Author: G.O.

Presidenti i Rumanisë, Klaus Iohannis, pritet të njoftojë më 20 qershor se do të heqë dorë nga gara për t’u bërë shef i ardhshëm i NATO-s.

Ai është pengesa e vetme në rrugën e kryeministrit të Holandës, Mark Rutte, për ta marrë postin e sekretarit të Përgjithshëm të aleancës ushtarake.

Duke folur në Bukuresht më 19 qershor, pas një takimi me presidentin italian Sergio Mattarella, Iohannis tha se së pari do të bisedojë rreth vendimit të tij me Këshillin Suprem të Mbrojtjes Kombëtare të Rumanisë dhe pastaj do ta bëjë atë publik.

Më herët gjatë ditës, Hungaria dhe Sllovakia thanë se do ta mbështesin Rutten, duke e lënë Rumaninë shtetin e vetëm në mesin e 32 vendeve anëtare të NATO-s që nuk e ka mbështetur liderin holandez 57-vjeçar.

Ekspertët mjeko-ligjorë të EULEX-it bashkë me përfaqësuesit e e IML-së dje në pikën kufitare në Merdarë kanë dorëzuar mbetjet e tre trupa të qytetarëve serbë të vrarë në luftën e fundit në Kosovë, që së fundi u identifikuan.

EULEX-i njoftoi se mbetjet e një person i janë dorëzuar familjes, ndërsa të dy të tjerëve i janë dorëzuar autoriteteve serbe.

“Ne mbetemi të përkushtuar për të mbështetur homologët tanë vendorë në IML dhe institucionet e tjera relevante të Kosovës duke ofruar ekspertizë mjekoligjore dhe këshilla në kryerjen e punës komplekse të identifikimit të të gjitha mbetjeve njerëzore në morgun e IML-së, në mënyrë që anëtarët e familjes të realizojnë të drejtën e tyre për të ditur të vërtetën”, thuhet në njoftimin e EULEX-it.

Presidentja Vjosa Osmani ka thënë se angazhimi i Kosovës është i palëkundur që të dalin para drejtësisë personat që kryen dhunime seksuale gjatë luftës së fundit.

Në platformën X, ajo ka shpërndarë një video të sajën derisa ishte duke folur në OKB.

“Në këtë Ditë Ndërkombëtare për Eliminimin e Dhunës Seksuale në Konflikt, ne vazhdojmë të nderojmë guximin dhe qëndrueshmërinë e atyre që kanë duruar tmerre të papërshkrueshme nën regjimin gjenocidal të Millosheviqit. Këto gra dhe burra të guximshëm na kujtojnë detyrën tonë të përbashkët për t’i dhënë fund përdorimit të dhunës seksuale si një armë lufte”.

“Sot, ne shohim të mbijetuar në Kosovë që e transformojnë dhimbjen e tyre në veprim të fuqishëm, duke frymëzuar të tjerë të panumërt në kërkimin e drejtësisë. Angazhimi ynë është i palëkundur: duhet t’i nxjerrim autorët para drejtësisë dhe të sigurojmë që mizori të tilla të mos përsëriten kurrë!”, ka thënë Osmani

Ambasada Amerikane ka deklaruar se SHBA-ja është e përkushtuar në mbështetjen e viktimave dhe të mbijetuarve të dhunës seksuale gjatë luftës.

Përmes një postimi në “X”, me rastin e Ditës ndërkombëtare për eliminimin e dhunës seksuale në konflikt, nga Ambasada bëhet thirrje të “qëndrojmë së bashku për një botë pa dhunë dhe konflikte”.

“Këtë Ditë ndërkombëtare për eliminimin e dhunës seksuale në konflikt, le të qëndrojmë së bashku për një botë pa dhunë dhe konflikte që u mundëson grave dhe vajzave të ushtrojnë të drejtat e tyre njerëzore dhe të përfaqësohen dhe të udhëheqin vendimmarrjen.

Dhuna seksuale e lidhur me konfliktin nuk është një pasojë e pashmangshme e luftës – ajo mund dhe duhet të parandalohet. Shtetet e Bashkuara janë të përkushtuara për të mbështetur viktimat dhe të mbijetuarit e kësaj dhune” thuhet në postimin e Ambasadës.

