ATV

Author: E.R.

  • Përvjetori i pavarësisë, PDK në Itali me tubim madhështorë

    Përvjetori i pavarësisë, PDK në Itali me tubim madhështorë

    Dega e PDK-së në Itali ka organizuar një tubim madhështorë për nder të përvjetorit të pavarësisë së Kosovës.

    Në këtë tubim në të cilin morën pjesë një numër i madh i shqiptarëve që jetojnë këtë shtet, prezent ishin edhe strukturat më të larta drejtuese të këtij subjekti.

    Kreu i PDK-së, Memli Krasniqi në fjalën e tij ka kujtuar gjithë ata që janë më meritorët për lirinë e Kosovës, dëshmorët e Kombit.

    Krasniqi ka folur edhe për krerët e UÇK-së që ndodhen në Hagë, pa të cilët, sipas tij, është e zbehtë çdo festë.

    Kreu i PDK-së ka thënë se zotimi i tij dhe subjektit që ai e drejton është që ta bëjë Kosovën një shtet me të cilin krenohen qytetarët e saj dhe një shtet dinjitoz.

    Ai ka çmuar kontributin e diasporës dhënë para, gjatë dhe pas lufte.

    Krasniqi ka përgëzuar degën e PDK-së në Itali për organizimin e sotëm.

    Ndërsa, kryetari i PDK-së në Itali, Patriot Krasniqi ka thënë se po e shënojnë edhe këtë përvjetor pa prezencën e idetorëve dhe kreatorëve të UÇK-së dhe pavarësisë së Kosovës.

    Krasniqi i ka bërë thirrje të gjithëve që sa më shumë ta mbështesin PDK-në veçanërisht në diasporë, pasi sipas tij, PDK është adresa e dëshmuar në të gjitha etapat.

    Të pranishmëve me nga një fjalë rasti i janë drejtuar edhe Vlora Çitaku, Elmi Reçica dhe Ragip Xhaka.

  • AGIM DEVA MBETET YLL I PASHUAR I LETËRSISË PËR FËMIJË

    AGIM DEVA MBETET YLL I PASHUAR I LETËRSISË PËR FËMIJË

    Shkruan: Demir Reshiti

    Si sot, 15 vite më parë, pushoi së rrahuri zemra e shkrimtarit, profesorit dhe studiuesit të letërsisë, Agim Deva. Të gjithë fëmijët që ishin mësuar ta shohin në krye të Karvanit të Shkrimtarëve poetin me mjekër e me zemër të bardhë, atë të diel janë ndierë nga pak jetimë. Jetimë janë ndier edhe kolegët e Agimit, poetët për fëmijë për të cilët Agimi ishte si një çadër e madhe ku ata gjenin strehim. Ideatori dhe udhëheqësi i manifestimit më të madh letrar në botë (Karvanit të Shkrimtarëve për Fëmijë), Agim Deva është ndarë nga jeta, të dielën e parë të shkurtit në orët e mbrëmjes, pas një sëmundje të rëndë, në moshën 61-vjeçare.

    Ai ka kryer Fakultetin Filozofik, Degën e Gjuhës dhe Letërsisë Shqipe në Universitetin e Prishtinës, ku edhe ka magjistruar dhe doktoruar në fushën e letërsisë për fëmijë. Pas diplomimit në fakultet, ka punuar një kohë si gazetar në “Zërin e rinisë”, e me vonë si kryeredaktor i parë i “Gazetës së pionierëve”.

    Në vitin 1973, nisi punën në Fakultetin e Filologjisë, së pari – asistent në ‘Teorinë e letërsisë’, e pastaj, ligjërues në lëndën ‘Letërsia për fëmijë’, të cilën e ka mbajtur deri në maj të vitit 2008 kur iu dorëzua sëmundjes. Në këtë fakultet, Agim Deva, si profesor ordinar ka ligjëruar edhe: Fillet e gazetarisë, Kritikën letrare, ndërsa në Departamentin e Gazetarisë ka ligjëruar lëndën Zhanret e gazetarisë.

    Gjysmë shekulli krijimtari letrare

    Me krijime letrare ka filluar të merret shumë herët, qysh në moshën dhjetëvjeçare, pra që nga viti 1958. Librin e parë “Trumbeta e artë” e botoi më 1968, libër i cili zgjoi interesim të konsideruar si te lexuesit, po ashtu edhe te kritika letrare dhe ishte një sinjal se në letrat shqipe po vjen një shkrimtar i madh, i cili do të jetë i pranishëm përherë në skenën letrare duke mbajtur kontakt të vazhdueshëm me lexuesin, sidomos me lexuesit e vegjël.

    Ishte njëri ndër shkrimtarët më produktivë të letërsisë sonë, veçmas asaj për fëmijë. Për gjysmëshekulli të krijimtarisë letrare, Agimi i la letërsisë shqiptare një opus të madh veprash.

    Ka botuar një numër të konsideruar veprash letrare (prozë e poezi), antologji të ndryshme, panorama të poezisë botërore, vepra të ndryshme shkencore, monografi, kritika, recensione, ese, parathënie e pasthënie, një libër leximi për klasën e katërt fillore, një roman, dy pjese teatrore, dy libra për fëmijët e hendikepuar, libra ilustrativë për fëmijët e moshave parashkollore, libra me karakter ambiental e, së fundi, botoi edhe Abetaren me të cilën, që nga ky vit shkollor, i mësojnë shkronjat e bukura shqipe mijëra vogëlushë anekënd Kosovës.

    Opusi krijues i Agim Devës shtrihet në mbi 70 vëllime, të cilat janë botuar nga shumë shtëpi botuese e institucione të tjera prestigjioze si: “Rilindja”, “Flaka e vëllazërimit” në Shkup, “Pionieri”, “Libri shkollor”, “Rozafa”, “Zef Serembe”, “Kinderberg”, “UNICEF”-i, “SOROS”-i, “Sida”, “USAID”-i, “KCF”-ja, “REC”-i, “Save the childrens”, “Hendicap International”, “Oxfam”- etj.

    Disa nga veprat e veta, ky krijues i nxori nga shtypi si botime të autorit, ndërkohë që ka lënë në dorëshkrim edhe disa libra të tjerë.

    Agim Deva, për punën e tij letrare dhe arsimore, qe nderuar me shumë çmime prestigjioze si dhe me dhjetëra mirënjohje, pena të arta, falënderime e çmime të ndryshme për tekstet me të mira të interpretuara nëpër festivale e manifestime të tjera në Kosovë dhe jashtë saj.

    Ishte pjesëmarrës në Simpoziumin Ballkanik të Letërsisë për Fëmijë të mbajtur në Tiranë (në vitin 2000), si edhe në shumë takime letrare në Shqipëri, Austri, Belgjikë, Gjermani, Zvicër, Itali, Francë, Maqedoni, Mal të Zi etj.

    Poezitë e tij janë përkthyer në disa gjuhë të huaja, si në: anglisht, gjermanisht, arabisht, italisht, rusisht, sllovakisht, rumanisht, kroatisht, turqisht, sllovenisht, maqedonisht, serbisht etj.

    Cilësia dhe sasia e këtyre veprave flasin, gjithsesi, për një botë jashtëzakonisht të pasur krijuese dhe një qasje jashtëzakonisht të ndjeshme, të larmishme e interesante ndaj botës së fëmijës. Ai kurdoherë ka pasur se çka t`u thotë fëmijëve. Ai kurdoherë, me secilin libër, doli i ri, i freskët, me përmbajtje të reja.

    Agim Deva mbetet edhe studiuesi, kritiku dhe teoricieni i parë i letërsisë shqiptare për fëmijë në Kosovë i cili hodhi bazat e i dha shtysë zhvillimit të mendimit kritik letrar dhe historisë së kësaj letërsie.

    Ishte krijues shumë i lexuar e shumë i dashur dhe, njëkohësisht, krijues shumë i frytshëm. Me përvojën e tij të krijuesit dhe profesorit të letërsisë ndihmoi edhe një numër të konsideruar të shkrimtarëve tanë, duke ua redaktuar e recensionuar deri më tani mbi 300 libra.

