Author: E.R.

PËRGATITI: ARTON HAMITI 

Janë bërë 105 ditë që kur Kosova dhe Serbia në Ohër u pajtuan për zbatimin e Marrëveshjes drejt normalizimit të marrëdhënieve. Megjithatë, palët vazhdojnë ta akuzojnë njëra-tjetrën për mos-zbatimin e aneksit, analistët vlerësojnë se zvarritja po behet me qellim.

Pas gati 12 orë bisedimesh mes delegacioneve të Kosovës dhe Serbisë me ndërmjetësimin e Bashkimit Evropian, me 18 mars në Ohër, dy liderët Albin Kurti e Aleksandër Vucic, u pajtuan për zbatimin e Marrëveshjes drejt normalizimit të marrëdhënieve mes tyre.

105 ditë nga ky dakordim, palët kanë miratuar deklaratën për personat e zhdukur, kurse Bashkimi Evropian, kishte njoftuar për krijimin e Komitetit të Përbashkët Monitorues për të mbikëqyrur zbatimin.

Megjithatë, Kosova dhe Serbia, vazhdojnë ta akuzojnë njëra tjetrën për shkelje të aneksit të Ohrit, derisa nga ekzekutivi kosovar thane se janë të hapur që marrëveshja për normalizimin e marrëdhënieve të implementohet.

“Ka një marrëveshje me Serbinë të quajtur Marrëveshja Bazike, sipas propozimit evropian, e cila gëzon një mbështetje të gjerë të shteteve demokratike. Ne i kemi dhënë mbështetjen e plotë kësaj Marrëveshje dhe kemi qenë gjithmonë të hapur e të gatshmen për takime si me qëllim arritjen e saj, ashtu edhe me qëllim zbatimin e saj.”

Por, sipas analistit Fitim Mulollit, te dyja palët me qellim po e zvarrisin zbatimin e marrëveshjes.

Madje, Mulolli nuk pret që aneksi të gjejë zbatim brenda këtij viti.

Ndryshe, në njërin prej vlerësimeve zyrtare, emisari amerikan Gabriel Escobar kishte deklaruar se të dyja palët e kanë shkelur Marrëveshjen e Ohrit dhe nga situata aktuale, përfiton vetëm Rusia.

Si pasojë e erërave të forta dhe reshjeve të shiut, drunjtë janë rrëzuar në rrugën “Luan Haradinaj”, përballë stacionit të policisë në Prishtinë.

Vendi është rrethuar me shirita, teksa nuk dihet nëse ka persona të lënduar.

Vendi ynë po përballet me reshje shiu, me ç’rast në shumë vende janë shkaktuar vërshime. Po ashtu ka edhe ndërprerje të energjisë elektrike në disa komuna.

Reshjet e shiut që kanë rënë sot gjatë ditës në Rahovec kanë shkaktuar vërshime në disa pjesë të qytetit.

Sipas pamjeve që janë publikuar në rrjetet sociale shihet se moti ligë ka përfshirë qytetin.

Ndryshe, Instituti Hidrometeorologjik i Kosovës (IHMK), ka njoftuar se gjatë fundjavës parashihet të mbajë mot i ndryshueshëm dhe mjaftë dinamikë.

IHMK njofton se, kjo situatë vjen si pasojë e vranësirave konvektive të cilat parashihen të formohen pasditen e së shtunës, për të vazhduar edhe ditën e diel.

“Reshjet më intensive parashihen ditën e diele, ku do të ketë edhe shkarkime rrufesh, por edhe dita e shtune parashihet të ketë reshje në shumë zona. Temperaturat minimale gjatë këtyre dy ditëve të vikendit do të lëvizin ndërmjet 12-16 gradë Celsius, ndërsa maksimalet e ditës parashihen të lëvizin ndërmjet 21-28 gradë Celsius”, thuhet në njoftim.

Moti i ligë që po mbizotëron në Prishtinë këtë të shtunë ka shkaktuar edhe dëme.

Në lagjen “Bregu i Diellit” ka rënë kulmi i një ndërtese, duke i dëmtuar edhe disa vetura që kanë qenë të parkuara aty.

Kryeqyteti pasditen e kësaj të shtune është mbuluar nga re të zeza, të cilat kanë sjell erëra të fuqishme dhe shi të rrëmbyeshëm.

Telegrafi ka provuar të kontaktojë me Policinë e Kosovës, por të njëjtit nuk kanë qenë të qasshëm.

E mot i ngjashëm si në Prishtinë po mban edhe në disa qytete tjera si: Gjakovë, Rahovec e Ferizaj.

Eksperti i sigurisë, Agim Musliu duke komentuar përfshirjen e Stevan Paviçeviq, udhëheqësit të “Mbrojtjes Civile”, në automjetin e Serbisë që u kap me armatim në veri të vendit, ka thënë se në Kosovë janë të pranishme të gjitha strukturat e sigurisë së Serbisë, por ato janë të maskuara.

Musliu ka shkruar në Facebook se Serbia asnjëherë nuk e ka angazhuar ushtrinë as në Kroaci e Bosnje, por serbët lokalë i ka furnizuar me armë, para e mbi të gjitha urdhra e detyra.

