Author: G.O.

Të enjten në Bruksel pritet që të zhvillohet takimi i radhës drejt gjetjes së një zgjidhjeje për çështjen e dinarit në mes të kryenegociatorëve, Besnik Bislimit dhe Petar Petkoviqit.

Në lidhje me këtë takim nga Bashkimi Evropian kanë thënë se çështja e dinarit do të jetë tema kryesore e bisedimeve dhe jo ajo e Asociacionit.

Megjithatë sipas zëdhënësit të BE-së, Peter Stano Asociacioni si çështje është prezent në secilin takim dhe se Kosova e ka obligim që ta formojë.

“Krijimi i Asociacionit të Komunave me shumicë serbe është një obligim tash e një kohë për Kosovën, kështu që duhet të përmbushet urgjentisht. Kjo është përsëritur disa herë nga Bashkimi Evropian, në nivelin më të lartë, atë të liderëve evropianë. Kështu që nëse Kosova nuk arrin që ta përmbush këtë, atëherë kjo nuk do të jetë shenjë pozitive e vullnetit për të ecur drejt normalizimit, që tani është i lidhur me rrugën e Kosovës drejt anëtarësimit.  Kjo është e para. Tjetra është që takimi i kryenegociatorëve këtë të enjte, është e përqendruar në çështje të tjera, që janë diskutuar edhe në javën e kaluar dhe atë paraprake në Bruksel, për të gjetur një zgjidhje kryesisht për çështjen, implikimet ose pasojat e vendimit të BQK-së për përdorimin e dinarit. Pra, Asociacioni si i tillë nuk është një prej temave kryesore por si çështje është prezente në secilin takim, dhe të gjitha ndërveprimet tona me partnerët në Kosovë, pasi që është një prej kushteve që urgjentisht duhet përmbushur sa më shpejt, pa vonesa të tjera”, ka thënë Stano.

Ndryshe, i dërguari i Bashkimit Evropian për dialogun Kosovë-Serbi, Miroslav Lajçak, dje ka thënë se në takimin e kësaj jave mes palëve në Bruksel pret të gjendet një zgjidhje për çështjen e Rregullores së Bankës Qendrore të Kosovës (BQK).

Një grup i bamirësisë ka thënë të martën se ushtria izraelite kreu një sulm ajror ndaj punëtorëve të tij në Gazë, duke i vrarë së paku shtatë persona, përfshirë disa të huaj.

Kuzhina Qendrore Botërore, një grup i bamirësisë i themeluar nga kuzhinieri i famshëm Jose Andres, tha të martën se shtatë punëtorët e vrarë janë nga vende si, Australia, Polonia, Britania e Madhe, si dhe një me shtetësi amerikano-kanadeze.

Ky grup tha se do ta pezullojë menjëherë punën në këtë rajon.

Sipas tij, punëtorët ishin duke i shpërndarë ndihmat e nevojshme ushqimore që kishin mbërritur në Gazë përmes detit të hënën, kur u goditën në mbrëmje.

Izraeli ka thënë se është duke e hetuar këtë incident.

Ushtria izraelite shprehu “pikëllim të sinqertë” për vdekjen e punëtorëve, por nuk e pranoi përgjegjësinë.

Vende të ndryshme, përfshirë Shtetet e Bashkuara, kanë filluar këtë muaj të dërgojnë ndihma humanitare edhe përmes detit në Gazën e rrënuar nga lufta.

Kombet e Bashkuara dhe partnerët kanë paralajmëruar se uria mund të prek pjesën e shkatërruar, të izoluar të veriut të Gazës gjatë këtij muaji.

Zyrtarët humanitarë kanë thënë se dërgesat nga deti dhe ajri nuk janë të mjaftueshme dhe se Izraeli duhet të lejojë që më shumë ndihmë të hyjë përmes rrugëve tokësore.

Një gjykatë e lartë e OKB-së ka urdhëruar Izraelin që të hapë më shumë pikëkalime tokësore dhe të ndërmarrë masa për të adresuar krizën humanitare.

