Author: G.O.

Komisioni për Ekonomi ka shtyrë shqyrtimin e vendimit të Presidentes për kthimin në rishqyrtim të Ligjit për Mbrojtjen e Konsumatorit, për shkak të nevojës për konsultime shtesë, raporton Ekonomia Online.

Vendimi është marrë në mbledhjen e sotme të komisionit, ku u bë e ditur se kjo çështje do të trajtohet në një mbledhje tjetër, pas përfundimit të konsultimeve të nevojshme.

Në të njëjtën mbledhje, Komisioni për Ekonomi ka themeluar edhe një grup pune për shqyrtimin e Projektligjit për masat e përkohshme të produkteve themelore në raste të veçanta të destabilizimit në treg.

Gjykata e Lartë do të shqyrtojë kërkesën e ish presidentit dhe kreut të Partisë së Lirisë Ilir Meta më datë 23 prill, raporton Euronewsalbania.

Meta ka bërë kërkesë për lirimin nga burgu dhe është drejtuar disa herë me kërkesë Shkallës së parë dhe të dytë të gjyqësorit, por që i janë rrëzuar.

Sipas mbrojtjes së Ilir Metës, rrethanat kanë ndryshuar pasi dosja ndaj tij ka kaluar për gjykim.

Rekusi i Metës do të shqyrtohet nga Ilir Panda, Albana Boksi dhe Genta Shala.

Meta akuzohet për veprat penale “korrupsion pasiv”, “pastrim parash” dhe “fshehje të pasurisë”.

Në Komisionin Ad hoc për përzgjedhjen e kandidatëve për anëtarë të Bordit të RTK-së, deputetja e Partisë Demokratike të Kosovës, Ganimete Musliu, është përplasur me deputeten e Lëvizjes Vetëvendosje, Arbëreshë Kryeziu.

Përplasja nisi pasi Musliu shprehu shqetësimin se qytetarët që kanë aplikuar duhet të njoftohen më herët, ndërsa Kryeziu reagoi duke theksuar se ata janë kandidatë dhe jo qytetarë.

“A janë kandidatët qytetarë, apo pjesë e grupit tuaj parlamentar?”, vazhdoi me pyetje deputetja e PDK-së.

Musliu më pas i tha Kryeziut: “Kur të flas unë, ti ndalesh, nuk të intereson se si drejtohem. Nëse janë anëtarë të Vetëvendosjes, kallxona, menjëherë kallxona””.

Komisioni për Legjislacion, Mandate, Imunitete, Rregulloren e Kuvendit dhe Mbikëqyrjen e Agjencisë Kundër Korrupsionit ka miratuar në lexim të parë Projektligjin për Byronë për Konfiskimin dhe Sekuestrimin e Pasurisë së Pajustifikueshme, duke i hapur rrugë procedimit të mëtejmë në Kuvendin e Republikës së Kosovës.

Para anëtarëve të Komisionit për Legjislacion, Zëvendëskryeministrja dhe Ministrja e Drejtësisë, Donika Gërvalla, theksoi rëndësinë e këtij projektligji si një ndër mekanizmat kyç në luftën kundër korrupsionit dhe forcimin e sundimit të ligjit.

“Përmes këtij projektligji vendosim një standard të qartë dhe të pakontestueshëm që nuk do të ketë tolerancë ndaj pasurisë së fituar në mënyrë të paligjshme e të pajustifikueshme ndërsa qeverisja e përgjegjshme dhe transparenca nuk janë opsionale por detyrë shtetërore. Byroja shtetërore është garanci e pa kompromis për drejtësi, integritet dhe besim të pakushtëzuar të çdo qytetari të Republikës së Kosovës”, tha Ministrja Gërvalla.

Tutje ajo potencoi që ky ligj shkon përtej një mandati qeveritar dhe përtej një partie politike andaj sipas saj është e rëndësishme që deputetët e Kuvendit ta miratojnë atë si garanci e prekshme për qytetarët dhe reformën në drejtësi.

Ministrja Gërvalla po ashtu sqaroi gjithashtu rolin dhe funksionimin e Byrosë, duke theksuar se ajo nuk merr vendime për konfiskim.

“Byroja nuk konfiskon. Ajo mbledh, verifikon dhe analizon informacionin, ndërsa vendimi për konfiskim merret nga gjykata. Procedurat iniciohen mbi bazë të informatave të besueshme dhe fokusi është te mospërputhjet substanciale financiare”, u shpreh ajo.

Sipas Ministres Gërvalla, ky projektligj garanton të drejtat e palëve në çdo fazë të procedurës, përfshirë qasjen në dokumentacion, të drejtën për t’u dëgjuar, përfaqësimin dhe mjetet juridike.

Në fund, Gërvalla u bëri thirrje anëtarëve të Komisionit dhe deputetëve që të mbështesin këtë projektligj në fazat e mëtejme.