    Mik i madh i fëmijëve dhe humanist shumëdimensional

    Agim Deva ishte mik i madh i fëmijëve, humanist shumëdimensional, i cili deri në ditët e fundit nuk reshti së dhëni kontributin e çmuar për të sotmen e për të ardhmen e tyre. Vepra e tij letrare e mbështetur në një spektër të pafund krijues e kënde të panumërta të interpretimit të dukurive e të botës së fëmijëve, do të jetojë për brezat e ardhshëm si një vlerë e madhe e kulturës sonë kombëtare.

    Si cilësia ashtu edhe numri i veprave të tij letrare e dëshmojnë të vërtetën se përkushtimi ndaj krijimtarisë artistike është përbërës i domosdoshëm i dhuntisë së madhe krijuese.

    Si themelues e drejtues i “Karvanit të Shkrimtarëve për Fëmijë” që nga viti 2000 e këtej, Agimi ka udhëhequr mbi 730 manifestime letrare në qindra mjedise anembanë Kosovës, por edhe me gjerë – në Maqedoni, Shqipëri, Mal të Zi, në Kosovën Lindore, etj. Ka organizuar disa simpoziume e sesione shkencore mbi çështjet e letërsisë për fëmijë e të rinj.

    Me kthjelltësi të rrallë mendimi, me një të folur të qartë e të shtruar, të rrjedhshëm e të këndshëm, shquhej në komunikimin me të gjithë, që nga kolegët e deri tek lexuesit e vegjël, fëmijët.

    Ai, tërë jetën, si mësues e si shkrimtar, me fjalën e tij ushqeu rritjen dhe lulëzimin e njeriut. Duke ia përkushtuar tërë jetën diturisë e artit, ai arriti që të krijonte mbretërinë e fjalës së vet, prej nga buronte humanizmi e çiltërsia. Me inteligjencën e veçantë në sytë e ëmbël e me fisnikëri të bukur në shpirt, ai ruante përfytyrimin e figurës që u takon të gjithëve.

    Me punën e tij të gjithanshme drejtuese e krijuese, ai ishte shembulli i një njeriu virtuoz, me një kapacitet të jashtëzakonshëm intelektual.

    Agimi nuk ishte vetëm letrar, shkencëtar dhe profesor. Ai njëherësh ka qenë qytetar me vlera dhe i spikatur. Ishte njeri me dinjitet, i fortë përballë dallgëve, burrëror dhe konstant në vlerat si qytetar.

    Ai do të rrojë mes nesh si model i Njeriut të Mirë, studiuesit e shkrimtarit, pedagogut, me vështrim përherë tek e ardhmja e shoqërisë.

    Agim Deva mbetet një yll i pashuar i letërsisë për fëmijë. Ai vazhdon të përhapë dhe të dërgojë dritë vezulluese, ngrohtësi, mirësi dhe dashuri njerëzore, mesazhe paqeje dhe humanizmi, veçanërisht te lexuesit e vegjël, që ai i donte aq shumë dhe që u kushtoi pjesën më të madhe të jetës dhe të energjisë së tij krijuese. Të tillë, do ta kujtojmë për jetë të jetëve.

    E ndiej vetën me fat që isha student, koleg, bashkëpunëtor dhe mik shumë i mirë i profesor Agimit.

     

    VEPRAT E BOTUARA:

    1. Trumbeta e artë, Rilindja, Prishtinë 1968
    2. Zonja e livadheve, Rilindja, Prishtinë 1969
    3. Midis yjeve, Pionieri, Prishtinë 1970
    4. Dhurata, Flaka e vëllazërimit, Shkup 1970
    5. Kali ynë lazdran, Rilindja, Prishtinë 1971
    6. Reja qe shet akullore, Rilindja, Prishtinë 1972
    7. Shoku im pa xhepa, Flaka e vëllazërimit, Shkup 1972
    8. Gishti ngjyrë vjollca, Rilindja, Prishtinë 1973
    9. Gjevrekët e liqenit, Rilindja, Prishtinë 1974
    10. Panushi (roman), Rilindja, Prishtinë 1974
    11. Merrja lojës vetëm zemrën, Rilindja, Prishtinë 1975
    12. Parada e luajve, Rilindja, Prishtinë 1977
    13. Antologji e poezisë shqipe për fëmijë, Prishtinë 1977
    14. Me temlik u nisa në botë, Rilindja, Prishtinë 1978
    15. Një mijë çerdhe, Rilindja, Prishtinë 1979
    16. Rrota e historisë, Rilindja, Prishtinë 1981
    17. Nëpër gurë e valë, Rilindja, Prishtinë 1982
    18. Tregu i xhinkave, Rilindja, Prishtinë 1 984
    19. Harta e zemrës, Flaka e vëllazërimit, Shkup 1984
    20. Letërsia shqipe për fëmijë në Jugosllavi, (studim i gjatë), Obzorja, Maribor 1985
    21. Kur qan e qesh Majliza, Rilindja, Prishtinë 1985
    22. Kënga e urimeve, Rilindja, Prishtinë 1986
    23. Njeriu i vjeshtës, Flaka e vëllazërimit, Shkup 1986
    24. Kapelat, Libri shkollor, Prishtinë 1986
    25. Çaste në trohallë, Rilindja, Prishtinë 1987
    26. Fjalim nga tavolina, Rilindja, Prishtinë 1989
    27. Xhela rritet një herë tjetër Rilindja, Prishtinë 1990
    28. Po ma vjedh dikush qytetin, botim i autorit, Prishtinë 1 994
    29. Poezi të zgjedhura për fëmijë, Shkup 1996
    30. Xhela me një rrotë, Enti i Teksteve, Prishtinë 1998
    31. Guri rrokulliset përpjetë, botim i autorit, Tetovë 1999
    32. Xhela gjet yllin e vet, botim i autorit, Prishtinë 2000
    33. Koha e luleve, botoi “Oxfam”, Prishtinë 2000
    34. Edhe rrugët udhëtojnë, botim autorit, Prishtinë 2000
    35. Vigani i Zanës, Prishtine 2000
    36. Gjuha e mureve, botim i autorit, Prishtinë 2000
    37. Qyteti i pikëpyetjeve, botoi “Kinderherg”u, 2001
    38. Fjala ruhet kur shkruhet, Hendicap international, 2002
    39. Natyreza, botoi “REC”u, Prishtinë 2002
    40. Pasaportë e jetës sime, KAC, Prishtinë 2003
    41. Unë jam unë, UNICEF-i, Prishtinë 2001
    42. Duart e arta, Soros, Unicef, 2001
    43. Shtrati i kaprollit, Save the childrens, Soros, 2001
    44. Sa me shumë drunj, Soros, Save the childrens, Prishtinë 2001
    45. Loni e Liraku në pyll, Sorosi, Prishtinë 2001
    46. Topi, Unicef, Prishtinë 2001
    47. Biçikleta prej çokolate, Oxfam, Soros, Prishtinë 2001
    48. Numëroj, Soros, Unicef, Prishtinë 2001
    49. Mali, Save the childrens Prishtinë 2001
    50. Ditët e javës sime, Prishtinë 2001
    51. Ora, Save the childrens, Prishtinë 2001
    52. Fëmijët, Unicef, Soros, Prishtinë 2001
    53. Kulmi i botës, antologji e poezisë botërore për fëmijë, Enti i teksteve, Prishtinë 1984
    54. Romani ynë për fëmijë (monografi) Rilindja, Prishtinë 1977
    55. Poezia shqipe për fëmijë (1872-1980) (studim monografik), Rilindja, Prishtinë 1982
    56. Fjala e përjetimi (studime e kritika), Rilindja, Prishtinë 1984
    57. Fjala bëhet lule (koautor), libër lex. për klasën IV fillore, Enti i teksteve, Prishtinë 1985
    58. Orët e duartrokitjeve (koautor), SBASHK-u, Prishtinë 2002
    59. Përse banka përsërit klasën, Prishtinë 1979
    60. Ankohet çanta e vogël, Naim Frashëri, Tiranë 1986
    61. Jeta jetohet me zemër, pjesë teatrore, Prishtinë 2003
    62. Në dhomën katër me tri, (pjesë teatrore), Prishtinë 1998
    63. Si shkruhet pa shkronja, Rozafa, Prishtinë 2003
    64. Shtatë mrekullitë e mia, botim i autorit, Prishtinë 2004
    65. Këtu dikush ka qenë, botim i autorit, Prishtinë 2005
    66. Shitet babi im, botim i autorit, Prishtinë 2006
    67. Poezi të zgjedhura për fëmijë, Libri shkollor, Prishtinë 2006
    68. Mungon një zemër, botim i autorit, Prishtinë 2007
    69. Unë dhe shokët e mi, botoi UNICEF-i, Prishtinë 2007
    70. Gurët fluturues, Zef Serembe, Prishtinë 2007 etj.
    71. Kush troket në mua, Zef Serembe, Prishtinë 2008
    72. Orët pa tregues. Zef Serembe, Prishtinë 2008
    73. Kërkoj orëndreqës, PEN, Prishtinë 2008
    74. Trahoma, Shkup 2008

