Në kuadër të Prishtina International Theater Festival – PITF 2024 do të mbahet orë letrare me shkrimtarin dhe studiuesin Agim Vinca, orë letrare që do të mbahet në 77 vjetorin e lindjes së shkrimtarit Agim Vinca,.
Ora letrare do të mbahet më 22 maj, në ora 14:00 në Teatrin Kamertal të Kolegjit AAB (Kati i 4-të).
Në konferencën për media me rastin e hapjes edicionit të 8-të së festivalit ndërkombëtar Prishtina International Theater Festival “Burbuqe Berisha”, regjisori boshnjak Dino Mustafić u bëri thirrje qeverisë së Bosnjë e Hercegovinës dhe asaj të Kosovës që sa më shpejtë ta rregullojnë problemin me viza mes dy vendeve.
“Unë e kam bërë edhe një shfaqje në lidhje me këtë temë edhe kam qenë në Prishtinë me atë shfaqje. Prej asaj, asgjë nuk ka ndryshuar dhe në mes të Bosnjës dhe Kosovës është komunikimi artistik më i komplikuari. Edhe pse kjo është çështje politike, por për ne nga rrethi artistik është edhe pyetje njerëzore. Për ne ka shumë rëndësi që me artistët nga Kosova të mbajmë një lidhje më të drejt për drejtë. Kështu që, me këtë rast, edhe një herë i falënderoj ekipin organizativ të festivalit që për një kohë të shkurtër nga ka siguruar vizat që të marrim pjesë në këtë festival”, tha Mustafić.
Regjisori boshnjak mbrëmë dha shfaqjen pjesëmarrëse në PITF2024, me titullin “Muhammad Ali, the one and only”, shfaqje kjo e cila edhe hapi edicionin e sivjetmë të këtij festivali.
Shfaqja e cila fliste për raportin mes babait dhe fëmijës ka impresionuar publikun që nga çastet e para. Aktorët janë duartrokitur nga publiku që ishte në numër të madh, duke përgëzuar dhe uruar ata për energjinë dhe atmosferën që sollën në skenë.
Kjo shfaqje delikate ishte një përzierje emocionesh për të gjithë të pranishmit, pasi ndërthurej me realitetin dhe aktualitetin për çdo familje. /atvlive.tv
Ministri i Mbrojtjes i Izraelit, Yoav Gallant, e ka akuzuar Gjykatën Ndërkombëtare Penale (GJNP) se po përpiqet t’ia mohojë Izraelit të drejtën për t’u vetëmbrojtur, pasi kryeprokurori i saj njoftoi se po kërkon fletarrestime për liderët e Izraelit dhe ata të Hamasit – grupit të shpallur terrorist nga Shtetet e Bashkuara dhe Bashkimi Evropian.
“Tentimi i prokurorit të Gjykatës Ndërkombëtare Penale, Karim Khan, për ta zhbërë krijimin [e Izraelit] nuk do të ketë sukses. Paralelja që prokurori bëri mes grupit terrorist Hamas dhe shtetit të Izraelit, është përbuzëse dhe e neveritshme”, tha Gallant në 20 maj.
Kryeprokurori i GJNP-së, Karim Khan, tha të hënën se beson se Netanyahu, ministri Gallant, dhe tre liderë të Hamasit – Yehia Sinwar, Mohammed Deif dhe Ismail Haniyeh – janë përgjegjës për krime lufte dhe për krime kundër njerëzimit në Rripin e Gazës dhe në Izrael.
Në lidhje me liderët izraelitë, Khan në mënyrë specifike i nënvizoi si arsye për fletarrestime “shkaktimin e urisë tek civilët si mjet lufte”, “shkaktimin e vuajtjeve të mëdha me qëllim”, “udhëheqjen e qëllimshme të sulmeve ndaj popullsisë civile” dhe “veprimet e tjera çnjerëzore”.
Khan i akuzoi tre liderët e Hamasit se janë përgjegjës për “shfarosje”, “rrëmbim”, “përdhunim dhe vepra të tjera të dhunës seksual “, “torturë” dhe “vepra çnjerëzore”.
Prokurori duhet të kërkojë lëshimin e fletarrestimeve nga një panel prej tre gjyqtarësh, të cilëve mund t’iu duhen deri në dy muaj kohë për t’i shqyrtuar provat dhe për të vendosur nëse mund të procedohet.
