Author: ATVLive

Më 11 maj, ka përfunduar periudha transitore e Bankës Qendrore të Kosovës për dinarin.

Nga e diela e 12 majit, valuta e vetme e cila mund të përdoret për pagesa në Kosovë është euroja.

Lidhur me këtë çështja është deklaruar Ambasada e Francës.

Në një përgjigje për Klankosova.tv thuhet se e respektojnë pavarësinë e Bankës Qendrore të Kosovës, por se zbatimi i rregullores i cili nuk është koordinuar paraqet vështirësi.

” Zbatimi i rregulloreve të Bankës Qendrore, i cili nuk është i kordinuar, megjithatë paraqet vështirësi që lidhen me qëndrueshmërinë e transfertave të ligjshme financiare nga Serbia, për shembull në favor të pensionistëve serbë ose të institucioneve shëndetësore ose arsimore”, thuhet në përgjigjen e Ambasadës.

Ambasada e Francës thotë se i mbështet propozimet e emisarit special të BE-së në dialogun Kosovës – Serbi, Miroslav Lajçak, rreth kësaj teme.

Tutje, Franca pret një përfundim të shpejtë dhe pozitiv të këtyre negociatave.

“Ndërmjetësuesi evropian Lajçak organizoi disa takime për këtë temë. Ne mbështesim plotësisht përpjekjet e tij dhe propozimet konkrete që ai ka paraqitur. Ne bëjmë thirrje për një përfundim të shpejtë dhe pozitiv të këtyre negociatave. Përfundimisht, një zgjidhje e qëndrueshme do të gjendet përmes krijimit të asociaciont të komunave me shumicë serbe”, thuhet në përgjigje.

Sindikata e Pavarur e Minatorëve të Trepçës ka bërë thirrje që të ekzekutohen pagat për minatorët.

SPMT thotë se situata e krijuar me vonesat në paga është bërë zakon që cenon vetë ekzistencën e minatorëve.

“Sot kur ne të gjithë me padurim presim ekzekutimin e pagave, me gjasë e njejta përseri nuk do të realizohet, duke vazhduar kështu pafund injorimi, fyerja dhe degradimi total i minatorëve. Një situatë e tillë e krijuar tashmë e sa kohë është bërë zakon që cenon vetë ekzistencën tonë. Mungesa e mjeteve ekzistenciale për jetës (pagesa e pagës) dhe injorimi i menxhmentit për të bërë punën e tyre tashmë nuk don koment”, thuhet në reagim.

Tutje, në reagim është thënë se minatorët nuk kanë mundësinë që ta vazhdojnë punën, pasi që të njëjtit nuk kanë financa të mjaftueshme as për shujtën ditore.

“Ne ju flasim në gjuhë të butë dhe gjuhë shqipe, ekzekutoni pagat sot. Një gjë e tillë është edhe pjesë e marrëveshjes së arritur me Bordin Mbikëqyrës, Ministrinë e Ekonomisë dhe Grupin e deputetëve. Këtij shqetësimi për ekzistencën tonë duhet ti vije fundi njëherë e përgjithmonë. Kërkojmë të ekzekutohen pagat”.

Partitë opozitare, LDK dhe AAK, refuzuan ftesën e kryeministrit Albin Kurti për t’u takuar sot dhe për të diskutuar rreth përmbushjes së agjendës legjislative për sesionin pranveror.

Krerët e të dyja partive, Lumir Abdixhiku dhe Ramush Haradinaj, e panë si të vonuar këtë ftesë nga ana e kryeministrit Kurti.

I vetmi që iu përgjigj pozitiv kësaj ftese ishte kreu i PDK-së, Memli Krasniqi.

Ish-ministrja e Punëve të Jashtme, Meliza Haradinaj-Stublla, ka thënë se partitë që kanë refuzuar këtë takim nuk janë të gatshme të qeverisin me vendin.

Ajo në një postim në Facebook ka shkruar se sa do që të jetë e vonshme kjo ftesë, refuzimi i saj tregon gjithashtu se liderët nuk janë të sinqertë për interesin shtetëror të vendit.

“Liderët dhe partitë politike që refuzojnë ndërtimin (edhe pse të vonshëm) të unitetit nuk janë gati të qeverisin me vendin dhe nuk janë të sinqertë për interesin shtetëror të Kosovës”, shkroi Haradinaj-Stublla.

Pas refuzimit që mori nga dy partitë opozitare, kryeministri Albin Kurti u shpreh se është i interesuar të takohet me të gjithë.

Kurti ka thënë se ka qenë i hapur gjithmonë dhe do të vazhdojë të jetë njësoj edhe në vitin e fundit të qeverisjes.

Ministria e Financave ka publikuar grafikën e borxhit shtetëror, në të cilin thuhet se Qeveria ka arritur të zvogëloj nivelin e tij krahasuar me gjendjen gjatë viteve të kaluara.

