Author: G.O.

Papa Françesku ka nisur të premten vizitën e tij treditore në Hungari, që me gjasë do të dominohet nga lufta në Ukrainë. Ai pritet të takohet me kryeministrin nacionalist hungarez, Viktor Orban, me të cilin shpesh ka mendime të ndryshme.

Papa do të qëndrojë vetëm në Budapest gjatë vizitës së tij për shkak të gjendjes jo të mirë shëndetësore. Ati i Shenjtë muajin e kaluar u shtrua në spital për shkak të problemeve shëndetësore.

Pasi u mirëprit në Pallatin presidencial nga presidentja Katalin Novak, Françesku do të takohet me Orbanin.

Orban është në pushtet që nga viti 2010 dhe rregullisht ka përdorur retorikë anti-migrantëve për të mbrojtur “Evropën e krishterë”.

Ndërkaq, Papa ka një qëndrim më mirëpritës ndaj personave që largohen nga varfëria apo zonat e konfliktit.

Megjithatë, gjatë takimit vitin e kaluar në Vatikan, Françesku kishte falënderuar Orbanin pasi Hungaria mirëpriti ukrainasit që u larguan nga lufta.

Pesë muaj para nisjes së pushtimit rus të Ukrainës, Papa Françesku kishte zhvilluar një vizitë shtatëorëshe në Budapest, gjatë së cilës kishte premtuar se do ta vizitonte sërish Hungarinë, shtet ku 39 për qind e popullsisë është e krishterë.

Françesku gjatë qëndrimit në Hungari do të takohet me autoritetet shtetërore, diplomatët dhe pjesëtarët e shoqërisë civile.

Ai ka thënë se planifikon të takohet me të rinjtë, anëtarët e kishave lokale dhe të dielën të udhëheqë meshën.

Françesku vazhdimisht ka bërë thirrje për paqe në Ukrainë dhe pritet që të takohet edhe me refugjatët ukrainas.

Orban, që ka lidhje me Moskën, ka qenë i kujdesshëm që të mos e kritikojë presidentin rus, Vladimir Putin, lidhur me luftën në Ukrainë.

Ai ka refuzuar që t’i dërgojë armë Kievit dhe ka dënuar sanksionet e vendosura ndaj Moskës. Këto qëndrime kanë ndërlikuar raportet e Hungarisë me Ukrainën dhe kanë përkeqësuar raportet me partnerët në Bashkimin Evropian./REL/

Kryeministri i Republikës së Kosovës, Albin Kurti po merr pjesë në Forumin vjetor Ekonomik në Delphi që organizohet nën patronatin e Presidentes së Greqisë, Katerina Sakellaropoulou. 

Në ditën e parë të pjesëmarrjes së tij, u takua me të Dërguarin e Posaçëm të Mbretërisë së Bashkuar për Ballkanin Perëndimor, Lord Stuart Peach, me të cilin u diskutua për marrëdhëniet dypalëshe ndërmjet Kosovës dhe Mbretërisë së Bashkuar dhe për zhvillimet e aktuale në Kosovë dhe rajon.

Kryeministri Kurti falënderoi Lord Peach për mbështetjen e vazhdueshme të tij dhe të Mbretërisë së Bashkuar, që u konfirmua edhe në rastin e pranimit të aplikimit të Kosovës për anëtarësim në Këshillin e Evropës, në fillim të kësaj jave.

Ata diskutuan për mbajtjen dhe mbarëvajtjen e zgjedhjeve në katër komunat veriore të Kosovës, të cilat ishin të qeta, paqësore dhe pa incidente.

Në takim gjithashtu u bisedua edhe për raportet ndërmjet Kosovës dhe Serbisë, rëndësinë dhe urgjencën e zbatimit të plotë dhe të pakushtëzuar të Marrëveshjes Bazë dhe Aneksit të Zbatimit të dakorduar në Bruksel, respektivisht në Ohër, dhe për pritjet nga takimi i radhës i nivelit të lartë politik që do të mbahet të martën e javës së ardhshme.

