Author: E.R.

Gjykata e Apelit ka ndryshuar aktgjykimin e Gjykatës Themelore në Mitrovicë, përmes të cilit i akuzuari për dhënie ryshfeti, Hasan Selimi, ishte dënuar me një vit burgim me kusht dhe 1 mijë euro gjobë, pasi ka gjetur se është shkelur Ligji Penal në dëm të të akuzuarit.

Me vendimin e 23 shtatorit 2022, ndaj të dënuarit Selimi, Apeli ka vërtetuar vetëm dënimin me gjobë prej 1 mijë euro, raporton “Betimi për Drejtësi”.

Gjykata Themelore në Mitrovicë më 5 gusht 2022, në rigjykim, e kishte shpallur fajtor dhe dënuar me një vit burgim me kusht dhe 1 mijë euro gjobë të akuzuarin Hasan Selimi, për dhënie ryshfeti.

Kundër këtij aktgjykimi, ka ushtruar ankesë i akuzuari Selimi, për shkak të vendimit lidhur me sanksionin penal, duke propozuar që Apeli t’i shqiptojë dënim më të butë.

Sipas vendimit të Apelit ankesa nuk është e bazuar, me arsyetimin se pretendimet ankimore të të akuzuarit për një dënim me të butë nuk qëndrojnë, pasi Themelorja me rastin e caktimit të dënimit ka vlerësuar të gjitha rrethanat lehtësuese dhe rënduese, të cilat ndikojnë në llojin dhe lartësinë e dënimit konform nenit 69 dhe 70 të KPRK-së.

“Një vlerësim të tillë të rrethanave relevante për matjen e dënimit si të drejtë dhe të ligjshëm e pranon edhe kjo gjykatë dhe gjen se rrethanat e pretenduara në ankesën e të akuzuarit veç se kanë qenë objekt vlerësimi nga gjykata e shkallës së parë”, thuhet në vendimin e Apelit.

Gjykata e Apelit ka konstatuar se gjykata e shkallës së parë, në këtë rast, ka bërë shkelje të Ligjit Penal në dëm të të akuzuarit, duke i shqiptuar dënim komulativ, sepse për veprën penale “Dhënia e ryshfetit” nga neni 429, par.1 të Kodit Penal të vitit 2013, parashihet dënimi me gjobë ose me burg dhe jo dënimi me burg dhe me gjobë, siç ka përcaktuar shkalla e parë.

Tutje, Apeli ka vlerësuar se dënimi me gjobë prej 1 mijë euro ndaj të akuzuarit Selimi, është në harmoni me intensitetin e rrezikshmërisë shoqërore të veprës së kryer penale, shkallën e përgjegjësisë penale të të akuzuarit si ekzekutor, intensitetin e rrezikimit apo pasojave të shkaktuara dhe se me të do të mund të parandalohet i akuzuari nga kryerja e veprave penale në të ardhmen, si dhe do të parandalohen personat tjerë nga kryerja e veprave penale.

Ndryshe, të akuzuarit Selimi i është shqiptuar dënimi i njëjtë nga Gjykata Themelore në Mitrovicë edhe më 18 shkurt 2022, kur në atë kohë, nga gjyqtari i rastit Radosllav Markoviq ishte shpallur fajtor dhe dënuar me një vit burgim me kusht dhe 1 mijë euro gjobë.

Kundër këtij aktgjykimi, në afatin ligjor ankesë kishin ushtruar Prokuroria Themelore në Mitrovicë, për shkak të shkeljeve të Ligjit Penal dhe vendimit mbi sanksionin penal, dhe i akuzuari Hasan Selimi, për shkak të vendimit lidhur me sanksionin penal.

Gjykata e Apelit e kishte kthyer rastin në rigjykim, sepse aktgjykimi i ankimuar ishte përfshirë me shkeljet esenciale të dispozitave të procedurës penale, nuk është përpiluar konform dispozitës së nenit 370, par.7 të KPPK-së, e cila përfshin dhe zbatimin e dispozitave të caktuara të ligjit penal ndaj të akuzuarit dhe veprës së tij.

Apeli kishte gjetur se përkitazi me dënimin e shqiptuar nga gjykata e shkallës së parë, me gjobë dhe me burg, sipas nenit 429, par.1 të KPRK-së, është shkelur Ligji Penal në dëm të të akuzuarit, pasi që dispozita e lartcekur për këtë vepër penale parasheh dënim me gjobë ose me burgim deri në tre vjet, dhe jo të dy dënimet siç ka vepruar gjykata e shkallës së parë.

