Author: G.O.

Në Kuvendin e Kosovës sot do të mbahen mbledhjet e gjashtë komisioneve parlamentare, ndër to edhe ajo e Komisionit për Çështje të Sigurisë dhe Mbrojtjes dhe e Komisionit për Mbikëqyrjen e Financave Publike dhe katra të tjera.

Komisioni për Shëndetësi dhe Mirëqenie Sociale, sot në ora 10:00 mbanë mbledhjen e radhës, në rend dite ka edhe takimin me shoqatën e logopedëve dhe takimin me shoqatën e ergoterapistëve.

Ndërsa, Komisioni për Çështje të Sigurisë dhe Mbrojtjes, fillon mbledhjen në ora 11:00. Në rend është edhe takimi i Komisionit me kursantët e Kursit të Lartë për Siguri dhe Mbrojtje të Shqipërisë.

Mbledhje, në ora 11:00 ka edhe Komisioni për Arsim, Shkencë, Teknologji, Inovacion, Kulturё, Rini dhe Sport i cili në rend dite ka edhe një takim me Komisionin për Edukim dhe Mjetet e Informimit Publik nga Kuvendi i Republikës së Shqipërisë.

Komisioni për Mbikëqyrjen e Financave Publike, gjithashtu fillon mbledhjen në ora 11:00 dhe në rend dite ka edhe shqyrtimin e Raportit të auditimit të teknologjisë së informacionit “Sistemi elektronik i prokurimit publik e-prokurimi“.

Mbledhje kanë edhe Komisioni për Mjedis, Ushqim, Bujqësi, Planifikim dhe Zhvillim si dhe Komisioni për Punë të Jashtme dhe Diasporë i cili do të ketë një takim me Bertrand Bouyx, Kryetar i Komisionit për Çështje Politike dhe Demokraci në Asamblenë Parlamentare të Këshillit të Evropës.

Kryeministri i Malit të Zi, Milojko Spajiq, ka komentuar votën e një deputeteje të këtij shteti kundër anëtarësimit të Kosovës në Këshillin e Evropës.

Spajiq tha se në Këshillin e Ministrave do të mund të shihni qëndrimin zyrtar të shtetit të Malit të Zi.

“Unë mendoj se ishte një votim i fshehtë dhe nuk ishte as votim, ishte një diskutim për këtë temë. Votimi i vërtetë do të bëhet në prill, kur do të kemi një seancë plenare dhe kur do të kemi një këshill ministror, ​​kur do të mund të shihni qëndrimin zyrtar të shtetit të Malit të Zi”, tha Spajiq para gazetarëve.

Gjatë ditës së djeshme, Ministrja për Çështje Evropiane e Malit të Zi, Maida Gorçeviq gjatë qëndrimit në Prishtinë, tha se Mali i Zi në Këshillin Ministror, në maj do ta përkrahë Kosovën për anëtarësim në KiE dhe do t’ia japë përkrahjen Kosovës për të gjitha çështjet që kanë të bëjnë në fushën e integrimeve evropiane.

“Unë e kuptoj interesimin e mediave në lidhje me votimin nga një deputeteje, por shumica parlamentare në Këshillin e Evropës, ashtu siç tha edhe zoti Bislimi votimi i disa deputetëve në Këshillin e Evropës nuk do të thotë se është qëndrim i Qeverisë së Malit të Zi…Dua të nënvizoj se Mali i Zi në Këshillin Ministror në Maj do ta përkrahë Kosovën për anëtarësim në KiE dhe do t’ia japë përkrahjen Kosovës për të gjitha çështjet që kanë të bëjnë në fushën e integrimeve evropiane”, tha ministrja malazeze.

Më 27 mars, Maja Vukiqeviq, kryetare e delegacionit malazias në Komitetin për Politikë dhe Demokraci në Asamblenë Parlamentare të Këshillit të Evropës (PACE), votoi kundër propozimit që Kosova të bëhet anëtare e Këshillit të Evropës.

Republika e Kosovës të mërkurën e ka kaluar me sukses votimin në Komitetin e Asamblesë Parlamentare të Këshillit të Evropës.

Me 31 vota për, 4 kundër dhe 1 abstenim, Komisioni për Çështje Politike e ka miratuar opinionin e raportueses për Kosovën, Dora Bakoyannis, e cila e rekomandon Këshillin e Evropës që ta ftojë Kosovën për t’u bërë anëtare.

