Author: G.O.

Nëpërmjet platformës e-Kosova qytetarët do të kenë mundësinë të zgjedhin mjekun e tyre familjar, për vetën, fëmijën e familjarët e tyre.

Përzgjedhja ka filluar tashmë dhe fillimisht po mundësohet për qytetarët e komunës së Prishtinës në dy qendra të mjekësisë familjare si dhe në Lipjan, Istog e Prizren.

“Unë ju bëjë thirrje dy qendrave, QMF nr.4 në Breg të diellit dhe atyre numër 5 në dardani dhe Ulpianë që të hyjnë në e-Kosova dhe të shkojnë te pjesa e shëndetësisë dhe të zgjedhin mjekun familjarë dhe do të zgjedhet mjeku familjar që preferojnë ta zgjedhin.”, tha Bujar Gashi, drejtor i qendrës kryesore të mjekësisë familjare.

Pilot projekti do të zgjasë edhe përafërsisht 3 javë.

“Sigurisht në nivelin qendror MSH është duke bërë kampanjën në mënyrën e  tyre. Normalisht edhe komunat  do të fillojnë ta përkrahin këtë kampanjë…këta që regjistrohen tani nuk do të kenë nevojë të regjistrohen prapë..”, thotë tutje Gashi.

Një gjë e tillë po mirëpritet nga qytetarët.

Pilot projekti i paraparë për 4 komunat ka nisur të zbatohet që nga 9 janari.

Ndërkohë projekti final ku do të përfshihen të gjitha qendrat e mjekësisë familjare, pritet të nisë në prill të këtij viti./atvlive.tv/

Ministria e Drejtësisë ka nisur ndryshimin e Udhëzimit Administrativ për Mbrojtjen Juridike të Personave të Akuzuar në Dhomat e Specializuara.

Përmes këtij projekt-udhëzimi që është në diskutim publik, synohet përcaktimi i tarifave fikse për avokatët, varësisht nga kompleksiteti i lëndës.

Te tabela e tarifave, deri tani pagesat ishin të prera. Për kompleksitetin e nivelit 1: në fazën e procedurës paraprake avokati paguhej 30 mijë euro. Në fazën e gjykimit paguhej 50 mijë euro e kështu me radhë. Tani, në secilën pagesë është vendosur togfjalëshi “deri në”.
Pikërisht ky element, sipas juristit Xhevdet Smakiqi, i cili ka punuar në udhëzimin administrativ bazë të vitit 2020, nënkupton që pagesat e avokatëve mund të ulen.

“Këto ndryshime nënkuptojnë që avokatët mbrojtës do të mund të paguhen më pak sesa vlera që ishte e vendosur më herët, varësisht nga kompleksiteti i lëndëve dhe fazave të gjykimit…” thotë ai.

Diçka të tillë nuk e mohoi as Ministria e Drejtësisë në një përgjigje për ATV-në.

“Duke u bazuar nga kompleksiteti i lëndës Komisioni për shqyrtim dhe vendosje do të vendos lidhur me kërkesat”, thuhet në përgjigjen e MD-së.

Ndryshimi eventual për çështjen e pagesave, vlerësohet se mund të ketë ndikim negativ.

“Kjo do të mund ndikojë negativisht në mbrojtjen e të akuzuarve nga gjykata speciale…”, thote Smakiqi.

Bashkë me Ligjin për Dhomat e Specializuara, në vitin 2015 ishte miratuar edhe ligji që të akuzuarve potencialë ua jepte të drejtën për ndihmë financiare dhe mbulim të shpenzimeve të mbrojtjes.

Por, në korrik të 2020-ës, u miratua Udhëzimi Administrativ, i cili përcaktonte se mbulimi financiar bëhej në bazë të tarifave të Odës së Avokatëve të Kosovës.
Avokatët e të akuzuarve nga Gjykata Speciale paguhen nga buxheti i Kosovës./atvlive.tv/

Punimet për shtrirjen e rrjetit të ujësjellësit i çoi në fund, por kompania kontraktuese nuk iu përmbajt kritereve të kontratës.

