Author: ATVLive

Në mars të këtij viti, numri i vizitorëve vendorë dhe të huaj në hotele ishte 40 mijë e 239, prej tyre 37. 4 për qind ishin vendorë dhe 62.5 për qind ishin vizitorë të jashtëm, raporton KosovaPress.

Sipas Agjencisë së Statistikave të Kosovës, krahasuar me muajin mars të vitit 2024 sa ishin 39 mijë e 374 vizitorë, në marsin e këtij viti kishte rritje të numrit të përgjithshëm të vizitorëve në hotele për 2.2 për qind.

“Numri i net-qëndrimeve ishte 84 mijë e 462, prej tyre 39,7 për qind nga vendorët dhe 60,2% nga të huajt”, njofton ASK.

Numri i vizitorëve të brendshëm dhe net qëndrimet e tyre në hotele sipas rajoneve

Sipas ASK-së, numrin më të madh të vizitorëve të brendshëm në hotele e ka rajoni i Prishtinës me 4 mijë 931 vizitorë. Ndërkaq, me net-qëndrime, numrin më të madh e ka rajoni i Pejës më 14 mijë e 562 net-qëndrime.

Numri i vizitorëve të jashtëm dhe net qëndrimet e tyre në hotele sipas shteteve prej nga vijnë

Numri më i madh i vizitorëve ishte nga: Shqipëria, Turqia, Gjermania, Zvicra etj.

“Sa u përket vizitorëve të huaj, krahasuar me periudhën paraprake (Mars 2024) ka rritje të numrit të vizitorëve për 4.7 për qind. Në total, 25 mijë e 173 vizitorë të huaj, nga të cilët numri më i madh është nga: Shqipëria, Turqia, Gjermania, Zvicra etj”, thuhet në raportin e ASK-së.

Tre muaj nga mbajtja e zgjedhjeve, Kosova vazhdon të ketë ngërç institucional kjo për faktin se për të dymbëdhjetën herë me radhë deputetët e Kuvendit të Kosovës dështuan të konstituojnë legjislaturën e nëntë.

Situata e krijuar ka nxitur reagime të shumta.

Ambasadori i Britanisë së Madhe në Kosovë, Jonathan Hargreaves, ka bërë thirrje për një angazhim të menjëhershëm nga liderët politikë të Kosovës për të formuar një Kuvend dhe një qeveri funksionale.

Ambasadori ka theksuar se pas më shumë se tre muajsh nga zgjedhjet e fundit është koha për të përmbushur pritshmëritë e qytetarëve dhe për të siguruar stabilitetin institucional të vendit.

“Më shumë se tre muaj pasi populli i Kosovës votoi në zgjedhje, Kosova ka nevojë urgjente për një Kuvend dhe një qeveri funksionale. Populli ka të drejtë të presë që liderët e tyre politikë të punojnë së bashku për interesin kombëtar”, ka deklaruar ambasadori Hargreaves për Telegrafin.

Bill Gates premtoi të enjten se do ta dhurojë pothuajse të gjithë pasurinë e tij personale gjatë dy dekadave të ardhshme.

Siç tha, rreth 200 miliardë dollarë do të shkojnë për më të varfrit e botës përmes fondacionit të tij, në një kohë kur qeveritë në mbarë botën po shkurtojnë ndihmën ndërkombëtare.

Filantropi 69-vjeçar dhe bashkëthemeluesi i Microsoft-it tha se po përshpejton planet për të ndarë pasurinë dhe për ta mbyllur Fondacionin Gates më 31 dhjetor 2045.

“Njerëzit do të thonë shumë gjëra për mua kur të vdes, por jam i vendosur që ‘vdiq i pasur’ të mos jetë njëra prej tyre”, shkroi Gates në një postim në faqen e tij të internetit.

“Ka shumë probleme urgjente që duhen zgjidhur për të mbajtur burime që mund të ndihmojnë njerëzit”, theksoi ai.

Në një kritikë të tërthortë ndaj presidentit amerikan, Donald Trump, për shkurtimet në ndihmën e jashtme të Shteteve të Bashkuara – donatori më i madh në botë – Gates tha se dëshiron të ndihmojë në parandalimin e vdekjeve të foshnjave, fëmijëve dhe nënave nga shkaqe të shmangshme, të luftojë sëmundje si poliomieliti, malaria dhe fruthi, dhe të reduktojë varfërinë.

“Është e paqartë nëse vendet më të pasura të botës do të vazhdojnë të mbrojnë më të varfrit”, shtoi ai, duke përmendur shkurtimet e ndihmave edhe nga Mbretëria e Bashkuar dhe Franca.

Gates theksoi se, pavarësisht buxhetit të madh të fondacionit, përparimi nuk do të ishte i mundur pa mbështetjen e qeverive.

