Me ftesë të Zyrës së Prokurorit të Specializuar, Rrustem Mustafa do të paraqitet në Hagë për të dëshmuar rreth organizimit të UÇK-së dhe pretendimeve të prokurorisë në procesin gjyqësor kundër ish krerëve të UÇK-së.
Ish komandanti i Zonës së Llapit e ka konfirmuar se do të udhëtoj në Hagë.
“Javën e ardhshme jam ftuar të dëshmoj në Hagë. Do ta mbroj të vërtetën e luftës së UÇK-së”, ka thënë Mustafa.
Presidentja e Kosovës, Vjosa Osmani ka shprehur falënderim për shtetin e Suedisë me rastin e përfundimit të Presidencës së Këshillit Evropian nga ana e këtij shteti.
“Derisa Suedia përfundon presidencën e saj, unë e falënderoj kryeministrin Ulf Kristersson për lidershipin e tij dhe angazhimin për siguri dhe stabiliteti në Evropë”, është shprehur Osmani.
“Shohim drejt vazhdimit të përpjekjeve tona për ta sjellë Kosovë ne afër BE-së gjatë vitit 2023”, ka shtuar ajo, duke e uruar Spanjën për marrjen e kryesimit të institucionit evropian.
Ministri i Bujqësisë, Faton Peci, përmes një postimi në llogarinë e tij në Facebook, ka thënë se2.6 milionë euro është vlera që po implementohet përmes granteve për fermerët e Komunës së Vushtrrisë.
Tutje, Peci është shprehur se po vazhdojnë me përkushtimin në këtë fushë.
“2.6 milionë euro është vlera që po implementohet përmes granteve vetëm për fermerët e Komunës së Vushtrrisë! 100,000.00€ është vlera që Faik Pronaj me dy djemtë e tij nga fshati Stanovc i Epërm i Komunës së Vushtrrisë ka përfituar nga Programi për Zhvillim Rural 2022 / Grante, për investime në makineri bujqësore. Përkushtim, zhvillim e jetësim”, thuhet në shkrimin e tij.
Lorand Gjoshi nuk ka arritur të kualifikohet në finale të kajakut në Lojërat Evropiane “Krakow 2023”.
Gjoshi garoi në disiplinën slalom.
Gabimet e bëra gjatë garës, e penalizuan atë me 54 sekonda, që i kushtuan me mos-kualifikim tutje.
Lorandi dhe Blandine Xhemajli, sot prej orës 15:00, do të garojnë edhe në disiplinën kros.
Kryeministri i Shqipërisë, Edi Rama, ka deklaruar sot se nisma “Ballkani i Hapur” e ka përfunduar misionin për të cilin ka lindur, e që thotë se ka qenë për ta shtyrë përpara Procesin e Berlinit.
Rama thotë se tash rruga kryesore është Procesi i Berlinit, duke përmendur se Samiti mbahet në Tiranë këtë vit.
“Procesi i Berlinit është tani më aksi ynë kryesor. “Ballkani i Hapur” ishte një iniciativë e cila lindi nga nevoja për ta shtyrë përpara Procesin e Berlinit, dhe e ka kryer tani atë mission për të cilin lindi. Ne duhet të futemi me kokë tani në Procesin e Berlinit, sepse e kemi këtë mundësi, e kemi në Tiranë. Kemi mundësinë ta zotërojmë si proces, me mbështetjen e madhe që kemi nga Gjermania, nga Kancelari Scholz por edhe nga gjithë të tjerët”, ka thënë Rama, në një intervistë për Euroneës Albania.
Ai tha se do të realizojë vizita në të gjitha shtetet e rajonit, për t’u takuar me kryeministrat dhe presidentët, dhe për t’i njoftuar se çka po bëhet në këtë drejtim.
“Procesi i Berlinit, është e ardhmja jonë, unë po përgatitem të bëj një tur në rajon,. Dua të shkoj t’I takoj të gjithë kryeministrat edhe presidentët, edhe në Shkup, edhe në Prishtinë, edhe në Beograd edhe në Sarajevë edhe në Podgoricë, për t’i informuar lidhur me çka po bëjmë”, ka deklaruar Rama.
Nisma për bashkëpunimin rajonal “Ballkani i hapur”, e cila përfshin Serbinë, Maqedoninë e Veriut dhe Shqipërinë, është marrë nga presidenti i Serbisë, Aleksandar Vuçiq, kryeministri i Maqedonisë së Veriut, Zoran Zaev, dhe kryeministri i Shqipërisë, Edi Rama, në tetor të vitit 2019.