     

    Shpërblimet:

    SHPËRBLIMI I DHJETORIT

    SHPËRBLIMI “NEVEN” (Novi Sad)

    SHPËRBLIMI I BV të INTERESIT (KK. i Prishtinës)

    SHPËRBLIMI “GANIMETE TERBESHI”

    SHPËRBLIMI “NAIM FRASHERI”

    SHPËRBLIMI “ADELINA MAMAQI” (Tiranë)

    SHPËRBLIMI “VEHBI KIKAJ”

    SHPËRBLIMI “YMER ELSHANI”

    SHPËRBLIMI I “PIONIERIT”

    SHPËRBLIMI “SOFRA POETIKE e Y. ELSHANIT”

    SHPËRBLIMI “AZEM SHKRELI” (nga Ministria e Kulturës)

  • Dr. Selami Sylejmani, profesionist e humanist i ndritur

    Dr. Selami Sylejmani, profesionist e humanist i ndritur

    Shkruan: Demir Reshiti

    Të martën (9 janar 2024) e ka kremtuar ditëlindjen e 70-të doktori i respektuar opojan, docent. dr. sc. Selami Sylejmani. Selamiu është një nga emrat më të spikatur të mjekësisë në Kosovë dhe rajon, i specializuar në lëmin e gjinekologjisë në Zagreb dhe Tiranë dhe një nga pionierët e ultrasonografisë në Kosovë.

    Dr. Selamiu është pronar i klinikës Ginekos, një nga klinikat e para private gjinekologjike ku ka dhënë kontribut të jashtëzakonshëm sidomos në periudhën e okupimit të institucioneve nga ana e pushtuesit serb. Në këtë klinikë ka trajtuar falas me mijëra paciente me kushte të rënda sociale, ndërsa për hir të mikpritjes që treva e Kukësit u ka bërë shqiptarëve të dëbuar nga Kosova, me vite të tëra ka ofruar shërbime falas për pacientet nga Kukësi e rrethina!


    Përveç si profesionist e humanist i spikatur, dr. Selamiu është edhe atdhetar i devotshëm. Ka qenë i burgosur dhe i përndjekur politik, ndërsa vëllain e tij Hyrmetin e kanë vrarë forcat ushtarako policore serbe në masakrën e Tususit, në vitin 1999.

    Dr. Selamiu u lind më 09.01.1954, në Bresanë. Është djali më i madh i prindërve Nijazi (Sylejman) Sylejmani dhe Xhevahire (Osmani) Sylejmani, të cilët përveç Selamiut kishin edhe dy djem Xhemilin (stomatolog) dhe Hyrmetin (i vrarë në masakrën e Tususit në Prizren).

    I lindur në një familje që shquhej për dëshirën e madhe për arsimim

    Fëmijëria e Selami Sylejmanit, nuk dallon shumë nga fëmijëria e bashkëmoshatareve të vet dhe bashkëvendëseve të vet. I lindur në “kulmin” e një dimri shumë të acartë të cilin akoma më të acartë e kishte bërë  aksioni i grumbullimit të armëve i ideuar nga krimineli serb Aleksander Rankoviq. Në shënjestër të këtij aksioni famëkeq ishte edhe gjyshi i Selamiut, Sylejmani, i cili si shumë shqiptarë tjerë qe ftuar për ta dorëzuar armën ndërsa babai i tij Nijaziu disa herë është dashur vullnetar të shkojë për ta ndërruar atë (Sylejmanin) kur është thirrur në polici, për ta kursyer nga torturat që i janë bërë, me pretekst të dorëzimit të armeve!
    Babai i Selamiut, Nijaziu, që në fëmijëri shquhej për dëshirën e madhe që kishte për mësim dhe për ta realizuar këtë dëshirë kishte mbështetjen e babait të ti haxhi Sylës i cili me t’u hapur shkolla shqipe në Bresanë, ishte ndër të parët që e dërgoi djalin e tij në shkollë të mësuesi i parë i asaj kohe, Hajdar Siçeca. Madje duke e ditur rëndësinë e arsimimit shqip, gjyshi i Selamiut, Syla i Ramadanit, në mënyrë vullnetare, pa pagesë, ua ka mundësuar që në njërën dhomë të shtëpisë e cila kishte vetëm dy dhoma, të banojnë mësuesi Hajdar së bashku me bashkëshorte e tij Arifqe Siçecën, të cilët në atë periudhë punonin si mësues dhe angazhoheshin në çrrënjosjen e analfabetizmit në Bresanë dhe rrethinë.

    Me qëllim të lehtësimit të shkollimit të fëmijëve, babai i Selamiut, Nijaziu, shpërngulet në Prizren ku në vitin 1979 pëson një fatkeqësi komunikacioni me biçikletë, në dalje të rrugës së Lubizhdës së Prizrenit, për në rrugë kryesore. Nijaziu aksidentohet nga gjykatësi i gjykatës së Prizrenit Zhivko Shtatkiç, dhe vdes në spitalin e Prizrenit në moshën 52 vjeçare.

    Nga dëshira për arsim, prindërit e dërgojnë në shkollë Selamiun akoma pa i mbushur 7 vjet. Shkollën fillore e përfundoi në vendlindjen e tij, Bresanë, ndërsa shkollimin e mesëm në Shkollën e Mesme të Mjekësisë në Prizren (1972) dhe pajiset me diplomën Teknik medicinal.

     

    Në vitin 1980 e përfundon fakultetin e mjekësisë në Universitetin e Prishtinës. Ndërsa studimet pasuniversitare i përfundon në vitin 1987 në Universitetin e Zagrebit (Kroaci), drejtimi Ultratingulli në Mjekësinë Klinike, dhe avancohet në gradën Ultrasonist në lëmin e gjinekologjisë dhe obstetrikës. Një vit më vonë (1988), në të njëjtin universitet kryen specializimin në lëmin e gjinekologjisë me Obstetrikë. Titullin magjistër i shkencave mjekësore e fiton në vitin 1995 në  Fakultetin e Mjekësisë të Universitetit të Prishtinës ku mbron me sukses të shkëlqyer tezen “Paraqitja ultrasonike e shtatzënive të hershme patologjike, posaçërisht në blighted ovum”.

    Gradën Doktor i shkencave mjekësore e arrin në vitin 2000 në Fakultetin e Mjekësisë të Universitetit të Tiranës ku mbron tezen “Parashikimi i ovulacionit dhe vlerësimi i funksionit të vezoreve te gratë me anë të ultratingullit”.

    Titullin akademik titullin akademik Profesor MD, PhD e arrin në Universitetin Publik “Fehmi Agani” në Gjakovë ndërsa titullin  “Docent” e arrin në në Universitetin Ndërkombëtar DIU Libertas, Zagreb, Kroaci.

    Specializime të ndryshme pasuniversitare në lëmin e ultrasonografisë në gjinekologji dhe obstetrikë ka kryer në institucione të njohura kombëtare e ndërkombëtare.

    I vlerësuar për punë profesionale dhe humanizëm

    Ka punuar si teknik medicinal, mjek, mësimdhënës dhe si gjinekolog në qytete të ndryshme të Kosovës: Suharekë, Dragash, Prizren, Podujevë dhe Prishtinë.

    Pas përfundimit të shkollës së mesme ka punuar për disa muaj (1975) si Infermier ne dhomën e pranimit të Spitalit të përgjithshëm të Qendrës Medicinale të Prizrenit. Më pas, në periudhën 1979-1980, ka punuar si profesor i disa lëndëve në Qendrën e Shkollave të Mesme “Jeta e Re” Suharekë.

