Author: G.O.

Partia Socialdemokrate ka kërkuar lirimin e menjëhershëm të gjashtë aktivistëve të saj, të cilët u arrestuan gjatë protestës në kundërshtim të Gjykatës Speciale, raporton Ekonomia Online.

Anëtari i kësaj partie, Qendron Kastrari tha se gjatë protestës janë arrestuar kryetari i PSD-së, Dardan Molliqaj dhe aktivistët Zgjim Hyseni, Nol Nushi, Korab Korça, Agron Kabashi dhe Gent Ibrahimi.

Arrestimi i tyre u bë në protestën e zhvilluar në kryeqytet, pas hedhjes së tymuesve në hyrje të hotelit ku kryetarja e Gjykatës Speciale, Ekaterina Trendafilova po qëndronte në një takim me shoqërinë civile.

Kryetarja e Dhomave të Specializuara të Kosovës në Hagë, Ekaterina Trendafilova, ka nisur takimin e saj me përfaqësues të shoqërisë civile.

Pak para takimit, Partia Socialdemokrate (PSD) protestoi të mërkurën kundër kryetares së Dhomave të Specializuara, Ekaterina Trendafilova, duke hedhur flakadanë që krijuan tym të madh të zi pranë një hoteli në Prishtinë, ku besohet se ajo po mbante takim me shoqërinë civile.

Policia e Kosovës u pa duke i arrestuar disa prej anëtarëve të kësaj partie, e cila nuk përfaqësohet në Kuvendin e Kosovës.

Megjithatë ajo ka thënë se nuk e kupton arsyen e veprimeve të tilla, për të cilat i fton të njëjtit që të diskutojnë.

“Nuk e kuptoj se përse po bëhen veprime të tilla. Mund të vijnë këtu, të diskutojmë”, tha ajo.

Vizita e Trendafilovës në Kosovë po vjen pak ditë pasi Zyra e Prokurorit të Specializuar vendosi t’ua pezullojë vizitat dhe komunikimet ish-krerëve të Ushtrisë Çlirimtare të Kosovës, Hashim Thaçit, Kadri Veselit dhe Rexhep Selimi, të cilët po mbahen në paraburgim në Hagë si të akuzuar për krime lufte.

Gjyqtarja bullgare në korrik të vitit të kaluar e kishte anuluar vizitën e saj në Kosovë pas paralajmërimit për protestë nga Partia Socialdemokrate.

Ajo kishte planifikuar të takohej me përfaqësues të shoqërisë civile në Gjilan, ku me ta do të fliste për punët dhe zhvillimet aktuale në Dhomat e Specializuara.

Drejtori i përgjithshëm i Policisë së Kosovës, kolonel Gazmend Hoxha, priti sot në takim njohës komandantin e KFOR-it, gjeneralin Ozkan Ulutas, me të cilin diskutoi mbi tema të ndryshme në interes të situatës së sigurisë në vendin tonë.

Në takim u rikonfirmua vazhdimi i bashkëpunimit të mëtejmë dhe avancimit të shkëmbimit të informacioneve në funksion të ruajtjes së një ambienti më të qetë dhe të sigurt për të gjithë qytetarët pa dallim.

Temë tjetër e diskutimeve ishin aktivitetet dhe patrullimet e përbashkëta në mes të Policisë së Kosovës dhe KFOR-it, të cilat reflektojnë në situatën e sigurisë në tërë vendin, përfshirë veriun.

Të dy palët u dakorduan se vazhdimi i bashkëpunimit, mirëbesimit dhe realizimit të aktiviteteve të përbashkëta, ndikon në rritjen e mëtejme të nivelit të sigurisë së përgjithshme.

Në Dhomat e Specializuara të Kosovës (DhSK) në Hagë, kryetarja e trupit gjykues, Mappie Veldt Foglia njoftoi se gjykimi ndaj Pjetër Shalës do të rifilloj më 9 janar 2024 dhe sot është hera e fundit që mbajnë seancë për këtë vit.