“Pas miratimit të Programit të Borxhit Shtetëror për periudhën 2025-2027, kujtojmë lëvizjen e borxhit shtetëror si përqindje e Bruto Prodhimit Vendor (BPV) në vitet e fundit.
2019: 17.63%
2020: 22.4%
2021: 21.53%
2022: 20.04%
2023: 17.52%
Vlen të theksohet se mes sfidave të shkaktuara nga pandemia COVID-19 ku masat për luftimin e saj rezultuan me një rritje në borxhin shtetëror, Qeveria e Kosovës me sukses ka kthyer nivelin e borxhit shtetëror në nivelin para pandemisë duke arritur që madje ta zvogëlojë nivelin e borxhit shtetëror si përqindje të BPV-së edhe në raport me periudhën para pandemisë, siç mund të shihet në grafikun në vijim.”, shkruan në njoftimin zyrtar.

Njësiti Rajonal i Trafikut rrugor i policisë në Prishtinë, po vazhdon me implementimin e planeve operative për kontrollin e shtuar në trafik.

Në kuadër të këtyre angazhimeve, ka nisur implementimi i planit “Semafori”.

“Deri tani u janë konfiskuar 34 patentë shoferë, ngasësve që nuk kanë respektuar sinjalizimin e semaforëve. Angazhimet për sigurinë në trafik do të kenë shtrirje në të gjitha rrugët e rajonit të Prishtinës dhe do të vazhdojnë deri sa të vlerësohet që është arritur efekti i dëshiruar”, thuhet në njoftimin e policisë.

Policia e Shtetit ka njoftuar se kanë ndarë një shumë prej 30 mijë eurove shpërblim për vendnodhjen e autorit që vrau policin në Fier.

“Kushdo që ka informacion të telefonojë në numrin pa pagesë 112, duke iu garantuar anonimatin. Për çdo informacion të vlefshëm, Policia e Shtetit vë në dispozicion shpërblimin 30 000 euro”, thuhet në njoftim.

Dorasi sipas policisë është Azgan Mernica, 23 vjeç, banues në fshatin Sulaj.

Njoftimi i plotë:

Policia e Shtetit

Në lidhje me ngjarjen e ndodhur në fshatin Baltëz, ku u vra me armë zjarri, punonjësi i Policisë (jashtë shërbimit), shtetasi N. C., Policia e Shtetit kërkon ndihmën dhe bashkëpunimin e qytetarëve për lokalizimin e autorit të dyshuar të vrasjes, shtetasit Azgan Mernica, 23 vjeç, banues në fshatin Sulaj.

Kushdo që ka informacion të telefonojë në numrin pa pagesë 112, duke iu garantuar anonimatin. Për çdo informacion të vlefshëm, Policia e Shtetit vë në dispozicion shpërblimin 30 000 euro.

Ndërkohë, shërbimet e Policisë së Fierit, Forca Kombëtare e Sigurisë dhe Reparti Special “RENEA”, në drejtimin e Drejtorit të Përgjithshëm të Policisë së Shtetit, vijojnë veprimet operacionale në zonë, me qëllim kapjen dhe vënien në pranga të 23-vjeçarit.

Gjithashtu, në të gjitha akset rrugore lidhëse me qarkun Fier janë ngritur pika kontrolli.

Grupi hetimor, në drejtimin e Prokurorisë, po vijon veprimet në vendngjarje për të sqaruar dhe dokumentuar me prova ligjore rrethanat e rastit.

Aleanca për Ardhmërinë e Kosovës e ka refuzuar ftesën për takim me kryeministrin Albin Kurti. Si arsye për këtë ata thanë se tema e takimit ka qenë agjenda legjislative dhe se sipas tyre kjo i takon shefit të Grupit Parlamentar.

Në një përgjigje për KosovaPress, kjo parti opozitare thotë se janë të gatshëm për takime që lidhen me interesin nacional.

“Ashtu siç jemi deklaruar në përgjigjen drejtuar z. Kurti, konsiderojmë që i takon shefave te grupeve parlamentare në Kuvend të dakordohen sa i përket agjendës legjislative, siç përcaktohet në bazë të rregullores së Kuvendit. Në qoftë se ka ndonjë temë tjetër lidhet me interesin nacional, mund të diskutohet në një moment tjetër”, thuhet në përgjigjen nga Aleanca për Ardhmërinë e Kosovës.

Nga Lidhja Demokratike e Kosovës nuk kanë pranuar të përgjigjen sa i përket qëndrimit të kësaj partie.

Megjithatë, në letrën e kreut të LDK-së, Lumir Abdixhiku bëhet e ditur se ata e konsiderojnë si tentim të vonuar mundësinë për bashkëpunim me partitë opozitare.

“Në përgjigje të letrës tuaj, e konsideroj të vonuar tani që, pas tre vitesh e gjysmë në pushtet, të tentoni të gjeni një klimë bashkëpunimi kur keni shuar rrënjësisht frymën e bashkëpunimit e kur keni mbjellë polarizim ofendues të skajshëm ndaj të gjitha partive politike tjera në Kosovë dhe përfaqësuesve të tyre. LDK vazhdon përherë të jetë mbështetëse për interesat madhore të Republikës, ndonëse nuk i jeni përgjigjur asnjëherë kësaj gatishmërie me bashkëpunim reciprok”, thuhet në letrën e Abdixhikut.