Lufta në Gazë nisi pasi Hamasi – grupi palestinez i shpallur organizatë terroriste nga Shtetet e Bashkuara dhe Bashkimi Evropian – sulmoi jugun e Izraelit, duke vrarë 1.200 civilë dhe duke rrëmbyer 250 të tjerë.

Sulmet ajrore dhe tokësore izraelite kanë lënë të vrarë më shumë se 33.000 palestinezë, sipas autoriteteve lokale në Rripin e Gazës.

Luftimet kanë detyruar mbi 80 për qind të popullsisë së Gazës të zhvendoset dhe qindra mijëra janë buzë urisë, kanë thënë Kombet e Bashkuara dhe agjencitë ndërkombëtare të ndihmës./REL/

Qeveria e Kosovës ka hapur thirrjen për ndihmë financiare për nxënësit dhe familjet në nevojë në Luginën e Preshevës.

Kjo thirrje është hapur për t’i ndihmuar fëmijët pa asnjë prind ose ata që kanë vetëm një prind, si dhe për familjet me 3 ose më shumë fëmijë në procesin edukativo-arsimor.

Kështu ka bërë të ditur këshilltarja politike e Kryeministrit për Preshevë, Medvegjë dhe Bujanovc, Ardita Sinani.

“Qeveria e Republikës së Kosovës, përmes Këshillit Kombëtar Shqiptar, është në një mision për të ndihmuar nxënësit që përballen me sfida të mëdha financiare. Këtë herë, drejtohemi drejtpërdrejtë te të gjithë nxënësit e Preshevës, Bujanocit dhe Medvegjës pa prindër, si dhe te ata që kanë vetëm një prind. Po ashtu, ofrojmë ndihmë financiare të menjëhershme për familjet me 3 ose më shumë fëmijë në procesin edukativo-arsimor, për të siguruar që të gjithë kenë mundësi të barabarta”, ka shkruar Sinani.

Koreja e Veriut e ka shkrepur dhe testuar një raketë balistike me rreze të mesme veprimi në ujërat e bregdetit të vet lindor të martën, tha ushtria e Koresë së Jugut.

Lideri verikorean, Kim Jong Un, është duke bërë përpjekje ta avancojë armatimin që ka për qëllim arritjen e caqeve të largëta amerikane në Paqësor.

Shtabi i Përgjithshëm i Koresë së Jugut tha se raketa u lëshua nga një zonë afër kryeqytetit të Koresë së Veriut, Penian, dhe fluturoi rreth 600 kilometra para së të binte në det mes Gadishullit Korean dhe Japonisë.

Lee Sung Joon, zëdhënës i Shtabit të Përgjithshëm, tha se shkrepja e raketës me gjasë e pason testimin që Koreja e Veriut ia bëri një motori me lëndë djegëse të ngurtë, i ndërtuar për një raketë të re hipersonike me rreze të mesme veprimi.

Nëse përsoset, një raketë e tillë mund ta arrijë bazën ushtarake amerikane në Paqësor, Guam, por edhe më larg, thonë ekspertët.

Ministria e Mbrojtjes e Japonisë dha më shumë hollësi në vlerësimin e saj, duke thënë se raketa fluturoi rreth 650 kilometra dhe e arriti lartësinë maksimale prej 100 kilometrave, para se të binte në ujërat jashtë zonës ekonomike ekskluzive të Japonisë.

Disa orë pas lëshimit të raketës, Ministria e Mbrojtjes jugkoreane tha se Koreja e Jugut, Shtetet e Bashkuara dhe Japonia kryen stërvitje të kombinuara ajrore mbi ujërat afër ishujve Jeju, në të cilat u përfshi së paku një bombardues bërthamor amerikan, B-52.

Muajt e fundit, Shtetet e Bashkuara e kanë rritur zhvendosjen e mjeteve strategjike në rajon, përfshirë aeroplanmbajtës dhe nëndetëse raketore, duke treguar forcën kundër Koresë së Veriut.

