Author: G.O.

Kryetari i Lidhjes Demokratike të Kosovës, Lumir Abdixhiku ka pritur në takim ambasadorin e Britanisë së Madhe në Kosovë, Nicholas Abbott.

Në takim është diskutuar për situatën aktuale politike në vend, me theks të veçantë gjendjen e tensionuar në veri të vendit.

Kryetari Abdixhiku e njoftoi ambasadorin Abbott për qëndrimin e LDK-së për tensionet në veri si dhe nevojën që në momente të tensioneve e provokimeve nga Serbia, ecja e përbashkët me aleat për të përballuar një krizë është domosdoshmëri.

Në këtë moment, Kosovës i duhen gjithë miqtë e saj; përplasja me ta është devijim strategjik e dështim diplomatik me pasoja afatgjata.

Kryetari Abdixhiku ka falënderuar ambasadorin Abbott dhe Britaninë e Madhe si partner strategjik për rolin dhe kontributin e saj në forcimin dhe konsolidimin e shtetit të Kosovës.

Lidhja Demokratike e Kosovës – dega në Vushtrri po akuzon Partinë Demokratike të Kosovës për keqmenaxhim me Komunën e Vushtrrisë, e cila udhëhiqet nga kryetari Ferit Idrizi. Kryetari i degës së LDK-së në këtë komunë, Xhafer Tahiri tha se të gjeturat e Raportit të Auditimit, nga Zyra Kombëtare e Auditimit për Komunën e Vushtrrisë për vitin 2022 tregojnë për një qeverisje të paaftë dhe me shumë keqpërdorime nga pushteti i PDK-së, të cilat ftoi prokurorinë që t’i hetojë.

Tahiri në një konferencë për media tha se nuk ka asnjë punë dhe asnjë projekt të ri nga qeverisja e PDK-së, përveç atyre që i ka lënë LDK-ja.

Sipas tij, vetëm për një vit qeverisje nga PDK-ja, Komuna e Vushtrrisë ka humbur mbi 2 milionë e 691 mijë euro investime kapitale.

“Ky vit në qytetin Vushtrrisë ka filluar me zero euro shpenzime për investime kapitale, që nënkupton se komuna nuk po bën asnjë punë, përveç atyre që i kemi lënë si projekte 2-vjeçare dhe 3-vjeçare. Buxheti final, në bazë të Raportit të auditimit për investime kapitale në qytetin e Vushtrrisë ishte 6 milionë e 47 mijë e 316 euro, prej tyre ishin shpenzuar vetëm 3 milionë e 356 mijë e 6 euro ose 55 përqind e buxhetit. Pra, janë humbur saktësisht 2 milionë e 691 mijë e 310 euro investime kapitale vetëm në vitin e parë të qeverisjes së PDK-së në Vushtrri. Pra, gjysma e punëve nuk janë kryer”, tha ai.

Ndërsa shtoi se suficiti total i buxhetit komunal për vitin 2022 në Vushtrri është 4 milionë e 375 mijë e 687 euro.

Tahiri, i cili kishte udhëhequr me këtë komunë për një mandat, akuzoi poashtu pushtetin aktual në Vushtrri për punësime të militantëve, me theks të veçantë avokatin e komunës.

“Suficiti total i buxhetit komunal për vitin 2022 në Vushtrri është 4 milionë e 375 mijë e 687 euro. Pra, janë humbur 4 milionë e 375 mijë euro, nuk ëhstë investuar asnjë cent këtë vit, ndërkohë që Komuna e Vushtrrisë për udhëtime zyrtare deri në momentin që po flasim ka zotuar mbi 50 mijë euro. Nuk ka asnjë punë dhe asnjë projekt të ri nga qeverisja e PDK-së, përveç atyre që i ka lënë qeverisja e LDK-së. Kjo komunë, në bazë të raportit të auditorit, për vendime gjyqësore ka kryer pagesa në vlerë prej 198 mijë e 779 euro. Komuna e Vushtrrisë ka angazhuar për avokat të komunës një militant të PDK-së, të cilin e ka paguar 20 mijë euro për nje vit, dhe prapë i ka humbur në gjykatë 200 mijë euro. Ne si LDK ftojmë prokurorinë të hetojë pagesat për avokatin e komunës, i cili ëhstë angazhuar me tenderë për të shpjeguar një pyetje të thjeshtë, pse është paguar kaq shumë avokati i komunës e janë humbur kaq shumë mjete financiare të komunës së Vushtrrisë në procese gjyqësore”, tha ai.

