Author: G.O.

Në Dhomat e Specializuara në Hagë, vazhdon edhe sot procesi gjyqësor ndaj ish krerëve të UÇK-së. Kryetari i trupit gjykues, Charles Smith III ka bërë të ditur se do të vazhdojnë me dëshminë e dëshmitarit të 29-të.

Të martën e ka përfunduar dëshminë në seancë të mbyllur dëshmitari i 30-të, në gjykimin ndaj Hashim Thaçit, Kadri Veselit, Jakup Krasniqit dhe Rexhep Selimit. Sipas njoftimit të Zyrës së Prokurorit të Specializuar, ky dëshmitar është ish-ushtar i Ushtrisë Çlirimtare të Kosovës.

Para se të përfundojë seancën gjyqësore, kryetari i trupit gjykues, Charles Smith III ka thënë se sot do të vazhdojnë me dëshminë e dëshmitarit të 29-të.

Dëshmitari i 29-të i prokurorisë, në seancën e 10 tetorit ishte ftuar nga trupi gjykues që të japë dëshminë e tij e cila edhe ishte ndërprerë disa herë, pasi që ai kishte kërkuar pushim me arsyetimin se nuk ndjehej mirë. Po ashtu, me kërkesën e tij, iu caktua edhe një avokat mbështetës.

Edhe pse seanca vazhdoj më 11 tetor, avokati mbështetës i dëshmitarit të 29-të kishte deklaruar se klienti i tij nuk ishte i gatshëm të dëshmojë, por ishte i gatshëm të shkojë në burg. Ai kishte kërkuar një muaj kohë në këtë proces, mirëpo kjo gjë u refuzua pjesërisht nga kryetari i trupit.

Ministria e Punëve të Brendshme do të lansojë sot hapjen e fushatës kundër Trafikimit me Njerëz, në ditën e BE-së Kundër Trafikimit me Njerëz.

Hapjen e kësaj ceremonie do ta bëjë Blerim Gashani, zëvendësministër i Punëve të Brendshme dhe njëherit Koordinator Kombëtar Kundër Trafikimit me Qenieve Njerëzore.

Dita evropiane kundër trafikimit të qenieve njerëzore

Kjo ditë shërben për të sjellë në vëmendje të vendimarrësve, shoqërisë civile, agjensive apo institucioneve të ndryshme dukurinë e trafikimit të personave, dukuri kjo që ka prekur mbarë botën. Rreth 27 milionë persona (gra, bura dhe fëmijë) trafikohen në vit.

Trafikimi i personave nënkupton “rekrutimin, transportimin, transferimin, fshehjen ose pritjen e personave nëpërmjet kërcënimit, përdorimit të forcës e formave të tjera të shtrëngimit, mashtrimit, marrjes me forcë, dredhisë ose abuzimit të pushtetit ose të pozitës vulnerabël ose dhënien apo marrjen e pagesave ose përfitimeve për të arritur pëlqimin e një personi që kontrollon një person tjetër, për qëllime shfrytëzimi.

Në të gjithë botën, 23% e viktimave të trafikimit të qenieve njerëzore janë vajza dhe adoleshentë.

Në Bashkimin Evropian, forma më e zakonshme e trafikimit të raportuar është ajo e shfrytëzimit seksual, një formë e dhunës me bazë gjinore që prek në mënyrë disproporcionale gratë dhe vajzat që përfaqësojnë 95% të viktimave të regjistruara.

Sipas raportit të fundit botëror për trafikimin e qenieve njerëzore, shumë vende kanë raportuar një rritje të viktimave të trafikimit në vitet e fundit, si për shkak të përmirësimit të procedurave për identifikimin e viktimave dhe trafikantëve, si dhe për një rritje të mundshme të incidencës.

Gratë dhe vajzat e përfshira në trafikim me qëllim shfrytëzimin seksual, pësojnë dhunë dhe abuzim që përfshin edhe privimin e lirisë personale, dhunë ekonomike, fizike dhe seksuale të cilat çojnë në pasoja të rënda dhe ndonjëherë kërcënuese për jetën.