Zëdhënësi i GJNP-së, Fadi Al-Abdallah, i tha Radios Evropa e Lirë se gjykatësit do të “marrin vendimin e tyre brenda afateve”, por nuk specifikoi ndonjë datë.
Izraeli e nisi luftën në Gazë si përgjigje ndaj një sulmi të Hamasit në jug të Izraelit më 7 tetor, ku u vranë 1.200 njerëz, kryesisht civilë dhe u rrëmbyen rreth 250 të tjerë.
Lufta izraelite i ka vrarë më shumë se 35.000 palestinezë, gjysma e të cilëve fëmijë dhe gra, sipas zyrtarëve të Hamasit.
Por, lufta izraelite ka shkaktuar edhe krizë humanitare në Gazë, duke bërë që rreth 80 për qind e popullsisë të zhvendoset dhe qindra mijëra njerëz të vuajnë nga uria, sipas zyrtarëve të OKB-së.
Izraeli e ka mohuar se ka kryer ndonjë krim gjatë luftës tashmë shtatëmujore në Gazë.
Kërkesa e kryeprokurorit të GJNP-së ka shkaktuar reagime të shumta nga e gjithë bota, për dhe kundër veprimit të Khan.
Franca dhe Belgjika thanë se e mbështesin kërkesën e kryeprokurorit të GJNP për lëshimin e fletarrestimeve për liderët e Izraelit dhe Hamasit.
Ministria e Jashtme e Francës tha se e “mbështet Gjykatën Ndërkombëtare Penale, pavarësinë e saj, dhe luftën kundër mosndëshkueshmërisë në të gjitha situatat”.
“Krimet e kryera në Gazë duhet të ndiqen penalisht patjetër në nivelet më të larta, pavarësisht se kush është kryerësi”, tha ministrja e Jashtme e Belgjikës, Hadja Lahbib.
Ndërkohë, presidenti amerikan, Joe Biden, e denoncoi kërkesën e kryeprokurorit për të arrestuar Netanyahun dhe Gallantin, duke thënë se “çfarëdo që ka dashur të thotë prokurori, nuk ka asnjë paralelizëm mes Izraelit dhe Hamasit.”/REL
Zëvendësndihmësja e sekretarit amerikan të Shtetit në Byronë për Demokraci, të Drejta të Njeriut dhe Punë, Nicole Chulick, tha se është e rëndësishme që Kosova të bashkëpunojë me partnerët e saj për të forcuar kandidaturën për anëtarësim në të gjitha institucionet euroatlantike, ashtu si edhe në Këshillin e Evropës (KiE).
Chulicku i bëri komentet të martën, në një takim me një grup gazetarësh në Ambasadën e Shteteve të Bashkuara të Amerikës (SHBA) në Prishtinë.
Ajo përsëriti se vizioni i SHBA-së për Kosovën është që ajo të jetë pjesë e institucioneve euroatlantike.
“Ne i bëjmë thirrje Kosovës që t’i dëgjojë këshillat e partnerëve të saj më të afërt, në mënyrë që të garantojë një rezultat pozitiv kur del në një votim”, tha Chulicku.
Gjatë vizitës në Kosovë, Chulicku u takua me presidenten e vendit, Vjosa Osmani, dhe me kryeministrin Albin Kurti.
Ajo tha se u ka shprehur atyre disa shqetësime të partnerëve evropianë në lidhje me Asociacionin e komunave me shumicë serbe dhe me rregulloren e Bankës Qendrore të Kosovës, që e ndalon përdorimin e dinarit serb.
“Kosova duhet të vazhdojë të punojë në këto çështje, t’i adresojë ato dhe të ecë sërish përpara”, tha zyrtarja amerikane.
“Duke i ditur edhe përgjegjësitë që i ka Banka Qendrore e Kosovës, ne vazhdimisht i kemi shprehur shqetësimet tona për mënyrën e zbatimit [të rregullores]. Nuk kemi ndjerë se ajo e ka marrë në konsideratë mënyrën se si do t’i ndikojë komunitetet, sidomos komunitetin serb. Ndaj, jemi duke e vëzhguar situatën dhe jemi të shqetësuar”, shtoi Chulick.