    Në shtator të vitit 1980 punësohet si mjek i përgjithshëm në Shtëpinë e Shëndetit në Dragash dhe në punkte shëndetësore nëpër fshatra të kësaj komune (sipas nevojës). Pas demonstratave studentore të vitit 1981 kur fillojnë diferencimet e arrestimet e intelektualëve me bagazh kombëtar,  më 13 prill e arrestojnë edhe doktor Selamiun për shkak të bindjeve politike me arsyetimin se ishte marrë me “veprimtari armiqësore” sepse kishte dalë në përkrahje të demonstratave dhe përkrahje e kërkesës së studenteve për  Kosovën Republikë! Një javë pasi e lirojnë nga burgu, e dërgojnë në shërbim ushtarak në Novi Sad të Vojvodinës. Pas përfundimit të shërbimit ushtarak, kthehet në vendin e punës në shtëpinë e shëndetit në Dragash, mirëpo menjëherë e përjashtojnë nga puna me procedurë të shpejtë!

    Në qershor të vitit 1982, pas përfundimit të procesit gjyqësor rikthehet në vendin e punës në Shtëpinë e shëndetit në Dragash dhe i caktohet vendi i punës në fshatin e largët Restelicë (si formë e dënimit për shkak të ‘papërshtatshmërisë’ politike). Në Restelicë mirëpritet nga banoret sepse behët mjeku i parë i përhershëm në këtë fshat! Respekti që gëzoi në këtë fshat bie në sy të strukturave drejtuese të asaj kohe dhe nga ana e drejtorisë së Shtëpisë së Shëndetit në Dragash “këshillohet” që tani në mënyrë “vullnetare” të largohet nga vendi i punës, ose në të kundërtën ata sërish do të nisin procedurën gjyqësore për përjashtimin nga puna! Detyrohet t’i zbatojë urdhrat dhe në mënyrë “vullnetare” dhe më 30 gusht1982 e lëshon vendin e punës dhe të nesërmen fillon punë si mjek në ambulancën e fshatit Orllan të komunës së Podujevës. Që të punësohet në Orllan, ndihmohet nga drejtori i Shtëpisë së Shëndetit Podujevë, dr. Muharrem Avdiu.

    Në fillim të vitit 1983 fillon punë në Qendrën Medicinale “Boro e Ramizi” në Prizren. Për punësimin në Qendrën Medicinale “Boro e Ramizi” në Prizren e ndihmon dr. Ymrane Celina e cila atëbotë ishte kryetare e pleqësisë së organizatës bazë, sepse ishte e vështirë një mjek me biografi pas burgosjes për shkaqe politike dhe largimit nga puna të pranohet në punë. Deri në përfundimin e specializimit, punoi si mjek i përgjithshëm, ndërsa pas përfundimit të specializimit (29.02.1988), punoi profesionin e gjinekologut dhe obstetrit në repartin gjinekologjik obstetrikë të Spitalit të përgjithshëm të Prizrenit. Në këtë spital për një kohë të shkurtër u bë njëri nga gjinekologët më të famshëm dhe në vitin 1989 e themeloi Kabinetin e Diagnostikës Ultrasonografike në Mjekësi.
    Si gjinekolog punoi deri më 14.10.1991, kur nga organi i dhunshëm punë-drejtues largohet nga puna. Pas largimit nga puna nga Spitali i Prizrenit, më 15 tetor të vitit 1991, themelon Ndërmarrjen private Shëndetësore “GINEKOS” në Prizren ku punon edhe tani.

    Poliklinika GINEKOS, shndërrohet në vatër të arsimit – Ordinancë Shkollë dhe “Nëna Terezë e dytë”.  Këtu mbajtën pjesën praktike studentët e Fakultetit të Mjekësisë të Universitetit të Prishtinës. Në poliklinikën GINEKOS e kryen pjesën praktike të gjitha gjeneratat e kësaj periudhe të Shkollës së Mesme të Mjekësisë “Luciano Motroni” në Prizren – drejtimi i mamive.

    Nga viti 1992 deri në vitin 2000 ka punuar si mësimdhënës në Shkollën e Mesme të Mjekësisë “Luciano Motroni” në Prizren. Në këtë shkollë ka punuar si profesor i lëndës së gjinekologjisë me obstetrikë për drejtimin e Mamive dhe Infermierisë së përgjithshme, (pa pagesë), në objektet Shtëpitë Shkolla, si formë e mbijetesës së arsimit shqip, dhe formë e rezistencës dhe luftës për mbijetesë të arsimit shqip të popullit tonë.

    Ka punuar pa pagesë në Ambulancën “Nëna Terezë” në Prizren dhe Spitalin “Nëna Terezë” në Prishtinë për 4 vite me radhë (1995-1999).

    Pas përfundimit të luftës, në qershor të vitit 1999, për shkak të rrethanave të krijuara dhe mungesës së mjekeve – gjinekolog në Repartin gjinekologji -obstetrikë të Spitalit Rajonal, rikthehet dhe fillon punën e gjinekologut, pa kompensim material. Më 15 nëntor 1999 i lejohet pushim pa pagesë për një vit me qëllim të përfundimit të punimit të doktoratës të cilin e mbron publikisht më 2 maj të vitit 2000.

    Pas fitimit të gradës shkencore doktor i shkencave të mjekësisë, udhëheqësit e Spitalit të përgjithshëm Rajonal nuk treguan gatishmëri e as interes për të vazhduar punën në këtë institucion, për çka serish kthehet dhe vazhdon punën private në Poliklinikën Ginekos.

    Në qershor të vitit 2013 angazhohet si Docent – Ligjërues në studimet pasuniversitare në lëmin e diagnostikës ultrasonografike në gjinekologji me obstetrikë në Universitetin Ndërkombëtar DIU Libertas në Zagreb të Kroacisë.

    Më 3 tetor 2014 nis punën në Fakultetin e Mjekësisë, Drejtimi Infermieri dhe Mami si profesor i lëndëve: Obstetrika dhe Gjinekologjia; Shëndeti Riprodhues dhe Etika 1; Shëndeti Riprodhues dhe Etika 2; dhe Infeksionet në shtatzëni dhe periudhën perinatale.

    Ka organizuar, udhëhequr dhe ligjëruar në Shkollën Ndërkombëtare për edukim në lëmin e diagnostikës ultrasonografike në mjekësi ALOKA-KOSOVA, 2003-2005, Prizren. Ka organizuar, udhëhequr dhe ligjëruar Kursin njëjavor në lëmin e diagnostikës ultrasonografike në gjinekologji dhe obstetrikë mbajtur në Spitalin Rajonal të Prizrenit 05-09 nëntor 2006. Ishte organizator dhe Udhëheqës i Kursit Intensiv në lëmin e ultrasonografisë së vazave të gjakut, mbajtur në Spitalin Rajonal të Prizrenit, nga 12-16 nëntor 2007.

    Ishte organizator, udhëheqës dhe ligjërues i punëtorisë në lëmin e ultrasonografisë së sëmundjeve të gjirit, mbajtur në bashkëpunim me Poliklinikën GINEKOS dhe NT KONTI, Prizren, Ligjërues në Konferencën e 4-të Ndërkombëtare të Perinatologjisë Shqiptare mbajtur në Tiranë – Shqipëri, nga 11-13 qershor 2010; Ligjërues në Kongresin e 5-të të Shoqatës Shqiptare të Perinatologjisë, mbajtur në Tiranë , Shqipëri, 10-12 Qershor 2011; Ligjërues në Kongresin e parë të Shoqatës së Obstetërve dhe gjinekologve të Kosovës, mbajtur në Pejë më 18-19 Maj 2012; Ligjërues në Simpoziumin: “Epidemiologjia dhe diagnostikimi bashkëkohor i sëmundjeve të gjirit”, organizuar nga Universiteti i Vlorës, 27 prill 2012; Ligjërues në Konferencën Ndërkombëtare: “Zhvillimet bashkëkohore në Farmaci” mbajtur nga 22-23 shtator 2012, Prishtinë; Ligjërues në Kongresin e 6-të Ndërkombëtar të Shoqatës Shqiptare të Perinatologjisë, mbajtur në Tiranë nga 02-03 shkurt, 2013; Ligjërues në Shkollën e 12-të të Perinatologeve të Serbisë mbajtur nga 05-07 prill 2013, në Tara; Ligjërues në Kursin Intensiv bazik “Ultrasonografia në Obstetrikë” mbajtur në Klinikën e gjinekologjisë me obstetrikë të Fakultetit të Mjekësisë në Prishtinë nga 29-31.05.2013.

