Author: G.O.

Presidenti i Shqipërisë, Bajram Begaj, ka folur sot për dialogun Kosovë-Serbi, me ç ‘rast ka theksuar nevojën për një marrëveshje të detyrueshme ligjore të njohur ndërkombëtarisht.

Kështu deklaroi Begaj pas takimit me senatorët amerikanë, senatorët amerikanë, Chris Murphy dhe Gary Peters.

“Normalizimi i marrëdhënieve mes Kosovës dhe Serbisë, me në qendër njohjen reciproke do të kishte një ndikim shumë pozitiv për sigurinë dhe progresin e rajonit të Ballkanit Perëndimor”, nënvizoi Begaj.

Ai përshëndeti vizitën e dy senatorëve amerikanë dhe vlerësoi vëmendjen dhe interesin në rritje të Kongresit amerikan për zhvillimet në rajonin e Ballkanit Perëndimor.

Begaj, vlerësoi gjithashtu marrëdhëniet e shkëlqyera me Shtetet e Bashkuara të Amerikës, si dhe nënvizoi, se për Shqipërinë e shqiptarët, Shtetet e Bashkuara mbeten partneri kryesor strategjik dhe miku e aleati më i madh i tyre.

Kreu i shtetit shqiptar, përshëndeti bashkëpunimin shumë të mirë që dy vendet kanë pasur, veçanërisht gjatë dy vjetëve të fundit në Këshillin e Sigurimit të Kombeve të Bashkuara, ku kanë ndërmarrë iniciativa të përbashkëta për të dënuar agresionin e paprovokuar e të pajustifikuar ushtarak rus në Ukrainë, përmes rezolutave të ndryshme.

Në këtë kuadër, Begaj, u ndal edhe te sfidat e reja me të cilat po ballafaqohet rajoni i Ballkanit Perëndimor, si dhe rritjen e aktivitetit kërcënues nga akterë të tretë dashakeqës ndaj zhvillimeve euroatlantike në rajon.

Ai shprehu mirënjohjen gjithashtu edhe për bashkëpunimin dhe mbështetjen që agjencitë e specializuara amerikane po japin për përballimin e sulmeve kibernetike, që kanë si synim kryesor dëmtimin e infrastrukturës digjitale të shtetit shqiptar.

Senatorët amerikanë, Chris Murphy dhe Gary Peters, shoqëroheshin në këtë takim nga ambasadorja e SHBA-së në Shqipëri, Yuri Kim.

Bashkimi Evropian pret që udhëheqja e re e Malit të Zi të fokusohet në reformat kryesore që janë të nevojshme për përparimin e vendit në procesin e integrimit evropian.

Zëdhënësja e Komisionit Evropian Ana Pisonero konfirmoi se institucionet evropiane janë të gatshme të bashkëpunojnë me Malin e Zi dhe të gjithë aktorët politikë për të ndihmuar vendin të qëndrojë në rrugën e tij strategjike dhe të ndërtojë një konsensus mbi veprimet prioritare që janë kyçe për procesin e pranimit të vendit në BE.

“Përqendrimi në reformat urgjente të shtetit të së drejtës, të cilat janë renditur në raportin e fundit të Komisionit Evropian për zgjerimin, janë të një rëndësie kyçe. Sigurisht, për këtë qëllim, ne vazhdojmë të mbështesim Malin e Zi në rrugën e tij drejt anëtarësimit në BE. Për ne, stabiliteti politik është kyç për përparimin në rrugën drejt BE-së, një proces ng ai cili përfiton si Mali i Zi, ashtu edhe Evropa në tërësi”, tha Pisnero në një konferencë shtypi në Bruksel.

Ajo konfirmoi se pret që së shpejti në Bruksel të organizohen takimet e para të nivelit të lartë ndërmjet Bashkimit Evropian dhe presidentit të sapozgjedhur, Jakov Milatoviq.

Jakov Milatoviq u inaugurua më 20 maj, pasi mposhti Milo Gjukanoviqin, i cili mbante postet më të larta në Mal të Zi për tre dekada.

Vizita e tij e parë jashtë vendit pritet të jetë në Bruksel.