Kosova është nën presion nga partnerët ndëkombëtarë për të themeluar Asociacionin e komunave me shumicë serbe, si dhe për të pezulluar rregulloren e BQK-së që e bën euron valutë të vetme për pagesa me para të gatshme.
Ndërkombëtarët kërkojnë më shumë kohë derisa komuniteti serb të përshtatet me praktikën e re, pasi ai, prej vitesh, ka pranuar pagesa të ndryshme në dinarë nga Serbia.
“Qeveria e Kosovës duhet të angazhohet më shumë me komunitetet”
Ambasadori i ShBA-së në Kosovë, Jeffrey Hovenier, i pranishëm gjithashtu në takimin me gazetarët, shprehu zhgënjimin e tij me aksionin e djeshëm të Policisë së Kosovës në veri të Kosovës, gjatë të cilit u mbyllën disa institucione financiare serbe.
Hovenier tha se ky veprim nuk ishte i koordinuar me partnerët ndërkombëtarë dhe, sipas tij, i përshkallëzon tensionet.
Ai kërkoi nga Qeveria e Kosovës angazhim konstruktiv në dialogun e lehtësuar nga Bashkimi Evropian, duke e cilësuar “si kanalin e duhur për zgjidhjen e çështjeve që kanë të bëjnë me normalizimin e marrëdhënieve mes Kosovës dhe Serbisë”.
Chulick, në anën tjetër, shtoi se një prej arsyeve përse gjendet në Kosovë, është për të treguar mbështetjen e ShBA-së për një Kosovë demokratike, të begatë dhe multietnike.
Ajo theksoi se është e rëndësishme që Qeveria të angazhohet në mënyrë më aktive me pjesëtarët e komuniteteve pakicë dhe t’i përfshijë ata në procesin e politikëbërjes.
“Kosova është shtëpi e shumë serbëve etnikë dhe ata meritojnë t’i mbajnë familjet dhe bizneset e tyre këtu”, tha Chulick.
Sipas saj, Qeveria e Kosovës duhet të punojë për të gjithë qytetarët e Kosovës, “pa marrë parasysh përkatësinë etnike apo dallimet e tyre”.
Chulick tha, po ashtu, se ShBA-së i vjen keq që Lista Serbe – partia më e madhe e serbëve në Kosovë – nuk mori pjesë në votimin për shkarkimin e kryetarëve shqiptarë në komunat me shumicë serbe në veri, më 21 prill.
“Ne do të donim që ata të përfitonin nga mjetet demokratike që i kanë në dispozicion”, tha ajo.
Chulick theksoi se ShBA-ja mbetet e shqetësuar nga trajtimi i pakicave në Kosovë dhe tha se do të vazhdojë të punojë në këtë çështje.
Sipas saj, një nga përfitimet e të qenët pjesë e Këshillit të Evropës do të ishte “respekti më i madh për qytetarët e pakicave dhe gjithashtu qasja në procese ndërkombëtare, përmes të cilave Kosova mund të adresojë çështje të tilla si: përfshirja e pakicave dhe pjesëmarrja e plotë në qeverinë dhe demokracinë e vendit të tyre – për shembull përmes Gjykatës Evropiane të të Drejtave të Njeriut”.
Javën e kaluar, Kosova mbeti jashtë agjendës së Këshillit të Ministrave të Këshillit të Evropës – ku do të duhej të merrej vendimi përfundimtar për pranimin e saj – për faktin se nuk ndërmori hapa për ta çuar përpara çështjen e Asociacionit.
E pyetur nëse druan se udhëheqësit nacionalistë në Ballkan do ta shfrytëzojnë vakumin politik ndërkombëtar, që rezulton nga zgjedhjet në BE-së dhe në SHBA, për ta komplikuar më tej situatën në terren, zyrtarja e Departamentit amerikan të Shtetit tha se “oportunistët politikë mund të përpiqen t’i shfrytëzojnë rrethanat ndërkombëtare në dobi të tyre në çdo kohë, por ne jemi vigjilentë ndaj atyre përpjekjeve, jo vetëm këtu në Kosovë, por në mbarë botën”.
