Author: ATVLive

Prokuroria Themelore në Prizren ka ngritur aktakuzë kundër të pandehurve H.Z., dhe R.Z., për shkak se në bashkëkryerje kanë kryer veprën penale “Vrasja” e mbetur në tentativë.

Sipas aktakuzës, më datë 10.05.2024 rreth orës 18:51min në rrugën “Tranisiti i Ri” në lagjen Arbana të Prizrenit, saktësisht në një auto servis, me dashje fillojnë kryerjen e veprës penale të vrasjes ndaj të dëmtuarit J.B., të cilën nuk e përfundojnë, në atë mënyrë që pas një mosmarrëveshje paraprake lidhur me servisimin e një veture që kishte ndodhur një ditë më parë, në mes të pandehurit H.Z., dhe të dëmtuarit J.B.

“Derisa i dëmtuari J.B i njëjti ishte duke punuar në brendësinë e një automjeti në punëtorinë e tij, për një moment paraqiten të pandehurit H.Z., dhe R.Z., të cilët pa ndërruar asnjë fjalë derisa i dëmtuari ndodhej brenda veturës dhe në pozicion të pa mbrojtur, të pandehurit nxjerrin thikat dhe me të njëjtat e godasin disa herë të dëmtuarin, në pjesën e qafës dhe në regjionin e veshit të majtë derisa e vërejnë dëshmitarin Sh.B., i cili hyn në mes për të penguar sulmin e mëtejmë. I dëmtuari si rezultat i plagëve të marra me mjet të mprehtë, në pjesë vitale të trupit, përfundon në Spitalin Rajonal të Prizrenit “Prim.Dr.DautMustafa”, me lëndime të përshkruara sikurse në Akt ekspertimin mjeko-ligjor. Ndërkaq, të pandehurit me veturën e tyre të markës “Mercedes Benz 220C”, pas kryerjes së krimit largohen nga vendi i ngjarjes dhe deri më datë 11.05.2024 bëhen të pa arritshëm për organet e ndjekjes.”, thuhet në njoftim.

Prokurori i çështjes me rastin e ngritjes së aktakuzës, i ka propozuar Gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, të pandehurit e lartëcekur për veprën penale për të cilën akuzohen të shpallen fajtorë dhe të dënohen sipas ligjit.

Sot në kazermën “Adem Jashari” diplomuan 16 oficerë të rinj të gjeneratës së vitit 2024 të kadetëve të rinj të Forcës së Sigurisë së Kosovës.

I pranishëm në këtë ceremoni ishte Ministri i Mbrojtjes, Ejup Maqedonci, i cili duke uruar kadetët e rinj, tha se qershori i ngjarjeve të rëndësishme historike për liri e pavarësi po përmbyllet këtë vit me shtimin e dhjetë oficerëve të rinj të FSK-së.

Maqedonci tha se ky vit jubilar dallon nga vitet tjera për shkak të pozicionit ku gjendet ushtria e Kosovës, për çka përmendi investimet mbi 200 milionë dhe numrin e ushtarëve dhe oficerë të rekrutuar.

Ai shtoi se Ushtria e Kosovës po ecën me hapa të shpejtë drejt zhvillimit me kapacitete të plota si ushtri profesionale.

“Qershorin e ngjarjeve të rëndësishme historike, luftës për liri e pavarësi po e përmbyllim këtë vit duke i shtuar radhëve të FSK-së edhe dhjetë oficerë të rinj. Përvjetori i çlirimit këtë vit përtej simbolikës si vit jubilar dallon nga vitet e tjera për shkak të stadit në të cilin gjendet sot ushtria e Kosovës. Më rritjen në 2 për qind të GDP-së të Bruto Produktit vendor të ndarë për ushtrinë me mbi 200 milionë investime në këto 3 vitet e fundit dhe mbi 1800 ushtarë e oficerë të rinj të rekrutuar. Ushtria e Kosovës me hapa të shpejtë po ecën drejt zhvillimit me kapacitete të plota si ushtri profesionale dhe multi-etnike. Ëndrrën e të gjithë atyre që sakrifikuan për lirinë sot po e jetësoni ju kadetë. Me diplomimin tuaj si oficerë po ndërtoni shtylla të rëndësishme të ushtrisë, andaj nuk kam se si ta fshehë krenarinë që ndjej për ju”, tha Maqedonci.

Ndërkaq, duke vlerësuar profesionalizmin e pjesëtarëve të FSK-së, Maqedonci tha se bashkëpunimi i me shtetet aleate është si rezultat i këtyre vlerave.