    Dr. Selami Sylejmani është autor dhe bashkautor i mbi 200 punimeve shkencore të publikuara në revista prestigjioze me impakt ndërkombëtar, si dhe organizator dhe pjesëmarrës në dhjetëra konferenca e aktivitete shkencore kombëtare e ndërkombëtare.

    Është anëtar i Shoqatës së Mjekëve të Kosovës; Anëtar i Kryesisë së Shoqatës së Obstetërve dhe Gjinekologëve të Kosovës në kryesinë aktuale; Kryetar i Shoqatës së Kosovës për Aplikimin e Ultratingullit në Mjekësi në periudhën 2002 – 2007; Anëtar i Shoqatës së Mjekëve Privatë të Kosovës; Anëtar i Shoqatës së Mjekëve të Kroacisë (Hrvatski Lječnički Zbor); Anëtar i ISUOG-ut (International Society of Ultrasound in Obstetrics and Gynecology); Anëtar nderi i Shoqatës së Perinatologeve të Shqipërisë;  Anëtar i Kryesisë së Shoqatës së Obstetërve dhe Gjinekologëve të Kosovës ne kryesinë aktuale.

    Nga viti 2018, dr. Selamiu është drejtor i Shkollës Ndëruniversitare Ndërkombëtare Ian Donald,  për Republikën e Kosovës, te cilin post ende e mban.

    Për punën dhe angazhimin e tij prej afro gjysmë shekulli në fushën e mjekësisë dhe humanizmit e atdhetarisë, është vlerësuar me qindra mirënjohje, certifikata e plaketa nderi nga institucione vendore e ndërkombëtare si dhe nga qindra pacientë të cilët falë përkujdesjes së doktor Selamiut janë bërë prindër madje edhe në rastet kur i kishin të shuara shpresat!

    Doktor Selamiu është i martuar me Shefkate Hajdarin nga fshati Bresanë me të cilën kanë lindur pesë fëmijë, tri vajza (Sebahate, Shqipe, Dorarta) dhe dy djem (Leutrim, Qendrim), që të gjithë kanë përfunduar fakultetin, katër të parët janë të martuar dhe janë bërë prindër, ndërsa djali i vogël Qendrimi është i fejuar. Selamiu dhe bashkëshortja e tij Shefkatja janë gjyshër të lumtur të dy mbesave (Amla e Anda) dhe katër nipave (Leari, Noari, Blini dhe Lisi).

    Vlen të theksohet se të gjithë fëmijët e dr. Selamiut kanë zgjedhur profesionin e mantelbardhit! Vajza e madhe Sebahate Sylejmani Shala, mjeke, Gjinekologe – Obstetre, punon në QKMF në Sharr; Vajza e dytë Shqipe Sylejmani Rexhepi, magjistre e farmacisë; Vajza e vogël, Dorarta Sylejmani Morina, Magjistre e Farmacisë; Djali i madh Leutrimi, mjek në specializim të Dermatovenerologjisë; Bashkëshortja e Leutrimit, Saimja, mjeke në specializim të gjinekologjisë me obstetrikë, ndërsa djali i vogël Qëndrimi është mjek, dhe e fejuara e Qëndrimit, Ela Jonuzi, është studente e Fakultetit të Mjekësisë!

    Doktor Selamiun e urojmë për ditëlindjen e tij të 70-të duke i dëshiruar shëndet në radhë të parë, dhe suksese në veprimtarinë e tij shkencore e humane!

    Disa histori jete të dr. Selamiut- kuriozitete që nuk harrohen!

    I – Më 14.10.1991, organi i përdhunshëm punë-drejtues e largon nga puna, në vazhdën e zbrazjes së institucioneve nga kuadrot e përkatësisë shqiptare. Për mbijetesë, më 15.10.1991, fillon punën në Poliklinikën Ginekos në Prizren. Me përkushtim maksimal e profesionalizëm që nga ajo ditë, asnjëherë, nuk e ka kthyer asnjë paciente pa e vizituar, pavarësisht a ka pasur mundësi të paguajë! Ky profesionalizëm dhe kjo korrektësi shumë herë u vlerësua nga shumë paciente.

    II – Në Dragash e konsiderojnë armik i popullit, e burgosin dhe e largojnë nga puna! Në Podujevë dhe fshatrat e komunës së Podujevës, bëhet mjek shumë i vlerësuar dhe i paharruar edhe pas 40 vitesh! Më 13 prill të vitit 1981, gjatë ushtrimit të profesionit të mjekut, arrestohet nga policia dhe me procedurë të shpejtë burgost, për shkak të përkrahjes së demonstratave të marsit të vitit 1981 dhe kërkesës Kosova Republikë. Pas lirimit nga burgu e largojnë nga puna, dhe për një periudhë detyrohet për mbijetesë të punojë punë krahu. Me ndihmën e Dr. Muharrem Avdiut, në atë periudhë drejtor i Shtëpisë së Shëndetit në Podujevë, më 31.08.1982, pranohet në punë në Ambulancën në Orllan. Aty punon deri më 10.01.1983. Populli i Orllanit dhe i fshatrave përreth, si popull i mrekullueshëm që është e mirëpret doktor Selamiun i cili ju shërbente me devotshmëri!

    Bota është e vogël! Në vitin 2012, qifti bashkëshortor Strelli – Pollomi, nga Podujeva të cilët edhe përkundër dëshirës 4 vite, ende nuk kishin fëmijë, shkojnë në ordinancën e tij private GINEKOS. Pas këshillave dhe terapisë, zonja G. S. ngel shtatzënë dhe i lindin dy vajza të bukura dhe të mrekullueshme, Rumesa dhe Tara. Pas 10 vitesh, ky çift bashkëshortor ishin shumë mirënjohës dhe së bashku me vajzat i shkojnë për vizitë dhe e falënderojnë doktor Selamiun!

    III- Fëmija i parë i dr. Selamiut, Sebahatja, ka lindur më 22.06.1981, ndërsa është  regjistruar zyrtarisht më 10.10.1981, për shkak se në periudhën e lindjes, babai i Sebahates, ishte burgosur nga regjimi dhe ndodhej në burg në Prizren, për shkak të përkrahjes së demonstratave të marsit të vitit 1981 dhe Shpalljes së Kosovës Republikë. Lindja e Sebahates u krye në shtëpinë private të familjes së Selami Sylejmanit, e ndihmuar nga mamia Shefie Tutuli Gashi, për shkak të frikës nga ish regjimi, që lindja e bashkëshortes së një të burgosuri politik të kryhet në institucione publike. Sebahate Selami Sylejmani Shala, tash është e martuar me Burim Shalën nga Prizreni dhe me profesion është mjeke gjinekologe.

    IV- Në datat 30 mars – 1 prill 2007, në Lahore të Pakistanit, është mbajtur Konferenca Ndërkombëtare Pakistanezo-Kosovare: PAK – KOSOVA INTERNATIONAL CONFRENCE, me rreth 500 pjesëmarrës nga të gjitha kontinentet. Në këtë Konferencë, Kosova u përfaqësua nga: Zëvendësministri i Shëndetësisë Dr. Fadil Kryeziu. Ligjërues ishin prof. Selami Sylejmani, dhe prof. Sejran Abdushi, ndërsa staf shoqërues Tahir Hoxha (tashmë i ndjerë) dhe Dorarta Sylejmani. Nga Kosova u prezantuan 5 ligjërata. Gjatë këtij aktiviteti shkencor, u bë promovimi i një librit mbi Kosovën, i një autori pakistanez. Pritja e përfaqësueseve të Kosovës në Lahore, u bë nga miku i madh i Kosovës, prof. Syed Amir Gilani. Ishte pritje e ngjashme me një delegacion zyrtar shtetëror, fantastike, e paharrueshme… Kuriozitet: Me rastin e hapjes zyrtare të konferencës, ishte traditë që të intonohen himnet e të dy shteteve. Delegacionit të Kosovës iu kërkua nga organizatori që ta dorëzojnë himnin e shtetit – Kosovës! Mirëpo, Kosova ende nuk ishte shtet i pranuar dhe i njohur. Sikur ta dorëzonim himnin e shtetit të Shqipërisë, ai mund të njihej nga ndonjë i pranishëm dhe të mund të na paraqiste ndonjë telashe të pa planifikuar. Atëherë, të gjithë u dakorduan dhe nga interneti e shkarkuan këngën  “Kur ka ra kushtrimi në Kosovë” që njihej si himni dardan dhe për herë të parë në një aktivitet zyrtar në mes dy Shoqatave të dy shteteve, u intonua zyrtarisht himni i Dardanisë! Të gjithë të pranishmit u ngritën dhe qëndruan në shenjë nderimi, gjatë antonimit. Ishte ndjenjë që nuk përsëritet!