Ndryshe, gjyqtari Markoviq kishte njoftuar se ka vendosur në mënyrë të njëjtë edhe në rigjykim, për arsye se versioni i gjuhës serbe i Kodit Penal të vitit 2013, për veprën penale “Dhënia e ryshfetit” parasheh dy lloje të dënimeve, pra dënim me burgim dhe dënim me gjobë.

Ndryshe, nga Prokuroria Themelore në Mitrovicë, për veprat penale dhënie e marrje ryshfeti dhe falsifikim të dokumentit zyrtar në të njëjtin akt akuzues me Hasan Selimin, ngarkohen edhe Vlora Ibrahimi, Donika Sylejmani dhe Kujtim Shaqiri, ku për këtë të fundit është veçuar procedura që në nëntor 2021, ndërsa për dy të akuzuarat Ibrahimi dhe Sylejmani nga gjyqtari Markoviq u veçua procedura më 16 shkurt 2022 gjatë shqyrtimit fillestar në të cilin munguan dy të lartpërmendurat.

Ndryshe, Prokuroria Themelore në Mitrovicë më 9 qershor 2021, kishte ngritur aktakuzë kundër Hasan Selimit, Vlora Ibrahimit, Donika Sylejmanit dhe Kujtim Shaqirit.

Sipas dispozitivit të parë të aktakuzës, Hasan Selimi akuzohej se në tetor të vitit 2016, i ka dhënë para në vlerë prej 300 euro personit zyrtar, Vlora Ibrahimi, si pronare e autoshkollës “Klinton” dhe NN personit, me qëllim që i njëjti të kryejë procedurat dhe të pajiset me patentë shofer të kategorisë “B” në mënyrë të kundërligjshme, pa mbajtur orë praktike dhe teorike, e po ashtu të mos hyjë në test teorik, ndërsa u premtoi se do t’ua japë edhe 500 euro tjera kur të pajiset me patentë shofer.

Më këtë, akuzohej se ka kryer veprën penale “Dhënie e ryshfetit” nga neni 429, par.1 të Kodit Penal.

Në dispozitivin e dytë të aktakuzës, Vlora Ibrahimi thuhet se në cilësinë e pronares së autoshkollës “Klinton” në bashkëpunim me NN personin me qëllim që të fitojë në mënyrë të kundërligjshme, ka pranuar para në cilësinë e personit zyrtar në bashkëpunim me NN personin, shumën e parave në vlerë prej 300 euro si dhe ka pranuar premtimin se të njëjtit do të pranojnë edhe 500 euro të tjera në mënyrë që mos të veprojnë në pajtim me detyrën e tyre zyrtare.

Tutje në aktakuzë thuhet se Vlora Ibrahimi ka regjistruar në mënyrë të kundërligjshme si kandidat të kategorisë “B” për patentë shofer personin Hasan Selimi dhe të njëjtit në këmbim të parave të lartcekura i ka mundësuar mbajtjen e orëve teorike dhe praktike si dhe ka lëshuar dokumentin “Libreza e kandidatit” për aftësim të kandidatit, ku aty thekson se kandidati ka mbajtur orët praktike si dhe orët teorike, duke i vërtetuar me nënshkrimin e vet.

Gjithnjë sipas aktakuzës, e njëjta akuzohet se në fund ka lëshuar dokumentin “Vërtetim”, mbi aftësimin e kandidatit Hasan Selimi, ku me këto veprime e njëjta ka përgatitur dosjen si të vërtetë për ta proceduar në njësinë e patentë shoferëve në Mitrovicë.

Me këtë, ngarkohet se ka kryer veprat penale “Marrje e ryshfetit” nga neni 428, par.1 të KPRK-së, dhe veprën penale “Falsifikim i dokumentit zyrtar” nga neni 434, par.1 të KPRK-së.

