ATV

Author: ATVLive

  • Në cilësinë e të dyshuarit, Hysen Durmishi intervistohet nga prokuroria speciale

    Në cilësinë e të dyshuarit, Hysen Durmishi intervistohet nga prokuroria speciale

    Përgatiti: Arton Hamiti

    Zakonisht ditën e fillon në zyrën e tij, por, zëvendësministri i Infrastrukturës paraditen e së mërkurës kishte diçka tjetër në agjendë.

    Në cilësinë e të dyshuarit, Hysen Durmishi për gati dy orë u intervistua nga Prokuroria Speciale në lidhje me kontratat e nënshkruara për rrugën Prishtinë – Podujevë.

    Pavarësisht se Organi Shqyrtues i Prokurimit konstatoi se Ministria e Infrastrukturës ka bërë shkelje duke nënshkruar kontratat derisa ka pasur ankesë aktive, Durmishi që është një nga tre nënshkruesit insiston se procedurat kanë qenë në rregull.

    Vendimi i OSHP-së në dhjetor të vitit të kaluar, e kishte konfirmuar se nënshkrimi i kontratës për ndërtimin e llotit të dytë të magjistraltes Prishtinë – Podujevë, ishte në kundërshtim me Ligjin e Prokurimit, pasi kishte ankesë aktive dhe tenderi është dashur të pezullohej.

    Kontrata ishte nënshkruar nga Nexhat Krasniqi, zyrtar përgjegjës i Prokurimit në këtë ministri, katër ditë pas ankesës se Operatorit Ekonomik “Sallahu” në OSHP.
    Për këtë shkelje Gjykata e Tenderëve kërkoi që Krasniqit t’i revokohet certifikata e zyrtarit përgjegjës të prokurimit.

    Sidoqoftë, duke u nisur kryesisht nga parimi i përgjithshëm i interesit publik, pavarësisht shkeljeve, OSHP-ja kishte rekomanduar që vendimi i ministrisë dhe kontrata e nënshkruar të mbesin në fuqi dhe puna në ndërtimin e rrugës të vazhdojë.

    Tenderi për “Zgjerimin e rrugës nacionale Prishtinë Besi – Podujevë” kap vlerën e
    38 milionë eurove.

  • Aksident trafiku në kryeqytet, gjashtë të lënduar, një në gjendje të rëndë

    Aksident trafiku në kryeqytet, gjashtë të lënduar, një në gjendje të rëndë

    Përgatiti: Benita Zeneli

    Gjashtë persona, kanë mbetur të lënduar si pasojë e një aksidenti mes dy veturave në Prishtinë.

    Njëri prej të lënduarve është në gjendje më të rëndë shëndetësore, derisa të gjashtit po trajtohen në Qendrën Klinike Universitare të Kosovës.

    Shkaqet e aksidentit ende nuk dihen. Mirëpo nga policia kanë konfirmuar se rasti po hetohet.

    “Sot rreth orës 09:00 kemi pranuar informatën se në udhëkryqin afër konvikteve në Prishtinë , ka ndodhur një aksident trafiku. Në këtë aksident kanë qenë të përfshira, dy automjete të cilat kanë qenë në lëvizje. Si pasojë e aksidentit lëndime trupore kanë pësuar gjashtë persona. Me rastin po merret hetuesia nga njësiti i trafikut rrugor”, thuhet në njoftimin e Policisë së Kosovës.

    Edhe dëmet materialet nuk janë hiç të vogla. Pjesët e veturave të aksidentuara u shpërndan gjithandej.

    Më shumë se një orë e gjysmë u desh për ta pastruar vendin e ngjarjes dhe më pas të vazhdojë qarkullimi normal i veturave të tjera.

  • “Dhjetë plumba kokës para syve të fëmijës 8-vjeçar”, gjykimi për vrasjen e 48 vjeçarit nga Prizreni

    “Dhjetë plumba kokës para syve të fëmijës 8-vjeçar”, gjykimi për vrasjen e 48 vjeçarit nga Prizreni

    Përgatiti: Nora Luta

    Për vrasjen që tronditi Prizrenin shtatorin e vitit të kaluar Aziz Gashi është deklaruar i pafajshëm.

    Në Gjykatën e Prizrenit të mërkurën nisi gjykimi ndaj Gashit nën akuzën për vrasjen e Beqir Morinës në shtator të 2023-s, në lagjen Arbana të këtij qyteti.

