ATV

Author: D.K.

  • Louis Tomlinson shpërthen në lot teksa flet për vdekjen e Liam Payne

    Louis Tomlinson shpërthen në lot teksa flet për vdekjen e Liam Payne

    Fansat e One Direction janë thellësisht prekur nga intervista e fundit e Louis Tomlinson në podcastin “The Diary of a CEO” me Steven Bartlett, ku këngëtari ka folur hapur për humbjen e Liam Payne, largimin e Zayn Malik dhe shpërbërjen e grupit që bëri histori në muzikën pop.

    Në bisedën gati dyorëshe, Louis u shfaq emocional dhe i përlotur teksa kujtonte momentet më të vështira të jetës së tij.

    “Isha i shkatërruar kur humba Liam-in,” tha ai, duke e përshkruar vdekjen e mikut të tij si “të padrejtë dhe jashtëzakonisht të vështirë për t’u përballuar”.

    Tomlinson pranoi gjithashtu se ishte “absolutisht i rrënuar” kur Zayn Malik u largua nga grupi në kulmin e suksesit, duke shtuar se ende “mbetet një elefant në dhomë” në marrëdhënien mes tyre megjithatë, zbuloi se ata janë takuar së fundmi dhe po përgatisin së bashku një dokumentar për Netflix.

    Duke kujtuar ditën kur One Direction u shpërbë, ai e përshkroi atë si “ditën më të ftohtë të karrierës sime”, duke shtuar se “kurrë nuk morëm një përgjigje të qartë se çfarë do të ndodhte me grupin pas atij ‘pushimi’”.

    I pyetur për mundësinë e një ribashkimi, Louis u shpreh me ndjeshmëri:

    “Kurrë mos thuaj kurrë por pas humbjes së Liam-it, nuk jam i sigurt nëse do të ishte e drejtë.”

  • Robbie Williams rikthehet me turneun “Long 90’s Tour”

    Robbie Williams rikthehet me turneun “Long 90’s Tour”

    Robbie Williams ka konfirmuar rikthimin e tij në skenë me një turne të ri muzikor, i cili do të nisë më 4 shkurt 2026 në Barrowlands Ballroom të Glasgow, për të promovuar albumin e ardhshëm “Britpop”.

    Turneu, i quajtur “Long 90’s Tour”, do të vazhdojë më pas në Liverpool (6 shkurt), Londër – O2 Academy (8 shkurt) dhe Wolverhampton (9 shkurt).
    Njoftimi u bë publik të enjten mbrëma, gjatë performancës së fundit të Williams për vitin 2025 në Camden, pas një serie koncertesh që përfshinë edhe shfaqjen madhështore në Murrayfield Stadium në Edinburg.

    Fillimisht, albumi “Britpop” ishte planifikuar të publikohej më 10 tetor 2025, por publikimi u shty për në shkurt 2026, për arsye organizative.

    Nëse albumi arrin vendin e parë të toplistave, ai do të shënojë projektin e 16-të të Williams që kryeson klasifikimet, duke e vendosur artistin përpara rekordit historik të The Beatles.

    Në “Britpop” marrin pjesë emra të njohur të muzikës britanike si Chris Martin (Coldplay), Gaz Coombes (Supergrass), Tony Iommi (Black Sabbath) dhe Gary Barlow, ish-anëtar i grupit Take That.

    Deri tani janë publikuar katër këngë nga albumi: “Rocket”, “Spies”, “Human” dhe “Pretty Face”, kjo e fundit e lëshuar të enjten.
    Kënga “Rocket” është përzgjedhur si singli kryesor që prezanton projektin.

    Williams e përshkroi “Britpop”-in si “albumin që gjithmonë ka dashur ta shkruajë” dhe tha:

    “Ishte epoka e artë e muzikës britanike. Ky album është më i papërpunuar, më energjik, me më shumë kitarra se çdo gjë që kam bërë më parë. Ka shumë ‘Brit’, por edhe shumë ‘Pop’. Jam jashtëzakonisht krenar për këtë punë.”