Kryeministri Albin Kurti pritet të takohet me kryetarin e PDK-së, Memli Krasniqi, i cili i vetmi nga tre liderët opozitarë ka pranuar të marrë pjesë në takimin e ftuar nga shefi i ekzekutivit.

Gjykata Themelore në Prishtinë ka shpallur aktgjykim dënues ndaj të akuzuarve Burim Selmani, Kastriote Bajrami-Sejdiu, Adushe Ukshini, Valon Hoti, Granit Abdyli , Faruk Ymeri, Abdullah Tërstena, Blerton Ostergllava, Avdyl Sejdiu dhe Muzafer Maliqi, në rastin e njohur si “Subvencionet V”.

Në total, dhjetë të akuzuarit e lartcekur janë dënuar me 6 vite e 10 muaj burgim dhe 30 mijë e 100 euro gjobë.

Shpallja e këtij aktgjykimit për këtë rast u bë të hënën, nga gjykatësja, Violeta Namani, raporton “Betimi për Drejtësi“

Sipas aktgjykimit, i akuzuari Selmani, u dënua me 3 muaj burg dhe me 5 mijë euro gjobë

për veprën penale “Ushtrim ndikimi”. I njëjti për veprën penale “Mashtrim me subvencione” u dënua edhe me 3 muaj burg dhe 15 mijë euro gjobë. Ndaj tij gjykata shqiptoi dënim unik me 5 muaj burg dhe 20 mijë euro gjobë.

Ndërsa, e akuzuara Bajram-Sejdiu, u dënua me 5 muaj burg dhe 500 euro gjobë për veprën penale “Dhënie ryshfeti”.

Ndërkaq, sipas aktgjykimit i akuzuari Ukshini, u dënua me 2 vite burg dhe 5 mijë euro gjobë, për veprën penale “Marrje ryshfeti”. Ndaj tij gjykata shqiptoi edhe dënim plotësues, dy vite ndalim i ushtrimi i funksionit në administratë publike apo funksioneve në shërbime publike.

Kurse, i akuzuari Hoti, u dënua me 9 muaj burg dhe 500 euro gjobë për veprën penale “Marrje ryshfeti”. Të njëjtit gjithashtu iu shqiptua dënim plotësues, dy vite ndalim i ushtrimi i funksionit në administratë publike apo funksioneve në shërbime publike.

Tutje, sipas aktgjykimit, i akuzuari Abdyli, u dënua me 9 muaj burg dhe 100 euro gjobë për veprën penale “Ushtrim i ndikimit”.

Me 6 muaj burg dhe 1 mijë euro gjobë për veprën penale “Dhënie ryshfeti”, u dënua i akuzuari Ymeri.

Për veprën penale “Dhënie ryshfeti” u dënua me 6 muaj burg dhe 1 mijë euro edhe i akuzuari Ostërgllava.

Gjithashtu, edhe i akuzuari Sejdiu, u dënua me 6 muaj burg dhe 1 mijë euro gjobë për veprën penale “Dhënie ryshfeti”.

Ndërsa, i akuzuari Tërstena u dënua me 6 muaj burgim dhe 1 mijë euro gjobë për veprën penale “Dhënie ryshfeti”.

Edhe i akuzuari Maliqi u dënua me 6 muaj burg dhe 1 mijë euro gjobë për veprën penale “Dhënie Ryshfeti”.

Sipas aktgjykimit, të akuzuarit e lartcekur janë të obliguar që secili veç e veç t’i paguajnë shpenzimet e procedurës në emër të paushallit gjyqësorë shumën prej 100 euro, si dhe për Fondin për Kompensimin të Viktimave të Krimit shumën prej 100.

Ndryshe, në seancën fillestare të akuzuarit Selmani, Bajrami-Sejdiu, Ukshini, Hoti, Abdyli , Ymeri, Tërstena, Ostergllava, Sejdiu dhe Maliqi kishin pranuar fajësinë për veprat penale me të cilat ngarkoheshin.

Ndryshe, Prokuroria Speciale e Republikës së Kosovës (PSRK) më 21 mars 2024 ka ngritur aktakuzë në rastin “Subvencionet V” ndaj 18 të akuzuarve lidhur me keqpërdorimet me subvencione, duke i ngarkuar me veprat penale “Ushtrim ndikimi”, “Mashtrim me subvencione”, “Marrje ryshfeti”, “Dhënie ryshfeti” dhe “Keqpërdorim i pozitës apo autoritetit zyrtar”.

Sipas aktakuzës të akuzuar në këtë rast janë tetë zyrtarët: Kujtim Zariqi, Luan Statovci, Sadat Shkodra, Kastriote Bajrami-Sejdiu, Aferdita Gjokaj, Adushe Ukshini, Valon Hoti dhe Bejtullah Pira. Si dhe 10 qytetarët: Burim Selmani, Granit Avdyli, Valdete Ismaili, Feriz Jonuzi, Faruk Ymeri, Avdullah Terstena, Blerton Ostergllava, Avdyl Sejdiu, Muzafer Maliqi dhe Alban Novosella.