Author: G.O.

Zëvendëskryeministri Besnik Bislimi i ka bërë thirrje Bashkimit Evropian që të jetë forcë shtytëse për Ballkanin Perëndimor, duke kërkuar që të vendet evropiane të jenë unike si në rastin e Ukrainës.

Pas vendimit të BE-së që t’ia ndajë Ukrainës një pako ndihme prej 50 miliardë eurosh, Bislimi ka thënë të enjten se sigurimi i financave për Planin e Rritjes të Ballkanit Perëndimor është hap i madh drejt integrimit.

“Vendimi i sotëm i BE-së tregon rëndësinë e unitetit dhe bashkimit. Të njëjtat pariem morale që duhet të jenë forcë lëvizëse edhe për Ballkanin Perëndimor. Në këtë kuptim, sigurimi i financave për Planin e Rritje së Ballkanit Perëndimor është hap i madh drejt integrimit”, ka thënë Bislimi në rrjetin social X.

BE-ja tha se marrëveshja për ndarjen e pakos për Ukrainën “mbyll një financim të qëndrueshëm, afatgjatë dhe të parashikueshëm për Ukrainën”.

Kosova është sanksionuar nga Bashkimi Evropian me disa “masa të përkohshme”.

Zyrtarët e BE-së patën thënë se sanksionet janë vendosur për shkak të mospërfilljes së kërkesave për hapa të menjëhershëm nga Qeveria e Kosovës për uljen e tensioneve në veri.

Policia e Kosovës ka larguar sot një bilbord serb të vendosur në një kodër te Kroi i Vitakut.

Lajmin e ka konfirmuar zëvendësdrejtori i Policisë së Kosovës për rajonin e Veriut, Veton Elshani.

Elshani tha se derisa Policia ishte duke bërë sigurimin në lagjen Kroi i Vitakut, për shkak të vizitës së ministrit të Brendshëm, Xhelal Sveçla, është larguar edhe billbordi që ishte i vendosur në kodër.

“Sot Policia e Kosovës ka bërë sigurimin në Lagjen Kroi i Vitakut derisa në vizit ishte Ministri i Punëve të Brendshme dhe Ministri i Pushtetit Lokal. Gjatë kësaj kohe është largu edhe billbordi që ishte në kodër aty në afërsi”, tha ai.

Vendimi i rregullores së Bankës Qendrore të Kosovës për ndalimin e qarkullimit të dinarit serb po konsiderohet i drejtë dhe si i tillë edhe duhet të zbatohet.

Profesori universitar, Mazllum Baraliu, thotë se përmes këtij vendimi pamundësohen keqpërdorimet dhe abuzimet.

Baraliu për KosovaPress deklaroi se vendi duhet të përballojë presionin e ndërkombëtarëve për shtyrjen e vendimit për dinarin, pasi sipas tij, duhet të ndalohet qarkullimi i valutave të huaja ilegale në vend.

“Vendimi është gjithsesi i drejtë, por edhe i domosdoshëm, sepse është obligim ligjor dhe kushtetues që Banka Qendrore të mbajë kujdes lidhur me politiken monetare që në këtë rast është e varur nga zona euro, por sidoqoftë që të zbatojë ligjin që të mos lejojë të qarkullojnë valuta të huaja ilegale në Kosovë. Andaj, vendimi është i domosdoshëm dhe me vend, dhe nuk duhet lejuar askush pastaj të ketë guximin siç disa zëdhënës nga Brukseli atje pretendojnë që ta fusin në negociata këtë çështje për arsyeje se është interne, një vendim i një institucioni të pavarur, dhe që duhet domosdo t’i zbatojë ligjet e këtij vendi”, tha Baraliu.

Ai potencon se në asnjë mënyrë nuk ka shkelje kushtetuese nga rregullorja e BQK-së lidhur me këtë çështje, derisa shton se çdo gjë është bërë në mënyrë ilegale duhet të ndërpritet.

