Author: G.O.

Gjykata Themelore në Mitrovicë ka caktuar masën e paraburgimit prej një muaji ndaj Arben Spasollit, i dyshuar për vrasjen e 37-vjeçarit Erduan Ibrahimi.

Sipas njoftimit zyrtar të gjykatës, masa është caktuar nga gjyqtari i procedurës paraprake në Departamentin për Krime të Rënda, pas dyshimeve për kryerjen e veprave penale “Vrasje e rëndë”, “Vrasje në tentativë” dhe “Mbajtje në pronësi, kontroll ose posedim të paautorizuar të armëve”.

Në vendim thuhet se paraburgimi ndaj të dyshuarit do të zgjasë një muaj, duke filluar nga data 27 maj deri më 26 qershor 2026.

Rasti lidhet me ngjarjen e rëndë që ndodhi në Mitrovicë, ku mbeti i vrarë Erduan Ibrahimi, ndërsa organet e drejtësisë po vazhdojnë hetimet për zbardhjen e plotë të rastit.

Komisioni Qendror i Zgjedhjeve në mbledhjen e mbajtur të premten ka akredituar 761 vëzhgues për vëzhgimin e zgjedhjeve të parakohshme për Kuvendin e Kosovës, të cilat do të mbahen më 7 qershor 2026, ndërsa ka refuzuar akreditimin e dy organizatave për shkak të mosplotësimit të kritereve ligjore, raporton Ekonomia Online.

KQZ miratoi rekomandimin e Zyrës për grupin e parë të organizatave vëzhguese për monitorimin e procesit zgjedhor.

Drejtori i Zyrës për Regjistrim, Certifikim dhe Kontroll Financiar të Subjekteve Politike, Besnik Buzhala, tha se organizatat e akredituara kanë përmbushur kriteret ligjore për vëzhgimin e zgjedhjeve.

Ndërkaq, ai bëri të ditur se dy organizata nuk janë akredituar pasi nuk kanë përmbushur kriteret e parapara.

“Advocacy Center for Democratic Culture , ka aplikuar për tu akredituar me qëllim të vëzhgimit të Zgjedhjeve të parakohshme për Kuvendin e Republikës së Kosovës, datë  07.06.2026. Zyra, pas shqyrtimit dhe vlerësimit të dokumentacionit të paraqitur nga kjo organizatë joqeveritare, ka konstatuar se dokumentacioni i dorëzuar nuk është në përputhje me nenin 54, paragrafi 1 të Ligjit Nr. 08/L-228 për Zgjedhjet e Përgjithshme në Republikën e Kosovës. Nga analiza e statutit, dhe fushë veprimtarisë së organizatës në fjalë, rezulton se ajo nuk zhvillon veprimtari që ndërlidhen me proceset zgjedhore, apo mbrojtjen e të drejtave të njeriut, siç kërkohet shprehimisht nga dispozitat ligjore në fuqi për akreditimin e vëzhguesve të zgjedhjeve. Zyra i rekomandon KQZ-së, refuzimin e kërkesës për akreditim të “Advocacy Center for Democratic Culture” për Zgjedhjet e Parakohshme për Kuvendin e Republikës së Kosovës, të cilat do të mbahen më 7 qershor 2026”, tha ai.

Po ashtu, Buzhala tha se Zyra ka rekomanduar refuzimin e akreditimit edhe për organizatën “Odbor za kontrolu i opservaciju”, pasi ka përdorur terminologjinë “Kosovë dhe Metohi”, formulim ky që bie ndesh me rendin kushtetues dhe juridik të Republikës së Kosovës.