    Karriera e këngëtarit është trajtuar së fundmi në filmin “Better Man” (2024), ku ai huazoi zërin për një shimpanzë të animuar që e portretizon atë, si dhe në dokumentarin e Netflix (2023), që ndriçoi betejat e tij me varësinë dhe shëndetin mendor.

  • Stomaku kundër trurit: Si të bindni veten për një dietë më të shëndetshme?

    Stomaku kundër trurit: Si të bindni veten për një dietë më të shëndetshme?

    Si të filloni një dietë të shëndetshme sot, pa pritje dhe pa stres

    Shumë prej nesh mendojnë se dita ideale për të filluar një dietë është “nesër” ose “java e ardhshme”. E vërteta është se koha më e mirë për të filluar është sot dhe tani. Nuk ka moment të gabuar – duhet vetëm pak planifikim dhe motivim.

    Megjithatë, vendimet që lidhen me ushqimin shpesh duken më të vështira se negociatat mes policisë dhe grabitësve të bankave. Për të ndihmuar veten, mjafton të kaloni nga “stomaku” te “truri” dhe të përdorni disa strategji të thjeshta.

    1. Pastroni ambientin nga tundimet

    Hapi i parë është të hiqni të gjitha ushqimet që mund të ju tërheqin drejt tundimit. Zbrazni sirtarët me çokollata të harruara, heqni ëmbëlsirat nga çantat dhe largoni çdo pako biskotash që nuk i përshtatet dietës suaj. Kur nuk keni pranë këto tundime, është më e lehtë të qëndroni të fokusuar.

    2. Planifikoni paraprakisht

    Zgjidhni një ditë të javës si “dita e planifikimit të menysë”. Bëni blerjet kur nuk jeni të uritur dhe vetëm sipas listës së përgatitur. Sa më pak të blini impulsivisht, aq më pak mundësi keni të tundoheni nga ushqime jo të shëndetshme.

    3. Riprogramoni zakonet e ngrënies

    Sheqeri ka efekt të ngjashëm me një varësi – trupi kërkon gjithmonë më shumë. Është e lehtë të krijoni zakone të këqija si torta pasdite apo ëmbëlsira pas darkës. Për këtë arsye, është e rëndësishme të eliminohet gradualisht sheqeri dhe të riprogramohet trupi për zgjedhje më të shëndetshme. Disa mund ta bëjnë menjëherë, të tjerët gradualisht – por rezultati duhet të jetë i njëjtë: largimi i sheqerit.

    4. Krijoni zakone të reja

    Disa javë këmbëngulje janë të mjaftueshme për të krijuar një rutinë të shëndetshme. Hani mëngjes, drekë dhe darkë në të njëjtën kohë çdo ditë, dhe planifikoni ushqime të shëndetshme për momentet kur ndjeni uri të fortë. Kjo eliminon “daljet spontane” dhe ju ndihmon të qëndroni në rrugën e duhur.

    5. Mbani ekuilibrin

    Ndërsa eliminoni ushqimet jo të shëndetshme, mos harroni të shtoni ato që ofrojnë vlera ushqyese të nevojshme. Një dietë e larmishme, që përfshin të gjitha grupet e ushqimit, siguron energji, vitamina dhe minerale për funksionimin normal të trupit. Ushqehuni në sasi të arsyeshme dhe shmangni kalorite e zbrazëta, duke e bërë dietën të kënaqshme dhe të qëndrueshme.

  • Si po sjell ultrazëri një epokë të re të trajtimit të kancerit pa ndërhyrje kirurgjikale?

    Si po sjell ultrazëri një epokë të re të trajtimit të kancerit pa ndërhyrje kirurgjikale?

    Për dekada, ultrazëri është përdorur për të parë brenda trupit, por tani valët e zërit me frekuencë të lartë po shfaqin potencialin për të luftuar kancerin.