Duke u thirrur në raportin e auditimit për vitin 2022 për Komunën e Vushtrrisë, Tahiri tha se janë paguar afër 200 mijë euro për projekte që nuk janë kryer, për çka kërkoi që prokuroria të hetojë edhe këto pagesa.

Ndërsa për mangësitë që sipas LDK-së, auditori ka gjetur në projekte, foli shefi i asamblistëve të LDK-së në Komunën e Vushtrrisë, Adnan Lahu.

Lahu tha se në pesë projekte janë identifikuar disa mangësi.

“Komuna e Vushtrrisë ka përzgjedhur operator ekonomik të papërgjegjshëm, vlera e kontratës 147,859€, mungesa e projekteve ekzekutuese për procedurat e prokurimit të investimeve kapitale, mos vazhdimi i sigurisë së ekzekutimit konform periudhës së zbatimit të kontratës, faturimet jo në pajtueshmëri me marrëveshjen, mangësi në regjistrin kontabël të pasurive, keqpërdorim në subvencione në bujqësi, ku thirrjet publike në bujqësi janë bërë jo në pajtim me rregulloren e brendshme për subvencionim, mangësi në raportim dhe monitorimin e projekteve të subvencionuara, Komuna e Vushtrrisë nuk ka përgatitur plan vjetor për mbeshtetje financiare të OJQ-ve, vonesa në pagesën e faturave në vlerë 93,929€, shpenzime të larta procedurale të pagesave të ekzekutuara sipas vendimeve gjyqësore… Vushtrria për fat të keq nuk ka kryetar, e për këtë arsye nuk ka as menaxhim e nuk ka as projekte. Kryetari Idrizi premtoi shumë, por premtimet e tij po dalin vetëm mashtrime”, tha ai.

Projektet që sipas LDK-së janë gjetur mangësi në Komunën e Vushtrrisë nga auditori i Përgjithshëm janë:Kontrata “Rregullimi i shtratit të lumit Sitnica në Vushtrri” në vlerë 1 milion e 49 mijë e 680 euro, Kontrata “Ndërtimi i trotuarit në fshatin Stanoc i Epërme Faza II” në vlerë 10 mijë e 869 euro, Kontrata “Ndërtimi dhe rregullimi i parqeve dhe shesheve në 6 fshatra” vlerë 89 mijë 236 euro, Kontrata “Furnizimi me aparaturë për kinema për funksionalizimin në qendrën e kulturës” vlerë 46 mijë e 757 euro si dhe Kontrata “Renovimi i Palestrës Jeton Terstena” Ritender e vitit 2022 në vlerë 114 mijë e 900 euro.

Ish-kryeministri i Kosovës, Avdullah Hoti ka deklaruar se me ardhjen në pushtet të Qeverisë Kurti II ka humbur sovraniteti në veri të Kosovës. Ai ka paralajmëruar se me këtë sjellje të kryeministrit, vendi mund të vijë në një situatë kur në veri, rendi dhe ligji të vendoset nga KFOR-i dhe EULEX-i, e jo nga Policia e Kosovës.

Ai thotë se në 30 vite të përpjekjeve të shqiptareve për shtet të pavarur dhe 15 vite pas pavarësisë, kurrë nuk ka pas një komunikim të tillë mes Qeverisë Kosovës dhe Qeverisë së SHBA-së, me ç’rast thekson se gjendja është kritike.

Hoti u shpreh se veprimet sado të drejta të jenë duhet të bëhen në koordinim me aleatët ndërkombëtarë.