Të 28-të kontrolluesit e trafikut ajror nga Autoriteti i Kontrollit të Qasjes në Prishtinë në Republikën e Kosovës, janë duke u trajnuar në Ndërmarrjen Shtetërore “Kontrolli i Trafikut Ajror” (BULATSA) të Bullgarisë, tha kompania të martën. Të trajnuarit do t’i nënshtrohen një kursi të krijuar posaçërisht për të rifreskuar njohuritë dhe aftësitë e tyre për të qenë në gjendje të sigurojnë një rrjedhë të sigurt, të rregullt dhe të shpejtë të trafikut ajror në vendin e tyre.

Kursi mbulon plotësisht kërkesat e Rregullores Evropiane 2015/340 dhe programit të trajnimit të ANSA-së, dhe zhvillohet në bazë të një kontrate ndërmjet Agjencisë së Shërbimeve të Navigacionit Ajror – Republika e Kosovës dhe BULATSA. Trajnimi është i nevojshëm që kontrolluesit e trafikut ajror të Kosovës të vazhdojnë vlefshmërinë e licencave të tyre për të kryer detyrat e tyre.

Përveç pjesës teorike, ata do të bëjnë edhe ushtrime praktike, të cilat do të kryhen në simulatorin BULATSA, ku do të interpretohen situata me ngarkesë të lartë, funksionim në dukuri të pafavorshme të motit, dështim të pajisjeve të vëzhgimit, si dhe rreziqe të tjera dhe situata emergjente.

Simulimet kryhen në hapësirën ajrore të projektuar posaçërisht nga specialistët e BULATSA, e cila përkon plotësisht me hapësirën reale ajrore të Republikës së Kosovës, duke përfshirë të gjitha pikat aktuale të lundrimit dhe mjetet ndihmëse dhe procedurat e aplikuara nga kontrolluesit e trafikut ajror. Avionët e hasur në simulator përputhen me ata avionë që përdoren në aeroportin e Prishtinës.

Simulatori BULATSA ofron mundësinë e vendosjes së Ndërfaqes së Makinerisë Njerëzore (HMI) që të ngjajë plotësisht me atë të përdorur në Republikën e Kosovës. Trajnimi është pjesë e planit të BULATSA për të zhvilluar simulatorin e saj dhe për të ofruar aftësinë për të trajnuar dhe kryer simulime në kohë reale, si për nevojat e veta ashtu edhe për kontraktorët e jashtëm. Kurse të ngjashme u mbajtën për kontrolluesit e trafikut ajror nga Maqedonia e Veriut dhe Armenia nën drejtimin e ekspertëve nga Qendra e Trajnimit të Aviacionit BULATSA.

Agjencia e Statistikave të Kosovës njofton se numri më i madh i studentëve të regjistruar për herë të parë në arsimin e lartë në nivelin Bachelor është shënuar në fushat “Biznes, administratë dhe ligj” me gjithsej 4 mijë e 268 studentë ose 25 për qind e numrit të përgjithshëm të studentëve.

“Nga numri i përgjithshëm i studentëve të regjistruar për herë të parë në nivelin Master, 1 mijë e 528 studentë janë regjistruar në fushën “Biznes, administratë dhe ligj” ose shprehur në përqindje 37,1% e numrit të përgjithshëm. Ndërsa, vërehet numër i vogël i studentëve të regjistruar në fushën “Shkenca natyrore, matematikë dhe statistikë”, me gjithsej 65 studentë ose 1,6% e numrit të përgjithshëm”, thuhet në raportin e Agjencisë së Statistikave të Kosovës për Arsim të Lartë sipas fushave të studimit për vitin akademik 2022/2023.

Ndërsa, numër më i vogël i studentëve janë regjistruar në fushat “Bujqësi, pylltari, peshkim dhe veterinari” me gjithsej 365 studentë ose 2,1 për qind.

“Po ashtu, vërehet numër i vogël i studentëve të cilët kanë zgjedhur të studiojnë në fushën e “Arsimit” me gjithsej 390 ose 2,3 për qind”, thuhet në raportin e Agjencisë së Statistikave të Kosovës për Arsim të Lartë sipas fushave të studimit për vitin akademik 2022/2023.