Ndërsa, në dispozitivin e tretë të aktakuzës Donika Sylejmani akuzohet se në cilësi të personit zyrtar, si instruktore e vozitjes pranë autoshkolles “Klinton” në Mitrovicë, në dokumentin “Libreza e kandidatit” ka theksuar se kandidati Hasan Selimi ka mbajtur orët praktike, duke e vërtetuar me nënshkrimin e vet si dhe në dokumentin “Vërtetim” mbi aftësimin e kandidatit Hasan Selimi, duke nënshkruar se është aftësuar kandidati Selimi, ku ky i fundit në polici ka mohuar se ka mbajtur këto orë praktike.

Me këtë, ngarkohet se ka kryer veprën penale “Falsifikim i dokumenteve zyrtare” nga neni 434, par.1 të Kodit Penal.

Ndërsa, në dispozitivin e katërt të aktakuzës, Kujtim Shaqiri po akuzohet se më 31 janar 2017, në njësinë e patentë shoferëve në Mitrovicë me rastin e organizimit të dhënies së provimit teorik për patentë shofer, ka tentuar të vë në lajthim organin kompetent që në një dokument publik të vërtetojë një çështje të pavërtetë.

Tutje thuhet se me dokumentin e rrejshëm – letërnjoftim të falsifikuar, kishte tentuar të hyjë në test teorik për kategorinë “B” në njësinë e patentë shoferëve në Mitrovicë për kandidatin Hasan Selimi, me qëllim që personi zyrtar të vendosë në regjistër kinse Selimi ka kryer testin teorik.

Mirëpo, thuhet se gjatë kontrollit së ekzaminerëve, është vërejtur dhe i njëjti ka ikur nga vendi i ngjarjes.

Me këtë, ngarkohet se ka kryer veprën penale “Legalizim i përmbajtjes së rreme” nga neni 403, par.1 lidhur me nenin 28 të Kodit Penal.

Kujtim Shaqiri, ngarkohet se me datën dhe vendin e njëjtë si më lartë me dije ka përdorë dokumentin publik – Letërnjoftimin e falsifikuar në emër të Hasan Selimit, ashtu që të njëjtin ia ka prezantuar personit zyrtar pranë njësisë së patentë shoferëve në Mitrovicë edhe pse e ka ditur se i njëjti është i falsifikuar.

Me këtë, ngarkohet se ka kryer veprën penale “Falsifikimi i dokumenteve” nga neni 389, par.2 të Kodit Penal.

Të paktën 288 persona tanimë dihet se vdiqën dhe 850 u lënduan si pasojë e përplasjes së trenave të premten në shtetin lindor të Indisë, Odisha, thanë zyrtarët.

Më shumë se 200 ambulanca u dërguan në vendngjarje në distriktin Balasore, tha kryesekretari i Odisha-s, Pradeep Jena.

Një tren pasagjerësh mendohet se doli nga shinat para se të goditet nga një tjetër në shinat ngjitur.

Ky është aksidenti më i rëndë i trenave këtë shekull në Indi.

Zyrtarët thanë se numri i të vdekurve pritet të rritet më tej.

Drejtori i përgjithshëm i Shërbimeve të Zjarrfikësve Odisha, Sudhanshu Sarangi tha se numri i të vdekurve ishte 288, shkruan BBC, përcjell KosovaPress

Kryeministri indian, Narendra Modi u shpreh se ishte i shqetësuar nga incidenti dhe mendimet e tij ishin me familjet e viktimave.

“Operacionet e shpëtimit janë duke u zhvilluar në vendin e fatkeqësisë dhe e gjithë ndihma e mundshme po u jepet të prekurve” shkroi ai në Twitter.

Ndërkohë, ministri i Brendshëm, Amit Shah e etiketoi incidentin “thellësisht shqetësues”.

Në Indi është shpallur ditë zie.

Presidenti i Serbisë, Aleksandar Vuçiq, ka thënë se ende nuk është vendosur nëse serbët do të marrin pjesë në zgjedhjet e parakohshme që mund të mbahen në katër komunat veriore të Kosovës. Ai ka thënë se nga e marta do të nisin diskutimet për zgjedhjet e reja.

Vuçiq nuk ka dhënë detaje se me kë do t’i zhvillojë këto diskutime.

“Nuk e di, më lejoni të negocioj, të flas. Unë do të flas vetëm nga e marta”, ka deklaruar Vuçiq në mediat serbe.

“Nuk kam zgjidhje për momentin, nuk kam shkop magjik, duhet të mendoj për ditë të tëra, duhet të masë gjithçka… Duhet të flas me në ditët në vijim dhe të shohim se çfarë do të marrin serbët, çfarë sigurie kanë”, ka theksuar Vuçiq.