Pas këtij votimi në Strasburg, çështja procedon në Asamblenë Parlamentare më 18 prill dhe nëse merr miratimin edhe në këtë institucion, atëherë fjalën përfundimtare për anëtarësimin e Kosovës duhet ta japë Këshilli i Ministrave të Këshillit të Evropës gjatë një mbledhjeje që do të mbajë në muajin maj.

Kosova ka aplikuar në majin e vitit 2022 për anëtarësim në Këshillin e Evropës.

Anëtarësimi i Prishtinës është riaktualizuar në javët e fundit, pasi, me kërkesën e Qeverisë së Kosovës drejtuar Agjencisë Kadastrale për transferimin e 24 hektarëve tokë në emër të Manastirit të Deçanit, është përmbushur njëri nga kushtet kryesore për anëtarësim.

Gjykata Themelore në Prishtinë ka caktuar masën një muaj paraburgim ndaj të pandehurit L.H., për shkak të dyshimit se në bashkëkryerje me të pandehurit K.G. dhe B.K., të cilët gjenden në arrati, kanë kryer veprën penale vrasje e rëndë në “Kolovicë” të Prishtinës.

Gjyqtari i procedurës paraprake ka thënë se masa e paraburgimit është caktuar në harmoni ligjin. Kundër këtij aktvendimi, palët e pakënaqura kanë të drejtë ankese në Gjykatën e Apelit, përmes Gjykatës Themelore në Prishtinë.

Në lagjen “Kolovicë” të Prishtinës më 26 mars vdiq Egzon Haliti nga Podujeva (30), pas plagëve të marra nga të shtënat me armë zjarri.

Nga të shtënat është plagosur edhe një kalimtare e rastit Zejnie Gashi (48), e cila ndërroi jetë të mërkurën në QKUK. Prokuroria bëri të ditur se janë të plagosur edhe dy persona tjerë.

Pesë persona kanë mbetur të plagosur pas përplasjes së dy automjeteve në rrugën e Kombit, mes të cilëve dy fëmijë.

Raportohet se aksidenti i rëndë ndodhi rreth orës 13:00 të së shtunës në afërsi të Milotit, ku u përplasën me njëra-tjetrën një automjet tip ‘Golf 6’ dhe një fuoristradë tip ‘Benz’.

Nga aksidenti mbetën të plagosur drejtuesi dhe pasagjerët në Golf-in, pjesëtarë të së njëjtës familje nga Kosova.

Ata u dërguan me urgjencë për ndihmë mjekësore në Spitalin e Traumës në Tiranë, ku ndodhen nën kujdesin e bluzave të bardha, ndërsa drejtuesi i fuoristrafës, që udhëtonte i vetëm, mori lëndime të lehta.

Nga aksidenti u bllokua për disa minuta rruga e Kombit. Nga të dhënat paraprake të policisë, bëhet e ditur se shkak për përplasjen e fortë është bërë parakalimi i gabuar i Golf-it, drejtuesi i të cilit humbi kontrollin e mjetit.

Autoritetet në veri të Holandës kanë njoftuar se ka përfunduar paqësisht pengmarrja e disa personave të shtunën, më 30 mars. Policia ka tha se ka arrestuar të dyshuarin, i cili po mbante një maskë, në momentin tentoi të dilte nga ndërtesa e rrethuar nga zyrtarët policorë.

“Të gjitha pengjet janë liruar. Një person është arrestuar. Nuk mund të ndajmë informacione të tjera për momentin”, u tha në deklaratën e policisë.

Disa persona, përfshirë punonjës të kafes Petticoat në qytetin Ede u morën peng mëngjesin e së shtunës.

Motivi është i paqartë, por policia paraprakisht deklaroi se nuk ka tregues se ngjarja ka motive terroriste.

I dyshuari doli nga kafeneja, vendosi duart prapa kokës së tij, u gjunjëzua para se të prangosej nga policia.

Njësitë kundër mjeteve plasëse kishin dalë në afërsi të ndërtesës që gjendet në qendër të qytetit.

Rrugët afër zonës u evakuuan dhe trenat ndalën shërbimet.

Ede gjendet rreth 80 kilometra larg Amsterdamit.

Gazeta kombëtare de Telegraaf kishte raportuar, duke u thirrur në disa burime anonime, se personi që mori pengjet kishte qenë i armatosur dhe po bartte mjete plasëse./REL/