    Fajësinë e mohoi, por nga banka e të akuzuarit ai u shprehi keqardhje për rastin familjes së viktimës, që ishte e pranishme në sallën e gjykimit.

    E bashkëshortja e të ndjerit, për disa çaste u detyrua ta lëshoj sallën shkaku i gjendjes së rënduar emocionale.

    52 vjeçari, sipas aktakuzës shkrepi dhjetë plumba në kokën e viktimës, për shkak të një mosmarrëveshje që e kishin pasur më herët.

    Sipas Prokurorisë, i akuzuari rrezikoi jetën edhe të anëtarëve të familjes së viktimës, që ishin të pranishëm në ditën kritike, përfshirë fëmijës 8 vjeçar.

    Ndaj Gashit rëndojnë edhe akuzat për armëmbajtje pa leje dhe asgjësim të pasurisë, për të cilat e pranoi fajësinë.

    Gjykata e veçoi procedurën për këto dy vepra, dhe vendimi do të shpallet gjatë javës së ardhshme.

    Ngjarja tragjike kishte ndodhur më 3 shtator të vitit të kaluar.

    I akuzuari në seancën për caktimin e masës së paraburgimit vitin e kaluar kishte deklaruar se nuk ka qenë në gjendje të mirë shëndetësore, derisa edhe të mërkurën tregoi se është në terapi.

  • Anketuesit e ASK-së përballën me sulme fizike dhe ngacmime

    Anketuesit e ASK-së përballën me sulme fizike dhe ngacmime

    Përgatiti: Pranvera Krasniqi

    Teksa trokisnin në dyert e kosovarëve për regjistrim të popullsisë, anketuesit, ditëve të fundit nuk u pritën mirë. Përveç konflikteve verbale për ndonjë paqartësi të mundshme rreth pyetjeve të formularit, ndaj tyre nuk mungoi as dhuna.

    Për rastin në Pejë, ku një anketues u sulmua fizikisht nga një familje në fshatin Turjakë, por edhe kërcënimet eventuale, tashmë po merret policia.

    “Është duke u marr policia atje, institucion përgjegjës, ka raste…kem sfida por te vogla, ekonomitë familjare mund të kenë ndonjë hall, në Moldavi e kanë ndërpre për shkak t sfida, ka sfida po procesi ka kaluar në duart e policisë pastaj nëse është e nevojshme do të kalojnë edhe në prokurori”, tha Avni Kastrati, u.d. i kryeshefit Ekzekutiv të ASK-së.

    Për dhunë jo, por për ngacmime seksuale, 3 gra kanë raportuar në organizatën “Fourth Wave”. Kjo u bë e ditur përmes protestës së aktivistëve para zyrave të ASK-së.

    “Gratë regjistruese janë lajmëruar te ne dhe kanë thënë se gjatë regjistrimit janë përballuar me intimidim dhe ngacmim…”, tha Nerimane Ferizi nga organizata “Fourth Wave”.

    Për këtë, drejtori i ASK-së thotë se nuk ka marrë ende ndonjë raport zyrtar.

    “Askush deri më tash nuk ka raportuar në formë zyrtare për këtë, kështu si thashetheme kemi dëgjuar…”, tha Kastrati.

    Sipas ekspertit të sigurisë, Drizan Shala, mungesa e komunikimit është shkaktar për të gjitha incidentet e mundshme gjatë procesit të regjistrimit mes anketuesve dhe ekonomive familjare.

    “Qytetarët tani kanë një devalvim kulturor ekonomiko-social, sidomos tri vitet e fundit, anketuesit duke mos pasur mundësi që të avancojnë tutje drejt dialogimit me intervistuesin, ka ndikua mu marrë pyetjet provokuese insistuese, edhe rasti I fundit është mungesë dialogimi…mund të kenë pasur pyetje që i kanë keqkuptuar, nuk është shtrirë pyetja si duhet”, tha Shala.

    Ndërkaq, për procesin e regjistrimit, janë angazhuar gjithsej 3400 punonjës, prej tyre 2500, si regjistrues dhe 900 të tjerë si mbikëqyrës.

  • BE-ja “e shqetësuar” për Vulinin, por e do Serbinë si “partnere të besueshme”

    BE-ja “e shqetësuar” për Vulinin, por e do Serbinë si “partnere të besueshme”

    Përgatiti: Fatlum Jashari

    Bashkimi Evropian vijon të tregojë dy anë qëndrimesh në raport me Serbinë, respektivisht Qeverinë e re në Beograd.