Ai vlerësoi reagimin e disa vendeve afrikane ndaj shkurtimit të ndihmave, të cilat kanë rialokuar buxhetet e tyre, por theksoi se, për shembull, poliomieliti nuk mund të çrrënjoset pa financimin nga SHBA.

Gates e bëri njoftimin me rastin e 25-vjetorit të themelimit të fondacionit, të cilin e krijoi në vitin 2000 me ish-bashkëshorten e tij, Melinda French Gates, dhe më vonë iu bashkua investitori Warren Buffett.

“Kam ardhur shumë larg që nga koha kur isha një djalë që nisja një kompani software-i me shokun tim nga shkolla e mesme”, tha ai.

Që nga krijimi, fondacioni ka dhuruar 100 miliardë dollarë, duke ndihmuar në shpëtimin e miliona jetëve dhe mbështetur iniciativa si grupi për vaksinim Gavi dhe Fondi Global për Luftimin e HIV/AIDS, Tuberkulozit dhe Malaries.

Sipas Gates, fondacioni do të mbyllet pasi të ketë shpenzuar rreth 99% të pasurisë së tij personale. Fillimisht, themeluesit kishin parashikuar që fondacioni të vazhdonte për disa dekada pas vdekjes së tyre.

Gates, pasuria e të cilit vlerësohet rreth 108 miliardë dollarë, pret që fondacioni të shpenzojë rreth 200 miliardë dollarë deri në vitin 2045, me shifrën përfundimtare që do të varet nga tregjet dhe inflacioni.

Fondacioni tashmë është një nga aktorët më të mëdhenj në fushën e shëndetësisë globale, me një buxhet vjetor që pritet të arrijë në 9 miliardë dollarë deri në vitin 2026.

Ai ka përballuar kritika për fuqinë dhe ndikimin e tepërt në këtë fushë, pa llogaridhënie të mjaftueshme – përfshirë edhe në Organizatën Botërore të Shëndetësisë.

Gates ka qenë gjithashtu objekt i teorive të konspiracionit, veçanërisht gjatë pandemisë së COVID-19.

Ai ka zhvilluar disa biseda me presidentin Trump muajt e fundit lidhur me rëndësinë e vazhdimit të investimeve në shëndetin global.

“Shpresoj që edhe njerëzit e tjerë të pasur të mendojnë se sa shumë mund të përshpejtojnë përparimin për më të varfrit e botës, nëse rrisin ritmin dhe shkallën e dhurimeve të tyre, sepse është një mënyrë jashtëzakonisht e fuqishme për t’i dhënë diçka pas shoqërisë”, shkroi Gates. /REL

Zëvendësministri në detyrë i Financave, Avni Zogiani, reagoi ndaj LDK-së e cila sot ka dorëzuar sot në prokurori 17 kallëzime penale ndaj Albin Kurtit dhe ministrave të tij,.

Ai tha se kjo parti po merret me veprime të vogla.

“U shkoi jeta pa asnjë kauzë, veç me veprime të vogëla që lidhen me interesa të mbyllura e të ngushta! Gjynah!”, shkroi në fb, Zogiani.

Qendra për Raste Gjyqësore Strategjike – platformë e Grupit për Studime Juridike dhe Politike ka pranuar aktgjykimin e Gjykatës Supreme me të cilin është aprovuar padia e datës 10 mars 2025, për shfuqizimin e pjesshëm të rregullores për organizimin dhe shfrytëzimin e parkingjeve të Komunës së Prishtinës.

Nga data 5 maj e tutje, ndërmarrja publike “Prishtina Parking”, nuk do të ketë kompetenca për bllokim të veturave.

Në një konferencë për media, hulumtuesi pranë organizatës GLPS, Liridon Salihi ka bërë të ditur se nëntë dispozita të aktit nënligjor të rregullores së Prishtina Parkingut janë në kundërshtim me të drejtat kushtetuese.

“Nga data 5 maj e tutje Prishtina Parking, nuk ka asnjë kompetencë që të vendosë bllokada për shkak të mos pagesës së tarifës së parkingut nga ana e qytetarëve. Gjykata supreme ka vlerësuar se lirimi i Ndërmarrjes “Prishtina Parking” nga përgjegjësia për kompensimin e dëmeve që eventualisht mund të shkaktohen nga personeli i saj në vend parkingjet publike, është i kundërligjshëm. Pretendimi jonë si palë paditëse është e kundërligjshme që një ndërmarrje publike vetëm të përfitoj nga ana e qytetarëve dhe të mos jap asnjë garanci për dëmet. Prishtina Parking nuk ka asnjë kompetencë ligjore që të bëjë as bllokimin, as debllokimin dhe as bartjen e veturave që nuk paguajnë tarifën e parkingut, kjo kompetencë është direkt e policisë dhe inspektoratit”, tha Salihi.

