Author: G.O.

Deputetja e Lëvizjes Vetëvendosje, Arbëreshë Kryeziu-Hyseni, para seancës së Kuvendit ka deklaruar se kandidatja për presidente, Feride Rushiti, tashmë i ka votat e nevojshme për t’u zgjedhur në këtë post, raporton Ekonomia Online.

Ajo u ka bërë thirrje deputetëve të partive opozitare që të jenë të pranishëm në seancë dhe të marrin pjesë në raundin e dytë të votimit.

“E vërtetë është që zonja Feride Rushiti tashmë i ka votat për t’u zgjedhur presidente, prandaj unë po e shfrytëzoj rastin t’u bëj thirrje të gjithë deputetëve të partive opozitare që ndryshe prej mbrëmë, sot të jenë prezent në sallë dhe t’i bashkohen raundit të dytë të votimit, sepse besoj që nëse duam zgjidhje, e kemi rastin të votojmë zonjën Feride. Nëse jo, atëherë besoj po shihet qartazi kush është bllokuesi dhe kush po do ta çojë vendin në zgjedhje të reja”, tha Kryeziu-Hyseni.

Sipas saj, pjesëmarrja në votim është kyçe për të shmangur një krizë të re politike dhe për të siguruar funksionalitetin institucional të vendit.

Një 21-vjeçar nga Austria ka pranuar se pati planifikuar sulm xhihadist në një koncert të Taylor Swiftit në Vjenë në gusht të 2024-tës.

Burri, i njohur vetëm si Beran A., po ashtu ka pranuar se ka qenë pjesë e një organizate terroriste, edhe pse ka mohuar të gjitha akuzat tjera, përfshirë ato për planin për sulm në Mekë të Arabisë Saudite.

Prokuroria e Shtetit ka thënë se në shtëpinë e burrit ka gjetur një bombë pothuajse të kompletuar.

Beran A. ishte arrestuar pas informacioneve nga CIA pak para koncertit të planifikuar të Swiftit në Vjenë.

Si rezultat, tri koncerte krejtësisht të shitura në stadiumin “Ernst Happl” u anuluan. Më shumë se 195 mijë njerëz pritej të merrnin pjesë.

Beran akuzohet për terrorizëm dhe shkelje të tjera.

Ai akuzohet bashkë me një 21-vjeçar të njohur si Arda K., që bashkë akuzohen se kanë qenë pjesë e Shtetit Islamik. Ata akuzohen se kanë planifikuar edhe sulme në Mekë, Stamboll e Dubai.

“Klienti im ka shkaktuar goxha frikë dhe panik te njerëzit dhe do të përgjigjet për këtë, nuk ka asnjë dilemë”, ka thënë avokatja e tij.

Sipas akuzës, Beran kishte planifikuar sulmin të paktën deri më 21 korrik 2024. Ai u arrestua më 7 gusht, një ditë para koncertit të planifikuar.

Prokurorët e akuzojmë se ka shpërndarë edhe propagandë online si dhe ka përgatitur eksplozivë. Sipas akuzës, ai ka marrë instruksione nga interneti se si të përgatitet një bombë e stilit të IS-it.

Të dy mund të përballen me deri 20 vjet burgim nëse shpallen fajtorë.

Ylli botëror i muzikës, Taylor Swift, pati mësuar për planin teksa ishte në aeroplan për në Austri. Ajo ishte shprehur se falë CIA-s është shmangur një masakër.

Me rastin e Ditës Botërore për Siguri dhe Shëndet në Punë, institucionet e Kosovës kanë theksuar nevojën për forcimin e inspektoratit dhe përmirësimin e kushteve të punës, duke paralajmëruar edhe ndryshime ligjore dhe masa konkrete për parandalimin e aksidenteve në vendin e punës, raporton Ekonomia Online.

Ministri për Punë, Familje dhe Vlerat e Luftës Çlirimtare, Andin Hoti, tha se fokusi i tij ka qenë forcimi i inspektoratit dhe ndryshimi i qasjes ndaj bizneseve.