“Odbor za kontrolu i opservaciju, ka aplikuar për tu akredituar me qëllim të vëzhgimit të Zgjedhjeve të parakohshme për Kuvendin e Republikës së Kosovës, datë  07.06.2026. Zyra, gjatë shqyrtimit dhe vlerësimit të dokumentacionit të paraqitur nga kjo organizatë ndërkombëtare, ka konstatuar se në dokumentacionin zyrtar të saj i është referuar Republikës së Kosovës me terminologjinë “Kosovë dhe Metohi”, formulim ky që bie ndesh me rendin kushtetues dhe juridik të Republikës së Kosovës. Përdorimi i një emërtimi të tillë cenon drejtpërdrejt subjektivitetin shtetëror, integritetin kushtetues dhe rendin juridik të Republikës së Kosovës, siç përcaktohet me Kushtetutën e Republikës së Kosovës, përkatësisht me nenin 1 të saj, ku përcaktohet se Republika e Kosovës është shtet i pavarur, sovran, demokratik, unik dhe i pandashëm”. Përdorimi i kësaj terminologjie është në kundërshtim edhe me parimet themelore kushtetuese mbi sovranitetin, identitetin shtetëror dhe respektimin e rendit juridik të Republikës së Kosovës nga çdo subjekt që kërkon akreditim dhe ushtrim të aktivitetit në territorin e Republikës së Kosovës. Për rrjedhojë, duke u bazuar në dispozitat kushtetuese dhe ligjore në fuqi, si dhe në obligimin institucional për mbrojtjen e rendit kushtetues dhe ligjor të Republikës së Kosovës, Zyra vlerëson se nuk janë plotësuar kushtet ligjore për aprovimin e kërkesës për akreditim të kësaj organizate. Zyra i rekomandon KQZ, refuzimin e kërkesës për akreditim të “Odbor za kontrolu i opservaciju” për Zgjedhjet e Parakohshme për Kuvendin e Republikës së Kosovës, të cilat do të mbahen më 7 qershor 2026”, tha ai.

Vëzhguesit e akredituar përfaqësojnë 5 organizata joqeveritare, 1 organizatë ndërkombëtare, 13 media vendore, 7 media ndërkombëtare, 2 ambasada dhe 1 institucion vendor.

OJQ VENDORE:

1.         INTERNEWS KOSOVA – 23 vëzhgues;

2.         BIRN KOSOVO – 45 vëzhgues;

3.         Demokracia për Zhvillim (D4D) – 6 vëzhgues;

4.         Kosova Democratic Institute – 305 vëzhgues;

5.         Syri i Vizionit – 153 vëzhgues.

ORGANIZATË NDËRKOMBËTARE:

1.         Nacional Democratic Institute – 14 vëzhgues.

MEDIA VENDORE:

1.         Urgjent Inc. – 3 vëzhgues;

2.         Albswiss Media SHPK – 2 vëzhgues;

3.         VIM INFO DOO – 14 vëzhgues;

4.         Telegrafi – 6 vëzhgues;

5.         Lajmi.net – 4 vëzhgues;

6.         KoSSev – 5 vëzhgues;

7.         Zëri – 3 vëzhgues;

8.         Gazeta Ekskluzive – 2 vëzhgues;

9.         Kontakt Kosvska Mitrovica/Kontakt Plus – 4 vëzhgues;

10.       TV DUKAGJINI – 38 vëzhgues;

11.       RTV PULS D.O.O – 7 vëzhgues;

12.       Radio Kim – 3 vëzhgues;

13.       KOHA – 23 vëzhgues.

MEDIA NDËRKOMBËTARE:

1.         The Associated Press – 8 vëzhgues;

2.         Novinska agencija Tanjug i Tanjug televizija – 4 vëzhgues;

3.         Top News – 5 vëzhgues;

4.         European Pressphoto Agency (EPA Images) – 1 vëzhgues;

5.         Mondo Inc doo – Kurir televizija – 2 vëzhgues;

6.         Radio Evropa e Lire – 3 vëzhgues;

7.         GERMAN RADIO &TV ARD – 3 vëzhgues.

PËRFAQËSI DIPLOMATIKE:

1.         Ambasada e Japonisë në Kosovë – 4 vëzhgues;

2.         Ambasada e Italisë në Prishtinë – 4 vëzhgues.

INSTITUCION VENDOR:

1.         Institucioni i Avokatit të Popullit – 67 vëzhgues.

Në këtë mbledhje, KQZ-ja miratoi edhe rekomandimin për pezullimin e partisë politike të regjistruar “EKO LËVIZJA E GJELBËR”.

Sipas Buzhalës, pezullimi është rekomanduar për shkak të mosmbajtjes së kuvendit zgjedhor të partisë brenda afatit shtesë të dhënë nga KQZ-ja.