     

     

     

  • INXHINIERI FATON PIRAJ I NJOHUR PËR SHPIKJET GJENIALE NË INDUSTRINË AUTOMOBILISTIKE

    INXHINIERI FATON PIRAJ I NJOHUR PËR SHPIKJET GJENIALE NË INDUSTRINË AUTOMOBILISTIKE

    Shkruan: Demir Reshiti

    Stereotipin që është krijuar ndër ne, se shqiptarët e mërgatës shihen vetëm si punëtorë krahu në vendet ku jetojnë, e kanë thyer shumë shqiptarë sidomos të rinj, të cilët janë inkuadruar dhe kanë arritur suksese mjaft të larta në shkencë, ekonomi, politikë, mjekësi etj. Emra të njohur ata janë bërë nëpër fusha të ndryshme në mbarë botën dhe suksesi i tyre është i padiskutueshëm.

    Në kuadër të ciklit të shkrimeve Portrete opojanësh që na bëjnë krenar, sot do ta bëj prezantimin e inxhinierit Faton Piraj, nga fshati Pllavë i komunës së Sharrit i cili jeton e punon në Vjenë të Austrisë. Shkas për ta bërë këtë shkrim është ditëlindja e tij e 58-të të cilën Fatoni këtë radhë do ta kremtojë në Vjenë në një ambient familjar i rrethuar nga tre fëmijët e tij që tashmë kanë dhënë shenja se po ecin gjurmëve të suksesit të babait!

    Fatoni është i lindur më 28 dhjetor 1965 në fshatin Pllavë. Është fëmija i dytë i prindërve Jahja e Hyrmete Piraj të cilët linden pesë fëmijë (dy djem e tri vajza).

    Faton Piraj

    Shkollimin fillor e ka kryer në vendlindje (4 klasë) dhe katër klasë të tjera në Shkollën “Shaban Shabani” në Llapushnik ku është shpallur nxënësi më i mirë i të gjitha kohërave i kësaj shkolle. Këtë të dhënë e gjeta në monografinë e shkollës të shkruar nga ish arsimtari Tafil Krasniqi! Gjatë shkollimit fillor dhe të mesëm, ka qenë shumë aktiv nëpër gara e kuize të diturisë që organizoheshin nga shkolla dhe institucionet tjera në nivel të komunës e të Kosovës.

    Dy vitet e para të shkollimit të mesëm i ka kryer në Sharr ndërsa dy të tjerat në Gjimnazin “Gjon Buzuku” në Prizren, drejtimi Matematikë-Teknikë. Në periudhën 1985-1990 me sukses të shkëlqyer përfundon Fakultetin e makinerisë, drejtimi Makineri – prodhimtari, në Universitetin e Prishtinës, ku fiton titullin Inxhinier i diplomuar i Makinerisë e njëherësh merr diplomën “Student i dalluar” i këtij Universiteti. Vlen të theksohet se krahas studimeve Fatoni për dy vite ka punuar edhe si gazetar në revistën studentore “Bota e re”.

    Pas përfundimit në afat rekord të studimeve, një vit ka punuar si profesor i matematikës në gjimnazin “Emin Duraku” në Sharr.
    Me ambicie për njohuri të reja në shkencë të cilat nuk i realizonte dot në vendlindje për shkak të të ardhurave të ulëta që realizonte si profesor, Fatoni vendos të merr rrugën e mërgimit dhe destinacioni i tij ishte Vjena ku fillimisht ka bërë punë nga më të ndryshmet dhe më të vështirat derisa arrin ta bëj nostrifikimin e diplomës dhe të punësohet në fushën për të cilën ishte shkolluar, përkatësisht si inxhinier në industrinë e veturave luksoze. Ka kryer edhe një mori specializimesh në fushën inxhinierike, kompjuterike e të gjuhëve të huaja, të gjitha këto në harkun kohor 1996-2006 në Vjenë të Austrisë.

    Njëri nga inxhinierët shqiptarë me më shumë shpikje të patentuara!

    Njohuritë e arritura gjatë shkollimit filloi t’i zbatonte me sukses në vendin e tij të punës ku iu krijuan mundësi edhe të bëjë dhjetëra zbulime të reja e të rëndësishme për industrinë automobilistike, disa nga të cilat ka arritur t’i patentojë!

    Për rreth 15 vite sa ka punuar në industrinë automobilistike, Fatoni ka bërë shumë projekte për brendet më të njohura të automobilave si Mercedes, Audi, Porsche, Toyota, etj., të cilat ka arritur t’i patentojë ndërkombëtarisht, duke u bërë njëri nga inxhinierët shqiptarë me më shumë shpikje të patentuara!

    Është inxhinieri i parë që ka arritur ta konstruktoj një mekanizëm i cili përpunon vrimën e motorit (që e mundëson shpejtësinë e sigurt deri mbi 330 km/h!). “Motori i veturave moderne ‘Porsche’ e ka një vrimë të shkallëzuar, në të cilën është i pozicionuar boshti i kollodokut (boshti ku lidhen manivelat e pistonave të motorit). Kjo vrimë, që përbëhet nga disa pjesë, ka saktësinë (tolerancën) aksiale e cilindrike nën 0,005 mm, pra nën 5 të mijtat e milimetrit (saktësi shumë e lartë shkaku i rrotullimeve të larta të motorit me mbi 6700 rrotullime në minutë). Për ta hapur dhe përpunuar këtë vrimë nuk mjaftonin kushinetat standarde e as ato speciale mekanike, ku do të vendosej vegla boshtore gdhendëse, shkaku i saktësisë së tyre të pamjaftueshme (mbi 0,005mm)”, shpjegon Fatoni duke shtuar se ky zbulim është patentuar dhe është e arritur e madhe, gati e pa imagjinuar në industrinë automobilistike! Fatoni thekson se për ta arritur këtë saktësi shkencore ishte sfidë e rëndë e shoqëruar me tensione të larta nervash, para se cilës gati se u patën dorëzuar stafi udhëheqës i “Porsche”-s. “Ngadhënjimi i kësaj sfide e përmirësoi ‘jetën’ e veturës së sotme moderne “Porsche” (çmimi i saj është mbi 250.000 euro). Një sfidë tjetër ishte edhe shuarja e dridhjeve të veglës, që i shkaktonte materiali jo i bollshëm në ato pjesë” sqaron më tutje Piraj.

    Torta e ditëlindjes dhe një kitarë, dhuratë nga fëmijët

    Është interesant fakti se rregullat e patentimit e ndalojnë për dhjetë vite bërjen publike të shpikjeve të patentuara dhe u desh të kalonte kjo periudhë kohore për ta njohur opinionin rreth tyre! Disa nga shpikjet e patentuara të inxhinier Fatonit që e kanë kaluar tashmë periudhën e “heshtjes” janë: 1. Pajisja për shndërrimin e lëngut në gas; 2. Njësia absorbuese; 3. Perdja e dritës me rregullim automatik; 4. Dërrasa e lëvizshme për ngjitje në derën e automjetit; 5. Prerësi dhe djegësi saldues; 6. Shtretërit hidraulikë të boshtit të kollodokut; dhe disa tjera që ende nuk e kanë kaluar stazhin e “heshtjes”. Ndërkaq ka realizuar edhe punime tjera si: Përzierësi vëllimor i çokolatës; Transporti me Shirita brenda sallës produktive të kompanisë së njohur “Billa Plus“; Kompresori i shkallëzuar p=800bar; Përpunimi invers i kokës së motorit “Toyota”; Saldimi me Laser gjatë rrotullimit në ambient të izoluar hermetikisht; e shumë të tjera të cilat nuk janë të patentuara.

    Pas pesëmbëdhjetë vitesh pune në industrinë e automobilave luksozë, në muajin maj të këtij viti, Fatoni punësohet në kompaninë e njohur “Sonnek Gruppe, Vana Anlagenbau GmbH”, kompani kjo që merret me prodhimin e makinave automatike që prodhojnë ëmbëlsira industriale, çokolata, biskota, bombonë edhe Fontana e çokolatës së lëngshme për qëllime marketingu.