    Zhen Xu, studente doktorature në Universitetin e Michigan-it, në fillim të viteve 2000 kërkonte një mënyrë për të shkatërruar indet e sëmura pa kirurgji invazive. Duke eksperimentuar me ultrazërin mbi zemrat e derrave, ajo pa se rritja e numrit të pulsimeve të ultrazërit jo vetëm e bënte tingullin më të durueshëm për kolegët, por gjithashtu shkatërronte indin më efektivisht, duke krijuar vrima në indin e zemrës brenda një minute.

    Ky zbulim rastësor çoi në zhvillimin e histotripsisë, një teknikë që përdor ultrazërin për të shkatërruar tumorët pa nxehtësi dhe pa operacione invazive. Procedura krijon mikroflluska që shkatërrojnë indin e tumorit brenda mikrosekondash, ndërsa sistemi imunitar pastron mbetjet.

    Në tetor 2023, FDA miratoi histotripsinë për trajtimin e tumoreve të mëlçisë. Një studim i vitit pasues tregoi sukses teknik në 95% të rasteve, ndërsa komplikimet janë të rralla dhe zakonisht përfshijnë dhimbje abdominale ose gjakderdhje të lehtë brenda trupit. Trajtimi është i shpejtë, pa dhimbje dhe shpesh pacientët mund të kthehen në shtëpi të njëjtën ditë. Seanca zgjat zakonisht 1–3 orë, dhe tumorët e vegjël kërkojnë vetëm një trajtim.

    Ndryshe nga teknika e mëparshme HIFU, që përdor nxehtësi për të shkatërruar indet, histotripsi minimizon rrezikun për indet përreth dhe ofron rezultate të ngjashme pa efekte termike.

    Përveç trajtimit të tumorëve, ultrazëri ka potencial për të përmirësuar shpërndarjen e barnave. Kur mikroflluskat injektohen në gjak dhe aktivizohen me ultrazër, ato mund të hapin përkohësisht barrierën gjak-tru, duke lejuar ilaçet të arrijnë tumoret e trurit. Gjithashtu, kjo teknologji mund të forcojë efektin e imunoterapisë, pasi tumoret e dëmtuar bëhen më të dukshme për sistemin imunitar.

    Megjithatë, teknologjia ka kufizime: ultrazëri nuk depërton përmes kockave apo organeve që përmbajnë gaz, si mushkëritë, dhe ende nuk ka të dhëna afatgjata për rikthimin e kancerit pas trajtimit.

    Histotripsi po shfaqet si një nga inovacionet më premtuese në luftën kundër kancerit, duke hapur rrugën për trajtime më të sigurta, më të shpejta dhe pa kirurgji invazive.

  • Test i ri gjaku diagnostikon lodhjen kronike me 96% saktësi

    Test i ri gjaku diagnostikon lodhjen kronike me 96% saktësi

    Shkencëtarët në Universitetin e East Anglia dhe kompaninë Oxford Biodynamics kanë zhvilluar një test gjaku inovativ për sindromën e lodhjes kronike (ME/CFS) me një saktësi të jashtëzakonshme prej 96%, duke sjellë shpresë për miliona të prekur në mbarë botën, përfshirë mbi 400,000 persona vetëm në Mbretërinë e Bashkuar.

    ME/CFS karakterizohet nga lodhje ekstreme që nuk përmirësohet me pushim, dhe deri më tani ka qenë një sëmundje e vështirë për t’u diagnostikuar. Shumë pacientë raportojnë se janë injoruar ose u është thënë se simptomat e tyre “janë vetëm në kokën e tyre”.

    Testi i ri përdor teknologjinë EpiSwitch 3D Genomics, e cila analizon mënyrën se si ADN-ja është e palosur në mostrat e gjakut. Ndryshe nga testet gjenetike për sëmundjet trashëgimore, kjo qasje shqyrton shenjat epigjenetike, modele të palosjes së ADN-së që ndryshojnë gjatë jetës dhe nuk lidhen me kodin gjenetik të fiksuar.