“Vijnë emisarët amerikanë në Kosovë dhe thonë qartë që ata janë mbrojtës të sovranitetit dhe integritetit territorial të Kosovës, dhe kërkesat që kanë karshi Kosovës për themelim të Asociacionit, e thonë qartë se nuk është kërkesë e tyre që duhet të bihet ndesh me kushtetutën e Kosovës. Janë edhe marrëveshjet paraprake, e vitit 2015 në veçanti, që krijon siguri Qeverisë së Kosovës për të lëvizur përpara në përputhje më këshillat e partnerëve, por kam përshtypjen se situata ka shkuar shumë larg. Veprimet e njëanshme, pavarësisht se janë të drejta, sepse ne kemi të drejtë legjitime si shtet sovran të vendosim ligjin dhe rendin në çdo pjesë të Kosovës, por këtë ne mund ta bëjmë në koordinim me partnerët tanë ndërkombëtarë, të shohim çfarë humbim dhe çfarë fitojmë nga veprimet e njëanshme. E vërteta është që asnjëherë nuk ka pasur më pak sovranitet të shtrirë në veri të Kosovës sesa në këtë qeveri”, deklaroi Hoti për KosovaPress.

Hoti thotë i druhet edhe një situate tjetër kur KFOR-i dhe EULEX-i të kujdesen për rendin dhe ligjin në veri të vendit. Sipas tij, kjo do të ishte e rëndë.

Ai kërkon që të gjitha komunitetet të përfshihen brenda strukturave të Republikës së Kosovës përmes politikave të mençura dhe jo duke përdorur dhunë.

“Unë i druhem edhe një situate tjetër, me këto veprime të pamatura të Qeverisë së Kosovës, kam frikë që mund të vijmë në situatën kur në atë pjesë të vendit rendi dhe ligji të vendoset nga KFOR-i dhe EULEX-i, ne nuk e duam atë. Kemi punuar shumë në pavarësinë e mbikëqyrur, në partneritet të ngushtë me miq tanë ndërkombëtarë duke shtrirë hap pas hapi sovranitetin tonë në atë pjesë të vendit. Të jetë NATO në Kosovë përmes KFOR-it, si mbrojtës i rendit, i sigurisë kombëtare, për gjitha çështjet t’i marrim përsipër, ta forcojmë policinë tonë, FSK-në dhe gradualisht t’i integrojmë të gjitha komunitetet brenda strukturave të rendit, të sigurisë, të ushtrisë së Kosovës, sepse ne jemi shumicë në këtë vend, shqiptarët janë shumicë, ne kemi përgjegjësi t’i integrojmë të gjitha komunitetet, jo me dhunë. Ne duhet të bëjmë politikë shumë më të mençur, të koordinohemi me partnerët tanë ndërkombëtarë në mënyrë që ta amortizojmë këtë ndikim, dhe gradualisht t’i përfshijmë komunitetin serb brenda institucioneve”, shton Hoti.

Hoti u shpreh për KosovaPress se Kurti në dy vitet e fundit ka sjellë një komunikim të vështirë me Shtete e Bashkuara të Amerikës dhe gjendja është kritike.

“Në dy vitet e qeverisjes ka pas momente të vështira të komunikimit të tyre me aleatin kryesor, me SHBA-të. Kemi pas rastin kur janë anuluar vizitat e ministrave, kemi pas situata kur kryeministri ka qëndruar tre javë atje dhe nuk e ka takuar askush, dhe situata të ndryshme të problemeve në bashkëpunim, për shkak të sjelljeve të Qeverisë së Kosovës, por që vjen deri në këtë pikë nuk e kam imagjinuar. Të vijnë deri në pikën që zyrtarë shumë të lartë amerikanë, nga Sekretari i shtetit (Blinken) e poshtë, hierarkia e Departamentit të Shtetit, ta thonë qartë se Kosova nuk po i ndjek këshillat e partnerit kryesor, është duke i cenuar marrëdhëniet mes dy vendeve, kjo situatë është e paimagjinueshme. Në 30 vite të përpjekjeve të shqiptarëve të Kosovës për shtet të pavarur dhe 15 vite pas pavarësisë, kurrë nuk ka pas një komunikim të tillë mes Qeverisë Kosovës dhe Qeverisë së SHBA-ve. Gjendja është kritike”, vijon Hoti.

Pezullimi i Kosovës nga stërvitja ushtarake “Defender Europe ‘23” për Hotin është një mesazh ogurzi për Republikën.