Nisma fillimisht është quajtur “Mini Schengen” dhe ajo parasheh lëvizjen e lirë të kapitalit, mallrave, shërbimeve dhe njerëzve midis tri vendeve.
Në korrik të vitit 2021, në Forumin për Bashkëpunim Ekonomik Rajonal në Shkup, nisma ka marrë emrin e ri, “Ballkani i hapur”.
Kosova ka qenë kundër kësaj nisme që nga fillimi.
Instituti i Kosovës për Drejtësi (IKD) thekson se Qeveria e Kosovës ka përmbushur 42% të programit legjislativ për gjashtëmujorin e parë të vitit 2023, ku përfshihen 34 projektligje të miratuara nga 78 të planifikuara.
Në raportin e IKD-së thuhet se Qeveria nuk përmbushi standardet e konsultimit publik në afërsisht 50% të projektligjeve.
“Qeveria e Kosovës e ka miratuar programin legjislativ me 25 janar 2023, përderisa me 11 janar 2023, ajo ka miratuar dy projektligje ende pa miratuar programin legjislativ. Deri në fund të muajit qershor, Qeveria ka përmbushur vetëm 42% të agjendës legjislative të paraparë për gjashtë mujorin e parë të vitit 2023.
Sipas agjendës legjislative, Qeveria kishte planifikuar miratimin e 78 projektligjeve deri në muajin qershor. Përderisa, deri më 30 qershor 2023, Qeveria ka miratuar 33 prej tyre, apo 42% të projekt-ligjeve të planifikuara. Qeveria gjatë kësaj periudhe kohore ka miratuar një projekt-ligj të planifikuar për muajin shtator të këtij viti”, thuhet në raport.
IKD thekson se edhe përkundër obligimit ligjor që projekt ligjet e inicuara nga ana e qeverisë dhe ministrive të linjës të kalojnë përmes konsultimit publik, nga 34 projektligjet e miratuara në Qeveri, IKD ka gjetur se 21 prej tyre është dashur t’i nënshtrohen procesit të konsultimit publik, gjë që e ka bërë vetëm në 11 raste apo 52% të rasteve, derisa ky obligim nuk ka vlejtur në raport me 13 projektligje që kanë të bëjnë me ratifikimin e marrëveshjeve ndërkombëtare.
“Vetëm gjatë këtij gjashtë mujori të parë të vitit 2023, Qeveria e Kosovës ka plotësuar dhe ndryshuar tre herë programin legjislativ. Programi Legjislativ i miratuar me 25 janar të këtij viti fillimisht përmbante 100 projektligje, por pas ndryshimit dhe plotësimit të programit legjislativ me 31 janar 2023, 9 mars 2023, dhe me 12 prill 2023 nga ana e Qeverisë dhe pas miratimit të projektligjeve jashtë planifikimeve, numri i projektligjeve të planifikuara për miratim deri në fund të vitit 2023, arriti në 131 projektligje”.
Po ashtu sipas raportit të IKD-së, Qeveria nuk përfshiu në programin legjislativ për vitin 2023, 26 projektligje, të cilat kanë qenë në plan programin legjislativ për vitin 2022, dhe të cilat nuk janë miratuar gjatë vitit të cekur.
“Në mesin e këtyre projektligjeve janë ai për Këshillin Ekonomiko-Social, projektligji për Inspektoratin e Punës, projektligji për Shërbimet Sociale dhe Familjare, projektligji për Vlerësimin, Njohjen e Statusit, Përfitimet dhe Shërbimet për Personat me Aftësi të Kufizuar.
Më tutje, Qeveria nuk përfshiu miratimin e ndryshimeve dhe plotësimeve në Ligjin për Policinë, në Ligjin për Institutin e Kosovës për Administratë Publike, në Ligjin për Ripranim, në Ligjin për Inspektoratin e Arsimit në Republikën e Kosovës, në Ligjin për Trashëgiminë Kulturore, në Ligjin për Organizimin e Institutit Bujqësor të Kosovës, Projektligjin për Zonat Ekonomike, Projektligjin për Nxitjen dhe Mbrojtjen e Investimeve, Projektligji për Inovacion dhe Ndërmarrësi, Projektligjin për Burimet e Ripërtëritshme të Energjisë”, thuhet në raport.