Milatoviq do të marrë pjesë në samitin e Komunitetit Politik Evropian, i cili do të mbahet më 1 qershor në Kishinjev të Moldavisë.

Nuk përjashtohet mundësia që ai të vizitojë Brukselin përpara Kishinjevit për të konfirmuar angazhimin e tij ndaj integrimit evropian.

Mali i Zi konsiderohet lider në procesin e anëtarësimit në Bashkimin Evropian dhe ka hapur të gjithë kapitujt në negociatat për anëtarësim.

Megjithatë, nuk ka pasur asnjë konferencë ndërqeveritare që nga dhjetori 2021 për shkak të progresit të pamjaftueshëm në reformat e nevojshme në procesin e anëtarësimit./REL/

Kryeministri Albin Kurti gjatë lansimit të Strategjisë Kundër Korrupsionit ka thënë se janë të obliguar të krijojnë një ambient ku sistemi gjyqësor e prokurorial të zhvishën nga çdo lloj ndikimi politik.

Kurti shtoi se reformën po e vazhdojnë me vetting të pozitave të larta në sistemin gjyqësor e prokurorial dhe luftim të pasurisë së pajustifikueshme me Byronë Shtetërore për konfiskim të pasurisë.

“Reformën po e vazhdojmë me vettingun. Vonimi i rezultateve që me këto mjete të fuqishme kundër korrupsionit zyrtarë, mund të numëroheshin edhe sot, bie në përgjegjësinë e partive opozitare që mbështjellin pengimin e çdo reforme me adresimin te Kushtetuesja. Sot jemi mbledhur për të përmbushur zotim dhe përgjegjësinë për ta hartuara Strategjinë Kundër Korrupsionit duke shtruar rrugën drejt një shoqërie të çliruara nga korrupsioni. Është detyrë e jona që përmes reformës institucionale e propozimeve për plotësim apo ndryshim të kornizës ligjore të ruajmë pasurinë buxhetin shtetërorë e të sigurojmë transparencë. Duhet ta kthejmë vëmendjen nga prokurorimi publikë dhe të sigurohemi që çdo kompani e papërgjegjshme vihet në listë të zezë. Jemi të obliguar të krijojmë ambient ku sistemi gjyqësor e prokurorial zhveshët nga çdo lloj ndikimi politik dhe vepron vetëm në bazë të ndërgjegjes personale dhe përgatitjes profesionale të gjyqtarit dhe prokurorit në bazë të të cilit edhe gjykohet nga publiku”, tha Kurti.

Kryeministri ka theksuar se duan etablim të shoqërisë që tregon zero tolerancë ndaj korrupsionit, zero tolerancë ndaj ryshfetit e kontratave në këmbim të parave.

Mes tjerash, me këtë rast theksoi se lufta e Qeverisë ndaj korrupsionit ka ndikuar edhe në rritjen e ekonomisë.

“Ne duam etablim të shoqërisë që tregon zero tolerancë ndaj korrupsionit, zero tolerancë ndaj ryshfetit e kontratave në këmbim të parave. Mungesa e korrupsionit në Qeveri, përmirësimi në fushën e sundimit të ligjit kanë ndikuar edhe në zhvillimin ekonomik. Qytetarët tanë kanë besuar këtë duke dëshmuar me votime masive në zgjedhjet e fundit. Këtë besim po e shndërrojmë në rezultatet të cilat po tregojnë që zyrtari publik punon për publikun e jo për t’u pasuruar për vete apo për dikë tjetër privatisht. Gjatë qeverisjes dy vjeçare kemi rezultate të prekshme në luftimin e krimit të organizuar dhe kontrabandës, që ka rezultuar me arrestimin e mbi 3 mijë e 200 personave, prej të cilëve mbi 300 janë zyrtarë publik e me 38 të arrestuar vetëm në rastin e keqpërdorimeve me subvencionet”, theksoi Kurti.

Ministri i Financave, Punës dhe Transfereve, Hekuran Murati tha se përmes kësaj strategjie synohet të luftohet korrupsioni nga të gjitha nivelet, duke vendosur një strukturë të fuqishme për parandalimin dhe luftimin efektiv të korrupsionit, e cila nuk do të lë hapësirë për mosndëshkim.