“Më vjen keq që gjithë ata ushtarë të FSK-së e kanë pas ëndërr me qenë pjesë e ushtrimit ‘Defender 2023’, të përjashtohen nga ky ushtrim. Ka qenë ndër momentet më të mira të qeverisjes time, sa kam qenë kryeministër kur patëm marrë ftesën që shumë pak ushtarë të FSK-së t’i bashkohen ushtrisë amerikane në misionin paqeruajtëse dhe gjithë Kosova e ka festuar si një arritje të madhe. Ndërkaq, sot pas dy viteve të merret vendimi që Kosova të përjashtohet nga ushtrimi i NATO-s, ku Amerika është kryesore, është shenjë dhe mesazh ogurzi për shtetin e Kosovës”, përfundon Hoti për KosovaPress.

Në Zveçan, Zubin Potok dhe Leposaviq, serbët po protestojnë duke kundërshtuar hyrjen e kryetarëve të rinj shqiptarë në objektet komunale, si dhe praninë e Policisë së Kosovës. Si pasojë e veprimeve të protestuesve kanë mbetur të lënduar 6 policë dhe 30 pjesëtarë të KFOR-it. Gjithashtu, janë djegur dhe dëmtuar vetura të Policisë së Kosovës dhe të mediave.

Një 52 vjeçar shqiptar është arrestuar në Greqi, pasi njihet si një ndër personat që ka pastruar miliona para të pista nga tregtia e drogës në Evropë.  Sipas Europol ai është një ndër bosët më të mëdhenjt të pastrimit të parave, i cili dyshohet se ka trafikuar rreth 250.000.000 euro brenda një periudhe 10 mujore.

Ndalimi i tij është bërë nga Prokuroria e Narkotikëve të SDOE në Glyfada, pas bashkëpunimit të shkëlqyer me shërbimet kompetente të autoriteteve holandeze. .

Mediat greke shkruajnë se 52-vjeçari, kishte një urdhër-arresti evropian të lëshuar kundër tij përmes aplikacioneve dhe fondeve të mesazheve të koduara, dyshohet se i zhvendosi “paratë e pista” atje ku qarqet i duheshin.

Numërimi mbrapsht për arrestimin e shqiptarit filloi 6 muaj më parë, kur autoritetet holandeze të zbatimit të ligjit arrestuan persona të lidhur me një rrjet të trafikut të drogës. Pasi kërkuan pajisjet e tyre elektronike, ata gjetën një kontakt me tre shkronja. Kur e kanë identifikuar, kanë konstatuar se është një person real që jeton në Greqi, përcjell Abcneës.al, transmeton Klankosova.t.

Në atë kohë u njoftua ambasada greke dhe nisën hetimet nga prokuroria e narkotikëve pranë SDOE-së për kapjen e 52-vjeçarit, i lindur në Sarandë dhe banues në Greqi. U zbulua shpejt se ai kishte themeluar dhe zotëronte një kompani të pasurive të paluajtshme në Glyfada.

Ai u ndoq menjëherë dhe u arrestua më 31 maj. Atë ditë, autoritetet kishin arritur të gjenin udhëzimet që ai u jepte, korrierëve të parave për tregtim përmes kripto-aplikacioneve.

Domethënë, ai fliste me kontaktet në Holandë dhe u jepte udhëzime se si të lëviznin paratë, duke i dërguar ato nga një vend në tjetrin në shuma të mëdha. Korrierët e informonin çdo natë, në fund të ditës, për shumat që trajtonin dhe ku shkonin.

Pas arrestimit i është sekuestruar e gjithë pasuria, përfshirë edhe apartamentet që i kishte transferuar kompanisë.Ai ka mbajtur një profil të ulët dhe pretendon se është i pafajshëm për atë që akuzohet.

Sekretari i Përgjithshëm i NATO-s, Jens Stoltenberg, tha se dhuna po e kthen prapa Kosovën dhe gjithë rajonin, derisa ka kërkuar edhe deeskalim të situatës në veri të vendit.

“Dhuna po e kthen prapa Kosovën dhe gjithë rajonin, duke vënë në pikëpyetje aspiratat euroatlantike. Si Prishtina ashtu edhe Beogradi duhet të ndërmarrin hapa konkretë për të de-përshkallëzuar situatën, të përmbahen nga sjelljet e mëtejshme të papërgjegjshme dhe të angazhohen në dialog me mbështetjen e BE-së, e cila është e vetmja rrugë për paqe të qëndrueshme”, tha ai për gazetën malazeze “Pobjeda”, transmeton Express.