Ministritë të cilat nuk i përfshinë në agjendën legjislative projektligjet nga viti 2022 janë: Ministria e Financave, Punës dhe Transfereve (MFPT), Ministria e Punëve të Brendshme (MPB), Ministria e Arsimit, Shkencës, Teknologjisë dhe Inovacionit (MAShTI), Ministria e Kulturës, Rinisë dhe Sportit (MKRS), Ministria e Bujqësisë, Pylltarisë dhe Zhvillimit Rural (MBPZhR), Ministria e Industrisë, Ndërmarrësisë dhe Tregtisë dhe Ministria e Ekonomisë (ME).
Lista e projekt-ligjeve që janë paraparë për miratim gjatë gjashtëmujorit të parë të vitit 2023, përfshinë ligje që ndërlidhen me përmbushjen e obligimeve ndërkombëtare në procesin e integrimit evropian por edhe ligje tjera me interes publik në sferën e shërbimit të jashtëm, drejtësisë, medias, politikave sociale, pensionale dhe të shëndetësisë, etj.
Instituti i Kosovës për Drejtësi thekson më tej se Lista e ligjeve të mbetura, përfshinë, Projekt Kodin Civil, Projektligjin për Shërbimin e Jashtëm, Projektligjin e punës, Projektligjin për Diasporën, Projektligjin për Komisionin e Pavarur të Mediave, Projektligjin për Noterinë, Projektligjin për Gjykatat, Projektligjin për Këshillin Gjyqësor të Kosovës, Projektligjin për të Huajt, Projektligjin për Gjendjen Civile, Projektligjin për Shëndetësi, Projektligjin për Sigurime Shëndetësore, Projektligjin për Inspektoratin Qendror të Shëndetësisë, Projektligjin për vlerësimin dhe shqyrtimin e akteve të komunave, Projektligjin për Banimin Social, Projektligjin për Inspektoratin për Mbikëqyrjen e Tregut, Projektligjin për Regjistrin e Pronarëve Përfitues, Projektligjin për Burimet e Ripërtëritshme të Energjisë etj.
Sa i përket nivelit të zbatimit të programit legjislativ nga ministritë përkatëse, IKD gjen se nivelin më të lartë të miratimit të projektligjeve e ka arritur Ministria e Arsimit, Shkencës, Teknologjisë dhe Inovacionit me 100% të projektligjeve të miratuara, Ministria e Bujqësisë, Pylltarisë dhe Zhvillimit Rural me 100%, Ministria e Kulturës, Rinisë dhe Sportit me 100%, Zyra e Kryeministrit me 75%, Ministria e Mjedisit, Planifikimit Hapësinor dhe Infrastrukturës me 57 %, Ministria e Industrisë, Ndërmarrësisë dhe Tregtisë me 43%, Ministria e Punëve të Jashtme dhe Diasporës me 25% etj.
Ndërkaq, asnjë projektligj, përkundër planifikimeve nuk ka arritur ta procedojë për miratim Ministria e Administrimit të Pushtetit Lokal dhe Ministria e Ekonomisë.
IKD, gjen se në një rast Qeveria e Kosovës, në kundërshtim me afatet e Aktgjykimit të Gjykatës Kushtetuese, vendos për Projektligjin për Skemat Pensionale, duke rrezikuar të drejtat e mijëra pensionistëve.
“Më 30 dhjetor 2023, Gjykata Kushtetuese shfuqizoi paragrafin 2 të nenit 8 te Ligjit nr.04/L-131 për Skemat Pensionale, sepse në mënyrë diskriminuese përmes këtij neni mijëra qytetarë, duke mos e përmbushur kriterin e përvojës prej 15 viteve pune para janarit të vitit 1999 nuk e kanë gëzuar pensionin kontribut dhënës, por vetëm atë të moshës. Gjykata urdhëroi Kuvendin dhe Qeverinë që të nisin ndryshimet për këtë ligj dhe që këto ndryshime të bëhen jo më larg se data 15 korrik 2023.
Përkundër premtimeve të qeverisë, projektligji ende nuk është miratuar nga ana e Qeverisë dhe Kuvendit të Kosovës”, thuhet më tej.
IKD, gjen se në një rast tjetër, në kundërshtim me Kushtetutën dhe duke u arsyetuar në miratimin e një neni të caktuar në Ligjin për Ndarjet Buxhetore për vitin 2023, Qeveria nuk i kishte transferuar të hyrat vetanake të komunave, duke bërë që mjetet, të cilat komunat i kanë mbledhur nga viti 2022 dhe vitet e tjera paraprake të bëhen pjesë e buxhetit qendror.