“Të gjithë e njohim ndikimin e rëndë që ka korrupsioni në shoqëri, pengon rritjen ekonomike dhe pengon qytetarët nga shërbimet dhe mundësitë themelore për të zhvilluar jetesë të dinjitetshme. Sot po shënojmë një ditë të rëndësishme në përpjekjet tona të vazhdueshme për të luftuar korrupsionin në Kosovë, ashtu siç e kemi premtuar. Përmes kësaj strategjie synojmë të luftojmë korrupsionin nga të gjitha anët duke vendosur një strukturë të fuqishme për parandalimin dhe luftimin efektiv të korrupsionit, e cila nuk do të lë hapësirë për mosndëshkim”, tha Murati.

Pranë Dhomave të Specializuara në Hagë e ka përfunduar dëshminë e tij dëshmitari i gjashtë i ZPS-së. Ai në dëshminë e tij në kundra-pyetjet e mbrojtjes së Jakup Krasniqit, Aidan Ellis, deklaroi se në vitin 1998 ishte përpjekur të kontaktonte Adem Demaçin dhe Jakup Krasniqin.

Ai tha se këto dy figura kishte dëgjuar se ishin personalitete kryesore në UÇK.

Dëshmitari i gjashtë tha se familja e tij në 1998, ishte përpjekur të kontakonte Demaçin, por kur u pyet për periudhën gjatë këtij viti, dëshmitari tha se nuk i kujtohet.

Avokati: Është e drejtë të themi se familja juaj u përpoq të kontaktonte Adem Demaçin

Dëshmitari: Po

Avokati: Të kujtohet kur ka ndodhur

Dëshmitari:98’tën

Avokati: Pak a shumë të kujtohet kur në 98

Dëshmitari: Jo

Pas kësaj deklarate të dëshmitarit të ZPS-së, mbrojtja e ballafaqoi dëshmitarin me një deklaratë të tij dhënë prokurorisë, ku kishte deklaruar se në vjeshtën e 98’ës, kishin tentuar të takonin Demaçin dhe më pas këtë e pohoi edhe vetë dëshmitari.

I pyetur se kush ishte Adem Demaçi, dëshmitari i gjashtë u shpreh se nga ajo që kishte dëgjuar nga të tjerët por në lajme kishte kuptuar se Demaçi ishte përfaqësuesi politik i UÇK-së.

Avokati: Në 1998 mbase në fillim por jo në fillim të 98 dhe prokuroria të pyet mos nga vjeshta e 98, ti je përgjigjur po mbase rreth asaj periudhe, mbase nga vjeshta kështu të kujtohet ende

Dëshmitari: Ndoshta u kanë vjeshta

Avokati: Prokurori të ka pyetur kush ishte në atë kohë Adem Demaçi dhe ti je përgjigjur në atë kohë ata thonin se ishte kryesori, thonin është edhe mbi UÇK, do të ishte përsëri përgjigja juaj kjo sot

Dëshmitari: Në atë kohë ashtu thoshin, në atë kohë

Avokati: Këtë kishe dëgjuar që e thonin në përgjithësi njerëzit aty në fshat apo jo

Dëshmitari: Po edhe në fshat por edhe mes lajmeve në televizor

Avokati: Të kujtohet të kenë thënë njerëzit që Adem Demaçi ka qenë përfaqësuesi politik i UÇK-së

Dëshmitari: Ashtu thoshin dhe për atë jemi shkuar në ushtri

Ndërsa, kur mbrojtja e Jakup Krasniqi e pyeti se a kishte dëgjuar se Jakup Krasniqi ishte zëdhënës i UÇK-së, dëshmitari me kodin 4355 e pohoi këtë.

Dëshmitari po ashtu u shpreh se në shtator të vitit 1998, kishte shkuar në fshatin e Jakup Krasniqit, saktësisht në Negrovcë.

