ATV

Author: G.O.

  • Jamie Shea: Nuk do të ketë luftë në Kosovë, Kryeministri Kurti të tregojë se është partner i besueshëm i ShBA-së dhe BE-së

    Jamie Shea: Nuk do të ketë luftë në Kosovë, Kryeministri Kurti të tregojë se është partner i besueshëm i ShBA-së dhe BE-së

    Ish-zëdhënësi i NATO-s, gjatë luftës në Kosovë, Jamie Shea ka siguruar të gjithë se nuk do të ketë luftë në Kosovë.

    Pavarësisht se inteligjenca lëshoi paralajmërimin për një rrezik të lartë për konflikte ndëretnike në Ballkanin Perëndimor, Shea mendon se nuk duhet dramatizuar situata.
    “Nuk shoh perspektivë për një luftë mes Serbisë dhe Kosovës. Por ka tensione, sigurisht, dhe kjo është një nga arsyet pse NATO dërgoi forca shtesë në KFOR vitin e kaluar, si para incidentit në Banjskë, ashtu edhe pas incidentit në Banjskë, për t’u siguruar që ka mjaft ushtarë të NATO-s në Kosovë, përfshirë këtu në veri, për të parandaluar çdo lloj agresioni, për të parandaluar çdo lloj sulmi. Pra NATO është shumë vigjilente”, ka thënë Shea.

    Ai pohon se situata është e tensionuar, por sipas tij NATO është plotësisht e mobilizuar.

    “Kështu është edhe BE-ja, për të menaxhuar krizat, për të parandaluar incidentet, për të ulur tensionet dhe mbi të gjitha, për të rikthyer në shina dialogun politik me Beogradin dhe Prishtinën”.

    Për ta arritur këtë, sipas Sheas është e rëndësishme që kryeministri i Kosovës Albin Kurti ta dëshmojë se është partner i besueshëm i SHBA-së e BE-së, ashtu siç ishin qeveritë e kaluara.

    “Është shumë e rëndësishme që kryeministri Kurti të tregojë se ai është gjithashtu një partner i besueshëm përballë Shteteve të Bashkuara dhe ndaj Bashkimit Europian. Ajo që ka qenë e suksesshme në të kaluarën është se qeveria e Kosovës ka punuar shumë, shumë ngushtë me miqtë e saj të mëdhenj në BE, në NATO, me Shtetet e Bashkuara, me vendin tim, Britaninë e Madhe. Ne kemi qenë partnerë të mirë dhe duhet ta ruajmë këtë partneritet edhe në vazhdim”, tha Shea për A2cnn.

  • Kaplohet nga zjarri një veturë me targa të huaja në autostradë

    Kaplohet nga zjarri një veturë me targa të huaja në autostradë

    Një veturë me targa të huaja është raportuar se është djegur tërësisht në autostradën në Obiliq.

    Sipas të dhënave, përveç dëmeve materiale nuk ka të lënduar.

    Njoftimi i plotë:“Obiliq / 25.03.2024 – 21:15. Ankuesi mashkull kosovar ka raportuar se derisa ka qenë në lëvizje në autostradë, vetura e tij me targa të huaja papritmas është kapluar nga zjarri dhe më pas është djegur tërësisht. Në vendin e ngjarjes përveç njësive policore kanë dalë edhe zjarrfikësit. Perveq dëmeve materiale nuk eshte raportuar per te lenduar. Lidhur me rastin është njoftuar prokurori, rasti procedohet ne procedure te rregullt”.

  • Kosova përballet sonte me Hungarinë në Budapest

    Kosova përballet sonte me Hungarinë në Budapest

    Kombëtarja e Kosovës dhe përzgjedhësi i ri, Franco Foda, do të kenë një test të vërtetë sonte, kur do të takohen me Hungarinë në një ndeshje miqësore.

    Kjo ndeshje do të zhvillohet në “Puskas Arena” të Budapestit, me fillim prej orës 19:00.

    Kosova hyn në këtë ndeshje pas fitores minimale në miqësoren ndaj Armenisë. Me rezultat të njëjtë, por si vendase, fitoi edhe Hungaria ndaj Turqisë.