“Është e rëndësishme për ne që të theksojmë se – janë interesa të sigurisë së SHBA-së dhe Evropës – ne mund të varemi nga partnerët tanë dhe ata mund të varen nga ne, pa marrë parasysh partinë politike apo lëvizjen. Ne do të vazhdojmë të kontribuojmë për një Ballkan Perëndimor më të qëndrueshëm, më të sigurt dhe më të begatë dhe ne do të vazhdojmë të punojmë në mbështetje të këtij qëllimi”, përfundoi Chulick./Radio Evropa e Lirë
Mjetet e të gjithë klientëve të Bankës Kursimore të Postës janë të sigurta dhe nuk do të dëmtohen pas aksionit policor të autoriteteve kosovare në veri të Kosovës, tha të martën banka serbe.
Në një njoftim për media, banka tha se, përkundër “ndalimit të përkohshëm” të funksionimit të degëve në veri të Kosovës, klientët mund të kryejnë të gjitha shërbimet bankare në degët më të afërta, të cilat ndodhen në vendkalimet kufitare me Kosovën: Jarinjë, Bërnjak, Merdare dhe Konçul.
Po ashtu, të gjithë punëtorët e Bankës Kursimore të Postës në veri të Kosovës mbeten të punësuar, sipas njoftimit.
Serbia ngriti degë të improvizuara të kësaj banke, të destinuara për serbët nga Kosova, në afërsi të katër pikave kufitare muajin e kaluar.
Autoritetet në Kosovë kryen të hënën një operacion policor ndaj institucioneve financiare serbe në veri të Kosovës, që rezultoi me mbylljen e gjashtë objekteve të Bankës Kursimore të Postës dhe Bankës Popullore të Serbisë në katër komunat me shumicë serbe.
Gjatë aksionit, që autoritetet e Kosovës thanë se kishte të bënte me vendosjen “e rendit dhe ligjshmërisë”, u konfiskuan prova të ndryshme, përfshirë para.
Policia e Kosovës, që bashkëngjiti fotografi të parave të konfiskuara, tha se u gjeti “rreth 1.600.000 euro, rreth 74.700.000 dinarë serbë (mbi 600.000 euro), rreth 19.500 franga, rreth 13.800 dollarë amerikanë, rreth 40 dollarë australianë”.
Aksionin policor në veri, zyrtarë të lartë në Serbi e dënuan ashpër, duke e cilësuar “të paligjshëm”.
Departamenti amerikan i Shtetit (DASH) tha se është i zhgënjyer që Policia e Kosovës ndërmori aksion në zyrat financiare në veri të Kosovës.
Në një përgjigje për Radion Evropa e Lirë, DASH-i shtoi se aksioni nuk ishte i koordinuar me partnerët ndërkombëtarë dhe përshkallëzon tensionet.
Aksioni i autoriteteve të Kosovës u krye një javë pasi Banka Qendrore e Kosovës njoftoi se ka përfunduar afati tranzitor për rregulloren e saj, që ndalon përdorimin e dinarit serb për kryerjen e pagesave.
Rregullorja e BQK-së, që hyri në fuqi më 1 shkurt, parasheh euron si monedhën e vetme për kryerjen e pagesave.
Kosova dhe Serbia janë takuar shtatë herë muajt e fundit në Bruksel, në kuadër të dialogut të ndërmjetësuar nga BE-ja, për ta gjetur një zgjidhje për dërgimin e ndihmës financiare nga Serbia për serbët e Kosovës, por nuk kanë gjetur pajtim deri tani.
Zëdhënësi i BE-së, Peter Stano, është pyetur për mbylljen nga policia e Kosovës të gjashtë njësive të “Bankës Postare Kursimore” të Serbisë në veri të vendit në konferencën e sotme.
Ai shkurt u përgjigj se kjo ngjarje ishte “e padobishme”, ndërsa paralajmëroi se do të lëshojnë një komunikatë për media për ta shpalosur më tej qëndrimin e tyre mbi këtë çështje.
“Ishte një ngjarje e padobishme që ndodhi dhe reagimin tonë do ta bëjmë të ditur përmes një komunikate për media që do ta lëshojmë këtë pasdite”, tha Stano.
Ndërkaq, qëndrimin për aksionin e djeshëm veçse e ka bërë të ditur Departamenti amerikan i Shtetit, i cili shprehu zhgënjim dhe shtoi se “ky veprim nuk ishte i koordinuar me partnerët ndërkombëtarë”.