    Në njërën anë blloku 27-anëtarësh dëshiron që afrojë shtetin ballkanik drejt perëndimit dhe ta largojë atë nga Rusia.

    “Në kontekstin aktual sfidues gjeopolitik, ne duam të llogarisim në Serbinë si partner i besueshëm evropian për parimet, vlerat dhe sigurinë e përbashkët. Prandaj ne presim të punojmë me Qeverinë e re në përpjekjet për të rritur nivelin e rreshtimit të Serbisë me qëndrimet e përbashkëta të BE-së në politikë të jashtme dhe siguri, përfshirë masat kufizuese të BE-së… Ne presim që Serbia të përmbahet nga intensifikimi i marrëdhënieve të saj më Rusinë. Presim që të gjithë anëtarët e Qeverisë së Serbisë të respektojnë zotimet që Serbia ka ndërmarrë në kuadër të negociatave për anëtarësim”, thuhet në qëndrimin e BE-së.
    Në anën tjetër, BE-ja është e brengosur për përfshirjen e Aleksandar Vulin dhe Nenad Popovic në qeverinë e re të Serbisë.

    “Shohim me shqetësim që disa nga veprimet dhe qëndrimet e z. Vulin viteve të fundit, fatkeqësisht, kanë qenë kundër thirrjeve të BE-së për të respektuar zotimet e lidhura me anëtarësimin dhe që të mos zhvillojë lidhje kundër-produktive me regjimin Rus. Anëtarësimi në BE është zgjedhje.

    Ne presim që Qeveria e Serbisë të demonstrojë përkushtimin e saj ndaj rrugës evropiane duke u rreshtuar me BE-në në politikë të jashtme dhe siguri, që në kontekstin gjeopolitik aktual është sinjal, më i rëndësishëm se kurrë me parë, i vlerave të përbashkëta dhe orientimit strategjik”, thuhet më tej në qëndrimin e BE-së.

    Reagimi fillestar i Përfaqësuesit të Lartë për Politkë të Jashtme dhe Siguri, Josep Borrell, se “mezi pret të punojë me qeverinë e re serbe”, ishte subjekt i kritikave edhe brenda institucioneve të BE-së.

    Duke rikujtuar se Vulin dhe Popovic mbesin në listën e të sanksionuarave, Shtetet e Bashkuara të Amerikës janë shprehur të zhgënjyera me përfshirjen e tyre në Qeverinë e re të Serbisë.

  • Betim Reçica dhe tre zyrtarë të tjerë lirohen nga akuzat për korrupsion

    Betim Reçica dhe tre zyrtarë të tjerë lirohen nga akuzat për korrupsion

    Përgatiti: Nora Luta

    Betim Reçica të martën është liruar nga akuzat për keqpërdorime në ndërtimin e autostradës së Gjilanit, nga Gjykata Themelore e Prishtinës.

    Aktgjykim lirues u shpall edhe për tre zyrtarët Isa Berisha, Leonora Limani dhe Mirdit Emini, ndaj të cilëve Prokuroria Speciale pretendon se Reçica ushtroi presion.

    Sipas aktakuzës Reçica si ushtrues i detyrës së drejtorit të prokurimit publik në Ministrinë e Infrastrukturës, ushtroi ndikim mbi tre të pandehurit që rivlerësimin e tenderit për ndërtimin e autoudhës ta kryejnë për 10 ditë.

    Por Gjykata në shpalljen e vendimit tha se nuk ka gjetur prova që dëshmojnë një gjë të tillë.

    Sipas PSRK-së, Reçica kishte kërkuar nga anëtarët e komisionit që të shkojnë në takim me ish-ministrin Pal Lekaj, e më pas ta shpallin fitues kompaninë “Gjoka Konstruktion”.

    Komisioni Rivlerësues, sipas aktakuzës, kishte rekomanduar kompaninë “Papenburg Adriani”.

    Por kjo sipas verdiktitit të gjykatës nuk është dëshmuar gjatë procesit gjyqësor.

    Ndërkohë ish sekretarit të Ministrisë së Infrastrukturës Betim Reçicës, në shkurt të këtij viti i është konfirmuar edhe aktakuza në një rast tjetër, për keqpërdorim të detyrës zyrtare në projektin e rrugës Prizren – Prevallë.

  • Çmime të larta të produkteve bujqësore

    Çmime të larta të produkteve bujqësore

    Përgatiti: Sara Shehu

    Prodhimet bujqësore në Kosovë po vazhdojnë të shtrenjtohen.