Ai tha se NATO dënon fuqishëm sulmet e fundit të paprovokuara ndaj trupave të KFOR-it në veri të Kosovës, në të cilat u plagosën pothuajse 40 paqeruajtës.

“Sulme të tilla janë të papranueshme dhe duhet të ndalen”, tha ai.

Stoltenberg ka përmendur edhe “aktorë të huaj” në rajon që punojnë për minim të paqes.

“Rajoni ka bërë një rrugë të gjatë që nga konfliktet e viteve 1990, por ne kemi parë tensione të përsëritura, duke përfshirë ato në Kosovë si dhe në Bosnje dhe Hercegovinë, me retorikë më agresive, reforma të ngecura dhe aktorë të huaj që punojnë për të minuar progresin. NATO ka një histori të gjatë në promovimin e paqes dhe stabilitetit në Ballkanin Perëndimor. Koncepti ynë i ri strategjik, i miratuar në Samitin e Madridit vitin e kaluar, ripohon rëndësinë strategjike të rajonit për Aleancën. Ne pajtohemi për rëndësinë e pranisë sonë në rajon, duke përfshirë misionin tonë paqeruajtës të KFOR-it në Kosovë dhe zyrat tona në Sarajevë dhe Beograd”.

Sekretari i NATO-s foli edhe për rritjen e prezencës në Kosovë pas shpërthimit të tensioneve në veri.

“Po dërgojmë në Kosovë edhe rreth 500 ushtarë të tjerë nga rezerva operative për Ballkanin Perëndimor dhe kemi vënë në gatishmëri një batalion shtesë rezervë, që edhe ata të dislokohen sipas nevojës. Këta janë hapa të kujdesshëm për të siguruar që KFOR-i ka forcat dhe aftësitë që i nevojiten për të përmbushur mandatin e tij”.

Ai tha se misioni i KFOR-it do të ndërmarrë të gjitha veprimet e nevojshme për të ruajtur një mjedis të sigurt dhe të qetë, si dhe lirinë e lëvizjes për të gjithë njerëzit në Kosovë.

“NATO do të vazhdojë të luajë rolin e saj për të mbështetur sigurinë e qëndrueshme në Kosovë dhe stabilitetin në të gjithë Ballkanin Perëndimor”.

Tri autoblinda të Policisë së Kosovës në Zveçan kanë lëvizur sot rreth orës 12:00 për disa metra, duke u vendosur prapa ndërtesës së komunës.

Ato po vazhdojnë të qëndrojnë ende në këtë lokacion, ndërsa nuk dihet nëse do të vazhdojnë rrugën në drejtim të Mitrovicës ose jo.

Protestuesit në Zveçan po qëndrojnë si rëndom nëpër tendat e improvizuara afër ndërtesës së komunës.

Disa prej tyre kanë luajtur basketboll deri në këto momente kur po raportojmë dhe tani kanë ndërprerë lojën për shkak të reshjeve të shiut.

Ushtarët e KFOR-it, të cilët janë në numër simbolik po vazhdojnë të qëndrojnë para objektit komunal.

Një numër i tyre është pozicionuar edhe në hyrje-daljet kryesore të kësaj komune, kurse situata aktualisht është e qetë.

Situata në komunat në veri të Kosovës është tensionuar të premten e 26 majit, kur kryetarët e betuar janë detyruar të futen në zyrat e tyre të punës nën asistencën e Policisë së Kosovës.

Si pasojë e protestave të dhunshme, janë plagosur gjashtë policë të Kosovës dhe 30 ushtarë të KFOR-it, ndërkohë që serbët kanë sulmuar edhe gazetarët.

Kryetari i Aleancës për Ardhmërinë e Kosovës (AAK), Ramush Haradinaj deklaroi se e kanë numrin e nevojshëm të deputetëve për të iniciuar mocionin e mosbesimit ndaj qeverisë Kurti.

Ish-kryeministri Haradinaj para gazetarëve tha se është i papranueshëm eskalimi i fjalorit të kryeministrit ndaj aleatëve.

Sipas tij, një gjë e tillë e bën të vështirë rrugën përpara, për çka kanë filluar pasojat. Kreu i AAK-së, shtoi se mocioni i mosbesimit është zgjidhja e duhur.

