Author: ATVLive

Në Dhomat e Specializuara në Hagë, edhe sot po vijon procesi gjyqësor ndaj ish-krerëve të Ushtrisë Çlirimtare të Kosovës.

Kjo është seanca e katërt dhe e fundit për këtë javë.

Seanca është njoftuar të nisë në ora 09:00.

Të enjten e javës së kaluar, Dhomat e Specializuara njoftuan se Hashim Thaçit dhe Kadri Veselit iu është vazhduar masa e paraburgimit.

Në një konferencë për media, zëdhënësja e Dhomave të Specializuara të Kosovës (DhSK), Angela Griep, tha se Trupi Gjykues konstatoi se për të dy të akuzuarit ekziston ende rreziku që të pengojnë ecurinë e procesit gjyqësor ose të kryejnë krime të tjera.

Kryeministri i Shqipërisë, Edi Rama ka thënë sot se rroga mesatare e mësuesve nga 1 korriku do të jetë 950 euro.

Rama në një postim në Facebook shkruan se ishte një rrugë e mundimshme reformash e rimëkëmbjeje tërësore të vendit e që siç thotë ai “e morëm në dorë copë e çikë”, por që thekson se e ngritën pagën mesatare të mësuesve në 950 euro në muaj.

Kryeministri i Shqipërisë postimit të tij në Facebook ia ka bashkëngjitur edhe një video.

“Mirëmëngjesi dhe me kënaqësinë që falë një rruge të mundimshme reformash e rimëkëmbjeje tërësore të këtij vendi që e morëm në dorë copë e çikë, e çuam pagën mesatare të mësuesve në 950 EURO në muaj, si edhe me bindjen se më e mira është ende përpara, ju uroj një ditë të mbarë”, shkruan Rama.

Aktivistja për të Drejtat e Njeriut në Serbi, Sonja Biserko ka thënë që nuk ka shumë pritshmëri nga takimi mes kryeministrit Albin Kurti dhe presidentit Aleksandër Vuçiq në Bruksel.

“Në fakt nuk pres shumë nga ky takim sepse 9 muajt e fundit e kanë dëshmuar se Serbia nuk është shumë e interesuar në zbatimin e marrëveshjeve, ata kanë arsyet e tyre sepse besojnë që konfliktet ndërkombëtare janë të luhatshme dhe mund të ndryshojnë dhe në këto ndryshime mund të sjellin në dobi të aspiratave të tyre jo vetëm në këtë por në tërë rajonin,” ka thënë Biserko, në intervistë për Dukagjini.

Biserko thotë se ky takim është thirrur nga Josep Borrell pasi sipas saj ai dëshiron të kap momentumin, teksa shton se Bashkimi Evropian deri më tash ka qenë më përkrahës për Serbinë se sa për Kosovën.

“Mund të jem e gabuar, por nuk pres shumë nga ky takim shpresoj të jetë një vazhdimësi jo vetëm gjërat praktike por të cilat do të sillnin kosovën në një nivel të barabartë me Serbinë, sepse deri më tani BE-ja ka qenë më përkrahëse për Serbinë duke sanksionuar Kosovën se nuk e ka bërë këtë ose atë.”

Ajo shpreson që do të jetë një qasje më e barabartë mes dy vendeve pasi shton se Serbia vetëm po “blen kohë” e nuk ka koncentrim në dialogun Kosovë-Serbi.

“Shpresoj të jëtë një qasje më e barabartë, sepse në të vërtëtë Serbia nuk është vërtetë e koncentruar në dialog dhe vetëm është duke blerë kohë, sepse në të vërtetë nuk merakosen shumë nëse Kosova arrin suksese në sovranitetin e saj në tërë territorin dhe kjo duhet të ndryshojë sepse edhe komuniteti serb në kosovë ndihen si të braktisur dhe janë të frustruar duke pritur,” shtoi Biserko.

Në një konferencë për media Josep Borrell të hënën ishte më konkret, pasi ai kërkoi nga Serbia të jetë më konstruktive dhe kërkoi largimin e masave ndaj Kosovës që kanë qenë të vendosura nga Bashkimi Evropian (BE).

Biserko poashtu thotë se qytetarët serb në Kosovë janë braktisur nga Serbia e këtë e quajti si fakt frustrues për serbët.