“Dy gjëra i kam pasur me rëndësi kur e kam marrë nën mbikëqyrje këtë ministri në raport me inspektoratin. E para, që inspektorati të ketë dinjitet, të forcohet, të ndjejë mbështetjen e shtetit vetë. Dhe e dyta, që inspektorati të mos shihet si çekiç ndaj bizneseve në Kosovë, por të shihet si partner ndaj bizneseve në Kosovë, por që natyrisht, pashmangshëm, qytetarin ta ketë prioritet mbi të gjitha”, tha ai.

Ai shtoi se Qeveria është duke ndërmarrë hapa konkretë për përmirësimin e sistemit të sigurisë dhe shëndetit në punë.

“Qeveria e Republikës së Kosovës është duke u angazhuar në përforcimin e sistemit kombëtar për siguri dhe shëndet në punë. Këtë vit ne kemi planifikuar ndryshim-plotësimin e Ligjit për Sigurinë dhe Shëndetin në Punë, ndryshimin e rregullores për certifikimin dhe licencimin e personave fizikë dhe juridikë, rritjen, themelimin e Këshillit Nacional për Siguri dhe Shëndet në Punë si mekanizëm trepalësh me ekspertë, fillimin e mbikëqyrjes dhe kontrollit të personave fizikë dhe juridikë që operojnë në këtë fushë, modernizimin e procesit të promovimit profesional për ekspertë përmes digjitalizimit, ndërtimin e ekipeve të bashkëpunimit mes profesionistëve, shoqatave dhe institucioneve, si dhe nisjen shumë shpejt të një fushate gjithëpërfshirëse vetëdisuese, domethënë të sensibilizimit, me qëllim të parandalimit të aksidenteve në vendin e punës”, tha ai.

Zëvendës shefi i Misionit dhe shef i Bashkëpunimit për Zhvillim në Ambasadën e Suedisë, Henrik Riby, theksoi rëndësinë e kushteve të sigurta të punës dhe rolit të inspektoratit.

“Shumë punëdhënës sot e kanë kuptuar se mund të tërheqin dhe mbajnë stafin duke ofruar jo vetëm kushte të sigurta, por edhe përfitime shtesë si mundësi trajnimi, aktivitete sociale, udhëtime, çfarëdo qoftë. Dhe kjo po rritet shumë. Ne e shohim këtë si një trend shumë pozitiv, sepse nuk mund ta trajtosh keq punëtorin dhe të presësh që ai të prodhojë diçka. Por megjithatë ka sektorë ku kushtet e punës nuk janë vërtet në standardet e duhura dhe në vetvete janë më të rrezikshme, si sektori i ndërtimit apo minierat. Dhe kjo është një nga arsyet pse kemi edhe inspektoratin e punës. Pas çdo vendi të sigurt pune, çdo punëtori të respektuar, çdo kontrate të drejtë, qëndron një rojtar i padukshëm, dhe ai është inspektorati i punës. Por edhe viti i kaluar, 2025, na kujtoi pse ky institucion është kaq i rëndësishëm. Patëm qindra aksidente, patëm dhjetëra jetë të humbura. Siguria nuk është e garantuar kudo. Ajo duhet të përmirësohet dhe duhet të zbatohet”, tha ai.

Ai shtoi se inspektorati i punës është linjë mbrojtëse mes neglizhencës dhe jetës njerëzore, duke vlerësuar edhe përparimin në digjitalizimin e inspektimeve.

“Dhe këtu qëndron inspektori i punës, jo si një trup burokratik, por si linja e mbrojtjes midis neglizhencës dhe jetës njerëzore. Në të njëjtën kohë, kemi parë përparim të jashtëzakonshëm brenda inspektoratit. Digjitalizimi i inspektimeve i ka bërë ato shumë më të shpejta, më transparente dhe më efektive në mbrojtjen e të drejtave të punëtorëve. Kjo pasqyron një përkushtim ndaj drejtësisë dhe llogaridhënies. Dhe mendoj se inspektorati i punës është një nga inspektoratet në Kosovë që është shembull për t’u ndjekur nga çdo institucion tjetër që merret me këto çështje”, tha ai.

Koordinatori i programit të ILO-s për Kosovë, Blerim Murtezi, theksoi se përmirësimi i kushteve të punës ndikon drejtpërdrejt në rritjen e produktivitetit.