Sipas ASK-së numër më i madh i femrave është në fushën “Teknologjia Informative dhe Komunikimi (TIK)”

“Në fushën e studimit “Teknologjia Informative dhe Komunikimi” (TIK) në nivelin Bachelor, krahasuar me vitin paraprak kemi një numër më të madh të femrave, ku për vitin 2021/2022 numri i femrave në këtë fushë ishte 2 mijë e 195 ose 28,8%, ndërsa në vitin akademik 2022/2023 ishte 2 mijë e 348 ose 32,4%”, thuhet në raport.

Sipas ASK-së, diferencë më e madhe ndërmjet femrave dhe meshkujve te fusha e Arsimit.

“Krahasuar me numrin e përgjithshëm të studentëve, që ndjekin arsimin e lartë në nivelin Master, dominon numri i studentëve të cilët ndjekin studimet në fushat “Biznes, administratë dhe ligj” me gjithsej 3 853, ose 36,0% e numrit të përgjithshëm. Diferencë më e madhe gjinore vërehet edhe tek niveli Master në fushën e “Arsimit “ ku nga 1 075 studentë, 83,0% janë femra, ndërsa 178 janë meshkuj ose 16,6%”, thuhet në raport.

Kryetari i Kuvendit të Kosovës, Glauk Konjufca, shoqëruar nga deputetë, anëtarë të Grupit të Miqësisë me Turqinë, priti sot në takim një delegacion nga Oda Tregtare e Ankarasë (ATO), të kryesuar nga presidenti Gursel Baran.

Në takim, ndër të tjera, u bisedua për fuqizimin e marrëdhënieve ekonomike dhe tregtare mes dy vendeve tona.

Në komunikatë thuhet se kryetari Konjufca, pasi i njoftoi mysafirët në lidhje me infrastrukturën ligjore dhe mundësitë për investime në Kosovë, theksoi rëndësinë e bashkëpunimit tregtar në fusha me interes për zhvillimin e ekonomisë së vendit dhe shprehu gatishmërinë për të thelluar bashkëpunimin ekonomik me Odën Tregtare të Ankarasë dhe shtetin mik të Turqisë. Ai po ashtu inkurajoi investimet e kompanive turke në sektorët e ndryshëm të ekonomisë së Kosovës.

Delegacioni turk falënderoi Kryetarin e Kuvendit për pritjen e ngrohtë dhe çmoi angazhimin e tij në nxitjen e marrëdhënieve të ndërsjella tregtare.

Kryetari i Kuvendit dhe kryetari i ATO-s, i cili shoqërohej nga nënkryetari, Halil Ibrahim Yilmaz, kryetari i Federatës Shqiptare, Hivzi Krusha, kryetari i Fondacionit Shqiptar për Kërkime Kulturore dhe Edukim i vendeve të Ballkanit dhe deputetë të Ankarasë, shprehën interesimin e dyanshëm për intensifikimin e bashkëpunimit të ndërsjellë të bizneseve me qëllim të avancimit të mëtejshëm të interesave të përbashkëta ekonomike ndërmjet Republikës së Kosovës dhe Republikës së Turqisë.

Policia e Kosovës njofton se mbrëmë hetuesit e stacionit policor të Podujevës, kanë arrestuar shtatë persona të dyshuar për vjedhje, ndërsa një person tjetër për blerje, pranim ose fshehje e sendeve të përfituara me kryerjen e veprës penale.

Në njoftim thuhet se shtatë personave të dyshuar u është iniciuar rast për vjedhjet që kanë ndodhë në periudha të ndryshme kohore në markete, ku personat e dyshuar (që të gjithë të mitur), në bashkëveprim dyshohet se kanë vjedhur artikuj nga marketi.

Ndërsa personit të dyshuar, A.R, mashkull 23 vjeç, i janë gjetur dhe sekuestruar gjësendet të cilat dyshohet të jenë të vjedhura.

“Ndaj tij është iniciuar rast për blerje, pranim ose fshehje të sendeve të përfituara me kryerjen e veprës penale”, thuhet në komunikatë.

Policia në koordinim me prokurorin e shtetit hetuesit po ndërmarrin veprimet e nevojshme policore para se rastet të procedohen më tej.