Author: G.O.

Kryetari i Lidhjes Demokratike të Kosovës, Lumir Abdixhiku sot ka pritur në takim ambasadorin e Belgjikës në Kosovë, Gregoire Cuvelier.

Sipas njoftimit të LDK-së në Facebook, Abdixhiku dhe ambasadori Cuvelier diskutuan rreth zhvillimeve të fundit në Kosovë, dhe qëndrimet e LDK-së karshi këtyre zhvillimeve.

Abdixhiku ka falënderuar ambasadorin Cuvelier për përkrahjen e vazhdueshme të Belgjikës ndaj Kosovës, në proceset integruese të saj.

Zëvendëskryeministri Besnik Bislimi e priti në një takim ambasadoren e Kroacisë në Kosovë, Danijela Barisiq.

Në njoftimin e lëshuar nga Zyra e Kryeministrit thuhet se Kosova dhe Kroacia gëzojnë marrëdhënie të shkëlqyeshme, të cilat u riafirmuan dhe në takimin e sotëm.

“Bashkëpunimi mes dy shteteve tona dhe intensifikimi i marrëdhënieve ishin në fokus të diskutimit të zhvilluar. Palët biseduan më tej dhe mbi zhvillimet e fundit në vend dhe rajon”.

“Zëvendëskryeministri Bislimi e falënderoi ambasadoren për takimin, bisedën dhe bashkëpunimin e frytshëm e të vazhdueshëm”, thuhet në njoftimin e qeverisë.

10 pjesëtarë të Policisë së Kosovës kanë dhënë dorëheqje gjatë muajit janar. Mbi 5600 zyrtarë policorë kanë nënshkruar peticionin e Sindikatës së Policisë së Kosovës, i cili u shqyrtua sot në mbledhjen e Komisionit për të Drejtat e Njeriut. Këshu tha kryetari i sindikatës, Imer Zeqiri, i cili shtoi se janë mbi 4700 raste të lëndimeve gjatë kryerjes së detyrës zyrtare dhe se të njëjtit kanë mbetur me invaliditet të përhershëm.

Teksa foli për kushtet e policëve, kryetari i Sindikatës së Policisë së Kosovës, Imer Zeqiri deklaroi se ka numër të madh të dorëheqjeve të pjesëtarëve. Ai lexoi edhe deklaratën e një polici që ka dhënë dorëheqje ditëve të fundit, ku theksoi se paga jo e dinjitetshme, shtesat policore e rrezikshmëria janë disa nga arsyet.

“Të gjithë ata që po japin dorëheqje vullnetare, po e dëmtojnë vet institucionin e sigurisë, për shkak se të gjithë janë profesionist të dëshmuar në punë. Parandalimi i vetëm për dorëheqje është plotësimi i kushteve dhe mirëqenies në Policinë e Kosovës. Për këtë vit nuk kemi një statistikë të saktë, kemi diku rreth 10 pjesëtarë deri më tani, për muajin janar. Unë vetëm sa për kureshtje se pse shumica e zyrtarëve policor japin dorëheqje, unë e kam një dorëheqje që është dorëheqje taman origjinale, deklaratë e policit që e ka dhënë para disa ditëve”, deklaroi ai.

Ai shtoi se kërkesë e tyre mbetet që të krijohet një fond për të gjithë policët që kanë mbetur me aftësi të kufizuara.

“Kemi prej atyre rasteve që mbi 4700 raste të lëndimeve gjatë kryerjes së detyrës zyrtare, kemi zyrtarë policorë që kanë mbetur me invaliditet të përhershëm, kanë mbetur në karrocë dhe nuk kanë mundur dhe nuk kemi një fond. Njëra ndër kërkesat që ka rrjedhur pas peticionit është edhe kjo, që të krijohet një fond për të gjithë ata që kanë mbetur me invaliditet të përhershëm. Ata realisht e marrin një pagë prej Policisë, aq ka mundësi buxheti i Policisë për t’i ndihmuar, përndryshe nuk kanë përkujdesje shtetërore”, theksoi ai.

Para anëtarëve të Komisionit për të Drejtat e Njeriut, ai u shpreh se mosha mesatare e pjesëtarëve të Policisë së Kosovës është 47 vjeç.

Ndërkaq, anëtarja e Komisionit për të Drejtat e Njeriut, Fatmire Mulhaxha-Kollçaku tha se vet policia është dashur të bëjë presion për implementimin e Ligjit për Sigurimet Shëndetësore.