“Nga puna jonë në këtë fushë, në nivel global dhe nga praktikat e ndryshme ndërkombëtare, kemi mësuar një gjë shumë të thjeshtë. Kur përmirësohen kushtet e punës, përmirësohet vetë puna. Nuk ka kompromis mes sigurisë dhe produktivitetit. Ato të dyja bashkëveprojnë, domethënë nuk mundet njëra pa tjetrën. Ajo që kemi filluar me Inspektoratin e Punës është baza dhe është vetëm fillimi. Pra, nga digjitalizimi, tek trajnimin, tek mbështetja konkrete në terren. Dhe nga ILO duhet të jemi të sinqertë: nuk është diçka që mund ta bëjë një institucion i vetëm. Përmirësimi i kushteve të punës natyrisht që i takon Inspektoratit të Punës të mbikëqyrë bazën ligjore, por nuk është një institucion i vetëm që mund të garantojë sigurinë dhe shëndetin në punë. Për këtë, sepse ne mund të kemi ligje të mira, mund të kemi rregullore të mira dhe strategji të mira, por në fund të ditës nuk do e masim suksesin me ligje apo rregullore, do e masim me atë se sa po respektohet”, tha ai.

Ushtruesi i detyrës së drejtorit të Inspektoratit Qendror të Punës, Kastriot Jashari, tha se ky institucion është i angazhuar edhe në luftimin e ekonomisë informale dhe rritjen e transparencës.

“Ne në kuadër të punës sonë, përveç mandatit ligjor të cilin po e ushtrojmë, njëkohësisht po e luftojmë në të njëjtën kohë potencialisht edhe ekonominë informale brenda për brenda subjekteve të cilët nuk respektojnë shtyllat kryesore të funksionimit ligjor. Në fakt, meqenëse jemi sot këtu në këtë donacion të rëndësishëm të ILO-s me Qeverinë Suedeze, s’mund pa e përmendur raportin që është hartuar në muajt paraprak, i cili është bërë raport model nga ILO-ja dhe që janë nxjerrë specifika reale aty të kohës ku është i publikuar në faqen zyrtare të Inspektoratit Qendror të Punës. Duke falënderuar partneritetin që kemi ne me ILO-n dhe donacionet e Qeverisë Suedeze, ne sot posedojmë si Inspektorat Qendror i Punës pajisje elektronike, tableta si dhe pajisje tjera që ndikojnë drejtpërdrejt në rritjen e efikasitetit, llogaridhënies dhe transparencës së inspektorëve. Kjo ndikon drejtpërdrejt në zhdukjen ose eliminimin, reduktimin për çdo dyshim potencial të punës së inspektorit që po aq sa është e ndjeshme, duhet të jetë edhe dinjitoze përballë çdo sfide të cilën e kanë”, tha ai.

Ministri i Mbrojtjes, Ejup Maqedonci ka pritur sot në takim anëtarët e Komitetit Ushtarak të NATO-s, të kryesuar nga Admirali Giuseppe Cavo Dragone, si dhe kryetari i Komitetit Ushtarak të Bashkimit Evropian (CEUMC), Gjeneral Sean Clancy.

Ministri ka bërë të ditur se gjatë takimit u diskutua mbi zhvillimet aktuale të sigurisë, zhvillimin e Forcës së Sigurisë së Kosovës dhe kontributin e Kosovës në funksion të sigurisë regjionale dhe globale, transmeton Klankosova.tv.

Ndër të tjera, Maqedonci thotë se Komitetit Ushtarak të NATO-s, ia theksoi synimin strategjik që Republika e Kosovës ka për anëtarësim në Bashkimin Evropian dhe NATO, duke nënvizuar rëndësinë që kanë këto procese, jo vetëm për zhvillimin e gjithëmbarshëm të vendit por edhe për forcimin e stabilitetit dhe sigurisë në rajon.

