Author: G.O.

Kosova dhe Kolumbia kanë nënshkruar tri marrëveshje, ndër të cilat përfshihet edhe heqja e vizave për pasaportat diplomatike dhe zyrtare.

Ky vendim është marrë gjatë një takimi mes zëvëndësministrit të MPJD, Kreshnik Ahmetit, dhe homulogut nga Kolombia, Pauna Andrea Ceron Arboleda.

Përpos kësaj ujdie, të dyja vendet u dakorduan edhe për konsultime politike ndërmjet dy ministrive të punëve të jashtme si dhe nënshkruan memorandumin e bashkëpunimit ndërmjet dy akademive diplomatike.

“Këto marrëveshje përbëjnë një hap të rëndësishëm drejt thellimit të bashkëpunimit institucional dhe forcimit të lidhjeve ndërmjet dy vendeve”.

“Gjatë takimit u diskutua edhe mundësia e heqjes së vizave për mbajtësit e pasaportave të rregullta, me ç’rast palës kolumbiane iu dorëzua drafti fillestar për këtë çështje, si një hap konkret drejt lehtësimit të lëvizjes së qytetarëve dhe afrimit të mëtejmë ndërmjet dy shteteve”, njofton Ministria e Punëve të Jashtme dhe Diasporës.

Gjithashtu u njoftua se palët u pajtuan që në një afat të afërt të mbahet raundi i parë i konsultimeve politike në Prishtinë, në kuadër të marrëveshjes së nënshkruar, me synim konkretizimin e bashkëpunimit në fusha të ndryshme.

Rebelët Houthi të mbështetur nga Irani kanë marrë përgjegjësinë për sulmin e tyre të parë me raketa ndaj Izraelit që nga fillimi i luftës në Lindjen e Mesme. Sulmi vjen disa orë pasi rebelët paralajmëruan se do të bashkoheshin me luftën që ka tronditur rajonin dhe ekonominë globale.

Ushtria izraelite ka njoftuar se ka rrëzuar raketën e qëlluar nga rebelët Houthi.

Zëdhënësi ushtarak i Houthit, gjenerali i Brigadës Yahya Saree, në një deklaratë të transmetuar të shtunën në mëngjes nga krahu mediatik Ansar Allah, tha se ata qëlluan një breshëri raketash balistike që synonin atë që ai e përshkroi si “vendndodhje të ndjeshme ushtarake izraelite” në jug të Izraelit.

Hyrja e Houthëve në konflikt gjithashtu ngre pikëpyetje për sigurinë e anijeve tregtare që kalojnë përmes korridorit të Detit të Kuq, duke rrezikuar edhe më tej transportin global. Që nga nëntori i vitit 2023 deri në janar 2025, rebelët Houthi kanë sulmuar mbi 100 anije tregtare me raketa dhe dronë, duke fundosur dy anije dhe duke vrarë katër marinarë.

Kontrolli i Iranit mbi Ngushticën e Hormuzit, nga ku dikur kalonte një e pesta e të gjithë naftës dhe gazit natyror, ka vështirësuar edhe më tej transportin detar global, dhe sulmet e Houthi-ve mund të shkaktojnë kaos të mëtejshëm.

Një person është arrestuar në Gjakovë, pasi gjatë një bastisjeje në rrugën “Fehmi Agani” i janë gjetur armë dhe mjete të tjera të ndaluara.

Rasti ka ndodhur të premten në mbrëmje, ndërsa i dyshuari është shoqëruar menjëherë për procedura të mëtejshme.

Sipas raportit policor, në çantën e të dyshuarit është gjetur dhe konfiskuar një armë me pesë fishekë, si dhe një thikë.

Pas intervistimit dhe me vendim të prokurorit, i dyshuari është dërguar në mbajtje.

Një person është arrestuar në Suharekë lidhur me një rast të kultivimit të bimës narkotike, i cili ishte raportuar më herët në fshatin Maqitevë.

Sipas raportit policor, arrestimi i të dyshuarit është bërë të premten, rreth gjashtë muaj pas datës kur rasti ishte evidentuar fillimisht.

Pas intervistimit dhe me vendim të prokurorit të rastit, i dyshuari është dërguar në mbajtje.

Policia ka arrestuar një person në Fushë Kosovë, i dyshuar për një seri vjedhjesh që kanë prekur disa biznese dhe kanë shkaktuar dëme të konsiderueshme financiare.

Sipas të dhënave fillestare, i arrestuari është A.H., 29 vjeç, i cili dyshohet se lidhet me dhjetë raste të raportuara.

Sipas hetimeve, ngjarja e parë është raportuar më 24 janar në rrugën “Meshari”, ku është depërtuar me forcë në një biznes dhe janë marrë kabllo e materiale të tjera.

Më tej, hetuesit kanë identifikuar edhe nëntë raste të tjera, prej tyre shtatë vjedhje të rënda.