Një incident i rëndë ka ndodhur në orët e vona të natës në fshatin Dolak të Vushtrrisë, ku një zjarr ka përfshirë shtëpinë e Driton Pllanës, djalit të martirit Sabri Hashim Pllana.

Pas kësaj, familja Pllana është përballur me dëme të konsiderueshme materiale.

Sipas banorëve të zonës, prej një kohe të gjatë janë ngritur ankesa lidhur me problemet në rrjetin elektrik të lagjes. Ata pretendojnë se kanë kërkuar vazhdimisht ndërhyrje nga institucionet dhe ekipet përgjegjëse, të cilat, sipas tyre, kanë evidentuar probleme teknike gjatë inspektimeve në terren.

Banorët thonë se shqetësimet e tyre nuk janë trajtuar me seriozitetin e duhur dhe kërkojnë që rasti të hetohet deri në fund për të sqaruar shkakun e zjarrit.

“Nëse paralajmërimet e qytetarëve do të trajtoheshin me kohë, pasojat do të mund të shmangeshin. Dëmet nuk janë vetëm materiale, por prekin drejtpërdrejt jetën e familjeve”, thuhet në reagimet e bëra publike.

Deri tani nuk ka një version zyrtar mbi shkaqet e incidentit, ndërsa pritet që autoritetet kompetente të dalin me informacione shtesë pas hetimeve.

Në Gjykatën Themelore në Prishtinë, të premten, ka dështuar të mbahet seanca në rigjykim ndaj të akuzuarit për krime lufte, Cedomir Aksiq, për arsye shëndetësore të mbrojtësit të të akuzuarit, avokatit Ymer Berisha.

Ky proces po zhvillohet pas vendimit të Gjykatës së Apelit, e cila e ktheu lëndën në rigjykim, duke kërkuar plotësimin e kushteve për gjykim në mungesë, raporton “Betimi për Drejtësi”.

Mbrojtësi i të akuzuarit Aksiq, avokati Ymer Berisha, më 29 maj 2026, ka njoftuar Gjykatën se për shkaqe shëndetësore nuk mund të prezantojë në seancën e së premtes, duke bashkëngjitur edhe raportin shëndetësor, në të cilin i propozohet regjim shtrati.

Prezentë në sallën e gjykimit ishin: prokurorja Habibe Salihu dhe përfaqësuesi i viktimave, Ibrahim Terstena.

Në mungesë të kushteve ligjore, për shkak të mungesës së avokatit mbrojtës, seanca e së premtes u shty për një datë tjetër.

I akuzuari Aksiq u shpall fajtor dhe u dënua nga Gjykata Themelore në Prishtinë me 15 vite burgim, më 26 dhejtor 2024, raporton “Betimi për Drejtësi”.

Ndryshe, më 20 nëntor 2023 në Gjykatën Themelore në Prishtinë kishte nisur gjykimi në mungesë ndaj të akuzuarit Çedomir Aksiq, i akuzuar për krime lufte. Gjykimi në mungesë parashihet me Kodin e Ri  të Procedurës Penale të Republikës së Kosovës.

Një tornado e fuqishme shkaktoi dëme të konsiderueshme në shtetin e Coahuila në Meksikën veriore, duke lënë pas imazhe kaosi dhe dëme të mëdha në objektet bujqësore dhe blegtori.

Fenomeni ekstrem i motit me erëra të forta që rrëzuan çatitë, shkatërruan strukturat dhe shkaktuan dëme të rënda në ferma, stalla dhe infrastrukturë tjetër në zonë.

Videot që qarkullojnë në rrjetet sociale kapin momentin kur tornado “gëlltit” gjithçka në rrugën e saj, duke krijuar skena paniku midis banorëve.

Autoritetet lokale mbeten në gatishmëri dhe po kryejnë kontrolle për të vlerësuar plotësisht dëmet, ndërsa ekipet kanë filluar tashmë operacionet për të regjistruar dhe riparuar dëmet, shkruan Euronews.al.