“Mocioni është zgjidhja e duhur, është demokraci dhe kjo do të ishte me siguri e dobishme për gjithë spektrin politik, përfshirë edhe shumicën, për pozitën. Janë votat, opozita e ka numrin e nevojshëm për të inicuar mocionin, por po ashtu ka plot deputetë në Kuvendin e Kosovës që nuk pajtojnë me këto tejkalimet e panevojshme të kryetarit të qeverisë”, deklaroi ai.

Ai thekson se Kosova ka pranuar tri kërkesat e ShBA-ve dhe BE-së për deeskalimin e situatës.

“Tri kërkesat që janë paraqitur, në një mënyrë janë pranuar prej Kosovës. Siç edhe e dimë, veç është paralajmëruar edhe nga presidentja edhe nga kryeministri për mbajtjen e zgjedhjeve më veri. Ashtu siç është pranuar edhe mundësia e heqjes së njësive speciale nga objektet e komunës ku duhet të qëndrojnë në veri. Njëkohësisht edhe pranimi nga Qeveria e Kosovës për pranimin e krejt marrëveshjeve të mëhershme, si në marrëveshjen e Ohrit, paraprakisht edhe në marrëveshjen e Brukselit. Mendoj se këto tria janë çështje të dakorduara, veprimet e mëtejme të Qeverisë duhet të ndodhin tash, në kohë. Besoj se është me rëndësi të merret seriozisht kërkesa në kohë. Nuk janë ultimatum, nuk janë kërkesë e re, por pritje prej Kosovës me fillua për të vepruar”, deklaroi Haradinaj.

Tutje, ai shtoi se institucionet e Kosovës kanë bërë tri gabime, të cilat tash po i vuan vendi.

“Institucionet e Kosovës i kanë bërë tri gabime, për të cilat po i vuajmë pasojat. Gabimi i parë se nuk u dakorduan me propozimin amerikan për tabelat dhe pastaj me mbet në kujdestari veriu gjatë gjitjë procesit të dialogut, në kujdestari të amerikanëve. Gabimi i dytë ishte insistimi apo nxitimi për të mbajtur zgjedhje, duke mos e pasur pjesëmarrjen e garantiar të gjithëve. I treti, ishte gabim sikurse e dimë, kryetarët që kanë marrë aq pak vota nuk kualifikohen mirëfilli si kandidate të mirëfilltë. Edhe zgjidhja me i kryer funksionet e veta në objekte alternative për një kohë ishte e mençur. Gaboi kryetari i qeverisë kur insistoi t’i vendos ata me forcë policore në objekte. Të tri këto gabime u shfrytëzuan shumë mirë prej Serbisë, prej Vuçiqit, prej bandave atje të kriminelëve më veri. Është koha e fundit që ta kthejmë faqen, ta fillojmë një plan serioz me bashkësinë ndërkombëtare, mos t’i rrejmë më”, shtoi ai.

I dërguari i posaçëm i Shteteve të Bashkuara për Ballkanin Perëndimor, Gabriel Escobar, deklaroi nga Beogradi se nuk i ka dhënë afate Kosovës, siç është raportuar një ditë më parë, në lidhje me 3 kërkesat e tyre. Ai paralajmëroi se Asociacioni do të formohet me qeverinë aktuale të drejtuar nga Albin Kurti ose me ndonjë qeveri të ardhshme.

Një ditë më parë u raportua se Escobar i ka dhënë dy ditë kohë Kurtit që të tregojë nëse pajtohet me kërkesat e bashkësisë ndërkombëtare, siç janë deeskalimi i situatës në terren, shpallja e zgjedhjeve të reja për katër komunat veriore dhe rikthimi në tryezën e dialogut, por kjo u mohua nga zyrtari amerikan.

“Nuk kam dhënë një afat. Ajo që më pyetën në Prishtinë ishte se cilët ishin hapat e mëtejshëm dhe nga unë dhe z. Lajcak pas kësaj vizite do të kërkohet një përditësim të premten, Shtëpia e Bardhë do të kërkojë nga unë të jap një përditësim se çfarë po ndodh dhe unë duhet të raportojë nëse kemi progres apo jo. Z. Lajcak duhet të shkojë dhe të raportojë te zoti Borrell për të dhënë të njëjtin vlerësim. Pra, nuk është një afat, por ky është hapi tjetër për mua, dhe në bazë të raportit tim, ne do të marrim disa vendime për të ecur përpara, por nuk është një afat për askënd”, deklaroi Escobar.