Pas analizimit të provave dhe incizimeve të kamerave të sigurisë, Policia ka arritur ta lokalizojë dhe arrestojë të dyshuarin.

Pas intervistimit në prani të avokatit, raportohet se ai ka pranuar veprat, ndërsa me vendim të prokurorit është ndaluar për 48 orë.

Janë larguar nga sheshi kryesor i Prishtinës tabelat që përmbanin informacione të pasakta mbi masakrat që ndodhën në Kosovë gjatë luftës.

Komuna e Prishtinës, një ditë pas pezullimit të lejes për ekspozitën, ka ndërmarrë veprimin për të hequr tabelat në mëngjes, duke ndjekur reagimet publike dhe vlerësimin për pasaktësitë që ishin evidentuar.

Ekspozita, me autor Shkëlzen Gashi, kishte nxitur reagime të shumta pasi u identifikuan gabime të konsiderueshme në përmbajtjen e saj.

Shtetet e Bashkuara presin që ta përmbyllin operacionin e tyre ushtarak në Iran “brenda javësh, jo muajsh”, tha sekretari amerikan i Shtetit, Marco Rubio, pasi u takua me ministrat e Jashtëm të Grupit të Shtatë shteteve më të industrializuara (G7) në Francë në kohën kur lufta SHBA-Izrael kundër Iranit po i afrohet javës së pestë.

Duke folur para se të nisej drejt SHBA-së më 27 mars, Rubio po ashtu tha se Uashingtoni mund t’i arrijë qëllimet e tij në Iran pa trupa tokësore dhe se Irani mund të synojë të vendosë një sistem pagese për kalimin përmes Ngushticës së Hormuzit.

“Jemi para afatit të planifikuar… presim që ta përmbyllim… është çështje javësh, jo muajsh”, tha ai për fushatën ushtarake.

“Ne do ta shkatërrojmë marinën e tyre… forcën ajrore… aftësinë e tyre për të prodhuar raketa dhe dronë… dhe do t’i zvogëlojmë ndjeshëm lëshuesit e raketave”, tha Rubio, duke shtuar: “Ne mund t’i arrijmë të gjitha objektivat tona pa asnjë ushtar në terren… ky nuk do të jetë një konflikt i zgjatur”.

Duke iu referuar trupave amerikane të dislokuara në rajon, ai tha se dislokimet kanë për qëllim “t’i japin presidentit fleksibilitet maksimal dhe mundësi maksimale për të përshtatur skenarët e mundshëm, nëse ato shfaqen”.

Komentet e Rubios vijnë në kohën kur Irani paralajmëroi për sulme të reja në të gjithë Lindjen e Mesme dhe u bëri thirrje civilëve të shmangin zonat pranë forcave amerikane, një ditë pasi presidenti amerikan, Donald Trump, zgjati afatin për Teheranin për të hapur Ngushticën e Hormuzit, një rrugë kyç për transportin e naftës dhe gazit nga Gjiri Persik drejt tregjeve globale, deri më 6 prill.

Në një deklaratë, ministrat e Jashtëm të G7-ës dhe përfaqësuesja e lartë Bashkimit Evropian kërkuan ndalimin e menjëhershëm të sulmeve ndaj infrastrukturës civile në luftën SHBA-Izrael kundër Iranit.

“Nuk mund të ketë asnjë justifikim për shënjestrimin e qëllimshëm të civilëve në situata të konfliktit të armatosur, si dhe për sulmet ndaj objekteve diplomatike”, thanë ministrat.

G7 përbëhet nga Shtetet e Bashkuara, Britania, Kanadaja, Franca, Gjermania, Italia dhe Japonia.

Irani nuk bëri asnjë lëvizje për të hapur Ngushticën e Hormuzit. Në një deklaratë më 27 mars, Garda Revolucionare Islamike tha se do ta mbajnë të mbyllur këtë rrugë ujore dhe se çdo përpjekje e mundshme për kalim që përfshin Shtetet e Bashkuara, Izraelin apo aleatët e tyre do të përballet me “masa të ashpra”.

Pas paralajmërimit të Gardës, mediat raportuan se më 27 mars tre anije të shteteve të ndryshme u kthyen mbrapsht nga Ngushtica e Hormuzit.

Ngushtica e Hormuzit përbën rreth një të pestën e dërgesave globale të naftës dhe mbyllja efektive e saj nga forcat iraniane është kthyer në çështjen qendrore të konfliktit, që nisi me sulmet e SHBA-së dhe Izraelit kundër Iranit më 28 shkurt.

Rubio tha se Irani mund të vendosë një sistem tarife për kalimin në këtë ngushticë, duke e quajtur këtë “të papranueshme” dhe duke theksuar se vendet evropiane dhe aziatike që përfitojnë nga tregtia përmes kësaj rruge ujore duhet të ndihmojnë për të siguruar kalimin e lirë pasi të përfundojë konflikti.

