Author: G.O.

Zyra për Media e kryeministrisë përmes një njoftimi për media ka bërë të ditur se sot në 15:30 do të mbahet një konferencë për media nga kryeministri Albin Kurti dhe ministrja e Jashtme, Donika Gërvalla-Schwarz.

“Kryeministri i Republikës së Kosovës, Albin Kurti, bashkë me zëvendëskryeministren, njëherësh ministre e Punëve të Jashtme dhe Diasporës, Donika Gërvalla-Schwarz, mbajnë konferencë për media”, thuhet në njoftim.

Mirëpo në këtë njoftim nuk është bere e ditur arsyeja e kësaj konference.

Përshkallëzimi i tensioneve mes Kosovës e Serbisë ka qenë në fokusin e takimit të Sekretarit të Përgjithshëm të NATO-s, Jens Stoltenberg, dhe kancelarit gjerman, Olaf Scholz.

“Angazhimi i NATO-s ndaj mandatit të OKB-së është i pathyeshëm”, tha shefi i aleancës më të madhe ushtarake të globit.

“Ne do të vazhdojmë të bëjmë gjithçka që është e nevojshme për të siguruar që mjedisi atje të jetë i sigurt dhe do t’u japim të gjithë të përfshirëve të njëjtin nivel sigurie. Nëse është e nevojshme do të ndërmarrim hapa të mëtejshëm, por do te vazhdojmë dialogun e nisur nga BE”, tha Stoltenberg.

Vetëm një ditë më parë, kreu i KFOR-it, Gjenerali Angelo Michele Ristuccia, i bëri thirrje Prishtinës dhe Beogradit të heqin dorë nga retorikat e kota dhe t`i kthehen bisedimeve. “I bëj thirrje të dyja palëve të shmangin retorikën e panevojshme dhe ta përballojnë këtë sfidë duke u kthyer në tryezën e negociatave, e cila është mënyra e vetme për të zgjidhur situatën”, deklaroi ai.

Edhe Brukseli pret “hapa të prekshëm” nga autoritetet në Prishtinë dhe Beograd për të reduktuar përshkallëzimin në Kosovë. Të hënën, zëdhënësi i Komisionit Evropian për çështje të jashtme, Peter Stano, tha se kryeministri i Kosovës Aljbin Kurti dhe presidenti serb Aleksandër Vuçiç ende nuk e kanë konfirmuar mbërritjen e tyre në Bruksel për “takimin e krizës”, në të cilin Borrell i ftoi për të gjetur një zgjidhje për krizën e fundit në veri të Kosovës dhe diskutojnë zbatimin e marrëveshjes për rrugën drejt normalizimit të marrëdhënieve.

Peter Stano përmendi dy takime të ardhshme, duke përfshirë samitin e BE-së më 29-30 qershor, ku vendet anëtare të BE-së mund të diskutojnë masat kundër të dy palëve nëse nuk arrijnë të bashkëpunojnë.

Youth Initiative for Human Rights (YIHR) përmes një ekspozite në sheshin “Zahir Pajaziti”, ku u shfaqën tetë storje të refugjatëve nga lufta në Kosovë, ka shënuar Ditën Ndërkombëtare të Refugjatëve, raporton Ekonomia Online.

Siç u shpreh koordinatorja e Programit për Ballafaqim me të Kaluarën nga kjo organizatë, Bjeshkë Guri, ekspozita ka për qëllim “shërimin kolektiv” të popullatës të Kosovës, kur “dihet se mbi 80 për qind e popullatës janë dëbuar nga shtëpitë e tyre”.

Guri tha se ekspozita përbëhet nga minoritete, vende dhe profesione të ndryshme, në mënyrë që të jetë sa më gjithëpërfshirëse.

“Kjo ekspozitë digjitale synon të mbledhë përvoja personale të personave që kanë qenë refugjatë gjatë luftës së Kosovës. Dihet se mbi 80 për qind e popullatës janë dëbuar nga shtëpitë e tyre, prandaj për neve është shumë e rëndësishme që ta nxisim një shërim kolektiv. Përvojat e qytetarëve janë heshtur, nuk janë dëgjuar”.