Avokati: Ti po ashtu i ke thënë prokurorisë që shkove në fshatin e Jakup Krasniqit

Dëshmitari: Nuk dëgjohet

Avokati: Kishe dëgjuar që zotëri Krasniqi ishte zëdhënës i UÇK-së

Dëshmitari: Po

Avokati: Të kujtohet kur ke shkuar në fshatin e tij

Dëshmitari: Po

Avokati: Kur

Dëshmitari: U kanë në shtator 98’tën

Ai tha se vendi ku kishte shkuar për të takuar Jakup Krasniqin me sa i kujtohet quhej Negrovcë, dhe aty kishte shkuar bashkë me nënën e tij, por që me Krasniqin nuk ishte takuar, pasi ai nuk ndodhej në fshat.

Avokati: Shkove tek fshati si the askujt më përpara se do të shkoje

Dëshmitari: Bashkë me nënën, por gjithmonë ishte nëna ajo që kërkonte me shkuar, e unë u deshtë me dërguar

Avokati: Kur shkove atje e mësove se Jakup Krasniqi nuk ishte atje

Dëshmitari: Po

Avokati: Duke qenë se nuk ishte Jakup Krasniqi, atje nuk biseduat ndonjë me Jakup Krasniqin për këtë çështje

Dëshmitari: Nuk kemi biseduar

Pas pyetjeve të mbrojtjes së Jakup Krasniqit, vazhdoi me pyetje gjyqtariGenël Metro, të cilat kryesisht ishin pjesë të redaktuara.

Por, në një pyetje gjyqtari Metro kërkoi të di nëse në qershorin e vitit 1998, kishte ndonjë autoritet apo institucion ku mund të kërkonin të hapej hetim për rastin e “personit 1” dhe “2”, për të cilët dëshmitari i 6-të, tha se janë mbajtur të burgosur nga UÇK-ja.

Dëshmitari në këtë pyetje të gjyqtarit u shpreh se nuk ka pas, por në ato vende ku kanë dëgjuar aty kanë shkuar.

Metro: Këta familjarët çfarë të thanë

Dëshmitari: Mjekësia e Prishtinës janë kanë në spitalin dhe ata e kishin lajmëruar se është gjetur trupi i njëshit

Gjyqtari: Na the se u përpoqe të kontaktoje dy persona brenda UÇK, dhe unë dua të pyes në qershor të 98’ës, a kishte ndonjë vend apo institucion ku të shkoje ti apo numri 2 që të hapej një hetim për t’u zbuluar çfarë u kishte ndodhur personit numër 1 dhe 2

Dëshmitari: Jo ato vende ku i dinim apo ku kemi dëgjuar, aty jemi shkuar

Ndërsa, aktualisht në seancën gjyqësore të sotme kundër katër ish-krerëve të UÇK-së, ka nis dhënien e dëshmisë së tij dëshmitari i shtatë i ZPS-së, i cili fillimisht po iu përgjigjet pyetjeve të ZPS-së, në sesion privat.

Në pjesën më të madhe dhënia e dëshmisë së dëshmitarit të gjashtë të ZPS-së, ka qenë e mbyllur për publikun.

Dëshmitari i gjashtë i ZPS-së, ka nisur dhënien e dëshmisë së tij nga pasditja e djeshme. Një pjesë e dëshmisë së dëshmitarit të gjashtë u dëgjuar kryesisht në seancë të mbyllur për publikun si masë për mbrojtjen e dëshmitarit.

Katër dëshmitarët e parë në gjykimin kundër ish-presidentit, Hashim Thaçi, ish-kryekuvendarëve, Jakup Krasniqi e Kadri Veseli dhe ish-deputetit, Rexhep Selimi, dhanë dëshminë e tyre në seanca të mbyllura për publikun.

Ish-krerët e UÇK-së, për të cilët prokuroria pretendon se kanë kryer krime lufte, po gjykohen pas një procedure paraprake që ka zgjatur më shumë se dy vjet.

Gjatë krejt kësaj kohe, ish-presidenti Thaçi, ish-kryeparlamentarët Krasniqi dhe Veseli, si dhe ish-deputeti Selimi, po qëndrojnë në paraburgim në Hagë, ndërsa në paraqitjet e tyre para gjykatës ata janë deklaruar të pafajshëm

Kryetari i Kuvendit të Republikës së Kosovës, Glauk Konjufca, mori pjesë në konferencën rajonale të organizuar nga Këshilli për Zhvillim të Qëndrueshëm në Kuvendin e Kosovës, në bashkëpunim me UNFPA-në, lidhur me perspektivën parlamentare për barazinë gjinore dhe qëndrueshmërinë demografike në Ballkanin Perëndimor.