    Përveç Leart Paçaradës, i cili është në dyshim shkaku i një lëndimi, Foda do të ketë në dispozicion të gjithë lojtarët tjerë.

    Lajm i mirë padyshim se është riaftësimi i kapitenit, Amir Rrahmani, i cili mungoi ndaj Armenisë.

    Trajneri gjerman i Kosovës në konferencën për media dje theksoi se Kosova nuk do ta ketë aspak të lehtë ndaj një kundërshtari të fortë si Hungaria, por shtoi se ka besim te grupi.

    “Nuk do të jetë e lehtë, pasi luajmë kundër një ekipi shumë të fortë. Ne zhvilluam ndeshje të mirë ndaj Armenisë. Kemi ekip që ka aftësi teknike, por përballja ndaj Hungarisë do të jetë e vështirë, që udhëhiqet nga një trajner që ka treguar paraqitje të mira siç është Marco Rossi. Sidoqoftë, ne mbesim skuadër e fortë dhe kemi besim te grupi ynë. Ndeshja me Hungarinë ishte aranzhuar para se unë të bëhesha trajner i Kosovës. Por, ne duhet të përballemi ndaj kundërshtarëve të tillë, pasi është niveli ku ne synojmë të arrijmë dhe të luajmë në të ardhmen. Ne do të luajmë me besim përballë Hungarisë”, ishte shprehur Foda të hënën.

    Në konferencën para gazetarëve në Budapest ishte paraqitur edhe Amir Rrahmani, i cili vuri në pah rëndësinë që Kosova të testojë veten me kundërshtarë si Hungaria.

    “Ndeshja ka rëndësi sepse është në kuadër të përgatitjeve për ndeshjet e Ligës së Kombeve në shtator. Duhet të shohim se çka kërkon trajneri dhe të ndjekim planin e idetë e tij. Na duhet kjo ndeshje, pasi luajmë kundër një kundërshtari shumë të fortë me lojtarë që luajnë në klube të forta evropiane. Shpresoj të paraqesim në fushë atë që kërkon trajneri. Trajneri ka kërkuar nga ne që të fitojmë topin sa më afër golit të kundërshtarit në mënyrë që të kemi sa më shumë të shënimit”, deklaroi Rrahmani.

    Vlen të theksohet se interesimi për ta ndjekur këtë ndeshje është shumë i madh dhe kjo dëshmohet më së miri me faktin se të gjitha biletat janë shitur.

    “Puskas Arena” ka kapacitet prej 67 mijë e 215 ulëseve.

  • Gjendet e vdekur një grua në Rahovec, Policia nis hetimet

    Gjendet e vdekur një grua në Rahovec, Policia nis hetimet

    Një grua është gjetur e vdekur dje në Rahovec.

    Policia njoftoi se vdekjen e viktimës e ka konstatuar ekipi mjekësor trupi i pajetë, derisa trupi i pajetë është dërguar në Institutin e Mjekësisë Ligjore, për obduksion.

    Tutje, në raport thuhet se Policia ka nisur hetimet për rastin.

  • Shahini: 400 biznese janë mbyllë për tre muaj

    Shahini: 400 biznese janë mbyllë për tre muaj

    Kryetari i Aleancës Kosovare të Bizneseve (AKB), Agim Shahini, thotë për Ekonomia Online se brenda tre muajve, në Kosovë janë shuar afër 400 kompani dhe se kjo po bëhet për shkak të borxheve e konkurrencës jo ferr.

    Këtë fakt, Shahini e sheh shqetësuese, teksa pret veprime institucionale.

    “Është shqetësim për vendin, po flasim aktualisht për tre muajt e fundit ku mesatarisht janë mbyllur rreth 400 kompani e që këto kompani kryesisht janë mbyllur për shkaqe të problemeve të njëpasnjëshme që kanë pas për shkak të humbjes së fuqisë në treg të borxheve dhe të konkurrencës jo ferr”, thotë Shahini.