“Në asnjë mënyrë, as nuk ka shkelje (kushtetuese), por përkundrazi është vonesë, në vite të konsiderueshme pikërisht lejimi i valutave ilegale siç është në mesin e tyre edhe dinari…Pra, çdo gjë është bërë në mënyrë ilegale, dhe duhet të ndërpritet kjo. Ky vendimi është i duhur, në kohën e vonuar, por të domosdoshme që të zbatohet, dhe askush nuk ka të drejtë të interferojë në politikat monetare dhe në pavarësinë e institucionit bankar siç është Banka e Kosovës”, tha Baraliu.

Ndërsa, ka renditur edhe të mirat që sjell kjo rregullore. Sipas tij, me hyrjen në fuqi të kësaj pamundësohen keqpërdorimet dhe abuzimet e po ashtu vlerëson se qarkullimi vë në disiplinë financiare që është e domosdoshme për stabilitetin bankar, i cili ndikon në sistemin ekonomik të vendit.

“Vë në kontroll, disiplinë financiare. Paramendoni ardhjet me thasë në forma krejt ilegale, të pakontrolluara të valutave të huaja dhe qarkullimi i tyre nëpër Kosovë në mënyrë ilegale. Natyrisht se kanë obligime ato institucione bankare që i qarkullojnë këto të holla, edhe ndaj shtetit të Kosovës. Asnjë obligim nuk është kryer deri më tani, kështu tani futet në sistem informaliteti i qarkullimit të valutave të huaja, edhe të dinarit të Beogradit, bëhet qarkullimi në kuadër të kornizave ligjore dhe kryhen obligimet ndaj shtetit por edhe ndaj qytetarëve. Kështu që, pamundësohen keqpërdorimet, abuzimet dhe qarkullimi vë në disipline financiare që është e domosdoshme për stabilitetin bankar, i cili ndikon në tërë sistemin ekonomik”, përfundon Baraliu.

Megjithatë, pavarësisht se nga sot kjo rregullore ka hyrë në fuqi, ende dinari serb është duke qarkulluar në Graçanicë. Ekipi i KosovaPress-it sot ka evidentuar qarkullimin e dinarit nëpër dyqane të Graçanicës.

Në një nga market në këtë komunë, një qytetar ka bërë pagesë me dinarin serb që është antikushtetues dhe antiligjor në Kosovë.

Në anën tjetër, guvernatori i BQK-së, Ahmet Ismaili dje ka mohuar se do të ketë shtyrje apo anulim të rregullores për ndalimin e qarkullimit të dinarit serb në Kosovë.

Qytetarët e komunitetit serb në Graçanicë konsiderojnë se do të dëmtohen nga vendimi për heqjen e dinarit serb nga përdorimi. Këta serbë lokal shprehen kritik ndaj ekzekutivit të Kosovës, të cilët kërkojnë që të hiqet nga fuqia një vendim i tillë. Përkundër kritikave, të njëjtit kanë vijuar me shfrytëzimin e kësaj valute. KosovaPress ka evidentuar qarkullimin e dinarit serb nëpër dyqane të Graçanicës. Edhe vet shitësit, prapa kamerës, kanë konfirmuar se kanë pranuar këtë valutë për blerje.

Nga sot ka hyrë në fuqi Rregullorja e Bankës Qendrore të Kosovës, e cila vendos që vetëm valuta euro të përdoret për pagesa me para të gatshme. Me këtë rregullore parashihet që vetëm valuta euro të përdoret për pagesa, duke u hequr nga përdorimi dinari serb. Ndërkaq, Qeveria e Kosovës ka njoftuar se zbatimi i rregullores së re për operacione me para të gatshme do të bëhet përmes një tranzicioni të lehtësuar.

Megjithatë, qytetari nga Graçanica, Millosh Todoroviq e konsideron të padrejtë këtë vendim.

“Nuk është e drejtë. Shpresoj se kjo do të ndryshojë sepse askund as në Kushtetutën zyrtare nuk shkruan që dinari është valutë që nuk njihet në Kosovë, madje as për euro nuk shkruan që është valutë zyrtare, sipas rregullës Kosova nuk do duhej ta kishte euron si valutë”, thotë ai për KosovaPress.

