ATV

Author: G.O.

  • Horoskopi për sot, ky është parashikimi i yjeve për shenjën tuaj

    Horoskopi për sot, ky është parashikimi i yjeve për shenjën tuaj

    Dashi – Kjo ditë kërkon maturi në vendimmarrje, veçanërisht në çështjet profesionale. Mund të përballeni me situata që kërkojnë zgjidhje të shpejta, por këshillohet të shmangni reagimet impulsive. Në planin personal, dialogu i hapur sjell qartësi.

    Demi – Fokusohuni te stabiliteti financiar dhe organizimi i prioriteteve. Një çështje e lënë pezull mund të marrë zgjidhje pozitive. Në marrëdhënie, tregohuni më fleksibël për të shmangur keqkuptime të panevojshme.

    Binjakët – Energjia juaj do të jetë e lartë, duke favorizuar komunikimin dhe kontaktet e reja. Është moment i përshtatshëm për të prezantuar ide apo projekte. Kujdes me shpërqendrimin në çështjet praktike.

    Gaforrja – Dita sjell nevojën për reflektim dhe qetësi. Çështjet familjare mund të kërkojnë vëmendje të veçantë. Në aspektin profesional, ruani ekuilibrin mes emocioneve dhe arsyes.

    Luani – Mundësi të reja bashkëpunimi shfaqen në horizont. Vetëbesimi ju ndihmon të spikatisni, por shmangni qëndrimet dominuese. Në planin sentimental, surprizat e këndshme janë të mundshme.

    Virgjëresha – Organizimi dhe përpikëria do të jenë pikat tuaja të forta. Dita favorizon zgjidhjen e çështjeve administrative ose financiare. Në marrëdhënie, kërkohet më shumë mirëkuptim.

    Peshorja – Harmonia në marrëdhënie është prioritet. Mund të merrni një lajm që ndikon pozitivisht në planet tuaja afatshkurtra. Në punë, bashkëpunimi sjell rezultate më të mira se veprimi individual.

    Akrepi – Intuita do t’ju udhëheqë në vendime të rëndësishme. Është moment i mirë për të rishikuar objektivat personale. Kujdes me tensionet e vogla në ambientin e punës.

    Shigjetari – Dita favorizon lëvizjen dhe iniciativën. Një takim apo bisedë e rëndësishme mund të hapë perspektiva të reja. Në aspektin financiar, shmangni shpenzimet e nxituara.

    Bricjapi – Përqendrohuni te përgjegjësitë dhe detajet praktike. Angazhimi juaj do të vlerësohet. Në planin personal, një diskutim i sinqertë ndihmon në forcimin e marrëdhënieve.

    Ujori – Kreativiteti dhe idetë inovative janë në qendër të vëmendjes. Dita është e favorshme për projekte të reja apo për zgjerim rrjeti profesional. Në aspektin emocional, kërkoni balancë.

    Peshqit – Ndjeshmëria juaj do të jetë më e theksuar, duke ju bërë më të vëmendshëm ndaj nevojave të të tjerëve. Në punë, ruani fokusin për të shmangur gabime të vogla. Në planin personal, dita premton momente të qeta dhe reflektuese.

  • Këto janë 8 zakonet për një zemër më të shëndetshme

    Këto janë 8 zakonet për një zemër më të shëndetshme

    Statistikat tregojnë se ka më shumë gjasa të vdisni nga një atak në zemër ose sulm në tru sesa nga çdo shkak tjetër.

    Sëmundjet kardiovaskulare janë shkaku kryesor i vdekjes si për burrat ashtu edhe për gratë, jo vetëm në Shtetet e Bashkuara, por në mbarë botën. Rreth 1 në 3 persona që vdesin në vit në nivel global humbin jetën nga sëmundjet e zemrës, përfshirë afro 700 mijë njerëz në SHBA.

    Por lajmi i mirë është se mund ta zgjasni jetën dhe ta ulni ndjeshëm rrezikun për sëmundje të zemrës duke ndjekur një formulë të thjeshtë: përmirësoni tetë tregues dhe sjellje kryesore shëndetësore.

    American Heart Association i quan këto “Life’s Essential 8”, sepse përbëjnë bazën e një jete të gjatë dhe të shëndetshme, ka shkruar The Washington Post.