Ndërkohë, mediat kanë raportuar se në javën e ardhshme i dërguari i posaçëm i Bashkimit Evropian për dialogun mes Kosovës dhe Serbisë, Miroslav Lajçak dhe i dërguari i posaçëm i SHBA-së për Ballkan Gabriel Escobar pritet të vizitojnë Prishtinën dhe Beogradin.

Vizita e tyre, sipas këtyre burimeve, do të ketë dy qëllime kryesore: Qëllimi i parë është gjetja e zgjidhjes për të dalë nga situata aktuale e cila rrezikon të dëmtojë gjithë atë që BE-ja e konsideron si sukses në dialog. Pra, fokusi së pari do të jetë në uljen e tensioneve dhe vazhdimi i përpjekjeve në bazë të asaj që është propozuar pas takimit në Moldavi.

Për mundësinë e mbajtjes së zgjedhjeve në katër komunat e banuara me shumicë serbe në veri të Kosovës, duket se ka një pajtim ndërmjet presidentes së Kosovës, Vjosa Osmani, dhe kryeministrit Albin Kurti, thonë njohësit e proceseve politike Agon Maliqi dhe Albert Krasniqi.

Mbajtja e zgjedhjeve po flitet si mundësi pas presionit të Shteteve të Bashkuara të Amerikës dhe Bashkimit Evropian për shtensionimin e situatës në Mitrovicë të Veriut, Leposaviq, Zubin Potok dhe Zveçan.

Në këto komuna për pesë ditë me radhë kanë protestuar grupe të qytetarëve serbë duke kundërshtuar kryetarët shqiptarë atje. Këto protesta më 29 maj u shndërruan në përleshje të dhunshme me pjesëtarë të misionit të NATO-s, KFOR, ku mbetën të lënduar dhjetëra pjesëtarë të KFOR-it, por edhe protestues.

Për dalje nga kjo gjendje nga samiti i Komunitetit Politik Evropian në Moldavi, presidenti francez, Emmanuel Macron, dhe kancelari gjerman, Olaf Scholz kërkuan nga Kosova mbajtjen e zgjedhjeve të reja. Kësaj kërkese i është bashkuar edhe përfaqësuesi i lartë i Bashkimit Evropian, Josep Borrell.

Presidentja Osmani ka konfirmuar se Kosova është e gatshme që të organizojë zgjedhje të reja në pjesën veriore të Kosovës.

Ndërkaq, kryeministri Albin Kurti gjatë një bisede telefonike me zëvendëskëshilltarin për siguri kombëtare të SHBA-së, Jon Finer, tha se duhet t’i jepet fund menjëherë dhunës së shkaktuar nga “turmat e sponsorizuara nga Beogradi kundër zyrtarëve të sigurisë” deri në zgjedhjet e reja në ato komuna.

“Nuk dëshiroj ta paragjykoj këtë pjesë, a janë konsultuar apo jo. Por, deri sa nuk ka ndonjë mohim nga kryeministri, ajo çka nuk mund të përjashtohet është se presidentja mund të ndërmarrë edhe hapa të njëanshëm duke parë se situata po del nga kontrolli dhe duke qenë se edhe ajo e ka peshën e vet politike, të cilën ndoshta po e përdor duke u bërë presion të gjitha palëve, përfshirë edhe kryeministrin”, thotë pë Radion Evropa e Lirë njohësi i proceseve politike, Agon Maliqi.

Radio Evropa e Lirë ka pyetur edhe Zyrën e presidentes dhe Zyrën e kryeministrit se a ka një dakordim ndërmjet tyre për zgjedhje të reja, por deri në publikimin e këtij teksti nuk janë përgjigjur.

Albert Krasniqi nga Demokraci Plus (D+), konsideron se ka një pajtim mes dy përfaqësueseve të shtetit (presidentes Osmani dhe kryeministrit Kurti) që të shkohet në organizimin e zgjedhjeve të reja në komunat veriore, siç thotë ai, dhe të dërgohet si akt dorëheqja e kryetarëve të zgjedhur.

Sipas tij, nuk ka ndonjë skenar ose rrugë tjetër për të dalë nga veprimet e panevojshme në veri të Kosovës, përveç se të pranohet propozimi i aleatëve ndërkombëtarë.