Përpara se të bëjë këtë njoftim, Mappie Veldt Foglia dha katër urdhra me gojë në këtë çështje gjyqësore.

Gjyqtarja Mappie Veldt-Foglia dha urdhër që përfshinte mbylljen e afatit për paraqitjen e provave nga mbrojtja. Trupi gjykues ka caktuar 15 janarin 2024 ku parashikohet që të bëhet mbyllja e paraqitjes së provave nga mbrojtja.

Njëra prej urdhrave ishte lidhur me kërkesën e mbrojtjes së Pjetër Shalës, për të thirrur dëshmitarin ekspert, Stefan Learts që të jep dëshmi në sallën e gjyqit.

“Trupi gjykues nuk pajtohet me argumentin e mbrojtjes se akt-ekspertiza e z.Lerts dhe përgjigjet me shkrim janë të pamjaftueshme dhe se palët janë të paqarta dhe për rrjedhojë ai duhet të vijë fizikisht. Rrjedhimisht, trupi gjykues konstaton se mbrojtja nuk ka dhënë arsye të mjaftueshme për të thirrur z.Lerts që të jep dëshmi në sallën e gjyqit fizikisht dhe rrezon kërkesën e mbrojtjes lidhur me këtë pikë”, tha Mappie Veldt-Foglia.

Sipas asaj që tha Veldt-Foglia, mbrojtja e Pjetër Shalës kishte bërë kërkesë që dëshmitari ekspert Stefan Lerts të jep dëshmi fizikisht në sallën e gjyqit.

“Lidhet me kërkesën e mbrojtjes për të thirrur dëshmitarin ekspert z.Stefan Lerts që të jep dëshmi në sallën e gjyqit. M 8 nëntor mbrojtja dorëzoi kundërshtimin e mbrojtjes sa i takon pranueshmërisë së raportit të dëshmitarit ekspert të mbrojtjes së viktimave dhe kërkon që të thërret dëshmitarin dhe të jep dëshmi live”, tha Mappie Veldt-Foglia.

Po ashtu sipas kryegjyqtarës, mbrojtja kishte kundërshtuar edhe akt-ekspertizën e këtij eksperti si provë mbi bazën se është i pabesueshëm dhe nëse ka ndonjë vlerë provuese ajo dëmtohet për shkak të efektit cenues.

“Mbrojtja kundërshton pranueshmërinë e akt-ekspertizës si provë mbi bazën se është i pabesueshme dhe nëse ka ndonjë vlerë provuese ajo dëmtohet për shkak të efektit cenues. Mbrojtja parashtron se në qoftë se trupi gjykues pranon akt-ekspertizën e Z.Learts si provë, ai të thirrët të jep dëshmi në sallën e gjyqit. Mbrojtja argumenton se përgjigjet me shkrim që ka dhënë z.Lert për mbrojtjen janë të pamjaftueshme dhe të vagullta dhe të mos thërrasësh dëshmitarin ekspert të jep dëshmi, cenon të drejtën themelore të z.Shala. me 20 nëntor të këtij viti, mbrojtësi i viktimave dorëzoi përgjigjen ndaj mbrojtjes me numër 723 ku parashtron se argumentet e paraqitura nga mbrojtja janë të vagullta dhe të pabazuara”, tha Veldt-Foglia.

Ajo i kujtoi palëve edhe vendimin për procedurat zhdëmtuese të cilat duhet të kryheshin me shkrim dhe sipas kësaj, eksperti Lerts nuk do të thirrej për të dhënë dëshmi fizikisht.