Kryetari i LDK-së, Lumir Abdixhiku, ka bërë të ditur se sot në përvjetorin e trembëdhjetë të ikjes në amshim – së bashku me Kosovaren e me bashkëpunëtorë, shpalosën pllakën dhe portretin përkujtimor të Nekibe Kelmendit brenda hapësirave të selisë qendrore të LDK-së.

Ai, me anë të një postimi në rrjetin social Facebook, ka thënë se gjurmët, sakrifica dhe puna e Nekibe Kelmendit tashmë janë një udhërrëfyes për të gjithë ne që të ecim përpara.

“Portreti i saj, i vendosur tashmë përballë Enver Malokut, e në varg me të tjerë që do të pasojnë, do të shërbejnë si rikujtim i fuqishëm për secilin që kapërcen nëpër korridorin hyrës të kësaj shtëpie të demokracisë. Se vepra e madhe e lëvizjes kombëtare për liri, pavarësi e demokraci, është bartur nga njerëz të mëdhenj me ëndrra e përkushtime të mëdha!”

“Nekibe Kelmendin, atdhetare dhe veprimtare e madhe të kauzës nacionale, ishte një emblemë identifikuese e një gruaje, e një nënë të pamposhtur që përkundër sfidave e dhimbjeve të rënda nuk u gjunjëzua asnjëherë. Ajo ka gravuar emrin e saj të merituar jo vetëm si një nga aktivistet e para të LDK-së, por edhe si profil i një njeriu që shkriu veten në formimin dhe konsolidimin e shtetësisë e Kosovës”, ka thënë Abdixhiku.

Presidenti i Shqipërisë, Bajram Begaj, në një intervistë për programin e “Deutsche Welle” në gjuhën shqipe, derisa foli rreth “hatërmbetjes” së Kosovës ndaj Shqipërisë, posaçërisht sa i përket zhvillimeve në procesin e dialogut për normalizimin e marrëdhënieve Kosovë-Serbi, theksoi se “s’ka vend për pakënaqësi” sepse Shqipëria do të jetë gjithmonë krah i Kosovës.

“Kosova është interesi më madhor i Shqipërisë, Shqipëria është avokatja më e mirë e Kosovës në arenën ndërkombëtare dhe çdo iniciativë rajonale përmendet dhe mbrohet Kosova. Patjetër që ne do të kemi këtë bashkëpunim dhe në të ardhmen nuk mendoj që ka vend për pakënaqësi. Ne jemi aty, do të jemi gjithmonë në mbështetje të Kosovës”, garantoi presidenti shqiptar.

Ndryshe, marrëdhëniet midis Shqipërisë dhe Kosovës kohën e fundit janë kategorizuar nga një cikël përplasjesh midis liderëve politikë. Kjo “ftohje” në raportet ndërshtetërore erdhi pas angazhimit të kryeministrit shqiptar, Edi Rama, në procesin e dialogut mes Prishtinës dhe Beogradit nën patronazhin e Bashkimit Evropian (BE), duke dhënë sugjerime e propozime.

Megjithatë, përkundër se angazhimi aktiv i kryeministrit Rama për të gjetur një zgjidhje për rrjedhën e tensionuar të marrëdhënieve midis Kosovës dhe Serbisë nuk ka gjetur konsideratë minimale nga liderët institucionalë në Kosovë, posaçërisht nga kryeministri kosovar, Albin Kurti, autoriteti dhe konstruktiviteti i tij janë vlerësuar pozitivisht nga diplomatët evropianë.

Një ngjarje shumë e rëndë ka ndodhur në familjen Azemi, në fshatin Bradash të Podujevës.

Dy kryefamiljarët e tyre, burri dhe gruaja kanë ndërruar brenda 24 orëve. Lajmin për vdekjen e tyre e kanë konfirmuar familjarët e çiftit.

Hamit dhe Nurije Azemi do të varrosen sot në ora 18:00, në varrezat e fshatit Bradash.