    “Prandaj shuarja e bizneseve nuk mund të jetë vullnetare përderisa ata nuk kanë arritur objektivat e veta. Asnjë biznes nuk mbyllet vullnetarisht që i ka punët mirë por që i ka punët keq dhe kjo e bën që Kosova të mos jetë një vend atraktiv për bizneset e reja por edhe bizneset me traditë janë duke shkuar drejt falimentimit për arsye të ndryshme të goditjeve të njëpasnjëshme që vijnë në biznes”, shtoi ai.

    Mundësitë e reja zhvillimore ato të investimit si dhe mbështetëse janë tre faktorë tejet të rëndësishëm për tu zhvilluar një biznes, thotë Shahini.

    Shahini numëron edhe ngarkesat që bizneset i kanë në vend, përfshirë ato tatimore e infrastrukturore.

    “Qeveria e vendit duhet të bëjë edhe më shumë, për të krijuar mundësi të reja zhvillimore, mundësi të reja investuese dhe mbështetëse duke i pasur këta tre faktorë të rëndësishëm për të mbajt aktiv ekonominë e vendit. Bizneset janë tepër të angazhuar dhe të bëjë gjithçka që ata të mos mbyllen, por në fund vjen momenti kur edhe mund të dorëzohen dhe nuk mund t’i përballen qoftë ngarkesave të njëpasnjëshme duke përfshirë këtu ngarkesat e larta tatimore, ato të larta të interesit bankar, infrastruktura shpesh e bën ajo fizike që disa biznese mund të mbyllen edhe për këtë çështje po ashtu për humbje të fuqisë konkurruese, humbja e tregjeve dhe mungesa e punëtorëve që kohët e fundit një fenomen po bëhet i zakonshëm”, thotë ai.

    Shahini kërkon që termi “bizneset po mbyllen vullnetarisht” të mos përdoret, pasi siç thekson ai, askush “nuk shkon te shtëpia me prit ndonjë ndihmë sociale”.

    “Bizneset zakonisht pas përfundimit të dorëzimit dhe aktivitetit të vetë ekonomik para konkurrencës, para fuqisë konkurruese ata mund të fillojnë procedurat për mbylljen e bizneseve dhe atyre askush nuk shkon me e mbyll biznesin por ata në mënyrë vullnetare që duhet ta përmbyllin procesin por vullnetarisht ata nuk e kanë mbyll punën e vetë, biznesin dhe aktivitetin e vetë”.

    “Nuk duhet përdoret termi ‘vullnetar’, për arsye se vullnetarisht ata i kanë hap bizneset por ka ardhur momenti kur ata edhe duhet të dorëzohen në mënyrë ligjore të paraqesin ç’regjistrimin e biznesit dhe të shikojnë të gjejnë alternativa tjera për tu punësuar ata njerëz ose për të krijuar ndonjë mundësi tjetër ose largim nga vendi ose të gjejnë mundësi tjetër të bashkojnë kapitalin e vetë në ndonjë biznes tjetër apo ndonjë individ tjetër por prape së prape askush vullnetarisht nuk e mbyll biznesin e vetë dhe askush nuk shkon te shtëpia me prit ndonjë ndihmë sociale përderisa ai është i aftë për punë”, thotë Shahini.

  • ​25 vjet nga masakra në familjen Berisha në Suharekë

    ​25 vjet nga masakra në familjen Berisha në Suharekë

    25 vjet më parë, forcat serbe, fillimisht kishin shtënë me armë zjarri në drejtim të rreth 50 anëtarëve të familjes Berisha, e më pas viktimat e të plagosurit i kishin bartur në një kafiteri, ku i kishin gjuajtur me bomba, për t’u siguruar se askush s’do të mbijetojë.

    E tëra nisi kur te shtëpitë e kësaj familjeje, që nuk gjendet më larg se 100 metra nga stacioni policor i Suharekës, do të shfaqeshin paramilitarët serbë, që disa do t’i vrisnin në pragun e shtëpisë e të tjerët do t’i dëbonin nga shtëpia e tyre, duke i dërguar në lokalin kafiteri, ku edhe do të ndodhte masakra.

    Nga kjo masakër kanë mbijetuar tre anëtarë të familjes, Vjollca Berisha me të birin, Gramozin dhe Shyhrete Berisha. Këta të tre gjatë transportit të viktimave të drejt Prizrenit, kanë kërcyer nga kamioni që ishte në lëvizje për të shpëtuar. Sipas rrëfimeve të Vjollca Berishës, në kamionin kishte edhe të tjerë që ishin gjallë, por të plagosur.