“Në Kosovë, duhet ta kuptojnë të gjithë se, janë të pranishme të gjitha strukturat e sigurisë së Serbisë, por ato janë të maskuara. Si ky rasti i fundit, kur vetura full municion, qenka e Hekurudhave te Serbisë apo që më vonë ia ka fal komunës ilegale të Istogut. Ani pse me targa të Beogradit. Këtë veturë e ka përdorur për sulme terroriste. Vet terroristi i strukturës së të ashtuquajturës Civilna Zaštita. Plus, bashkëpunëtor i qendrës së inteligjencës ruse GRU, në Nish. Ky farë Paviçeviçi duhet menjëherë të arrestohet dhe të sillet para gjyqit.

Stevan Paviçeviq, udhëheqës i “Mbrojtjes Civile” i përfshirë në automjetin e Serbisë që u kap me armatim – ATV (atvlive.tv)

Një dokument që përfshin Stevan Paviçeviqin, shefin e organizatës së shpallur terroriste “Civilna Zastita”, është gjetur në automjetin Audi A6, përplot me arsenal armësh, e cila është kapur nga institucionet e sigurisë së Republikës së Kosovës në Zveçan, më 23 qershor 2023.

Kosovapress ka siguruar kopjen e këtij dokumenti, i cili dëshmon për shfrytëzimin e automjetit AUDI A6 me targa BG-955-JW, nga Paviçeviq që në vitin 2016.

Dokumenti është i tipit të fletë-udhëtimit, kur Paviçeviq, më 22.07.2016 e kishte plotësuar me dorëshkrim udhëtimin nga Mitrovica në qytetin e Çaçakut në Serbi. Dokumenti përmban edhe nënshkrimin e Paviçeviqit.

Dokumenti ka gjithashtu edhe vulën e komunës ilegale të të ashtuquajturit Kuvendit Komunal të Istogut, Osojan – Republika e Serbisë.

Përveç ekspozimit nga Policia e Kosovës të armëve dhe simboleve që ndërlidhen me organizatat e shpallura terroriste, Kosovapress ka mësuar se në automjetin Audi A6 me targa të Beogradit janë gjetur si prova edhe një varg të dhënash, që ndërlidhin një varg serbësh me furnizimin me armatim dhe me sulmet që janë bërë në komunat veriore muajin e fundit, si ndaj institucioneve të Kosovës, ashtu edhe ndaj KFOR-it dhe vetë serbëve lokalë.

Kryeministri i Kosovës, Albin Kurti kishte akuzuar Serbinë për organizim terrorist, kurse më 29 qershor 2023, Qeveria e Kosovës i ka shpallur organizata terroriste, dy formacione serbe që veprojnë në veri, “Civilna Zastita” dhe “Severna Brigada”.

Në anën tjetër, autoritetet serbe, Aleksandar Vuçiq dhe Petar Petkoviq e kanë quajtur rastin si fabrikim.

Edhe Lista Serbe, në një komunikatë për opinionin, më 30 qershor 2023, duke reaguar për shpalljen e “Civilna Zastita” dhe “Severna Brigada”, si organizata terroriste nga Qeveria e Kosovës, i ka quajtur këto organizata si inekzistente.

 Historia e “Civilna Zastita”

Sipas të dhënave që Kosovapress ka siguruar, “Civilna Zastita” ka funksionuar në veri të Kosovës vazhdimisht, megjithëse, në vitin 2015, sipas marrëveshjeve që ishin ndërmjetësuar nga Brukseli, në mes të Kosovës dhe Serbisë, ajo do të duhej të shuhej më 1 shtator 2015. Ndërkohë, punëtorët e “Civilna Zastita” më pas ishin integruar në institucionet e Kosovës – kryesisht në Policinë e Kosovës.

“Civilna Zastia” në Serbi funksionon në kuadër të Ministrisë së Punëve të Brendshme.

Mirëpo, sipas të dhënave të Qendrës Kosovare për Studime të Sigurisë, “Mbrojtja Civile” në Kosovë përbëhej nga pjesëtarë, të cilët kishin kaluar trajnime ushtarake dhe konsideroheshin shumë të rrezikshme për sigurinë e Kosovës.

Në fillim kishte rreth 500 anëtarë, por pas shpalljes së pavarësisë së Kosovës në vitin 2008, ky numër ishte rritur në mbi 750 në vitin 2013 dhe 2014.

Përveç se është pjesë e MPB-së së Serbisë, “Civilna Zastita” ka shënuar bashkëpunim të afërt edhe me Federatën e Rusisë.

Më 27 prill 2014, pikërisht Stevan Paviçeviq, si shef i “Civilna Zastita” dhe kryetari i tashëm i Listës Serbe, Goran Rakiq kishin pranuar 10 automjete si donacion nga Rusia, përkatësisht qendra e njohur nga Perëndimi si qendër spiunazhi, e ashtuquajtura “Qendra Humanitare Ruso-Serbe”.

Pranim-dorëzimi ishte realizuar pikërisht në Nish, qytetin ku e ka selinë ende kjo qendër.

Edhe presidenti i Serbisë, Aleksandar Vuçiq, në një emision televiziv në Serbi, një ditë pasi serbë kishin zhveshur uniformat e Policisë së Kosovës në veri, më 6 nëntor 2022, kishte deklaruar se “tash gjithçka është në duart tona… Ku ta dimë, ndoshta duhet ta kthejmë Civilna Zastita”.