Krahas takimeve, sot në orën 17:30, kryeministri Kurti po ashtu do të jetë panelist në një diskutim në kuadër të forumit me titull “Ballkani Perëndimor në Fushën e re të Shahut të Gjeopolitikës”.

Presidenti i Shqipërisë, Bajram Begaj zhvilloi sot një drekë pune me kryeministrin e Kroacisë, Andrej Plenkoviq, në kuadër të vizitës shtetërore në Kroaci.

Begaj shprehu mirënjohjen për mbështetjen që Kroacia i dha Shqipërisë për kapërcimin e pasojave të tërmetit shkatërrimtar në nëntor të vitit 2019, si dhe gjatë periudhës së pandemisë Covid-19.

Pasi e uroi kryeministrin Plenkoviq për arritjet më të fundit të Kroacisë në kuadër të BE-së dhe për hyrjen në zonën Shengen e Eurozonë, Begaj nënvizoi se Kroacia mbetet shembulli më i mirë për rrugëtimin evropian të Shqipërisë.

Ai shprehu gjithashtu mirënjohjen për mbështetjen që Kroacia i ka dhënë procesit të integrimit të Shqipërisë me ekspertë dhe ekspertizë.

Duke iu referuar partneritetit strategjik midis dy vendeve, siç u bë e ditur, të dy bashkëbiseduesit nënvizuan marrëdhëniet tradicionalisht të shkëlqyera, si dhe nevojën e avancimit të tyre edhe në kuadër të bashkëpunimit ekonomik.

“Pavarësisht tendencave pozitive në drejtim të bashkëpunimit ekonomik e tregtar, ende jemi larg shfrytëzimit sa duhet të mundësive që ekzistojnë në këtë drejtim”, u shpreh Begaj.

Ndërsa, në kuadër të bashkëpunimit rajonal dhe të integrimit evropian, Begaj shprehu mirënjohje për mbështetjen që Kroacia i ka dhënë procesit të zgjerimit të Bashkimit Evropian me vendet e Ballkanit Perëndimor.

Presidenti i Shqipërisë vlerësoi gjithashtu kontributin dhe mbështetjen e madhe që Kroacia i ka dhënë Kosovës në të gjitha aspektet, përfshirë edhe mbështetjen për anëtarësimin e saj në organizatat rajonale dhe ndërkombëtare.

“Kroacia dhe Qeveria juaj kanë dhënë një mbështetje të jashtëzakonshme në këtë drejtim dhe ju siguroj se shqiptarët janë mirënjohës për këtë mbështetje”, tha Begaj.

Vëmendje e veçantë iu kushtua edhe mundësisë së rritjes së bashkëpunimit në fushën e turizmit, ku interesi i përbashkët është vendosja e një linje ajrore direkte Tiranë-Zagreb, por edhe të linjave detare që lidhin portin e Durrësit me portet e Kroacisë.

Plenkoviq e siguroi presidentin Begaj për vullnetin e palës kroate në çuarjen përpara të këtyre projekteve me interes të ndërsjellë.

Të dy bashkëbiseduesit u ndalën edhe tek agresioni ushtarak rus në Ukrainë, si dhe te ndikimi i këtij agresioni në rajonin e Evorpës Juglindore apo rreziku që kanoset nga interesi i palëve të treta jo miqësore për të nxitur trazira dhe për të dëmtuar stabilitetin e rajonit.

Kryetari i Kuvendit të Kosovës, Glauk Konjufca, ka deklaruar se nuk është në interesin e Kosovës me qenë funksional ekipi menaxhues për hartimin e draft-statutit të Asociacionit të komunave me shumicë serbe, raporton KosovaPress. 

“Një institucion i cili e konsideron veten se është i Kosovës duhet të veprojë sipas kushtetutës dhe ligjeve tona dhe interesit tonë shtetëror nëse një institucion nuk është i Kosovës në kuptimin e sjelljes së tij mban qëndrime që nuk janë të Kosovës por të Serbisë nuk mendoj se është interes i Kosovës të vazhdojë më ai institucion”, tha ai.

Ai tha se tek ky ekip nuk është problem vetëm sjellja dhe papërgjegjësia e tyre karshi institucioneve të Kosovës, por edhe kryesimi i tij nga një deputete e Kuvendit të Serbisë.