    Studimet tregojnë se përqendrimi në këto tetë pika ul rrezikun për atak në zemër dhe sulm në tru, përmirëson mbijetesën nëse tashmë keni problem me zemrën, mbron nga sëmundje të tjera si diabeti, demenca dhe madje disa lloje kanceri.

    Sipas kardiologut Donald Lloyd-Jones, ish-president i American Heart Association, njerëzit që i mbajnë këta tregues në nivele optimale “e fitojnë lojën”, sepse përfitojnë shëndet më të mirë në çdo aspekt të jetës.

    Tetë zakonet që mund t’i ndiqni:

    Flini 7 deri në 9 orë në natë

    Gjumi i mirë, ul inflamacionin, ul tensionin e gjakut, zvogëlon hormonet e stresit dhe mbron shëndetin e trurit.

    Studime të mëdha kanë treguar se njerëzit që flenë më pak se 7 orë në natë kanë 48 për qind më shumë rrezik për sëmundje të zemrës.

    Për të përmirësuar gjumin mbani orar të rregullt, shmangni ekranet para gjumit (drita e kaltër pengon prodhimin e melatoninës dhe mos konsumoni alkool para gjumit.

    Lëvizni rregullisht

    Aktiviteti fizik forcon muskujt, ul yndyrën trupore, përmirëson kontrollin e sheqerit në gjak, zgjeron enët e gjakut dhe përmirëson qarkullimin.

    Sa më shumë të lëvizni, aq më i ulët është rreziku për atak në zemër, sulm në tru dhe dështim të zemrës.

    Rekomandohet të bëni 150 minuta aktivitet të moderuar në javë (ecje, kopshtari, vrap i lehtë)
    ose 75 minuta aktivitet intensiv (vrap, not, tenis)

    Edhe lëvizje të vogla gjatë ditës, si ngjitja e shkallëve për 2 minuta, bëjnë diferencë.

    Ushqehuni shëndetshëm

    Baza e dietës duhet të jetë me fruta dhe perime të freskëta, drithëra të plota, fasule dhe thjerrëza, arra peshk e mish të freskët dhe vaj ulliri.

    Studime të mëdha kanë treguar se dieta mesdhetare ul me 30 për qind rrezikun për atak në zemër dhe sulm në tru krahasuar me dietat klasike me pak yndyrë.

    Sekreti është i thjeshtë: më shumë ngjyra në pjatë dhe më pak ushqime të përpunuara.

    Kontrolloni sheqerin dhe kolesterolin

    Është e rëndësishme të njihni vlerat tuaja.

    Niveli i yndyrës duhet të jetë nën 130 mg/dL.
    HbA1c (që tregon mesataren e sheqerit në gjak për 2-3 muaj) duhet të jetë nën 5.7 për qind.

    Niveli i lartë u yndyrës dhe diabeti i tipit 2 rrisin ndjeshëm rrezikun për atak në zemër dhe sulm në tru.

    Nëse vlerat janë të larta, përmirësoni dietën, rrisni aktivitetin fizik, diskutoni me mjekun për medikamente nëse është e nevojshme

    Menaxhoni tensionin e gjakut

    Tensioni i lartë quhet “vrasës i heshtur” sepse shpesh nuk jep simptoma.

    Vlera ideale është nën 120/80.

    Çdo rritje prej 10 mm Hg e tensionit sistolik rrit ndjeshëm rrezikun për sëmundje të zemrës.

    Për ta ulur atë  lëvizni më shumë, reduktoni kripën, humbni peshë nëse është e nevojshme dhe menaxhoni stresin.

    Mbani në nivel të shëndetshëm indeksin e masës trupore

    BMI (indeksi i masës trupore) është një tregues i përgjithshëm i yndyrës trupore.

    Idealja është nën 25.

    Edhe pse nuk është tregues perfekt, shumë studime tregojnë se BMI i lartë lidhet me rrezik më të madh për vdekje nga sëmundjet e zemrës.

    Mos pini duhan

    Duhanpirësit kanë 2 deri në 4 herë më shumë gjasa të zhvillojnë sëmundje të zemrës.

    Edhe cigaret elektronike rrisin rrezikun.

    Lajmi i mirë: sapo ndaloni, rreziku fillon të ulet shpejt.