“Ne nuk po i kërkojmë askujt t’i bashkohet luftës”, tha Rubio, duke shtuar se “vendet që preken më së shumti [nga mbyllja e ngushticës]… duhet të jenë të gatshme të bëjnë diçka për këtë”.

Një ditë më herët, Trump për herë të dytë shtyu afatin për hapjen e Hormuzit, teksa ka paralajmëruar se do të kryejë sulme ndaj centraleve energjetike iraniane nëse Teherani nuk e hap këtë rrugë ujore. Ai vendosi që afati i ri për Teheranin të jetë deri më 6 prill.

Fundjavën e kaluar, Trump tha se Shtetet e Bashkuara do t’i “shkatërrojnë plotësisht” centralet energjetike të Iranit nëse Teherani vazhdon të bllokojë Ngushticën e Hormuzit pas 48 orësh. Ai më pas e zgjati afatin deri më 27 mars.

Më 26 mars, Trump deklaroi se bisedimet me Iranin “janë duke vazhduar” dhe “po shkojnë shumë mirë”.

Zyrtarë të lartë iranianë kanë mohuar se Teherani është në negociata me Uashingtonin, por Irani tha më 25 mars se po e shqyrton një propozim amerikan me 15 pika dhe paraqiti pesë kushte, që sipas tij, duhet plotësuar për të përfunduar konflikti.

Plani amerikan, sipas raportimeve, përsërit kërkesat e Uashingtonit që Irani të çmontojë objektet e tij bërthamore, të kufizojë kapacitetet e tij raketore dhe të ndalë mbështetjen për forcat aleate në rajon.

Rubio tha më 27 mars se SHBA-ja ende nuk ka marrë ndonjë përgjigje nga Irani dhe sugjeroi se kontaktet ishin të tërthorta.

“Kemi pasur një shkëmbim mesazhesh dhe sinjale nga sistemi iranian, çfarëdo që ka mbetur prej tij, për një gatishmëri për të biseduar për disa çështje”, u shpreh ai. “Po presim sqarime të mëtejshme për… me kë do të bisedojmë, për çfarë do të bisedojmë dhe kur do të bisedojmë”.

Jozyrtarisht, Teherani i është përgjigjur ashpër planit me 15 pika të Uashingtonit, duke thënë se kushtet e SHBA-së janë të tepruara dhe se do t’i japë fund luftës kur të vendosë vetë dhe nëse plotësohen kushtet e tij, duke këmbëngulur se ka të drejtë të zhvillojë programin e tij të raketave balistike. /Radio Evropa e Lirë

Dogana e Kosovës ka zbuluar dhe sekuestruar një sasi të konsiderueshme të etanolit (alkool i koncentruar 96%) në rajonin e Prizrenit, në dy operacione të ndara, duke parandaluar një shmangie nga taksat doganore dhe akciza në vlerë rreth 6,260 euro.

Sipas njoftimit zyrtar të Doganës, gjatë kontrollit në terren, njësitet antikontrabandë ndaluan një automjet transportues ku u gjetën 500 litra etanol pa dokumentacion përkatës. “Personat e përfshirë nuk kanë poseduar dokumentacion që dëshmon origjinën e rregullt të mallit, importin legal apo pagesën e taksave doganore,” thuhet në njoftim.

Pas ndalimit të automjetit, u kryen kontrolle shtesë në lokacione të dyshuara, duke çuar në zbardhjen e një sasi tjetër prej 500 litrash etanol të fshehur në garazhin e një shtëpie në të njëjtin rajon. Sasia totale e sekuestruar arrin 1,000 litra etanol, e cila dyshohet se ka origjinë nga Serbia dhe nuk shoqërohej me asnjë dokumentacion ligjor.

Dogana thekson se kjo sasi përfaqëson shmangie nga pagesa e akcizës, taksave doganore dhe TVSH-së, duke shkaktuar dëm të drejtpërdrejtë në buxhetin e Republikës së Kosovës dhe krijuar konkurrencë të padrejtë në treg.

“Rasti është duke u trajtuar në procedurë të rregullt hetimore në koordinim me institucionet kompetente dhe do të ndërmerren të gjitha veprimet ligjore ndaj personave të përfshirë, në përputhje me legjislacionin në fuqi,” thuhet në njoftim.

Ushtria izraelite ka njoftuar se në dy ditët e fundit në jug të Libanit janë plagosur nëntë ushtarë.

Forcat e Mbrojtjes së Izraelit thanë se një oficer u plagos rëndë, ndërsa një tjetër u plagos pas sulmit me raketë anti-tank dje.

Gjatë natës, u raportua se një tjetër oficer u plagos rëndë dhe gjashtë ushtarë të tjerë u plagosën pas sulmeve me raketa.

Ushtarët janë evakuuar në spital dhe familjet e tyre janë njoftuar.