    Në tre muajt e parë të këtij viti, sipas Agjencisë së Statistikave, këto produkte patën çmim më të lartë për 5.3%, krahasuar me periudhën e njëjtë të 2023-ës.

    Kjo kategori ndahet në prodhime bimore dhe blegtorale. Të parat, që përfshijnë drithërat, perimet e pemët, u shtrenjtuan për 2.8%, ndërsa dallim vërehet më shumë te çmimi i produkteve të kafshëve, për 7.3%.

    Njohësi i ekonomisë , Zekirja Shabani, thotë se këto çmime ndikojnë drejtpërdrejt në xhepin e qytetarëve.

    Një nga tregjet më të frekuentuara është ai i Bresjes në Fushë Kosovë. Qytetarët ankohen se për çmimet e larta.

    Sipas tyre, problem tjetër vazhdon të jetë edhe dallimi i çmimeve të produkteve ushqimore nëpër dyqane. Norma vjetore e inflacionit për muajin mars në Kosovë ishte 2.3%.

  • E dhimbshme: Invalidi i luftës mbeti me vite brenda në shtëpi se nuk e ndërronte dot protezën

    E dhimbshme: Invalidi i luftës mbeti me vite brenda në shtëpi se nuk e ndërronte dot protezën

    Përgatiti: Krenare Mulliqi

    Mbajtja e protezës më gjatë se që ishte parashikuar, nuk e la pa pasoja.

    Qazim Hajdari, ndërrimin e protezës në këmben tij duhet ta bëjë çdo 2 vjet, por kësaj here e mbajti më shumë se 5.

    Derisa nuk kishte fonde të ndara nga Qeveria për këtë kategori, Hajdari nuk arriti që shumën e protezës ta përballonte i vetëm, dhe kështu për disa vjet ai lëvizi me karrocë.

    “2 vjet e 8 muaj kom nejt pa protezë, nuk u kanë hiq lehet, veç kush mujke mem nimu, dikur ma sjellën ni kolic..”, tha Hajdari.

    Mirëpo, Hajdari arriti ta ndërrojë protezën, para 3 jave, pasi që Qeveria së fundmi ekzekutoi mjetet për këtë kategori.

    “Proteza më ka kushtua 5 mijë euro, jam shumë i kënaqur edhe ma i kënaqur që e kom ba në Kosovë te një shqiptar..”, tha Hajdari.

    Ndërkaq, nga 105 invalidët që kanë nevojë për proteza deri më tani 45 e kanë fituar këtë të drejtë.

    “45 invalid e kanë marrë dokumentacionin prej Qendrës Klinike Universitare dhe e kanë dorëzuar në Fondin për Sigurime Shëndetësore, janë marr masat dhe po punohet intensivisht aty ku dëshiron vet invalidi”, tha Fadil Shurdhaj nga shoqata e Invalidëve.

    Ani pse me shumë vonesë, sipas Shurdhaj paratë që Qeveria i ndau janë të mjaftueshme.

    “Është shumë e mjaftueshme pasi protezat kanë dy vite garancion, do të thotë ata që e marrin sivjet edhe dy vite nuk kanë nevojë, meqë institucionet publike shëndetësore nuk i ofrojnë këto shërbime”, tha Shurdhaj.

    Pas shumë kërkesave, në fund të muajit mars Qeveria ndau mbi 2 milionë euro për mbulim të trajtimit mjekësor të personave me status të invalidit të luftës, për qëllim të ndërrimit, mirëmbajtjes apo vendosjes së protezave jashtë institucioneve shëndetësore publik.

    Kjo shumë do të shfrytëzohet për tri vitet e ardhshme.

  • Lajcak e Escobar në fund të mandatit, analistët s’kanë arritur asnjë rezultat

    Lajcak e Escobar në fund të mandatit, analistët s’kanë arritur asnjë rezultat

    Përgatiti: Haris Ademi

    Miroslav Lajcak tha se u zhyt në diskutime të thella me Gabriel Escobar, në takimin e së martës, në Uashington.

    Dy emisarëve tw Bashkimit Evropian dhe Shteteve të Bashkuara, planifikon t’i bashkohet edhe Ndihmës-sekretari Amerikan i Shtetit, James O’Brien, për ta koordinuar mbështetjen SHBA-Be për Ballkanin Perëndimor.

    Njohësit thonë se këto mund të jenë ndër aktivitetet e fundit të Lajcak e Escobar në postet aktuale.