“Për më tepër, delegacionin e Komitetit Ushtarak të NATO e informova rreth objektivat strategjike të Ministrisë së Mbrojtjes për katër vitet e ardhshme, të cilat janë fokusuara në zhvillimin e mëtejmë të kapaciteteve të FSK-së, zbatimin e mbrojtjes gjithëpërfshirëse, zhvillimin e industrisë së mbrojtjes, bashkëpunimin ndërkombëtar dhe vetëqëndrueshmërinë”, thotë Maqedonci në postimin e tij në Facebook.

Ministri shtoi se anëtarësimi i Kosovës në strukturat euroatlantike përbën një hap të natyrshëm dhe të domosdoshëm, që kontribuon për paqe të qëndrueshme, bashkëpunim të thelluar ndërkombëtar dhe arkitekturë më të fortë té sigurisë në Evropë.

“Republika e Kosovës mbetet e vendosur të ecë përpara si një partner i besueshëm, duke kontribuar aktivisht në sigurinë kolektive dhe mbrojtjen e vlerave që na bashkojnë”.

Lëvizja FOL përmes një komunikate për media ka shprehur shqetësim të thellë lidhur me mënyrën se si është proceduar me procesin e zgjedhjes së Presidentit të Republikës së Kosovës. Në një rend kushtetues parlamentar, zgjedhja e Presidentit nuk është një veprim i rëndomtë politik, por procedurë e veçantë kushtetuese, e cila duhet të zhvillohet vetëm në përputhje të plotë me Kushtetutën dhe me standardet e përcaktuara nga Gjykata Kushtetuese.

“Ajo që ndodhi vonë mbrëmë në Kuvendin e Republikës së Kosovës, ku u tentua të zgjidhej Presidenti përmes një procedure të kontestueshme te ashtuquajtur nga vetë eksponentët e shumicës si proces “karate”, përbën rrezik serioz për funksionimin normal të institucioneve dhe për vetë rendin kushtetues.

Republika nuk mbahet vetëm me numra. Presidenti nuk është pronë e një shumice të përkohshme. Presidenti është institucion i unitetit të popullit. Për këtë arsye, procesi i zgjedhjes së tij nuk mund të shndërrohet në ‘ushtrim force’, në kalkulim partiak apo në lojë procedurale. Kushtetuta nuk është instrument për t’u përdorur kur i shërben pushtetit dhe për t’u anashkaluar kur e kufizon atë.

Shkelja me paramendim dhe me qëllim e Kushtetutës përbën akt shumë të rrezikshëm dhe të paprecedent në historinë e re të Republikës. Një veprim i tillë nuk është vetëm gabim procedural; është goditje ndaj parimit se pushteti buron nga Kushtetuta dhe ushtrohet vetëm brenda kufijve të saj. Sepse ajo krijon bindjen se institucionet mund të deformohen nga brenda, se rregullat mund të lakohen sipas nevojës politike dhe se shteti mund të trajtohet si pronë e atyre që përkohësisht e qeverisin. Kjo është pikërisht arsyeja pse situata është kaq e rrezikshme: sepse normalizon idenë se Kushtetuta mund të anashkalohet kur nuk i përshtatet shumicës së momentit”, thuhet në komunikatë.

Sipas FOL,  fillimi apo vazhdimi i votimit pa praninë e së paku 80 deputetëve në sallë nuk mund të konsiderohet thjesht si çështje procedurale e brendshme e Kuvendit. Një veprim i tillë prek drejtpërdrejt rendin kushtetues, sepse synon të prodhojë pasoja juridike në mungesë të kushteve themelore që Kushtetuta kërkon për këtë proces.

Në këtë kuptim, shumica parlamentare dhe udhëheqja e Kuvendit kanë përgjegjësi të veçantë që të mos e trajtojnë Kushtetutën si pengesë teknike. Çdo procedim pa kuorumin e nevojshëm krijon precedent të rrezikshëm, dobëson parimin se pushteti ushtrohet vetëm brenda kufijve të përcaktuar me Kushtetutë dhe e fut vendin në një zonë të pasigurt institucionale.

Lëvizja FOL rikujton se demokracia nuk matet vetëm me numrin e votave që një shumicë mund t’i sigurojë në një moment të caktuar. Ajo matet edhe me gatishmërinë e asaj shumice për t’u ndalur kur Kushtetuta e kërkon këtë. Respektimi i kufijve kushtetues është kusht për legjitimitetin e çdo vendimi institucional.