Ndërsa, shtoi se fakti që Serbia pengoi votimin e Kosovës për të qenë pjesë e Këshillit të Evropës është habi pasi edhe serbët në Kosovë do të kishin mundësi që të adresonin problemet e tyre.

“Mund të them se Serbia i ka braktisur qytetarët e saj në Kosovë duke i larguar ata nga Institucionet e Kosovës duke mos i lejuar ata të marrin pjesë në referendumin për kryetarët ata janë jashtë sistemit, ky është një fakt shumë frustrues për serbët sepse të gjithë ne po presim dicka tjetër dhe nuk mendoj se në këtë moment Serbia është e gatshme të ndryshojë dicka dhe ne vazhdimisht e kritikojmë Kosovën për këtë, nuk po them se nuk ka problem edhe nga pala kosovare, mendoj ata duhet të jenë më të kuptueshëm për palën kosovare dhe jam e befasuar se si ata tentuan dhe penguan votimin e Kosovës për të qenë pjesë e KiE sepse kjo do të ishte një mundësi që edhe serbët në Kosovë të adresojnë problemet e tyre,” deklaroi Biserko.

Për shkak të sulmeve të supozuara ndaj presidentit serb Aleksandar Vuçiq, delegacioni i Kuvendit të Serbisë u largua nga një konferencë në Petrovac.

Gjithçka ndodhi dje gjatë takimit “Avantazhet e Procesit të Berlinit: fokus i veçantë në tregun e përbashkët rajonal”.

Ata deklarojnë se Vuçiq është sulmuar nga deputetë të Bosnjë-Hercegovinës, Shqipërisë dhe Kosovës.

Delegacioni i Kuvendit të Serbisë udhëhiqej nga nënkryetarja Snezhana Paunoviq.

“Është e papranueshme që presidenti i Serbisë, i cili është zgjedhur legjitimisht dhe ligjërisht me vullnetin e qytetarëve, të akuzohet dhe të ofendohet nga përfaqësuesit e atyre që udhëheqja e të cilëve është emëruar nga qendrat e pushtetit, me dekret”, tha Paunoviq.

Në Gjermani futet më 27 qershor në fuqi ligji i ri për shtetësinë. Të huajt tani mund të bëhen gjermanë më shpejt. Po cilat janë kushtet?

Pasaporta e kuqe me stemën gjermane është e njohur dhe shumë e dëshiruar. Nuk është çudi, kur dihet se qytetarët gjermanë gëzojnë liri pothuajse të pakufizuar udhëtimi, mund të jetojnë dhe punojnë në të gjithë BE-në, kanë të drejtë të votojnë në zgjedhje dhe mund të zgjedhin lirisht profesionin e tyre.

Rruga për marrjen e kësaj pasaporte tani është thjeshtuar. Ligji i ri i Shtetësisë do të zbatohet në Gjermani nga 27 qershori 2024. Shumë nga rreth 12 milionë të huajt në Gjermani tani mund të aplikojnë për shtetësi gjermane.

1. Rrugë e shpejtë drejt shtetësisë

Pas pesë vitesh qëndrimi të ligjshëm në Gjermani, të huajt mund të aplikojnë për shtetësi gjermane. Kur është fjala për të ashtuquajturat “efektet e veçanta në integrim”, marrja e shtetësisë është e mundur edhe pas tre vjetësh. Këtë mund ta bëjë kushdo që mund të dëshmojë një nivel të lartë të njohurive gjuhësore (niveli C2 apo C1, që nënkupton aftësinë e komunikimit të rrjedhshëm), vullnetarizmi ose performanca veçanërisht e mirë në shkollë ose në punë. Deri tani, të huajt kanë mundur të aplikojnë për shtetësi vetëm pas tetë vjet qëndrimi në vend.

Qeveria gjermane, e përbërë nga socialdemokratët, ekologjistët dhe liberalët, shpreson të rrisë numrin e njerëzve që marrin shtetësi dhe në këtë mënyrë të krijojë stimuj për integrim më të shpejtë. Deri më tani, shkalla e marrjes së shtetësisë gjermane ka qenë e ulët në krahasim me BE-në, por së fundmi është rritur. Opozita, e përbërë nga një pjesë e Alternativës për Gjermaninë (AfD) të ekstremit të djathtë dhe CDU/CSU-së konservatore, ka frikë se pasaporta gjermane tani mund të bëhet një “plehrë”.