    Amerikani tashmë është konfirmuar se do të lëviz javët në vijim në një detyrë tjetër diplomatike. Ndërsa sllovenit i përfundon mandati në gusht, si ndërmjetësues në dialog.

    Njohësi i këtij procesi, Dorajet Imeri, thotë se nuk pret dinamikë në ditët e fundit të punës së dyshes.

    “Nuk ka asnjë indikacion, Kosova e ka të qartë që nuk është e gatshme për Asociacionin, përderisa Serbia nuk është e gatshme për ta nënshkruar marrëveshjen… Të dy nuk kanë arritur asnjë rezultat, për shkakun se si e kanë parë negociatat”, tha Imeri.

    Krejt 2024-ta në raportet Kosovë-Serbi do të jetë e qetë, sipas politologut Fidan Ukaj.

    “Dinamika e facilitimit nga emisarët e SHBA dhe BE do të bie, në qershor kemi zgjedhje në BE, kurse në fundvit në SHBA. Shto kësaj edhe largimin nga përgjegjësitë të Lajcakut dhe Escobarit”, tha Ukaj.

    Ndryshe mendon Gëzim Qerimi, që thotë se pret dinamikë, sidomos nga Bashkimi Evropian, pas miratimit të Planit Financiar për Ballkanin Perëndimor, nga ku Kosova e Serbia mund të përfitojnë vetëm nëse përparojnë në dialog.

    Mirëpo ky thotë se nga cilitdo emisarë të rinj që mund të emërohen, nuk mund të priten ndryshime të mëdha.

    “Një emër tjetër do ta ndryshonte klimën, por jo procesin, sepse procesi nuk varet nga përfaqësuesit e BE-së dhe SHBA-së, por nga politikat e Bashkimit Evropian, ata vetëm i përfaqësojnë interesat”, tha Qerimi.

    Për ta zëvendësuar Lajcakun, ka treguar ambiciet ish-presidenti slloven, Borut Pahor. Ndërsa ende nuk është bërë e ditur se kë mund ta dërgojë SHBA-ja për t’u marrë me Ballkanin Perëndimor.

  • Mbi 1,2 milion kosovarë marrin pjesë në regjistrimin e popullsisë

    Mbi 1,2 milion kosovarë marrin pjesë në regjistrimin e popullsisë

    Përgatiti: Armand Hoti

    Mbi 1,2 milion kosovarë morën pjesë në procesin e regjistrimit të popullsisë proces i cili do të përmbyllet më 17 maj.

    “Deri më tani po i shihni të dhënat ku janë regjistruar mbi 1,204,560 dhe regjistrimi është duke shkruar sipas planit. Edhe komunitetet, të gjitha janë duke marrë pjesë, disa komuna në veri nga serbët ka ende hezitim, një pjesë e tyre po regjistrohet, ka një hezitim por një pjesë po regjistrohet”, tha Avni Kastrati, u.d i kryeshefit të ASK-së.

    Mazllum Baraliu, ekspert i programit për zhvillim i OKB-së shprehet i kënaqur me gatishmërinë e qytetarëve për t’u regjistruar. Ai pret që këtë herë Kosova të numërojë më pak banorë, krahasuar me vitin 2011.

    “Lajm i mirë sepse ka pasur lajme, pritshmëri edhe më pesimiste do thoja pra shumë njerëz nga brenda dhe jashtë Kosovës, miq dhe armiq të Kosovës kanë menduar se jemi shumë më pak dhe do të dalim edhe më pak sa që jemi”, tha Baraliu.

    Edhe demografi Sami Behrami, është skeptik se Kosova ka banorë sa kishte 13 vjet më parë duke e përmendur migrimin si faktorin kryesor dhe rënien e natalitetit.

    “Popullsia e Kosovës do lëviz mes 1.5 ose 1.6 milion banorë…Faktori kryesor dhe më i rëndësishmi është emigrimi dhe fluksi shumë i lartë i migrimeve nga Kosova. Për informacionin tuaj dhe shikuesve tuaj, Kosovën në vitin 2021 dhe 2022 e kanë braktisur 40 mijë banorë, brenda vitit…nga migrimet përfshihen gjeneratat dhe grupmoshat më të afta për riprodhim, për punë dhe për siguri të vendit”, tha Behrami.

    Referuar të dhënave të Agjencisë së Statistikave të Kosovës, komuniteti serb në veri të vendit, del të jetë më hezituesi karshi procesit të regjistrimit.