Për këtë arsye, i bëjmë thirrje Kuvendit të Republikës së Kosovës, udhëheqjes së tij dhe të gjithë deputetëve që procesi i zgjedhjes së Presidentit të zhvillohet vetëm në përputhje të plotë me nenin 86 të Kushtetutës dhe me jurisprudencën e Gjykatës Kushtetuese. Çdo shmangie nga këto standarde nuk e zgjidh krizën institucionale; përkundrazi, e thellon atë, e dobëson besimin në institucione dhe e vendos vendin përballë një kontestimi të ri kushtetues.

Kosova ka nevojë për President të zgjedhur në mënyrë të rregullt, me proces të pastër dhe me legjitimitet të pakontestueshëm. Çdo rrugë tjetër është e dëmshme për institucionet, për rendin kushtetues dhe për besimin e qytetarëve në shtet.

Reagimet e para kanë ardhur për një propozim të raportuar iranian, i cili ofron një marrëveshje për Ngushticën e Hormuzit, duke anashkaluar çështjet e vështira mbi pasurimin bërthamor.

Një zyrtar amerikan tha të hënën se presidenti Donald Trump është i pakënaqur me propozimin sepse nuk trajton rezervat e uraniumit të pasuruar të Iranit, të cilat ShBA-të duan t’i heqin.

“Ai nuk e pëlqen propozimin”, tha burimi për Reuters, shkruan Sky News.

Trump e kishte diskutuar propozimin me ndihmësit e tij kryesorë të sigurisë kombëtare më herët gjatë ditës.

Axios kishte dhënë lajmin për propozimin e ri iranian dje pasi të dyja palët nuk arritën të bien dakord për bisedimet e paqes.

Deputetja e PDK-së, Ganimete Musliu, ka vlerësuar se VV-ja po dëshiron zgjedhjen e presidentit jashtë rregullave demokratike.

Ajo ka bërë me dije se kjo është rrëshqitje e rrezikshme drejt një forme të grushtshtetit.

Në profilin e saj në Facebook, ajo ka shkruar se Kosova meriton ligj dhe respektim të demokracisë.

“Kur institucionet kapen, ligjet anashkalohen dhe vendimet merren jashtë rregullave demokratike, kjo nuk është më qeverisje është rrëshqitje e rrezikshme drejt një forme të grushtshtetit. Kosova meriton rend, ligj dhe respekt për demokracinë, jo improvizim dhe kapje të shtetit”, ka shkruar ajo.

Ministrja e Ekonomisë, Artane Rivanolli ka njoftuar se KEK dhe KESKO kanë arritur marrëveshje sipas së cilës nuk do të ketë rritje të tarifave të energjisë elektrike.Rizvanolli në një videomesazh të publikuar në Facebook ka thënë se Qeveria e Kosovës mirëpret këtë marrëveshje.

“Qeveria e Republikës së Kosovës mirëpret marrëveshjen mes KEK dhe KESCO e cila do të mundësoi që sipas raportit konsultativ të ZRrE-së të mos kemi rritje të tarifave të energjisë elektrike”, ka thënë ajo.

Rizvanolli poashtu ka thënë se falënderon të gjitha palët që janë angazhuar që sivjet investimet në KEK të vazhdojnë në të dy termocentralet “për të rritur prodhimin e tyre dhe jetëgjatësinë, ndërkohë që ruhet përballushmëria e çmimeve për qytetarët dhe bizneset tona”.

Një i dyshuar është vetëdorëzur në Polici pasi dyshohet për “Lëndim të rëndë trupor” dhe “Shkaktim të rrezikut të përgjithshëm”.

Sipas raportit 24 orësh të Policisë, rasti kishte ndodhur më 15 shkurt në Milloshevë të Obiliqit, raporton “Betimi për Drejtësi“.

“Fsh. Milloshevë, Obiliq / 15.02.2026 – 18:00. Më 27.04.2026 lidhur me rastin është paraqitur në stacion policor i dyshuari mashkull kosovar dhe i njëjti pas intervistimit me vendim të prokurorit është dërguar në mbajtje”, thuhet në njoftim.