    Për të lënë duhanin shmangni alkoolin, filloni aktivitet fizik, kërkoni mbështetje nga familja dhe miqtë, përdorni terapi me nikotinë ose medikamente nëse është e nevojshme

    Matni rezultatin tuaj

    American Heart Association ofron një test online ku mund të përgjigjeni në disa pyetje dhe të merrni një rezultat nga 0 në 100 për shëndetin tuaj kardiovaskular.

    Sa më i lartë rezultati, aq më i mirë është shëndeti i zemrës, dhe jo vetëm i zemrës. Një rezultat i mirë do të thotë më pak rrezik për diabet, demencë, kancer dhe probleme të tjera shëndetësore.

  • Sot anulohet qarkullimi i trenit Pejë-Prishtinë

    Sot anulohet qarkullimi i trenit Pejë-Prishtinë

    Trainkos ka njoftuar se treni në linjën Pejë-Prishtinë, me nisje nga ora 05:30, është anuluar për sot.

    Kjo, sipas tyre për arsye teknike.

    “Të nderuar udhëtarë,

    Ju njoftojmë se ditën e nesërme treni në linjën Pejë – Prishtinë, me nisje në ora 05:30, datë 21.02.2026, është revokuar (anuluar) për shkak të arsyeve teknike.

    Kërkojmë mirëkuptimin tuaj” – thuhet në njoftim.

  • Trump po shqyrton sulm të kufizuar ushtarak ndaj Iranit

    Trump po shqyrton sulm të kufizuar ushtarak ndaj Iranit

    Presidenti i Shtetet e Bashkuara të Amerikës, Donald Trump, ka deklaruar se po shqyrton mundësinë e një sulmi të kufizuar ushtarak ndaj Iran, me qëllim që të rrisë presionin ndaj udhëheqësve iranianë për të arritur një marrëveshje që do të frenonte programin e tyre bërthamor.

    Deklarata e presidentit erdhi në përgjigje të një pyetjeje nga një gazetar, vetëm disa orë pasi zyrtarë amerikanë kishin sugjeruar mundësinë e një sulmi, shkruan BBC.

    Të enjten, Trump u shpreh se bota do ta mësojë “gjatë 10 ditëve të ardhshme, ndoshta,” nëse do të arrihet një marrëveshje apo nëse SHBA-ja do të ndërmarrë veprime ushtarake.

    Ndërkohë, SHBA-ja ka rritur praninë e saj ushtarake në rajon gjatë javëve të fundit.

    SHBA-ja dhe aleatët e saj evropianë dyshojnë se Irani po lëviz drejt zhvillimit të një arme bërthamore, pretendim që Irani e ka mohuar vazhdimisht.

  • Shpërthen kamioni në mënyrë fatale në Santiago, humbin jetën 4 persona dhe 17 të plagosur

    Shpërthen kamioni në mënyrë fatale në Santiago, humbin jetën 4 persona dhe 17 të plagosur

    Të paktën katër persona humbën jetën dhe 17 të tjerë u plagosën pasi një kamion që transportonte gaz të lëngshëm u përmbys dhe shpërtheu në kryeqytetin e Kilit, Santiago, njoftuan autoritetet të enjten.

    Sipas policisë, shoferi humbi kontrollin e mjetit përpara se të përplasej, duke shkaktuar shpërthimin e fuqishëm. Mes viktimave është edhe vetë shoferi i kamionit. Zyra e prokurorit ka nisur hetimet për të zbardhur shkaqet e aksidentit.

    Kamioni ishte i lidhur me kompaninë lokale të gazit Gasco, e cila nuk iu përgjigj menjëherë kërkesës për koment.

    Ngjarja ndodhi në komunën veriore të Rencës, pranë një autostrade kryesore dhe një zone industriale. Pamjet e publikuara në rrjetet sociale treguan flakë të mëdha që përfshinë zonën pas shpërthimit.

    Sipas zjarrfikësve, shpërthimi u ndje në një rreze prej 150 deri në 200 metrash dhe dëmtoi të paktën 50 automjete. Presidenti i Kilit, Gabriel Boric, deklaroi se mbeturinat nga shpërthimi ranë mbi tre biznese, por deri më tani nuk ka raportime për dëme të tjera të përhapura.

    Guvernatori i rajonit metropolitan të Santiagos, Claudio Orrego, bëri të ditur se pesë persona ndodhen në gjendje të rëndë. “Njëri prej tyre ka djegie që mbulojnë 100% të trupit dhe është në rrezik të menjëhershëm për jetën”, tha ai.