2. Të ardhura të nevojshme

Parakushtet e mëparshme për marrjen e shtetësisë gjermane mbeten në fuqi. Prandaj, kushdo që dëshiron të marrë nënshtetësinë gjermane duhet të jetë ende në gjendje të mbajë veten, pra të ketë të ardhura të mjaftueshme financiare. Këtu rregullat madje do të shtrëngohen, kështu që ata me të ardhura të ulëta do ta kenë më të vështirë në të ardhmen të marrin shtetësinë gjermane.

3. Nuk ka pasaportë për racistët dhe antisemitët

Respektimi dhe sjellja sipas rendit themelor të lirë demokratik të parashikuar me Kushtetutë është tani i detyrueshëm për të gjithë aplikantët për shtetësi gjermane.

Kjo në mënyrë specifike do të thotë se pasaportën gjermane nuk mund të marrin personat me qëndrime antisemite, raciste ose të tjera antihumane. Shtetësinë gjermane nuk mund të marrin as ata që nuk i respektojnë të drejtat e barabarta mes burrave dhe grave ose jetojnë në bashkësi poligame.

4. Përgjegjësia e Gjermanisë që buron nga historia

Në të ardhmen do të ketë gjithashtu një përkushtim ndaj përgjegjësisë së veçantë historike të Gjermanisë. Gjatë epokës naziste, Gjermania filloi Luftën e Dytë Botërore duke sulmuar Poloninë dhe vrau rreth gjashtë milionë hebrenj evropianë si pjesë e gjenocidit të organizuar nga shteti.

Për këtë arsye, ata që marrin nënshtetësinë gjermane do duhet të deklarohen kur bëhet fjalë për mbrojtjen e jetës hebreje dhe ndalimin e zhvillimit të një lufte agresioni. Kushdo që nuk e ndan këtë pikëpamje, nuk mund të marrë dokumentat gjermane. Prandaj, katalogu i pyetjeve për provimin pranues do duhet të rregullohet.

5. Pasaporta gjermane që i nënshtrohet revokimit

Ata që kanë gënjyer gjatë procesit të marrjes së shtetësisë mund të humbasin shtetësinë gjermane brenda dhjetë vjetësh. Kështu ka qenë deri tani. Ndërsa tani, kushdo që nuk e ka kuptuar seriozisht angazhimin dhe përgjegjësinë historike të Gjermanisë do të humbasë pasaportën gjermane – për shembull nëse përhapë mesazhe të urrejtjes antisemite.

6. Shtetësia e dyfishtë për të gjithë

Ata që dëshirojnë të bëhen gjermanë prej tani nuk duhet të heqin dorë nga shtetësia e mëparshme. Kjo do të thotë se shtetësia e shumëfishtë është e mundur për të gjithë migrantët. Më parë, ishte menduar vetëm për shtetasit e vendeve të BE-së.

Në këtë mënyrë, qeveria gjermane dëshiron t’ua lehtësojë pozitën njerëzve që kanë ndjenja të ngushta me vendin e tyre të origjinës. Qeveria e arsyeton këtë vendim me qëndrimin se faktorë të tillë si njohja e gjuhës, arsimi dhe përkushtimi ndaj demokracisë janë më të rëndësishëm për integrimin sesa një pasaportë tjetër.

7. Përfitimet për punëtorët mysafir (gastarbeiter) dhe punëtorët me kontratë në RDGJ

Rregulla më pak të rrepta zbatohen për njerëzit nga gjenerata e të ashtuquajturve punëtorë mysafirë që erdhën në Gjermaninë Perëndimore midis 1955 dhe 1972, si dhe për “punëtorët me kontratë” të RDGJ-së në Gjermaninë Lindore. Kjo është për të nderuar kontributin e tyre të rëndësishëm në zhvillimin e Gjermanisë.

Për këta persona si dëshmi e njohjes së gjuhës, mjafton të komunikosh lehtësisht në gjermanisht në jetën e përditshme. Përveç kësaj, ata nuk duhet të bëjnë testin e shtetësisë (Leben in Deutschland).