    Shkencëtarët analizuan mostra gjaku nga 47 pacientë me ME/CFS të rënda dhe 61 individë të shëndetshëm, duke identifikuar një model unik të palosjes së ADN-së që shfaqet te pacientët me ME/CFS, por jo te të shëndetshmit. Testi tregoi 92% ndjeshmëri (identifikon saktë pacientët) dhe 98% specifikë (identifikon saktë ata pa sëmundjen).

    Prof. Dmitry Pshezhetskiy, kryeshkencëtari i projektit, shpjegoi se ky test mund të transformojë diagnostikimin dhe menaxhimin e ME/CFS, duke i dhënë fund viteve të diagnostikimeve të gabuara. Testi gjithashtu ka zbuluar rrugë të sistemit imunitar dhe të inflamacionit të përfshira në sëmundje, të cilat mund të udhëheqin drejt trajtimeve të synuara në të ardhmen.

    Shkencëtarët shpresojnë që ky zbulim të hapë rrugën për teste të ngjashme për COVID-in e gjatë, e cila shfaq simptoma të ngjashme me ME/CFS.

    Platforma EpiSwitch ka treguar më parë sukses në identifikimin e shenjave për sëmundje komplekse si ALS, artriti reumatoid dhe disa lloje kanceresh. Prof. Pshezhetskiy thekson se ky është herën e parë që ekziston një test i thjeshtë gjaku që mund të diagnostikojë me besueshmëri ME/CFS, me potencial për të ndryshuar rrënjësisht mënyrën se si diagnostikohet dhe menaxhohet kjo sëmundje komplekse.

  • Ushqimi nuk është gjithmonë shkaku, arsyet më pak të njohura pse ndiheni të fryrë

    Ushqimi nuk është gjithmonë shkaku, arsyet më pak të njohura pse ndiheni të fryrë

    Shpesh e lidhim fryrjen e barkut me ushqimin, por ky fenomen i pakëndshëm mund të ketë shkaqe krejt të ndryshme. Grumbullimi i gazrave në traktin tretës shpesh shoqërohet me dhimbje stomaku, shqetësim ose gromësija, por nuk lidhet gjithmonë me dietën.

    Gastroenterologia Monica Borka shpjegon se fryrja mund të shkaktohet nga faktorë të ndryshëm shëndetësorë dhe psikologjikë. Ja disa prej tyre:

    1. Stresi dhe ankthi
    Sistemi tretës është i lidhur ngushtë me trurin. Kur jemi të stresuar, trupi çliron hormonin kortizol, i cili mund të ngadalësojë tretjen dhe të shkaktojë fryrje. Stomaku “ndjen” stresin tonë.

    2. Medikamente dhe suplemente
    Disa ilaçe mund të prishin ekuilibrin e baktereve në zorrë, të shkaktojnë mbajtje të lëngjeve ose të ngadalësojnë tretjen. Përdorimi afatgjatë i qetësuesve të dhimbjeve shpesh shkakton kapsllëk, që çon në fryrje. Edhe disa suplemente, si multivitaminat ose hekuri, mund të ndikojnë në të njëjtën mënyrë.

    3. Divertikuloza
    Kjo gjendje karakterizohet nga formimi i gungave të vogla në murin e zorrës së trashë, shpesh për shkak të dietës me pak fibra. Kur këto gunga infektohen (divertikulit), fryrja është një simptomë e zakonshme. Megjithëse prek kryesisht të moshuarit, po ndodh gjithnjë e më shumë tek të rinjtë.

    4. Infeksione
    Fryrja mund të shkaktohet nga infeksione, përfshirë ato të shkaktuara nga bakteret Helicobacter pylori në stomak ose infeksione të traktit urinar. Simptomat shoqëruese mund të përfshijnë të përziera, dhimbje barku, belbëzim ose ndjesi djegieje.

    Fryrja e barkut nuk është gjithmonë thjesht një pasojë e ushqimit. Njohja e këtyre shkaqeve mund t’ju ndihmojë të merrni masat e duhura dhe të kërkoni trajtim në kohë.