Sipas Kushtetutës së Kosovës, komunat e kanë të drejtën e vendosjes, caktimit, mbledhjes dhe shpenzimit të të hyrave vetanake dhe në të njëjtën kohë të marrin fonde nga Qeveria e Kosovës.
994 persona janë arrestuar gjatë natës në Francë, ndërsa protestat e dhunshme për vrasjen e 17-vjeçarit të qëlluar nga policia kanë hyrë në natën e katërt.
Protestat vazhduan deri në mëngjesin e së shtunës, me trazira që shpërthyen në disa qytete, raportojnë mediat franceze, megjithëse situata në përgjithësi dukej më pak e tensionuar se një ditë më parë. Disa dyqane u grabitën në disa qytete ndërkohë që trazirat vijojnë.
Sipas një raporti të ri nga Ministria e Brendshme, 994 persona janë arrestuar gjatë trazirave që shpërthyen pas vdekjes së Nahelit. Varrimi i të riut Nahel do të bëhet këtë të shtunë në Nanterre.
Videot e mediave sociale të skenave në Lyon, treguan të shtëna me armë zjarri nga një pushkë automatike gjatë natës, fishekzjarre që lëshoheshin në protestë dhe demonstrues pranë zjarreve që digjen.
Të premten në mbrëmje ka ndodhur një shpërthim në Portin e Vjetër të Marsejës, por nuk ka pasur viktima. Ndërsa është dëmtuar edhe biblioteka Alcazar në Marsejë, e cila u vandalizua gjatë natës.
Dhuna e vazhdueshme vjen pavarësisht se policia franceze vendosi 45,000 oficerë, njësi speciale, automjete të blinduara dhe helikopterë në të gjithë vendin të premten.
Sipas raportit të fundit nga Ministria e Brendshme, 79 policë janë lënduar në margjina të trazirave të natës.
Për sa i përket dëmeve materiale, numëron 2560 zjarre në rrugë publike, 1350 automjete të djegura, 234 objekte të djegura apo të dëmtuara.
Ai vë në dukje gjithashtu se 31 stacione policie, 16 stacione policore bashkiake dhe 11 kazerma të xhandarmërisë janë në shënjestër.
Policia e Kosovës ka sekuestruar mbi katër kilogramë substancë narkotike të llojit marihuanë, në objektin e ish-Kominatit Trepça.
Sipas policisë, nuk ka të dyshuar për momentin teksa rasti është duke u hetuar.
“Ish objekti i Kombinatit Trepça, Trepçë 30.06.2023 – 15:00. Njësia e DHTN ka pranuar informatën se në ish e objektin e lartcekur në një dhomë gjenden katër qese të mbështjella me ngjitës. Në atë lokacion policia ka hasur në dy paketime që dyshohet se janë substanca narkotike e llojit marihuanë. Substanca e dyshuar është konfiskuar dhe pesha e saj është 4436 gramë. Për momentin nuk ka te dyshuar. Rasti është duke u hetuar”, thuhet në njoftimin e policisë.
Një person e ka rrahur vajzën e tij, pas një zënke verbale në Istog.
Vajza më pas ka pranuar tretman mjekësor.
Ndërkaq i dyshuari me vendim të prokurorit është dërguar në mbajtje.
“Istog 30.06.2023 – 11:10. Është arrestuar i dyshuari mashkull kosovar pasi i njëjti pas një zënke verbale që kishte pasur me vajzën e tij, e kishte sulmuar fizikisht atë. Viktimës i është ofruar tretmani mjekësor. I dyshuari me vendim të prokurorit është dërguar në mbajtje”, thuhet në njoftimin e policisë.
Policia e Kosovës bëri të ditur se një person ka rënë nga minibusi që ishte në lëvizje pasi shoferi e kishte hapur derën në mënyrë të pakujdesshme.
Rasti ka ndodhur në rrugën “Ibrahim Rugova” në Gjilan, të premten në ora 10:30.
“I dyshuari mashkull kosovar derisa ishte duke drejtuar minibusin, dyshohet nga pakujdesia ka hapur derën e minibusit në mënyrë të pakujdesshme dhe për pasojë viktima mashkull kosovar ka rënë nga minibusi dhe ka pësuar lëndime”, thuhet në raport.
Viktima është dërguar për tretman mjekësor në QKUK, ndërsa rastin në konsultim me prokurorin shkon në procedurë të rregullt.