“Ai (veprimi) minon perceptimin se Kosova po vepron me vullnet të mirë për zgjidhjen e çështjeve mes saj dhe Serbisë përmes Dialogut të lehtësuar nga BE-ja”, tha një zëdhënësi i Departamentit të Shtetit.
“Ne i bëjmë thirrje qeverisë së Kosovës që t’i kthehet angazhimit konstruktiv në dialogun e ndërmjetësuar nga BE-ja si rruga e duhur për zgjidhjen e çështjeve që kanë të bëjnë me normalizimin e marrëdhënieve ndërmjet Kosovës dhe Serbisë dhe t’u përgjigjet adresojë nevojave bazë të të gjithë qytetarëve të saj — përfshirë ato të pakicës serbe – e ndikuar negativisht nga ndryshimet e fundit në rregulloren për monedhën”.
Aleanca për Mbrojtjen e teatrit, grupimi i Rithemelimit të Partisë Demokratike dhe Partia e Lirisë zhvilluan sot protestën e radhës përpara bashkisë së Tiranës.
Protesta, e teta gjatë këtyre muajve, ka nisur me hedhjen e molotovëve dhe tymueseve nga protestuesit. Godina e bashkisë ashtu si gjatë çdo proteste është rrethuar nga forca policie për të mos lejuar protestuesit të hyjnë në bashki.
Nga hedhja e molotovëve, zjarri përfshiu hyrjen e bashkisë. Policia ndërhyri dhe arriti të shuajë zjarrin tek hyrja kryesore e godinës.
Protestat u thirrën pas arrestimit me urdhër të SPAK të disa ish-drejtorëve të kësaj bashkie. Në protestë marrin pjesë qytetarë dhe përfaqësues të opozitës, të cilët kërkojnë dorëheqjen e kryebashkiakut Erjon Veliaj, pas arrestimeve të disa ish-zyrtarëve të këtij institucioni.
Anëtari i kryesisë së Rithemelimit të PD-së, Belind Këlliçi tha se shumë shpejt do depozitojë në SPAK edhe dy emra të tjerë, administratorë të dy ish-komunave, Arben Maloku i Zall Herit dhe Kujtim Qefalia i Dajtit.
“I kemi dërguar në SPAK, janë pjesë e dosjes së 5D. Edhe ky material po përgatitet për t’u depozituar së shpejti në SPAK”, tha Këlliçi.
“Shpeshherë dëgjojmë që njerëzit thonë se opozita ka probleme me drejtësinë, por ne jemi ata që kemi inkurajuar SPAK, duke çuar kallëzime për të zbuluar të vërtetat”, tha Këlliçi, ndërsa deklaroi se nuk do të tërhiqen deri në arritjen e objektivit që siç u shpreh ai është “largimi i Veliajt”.
Kryetari i FRPD, Besart Xhaferri në fjalën e tij në protestë tha se, ka dy palë shqiptarë, ata që shkojnë në protestë dhe ata që flenë gjumë dhe nuk bashkohen në protestë.
“Çfarë prisni, që t’ju ikin edhe juve fëmijët jashtë? Frymëzohuni nga heronjtë e revoltës së Spaçit”, u shpreh Xhaferri.
Policia e Shtetit ka marrë masa organizative dhe operacionale për garantimin e rendit publik dhe sigurisë gjatë zhvillimit të këtij tubimi.
Në zbatim të planit të masave, Policia e Shtetit prej orës 09:30 e në vijim, ka bllokuar në mënyrë të përkohshme qarkullimin e mjeteve, në Bulevardin kryesor pranë Bashkisë së Tiranës. /atsh/
Deputeti i LDK-së, Avdullah Hoti ka reaguar pas vendimit të Qeverisë për shuarjen e Ndërmarrjes së Re Energjetike të Kosovës (NKEC).
Ai përmes një postimi ka akuzuar Qeverinë duke thënë se janë përgjegjës për mijëra euro të humbura të shpenzuara kot.
Sipas tij, auditorët ka kohë që e kanë rekomanduar që të ndalohet veprimtaria e kësaj ndërmarrjeje.