Ai pret që ky vendim të mos mbetet në fuqi dhe të vazhdojë me shfrytëzimin e dinarit serb si valutë.

“Do të na dëmtoj nëse mbetet në fuqi, por shpresoj që nuk do të mbetet në fuqi dhe do të mund edhe më tutje ta përdorim dinarin”, shton ai.

Edhe Kosora, një e moshuar serbe konsideron se heqja e dinarit nga përdorimi do t’i dëmtojë pensionistët.

“Natyrisht që do të na dëmtojë nëse nuk pranojmë si, nuk jemi vetëm ne në pyetje, ka të bëjë edhe me ju, edhe njerëzit e juaj i marrin pensionet nga Serbia, kjo do të ishte katastrofë për gjithë popullin, populli duhet të jetojë, ta lemë politiken… Them populli duhet të jetojë, ta ketë lirinë, liria është me e rëndësishmja në jetë, që populli të mund të jetoj. Vështirë, mund të ju them që është vështirë për rininë”, thekson ajo.

Titomir Sekuliq, i cili është banor i Graçanicës thotë se këtë e ka vendosur pushteti, për çka shprehet kritik.

“Çka të komentojë, pushteti më i fortë…Si jo do të na dëmtoj, nuk di, nuk di çka të them”, përfundon Sekuliq.

Bashkimi Evropian edhe sot ka reaguar lidhur me rregulloren e re të Bankës Qendrore të Kosovës, duke i kërkuar Kosovës që të sigurojë një periudhë mjaft të gjatë tranzicioni dhe të gjejë një zgjidhje të negociuar për këtë çështje në kuadër të dialogut.

Zëvendëskryeministri Besnik Bislimi mbrëmë ka deklaruar se do të ketë periudhë tranzitore që do të përcillet me edukim dhe informim të qytetarëve të Kosovës.

Sipas tij, partnerët ndërkombëtarë nuk e kontestojnë që euro ka qenë dhe vazhdon të jetë e vetmja valutë zyrtare në përdorim.

Qindra fluturime u anuluan në aeroportet kryesore të Gjermanisë të enjten pasi stafi i sigurisë filloi një grevë njëditore për një mosmarrëveshje të vazhdueshme mbi pagat.

Greva ndaloi më shumë se 1100 fluturime në 11 aeroporte, duke përfshirë aeroportin ndërkombëtar më të ngarkuar të vendit në Frankfurt, duke prekur më shumë se 200.000 pasagjerë.

Aeroporti i Frankfurtit tha se greva do të shkaktojë ndërprerje të mëdha dhe anulime fluturimesh gjatë gjithë ditës dhe këshilloi pasagjerët të mos vijnë në aeroport pasi pikat e kontrollit të sigurisë ishin të mbyllura.

Ndërprerje të mëdha dhe anulime fluturimesh priten gjithashtu në aeroportet Hamburg, Bremen, Hannover, Berlin, Këln/Bon, Dusseldorf, Leipzig/Halle, Dresden, Erfurt dhe Shtutgart.

Autoritetet kanë thënë se stafi i sigurisë në aeroportet e Mynihut dhe Nurembergut nuk do t’i bashkohet aksionit të grevës, megjithatë vonesat dhe anulimet e fluturimeve mund të jenë ende të mundshme, për shkak të ndërprerjeve mbarëkombëtare të operacioneve të fluturimeve.

Sindikata Ver.di kishte njoftuar grevën paralajmëruese në fillim të kësaj jave pasi raundi i tretë i negociatave kolektive me Shoqatën Federale të Kompanive të Sigurisë së Aviacionit (BDLS) nuk dha një rezultat.

Sindikata, e cila përfaqëson rreth 25.000 staf sigurie, po kërkon një rritje pagash prej 2.80 € (3.02 dollarë) në orë, rritje të bonuseve dhe tarifa më të larta për pagën jashtë orarit./AA

Sot u bënë 34 vite, nga rënia e Elfete Humollit, vajzës së re që u vra nga policia e Serbisë, teksa po protestonte për liri dhe republikë.