  • A është efektiv mikrodozimi i Accutane?

    A është efektiv mikrodozimi i Accutane?

    Aknet e rënda, të dhimbshme dhe që lënë plagë në lëkurë, ndikojnë ndjeshëm në vetëbesimin e adoleshentëve dhe të rriturve. Kur trajtimet e zakonshme nuk japin rezultate, dermatologët shpesh përshkruajnë izotretinoin, i njohur me emrin tregtar Accutane.

    Sipas Dr. John Barbieri, profesor i asociuar i dermatologjisë në Harvard Medical School, izotretinoina funksionon duke tkurrur gjëndrat e yndyrës dhe parandaluar bllokimin e poreve, duke sjellë lëkurë më të pastër për shumicën e përdoruesve. Megjithatë, ilaçi mund të shkaktojë efekte anësore shqetësuese, si thatësi të lëkurës, buzëve dhe syve, dhimbje koke, dhimbje muskujsh, ndryshime të humorit, depresion dhe rritje të kolesterolit. Në disa raste, aknet mund të rikthehen pas përfundimit të trajtimit.

    Çfarë është mikrodozimi?

    Për ata që shqetësohen për efektet anësore ose kanë pasur rikthim të akneve, dermatologët mund të rekomandojnë mikrodoza të izotretinoinës, shpjegon Dr. Sara Perkins nga Yale School of Medicine. Nuk ka një përkufizim standard, por mikrodozat zakonisht janë më të ulëta se doza standarde dhe mund të jenë të përshtatura sipas peshës, ashpërsisë së akneve dhe tolerancës së pacientit.

    Për shembull, një dozë standarde mund të jetë 30–60 mg në ditë për një person 60 kg, ndërsa mikrodoza mund të jetë 10–30 mg në ditë, ose edhe vetëm tri herë në javë.

    Trajtimi standard zakonisht zgjat 4–6 muaj, ndërsa mikrodozimi mund të zgjasë 8 muaj deri një vit ose më shumë.

    Mikrodozimi zvogëlon efektet anësore dhe mund të parandalojë rikthimin e akneve pas përfundimit të trajtimit. Ai është gjithashtu i përshtatshëm për persona me akne të lehta ose të moderuara që nuk janë përmirësuar me trajtime të tjera.

    Paralajmërime të rëndësishme

    Izotretinoina nuk duhet përdorur nga gratë shtatzëna ose ato që mund të mbeten shtatzëna, pasi mund të shkaktojë defekte serioze të lindjes ose vdekje të fetusit.

    Ilaçi mund të rrisë kolesterolin, trigliceridet dhe nivelet e enzimave të mëlçisë, ndaj dermatologët rekomandojnë analiza periodike gjaku, të cilat gjatë mikrodozimit mund të zgjasin një vit ose më shumë.

    Mikrodozimi po bëhet një opsion gjithnjë e më i përdorur për të trajtuar aknet e rënda me më pak efekte anësore, duke ofruar shpresë për pacientët që kërkojnë një lëkurë të pastër dhe të shëndetshme pa rrezikun e komplikimeve serioze.

  • Etiketat e kalorive në menu nuk ndikojnë shumë në përmbajtjen ushqimore

    Etiketat e kalorive në menu nuk ndikojnë shumë në përmbajtjen ushqimore

    Kur Anglia nisi në vitin 2022 një rregull që detyron restorantet, kafenetë dhe fast food-et e mëdha të shënojnë numrin e kalorive për çdo ushqim në menu, pritej që kjo të nxiste ofrimin e ushqimeve më të shëndetshme dhe të ndihmonte konsumatorët të zgjedhnin më mirë. Por një studim i ri tregon se kjo praktikë ka pasur efekt minimal.