“Çdo pasuri e pajustifikueshme, e krijuar në mospërputhje me të ardhurat e ligjshme, përmes mekanizmave kushtetues dhe ligjor do të rikthehet tek shteti dhe qytetarët. Ky projektligj vendos një standard të qartë se nuk do të ketë tolerancë ndaj pasurisë së fituar në mënyrë të paligjshme”, përfundoi ajo.

Zëvendëspresidenti i Shteteve të Bashkuara, JD Vance, tha se topi tani është në fushën e Iranit, pasi bisedimet për paqe, fundjavën e kaluar në Islamabad, shënuan “shumë përparim”.

Duke folur në një intervistë për Fox News, Vance tha se gjatë bisedimeve të paqes, të cilat zgjatën rreth 20 orë, “ne, në fakt, e bëmë shumë të qartë se cilat ishin vijat tona të kuqe”.

“Unë me të vërtetë mendoj se topi është në fushën e Iranit, sepse ne kemi vënë shumëçka në tryezë”, tha Vance.

Ai shtoi se gjatë bisedimeve u bë e qartë se presidenti i SHBA-së, Donald Trump, nuk ka fleksibilitet në lidhje me uraniumin e pasuruar të Iranit, të cilin Uashingtoni duhet ta ketë, dhe mekanizmin e verifikimit që do të siguronte që Teherani të mos zhvillonte armë bërthamore në të ardhmen.

“Është një gjë për iranianët të thonë se nuk do të kenë armë bërthamore, është një gjë tjetër për ne të vendosim mekanizmin për të siguruar që kjo nuk do të ndodhë”, tha Vance.

Vance, po ashtu, akuzoi Qeverinë iraniane për përfshirje në një “akt terrorizmi ekonomik” duke bllokuar trafikun përmes Ngushticës së Hormuzit.

Nëse iranianët “angazhohen në terrorizëm ekonomik”, SHBA-ja do t’i përmbahet parimit se “asnjë anije iraniane nuk do të dalë”.

Nga 13 prilli, SHBA-ja nisi zbatimin e një bllokade detare ndaj anijeve që hyjnë në portet dhe zonat bregdetare të Iranit, pasi bisedimet e javës së kaluar për paqe nuk prodhuan rezultate konkrete.

Anijet që shfrytëzojnë Ngushticën e Hormuzit për në dhe nga portet joiraniane, nuk do të pengohen, tha ushtria amerikane.

Ky veprim shihet si përpjekja e fundit e presidentit Trump për ta detyruar Iranin të bëjë lëshime.

Dy vendet dhe Izraeli, nga 9 prilli, janë në armëpushim dyjavor, pas gati gjashtë javësh luftime.

Irani ka kërkuar kompensim nga pesë vende arabe, përfshirë Arabinë Saudite, Emiratet e Bashkuara Arabe, Bahreinin, Katarin dhe Jordaninë, duke i akuzuar ato për përfshirje në sulmet e përbashkëta amerikano-izraelite kundër territorit iranian.

Në një letër të dërguar të hënën drejtuar Sekretarit të Përgjithshëm të OKB-së, Antonio Guterres, dhe Presidentit të Këshillit të Sigurimit, Jamal Fares Alrowaiei, përfaqësuesi i Iranit në OKB, Amir Saeid Iravani, deklaroi se këto shtete kanë “shkelur detyrimet ndërkombëtare” duke lehtësuar, sipas tij, sulmet e ShBA-së dhe Izraelit ndaj Iranit.

Ai theksoi se vendet në fjalë duhet të mbajnë përgjegjësi dhe të paguajnë kompensim për dëmet dhe humbjet e shkaktuara gjatë konfliktit.

Tensionet në rajon u rritën ndjeshëm pas sulmeve të përbashkëta të nisura nga Shtetet e Bashkuara dhe Izraeli më 28 shkurt, të cilat shkaktuan mijëra viktima mes të vrarëve dhe të plagosurve.

Si kundërpërgjigje, Irani ndërmori sulme ndaj objektivave në Izrael, Irak, Jordani dhe vende të Gjirit që strehojnë baza ushtarake amerikane. Një armëpushim dyjavor u shpall javën e kaluar, duke sjellë një qetësim të përkohshëm të situatës.

Katër vite më parë, NASA vlerësonte se 93 miliardë dollarë (69 miliardë paund) do të shpenzoheshin për programin Artemis midis viteve 2012 dhe 2025, shumë më tepër se vlerësimet e mëparshme.

Edhe pse programi zyrtarisht filloi në vitin 2017, ndërtimi i raketës kishte nisur shumë më herët. Por sipas raportit më të fundit të auditimit, kostot janë rritur që atëherë.

Megjithëse shfrytëzimi i burimeve të Hënës mund të sjellë përfitime të mundshme ekonomike, kjo mbetet ende shumë larg.