“Shkaqet për ekzistencën e kësaj ndërmarrjeje publike kanë pushuar që nga koha kur është ndërprerë projekti i termocentralit “Kosova C”. Ju keni përgjegjësi për mijëra euro të shpenzuara kot. Auditori ju ka rekomanduar para shumë kohe ta shuani. Ju ra ndërmend pas ballafaqimit që kishim në Kuvend”, shkroi Hoti.
Ambasada e Britanisë së Madhe në Kosovës, ka thënë se aksioni i Policisë së Kosovës në katër komunat veriore, mund të ndikojë në përshkallëzim të situatës.
Në një reagim të kësaj ambasade i bëhet thirrje institucioneve të Kosovës të koordinohet për veprimet me partnerët ndërkombëtarë, duke theksuar angazhim në dialogun e lehtësaur nga Bashkimi Evropian për të zgjidhur çështje të tilla.
“Jemi të shqetësuar se veprimet e djeshme të policisë në veri të Kosovës rrezikojnë të përshkallëzojnë tensionet dhe të vështirësojnë zgjidhjen afatgjatë të çështjes së monedhës në Kosovë. Ne inkurajojmë autoritetet kosovare që të koordinojnë veprimet me partnerët ndërkombëtarë dhe të angazhohen në mënyrë konstruktive me Dialogun e lehtësuar nga BE-ja për të zgjidhur çështje të tilla”, thuhet në reagim.
Komisioni për Mbikëqyrjen e Financave Publike, shqyrtoi raportin vjetor të performancës së Zyrës Kombëtare të Auditimit për vitin 2023. E ftuar ishte auditorja e Përgjithshme, Vlora Spanca, raporton EO.
Gjatë mbledhjes së këtij Komisioni kishte replika mes deputetit të PDK-së, Hajdar Beqa dhe deputetit të LVVsë, Halil Thaqi.
“Ju kërkojmë mirëkuptim nuk e di pse dulem, këtë situatë na qiti mazhoranca, unë po kërkoj mos e mbroni të keqen sa i përket Obiliqit. Obiliqi sa ka qenë PDK-ja ka qenë stabile, ka mujt me i pas sfidat e veta aty t’ka mujt ni kandidat i pavarur je shku i ke mashtru qindra familjar”, ka thënë Beqa.
Deputeti, Halil Thaqi i ka thënë Beqës se ai po shpifë.
“Mos shpif edhe për ndërtim të shtëpisë së re. Të gjitha i dimë kush ke qenë ti kur ke qenë drejtor i Ibër Lipencencit”.
Deputeti Beqa ka thënë se prokuroria po gabon qe nuk të fut në burg.
“ Qato shpija që i tha kolegu Shala që janë ndërtu me i vlerësu i ke ndërtu ti. Ti e din kon e ki ndërtu. Qato pemë që i ke mbjell ti me vlerësu i ke bo ti. Prokuroria gabon qe nuk të shtin n’burg ty jo, me kon deputet”, ka thënë Beqa.
Thaqi tutje ka thënë se këto janë krejt shpifje.
“Këto janë krejt shpifje. Mos u ngut kadal mos u nxe. Edhe këto dy shpija e ftoj prokurourinë me marrë në intervistim Hajdarin kush i ka ndërtu ato”, ka thënë Thaqi.
Deputeti i PDK-së, Rashit Qalaj ka thënë se edhe ai shkon me të.
“Unë shkoj me të”, ka thënë ai.
Më tej deputeti Thaqi ka shtuar se iu ka tregu qytetarëve që është zonë e ndaluar.
“Edhe Rashiti po deklarohet, i kom kallxu qytetarëve është zonë e ndaluar nuk po ndërtohet”, ka thënë ai.
Deputeti Beqa sërish ka ndërhyrë duke thënë se Shipitula shkon si përfaqësues i KEK-ut.
“Shipitula shkon si përfaqësues i KEK-ut mos me thanë si sekser lej këto sene”.
Thaqi sërish ka përsëritur se të gjitha këto janë shpifje.
“Këto janë shpifje”, ka thënë ai.
Beqa: “Pom më dhem që po i manipulon qytetarët”, ka thënë ai.
U shqyrtua edhe Raporti Zyrës së Auditorit të Përgjitshëm pwr vitin 2023.
Në fund në mungesë të korumit për t’u votuar mbeti për tu shqyrtuar në mbledhjen e ardhshme.