“Një deputete e Kuvendit të Serbisë nuk mund të jetë kryesuese e ekipit menaxhues si mundet një deputete e Serbisë ta prezantoj Kosovën ajo s’ka ka me prezantua hiq”, tha ai.

Këto komente kryetari i Kuvendit i bëri pas një tryeze diskutimi të organizuar nga IKD lidhur më punën e Kuvendit të Kosovës.

Kuvendi i Kosovës është injoruar nga Qeveria, kështu thotë raporti “DOBËT: Raport i monitorimit të punës së Kuvendit të Kosovës për vitin 2022” i cili u publikua në tryezën e organizuar nga Instituti i Kosovës për Drejtësi (IKD) me temë “Kuvendi i privilegjeve”.

Naim Jakaj nga IKD tha se sipas raporti viti 2022 karakterizoi Kuvendin e Kosovës me numër të madh të pikave të rendit të ditës nga seancat e mbetura nga viti 2021.

Seancat e rregullta të Kuvendit sipas këtij raporti janë karakterizua me vazhdime të shumta të seancave që përbëjnë 53% të totalit të seancave të rregullta.

Po ashtu kontrolli parlamentar lidhur me punën e qeverisë dhe mbikëqyrjes se institucioneve te pavarura pothuajse ka qenë inekzistent.

Sa i përket llogaridhënies së qeverisë përballe Kuvendit, IKD ka gjetur se Kuvendi i injorua nga Qeveria derisa Kryesuesi i seancës apo kryetari nuk mori ndonjë masë ndaj qeverisë.

Edhe kjo legjislaturë është karakterizuar nga gjuha jo parlamentare, polarizimi i skajshëm ndërmjet deputetëve dhe grupeve parlamentare.

Transparencë dhe llogaridhënia e Kuvendit mbetet sfidë.

Sipas raportit të IKD-së nw aspektin legjislativ, puna e Kuvendit është përcjell me joefikasitet dhe në secilën seancë plenare projektligjet janë bartur nga një seancë në tjetrën për shkak të mungesës së kuoruimit nga ana e shumicës parlamentare dhe mos pjesëmarrjes së opozitës në procesin e votimit.

Po ashtu Kuvendi nuk e ka votuar asnjë projektligj të sponsorizuar nga ana e grupeve opozitare.

Kryetari i Kuvendit, Glauk Konjufca tha se ky raport identifikon cilat janë mangësi të kuvendit dhe të punës së kuvendit por edhe deputeteve.

Sipas tij këto raporte ndihmojnë dhe pritet të hartojnë plane për të dal më mirë në vitin 2023.

Ai tha se Kuvendi në legjislaturën aktuale me vëllimin e punës as që krahasohet me legjislatura të kaluara, sepse ato të kaluarat kanë pas dukshëm më shumë probleme.

Konjufca tha se me ligjin për detyrime te deputeteve të zgjedhurit e popullit janë të obligua të shfaqen në Kuvendin e Kosovës.

Shefja e grupit parlamentar të Lëvizjes Vetëvendosje, Mimoza Kusari-Lila tha se nuk iu pëlqen kur e marrin një raport me titull ‘dobët’ derisa mendon se në ketë legjislaturë ka një stad të avancimit në krahasim me legjislaturat e tjera.

Sipas saj deputetët e rinj përbëjnë 40% te legjislaturave dhe nevojitet aftësim të vazhdueshëm, ndërsa ngriti si shqetësim edhe mungesën e hapësirave për deputetët.

Deputeti i LDK-së, Driton Selmanaj tha se pozita e deputetëve e politikanit në këtë vend është pozita me e urryer pasi gjithçka është implikuar në pagën dhe aspektin financiar.

Shefi i grupit parlamentar të AAK-së, Besnik Tahiri shprehu paanësinë për gjuhën joparlamentare po ndodh në Kuvend, ndërsa mungesën e deputetëve pa pasur një veprim politik është e papranueshme.

Ndërsa, shtoi se nuk ka arsyetim që mos të ndodh votimi elektronik.