Megjithatë, NASA argumenton se programi, në formën e tij aktuale, sjell përfitime të konsiderueshme për ekonominë e SHBA-së. Të dhënat më të fundit nga organizata tregojnë se ajo punëson pothuajse 20,000 persona, duke gjeneruar 75.6 miliardë dollarë prodhim ekonomik. Argumenti i dytë është se SHBA-ja nuk mund të përballojë të mbetet pas rivalëve të saj.

Në një seancë dëgjimore të vitit 2024 nga Committee on Science, Space and Technology për të vlerësuar programet e NASA, kryetari, përfaqësuesi republikan Frank Lucas, tha: U kujtoj kolegëve të mi se ne nuk jemi i vetmi vend i interesuar për të dërguar njerëz në Hënë. Partia Komuniste Kineze […] ka deklaruar ambicien e saj për të pasur astronautë njerëzorë në sipërfaqe deri në vitin 2030. Vendi që do të zbresë i pari do të ketë mundësinë të vendosë një precedent për atë nëse aktivitetet e ardhshme hënore do të zhvillohen me hapje dhe transparencë apo në një mënyrë më të kufizuar.

Disa persona kanë humbur jetën dhe dhjetëra të tjerë u plagosën pas një sulmi të armatosur në një vend pikniku në provincën Herat të Afganistanit.

Siç shkruan BBC, ngjarja ndodhi të premten pasdite në fshatin Deh Mehri, distrikti Enjil, ku persona të paidentifikuar që lëviznin me motoçikleta hapën zjarr ndaj civilëve.

Raportet mbi numrin e viktimave janë kontradiktore pasi Ministria e Brendshme e Talebanëve njoftoi për shtatë të vrarë, ndërsa zyrtarët lokalë raportuan katër.

Një mjek nga spitali rajonal i Heratit tha për BBC-në se numri i viktimave është edhe më i lartë, 12 të vrarë dhe 12 të plagosur, duke theksuar se të gjithë ishin pjesëtarë të komunitetit Hazara, një pakicë Shia e cila shpesh ka qenë e shënjestruar në të kaluarën.

Zyrtari taliban Ahmadullah Muttaqi konfirmoi se mes të plagosurve ka edhe gra dhe se një i dyshuar është arrestuar nga forcat e sigurisë. Ai e cilësoi ngjarjen si një “incident terrorist” dhe shtoi se viktimat kishin shkuar në një zonë për rekreacion pranë një tyrbe myslimane Shia që vizitohet çdo ditë nga shumë njerëz për lutje.

Autoritetet afgane po hetojnë ngjarjen, ndërsa asnjë grup nuk ka marrë ende përgjegjësinë për sulmin.

Kreu i Qeverisë së Kosovës, Albin Kurti, ka përmbyllur vizitë e tij në Londër me një takim tre orësh me historianin Sir Noel Malcolm.

Kurti ka thënë se sa herë që takohet, mahnitet nga fuqia intelektuale dhe saktësia analitike e mendimeve të tij.

“Sa herë që takohem me Sir Noel Malcolm, Senior Research Fellow i All Souls College i Oksfordit, mahnitem nga fuqia e tij intelektuale dhe saktësia analitike e mendimeve të tij”, ka shkruar Kurti.

Sipas kreut të VV’së, Kosova ka gjithnjë e më shumë nevojë për njerëz si Malcolm të cilët kanë edhe dijen, edhe guximin për të folur të vërtetën e asaj që Serbia ka bërë në Kosovë.

“Në një kohë kur bota po sfidohet vazhdimisht nga lajme të rreme për të tashmen dhe revizionizmi historik për të kaluarën, Kosova ka gjithnjë e më shumë nevojë për njerëz si Sir Noel, të cilët kanë edhe dijen, edhe guximin për të folur të vërtetën. Pikërisht këtë e ka bërë ai në veprën e tij klasike “Kosova: një histori e shkurtër”. I botuar në vitin 1998, në fillim të luftës sonë çlirimtare, ky libër i ekspozoi dhe shpartalloi mitet që shërbenin si baza propagandistike për fushatën gjenocidale të Serbisë që kryhej ndaj popullit tonë”, ka theksuar Kurti.

“Mbrëmë, në fund të vizitës sime dyditore në Londër, e takova Sir Noel për darkë. Gjatë tri orëve sa ishim bashkë, mbuluam një gamë të gjerë temash, prej ndikimit të inteligjencës artificiale në tregun e punës dhe procesin mësimor, deri te mbijetesa e veprave të at’ Gjergj Fishtës gjatë sundimit gjysmëshekullor të komunizmit në Shqipëri.Mezi pres të takohem përsëri me Sir Noel Malcolm, historian i shquar dhe mik i madh i Kosovës dhe i gjithë popullit shqiptar”, ka shkruar Kurti.