8. Fëmijët mund të bëhen gjermanë më shpejt

Fëmijët e prindërve të huaj marrin nënshtetësinë gjermane nëse njëri prind ka banuar ligjërisht në Gjermani për më shumë se pesë vjet. Më parë, kjo ishte e mundur vetëm pas tetë vjetësh. Sipas studimeve, fëmijët me rrënjë të huaja janë më të suksesshëm në shkollë dhe në punë sa më herët të marrin nënshtetësinë gjermane.

Megjithatë, rregullorja e re nuk zbatohet në mënyrë retroaktive. Kjo do të thotë se do të përfitojnë vetëm fëmijët e lindur pas 27 qershorit 2024. (DW)

Forcat e Armatosura të Bolivisë u tërhoqën nga pallati presidencial në La Paz të mërkurën në mbrëmje dhe policia e arrestoi gjeneralin në krye të një grusht shteti të dështuar.

Të mërkurën gjatë ditës, njësi ushtarake, të udhëhequra nga gjenerali Juan Jose Zuniga, ishin mbledhur në sheshin qendror Plaza Murillo, ku ndodhen pallati presidencial dhe Kongresi.

Presidenti bolivian Luis Arce e dënoi tentim-puçin dhe i bëri thirrje popullit për mbështetje.

“Sot, vendi po përballet me një përpjekje për grusht shtet. Ne i bëjmë thirrje popullit bolivian të mblidhet sot. Ne kemi nevojë që populli bolivian të organizohet dhe të mobilizohet kundër grusht shtetit dhe në të mirë të demokracisë”, tha presidenti Luis Arce nga pallati presidencial.

Më vonë, ushtarët, së bashku me një varg automjetesh ushtarake, u tërhoqën nga sheshi, duke i dhënë fund rebelimit pas vetëm tri orëve.

Qindra mbështetës të Arces u mblodhën pastaj në sheshin pranë pallatit, duke valëvitur flamuj bolivianë, duke kënduar himnin kombëtar dhe duke brohoritur.

Pas tërheqjes së ushtrisë, policia e arrestoi gjeneralin Juan Jose Zuniga, pasi prokurori i përgjithshëm nisi një hetim.

Ministri qeveritar Eduardo del Castillo tha se përveç Zunigas, u arrestua edhe ish- zëvendësadmirali i marinës, Juan Arnez Salvador.

“Cili ishte synimi i këtij grupi? Synimi ishte rrëzimi i autoriteteve të zgjedhur në mënyrë demokratike”, tha Del Castillo për gazetarë pas arrestimeve.

Më vonë të mërkurën, ministri i Mbrojtjes Edmundo Novillo tha se “gjithçka është nën kontroll tani”.

I rrethuar nga shefat e rinj të ushtrisë, të emëruar nga Arce, Novillo theksoi se Bolivia e përjetoi një “grusht shtet të dështuar”.

Përpjekja për puç ndodhi në një kohë kur vendi po përballet me tensione dhe me grindje politike mes Arces dhe dikur aleatit të tij, ish-presidentit majtist, Evo Morales, për atë se kush duhet ta kontrollojë partinë në pushtet. Bolivia po përballet gjithashtu me një krizë të madhe ekonomike.

Mospajtimet e tyre kanë bërë që Qeveria të mos jetë në gjendje ta luftojë krizën ekonomike. Për shembull, aleatët e Morales në Kongres ia kanë pamundësuar vazhdimisht Arces të marrë borxh për ta luftuar krizën.

Arce dhe Morales kanë luftuar për të ardhmen Lëvizjes për Socializëm të Bolivisë, e njohur si MAS, para zgjedhjeve të vitit 2025.

Sot ushtrisë së Kosovës do t’i shtohen edhe një numër i ushtarëve.

Nga ora 09:45 do të nis ceremonia e betimit të kadetëve të gjeneratës së 2024-tës, të Forcës së Sigurisë së Kosovës.

Aty, do të marrin pjesë drejtuesit e Ministrisë së Mbrojtjes dhe të FSK-së.

Ky organizim mbahet në kazermën “Adem Jashari” në Prishtinë.