Maqedonci gjithashtu falënderoi familjarët për mbështetjen ndaj kadetëve, duke thënë se ai nuk ka asgjë që e bën më krenar se sa të shoh rritjen dhe zhvillimin e Ushtrisë së Republikës së Kosovës.

“Ju pjesëtarët e FSK-së në vazhdimësi po tregoni profesionalizëm në çdo garë e trajnim ndërkombëtar. Bashkëpunimi i qëndrueshëm që kemi krijuar me shtetet partnere është si rezultat i vlerave që përfaqësojmë… Dimë çka besojmë dhe çka angazhohemi, luftojmë vetëm për paqen ashtu siç të parët tanë, Komandanti Legjendar Adem Jashari, dëshmorët dhe veprimtarët e kombit e bënë para nesh. Për fund, dua t’u uroj diplomimin dhe dijeni se keni përkrahjen e popullit dhe gjithmonë do të keni përkrahjen time. Në këtë rast falënderoj familjarët tuaj për mbështetjen që iu kanë dhënë. E di që nuk është e lehtë mbështetja e një kadeti në zhvillimin e tij profesional, është jetike dhe instrumanetale për suksesin në vazhdim. Nuk është e lehtë as pesha e uniformës që bartni, por pikërisht përball vështirësive vlerësohet madhështia e njeriut. Nuk ka asgjë që vlerësoj më shumë se sa betimi juaj për t’iu përkushtuar atdheut. Nuk ka asgjë që më bën më tepër krenar se të jem këtu sot e të shoh ushtrinë e Republikës së Kosovës teksa rritet e zhvillohet”, tha Maqedonci.

Kurse, Komandantja e Qendrës për Studime Universitare, që ka për qëllim të mëshirojë kadetët-oficerët me vlera ushtarake, Majore Mimoza Gudeci në ditën e saj e fundit si komandante e kësaj qendre, ndau tri mësime me kadetët e sapo diplomuar.

Ajo tha se detyra, nderi dhe atdheu janë fjalë që duhen të kujtohen gjithmonë në mënyrë që çdo veprim e vendim i tyre do të jetë i drejtë dhe i mirë.

“Porosia ime e parë për ju kadet është që asnjëherë mos harroni qëllimin tuja, qëllimi që përbëhet nga tri fjalë që keni dëgjuar më së shpeshti gjatë trajnimit 4 vjeçar në QSU, ka qenë dhe është i përbërë nga tri fjalët, detyra, nderi dhe atdheu. Sot para juve unë kërkojë nga të gjithë ju nga sot e deri në ditën e fundit kur do të pensionoheni të mbani mend këto tri fjalë, ky është qëllimi i shërbimit tuaj dhe nëse ju para çdo vendimi dhe veprimi, do t’i mbani mend këto tri fjalë, atëherë çdo veprim dhe vendim i juaji do të jetë i drejt, i mirë dhe profesional…QSU dhe unë jam krenare me atë që keni arrit të bëheni sot, një zonjushë dhe 15 zotërinj, të cilët do të udhëheqin Forcën e Sigurisë së Kosovës me shembullin më të mirë. Kjo është ajo që presim të gjithë“, tha ajo, duke shtuar se kadetët që të jenë vetvetja në vendime të vështira dhe të punojnë në mënyrë ekipore, duke respektuar varësit e tyre.

Në këtë ceremoni, shpërblimi “Kadet i dalluar në rrugëtimin 4-vjeçar” iu nda, Atdhe Ahmetit, i cili në emër të klasës 2024, tha se janë falënderues ndaj familjes dhe instruktorëve të cilët ngjallen një shpirt luftarak te kadetët që të ngritin vlera ushtarake.

“Në çdo hap të rrugëtimit tonë ne ishim krah i fort i njëri tjetrit, bashkë gjithçka ka qenë e arritshme, miqësia dhe besnikëria që ne kemi krijuar gjatë këtyre 4 viteve na bëjnë të pathyeshëm përball çdo vështirësie. Le të kujtojmë se forca më e madhe për ne është dashuria për atdheun. Ky vend pati burra e gra që kur pati më së shumti nevojë i dolën Zot, e atyre ne u jemi gjithmonë mirënjohës“, tha ai.

Në fund kadetët e rinj kanë pranuar diplomat e tyre.