“Në këtë kuvend është miratuar shumë vite më herët Ligji për Sigurimet Shëndetësore, i cili sot e kësaj dite nuk zbatohet. Presioni i parë i cili është dashur edhe policia edhe gjithë qytetarët të bëjë karshi të gjitha qeverive të deritanishme është që sa më shpejt të zbatohet Ligji për Sigurim Shëndetësor, që i takon gjithë qytetarëve. Kemi fëmijë, kemi të rritur, kemi policë, kemi ushtarë, kemi mjekë, mësues, që kanë nevojë për shërbime shëndetësore. Mirëpo, shteti duhet ta rregullojë për gjithë qytetarët në mënyrë të barabartë dhe është dashur policia të bëjë presion të jashtëzakonshëm që sa më shpejt të krijohet fondi publik dhe të zbatohet ligji. Ky është dashur të bëhet debati publik ndër vite me qenë”, deklaroi ajo.

Më tej, ajo kërkoi nga Sindikata e Policisë së Kosovës që të mos ndikohen nga partitë politike.

Për këtë, reagoi edhe kryetari Imer Zeqiri, i cili tha se asnjëherë nuk ka ndodhur një gjë e tillë.

“Asnjëherë Sindikata e Policisë së Kosovës, po e them me shumë përgjegjësi, asnjëherë nuk ka qenë e ndikuar, as nuk ka krijuar simpati për asnjë subjekt politik në Republikën e Kosovës, në Kuvendin e Kosovës. Asnjëherë nuk ka marrë direktiva as prej partisë në pushtet e as prej partive opozitare, sepse jemi të vendosur që Sindikatën e Policisë së Kosovës dhe Policinë e Kosovës ta mbajmë a-politike. Sindikata e Policisë së Kosovës është a-politike. Asnjëherë në asnjë kërkesë që e kemi adresuar dhe në asnjë prononcim që e kemi bërë para mediave nuk kemi thënë se Sindikata e Policisë është kundër qeverisë. Çdo herë edhe sot po e them, Sindikata e Policisë së Kosovës, qeverinë e llogarit si partner për dialog”, u shpreh ai.

Kurse anëtarja e Komisionit për të Drejtat e Njeriut, Ariana Musliu-Shoshi kritikoi pushtetin, ku tha se që nga vera nuk janë dëgjuar kërkesat e sindikatës.

“Se sa është pushteti i gatshëm të ju takojë, mendoj që të gjithë ata që ju dëgjojnë por edhe ju e dini. Kanë kaluar plot gjashtë muaj nga dorëzimi i kësaj kërkese edhe tek sot e kanë gjetur kohën me ju taku. Kanë kaluar dy muaj kur ne e kemi caktuar kohën të ju takojmë dhe ka qenë data 3 tetor. Ne ju kemi dëgjuar, ne e dimë çka keni për të thënë. Ne e dimë me çka përballeni ju, sepse e kemi ngritur zërin në kuvend. Ne kemi ftuar seancë të jashtëzakonshme, pozita nuk ka marrë pjesë për të diskutuar për ju, në këtë komision kemi ardhur, pozita nuk kanë gjetur kohë për të ardhur. Kemi marrë iniciativë për pensionim të parakohshëm, pozita nuk e ka votuar”, kritikoi Musliu-Shoshi.

Në mbledhjen e Komisionit për të Drejtat e Njeriut u tha se shujta ditore e një polici të Kosovës është rreth tetë euro.

Ministri i Mbrojtjes së Rumanisë, Angel Tilvar, ka përjashtuar mundësinë e kthimit të shërbimit të detyrueshëm ushtarak në Rumani në mes të diskutimeve lidhur me masat që duhet të ndërmarrë ky shtet i NATO-s në rast se lufta e Rusisë kundër Ukrainës zgjerohet.

Rumania aktualisht ka 80.000 pjesëtarë profesionistë të ushtrisë dhe një trupë të rezervistëve. Ky shtet kishte anuluar shërbimin e detyrueshëm ushtarak më 2007, tre vjet pasi iu bashkua NATO-s në mars të vitit 2004.

Shefi i ri i ushtrisë rumune, gjenerali Gheorghita Vlad, javën e kaluar deklaroi për Radion Evropa e Lirë se shtetit duhet më mënyrë urgjente të miratojë një kornizë ligjore që do t’iu mundësonte vullnetarëve civilë që të ndjekin trajnime ushtarake. Kjo deklaratë la vend për spekulime në mesin e rumunëve se do të rikthehej shërbimi i detyrueshëm ushtarak.