“Si fillim, trupi gjykues rikujton vendimin që procedurat zhdëmtuese parimisht duhet kryer me shkrim dhe se Z.Leart nuk do të thirrej për të dhënë dëshmi live në prani fizike, pra në përjashtim të rasteve kur mbrojtja i jep trupit gjykues arsye për të marrë një vendim të ndryshëm. Trupi gjykues rikujton me tejë se në kundërshtim me parashtrimet e mbrojtjes në kontekstin e proceseve gjyqësore zhdëmtuese rregulla 168 e rregullores së procedurës dhe provave… trupi gjykues vërenë se mbrojtja ka pas mundësi të njihet me raportin që ka mbajtur z.Lerts dhe të dorëzoj pyetje me shkrim për dëshmitarin ekspert megjithatë mbrojta i ka paraqitur kundërshtimet sa i takon vlefshmërisë së këtij raporti si provë dhe me teje ka paraqitur provat e veta nga një ekspert në kundërpërgjigje të raportit të z.Lerts”, tha Mappie Veldt-Foglia.

Ndërsa urdhri i dytë dhe i tretë i Mappie Veldt-Foglia u dha me përmbajtje të redaktuar për publikun.

Vlen të theksohet se dëshmitari i cili sot dha dëshmi ishte i fundit për këtë bllok të dëshmitarëve dhe se në janar do të vazhdohet me dëshmitarin e ardhshëm. Kështu, të gjitha seancat tjera të parapara për këtë vit u anuluan. /betimipërdrejtësi

Këshilli për Mbrojtjen e të Drejtave dhe Lirive të Njeriut (KMDLNj), përmes një reagimi publik të mërkurën ka kundërshtuar marrëveshjen për burgjet me qira në mes të Republikës së Kosovës dhe Mbretërisë së Danimarkës.

Kjo marrëveshje nuk u hodh fare në votim në seancën e fundit të Kuvendit të Kosovës, pas polemikave të shumta mes ministres së Drejtësisë, Albulena Haxhiu dhe deputetëve, kryesisht nga Lidhja Demokratike të Kosovës.

Përkundër insistimit të ministres Haxhiu që kjo marrëveshje të kalojë, deputetët e opozitës deklaruan se nuk do ta votojnë pasi sipas tyre, është e kundërligjshme.

Se kjo marrëveshje nuk duhet të votohet vlerëson edhe KMDLNj-ja, e cila për qëndrim ka renditur 15 arsye.

Sipas KMDLNj, deputetët e Kuvendit të Kosovës nuk kanë qenë drejt të informuar për përmbajtjen e kësaj marrëveshjeje.

“Deputetët e Kuvendit të Kosovës nuk janë informuar as për veprat që janë dënuar këta të burgosur e as për shtetin nga e kanë prejardhjen. Deputetët e Kuvendit të Kosovës nuk janë informuar se asnjë i burgosur nuk është danez apo shtetas danez”, thuhet në komunikatën për media.

Këshilli tutje ka deklaruar se “deputetët nuk janë informuar se këta të burgosur do të transferohen dhunshëm dhe kundër vullnetit të tyre në Kosovë”.

“Deputetët e Kuvendit të Kosovës duhet ta kenë të qartë se këta të burgosur janë kryesisht nga shtetet afrikane, aziatike dhe arabe dhe të besimit islam. Deputetët e Kuvendit të Kosovës duhet ta kenë të qartë se këta nuk transferohen në Kosovë shkaku se Kosova i trajton mirë (edhe i trajton mirë sipas standardeve kosovare të dënuarit kosovarë) për faktin se përgjegjësinë për trajtimin e tyre e ka shteti danez por se ata dërgohen në Kosovë sepse Kosovën e konsiderojnë si një shtet islamik i afërt me përcaktimin fetar të burgosurve që do të kontrabandohen nga Danimarka në Kosovë”.

Po ashtu, KMDLNj ka thënë se deputetët nuk janë informuar as se si do të organizohen vizitat familjare të cilat janë më të shpeshta se në Kosovë.