Në fjalimin e tij hyrës, kryeparlamentari Konjufca duke e cilësuar këtë konferencë si shumë të rëndësishme dhe të dobishme për të kaluar sfidat e barazisë gjinore, përmendi faktin se krahasuar me të kaluarën, rolet sociale të burrave dhe grave në shoqëri kanë pësuar ndryshime.

Ai tha se në periudhën që po jetojmë, falë politikave përkrahëse ndaj grave, pjesëmarrja e tyre në tregun e punës është rritur dukshëm, por sfidat janë ende shumë evidente.

Për më tepër, kryetari Konjufca tha se Kosova në aspektin legjislativ e ka të rregulluar çështjen e barazisë gjinore, pasi që ky problem është jetik dhe se nuk ka progres të vendit pa u arritur caku ideal i barazisë.

“Kosova, në kuptimin e kornizës ligjore, e ka të mishëruar përkushtimin për barazi gjinore, luftimin e diskriminimit dhe paragjykimit në bazë gjinore, si dhe respektimin e plotë të konventave ndërkombëtare për të drejtat e grave. Natyrisht, gjithmonë ka hapësirë për përmirësim e avancim në këtë drejtim. Por ajo që e sfidon vazhdimisht këtë strukturë të mirë – ndërtuar ligjore, janë barrierat tradicionale e normat kulturore. Politikat e bashkërendimit të punës dhe jetës familjare në mënyrë të barabartë mes burrave dhe grave janë më shumë se kurrë të nevojshme për të luftuar diskriminimin gjinor dhe për të siguruar barazi të mirëfilltë mes burrave dhe grave”, ka shtuar kryetari Konjufca.

Kryeparlamentari Konjufca fjalimin e tij e përmbylli me sugjerimin e intensifikimit të përpjekeve institucionale, duke kërkuar kështu të merrën të gjitha masat e nevojshme legjislative dhe masa të tjera të nevojshme që të adresohen mangësitë dhe sfidat që prekin politikat përkrahëse për familjet.​

Numër i madh parregullsish nga më të ndryshmet, nisur keqmenaxhimi financiar dhe kontrollit, dobësi evidente në fusha të rëndësishme financiare si: moszbatim i procedurave të duhura të prokurimit, tejkalim i kontratave, menaxhim jo të mirë me kontratat, detyrimet e papaguara, etj. janë evidentuar nga Zyra Kombëtare e Auditimit (ZKA) të kenë ndodhur në Komunën e Gjilanit gjatë vitit 2022.

Kështu, Auditori ka gjetur se komuna kishte bërë keq klasifikime të shpenzimeve ku nga kategoria ekonomike investime kapitale kishte paguar 605,692€, për nga natyra i takojnë mallrave dhe shërbimeve.

“Shpenzimet e paguara kanë të bëjnë me mirëmbajtjen teknike të objekteve komunale, sanimi dhe mirëmbajtja e ndriçimit publikë si dhe mirëmbajtjen verore të rrugëve ekzistuese. Të njëjtat nuk ishin regjistruar në regjistrin e pasurive mbi 1,000€, sepse zyrtari i pasurive ka vlerësuar se këto shpenzime nuk e plotësojnë kushtin për të qenë pasuri kapitale. Këto kishin ndodhur për shkak të planifikimit jo të mirë buxhetor dhe mungesës së mjeteve në kategoritë adekuate”, thuhet në raport.

Sipas Auditorit, gjetje tjetër ka ndodhur edhe për pagesa të faturës për shërbime zërimi pa procedura kontraktuale.

“Pagesa e faturës në vlerë prej 5,480€, ishte bërë për shërbimet e zërimit në llogarinë e operatorit ekonomik nga kodi ekonomik shërbime teknike me vendim të Kryetarit të Komunës. Për pagesën e bërë nuk kemi gjetur kontratë të nënshkruar nga zyrtari përgjegjës i prokurimit dhe raport të pranimit. Kjo ka ndodhur për shkak të vendimit të Kryetarit për të bërë pagesën e shërbimeve të zërimit të cilat ishin mbajt në kuadër të flakës së janarit”, thuhet në raport.