Në vend të kalldrëmit, në rrugën historike të Prizrenit “Berati”, që të çon te kalaja, u shtrua beton.

Për këtë komuna ka urdhëruar kompaninë ta largojë betonin, e ta kthejë rrugën në gjendjen e mëparshme.

“Ne si drejtori e kemi gjetë si kontratë kur kemi ardhë në pushtet. Operatori ka pasë ngecje në kthimin e asaj infrastrukturës e cila është obligative me kontratë. Në momentin që kanë reagu edhe inspektorati edhe qendra, kemi ba vërejtje që operatori me iu përmbajt kontratës. Ne kemi kërkuar në mënyrë urgjente që të rifillohet me vendosjen e kalldrëmit lumor dhe operatori është duke intervenuar”, tha Çelë Lamaj, drejtor i shërbimeve publike në Prizren.

Betonimi i rrugës “Berati”, u pa me shqetësim edhe nga prizrenasit.

Punimet në këtë pjesë të njohur si “nënkalaja”, kishin filluar me pëlqimin e Qendrës Rajonale për Trashëgimi Kulturore në Prizren, që funksionon brenda Ministrisë së Kulturës.

Por me të dalë në teren ata kishin parë edhe gjendjen e rrugës. Sipas tyre, nëse rruga nuk kthehet në gjendje të mëparshme do të marrin masa. Inspektorati i trashëgimisë kulture, po ashtu, ka thënë se secili veprim ose mosveprim, i cili dëmton asetet e trashëgimisë kulturore në “kompleksin Nënkalaja”, është i dënueshëm, sipas ligjit të Trashëgimisë Kulturore dhe Kodit Penal të Republikës së Kosovës./atvlive.tv/

Trupat gjerman në Kosovë pritet të shtohen. Një kontingjent i ri i ushtarëve gjerman do të vinë në Kosovë në maj të këtij viti. Krejt kjo sipas ambasadorit Gjerman në Kosovë Jorn Rohde, për shkak të situatës së brishtë mes Kosovës dhe Serbisë.

Madje sipas tij, sulmi terrorist i 24 shtatorit në Banjskë të Zvecanit ka ndryshuar gjithçka.

Ai po kërkon që autorët e këtij sulmi të ndëshkohen.

“Ishte një sulm terrorist. Ajo që duam është paqe dhe stabilitet. Sulmet si ky janë saktësisht e kundërta e kësaj. Nëse nuk dënohen autorët e sulmit në Banjskë, si mund të rritet besimi mes dy vendeve. Personalisht, nuk mund ta imagjinoja se do të ndodhte diçka e tillë, dhe për këtë arsye NATO e shtoi praninë e saj dhe Gjermania do të bëjë të njëjtën gjë me një kontingjent të ri nga maji”, u shpreh Rohde.

Mirëpo, shtimi i trupave gjerman në Kosovë sipas njohësit të çështjeve politike, Fitim Mulolli, ka edhe anë pozitive por edhe negative për vendin.

Derisa Ambasadori gjerman vlerëson se mes Kosovës dhe Serbisë, mund të ketë konflikt të ngrirë, Mulolli thotë se pas sulmit të Banjskës, Kosova është në pozitë më të favorshme në procesin e dialogut.

Ndërsa, duke folur për integrimin evropian, Rohde ka theksuar se nëse Evropa nuk vjen në rajon dhe nëse rajoni nuk i bën detyrat e shtëpisë, qytetarët e Ballkanit Perëndimor do të kërkojnë ikje në vendet evropiane./atvlive.tv/

Ka vdekur i riu nga Podujeva, pasi u rrah brutalisht para disa ditësh në rrugën “Drenica” në Podujevë.

Bëhet fjalë për Lulzim Fejzullahun, 18-vjeçar. Lajmin për vdekjen e tij e kanë konfirmuar familjarët.