Escobar deklaroi se nuk e di nëse ka pasur përgjigje nga Qeveria e Kosovës në lidhje me kërkesat e tyre, por u shpreh se diskutimet do të vijojnë me Bashkimin Evropian edhe pas këtyre vizitave.

“Mendoj se diskutimet mes qeverisë së Kosovës dhe përfaqësuesit special të BE-së do të vazhdojnë edhe pas largimit të tij sot nga Beogradi. Pra, nuk e di nëse ka pasur ende një përgjigje konkrete nga Qeveria e Kosovës, shpresoj që Qeveria e Kosovës e pranon se ajo që po përpiqemi të arrijmë është një rezultat i qëndrueshëm dhe reciprokisht i dobishëm për të dyja vendet”, vijoi Escobar.

Escobar deklaroi se t’i kthesh shpinën këtij propozimi është t’ia kthesh shpinën Evropës, Shteteve të Bashkuara, Mbretërisë së Bashkuara dhe të gjithë miqve të tjerë, njëjtë tha se mund të cilësohet edhe nëse refuzohet dialogu mes dy vendeve.

“Për sa i përket pasojave, unë e kam nënvizuar njërën që është ajo që tha Bashkimi Evropian, t’i kthesh shpinën një propozimi evropian do të thotë t’i kthesh shpinën Evropës, por më duhet të theksoj se ky nuk është vetëm Bashkimi Evropian, por edhe Mbretëria dhe Shtetet e Bashkuara, dhe si miq të Kosovës ne po i inkurajojmë ata të bashkëpunojnë, të koordinohen dhe të rreshtohen me përpjekjet tona për të prodhuar stabilitet rajonal. Tani ai partneritet është i hapur për Kosovën sa herë që ajo dëshiron, por në të njëjtën kohë, nëse nuk e bëjnë, ata po ndërmarrin një veprim të njëanshëm, duke u larguar nga partneriteti i tyre me komunitetin transatlantik. Tani kjo në vetvete është gjithashtu një pasojë”, tha ai.

Escobar deklaroi se sfida e Serbisë është që të bind serbët të kthehen në institucionet e Republikës së Kosovës.

“Unë mendoj se sfida më e madhe për Serbinë është të bindë serbët në Kosovë që të kthehen në institucione. Tani këtu mendoj se jemi në të njëjtën anë me Serbinë. Duhet të sigurohemi që ata që marrin pjesë në zgjedhje”, u shpreh Escobar.

I dërguari i posaçëm i Shteteve të Bashkuara për Ballkanin Perëndimor deklaroi se presidenti serb Aleksandër Vuçiq ka premtuar se do të përdorë ndikimin e tij për të bindur serbët që të marrin pjesë në zgjedhjet e reja.

“Njëra është që duhet të deeskalojmë situatën menjëherë. Pra, kjo do të thotë se ne shpresojmë që kryetarët e komunave të mos i përdorin ato ndërtesa, që policia e Kosovës të tërhiqet nga rrethinat e ndërtesave, por gjithashtu duam të sigurohemi që edhe protestuesit të largohen nga zona. Përveç kësaj, nëse do të ketë zgjedhje të reja, dhe ne shpresojmë se do të ketë zgjedhje të reja, ne duam që serbët të marrin pjesë pa parakushte dhe presidenti Vuçiq tha se ai do të përdorte ndikimin e tij në përpjekje për t’u rikthyer në zgjedhje”, deklaroi Escobar.

Duke u ndalur tek themelimi i Asociacionit të komunave me shumicë serbe, Escobar u shpreh se kjo do të ndodhë, vetëm mbetet për t’u parë nëse me qeverinë e Albin Kurtit apo të dikujt tjetër.

“Unë thjesht po them një fakt, asociacioni është një kërkesë ligjore për qeverinë e Kosovës, është në Marrëveshjen e Brukselit, është në Bashkimin Evropian, në konkluzionet e Këshillit Evropian, është në marrëveshjen e Ohrit, pra nuk është marrëveshje mes Kurtit dhe Serbisë, por është marrëveshje ndërmjet Kosovës dhe Serbisë. Pra, në një moment, nëse Kosova dëshiron të ecë përpara në integrimin e saj euroatlantik, do të duhet të formojë Asociacionin. Pra, Asociacioni do të ndodhë, pyetja është a do të ndodhë me këtë qeveri apo një qeveri të ardhshme?”, tha Escobar.