     

    Krahas rezultateve të larta që ka arritur në profesionin e inxhinierit, Fatoni dallohet edhe në shumë fusha tjera si: letërsi, aktrim, këndim, enigmatikë, prova të inteligjencës, sporte të ndryshme, iu bie instrumenteve muzikore (violinës, kitarës…), dallohet në lojëra si Biliard, Bowling, etj.

    Ndonëse më tepër se gjysmën e viteve të jetës (32) i ka kaluar në mërgim, Fatoni e flet dhe e shkruan rrjedhshëm gjuhën shqipe e krahas saj e flet edhe gjermanishten, frëngjishten, anglishten, polonishten dhe kroatishten!

    Jeton në Bezirkun 11 në Vjenë, me bashkëshorten Gilimseren dhe fëmijët Fleten (21), Fiolen (18) e Learin (15 vjeç). Vajzat janë studente ndërsa djali gjimnazist.

    Në përmbyllje të këtij shkrimi, inxhinier Fatonin e uroj për ditëlindjen e tij të 58-të duke i dëshiruar shëndet në radhë të parë, dhe suksese në punë dhe në jetë, me shpresën që në vitin e ardhshëm të na gëzojë edhe me ndonjë zbulim të ri shkencor!

    Inxhinieri Faton Piraj me autorin e shkrimit
  • DR. NURIDIN MESTANI, 67 VJET JETË – 42 VJET PËRVOJË AKADEMIKE!

    DR. NURIDIN MESTANI, 67 VJET JETË – 42 VJET PËRVOJË AKADEMIKE!

    Shkruan: Demir Reshiti
    Të martën (26 dhjetor 2023) e ka kremtuar ditëlindjen e 67-të profesori i respektuar opojan, dr. sc. Nuridin Mestani. Doktor Nuridini është intelektual me bagazh të madh njerëzor, profesional, miqësor e shoqëror i cili ka dhënë kontribut të çmuar në të gjitha fushat ku është angazhuar si profesor, ekspert dhe veprimtar.
    Punën e tij të frytshme dhe me vlerë e respekton e gjithë komuniteti intelektual, e respektojnë kolegët dhe studentët e tij të cilët kanë pasur fatin ta kenë bashkëpunëtor dhe profesor.
    Prof.dr. Nuridin Mestani është i lindur me 26 dhjetor 1956 në fshatin Kuklibeg të Opojës. Është fëmija i gjashtë nga tetë fëmijët (tri vajza e pesë djem) i prindërve Mestan e Fatime Mestani.
    Shkollën fillore e ka kryer në fshatin Bresanë ndërsa gjimnazin në Prizren. Në tetor të vitit 1980 ka diplomuar në fakultetin e Bujqësisë të Universitetit të Prishtinës me ç’rast fiton titullin Inxhinier i diplomuar i Bujqësisë, seksioni i përgjithshëm.
    Studimet postdiplomike i ka përfunduar në fakultetin e Bujqësisë të Universitetit të Zagrebit (Kroaci) ku fiton titullin Magjistër i specializuar në profilin Të ushqyerit e Kafshëve dhe Teknologjia e Prodhimit të Ushqimeve për Kafshë.
    Në dhjetor të vitit 1996, në fakultetin e Bujqësisë të Universitetit të Prishtinës mbron me sukses temën e doktoraturës dhe fiton gradën shkencore PhD/Dr.sc. i Shkencave Bujqësore. Në po këtë fakultet, më 14 korrik të vitit 2004 merr titullin akademik Profesor.
    42 vjet përvojë akademike
    Në vitet 1981-1984 profesor Nuridini punon si Asistent në Fakultetin e Bujqësisë të Universitetit të Prishtinës ku angazhohet në punë hulumtuese në Institutin për Blegtori dhe Veterinari, Katedrën për të ushqyerit e kafshëve.
    Në vitet 1985 -1990 punon në Fakultetin e Bujqësisë të Universitetit të Prishtinës si Asistent në lëndën “Anatomia dhe Fiziologjia e kafshëve” si dhe mban ushtrime laboratorike dhe praktike nga Anatomia dhe Fiziologjia e kafshëve.
    Në vitet 1991-2000 punon në Fakultetin e Bujqësisë të Universitetit të Prishtinës si Ligjërues i lëndës “Zooteknia I (Joripërtypësit) ku ligjëron në lëmin e teknologjisë së mbarështimit të kafshëve joripërtypëse (Kuajt, Derrat dhe Shpendët) për studentët e vitit të IV të seksionit të Blegtorisë. Në vitin 2021 të njëjtën lëndë e ligjëron për studentët e seksionit të Blegtorisë dhe të Veterinarisë.
    Në periudhën 2002-2011 punon si Drejtor për Kosovë i Organizatës Humanitare Heifer International Kosova me seli në Little Rock, SHBA. Organizata angazhohet në sigurimin e shërbimeve që lidhen me blegtorinë për fermerët e varfër në përputhje me Misionin e Heifer International.
    Në vitet 1989-1990 dr. Nuridini ishte Anëtar i Senatit të Universitetit të Prishtinës, ndërsa në vitet 1997 – 1999 ishte Prodekan për çështje materiale në Fakultetin e Bujqësisë të Universitetit të Prishtinës.
    Në vitin 2010 zgjidhet Udhëheqës i Departamentit të Bioteknologjisë në Zootekni në Fakultetin e Bujqësisë dhe Veterinarisë të Universitetit të Prishtinës. Një vit më vonë (2011) dr. Nuridini emërohet Kryetar i Këshillit Shkencor për Prodhim Bujqësor dhe Siguri të Ushqimit në Ministrinë e Arsimit, Shkencës dhe Teknologjisë të Republikës së Kosovës. Në vitin 2016, ishte kandidat për rektor të Universitetit të Prishtinës i propozuar nga Fakulteti i Bujqësisë dhe Veterinarisë.
    Ka kryer një mori specializimesh dhe ka marrë pjesë në konferenca të ndryshme shkencore të organizuara nga institucione të njohura arsimore e shkencore ndërkombëtare (Holandë, ShBA, Kroaci, Gjermani, Turqi, Australi, Greqi, Shqipëri, Maqedoni, etj.) si dhe ka publikuar (si autor dhe bashkautor) dhjetëra punime shkencore në revista të njohura në gjuhë shqipe, angleze e kroate, nga fushat në të cilat është specializuar.
    Profesor Nuridini ka dhënë kontribut të çmuar edhe në periudhën e rezistencës kombëtare gjatë viteve nëntëdhjeta të shekullit të kaluar ku krahas angazhimit si profesor universitar, ka mbështetur edhe shumë aksione të organizuara nga intelektualë e veprimtarë opojanë, dhe jo vetëm. Falë këtij angazhimi sot çmohet shumë nga të gjithë ata që e njohin e kanë pasur rastin të bashkëpunojnë me të.
    Ndonëse zyrtarisht është pensionuar dy vite më parë, profesor Nuridini vazhdon të jep kontributin e tij në Fakultetin e Bujqësisë dhe Veterinarisë të Universitetit të Prishtinës ku angazhohet si profesor dhe bashkëpunëtor profesional.
    Aktualisht jeton në Fushë Kosovë me bashkëshorten e tij me të cilën kanë pesë fëmijë (tri vajza e dy djem) dhe janë gjyshër të lumtur të shtatë mbesave e pesë nipave!
    Profesor Nuridinin e urojmë për ditëlindjen e tij të 67-të duke i dëshiruar shëndet në radhë të parë, dhe suksese në veprimtarinë e tij shkencore e publicistike!
  • Deputetja Statovci përzgjidhet ta përfaqësoj Evropën në “Global Young MP Initiative”

    Deputetja Statovci përzgjidhet ta përfaqësoj Evropën në “Global Young MP Initiative”

    Deputetja e Kuvendit të Kosovës, nga radhët e Listës Guxo, Jeta Statovci është përzgjedhur që ta përfaqësoj Evropën dhe Azinë qendrore, në mesin e vetëm tetë deputetëve në mbarë botën, për të dialoguar rreth çështjeve zhvillimore, përmes iniciativës globale të deputetëve të rinj (2023-2025 Global Young MP Initiative).

    Përveç se do të përfaqësoj një rajon kaq të gjatë, deputetja kosovare do të jetë edhe zëri i Kosovës në një iniciativë kaq të madhe golabale.