Po ashtu edhe përdorimi i gabuar i procedurës së prokurimit, është evidentuar si e gjetur nga auditori.

“Për punë ose shërbime shtesë që nuk janë përfshirë në kontratën origjinale që u nënshtrohen disa kushteve të caktuara (Operatori Ekonomik OE) njëjtë ekzekuton shërbimet ose punët shtesë, që nuk mund të ndahen në mënyrë teknike ose ekonomike, megjithëse si të ndara janë tejet të nevojshme për kompletim, si dhe vlera nuk është më shumë se 10% e vlerës se kontratës origjinale); dhe për shërbime ose punë të reja që përbehen nga përsëritja e punëve ose shërbimeve të ngjashme që i janë besuar OE që i nënshtrohet disa kushteve të caktuara (janë në përputhje me projektin bazë, kjo mundësi është e zbuluar në tender, ndodh brenda 2 viteve pas përfundimit të kontratës fillestare si dhe vlera nuk është më shumë se 10% të vlerës së kontratës origjinale)”, thuhet në raport.

Po ashtu sipas ZAK-së, Zyra e prokurimit kishte lidhur dy kontrata për pastrimin e objekteve shkollore, njëra me 13.04.2022, në vlerë 40,262.86€, për një muaj dhe tjetrën me 18.05.2022, në vlerë prej 87,377.37€, deri në zgjidhjen çështjes së pastrimit të objekteve, duke përdorur procedurën e negociuar pa publikim të njoftimit për kontratë.

“Zyra e prokurimit në këtë rast është dashtë ta përdorë procedurën e hapur për shkak se asnjë nga kriteret e përmendura nga rregulla dhe udhëzuesi operativ nuk janë plotësuar për ta përdorur procedurën e negociuar pa publikim të njoftimit. Kjo ka ndodhur nga pakujdesia e zyrës së prokurimit për t’i respektuar kërkesat e parapara ligjore”, thuhet në raport.

Edhe tejkalim i kontratave për është evidentuar sie gjetur në raportin e auditorit për vitin 2022, për komunën e Gjilanit.

“Komuna me datën 08.11.2019, kishte lidhur kontratë publike kornizë me çmim për njësi për ”Sanimi, mirëmbajtja dhe zgjerimi i ndriçimit publik në fshatrat e Komunës së Gjilanit” në vlerë 250,000€. Sipas raportit të menaxherit të kontratës punë të kryera me këtë kontrat janë 312,575€, të cilat edhe ishin paguar. Pra totali i tejkaluar i kontrratës është 62,575€. Po ashtu kontrata e lidhur me 26.04.2021, në vlerë prej 60,000€, për “Mirëmbajtja dimërore e rrugëve në Komunën e Gjilanit” ishte tejkaluar për 18,000€. Për këtë tejkalim nuk ka ndonjë arsyetim nga menaxheri i kontratës”, bëhet e ditur në raport.

Po kështu e gjetur tjetër është evidentuar edhe për mangësi lidhur me marrëveshjet për shërbime të veçanta

“Komuna në RVF për vitin 2022 kishte raportuar 29 persona me marrëveshje për shërbime të veçanta. Ndonëse ka zvogëlim të numrit të tyre nga viti i kaluar (103), megjithatë, në pesë (5) mostra të testuara, kemi identifikuar se komuna nuk kishte zhvilluar procedura të prokurimit publik për angazhimin e tyre. Kontratat e nënshkruara mes kryetarit dhe të angazhuarve ishin për pozitat: zyrtare në zyrën për Preshevë, Medvegjë dhe Bujanovc, inspektor i shërbimeve publike, inxhinier i komunikacionit, zyrtar për protokoll dhe asistente administrative”, thuhet në raport.

Ky raport ka rezultuar me 15 rekomandime, prej tyre 6 janë rekomandime të reja, 9 të përsëritura.

Kryeministri rus Mikhail Mishustin ndodhet në Shangai dhe po merr pjesë në forumin ekonomik, në kuadër të një vizite dyditore gjatë së cilës do të takohet me presidentin kinez Xi Jinping.