    Para pak vjetësh disa prej anëtarëve janë gjetur dhe janë varrosur eshtrat e Bujar Berishës, Faton Berishës, Nexhat Berishës dhe Arta Berishës, nën nderimet ushtarake. Por, ende nuk janë gjetur të gjithë anëtarët e familjes Berisha.

  • Sot fillon punimet takimi i 11-të i Komisionit Parlamentar për Stabilizim-Asociim

    Sot fillon punimet takimi i 11-të i Komisionit Parlamentar për Stabilizim-Asociim

    Takimi i 11-të i Komisionit Parlamentar për Stabilizim Asociim BE-Kosovë do të mbahet sot e nesër në mjediset e Kuvendit të Kosovës.

    Sipas njoftimit nga Kuvendi, hapja do të bëhet nga Mimoza Kusari-Lila dhe Lukas Mandl, bashkëkryesues të Komisionit Parlamentar për Stabilizim-Asociim BE-Kosovë.

    Në vazhdim, pikëpamjet e tyre mbi gjendjen e marrëdhënieve BE-Kosovë, do t’i paraqesin: Glauk Konjufca, kryetar i Kuvendit; Besnik Bislimi, zëvendëskryeministër i Parë për Integrim Evropian, Zhvillim dhe Dialog; Nenad Rashiq, ministër për Komunitete dhe Kthim; AnnaCarin Platon, shefe e Sektorit Politik, Ekonomik për Integrim Evropian, në emër të Përfaqësuesit të Lartë të Bashkimit për Punë të Jashtme dhe Politikës së Sigurisë dhe në emër të Komisionit Evropian.

  • Sot përkujtohet masakra e Krushës së Madhe, e pranishme presidentja Osmani

    Sot përkujtohet masakra e Krushës së Madhe, e pranishme presidentja Osmani

    Në Krushë të Madhe përkujtohet maskara e ndodhur 25 vjet më parë.

    Në tubimin përkujtimor dhe kujtim dhe nderim të të rënëve e pranishme do të jetë edhe presidentja, Vjosa Osmani.

    “Në orën 11:00, Presidentja e Republikës së Kosovës, Vjosa Osmani merr pjesë në tubimin përkujtimor në 25 vjetorin e masakrës në Krushë të Madhe. Presidentja Osmani, gjithashtu do të marrë pjesë edhe në Përurimin e Muzeut të Masakrës së Krushës së Madhe”, thuhet në njoftimin e Presidencës.

    25 vjet nga masakra në Krushë të Madhe

  • Gërvalla pas dështimit të kërkesës ruse në OKB: Rusia ngeli e vetme në përpjekje për ta shtrembëruar të vërtetën

    Gërvalla pas dështimit të kërkesës ruse në OKB: Rusia ngeli e vetme në përpjekje për ta shtrembëruar të vërtetën

    Ministrja e Punëve të Jashtme, Donika Gërvalla, ka thënë se Rusia ka ngelur e vetme në përpjekjen e saj për ta shtrembëruar të vërtetën, pasi i dështoi thirrja për seancë të jashtëzakonshme të Këshillit të Sigurimit të Organizatës së Kombeve të Bashkuara për Kosovën.

    Një ditë më parë, vetëm tre anëtarë votuan pro mbajtjes së seancës në lidhje me 25-vjetorin e bombardimeve të NATO-s ndaj caqeve serbe.

    Ministrja Gërvalla të hënën në mbrëmje ka thënë se Kosova ka qenë e gatshme për të paraqitur faktet rreth krimeve të Serbisë. Ajo ka falënderuar shtetet partnere të Kosovës.