“Rikthimi i shërbimit të detyrueshëm ushtarak është jashtë diskutimit, të paktën gjatë mandatin tim si ministër i Mbrojtjes. Unë e kam refuzuar këtë mundësi”, tha Tilvar për Euronews. “Aktualisht nuk ka diskutime për këtë çështje”.

Megjithatë, Tilvar konfirmoi se deklarata e gjeneralit Vlad se me Ministrinë e Mbrojtjes po diskutohet një ligj që do të rregullonte një program trajnimi ushtarak për vullnetarët nga mosha 18 deri në 35 vjeç. Ky legjislacion parasheh një pagesë për ata që e përfundojnë programin.

“Një shërbim i tillë vullnetar do të përmbushte nevojat për një forcë rezerviste, pasi që çdo shtet është i shqetësuar me sigurimin e një force njerëzore për një trupë rezerviste”, tha Tilvar.

Ai tha se ushtria rumune vitin e kaluar humbi 7.000 ushtarë profesionistë për shkak ose u pensionuan ose dhanë dorëheqje.

Megjithatë, Parlamenti i Rumanisë ka pak të ngjarë të diskutojë këtë për një ligj të tillë që do të rregullonte shërbimin vullnetar pasi që shteti është paraparë të mbajë zgjedhje lokale, parlamentare dhe presidenciale.

Tilvar u bëri jehonë deklaratave të bëra nga presidenti Klaus Iohannis, dhe kryeministri Marcel Ciolacu, duke siguruar publikun se Rumania nuk po përballet me një rrezik të menjëhershëm nga ndonjë sulm, duke rikujtuar se është shtet anëtar i NATO-s.

“Por, kjo nuk do të thotë se një shtet i fortë sikurse Rumania, anëtare e aleancës më të rëndësishme në histori, nuk duhet t’iu bashkohet ushtrive të tjera që po veprojnë kështu”, tha Tilvar.

Iohannis javën e kaluar deklaroi se Rumania “kurrë nuk ka qenë më e mbrojtur se tash, si anëtare e NATO-s”, ndërkaq Ciolacu tha se “nuk ka rrezik që Rumania të përfshihet tani në ndonjë luftë. Rumania kurrë nuk ka qenë më e sigurt”.

Pas nisjes së pushtimit rus të Ukrainës në shkurt të vitit 2022, NATO rriti trupat në Evropë dhe krijoi edhe tri grupe luftarake shumëkombëshe në Bullgari, Hungari, Rumani dhe Sllovaki./REL/

Fermerët në Spanjë u janë bashkuar homologëve të tyre evropianë për nisje të protestave mbarëkombëtare.

Ata janë duke kërkuar më shumë fleksibilitet prej Bashkimit Evropian, kontrolle më të ashpra për prodhimet jashtë vendeve të BE-së, dhe më shumë ndihmë prej qeverive.

Në disa rajone spanjolle, ata i kanë bllokuar dyert dhe i kanë bllokuar motoristët.

Një protestë e madhe në qendër të Madridit është planifikuar më vonë gjatë këtij muaji.

Të martën, fermerët kanë dalë nëpër rrugë me traktorë dhe mjete tjera bujqësore, dhe duke mbajtur flamuj spanjollë nëpër duar.

“Çmimet, kur është fjala për prodhim të miellit dhe elbit janë shumë të mëdha”, ka thënë Esteban, i cili është identifikuar vetëm me mbiemër.

“Duhet të paguajmë për pleh, pesticide, naftë – na mbytën këto”.

Gjendja e vështirë e fermerëve spanjollë është komplikuar edhe më shumë për shkak të thatësisë në atë rajon.

Spanja është prodhuesja më e madhe e vajit të ullirit në botë, mirëpo çmimet janë rritur shumë, për shkak të prodhimit të vogël.

Të martën, presidentja e Komisionit Evropian, Ursula von der Leyen, ka thënë së dëshiron të kthejë mbrapsht një plan për të zvogëluar përdorimin e pesticideve, duke e përshkruar si “simbol të përçarjes”.

Kryeministri belg Alexander De Croo, e ka mirëpritur njoftimin, duke thënë se është “kyçe që fermerët të ndjekin ritmin e një bujqësie më të qëndrueshme në të ardhmen”, duke i përmendur synimet për mbrojtje të natyrës./REL/

Probleme me shpronësimin, vonesa në zbatimin e punëve si dhe plotësimin e kushteve kontraktuale janë disa nga të gjeturat e raportit të Zyrës së Auditorit për stadiumin “Adem Jashari në Mitrovicë”, atë të Gjilanit si dhe të Gjakovës.