  • Sulmuesit vrasin të paktën 50 njerëz, rrëmbejnë gra e fëmijë në Nigeri

    Sulmuesit vrasin të paktën 50 njerëz, rrëmbejnë gra e fëmijë në Nigeri

    Të paktën 50 njerëz u vranë dhe disa gra e fëmijë u rrëmbyen, pasi disa burra të armatosur sulmuan një fshat në shtetin veriperëndimor nigerian, Zamfara, i tha të premten agjencisë “Reuters” një ligjvënës shtetëror.

    Hamisu A. Faru, ligjvënës që e përfaqëson vendbanimin Bukkuyum, tha se sulmuesit e bastisën fshatin Tungan Dutse rreth orës 17:00 të enjten deri rreth orës 3 e 30 minuta të mëngjesit të së premtes, duke djegur ndërtesa e duke i qëlluar me armë banorët që mundoheshin të iknin.

    “Ata kanë qenë duke lëvizur nga një fshat te tjetri… duke lënë të vdekur të paktën 50 njerëz” – tha përmes telefonit Faru.

    Ai shtoi se numri i viktimave të rrëmbyera nuk është përcaktuar ende. Një zëdhënës i policisë shtetërore në Zamfara nuk iu përgjigj thirrjeve për koment.

    Abdullahi Sani, 41 vjeç, banor i fshatit Tungan Dutse, tha se tre anëtarë të familjes iu vranë në sulm.

    “Askush nuk fjeti dje, të gjithë jemi në dhimbje” – tha ai.

    Një ditë më parë, banorët i kishin kontaktuar forcat e sigurisë dhe autoritetin lokal, kur kishin parë më shumë se 150 motoçikleta me burra të armatosur, por paralajmërimi u shpërfill, tha Sani.

  • Moti sot kryesisht i vranët, priten reshje shiu e bore

    Moti sot kryesisht i vranët, priten reshje shiu e bore

    Sot parashikohet mot kryesisht i vranët dhe lokalisht pritet të ketë reshje të pakta shiu e bore, sidomos në orët e mëngjesit. 

    Era do të fryjë kryesisht nga veriu dhe verilindja, e cila herë pas here pritet të jetë e fuqishme lokalisht, me shpejtësi prej 15-41 km/h.

    Temperaturat minimale do të luhaten prej 1 deri në 3°C, ndërsa ato maksimale prej 2 deri në 7°C.

  • Bombola e gazit lotsjellës godet protestuesin në kokë

    Bombola e gazit lotsjellës godet protestuesin në kokë

    Në protestën e Partisë Demokratike para Kryeministrisë në Tiranë, tensionet janë rritur sërish mbrëmë.

    Efektivët e policisë përdorën gaz lotsjellës, ku një bombolë goditi në kokë një protestues, i cili ra i lënduar rëndë, duke mbajtur kokën.

    Gjendja e tij shëndetësore ende nuk është bërë e ditur.

    Videon e plotë e gjeni në linkun e mëposhtëm:

    https://www.facebook.com/reel/26100954196229648/?mibextid=ZZyLBr

  • PD-ja: Mbi 40 persona të shoqëruar nga policia pas protestës

    PD-ja: Mbi 40 persona të shoqëruar nga policia pas protestës

    Kreu i Grupit Parlamentar të Partisë Demokratike, Gazment Bardhi, ka deklaruar se mbi 40 persona janë shoqëruar nga policia pas protestës.

    Ai akuzoi forcat e rendit për arrestimin e qytetarëve që, sipas tij, protestuan paqësisht, duke shtuar se mes të shoqëruarve ka edhe kryetarë degësh të PD-së.

  • Gjashtë të vrarë nga sulmet izraelite në Libanin lindor

    Gjashtë të vrarë nga sulmet izraelite në Libanin lindor

    Të paktën gjashtë persona janë vrarë dhe 25 të tjerë janë plagosur si pasojë e sulmeve izraelite në Luginën Bekaa të Libanit.

    Ushtria izraelite tha se kishte në shënjestër qendra të Hezbollahut në zonën e Baalbek.

    Sulmet rrezikojnë të tensionojnë armëpushimin e brishtë mes Izraelit dhe Hezbollahut, ndërsa palët kanë shkëmbyer akuza për shkelje të marrëveshjes.