Me kërkesë të Komisionit për Çështje të Sigurisë, Projektligji për Agjencinë e Intelegjencës dhe Sigurinë e Mbrojtjes është kthyer për raport plotësues në komision. Për këtë kanë votuar 69 deputetë për, katër kundër dhe asnjë abstenim. Kryetari i Komisionit për Çështje të Sigurisë, Bekë Berisha ka kërkuar që ky projektligj të kthehet në komision, meqë theksoi se si i tillë nuk duhet të miratohet.

Kryetari i Komisionit për Siguri, Bekë Berisha tha se deputeti i Lëvizjes Vetëvendosje, Enver Dugolli ka “kontrabanduar me propozim-amendamentet”. Ai ka propozuar që kjo nismë legjislative të kthehet në Komisionin për Siguri, teksa shtoi se do të jetë problem për shtetin.

“Projektligji për Agjencinë e Inteligjencës dhe Sigurisë së Mbrojtjes ka më shumë se një vit që është në procedurë në shqyrtim në Komisionin për Çështje të Sigurisë dhe Mbrojtjes. Por qëllimisht shqyrtimi i tij ka kaluar çdo limit kohor dhe kjo është bërë qëllimshëm nga kryesuesi i grupit punues, deputeti Enver Dugolli, të cilit ja kemi dhënë në mirëbesim me udhëheq këtë grup, po ashtu nga përfaqësuesit e Ambasadës Amerikane i është konfirmuar se përmbajtja e projektligjit të miratuar në qeverinë është në dakordim të plot me ta, si ligj fillimisht. Ndërsa, në anën tjetër zotëri Dugolli në mënyrë klandestine ka kontrabanduar dhe ka propozuar propozim-amendamente të cilat nuk janë rezultat i grupit punues por një rezultat i një rrethi të tij të brendshëm”, deklaroi ai.

Teksa përmendi amendamentet e ndryshuara, Berisha theksoi se humb kuptimi i agjencisë.

“Ky projektligj me këto amendamente nuk duhet të miratohet. Sepse do të cenojë sigurinë kombëtare, mes tjerash do të cenojë bashkëpunimin në këtë fushë dhe me partnerët tonë. Me theks të veçantë amendamenti numër 1, ndryshimi i titullit të projektligjit, ky agjencion e ka mandat jo vetëm veprimtarinë e intelegjencës por edhe të sigurisë në fushën e mbrojtjes. Nëse hiqet termi ‘dhe sigurisë’ do të cenohet dhe do të kufizohet mandati dhe veprimtaria e kësaj agjencie…Amendamenti numër 32 është propozuar që të ulet grada e drejtorit të agjencisë nga e gjeneralit në atë të kolonelit, kjo nuk duhet të ndodhë sepse në njërën anë po avancohet drejtoria aktuale për intelegjencë dhe siguri në Ministrinë e Mbrojtjes dhe po bëhet Agjenci për Intelegjencë dhe Siguri të Mbrojtjes, në anën tjetër po ulet apo degradohet grada e udhëheqësit të kësaj agjencie”, shtoi ai.

Shefja e Grupit Parlamentar të Lëvizjes Vetëvendosje, Mimoza Kusari-Lila theksoi se si LVV deklarohemi pro që ky projektligj të kthehet në komision.

“Nuk qëndrojnë të gjitha ato pretendime të cilat zotëri Berisha, kryetari i komisionit, i përmendi. Grupi Parlamentar i Lëvizjes Vetëvendosje ka dakordimin që ky projektligj të kthehet në komision në mënyrë që të ketë harmonizimin edhe dakordimin bashkë me partnerët të cilët janë pjesë e diskutimit për temën e sigurisë dhe intelegjencës. Dhe nuk ka pasur të bëjë me dispozitat të cilat ai i përmendi një nga një, që janë krejtësisht një tematikë tjetër. Prandaj ne si Grup Parlamentar deklarohemi që sot ky projektligj të kthehet në komision, jo të tërhiqet nga sponzorizuesi, në këtë rast t’i kthehet Qeverisë së Kosovës, por të jetë në komision dhe në kuadër të komisionit pastaj të trajtohet më tutje për ndjeshmërinë dhe rëndësinë që e ka”, deklaroi Kusari-Lila.

Edhe deputeti i Partisë Demokratike të Kosovës, Rashit Qalaj tha se ky projektligj duhet të kthehet në komision.