Anëtarja e komisionit për mbikëqyrjen e financave Mirlinda Tishukaj-Sadiku duke dhënë detaje nga të gjeturat e këtij raporti ka thënë se për stadiumin “Adem Jashari” problemi kryesor ka qenë shpronësimi.

“Ministria e Kulturës, RInisë dhe Sportit nuk kishte qenë në dijeni që stadiumi olimpik ‘Adem Jashari’ në Mitrovicë nuk kishte një titullar të vetëm të pronës, për këtë arsye, stadiumi ishte ndërtuar në disa prona të cilat kryesisht i përkisnin kompanive në kuadër të ndërmarrjes ‘Trepça’. Po ashtu, Minsitria e Kulturës nuk ka aplikuar ende për leje ndërtimore sepse nuk i plotëson kriteret për t’u pajisur me një leje të tillë”, ka thënë Tishuka-Sadiku.

Parregullsi me pronën auditori ka gjetur edhe tek stadiumi i qytetit të Gjilanit, ndërsa vonesa të shumta dhe mos realizim të kontratave janë gjetjet sa i përket stadiumit të qytetit në Gjakovë.

Ministri i Kulturës, Rinisë dhe Sportit, Hajrulla Çeku ka thënë se kanë shkëputur kontrata e operatorëve për shkak se nuk i kishin kryer punimet sipas kontratave të lidhura dhe kanë nisur procedurë të re të prokurimit.

“Po e fillojmë më stadiumin e Gjilanit ku shkëputja e kontratës me operatorin që ka qenë duke i kryer punimet në koordinim me Komunën e Gjilanit është bërë para se të publikohet raporti i Zyrës Kombëtare të Auditimit…Për fat të keq, në këtë stadium ndonëse kishte kontratë për zbatimin e punimeve nuk kishte një projekt zbatues final për kategorinë 4 të këtij stadiumi…Në bashkëpunim me Ministrinë e Financave e kemi ndarë tashmë buxhetin e nevojshëm që është rreth 15 milionë uro në kornizën afatmesme të shpenzimeve…Kur jemi tek stadiumi i Gjakovës kemi insistuar shumë që operatori që e ka kontratën për ndërtimin e një pjese të stadiumit…që ajo kontratë të zbatohet por operatori ka qenë i papërgjegjshëm. Përkundër insistimeve tona, sigurimit të buxhetit…Në buxhetin e Ministrisë së Sportit në KASH janë rreth katër milionë euro të dedikuara për përfundimin e punimeve në stadiumin e Gjakovës”, ka thënë Çeku.

Ndërsa për stadiumin “Adem Jashari”, Çeku theksoi se tashmë janë kaluar të gjitha pengesat dhe se janë ndarë rreth 13 milionë euro për renovimin e tij.

“Rasti më i komplikuar, stadiumi ‘Adem Jashari’ në Mitrovicë, në prill të vitit 2022 inspektorati i ndërpret punimet se[se konstaton që ajo kontratë me një operator për renovimin e tërësishëm të atij stadiumi pa i siguruar disa kushte paraprake siç janë shpronësimet, kushtet ndërtimore, leja ndërtimore, dhe ndërkohë e kemi zbuluar se as shpenzimet e komunalive, rrymë dhe ujë nuk janë ë paguar për vite të tëra…Buxheti është i siguruar për të gjitha stadiume, duke përfshirë edhe ‘Adem Jasharin’. Tashmë jemi në vlerat 12.5 deri 13 milionë për ‘Adem Jasharin’”, ka thënë Çeku.

I pari i MKRS-së ka theksuar se kjo ministri është e gatshme të paguajë para shtesë për operatorët që kryejnë punët me kohë dhe kanë nevojë për buxhet shtesë për shkak të punimeve që mund të nevojiten.

Sekretarja për media e politikanit të burgosur rus, Aleksei Navalny, ka thënë më 6 shkurt, se kritiku i Kremlinit është dërguar në izolim pesë ditë më parë, për arsye të panjohura.

Sipas Kira Yarmyshit, Navalny do të qëndrojë në izolim për 10 ditë.

Kjo është hera e 26-të që ai i është nënshtruar masës së izolimit, prej burgosjes, tre vjet më parë.

Prej kur është burgosur, ai i ka kaluar 293 ditë në izolim.

Kjo është hera e tretë që Navalny është në izolim në burgun “Ujku polar” në rajonin rus të Arktikut, ku është transferuar në dhjetor të vitit 2023.

