Policia e Kosovës është duke bastisur objektin ku janë zhvilluar aktivitete të të ashtuquajturës Drejtori e Urbanizmit të Komunës paralele në veri të Mitrovicës.
Lajmin e ka konfirmuar për KosovaPress, zëvendës drejtori i policisë për rajonin e veriut, Veton Elshani.
“Po, policia është duke bastisur këtë objekt. Është konfiskuar dokumentacioni dhe disa prej të punësuarve aty po intervistohen”, ka thënë mes tjerash Elshani./KP
Edmond Lajqi është dënuar me burgim të përjetshëm për vrasjen e bashkëshortes së tij, Gjyljeta Ukella.
Sipas aktgjykimit, i akuzuari Lajqi dënohet me burgim të përjetshëm për kryerjen e veprës penale “Vrasje e rëndë” , kurse për armëmbajtje pa leje gjyqtari Povataj tha se nuk ka dënim, ndërsa i është konfiskuar arma me të cilën e ka kryer krimin.
Ai e ka pranuar fajësinë të martën, në seancën fillestare për rastin të mbajtur në Gjykatën Themelore në Pejë.
Familjarët e Ukellës e kanë mirëpritur vendimin e gjykatës.
Sipas aktakuzës së ngritur më 19 nëntor nga Prokuroria Themelore në Pejë, Lajqi akuzohet se më 16 prill, rreth orës 8 të mëngjesit, me dashje dhe me pistoletë e ka vrarë bashkëshorten e tij në banesën e tyre në rrugën “Bill Klinton” në Pejë.
Instituti Kombëtar i Shëndetësisë të Publike të Kosovës ka bërë të ditur se gjatë ditës së djeshme në Laboratorin e Mikrobiologjisë përmes metodës RT-PCR është konfirmuar një rast i importuar të Mpox, i njohur më parë si Lia e Majmunëve.
“Rasti i gjinisë mashkullore (30 vjeç), shtetas i Republikës së Kosovës, është spitalizuar në Klinikën Infektive/QKUK me datë 24.12.2024, pas kthimit nga një shtet i Afrikës Perëndimore, me simptoma si temperaturë, ethe, ndryshimet në lëkurë, në fytyrë, në duar dhe kruarje”, thuhet në njoftimin e IKShPK-së.
Sipas IKShPK-së, pacienti është në gjendje stabile shëndetësore.
“IKSHPK i ka gjurmuar të gjitha kontaktet e deklaruara të personit të infektuar dhe të familjarëve të tij, të cilëve u janë dhënë rekomandimet për masat e parandalimit dhe të kontrollit të infeksionit”.
“IKSHPK tërheq vëmendjen për kujdes të qytetarëve, sepse personat që preken nga Mpox zakonisht përjetojnë simptoma të lehta apo mesatare që zgjasin dy deri në katër javë, dhe shërohen plotësisht. Edhe pse duhet vigjilencë, nuk ka vend për panik”.
Gjigantët evropianë, Real Madrid, do të ndryshojnë emrin e stadiumit të tyre ikonik “Santiago Bernabeu”. Madridi është një nga klubet më të mëdha në futbollin botëror, duke fituar 15 trofe të Ligës së Kampionëve dhe 36 tituj të La Ligës, ndër arritjet e tjera.
Gjatë viteve, disa nga lojtarët më të mirë në mbarë botën kanë përfaqësuar Los Blancos, duke përfshirë Cristiano Ronaldo, Zinedine Zidane, Luis Figo dhe Kaka. Shumica e lojtarëve do të kishin ëndërruar të vishnin fanellën e bardhë të famshme të Madridit dhe të dilnin në terren në stadiumin “Santiago Bernabeu”.
Megjithatë, tani po pretendohet se emri ikonë është vendosur të ndryshohet.
Siç raportohet nga gazeta spanjolle “Marca”, terreni i Madridit tani thjesht do të njihet si “The Bernabeu”, duke hequr “Santiago”, përcjellë KosovaPress.
Është sugjeruar se ndryshimi i emrit është bërë për arsye komerciale. Vitet e fundit, stadiumi i është nënshtruar një rinovimi mahnitës që e ka bërë më tej atë si një nga më të mirët në futbollin botëror.