    Ky është njoftimi i deputetes Statovci:

    Shumë e lumtur që Banka Botërore më ka zgjedhur të përfaqësoj rajonin e Evropës dhe Azisë Qendrore, në mesin e vetëm tetë deputetëve të rinj nga gjithë bota, për të dialoguar rreth çështjeve zhvillimore, përmes iniciativës globale të deputetëve të rinj (2023-2025 Global Young MP Initiative).

    Më vjen shumë mirë që Republika e Kosovës 🇽🇰, ani pse shtet i vogël, dërgon një përfaqësuese në emër të një rajoni kaq të madh, në bashkëpunim me dy institucionet më të mëdha financiare në botë, Bankën Botërore dhe Fondin Monetar Ndërkombëtar.

  • Statovci: Dhuna në familje e sidomos e gruas është dukuri që po bëhet gjithnjë e më shqetësuese

    Statovci: Dhuna në familje e sidomos e gruas është dukuri që po bëhet gjithnjë e më shqetësuese

    Deputetja e Partisë Guxo, Jeta Statovci, përmes një postimi në facebook ka thënë se dhuna në familje e sidomos e gruas është dukuri që po bëhet gjithnjë e më shqetësuese.

    Sipas Statovcit, Kosova ka përjetuar plagë të rënda dhe nuk mund të lejojmë që këto plagë të rëndohen, tash kur  duhet të shfaqim energjinë tonë si shtet i ri.

    Ndërsa ka shtuar se kërkohet punë e përkushtim i të gjithëve për të shëruar këtë ‘defekt shoqëror’, që po shihet se jeton brenda nesh.

    Postimi i plotë:

    Raste të natyrave e moshave të ndryshme por me një të përbashkët: dhunë në familje, e viktima është kryesisht gruaja. Kjo dukuri po bëhet gjithnjë e më shqetësuese pikërisht sepse është bërë dukuri. Po jetojmë në kohën e lirisë e të shtetit tonë demokratik por nuk po e gjejmë dot mënyrën se si ta lirojmë mendjen nga prirjet maskuliste, patriarkale. Pra, nuk po e hapim dot mendjen për të qenë shoqëri që beson në të drejtat dhe liritë themelore të njeriut. Dëmet e mëdha që i janë bërë për dekada, sistemit tonë të edukimit, duket se kanë lënë gjurmë të thella në dijen e ndërdijen sociale.

    Kërkohet punë e përkushtim i të gjithëve e me të gjitha mjetet për të shëruar këtë ‘defekt shoqëror’, që po shihet qartë se jeton brenda nesh.

    Unë jam e bindur se tradita jonë si popull i vjetër, përkushtimi jonë i sinqertë e kurajoz, do të arrijë ta identifikojë e më pas ta luftojë dhunën në bazë gjinore.

    Kosova, ka përjetuar plagë të rënda dhe nuk mund të lejojmë që këto plagë të rëndohen, tash kur ne duhet të shfaqim energjinë tonë si shtet i ri.

  • Mobilizohet PDK në Itali, njofton për aderime të reja dhe themelim të nëndegëve

    Mobilizohet PDK në Itali, njofton për aderime të reja dhe themelim të nëndegëve

    Dega e Partisë Demokratike të Kosovës në Itali ka njoftuar për aderime të reja. Kryetari i kësaj dege, Patriot Krasniqi u ka uruar mirëseardhje Mefail dhe Egzon Thaçit.

    Krasniqi poashtu ka njoftuar se paraprakisht kanë mbajtur takimin edhe me kryesinë e degës.

    “Temë e diskutimit kanë qenë zhvillimet aktuale të degës, si dhe planifikimi per vazhdimin e themelimit të nëndegëve të tjera në Itali, po ashtu biseduam edhe për aktivitetet e ndryshme që do të mbahen gjatë festave dhe situatën aktuale politike në Kosovë”, ka shkruar ndër të tjera ai.

    Partia Demokratike e Kosovës, sipas tij, çdo ditë e më shumë është duke u fuqizuar në Itali, sepse mërgata thotë ai e kanë kuptuar qe gjendja aktuale dhe zhvillimet e fundit që janë duke ndodhur në Kosovë, sipas tij, nuk kanë qenë kurrë më keq që nga paslufta.

    “Jam shumë falënderues ndaj secilit anëtare dhe aktivist e aktiviste të PDK-së në Itali, për punën e madhe dhe kontributin që janë duke e dhënë, që PDK-ja të rikthehet dhe të vazhdoj në shtyrjen e proceseve të mëdha për Kosovën, sepse këtë ka ditur të bëj vetëm Partia Demokratike e Kosovës”, ka shkruar ndër të tjera ai.

  • Kongresisti amerikan Torres: Serbia t’i tërheq trupat nga kufiri, po përshkallëzon situatën

    Kongresisti amerikan Torres: Serbia t’i tërheq trupat nga kufiri, po përshkallëzon situatën

    Kongresisti amerikan, Ritchie Torres ka reaguar ndaj dislokimit të madh të trupave të Serbisë përgjatë kufirit me Kosovën.

    Torres në një postim në X shkruan se është i alarmuar me këtë dislokim të madh dhe të sofistikuar të forcave serbe, ndërkaq ka kërkuar nga Serbia t’i tërheqë trupat.

    “Si një përkrahës dhe aleat krenar dhe i palëkundur i Republikës së Kosovës, jam gjithnjë e më i alarmuar nga raportimet për një dislokim të madh dhe të sofistikuar të forcave serbe përgjatë kufirit Serbi-Kosovë”, shkruan ai.

    Sipas tij, ky është një vazhdim i hapur i cenimit nga Serbia kundër Kosovës që po përshkallëzon tensionet në mënyrë të panevojshme për një kohë të gjatë.

    “Unë i mbështes thirrjet e administratës së Bidenit që Serbia të tërheqë menjëherë këto forca. Serbia duhet të de-përshkallëzojë situatën, të kërkojë llogari nga përgjegjësit për sulmet e dhunshme të fundit dhe të respektojë pavarësinë e Kosovës, si një komb sovran”, shkruan ai.

  • Kaq po shitet metri i druve në këtë vit

    Kaq po shitet metri i druve në këtë vit

    Ministria e Ekonomisë ka lansuar thirrjen për subvencionimin e pajisjeve efiçiente për ngrohje për shtëpi dhe banesa. Përmes kësaj thirrjeje, qytetarët do të subvencionohen deri në 2 mijë euro. Afati do të jetë i hapur për aplikim deri më 22 nëntor të këtij viti. Ndërkaq, përmes kësaj thirrjeje po synohet që të kursehet energjia elektrike. Por, ka qytetarë që ngrohjen për dimër kanë vendosur ta bëjnë me dru.

    Familja Demolli ka vendosur që edhe këtë vit të ngrohet me dru, pavarësisht që brenda në shtëpi i kanë të vendosura edhe nxehëset. Ngrohjen me dru ata po e shohin si alternativën më të lirë e më të mirë.

    Ngrohjen me dru Vesel Demolli e sheh si alternativë edhe për vitet e ardhshme.

    Shitësit kanë treguar se interesimi i qytetarëve për të blerë dru ka qenë shumë i madh. Ndërsa, një metër dru kushton nga 60 deri në 65 euro.

    Për të kursyer energjinë elektrike, e për të mos ndotur ajrin, Ministria e Ekonomisë ka lansuar thirrjen për subvencionimin e pajisjeve efiçiente për ngrohje.

    Por cilat janë pajisjet që do të subvencionohen?

    Pompa termike – 30% e vlerës investive apo deri në 2 mijë euro

    Kondicioneri – 40 për qind apo deri në 400 euro Kaldaja me biomasë – 70 për qind, apo deri në 1 mijë e 200 euro.

    Stufa individuale me biomasë – 70 për qind apo deri në 435 euro

    Ministrja e Ekonimise Artane Rizvanolli, dhe Alessandro Bianciardi nga Zyra e BE-së në Kosovë, kanë thënë se janë duke besuar se është duke u ngritur vetëdija e qytetarëve për rëndësinë për të kursyer energjinë që të ketë një të ardhme më të qëndrueshme.

    Ndërsa për njohësin e energjetikës, Fatos Aliun, subvencionimet e efiçiencës konsiderohen si të pamjaftueshme.