Navalny, i cili ka qenë afër vdekjes, pasi është helmuar me agjent të tipit Noviçok, më 2020 – për çka i fajëson operativët rusë të sigurisë se kanë vepruar në emër të presidentit rus, Vladimir Putinit – është ndaluar më 17 janar 2021, në aeroportin e Moskës, pasi ka arritur aty prej Gjermanisë, ku është trajtuar pas helmimit.

Ai është dënuar me dy vjet e gjysmë burgim për shkelje të rregullave të një dënimi me kusht.

Kremlini e ka mohuar akuzën e Navalnyt, se është përfshirë në helmimin e tij.

Akuzat për të cilat është dënuar Navlany konsiderohen gjerësisht si të motivuara politikisht.

Në mars të vitit 2022, Navalny është dënuar me nëntë vjet burgim me akuzat për përvetësim, të cilat ekipi i tij i ka konsideruar të motivuara politikisht.

Më vonë, Fondacioni Kundër Korrupsionit, në krye me Nanvalnyn, është shpallur organizatë terroriste dhe i është ndaluar veprimtaria.

Në gusht të vitit të kaluar, një gjykatë e ka dënuar Navalnyn me 10 vjet burgim, dhe e ka dërguar në një “regjim special” shumë të ashpër.

Burgu, “Ujku polar”, ku është dërguar Navalny, konsiderohet një prej burgjeve me sistemin më strikt në gjithë Rusinë./rel/

Gjykata Themelore në Prishtinë ka njoftuar se ka shtyrë ekzekutimin e vendimit të Kuvendit të Komunës së Prishtinës për këmbimin e pronës në “Prishtina e re”, me pronat në Zllatar.

Departamenti për Çështje Administrative i kësaj Gjykate e ka aprovuar si të bazuar kërkesën e Institutit të Kosovës për Drejtësi (IKD), ashtu që ka vendosur që të shtyhet ekzekutimi i vendimit të Kuvendit të Komunës së Prishtinës për këmbimin e pronës së kësaj Komune në “Prishtina e re”.

Duke aprovuar kërkesën e IKD për shtyrje të ekzekutimit të vendimit, Gjykata vendosi se ky vendim nuk do të ekzekutohet, deri në momentin kur Gjykata të vendosë mbi meritat e këtij rasti.

Më 25 janar 2024, IKD ka parashtruar padi, me kërkesë për shtyrjen e ekzekutimit të vendimit, ndaj vendimit të Kuvendit të Komunës së Prishtinës nr. 01-20/04-236518/23, i datës 26.12.2023, për këmbimin e pronës komunale, konkretisht parcelës kadastrale, nr. 01998-1, me sipërfaqe të përgjithshme 208318 m2 (Zona Kadastrale në Çagllavicë), dhe kalimin e kësaj prone në pronësi të Rrahman Haradinit dhe Shaban Konxhelit, me pronën, konkretisht parcelat kadastrale, nr. 00578-4, me sipërfaqe 3426 m2 (Zona Kadastrale Zllatar), me pronar Rrahman Haradinit dhe Shaban Konxhelit dhe kalimn e kësaj prone në pronësi të Komunës së Prishtinës.

Gjykata gjeti se me propozimin për shtyerjen e ekzekutimit të vendimit, IKD ka ofruar argumente të besueshme se në rastin konkret janë përmbushur në tërësi dhe në mënyrë kumulative të gjitha kushtet për shtyrjen e ekzekutimit të vendimit të Kuvendit Komunal të Komunës së Prishtinës, ashtu që ekzekutimi i këtij vendimi do të sjellte dëm vështirë të riparueshëm. Tutje, Gjykata vlerësoi se shtyrja e ekzekutimit të këtij vendimi nuk është në kundërshtim me interesin publik dhe as nuk i sjell dëm të madh palës kundërshtare apo personit të interesuar. Përkundrazi, Gjykata gjeti se pikërisht shtyrja e ekzekutimit të vendimit paraqet interes publik.

Kështu, Gjykata gjeti se IKD ka argumentuar mjaftueshëm përmbushjen e kushteve ligjore për aprovimin e kërkesës për shtyrjen e ekzekutimit të vendimit, derisa Gjykata të vendosë përfundimisht lidhur me ligjshmërinë e vendimit të kontestuar përkitazi me padinë e IKD.

Më 20 janar 2024, IKD kishte reaguar ndaj vendimit të Kuvendit të Komunës së Prishtinës për këmbimin e pronës së kësaj Komune në “Prishtina e re”, me pronat në Zllatar, duke e cilësuar këtë vendim si të kundërligjshëm.