Ministria e Koresë së Jugut tha se stërvitja e së martës kishte për qëllim përforcimin e përgjigjes së tyre ushtarake kundër kërcënimeve raketore dhe bërthamore nga Veriu.

Kjo ishte shkrepja e parë e një rakete nga Veriu për të cilën dihet prej 18 marsit, kur lideri verikorean, Kim Jong Un, e udhëhoqi një stërvitje të sistemeve të artilerisë së dizajnuar për ta goditur kryeqytetin e Koresë së Jugut.

Koreja e Veriut e ka shtuar testimin e armëve prej fillimit të vitit 2022, në përpjekje për ta modernizuar dhe rritur arsenalin e vet bërthamor dhe raketor.

Si përgjigje ndaj saj, SHBA-ja dhe Koreja e Jugut i kanë zgjeruar stërvitjet dhe ushtrimet tripalëshe, duke e përfshirë edhe Japoninë në to.

Ekspertët thonë se me gjasë Kimi dëshiron ta përdorë arsenalin e vet të rritur bërthamor për të siguruar koncensione nga SHBA-ja, si për shembull, lehtësira të mëdha nga sanksionet ndërkombëtare kundër Koresë së Veriut.

Ata thonë se Koreja e Veriut pritet ta zgjerojë veprimtarinë e testimeve dhe ta shpeshtojë retorikën luftëdashëse këtë vit, pasi Shtetet e Bashkuara dhe Koreja e Jugut mbajnë zgjedhje të rëndësishme./REL/

Dy serbë janë ndaluar në Koshuticë të Leposaviqit, pasi që të njëjtit janë takuar duke kaluar kufirin ilegalisht nga Kosova për në Serbi duke shfrytëzuar rrugët dytësore.

Policia ka njoftuar se me vendim të prokurorit, të dyshuarit janë liruar.

“Rasti vazhdon në procedurë të rregullt”, thuhet në raportin 24 orësh të policisë.

Policia e Kosovës ka arrestuar një person në Pejë, pasi i njëjti kishte shtënë me armë zjarri.

Në njoftimin e bërë për media, Drejtoria Rajonale e Policisё nё Pejё, Stacioni Policor Pejё, thotë se më datë 29 mars 2024 rreth orës 09:00, ka pranuar njё informacion se me datё 23.03.2024 rreth orёs 17:00, nё fshatin Vitomiricё njё person i dyshuar kishte shtёnё me armё zjarri.

Njёsiti i hetimeve pranё Stacionit Policor nё Pejё, ka ndёrmarrё veprime hetimore ёshtё arritur qё tё gjinden dy (2) gёzhoja ne vendin e ngjarjes, e mё pas edhe personi i dyshuar ёshtё arrestuar dhe nё veturën e tij janё gjetur dhe sekuestruar:

• Njё (1) armё (pistoletё) e tipit M57 kal: 7.62mm

• Dy (2) gёzhoja kal: 7.62X 25mm.

Tutje, Policia njoftoi se i dyshuari pas intervistimit nga hetuesit, me vendim tё Prokurorit tё shtetit rasti shkon nё procedurё te rregullt.

Tetë person dyshohet të kenë vdekur si pasojë i një aksidenti të rëndë që ka ndodhur në orët e para të mëngjesit të së martes.

Siç raporton Abcnews.al, aksidenti ka ndodhur në rrugën Këlcyrë-Përmet, në afërsi të fshatit Kuqar.

Automjeti i tipit Mercedes Benz, ka dalur nga rruga dhe ka përfunduar në lumin Vjosa.

Raportohet se shtatë viktima janë shtetas të huaj, po ashtu edhe shoferi i automjetit, nga Shkodra.

Në vendin e ngjarjes ka dalur policia dhe Prokurori, që po punojnë për sqarimin e rrethanave dhe shkakut të aksidentit.

Gjithashtu në vendin e ngjarjes ndodhen Drejtori Vendor i Policisë, Drejtori i Departamentit për Kufirin, Drejtori i Policisë Rrugore dhe Drejtori i Rendit Publik, si dhe dy grupe të Forcës Kombëtare të Sigurisë.