Deri më tani, nuk ka raportime për të lënduar ose viktima, megjithatë, autoritetet po u bëjnë thirrje qytetarëve të qëndrojnë të kujdesshëm për shkak të mundësisë së ngjarjeve të reja ekstreme të motit në zonë.

Presidenti i Ukrainës, Volodymyr Zelensky, ka deklaruar se Ukraina është e gatshme të ofrojë mbështetje për Rumaninë “në çfarëdo mënyre që është e nevojshme në këto rrethana”.

Në një postim në rrjetet sociale, Zelensky theksoi gjithashtu nevojën për rritjen e presionit ndërkombëtar ndaj Rusisë, me qëllim që lufta “të mos zvarritet apo të zgjerohet më tej”.

Ai u shprehu urime për shërim të shpejtë të lënduarve dhe theksoi rëndësinë e masave të reja të Bashkimit Evropian, duke kërkuar që sanksionet ndaj Rusisë të jenë sa më të forta.

Sipas tij, këto masa duhet ta bëjnë Rusinë të ndiejë pasoja të konsiderueshme për shkak të sulmeve të saj.

Forca e Sigurisë së Kosovës ka njoftuar qytetarët për lëvizje të konvojeve ushtarake drejt rajonit të Gjakovës në kuadër të një ushtrimi fushor që do të zhvillohet ditëve në vijim.

Sipas njoftimit zyrtar, nga 31 maji deri më 5 qershor 2026 do të mbahet ushtrimi validues “Ujku i Pamposhtur 01”, i cili përfshin aktivitete të ndryshme stërvitore në terren.

Gjatë kësaj periudhe, pritet lëvizje e konvojeve të FSK-së nga bazat ushtarake në drejtim të Aeroportit të Gjakovës dhe poligonit në Babaj të Bokës.

FSK ka bërë thirrje për mirëkuptim nga qytetarët, duke theksuar se të gjitha lëvizjet dhe aktivitetet janë pjesë e planit stërvitor dhe kanë për qëllim ngritjen e gatishmërisë operacionale të forcës.

Ushtrimi pritet të zgjasë disa ditë dhe përfshin skenarë të ndryshëm trajnimi në kushte reale terreni.

Gjatë 24-të orëve të fundit në vendin tonë janë shënuar katër raste të armëbajtjeve pa leje.

Sipas raporti policor rastet janë raportuar në qytetet e Lipjanit, Prishtinës, Malishevës dhe Gjakovës.

Lipjan / 19.05.2026 – 21:50. Njësiti policor me 28.05.2026 me urdhër të prokurorit nga i dyshuari mashkull kosovar kanë konfiskuar një pistoletë e cila kishte qenë me leje por i dyshuari nuk kishte bërë kërkesë për vazhdimin e lejes. Lënda e rastit procedohet në procedurë të rregullt.

Prishtinë 28.05.2026, 18:00. Është shoqëruar në stacionin policor i dyshuari mashkull kosovar pasi që gjatë kontrollit në veturën e tij është gjetur dhe sekuestruar një armë me një karikator dhe 10 fishekë. Me vendim të prokurorit pas intervistimit rasti procedohet në procedurë të rregullt.

Malishevë / 28.05.2026 – 07:10. Njësiti policor ka ndaluar automjetin me traga të shtetit të Austrisë të cilën kishte qenë duke e drejtuar i dyshuari mashkull kosovar, ku gjatë kontrollit në automjet është gjetur dhe konfiskuar një revole me 4 copë fishekë. Në konsultim me prokurorin lënda e rastit procedohet në procedurë të rregullt.

Gjakovë 28.05.2026, 22:00. Është shoqëruar në stacionin policor i dyshuari mashkull kosovar, pasi që gjatë kontrollit në veturën e tij është gjetur dhe sekuestruar një armë dhe 43 fishekë. Me vendim të prokurorit pas intervistimit rasti procedohet në procedurë të rregullt.

Instituti i Kosovës për Drejtësi (IKD) ka publikuar një raport lidhur me kandidatët e certifikuar për zgjedhjet e parakohshme parlamentare, duke bërë të ditur se 25 prej tyre rezultojnë të përfshirë në raste penale.