“Paramendojeni situatën kur 300 të burgosur në të njëjtën kohë vizitohen nga 1200 familjarë! Do të krijohej një situatë sikur të ishin në Afganistan, Sudan, Siri apo Pakistan. Kufizimi i vizitave do të ishte shkelje e të drejtave të njeriut. Deputetët e Kuvendit të Kosovës nuk janë informuar se kjo çështje ndërlidhet drejtpërdrejtë me sigurinë dhe rrezikon sovranitetin e vendit nga rrymat radikale politike dhe fetare”.

“Deputetët e Kosovës nuk janë informuar si do t’i realizojnë të burgosurit e kontrabanduar nga Danimarka beneficionet që iu takojnë sipas ligjit si vikendet jashtë burgut, pushimet vjetore, realizimi i vizitave humanitare etj. Deputetët e Kuvendit të Kosovës nuk janë informuar se si do të trajtohen në aspektin shëndetësor rastet kur është e nevojshme trajtimi jashtë objektit të burghotelit në Gjilan. Kush do të garantojë për sigurinë e tyre?”.

“Deputetët nuk janë informuar se si do të komunikojnë të burgosurit me stafin korrektues (janë kosovarë), si do të informohen në gjuhën e tyre amtare apo në gjuhën që e kuptojnë dhe se kush do të përkujdeset për realizimin e të drejtave fetare që iu takojnë. Mos do të jetë BIK–u, vallë? Deputetët duhet të informohen se me këtë traktat kriminal dhe racist po legalizohet sistemi paralel korrektues dhe në Kosovë do të kemi tre sisteme korrektuese; ai i Kosovës që zbatohet aktualisht, ai i Zajednicës kur të fitohet autonomia për serbë dhe ai për të burgosurit që do të kontrabandohen nga Danimarka”.

Mes tjerash thuhet se deputetët duhet të informohen se me këtë “traktat kriminal dhe racist po përligjet ndarja e Shërbimit Korrektues të Kosovës si dhe po përligjet diskriminimi i të burgosurve që vuajnë dënimin në të njëjtin vend – në Kosovë”.

“Deputetët duhet të informohen se përfitimi material prej afërsisht 15 milionë euro brenda viti është i papërfillshëm krahasuar me dëmet afatgjate që i shkaktojnë Kosovës dhe Shërbimit Korrektues të Kosovës. Deputetët duhet të informohen se me këtë përligjje të diskriminimit do të krijohen kushte reale dhe të arsyeshme për rebelim të burgosurve kosovarë që janë nën përkujdesje të Shërbimit korrektues të Kosovës”.

“KMDLNj që nga dita e parë e ka kundërshtuar këtë marrëveshje dhe në këtë drejtim ka bashkëpunuar me organizatat dhe individë nga Danimarka që e kundërshtojnë këtë marrëveshje në shtetin e tyre. Danimarka këta të burgosur i kontrabandon në Kosovë në kundërshtim të plotë me të drejtat e njeriut dhe miratimi eventual nga Kosova i kësaj marrëveshje e vë Kosovën në bankën e të akuzuarve për shkelje të drejtave të njeriut. Para se të hedhet në votim është dashur të kërkohet mendimi i Gjykatës Kushtetuese të Kosovës nëse është në përputhje me të drejtat e njeriut. Sponsorisuesi i këtij traktati është i udhëhequr nga interesi politik dhe as që i intereson për dëmet që ia bën Kosovës. Tërë kohën e ka mashtruar edhe opinionin si dhe deputetët prandaj ka heshtje dhe mosreagim të opinionit”.

“Prandaj, deputetë të Kuvendit të Kosovës, mos e votoni këtë traktat të dëmshëm, racist dhe në kundërshtim me të drejtat e njeriut. Refuzoni të votoni traktat kundër interesave të Kosovës sepse, po të ishte diçka e mirë, as që do t’i vinte rendi Kosovës për këtë. Kosovën duan ta shndërrojnë në deponi për mbetje njerëzore të njerëzve të paaftë dhe mos u bëni pjesë e këtij krimi”, përfundon reagimi.