    Sipas një hulumtimi të publikuar në BMJ Public Health, përmbajtja mesatare e kalorive në menutë e lokaleve ra vetëm rreth 2% pas zbatimit të politikës, një ndryshim që studiuesit e përshkruajnë si “të kufizuar dhe modest për shëndetin publik”. Një studim tjetër vitin e kaluar tregoi se konsumatorët pothuajse nuk ndryshuan zakonet e tyre, duke konsumuar të njëjtat kalori si më parë.

    Hulumtimi përfshiu mbi 31 mijë artikuj nga 78 zinxhirë restorantesh, duke krahasuar menutë para dhe pas futjes së rregullit. Rezultatet treguan se kaloritë mbetën pothuajse të pandryshuara për shumicën e ushqimeve. Përjashtim bënë disa kategori, si pijet e gazuara, pijet joalkoolike dhe hamburgerët, të cilat shënuan një ulje më të dukshme të kalorive. Megjithatë, kjo ulje nuk erdhi nga riformulimi i recetave, por kryesisht nga heqja e produkteve me shumë kalori dhe shtimi i opsioneve pak më të lehta.

    Studiuesit theksojnë se shënimi i kalorive në menu vetëm e ndryshon prezantimin e ushqimit, por nuk i detyron bizneset të bëjnë ndryshime reale në përbërjen e tij.

    Qeveria britanike vlerëson se nëse popullsia do të ulte mesatarisht vetëm 50 kalori në ditë, kjo mund të nxirrte nga obeziteti rreth 2 milionë të rritur dhe 340 mijë fëmijë.

  • Çizme të dëmtuara dhe rroba rezervë për shkollë: Realiteti i tronditshëm i fëmijëve në Fushë Kosovë

    Çizme të dëmtuara dhe rroba rezervë për shkollë: Realiteti i tronditshëm i fëmijëve në Fushë Kosovë

    Fëmijët e lagjes Meshari në Fushë Kosovë përballen me kushte të vështira për të shkuar në shkollë

    Në lagjen Meshari të Fushë Kosovës, fëmijët e komuniteteve minoritare përballen çdo ditë me sfida për të arritur në shkollë. Rrugët e mbushura me lloq dhe baltë i detyrojnë ata të vijnë me rroba rezervë dhe të gjejnë mënyra për të kaluar sipër baltës, vetëm për të vazhduar mësimin.

    Ky realitet tregon gjendjen e rënduar të infrastrukturës lokale dhe nevojën urgjente për ndërhyrje që fëmijët të kenë kushte të denja për të ndjekur shkollën pa pengesa fizike.

    https://www.facebook.com/share/v/17WfeVBjQt/

     

  • Një e katërta e shoferëve nuk dinë si ta përdorin treguesin në rrethrrotullim

    Një e katërta e shoferëve nuk dinë si ta përdorin treguesin në rrethrrotullim

    Një e katërta e shoferëve nuk dinë si ta përdorin treguesin në rrethrrotullime, sipas një ankete të Klubit Gjerman të Automobilave (ACE) në Evropë.

    ACE-ja vëzhgoi 30 rrethrrotullime në të gjithë vendin, për një orë secili, gjatë një periudhe tre-ditore. Gjatë analizës u vëzhguan afro 20 mijë automjete dhe u zbulua se vetëm 26.6% e shoferëve hyjnë dhe dalin saktë nga rrethrrotullimet. Shumica e tyre gabojnë në përdorimin e treguesve.

    Përdorimi i duhur i treguesit në rrethrrotullime është i thjeshtë:

    Kur hyni në rrethrrotullim: mos e ndizni treguesin, për të mos ngatërruar shoferët e tjerë.

    Kur dilni nga rrethrrotullimi: ndizni treguesin sa më shpejt të jetë e mundur.

    Ky sinjal i tregon shoferëve të tjerë se ku keni ndërmend të dilni, duke rritur sigurinë dhe duke lehtësuar rrjedhën e trafikut.

    Në Gjermani, kushdo që përdor treguesin gabimisht ose nuk e përdor fare rrezikon një gjobë prej 10 eurosh, edhe nëse nuk shkakton aksident.