Mishustin mbërriti në Shangai të hënën në mbrëmje, njoftoi Ministria e Punëve të Jashtme ruse.

Ai u prit nga ambasadori rus në Kinë, Igor Morgulov, si dhe ambasadori kinez në Moskë, Zhang Hanhui.

Në Shangai, kryeministri rus pritet të marrë pjesë në forumin e biznesit ruso-kinez si dhe janë planifikuar bisedime me përfaqësues të qarqeve të biznesit rus në Kinë,

Një numër i biznesmenëve rusë që janë objektiv i sanksioneve perëndimore, veçanërisht në sektorët e çelikut, minierave dhe plehrave, si dhe zëvendëskryeministri përgjegjës për energjinë Aleksandar Novak, janë të ftuar në forum.

Liderët e shteteve të Azisë Qendrore në samitin e organizuar në Kinë, më 19 maj 2023.
LEXONI EDHE KËTË:
Kina shpalos planin ambicioz për zhvillimin e Azisë Qendrore

Kina u bë blerësi më i madh i Rusisë në sektorin e energjisë vitin e kaluar, duke lejuar Moskën, e cila është vënë nën sanksionet perëndimore për shkak të luftës së saj në Ukrainë, të shmangte një kolaps në eksportet e saj të gazit.

Të mërkurën, Mishustin do të udhëtojë për në Pekin, ku do të takohet me presidentin e Kinës dhe kryeministrin Li Jiang.

Kina dhe Rusia kanë forcuar bashkëpunimin ekonomik dhe kontaktet diplomatike në vitet e fundit.

Partneriteti i tyre strategjik është bërë edhe më i fortë që nga pushtimi rus i Ukrainës , dhe analistët besojnë se Kina tani ka një avantazh në marrëdhëniet, duke pasur parasysh izolimin e Rusisë në skenën ndërkombëtare.

Pekini pretendon të jetë neutral në konflikt, por nuk e ka dënuar publikisht pushtimin e Ukrainës.

Në muajin shkurt, qeveria kineze publikoi një dokument që bën thirrje për një “zgjidhje politike” të konfliktit dhe respektimin e integritetit territorial të të gjitha vendeve, ku përfshihet edhe Ukraina.

Në samitin e marsit në Moskë , presidenti Xi ftoi homologun e tij Vladimir Putin të vizitonte Pekinin./REL/

Këshilli për Mbrojtjen e të Drejtave dhe Lirive të Njeriut (KMDLNj) ka kritikuar Kuvendin e Kosovës për mos mbajtje të seancave për një periudhë kohore.

Në reagimin e KMDLNj-së thuhet se parlamenti kosovar ka hyrë në javën e tretë që kur nuk ka mbajtur asnjë seancë ndonëse ka pika të rendit të ditës të bartura edhe nga viti 2022.

“Në anën tjetër, me rregulloren e re të Kuvendit kemi përfitime të ndjeshme, që nga kryetari i Kuvendit i cili, përfiton thuaja 80% më shumë krahasuar me më parë. Linja e përfitimeve përfshinë edhe nënkryetarët, deputetët dhe të tjerët puna e të cilëve ndërlidhet me Kuvendin e Kosovës. Rritja e përfitimeve në vendet normale kryesisht kushtëzohet me rritje të punës dhe përgjegjësive si dhe performancës që vlerësohet si e suksesshme ndërkaq, në rastin e Kuvendit të Kosovës kjo rritje është shkelje e standardeve minimale të moralit sepse kjo rritje është në kundërshtim të plotë me punën që e bëjnë përfituesit, të pandërgjegjshëm dhe të papërgjegjshëm duke filluar nga kryetari i Kuvendit që po i prinë këtij shpërdorimi institucional, moral dhe material”, thuhet në njoftim.

“KMDLNj nuk e beson se ka Kuvend më përtac në rajon e që ka përfitime më të mëdha. KMDLNj nuk e ka të qartë pse deputetët dhe udhëheqja e Kuvendit duhet të kompensohen shtesë për punët që përfshihen në përshkrimin e vendit të punës”.