“Është mirë që ky projektligj të kthehet në komision edhe pse mendoj që është shumë më mirë që të tërhiqet nga sponsorizuesi dhe të startojmë prapë për shkak të shumë çështjeve të cilat janë devijuar rrugës nga projektligji fillestar. Dhe nuk ka nevojë që të jesh shumë njohës i sigurisë dhe të shohësh tendencat të cilat janë reflektuar me amendamentet që janë bërë nga grupi punues. Qëndrojnë ato të cilat i tha zotëri Bekë Berisha, për shkak se vërehet shumë lehtë që është një konflikt, mos të them një luftë në mes të dy institucioneve kryesore të vendit”, theksoi ai.

Kritika për përmbajtjen aktuale të projektligjit pati edhe deputeti i Lidhjes Demokratike të Kosovës, Anton Quni.

“Me Projektligjin për Agjencionin e Intelegjencës dhe Sigurisë së Mbrojtjes, ideja është që drejtoria të avancon në agjencion. Do të thotë del nga organogrami i përgjegjësive të sekretarit dhe kalon në përgjegjësinë e ministrit të Mbrojtjes, kryeministrit dhe presidentit. Me këtë avancim, me kalim nga drejtoria në agjencion do të thotë janë politikat e veçanta, kadrovike, autorizimeve… tani nga kolegu ynë Enver Dugolli janë propozuar disa amendamente që janë shumë paradoksale. Një ndër to është që me rritjen e përgjegjësisë së organizatës ulet grada, rangu i atij që do të udhëheq me agjencionin. Drejtorinë e udhëheq një gjeneral, kurse agjencionin në të ardhmen mund ta udhëheq një kolonel”, u shpreh ai. /kp

Kryeministri i Shqipërisë, Edi Rama ka postuar një fotografi ku ka shkruar se autostrada e kategorisë A të Bashkimit Evropian, Thumanë-Kashar, loti i parë i korridorit Blu, do të hapet të dielën 30 qershor në 19:00 për qarkullimin e automjeteve.

Thumanë-Kashar është i aks i kategorisë A, ku shpejtësia e lëvizjes do të jetë 130 kilometra në orë, duke ofruar gjithashtu kushte të larta sigurie.

Hapja e këtij aksi për qarkullimin e automjeteve do të lehtësojë ndjeshëm fluksin e trafikut.

Ndërkohë të gjithë drejtuesit e automjeteve do të kenë të drejtë të zgjedhin rrugët e shpejtësisë mbi 130 kilometra në orë me pagesë, apo rrugët dytësore të cilat do të jenë të disponueshme pa asnjë lloj pagese.

Drejtori i përgjithshëm i Policisë së Kosovës, Gazmend Hoxha, së bashku me me atasheun Kimberly Riffe, DOJ-ICITAP pranë Ambasadës Amerikane kanë vizituar dje veriun e vendit, gjegjësisht njësitet policore të Policisë Kufitare dhe ata të Rendit Publik në Jarinje, Leposaviq, Bërnjak dhe në Banjskë ku me 24 Shtator 2023 u vra Rreshteri Afrim Bunjaku.

Në njoftim thuhet se drejtori Hoxha bisedoi me zyrtarët policorë të cilët ishin në kryerje të detyrave, duke u interesuar për gjendjen e përgjithshme, sfidat, vështirësitë dhe realizimin e detyrave dhe aktiviteteve policore në atë pjesë të vendit.

“Ndër të tjera, në takimet me zyrtarët policorë, drejtori i përgëzoi ata për punën e angazhimin në kryerje të detyrave duke ofruar siguri për të gjithë pa dallime etnike dhe sundim të rendit e ligjit. Po ashtu, delegacioni nga Prishtina, u prit edhe nga zëvendësdrejtori i Drejtorisë Rajonale Policore Mitrovicë Veri Veton Elshani, i cili njoftoj eprorët e PK-së rreth gjendjes së përgjithshme të sigurisë në veri të vendit”, thuhet në njoftim.

Po ashtu drejtori i PK-së, Hoxha me bashkëpunëtor vizitoi dhe vuri kurorë me lule, në vendin e rënies së heroit të Kosovës Enver Zymberit.

Deputetët e Listës Serbe kanë ardhur në seancën e sotme plenare të Kuvendit të Kosovës. Para fillimit të seancës plenare, e cila po mbahet në sallën alternative, të njëjtit shihen duke u nënshkruar në listën e pjesëmarrjes. Hera e fundit që ata u paraqiten në sallë plenare ishte më 8 shkurt. Të njëjtit kanë marrë mandatet e tyre në nëntor të vitit 2022, kur paraardhësit e tyre dhanë dorëheqje, raporton KP.