Ndërsa, hulumtuesja Ema Pula u shpreh se gjetjet e gjykatës sipas padisë së tyre, do të shërbejnë si precedent për të gjitha komunat e Kosovës.

“Ky vendim i Gjykatës Supreme është një fitore e madhe për misionin e Qendrës në mbrojtjen e interesit publik nga aktet nënligjore të kundërligjshme të autoriteteve publike, dhe gjetjet e gjykatës sipas padisë sonë do të shërbejnë si precedent për të gjitha komunat e Republikës së Kosovës me rastin e miratimit të Rregulloreve për menaxhimin dhe shfrytëzimin e parkingjeve publike”, u shpreh Pula.

Nga Gjykata Supreme si dispozita të kundërligjshme dhe që cenojnë standardet ndërkombëtare për të drejtat e njeriut, janë vlerësuar dispozitat e rregullores që përcaktojnë: kompetencën e Ndërmarrjes Publike Lokale “Prishtina Parking” të vendosë bllokada në vetura për shkak të mos pagesës së tarifës së parkingut; lirimin e Ndërmarrjes Publike Lokale “Prishtina Parking” nga përgjegjësia për kompensimin e dëmeve që eventualisht mund të shkaktohen nga personeli i saj në vend parkingjet publike; kompetencën e “Prishtina Parking” për bllokim, debllokim dhe bartje te veturave që nuk paguajnë tarifën e parkingut; kompetencën e “Prishtina Parking” për të menaxhuar me rastet e parkimit ilegal të veturave; kufizimin e kohës për shfrytëzimin e vend parkingjeve rezidenciale nga ana e vizitorëve dhe kufizimin e qasjes së qytetarëve në shërbime publike – vend-parkingje – duke lënë si mundësi të vetme pagesën përmes telefonit.

Kujtojmë, më 10 mars 2025, GLPS kishte dorëzuar padi për shfuqizimin e rregullores për organizimin dhe shfrytëzimin e parkingjeve të Komunës së Prishtinës, duke kërkuar nga Gjykata Supreme shfuqizimin e rregullores. /kp

Komisioni Qendror Zgjedhor nuk e regjistroi partinë e re, Lidhja Kosovare (Kosovski Savez) e drejtuar nga Goran Marinkoviq, raporton EO.

Pesë vota ishin për dhe katër abstenime. Kësisoj u refuzua rekomandimi i Zyrës për Regjistrimin e partive politike për regjistrimin e kësaj partie të re.

Më parë, në mbledhjne KQZ-së, anëtari i KQZ-së nga radhët e Vetëvendosjes, Alban Krasniqi, bëri vërejtje te pjesa e programit politik të Lidhjes Kosovare se Kosovës nuk i referohet me emrin kushtetues Republika e Kosovës

“Kosova nuk është term gjeografik, por është shtet”, tha Krasniqi.

KQZ-ja hoqi nga rendi i ditës pezullimin e partisë politike Kosova Adalet Türk Partisi, për shkak se nuk e kishte dorëzuar brenda afatit ligjor, deri më 28 prill 2025, raportin e deklarimit financiar të fushatës për zgjedhjet e 9 shkurtit 2025.

Siç u tha në mbledhje, pas këtij afati kjo parti ka dorëzuar raportin për deklarimin financiar të fushatës zgjedhore dhe rrjedhimisht kanë pushuar arsyet për pezullimin e saj. Ndaj këtij subjekti politik, për shkak të mosdorëzimit të raportit financiar të fushatës brenda afatit ligjor, më 2 maj 2025, Zyra ka shqiptuar gjobë prej 5 mijë eurove.

Filarmonia e Kosovës do të performojë në Bulgari Hall në Sofje më 17 maj.

Kjo është vizita e parë e orkestrës në Bullgari dhe koncerti shënon 25-vjetorin e themelimit të saj. Ngjarja simbolizon afrimin kulturor mes Kosovës dhe Bullgarisë, tha Filarmonia e Sofjes, raporton BTA, përcjell KosovaPress.

Dirigjent do të jetë Maestro Nayden Todorov, i cili ka lidhje të ngushta me historinë muzikore të Kosovës. Atij do t’i bashkohen sopranoja Besa Llugiqi dhe saksofonisti Vitaly Vatulya si solistë.

Në program do të shfaqen vepra nga Rexho Mulliqi – Baresha (Bariesha), Valton Beqiri – AlBalkanika, Giacomo Puccini – Un bel dì, vedremo (nga Madama Butterfly), Giuseppe Verdi – Overture to Nabucco-s dhe È strano… Semper libera (nga Lajmeti 2 dhe 2013) Manuel de Falla – Kapela me tre cepa, suita numër dy.