    “Të gatshme për të paraqitur para anëtarëve të Këshillit të Sigurimit faktet rreth krimeve gjenocidale të Serbisë ndaj popullatës civile në Kosovë, përshëndetëm megjithatë unitetin e partnerëve, miqve dhe aleatëve tanë për moslejimin e mbajtjes së kësaj seance propagandistike. Rusia mbeti e vetme në përpjekjet e saj të rrezikshme për ta shfrytëzuar Këshillin e Sigurimit për të shtrembëruar të vërtetën. Me vetëm 3 vota pro (mes tyre Federata Ruse) dhe 13 abstenime, iniciativa e Rusisë nuk kaloi. Qindra masakra të tmerrshme që Serbia bëri në Kosovë, vrasja mizore e 1432 fëmijëve, përdhunimi i mijërave grave, vajzave, burrave dhe fëmijëve, zhdukja e viktimave të luftës dhe shkatërrimi i pasurisë së Kosovës ishin dhe mbeten fakt”, ka shkruar ajo në Facebook teksa ka njoftuar se në KS të OKB-së ka qenë me ish-deputeten dhe aktivisten, Vasfije Krasniqi-Goodman, si e dërguar e posaçme e Presidencës për çështje të të mbijetuarve të dhunës seksuale gjatë luftës.

    Gërvalla ka vazhduar tutje duke thënë se për 25 vjet të pasluftës Kosova ka avancuar në demokraci, sundim të ligjit e respektim të të drejtave të njeriut, ndërkohë që “Serbia dhe Rusia kanë mbetur në të kaluarën e tyre të errët, që fatkeqësisht po i përcjell edhe sot dhe që po i çon drejt izolimit”.

    Këshilli i Sigurimit hedh poshtë kërkesën e Rusisë për seancë të jashtëzakonshme kundër ndërhyrjes së NATO-s në Kosovë

  • Trump fiton betejën me gjykatën: E respektoj vendimin, do të paguajë 175 milionë dollarë

    Trump fiton betejën me gjykatën: E respektoj vendimin, do të paguajë 175 milionë dollarë

    Ish-presidenti Amerikan, Donald Trump fitoi betejën me gjykatën e Lartë të Nju-Jorkut kundër sekuestrimit të aseteve të tij pasurore.

    Sipas vendimit të Gjykatës së Apelit, Donald Trump do të duhet të paguajë një shumë prej 175 milionë dollarë brenda 10 ditëve.

    Në këtë mënyrë, organet ligjzbatuese do të pezullojnë akuzat për mashtrim fiskal në shumën prej 454 milionë dollarësh.

    Vendimi i hap rrugën Trump për të kandiduar i pashqetësuar në zgjedhjet e nëntorit në SHBA.

    “Gjyqtari i Gjykatës së Lartë të Manhatanit, Arthur Engoron i ka bërë një dëm të tmerrshëm shtetit të Nju Jorkut. Bizneset po ikin dhe krimi po lulëzon në të gjithë shtetin dhe ajo që ai ka bërë është një shërbim kaq i keq dhe nuk duhet lejuar të ndodhë më kurrë. Unë e respektoj shumë vendimin e divizionit të apelit dhe do të jap ose 175 milionë dollarë në para, obligacione ose garanci ose çfarëdo që është e nevojshme, shumë shpejt brenda dhjetë ditëve”, tha Trump.

    Zyra e Prokurores së Përgjithshëm të Nju Jorkut, Letitia James, e cila po trajton çështjen, tha se Trump “është duke u përballur me përgjegjësinë për mashtrim”.

    Trump ka luftuar për të mbledhur para si për fushatën e tij ashtu edhe për shpenzimet e tij ligjore.

    Ai është deklaruar i pafajshëm në rastet penale dhe ka mohuar të ketë kryer shkelje ligjore për rastet e përmendura ndaj tij.

    Në çështjen civile të Nju Jorkut, Trump u gjet përgjegjës për mashtrim me pasurinë e tij në miliarda dollarë për të siguruar kushte më të mira kredie dhe sigurimi.

    Gjyqtari Arthur Engoron zbuloi se Trump ishte përfshirë në mashtrim duke mbivlerësuar pronat, duke përfshirë edhe pronën e tij Mar-a-Lago në Florida, apartamentin e tij në Kullën Trump të Manhatanit dhe ndërtesa të ndryshme zyrash dhe fusha golfi.

    Gjyqi u fokusua kryesisht në atë se sa duhet të paguajë Trump në gjoba.