk arrihet një marrëveshje bërthamore me SHBA-në.
Netanyahu është nën presion nga aleatët në qeverinë e tij të djathtë ekstreme që të përdorë lidhjet me Trumpin për të shtyrë një marrëveshje të gjerë SHBA-Iran që plotëson shqetësimet e sigurisë së qeverisë izraelite, thonë ekspertët.
“Izraeli është i shqetësuar se, në nxitimin për të arritur një marrëveshje me Iranin, presidenti mund të pranojë një marrëveshje që nuk trajton programin raketor të Iranit apo mbështetjen për grupet aleate, ose që i lejon atij të ruajë një pjesë të programit bërthamor,” tha Dan Byman, profesor në Universitetin Georgetown.
“Një shqetësim që Izraeli dhe aleatët e tjerë kanë për SHBA-në nën Trumpin është se ai dëshiron një marrëveshje më shumë sesa një rezultat të caktuar,” shtoi Byman.
Analistët thonë se regjimi iranian është tani në një pozitë më të dobët pas protestave masive dhe një fushate ajrore 12-ditore nga SHBA-ja dhe Izraeli vitin e kaluar.
“Regjimi iranian sot është vërtet i cenueshëm,” tha Mohammed Hafez, profesor në Naval Postgraduate School dhe ekspert i politikës së Lindjes së Mesme. “SHBA-ja dhe Izraeli ndiejnë se i kanë të gjitha kartat në dorë, Irani është në pozicion mbrojtës dhe ata mund të bëjnë kërkesa maksimale.”
Lluka Mishetiq, avokati i ish-presidentit të Kosovës, Hashim Thaçi njoftoi se nesër në orën 09:00 do të paraqesë deklaratën përmbyllëse në rastin e ish-krerëve të Ushtrisë Çlirimtare të Kosovës në Gjykatën Speciale në Hagë.
“Do ta paraqes deklaratën përmbyllëse në gjykimin për krime lufte të klientit tim, Hashim Thaçi, nesër (të mërkurën) në orën 9:00 sipas Kohës së Europës Qendrore (CET). Mund ta ndiqni në këtë lidhje, me një vonesë prej 45 minutash (videoja do të fillojë në orën 9:45 CET): https://streaming.scp-ks.org“, shkroi ai në një postim në X.
Avokati shpërndau një postim të Speciales për transmetimin e deklaratës përmbyllëse.
Prokuroria e Specializuar, ndërkaq, përfundoi sot deklaratën e saj përmbyllëse në këtë gjykim.
FSK ka njoftuar se një kontigjent i saj do të marrë pjesë në ushtrimin ndërkombëtar “Dynamic Front 26” në Gjermani. Ky ushtrim është organizyara nga Ushtria Amerikane për Evropë dhe Afrikë.
“Forca e Sigurisë së Kosovës me një kontingjent nga Regjimenti i Tretë i këmbësorisë me një togë të mortajave, është duke marrë pjesë në ushtrimin ndërkombëtarë “Dynamic Front 26” , i organizuar nga Ushtria Amerikane për Evropë dhe Afrikë (USAREUR-AF).”
FSK shton se ky ushtrim është shumëkombësh dhe teston ndërveprueshmërinë e ushtrive të NATO’s dhe ushtrive partnere në fushën e artilerisë dhe zjarrit indirekt.
“Ushtrimi fushor Dynamic Front është një ushtrim shumëkombësh që teston ndërveprueshmërinë e ushtrive të NATO-s dhe ushtrive partnere në fushën e artilerisë dhe zjarrit indirekt. Këtë vit, ushtrimi është realizuar paralelisht në pesë shtete: Gjermani, Rumani, Poloni, Spanjë dhe Turqi.”
FSK thotë se kontigjenti ka zbarkuar në Gjermani, me kapacitetet e veta logjistike, duke përfshirë automjetet, armatimin dhe municionin.
“Kontingjenti i FSK-së, ka vepruar bashkëngjitur me Regjimentin 4-319 të Artilerisë Fushore të Ushtrisë së Shteteve të Bashkuara të Amerikës. Togu i mortajave, me elementët e tij përbërës – Vijën e Zjarrit, Qendrën e Drejtimit të Zjarrit dhe Vëzhguesit e Përparëm – si dhe me mortaja 120 mm, ka realizuar qitje mbi objektiva në koordinim me Ushtrinë Amerikane dhe trupat e Ushtrisë Italiane. Gjatë Ushtrimit Fushor Dynamic Front 26, FSK ka demonstruar përvojën e saj në qitje me mortaja gjatë ditës dhe natës, si dhe ka shkëmbyer mësime dhe praktika më të mira me forcat partnere. FSK çdo ditë po dëshmon profesionalizmin, disiplinën duke ndërvepruar me partnerët në të mirë të paqes dhe sigurisë.”
Policia në Shqipëri ka njoftuar se ka arrestuar një 39 vjeçar nga Kosova pasi tentoi ta kalojë kufirin “me municion luftarak dhe 4 armë të ftohta në automjet.
Ndaj tij është iniciuar rast për veprat penale “Trafikimi i armëve dhe i municionit” dhe “Prodhimi, mbajtja, blerja apo shitja pa leje e armëve të ftohta”.
“Shërbimet e Policisë Kufitare Morinë, në vijim të punës për goditjen e krimeve ndërkufitare, bazuar në analizën e riskut, kanë kaluar për kontroll në vijë të dytë, në hyrje të RSh-së, automjetin me drejtues shtetasin M. L. Gjatë kontrollit në automjet, shërbimet e Policisë gjetën 2 karikatorë me fishekë, 2 thika, 1 sëpatë dhe 1 shkop metalik si ai i Policisë, të cilat u sekuestruan në cilësinë e provës materiale, bashkë me automjetin. Në përfundim të veprimeve për rastin, specialistët për Hetimin e Krimeve të DVKM Kukës arrestuan në flagrancë shtetasin M. L., 39 vjeç, banues në Kosovë, për veprat penale “Trafikimi i armëve dhe i municionit” dhe “Prodhimi, mbajtja, blerja apo shitja pa leje e armëve të ftohta”. Materialet procedurale iu referuan Prokurorisë, për veprime të mëtejshme.”
Kupa e Kosovës në basketboll vazhdon me gjysmëfinalet e kthimit, ku katër ekipet më të mira do të kërkojnë biletën për finalen e 18 shkurtit.
Në ndeshjen e parë, Bora do të përballet me Trepçën nga ora 17:00 ndërsa nga ora 20:00, Sigal Prishtina pret Bashkimin.
Të dy ndeshjet zhvillohen të mërkurën në Palestrën “1 Tetori” në Prishtinë.
Lëvizja Vetëvendosje ka bërë homazhe në Prishtinë, në 19-vjetorin e vrasjes së Arben Xheladinit dhe Mon Balajt, gjatë protestës së 10 shkurtit të vitit 2007, duke vendosur lule te pllaka përkujtimore në rrugën “Nënë Tereza”.
Kryeminisri në detyrë, Albin Kurti, rikujtoi protestën kundër pakos së Martti Ahtisaarit, duke thënë se marshi i atëhershëm u ndalua me dhunë nga policia e UNMIK-ut, e cila, sipas tij, veproi përtej qëllimit të ndalimit të demonstruesve.