Ish-kryeministri i Kosovës, aktualisht kryetar i AAK-së, Ramush Haradinaj, ka kujtuar sot procesin gjyqësor ndaj tij në Tribunalin e Hagës, i cili kishte zgjatur me vite të tëra për të përfunduar në favor të tij dhe bashkëluftëtarëve të tij.

Haradinaj ka thënë se ashtu siç ishte konfirmuar pastërtia e UÇK-së në rastin e tij, njëjtë do të ndodh edhe me të akuzuarit që sot mbahen në Hagë.

“Edhe atë kohë kishim ndjenjën që drejtësia e vonuar është drejtësi e mohuar, por megjithatë kur erdhi ishte lehtësim i madh, çlirim nga padrejtësitë që ndodhën gjatë procesit. Po ashtu sot besoj që do të vërtetohet pafajësia dhe pastërtia e bashkëluftëtarëve që janë duke u përballë me sfidën e radhës në Hagë. Ata shkuan si çlirimtarë atje, ashtu do të kthehen!”, ka thënë mes tjerash Haradinaj.

Postimi i plotë i Haradinajt:

Të dashur qytetarë,

Më 17 nëntor 2004 pata dhënë dorëheqje nga posti i kryeministrit, për t’u paraqitur për intervistim para prokurorëve të Hagës në Prishtinë, si i dyshuar për krime lufte dhe thyerjen e ligjeve dhe rregullave të luftës.
Pas marrjes së aktakuzës së parë, filloi një proces i gjatë gjyqësor. Që nga ajo ditë e deri më 29 nëntor 2012, zgjati ndjekja ligjore ndaj meje. Edhe pse në aktgjykimin e parë u lirova si i pafajshëm, pas disa vjetësh jam rikthyer për herë të dytë në rigjykim.

I gjithë ky proces gjyqësor zgjati më shumë se 8 vjet, ku përfundimisht sot para 11 vjetësh, mora aktvendimin e pafajësisë i cili vulosi pafajësinë time dhe të bashkëluftëtarëve të mi, për luftën e drejtë dhe të pastër të UÇK-së.

Në këtë proces për vendosjen e drejtësisë asnjëherë nuk mbeta i vetëm. Kisha afër familjen, bashkëluftëtarët, gjithë qytetarët e diasporën e në përgjithësi shqiptarët, por edhe institucionet tona, edhe pse në pjesën e parë nuk ishim shtet i pavarur.
Edhe atë kohë kishim ndjenjën që drejtësia e vonuar është drejtësi e mohuar, por megjithatë kur erdhi ishte lehtësim i madh, çlirim nga padrejtësitë që ndodhën gjatë procesit.

Po ashtu sot besoj që do të vërtetohet pafajësia dhe pastërtia e bashkëluftëtarëve që janë duke u përballë me sfidën e radhës në Hagë. Ata shkuan si çlirimtarë atje, ashtu do të kthehen!

Kryeministri i Republikës së Kosovës, Albin Kurti ka pritur në takim Ambasadorin e Gjermanisë në Kosovë, Jörn Rohde.

Sipas një komunikate dërguar mediave nga Kryeministria, Kurti dhe Rohde folën për marrëdhëniet bilaterale dhe bashkëpunimin ndërmjet Kosovës dhe Gjermanisë, temat aktuale dhe zhvillimet e fundit në vend.

“Gjatë këtij takimi, kryeministri Kurti pranoi nga ambasadori gjerman Rohde një kopje të librit “Gjermania dhe Kosova: Historia e një partneriteti” nga autorët Enrico Seewald dhe Urs Unkauf, që përshkruan dhe shtjellon historikun e raporteve të shkëlqyeshme ndërmjet dy shteteve dhe popujve. Krahas falënderimit për librin, kryeministri e falënderoi ambasadorin Rohde për bashkëpunimin e afërt, dhe shtetin gjerman për mbështetjen e vazhdueshme ndaj Kosovës”, thuhet mes tjerash në komunikatë.