Sipas familjarëve, i njëjti ishte goditur me veturë, e më pas ishte sulmuar me mjete të forta, duke i shkaktuar tashmë plagë vdekjeprurëse.

Ditë më parë Policia ka thënë se për këtë rast janë arrestuar dy persona.

Ekspertja amerikane e sigurisë, Ivana Stradner, ka komentuar fjalimin e presidentit amerikan, Joe Biden, të mbajtur dje në Shtëpinë e Bardhë e ku flet për agresionin rus në Ukrainë dhe shtron pyetjen se çfarë mund të ndodh nëse Amerika largohet dhe Putin mposht Zelenskyn.

Stradner ka thënë se për një kohë të gjatë ka paralajmëruar për rrezikun e një lufte në Ballkan dhe se më në fund SHBA-ja ka hapur sytë.

Ajo ka thënë se nëse SHBA-ja nuk e ndalë Rusinë, radha është për Ballkanin, meqë Rusia kërkon një front të dytë në Evropë.

“Unë kam paralajmëruar për një luftë në Ballkan për një kohë të gjatë dhe më në fund SHBA ka hapur sytë. Nëse nuk ndalojmë Rusinë, Ballkani është i radhës. Fronti i Dytë i Rusisë në Evropë”, ka shkruar ajo.

“Bundeswheri” gjerman përmes një njoftimi për media kanë bërë të ditur se si rezultat i përkeqësimit të situatës së sigurisë në Kosovë, Gjermania do ta rris numrin e forcave të saj që janë në Kosovë në kuadër të KFOR-it. Ky kontingjent gjerman i këmbësorisë do të zbarkojë në Kosovë në pranverë.

“Bundeswheri bën një kontribut të rëndësishëm në stabilitetin dhe sigurinë e Kosovës përmes KFOR-it. Gjermania është shteti i parë që do të rris përkushtimin duke dërguar forca shtesë këmbësorie”, thuhet në njoftim e Bundesëher.

Nga 80 ushtarë gjermanë sa janë aktualisht në Kosovë në kuadër të KFOR-it, numri i tyre do të shkojë në 300 së bashku me stafin mbështetës.

Për këtë çështje ka folur edhe Gjenerali gjerman Bernd Schutt, duke thënë se trupat shtesë gjermane do të zbarkojnë në Kosovë në pranverë.

“Në pranverë do të dërgojmë një kompani shtesë këmbësorie në veprim,” ka thënë gjenerallejtënant Schutt.

Duke dhënë detaje për forcat shtesë që do të vijnë në Kosovë, Schut ka thënë se ata do të bëjnë patrullime, detyra të sigurisë dhe nëse do të jetë e nevojshme edhe de-përshkallëzim në rast të trazirave dhe protestave.

“Portofoli i tyre i detyrave përfshin patrullimet, detyrat e sigurisë dhe, nëse është e nevojshme, de-përshkallëzimin gjatë protestave dhe trazirave,” shpjegoi gjenerallejtënant Schütt.

Bundesëher njofton se shtimi i trupave gjermane në Kosovë në selinë e KFOR-it është pritur tepër mirë.

Komandanti aktual i KFOR-it, Ozkan Ulutas, ka mirëpritur vendimin e Gjermanisë për rritjen e numrit të forcave në kuadër të KFOR-it në Kosovë.

Ai ka thënë se njoftime të tilla tregojnë vendosmërinë e shteteve aleate për t’u siguruar që KFOR-i ka kapacitetet e nevojshme për të përmbushur mandatin e saj.

Ulutas ka thënë se KFOR do të vazhdojë të përpiqet për të parandaluar çdo përshkallëzim dhe se misioni ushtarak është i gatshëm për t’iu përgjigjur çdo sfide.

“Ne do të vazhdojmë të përpiqemi për të parandaluar çdo përshkallëzim dhe jemi të gatshëm t’i përgjigjemi çdo sfide”, ka thënë Ulutas.