Nëntë deputetët e Listës Serbe dhe një deputet i pavarur serbë vijnë në seanca plenare vetëm një herë në gjashtë muaj dhe pas nënshkrimit nuk qëndrojnë në sallë plenare.

KosovaPress ka raportuar se vlera e pagave të dhjetë deputetëve serb është mbi 300 mijë euro.

Këta deputetë nuk kanë pasur asnjë deklaratë në foltoren e Kuvendit të Kosovës, nuk kanë përfaqësues në asnjë nga komisionet, nuk kanë grup parlamentar. Kryesia është në mungesë të një nënkryetari nga radhët e këtij komuniteti.

Kryetari i Bordit të Asociacionit të Gazetarëve të Kosovës, Xhemajl Rexha, dhe juristja e medias, Flutura Kusari, kanë shprehur shqetësimet dhe vërejtjet e shoqërisë civile rreth Projektligjit të Komisionit të Pavarur për Media (KPM), raporton EO.

Përmes një konference të përbashkët për media, i kanë bërë thirrje Qeverisë të tërhiqet nga ky projektligji.

Kryetari i Bordit të AGK-së, Xhemajl Rexha, ka bërë që ky Projektligj të tërhiqet dhe të mos miratohet në lexim të dytë, ndërsa kritika ka për ekzekutivin e mazhorancën. Këto të dyja sipas tij nuk i kanë marrë parasysh vërejtjet e shoqërisë civile dhe bashkësisë ndërkombëtare.

“Qëllimi i kësaj konference është të shprehim pakënaqësitë tona për ligjin e KPM-së sepse siç e dini sot në rend dite është miratimi në lexim të dytë i projektligjit për KPM të cilën tashmë në mënyrë publike si pjesë e shoqërisë civile e kemi shprehur pakënaqësitë tona dhe vërejtjet më të cilat ky ligj është miratuar. Si AGK kemi thënë disa here se shoqëria civile nuk ka qenë e përfshirë më fazat kryesore të hartimit të këtij ligjit. Qeveria Kosovës, partia në pushtet nuk ka qenë e interesuar të flas me të gjithë akterët që janë pjese e rëndësishme të industrisë së mediave të flas me të për ligjin sa me te mirë edhe pse ka pas kohën e duhur ne dispozicion”, u shpreh Rexha.

Juristja e medias, Flutura Kusari, ka thënë se “pasoja kryesore nga ky projektligj është zvogëlimi i pluralizmit medial”.

“E ftojmë Lëvizjes Vetëvendosje mos ta votojë këtë ligj, dhe draftimi i tij të bëhet përmes një grupi punues siç ka kërkuar edhe Këshilli i Evropës. Qëllimi fillestar i Qeverisë ishte t’i kontrollonte mediat online përmes KPM-së dhe kur e pa që ligjërisht nuk është e mundur e ka propozuar njëfarë regjistrimi por është aq keq i rregulluar sado të shkaktojë kaos ligjor dhe nuk do të funksionojë”, u shpreh Kusari, teksa mediat online i cilësoi si storie suksesi.

“Nëse aprovohet ky projektligj, këshilli i mediave do të dobësohet në një moment kur ka reformë të mirë të brendshme”, u shpreh ajo.

Kuvendi i Shqipërisë mblidhet sot në seancë plenare ku në rendin e ditës është interpelanca me ministren e Shëndetësisë dhe Mbrojtjes Sociale, Albana Koçiu, kërkuar nga deputeti Tritan Shehu.

Seanca vijon me pyetje nga deputetët, ndërsa më pas parashikohet diskutimi i raportit vjetor të Autoritetit të Komunikimeve Elektronike dhe Postare (AKEP), për vitin 2023.

Në rendin e ditës parashikohet edhe diskutimi i raportit vjetor të Agjencisë së Sigurimit të Depozitave (ASD), për vitin 2023.

Seanca do të diskutojë edhe raportin vjetor të ERE për gjendjen e sektorit të energjisë.

Seanca vijon me diskutimin e projektligjit “Për disa shtesa dhe ndryshime në ligjin nr.65/2014, “Për Agjencinë e Inteligjencës dhe Sigurisë së Mbrojtjes”, “Për ratifikimin e marrëveshjes ndërqeveritare, ndërmjet Këshillit të Ministrave të Republikës së Shqipërisë dhe qeverisë së Republikës së Francës, për kontributin në zbatimin e projekteve prioritare në Shqipëri”, “Për disa ndryshime dhe shtesa në ligjin nr. 45, datë 28.4.2016 “Për vullnetarizmin”.