“Prej vitit 2017 kemi marrë çdo vit nga 30 përvoja personale. Jemi fokusuar në vendet rurale. Kemi hasur shpesh në hezitime. Ata nuk ndihen që përvojat e tyre kanë vlerë”.

“Në këtë ekspozitë po shfaqen tetë storje të ndryshme, tetë përvoja nga lufta e fundit në Kosovë. Ka prej vendeve të ndryshme, profesioneve të ndryshme dhe minoriteteve të ndryshme sepse mundohemi që muzeun ta bëjmë sa më gjithëpërfshirës”.

Ajo po ashtu ka treguar se disa nga storjet janë anonime e se më së shumti janë serbët, ngase ata hezitojnë ta shfaqin emrin e tyre.

Presidentja Vjosa Osmani me rastin e Ditës Botërore të Refugjatëve, ka kujtuar luftën e fundit në Kosovë.

Ajo ka thënë se gjatë asaj periudhe, më shumë se gjysma e popullsisë janë bërë refugjatë si rezultat i gjenocidit të Millosheviqit.

“Në Ditën e Refugjatëve kujtojmë sakrificën dhe vuajtjen e pamasë të refugjatëve në mbarë botën. Gjatë luftës në Kosovë, më shumë se gjysma e popullsisë sonë u bënë refugjatë si rezultat i gjenocidit të Millosheviqit”, ka shkruar Osmani në Twitter.

Presidentja tutje ka thënë se “sot ne vazhdojmë të përforcojmë zërat e refugjatëve dhe të mbrojmë të drejtat e tyre”.

Gjykata Speciale me seli në Hagë ka vendosur për paraburgimin e ish-kryetarit të Kuvendit, Kadri Veseli.

Trupi Gjykues në rastin e krerëve të UÇK-së ka vendosur që Veselit t’i vazhdohet paraburgimi.

Palët janë urdhëruar që parashtresat në lidhje me rishikimin tjetër të paraburgimit të dërgohen deri më 28 korrik të vitit 2023.

Policia e Kosovës ka njoftuar se në konsultim me prokurorin kujdestar, është iniciuar rasti për shkaktim të rrezikut të përgjithshëm, pasi që me datë 15 qershor, të dyshuar të panjohur kanë hedhur koktej-molotovi në drejtim të veturës zyrtare të policisë.

Rasti kishte ndodhur më 15 qershor, rreth orës 18:00, në Leposaviq dhe është në procedurë hetimore.

Javën e kaluar pati momente tensionesh pranë komunës së Leposaviqit, derisa më 16 qershor kanë ndodhur disa sulme fizike ndaj gazetarëve.

Italia po shqyrton mundësinë që të rrisë kufirin e shpejtësisë në disa autostrada të saj ku aksidentet janë të pakta ose nuk ka fare të tilla. Aktualisht kufiri maksimal i lejuar në rrugët e Italisë është 130 km/h.

Agjencia italiane e lajmeve, ANSA, duke cituar ministrin italian të Transportit, Matteo Salvini, raporton se edhe Qeveria italiane është e hapur ndaj kësaj mundësie.

“Jam i bindur se në disa linja italiane që kanë një shkallë aksidenti afër zeros, në momente të caktuara dhe në prani të tre, katër apo edhe pesë korsive, mund të jetë një rritje e kontrolluar e shpejtësisë aktuale prej 130 km/h e të konsiderohet si në vendet e tjera evropiane”, tha Salvini.

Këtë javë qeveria pritet të paraqesë një projektligj për sigurinë rrugore për të parandaluar aksidentet si ajo e një jave më parë në Romë, ku një djalë pesëvjeçar humbi jetën pasi u shtyp nga një makinë e tipit SUV, shoferi i të cilit dyshohet se po merrte pjesë në një sfidë në YouTube me katër personat e tjerë në veturë.

Salvini tha se masat e reja të propozuara përfshijnë ndalimin e shoferëve të sapolicensuar nga drejtimi i makinave të mëdha për tre vjet, humbjen e përhershme të patentës së drejtimit për shkelësit e përsëritur që shkaktojnë dëme nga drejtimi në gjendje të dehur dhe dënime më të ashpra për ata që përdorin telefoni celular gjatë vozitjes.