“Veprimet në veri vetëm sa kanë rritur kërkesën e serbëve lokalë që të ketë një asociacion dhe për më tepër do t’i forcojë kompetencat dhe është rreziku që ato tashmë të shkojnë edhe në sektorin e sigurisë për shkak se kemi treguar se me këto veprime nuk po jemi në gjendje që t’i qeverisim serbët lokalë atje dhe ata duhet të kenë qeverisje autonome”, thekson Krasniqi.

Zgjedhjet dhe Asociacioni i komunave me shumicë serbe

Sipas Agon Maliqit, zgjedhjet në veri nuk kanë kuptim nëse nuk sjellin rezultate, të cilat do të ndihmonin në përmbylljen e Marrëveshjes së Brukselit dhe të Ohrit.

“Zgjedhjet e reja sjellin rezultat në rast se paralelisht ka proces dhe hapa përpara nga ana e Qeverisë së Kosovës për themelimin e Asociacionit të komunave me shumicë serbe në Kosovë, sepse në atë rast do të mund të kemi institucione që do mund ta zbatonin këtë marrëveshje”, vlerëson Maliqi.

Zgjedhjet në katër komuna në veri të vendit (Mitrovicë të Veriut, Leposaviq, Zubin Potok dhe Zveçan) janë mbajtur më 23 prill. Kryetarët e këtyre komunave – të gjithë shqiptarë, kanë bërë betimin më 19 respektivisht 25 maj. Këto zgjedhje ishin bojkotuar nga komuniteti serb.

Situata atje u tensionua më 26 maj, kur Policia e Kosovës ndihmoi këta kryetarë të hyjnë në zyrat komunale, me gjithë rezistencën e serbëve lokalë.

Nga zgjedhjet e fundit, kryetar në Mitrovicën e Veriut është zgjedhur Erden Atiq nga Lëvizja Vetëvendosje, Lulzim Hetemi në Leposaviq po ashtu nga Lëvizja Vetëvendosje, kurse nga Partia Demokratike e Kosovës, në Zubin Potok është zgjedhur Izmir Zeqiri, dhe në Zveçan Ilir Peci.

Kryetari i Partisë Demokratike të Kosovës, Memli Krasniqi, thotë për Radion Evropa e Lirë, se as presidentja Vjosa Osmani dhe as kryeministri Albin Kurti “nuk kanë diskutuar për këtë temë” [për zgjedhjet e reja në veri të Kosovës] me PDK-në.

Presidentja Osmani, nga Moldavia ka thënë se organizimin e zgjedhjeve e lejon rregullimi ligjor i Kosovës. Kjo, sipas saj, mund të bëhet përmes një peticioni të nënshkruar nga 20 për qind e qytetarëve që janë në listën votuese, të cilët mund të iniciojnë procesin e zgjedhjeve të reja.

Cilat janë procedurat për organizimin e zgjedhjeve të reja?

Përveç peticionit të përmendur nga presidentja Osmani, Eugen Cakolli nga Instituti Demokratik i Kosovës, tregon se mundësia tjetër është edhe dorëheqja e kryetarëve aktualë.

“Ekzistojnë dy zgjidhje ligjore për të pasur zgjedhje të jashtëzakonshme në katër komunat veriore. E para është që të arrihet ndonjë dakordim më i madh politik dhe kryetarët e rinj të japin dorëheqje. Ndërsa, mundësia e dytë arrihet nëse 20 për qind e votueseve me të drejtë vote nënshkruajnë një lloji peticion apo kërkese që i dërgohet kryetarit të Kuvendit përkatës komunal”, sqaron Cakolli.

Pastaj, tregon Cakolli, duhet të organizohet një proces votimi ku qytetarët e komunave përkatëse pyeten nëse janë për ose kundër shkarkimit apo largimit të kryetarit të komunës se tyre, pavarësisht se cila mund të jetë arsyeja. Ky është një mini-referendum që kërkon të paktën 50 për qind plus një e votuesve të votojnë për largimin e kryetarëve.

Përveç organizimit të zgjedhjeve të reja në veri të Kosovës, Bashkimi Evropian ka kërkuar nga Kosova që të sigurohet pjesëmarrja e serbëve të Kosovës në zgjedhje dhe të nisë puna për themelimin e Asociacionit të komunave me shumicë serbe.