Kryeministri Kurti ka qenë në Lupç të Podujevës për të kujtuar vajzën llapjane që shquhej për aktivitetin e saj kombëtar.

“Më 1 shkurt 1990, Elfetja bashkë me vëllain e saj Mentorin dhe me shumë të tjerë, kishte marrë pjesë në demonstratë kundër pushtetit represiv të Serbisë pushtuese, që i shtypte shqiptarët në Kosovë, i burgoste mbi baza politike dhe i diskriminonte mbi baza etnike. Elfetja ishte 16 vjeçare, kurse Mentori 13 vjeçar. Mes shtëllungave të tymit të gazit lotsjellës, policët e Serbisë shtinë mbi protestuesit duke i plagosur Eset Kaçiun, Ismet Krasniqin dhe Avni Retkocerin, kurse Elfetja nuk u mbijetoi plagëve. Ajo vdiq aty, teksa fjalët e fundit të saj ishin: “Ku është Mentori, a ka shpëtuar?!”

Mentori kishte shpëtuar dhe e vazhdoi rrugën e të njëjtave ideale të lirisë, duke u mobilizuar në Ushtrinë Çlirimtare të Kosovës dhe duke luftuar me uniformën e saj derisa ra dëshmor më 21 maj 1999 në betejën e Koshares.

Për t’i kujtuar së bashku, Elfeten dhe Mentorin, sot bëmë homazhe të monumenti përkujtimor i ngritur në fshatin Lupç i Poshtëm, afër vendit ku kishte rënë Elfetja 34 vite më parë. Mbi një gur masiv janë gdhendur emrat e Elfete dhe Mentor Humollit, kurse poshtë tij është vendosur një krua me ujë për udhëtarët.

Me nderime u kujtofshin gjithmonë Elfete dhe Mentor Humolli, mes të rënëve për lirinë e Kosovës”, shkruan Kurti në përkujtimin e Elfete Humollit.

Një pikë e pompës së derivateve “Patroni” Sh.P.K., në pronësi të afaristit Driton Morina është mbyllur sot me vendim të Ministrisë së Bujqësisë, raporton Ekonomia Online.

Kësisoj, gjatë së enjtes, inspektorë të Ministrisë së Bujqësisë të asistuar nga Policia e Kosovës kanë vendosur shirita në prona që gjenden përballë objektit të Agjencisë Kosovare për Inteligjencë në Prishtinë.

Kjo hapësirë ishte shfrytëzuar nga një biznes privat që shërbente si pompë e derivateve dhe kishte kontratë qiramarrëse nga viti 2018.

Lirimi i kësaj hapësire bujqësore do të bëhet bazuar në një paralajmërim që Ministria e Bujqësisë i kishte bërë biznesit ‘Pompa e Derivateve Patroni’ në tetor, si dhe në dhjetor të vitit të kaluar.

Zëvendësministri i Ministrisë së Mjedisit, Planifikimit Hapësinor dhe Infrastrukturës, Hysen Durmishi, duke iu referuar seancës së djeshme ku ish-ministri Pal Lekaj u dënua me 3 vjet e gjysmë burgim, ka thënë se nuk bëhet fjalë për 53 milionë, por për 97 milionë euro.

Në llogarinë e tij në Facebook, ai ka thënë se përveç 53 milionë eurosh,” Bechtel Enka “është paguar edhe me një shumë tjetër në vlerë 44 milionë eurosh.

“Nuk bëhet fjalë për 53 milionë, por për 97 milionë euro. Përveç 53 milionë eurosh, Bechtel Enka është paguar edhe me një shumë tjetër në vlerë 44 milionë eurosh”, ka shkruar ai.

“Edhe pse kontrata ka qenë ‘llamsam’ (me çelësa në dorë) dhe me këtë lloj kontrate nuk lejohen punët shtesë, pa asnjë procedurë të prokurimit Bechtel Enka-s i janë paguar edhe 44 milionë euro shtesë”, ka shtuar Durmishi.