Sipas hulumtuesit të lartë të IKD-së, Gzim Shala, në zgjedhjet e 7 qershorit do të marrin pjesë 21 subjekte politike me gjithsej 902 kandidatë të certifikuar nga Komisioni Qendror i Zgjedhjeve.

“Në zgjedhjet e parakohshme të 7 shkurtit do të marrin pjesë 21 subjekte politike të cilat janë certifikuar nga Komisioni Qendror i Zgjedhjeve e në të cilat bëjnë pjesë gjithsej 902 kandidatë. Nga këta 902 kandidatë, bazuar në të dhënat e Institutit të Kosovës për Drejtësi, rezulton se 25 prej tyre janë të përfshirë në raste penale. Shprehur në përqindje i bie se 2.77% e totalit të listave të kandidatëve janë persona të cilët kanë ose dënime të formës së prerë ose aktakuza aktive”, tha ai.

Ai tha se nga ky numër, 25 kandidatë kanë ose aktakuza aktive ose dënime të formës së prerë nga e kaluara.

“15 prej tyre janë me aktakuza aktive, ndërkaq 13 të tjerë janë persona të cilët në të kaluarën kanë pasur dënime penale. Ndërkaq janë evidentuar edhe 3 raste, 3 kandidatë të cilët përpos aktakuzës aktive në të njëjtën kohë kanë edhe dënime penale”, tha ai.

Sipas raportit, Lëvizja Vetëvendosje ka numrin më të madh të kandidatëve me probleme me ligjin, gjithsej 13 kandidatë.

“Sa i përket subjekteve politike, numrin më të madh të kandidatëve të cilët kanë probleme me ligjin e mban Lëvizja Vetëvendosje me gjithsej 13 kandidatë, që në raport me listën e përgjithshme prej 902 kandidatëve pjesëmarrja e këtij subjekti është 1.44%. AAK dhe Lista Serbe kanë nga 3 kandidatë të cilët kanë probleme me ligjin që përbën 0.33% të listës së përgjithshme. PDK-ja me 2 kandidatë që përbën 0.22% të listës së përgjithshme, ndërkaq katër subjekte të tjera kanë të përfshirë nga 1 kandidat i cili ka probleme me ligjin”, tha ai.

IKD-ja bëri të ditur se veprat penale që dominojnë janë ato që lidhen me korrupsionin zyrtar, ndërsa përdorimi i armës është vepra penale më e shpeshtë në mesin e kandidatëve të përfshirë në raste gjyqësore.

“Sa i përket kapitujve të veprave penale për të cilat ose janë dënuar ose akuzohen kandidatët në fjalë, sipas kapitujve dominojnë veprat penale të korrupsionit zyrtar, ndërkaq sipas veprave penale, vepra më e shpeshtë është vepra e përdorimit të armës”, tha ai.

Gjykata Supreme e Kosovës ka refuzuar si të pabazuar kërkesën për mbrojtje të ligjshmërisë në një rast penal që lidhet me një grup të dyshuar për krim të organizuar, trafikim të narkotikëve dhe pastrim parash.

Sipas vendimit, kërkesa ishte paraqitur nga mbrojtja e njërit prej të pandehurve, por gjykata ka vlerësuar se nuk ka shkelje esenciale të procedurës penale në vendimet e mëparshme të gjykatave më të ulëta.

Rasti përfshin disa persona të dyshuar për pjesëmarrje në grup kriminal të organizuar, blerje, posedim, shpërndarje dhe shitje të narkotikëve, si dhe për veprën penale të shpërlarjes së parave.

Gjykata Supreme ka konstatuar se ekzistojnë prova dhe dyshime të bazuara që lidhen me aktivitetin e të pandehurve, përfshirë komunikime dhe të dhëna hetimore të siguruara përmes bashkëpunimit ndërkombëtar.

Po ashtu, në vendim theksohet se vazhdimi i paraburgimit është i justifikuar për shkak të rrezikut të ikjes, ndikimit në dëshmitarë dhe mundësisë së pengimit të procedurës penale.

Autoritetet gjyqësore kanë vlerësuar se masa e paraburgimit mbetet e nevojshme duke marrë parasysh peshën e veprave dhe rrezikun e përsëritjes së tyre.