Escobar u shpreh se shumë gjëra mund të arrihen këtë vit nëse Kosova dhe Serbia fokusohen të zbatimi i marrëveshjes së 27 shkurtit dhe aneksit të dakorduar në Ohër më 18 mars.

Marrëveshja e Ohrit është një marrëveshje gjithëpërfshirëse dhe e rëndësishme për normalizimin ndërmjet Serbisë dhe Kosovës dhe ajo përcakton një sërë kushtesh që do të krijonin një marrëdhënie paqësore dhe të qëndrueshme midis dy vendeve dhe përshkruan përgjegjësitë që secili ka, në mënyrë që të jetë e vlefshme. Përmbushja e asaj që duhet të realizohet mund të bëhet shumë shpejt, duke përfshirë një marrëveshje për Asociacionin, kështu që ne ende duam t’i shohim të dy palët të bashkohen dhe të fokusohen në planin e zbatimit dhe më pas të fokusohemi në ecjen përpara me Asociacionin. Unë ende mendoj se ne mund t’i kemi të gjitha elementet, shumicën e elementeve, të përmbushura këtë vit kalendarik”, tha Escobar.

Situata në tri komunat veriore të Republikës së Kosovës u tensionuar më 26 maj kur kryetarët e zgjedhur më 23 prill u penguan të hyjnë në ndërtesat e Kuvendeve Komunale dhe hynë vetëm me asistimin e Policisë së Kosovës. Serbët kundërshtojnë kryetarët e zgjedhur, madje këtë e bënë dhe në mënyrë të dhunshme më 29 maj kur plagosën 30 ushtarë të KFOR-it.

Rreth 42 mijë vetë rrezikohen nga përmbytjet në zonat e kontrolluara nga Rusia përgjatë lumit Dnipro në Ukrainë, pas shkatërrimit të një dige në Nova Kakovka. Shefi i Ndihmave në OKB, Martin Griffiths paralajmëroi gjatë fjalës së tij në Këshillin e Sigurimit për pasoja të rënda dhe me shtrirje të gjerë.

“Shkatërrimi i digës së centralit hidro-elektrik të Kakhovka është një prej dëmëve më të mëdha në infrastrukturën civile që prej nisjes së luftës në shkurt të vitit 2022. Magnituda e katastrofës do të kuptohet plotësisht gjatë ditëve në vijim, por që tani është e qartë se do të ketë pasoja të rënda për mijëra njerëz në jug të Ukrainës”, tha Griffiths.

Ukraina dhe Rusia fajësojnë njëra-tjetrën për shkatërrimin e digës që shkaktoi vërshime masive uji përgjatë një zone të madhe lufte, e detyroi evakuimin e mijëra personave. Kievi pretendon se forcat ruse ndërmorën një akt të qëllimshëm lufte, duke hedhur digën në erë

“Vetëm çlirimi i plotë i tokave ukrainase nga pushtuesit rus do të garantojë ndaljen e sulmeve të tilla terroriste. Rusia përdor çdo gjë për të shkaktuar terror. Shteti terrorist duhet të humbasë”, tha Presidenti i Ukrainës, Volodymyr Zelensky.

Por, Moska fajëson Kievin dhe gjatë një seance të Këshillit të Sigurisë, foli për akt të qëllimshëm sabotazhi: “Sabotazhi i ndërmarrë nga Kievi kishte dy qëllime kryesore; së pari të tërhiqte vëmendjen maksimale për të krijuar mundësitë e favorshme për kundërofensivën e paralajmëruar; dhe së dyti, të shkaktonte dëmin maksimal humanitar ndaj popullsisë”.

SHBA-ja tha se nuk ishte e sigurt se kë të fajësonte për shkatërrimin e digës, por se nuk do të kishte kuptim që Ukraina t’ia kishte bërë këtë popullsisë së vet. Ndërsa ende nuk ka raportime për viktima, media shtetërore në Rusi foli për disa persona të zhdukur.

Gjendja e jashtëzakonshme është shpallur në zonën e pushtuar të Nova Kakhovka në rajonin e Kherson.