Që nga viti 1955, stadiumi i Madridit ka përdorur emrin Santiago Bernabeu. Në raport thuhet gjithashtu se nuk ka pasur asnjë konfirmim apo fjalë zyrtare nga klubi në lidhje me ndryshimin e emrit.
Kapiteni Igor Kshnyakin, bashkë-piloti Aleksandr Kalyaninov dhe stjuardesa Hokuma Aliyeva humbën jetën në rrëzimin e aeroplanit, ndërsa dy stjuardesa, Zulfugar Asadov dhe Aidan Rahimli thuhet se mbijetuan dhe po trajtohen në spital.
Teksa dalin detaje rrëqethëse të momenteve të fundit të fluturimit 8432 të Azerbajxhanit, i cili u rrëzua të mërkurën në Aktau, ekuipazhi i fluturimit që bëri çmos për të shpëtuar pasagjerët deri në momentin e fundit po konsiderohen heronj.
Azerbajxhani Airlines publikoi emrat e pesë anëtarëve të ekuipazhit, duke identifikuar Igor Kshnyakin dhe Aleksandr Kalyaninov si pilotë dhe Hokuma Aliyeva, Zulfugar Asadov dhe Aydan Rahimli si stjuardesa.
Sipas linjës ajrore, aeroplani Embraer 190 mbante 37 shtetas azerbajxhanas, gjashtë nga Kazakistani, tre nga Kirgistani dhe 16 shtetas rusë.
Një total prej 29 pasagjerësh i mbijetuan përplasjes, ndërsa 38 humbën jetën ndërsa pilotët u përpoqën të bënin një ulje emergjente pranë qytetit të Kazakistanit Aktau.
AZAL-ın J2-8243 nömrəli Bakı-Qroznı reysində olan sərnişinlərin və ekipaj üzlərinin siyahısı:
1.Ağayev Ramin
2.Əhmədov Rəşad
3.Əlimirzəyeva Xədicə
4.Əlimirzoyev Əli
5.Əliyev Zamin İdris
6.Anqbazova Maleyka
7.Arsbayeva Ceyran
8.Arsbayeva Madina
9.Asanov Rinat
10.Atsayeva Zaira… pic.twitter.com/8sUqY73Kb7— AZAL – Azerbaijan Airlines (@azalofficial) December 25, 2024
Burimet e qeverisë së Azerbajxhanit kanë konfirmuar se një raketë ruse tokë-ajër shkaktoi rrëzimin, shkruan euronews, përcjell Telegrafi.
Sipas burimeve, raketa u qëllua gjatë aktivitetit ajror të dronëve mbi Grozny dhe copëzat goditën pasagjerët dhe ekuipazhin e kabinës ndërsa ajo shpërtheu pranë aeroplanit në mes të fluturimit.
Burime qeveritare thanë se aeroplani i dëmtuar nuk u lejua të ulej në asnjë aeroport rus pavarësisht kërkesave të pilotëve për një ulje emergjente dhe u urdhërua të fluturonte përtej Detit Kaspik drejt Aktaut në Kazakistan.
Sipas të dhënave, sistemet e navigimit GPS u bllokuan gjatë gjithë shtegut të fluturimit mbi det.
Ndryshe, raportohet se kapiteni Kshnyakin kishte një përvojë fluturimi prej mbi 15,000 orësh, nga të cilat 11,200 orë si kapiten, sipas Azerbajxhanit Airlines.
Ai dhe Kalyaninov shfaqën aftësi të jashtëzakonshme, sipas ekspertëve, pasi arritën të fluturonin aeroplanin përtej Detit Kaspik dhe të rrëzoheshin vetëm 3 kilometra larg pistës së aeroportit Aktau.
Bazuar në pamjet e vendit të rrëzimit dhe rrënojave të aeroplanit, ekspertët e aviacionit arritën në përfundimin se stabilizatori horizontal i majtë i Embraer 190 duket se është shpuar nga copëza dhe se aeroplani humbi shumicën e sistemeve hidraulike, duke përfshirë kontrollin e timonit.
Videot e analizuara nga ekspertët tregojnë se pilotët ishin të detyruar të ndryshonin shpejtësinë e aeroplanit, duke u ulur për të fituar shpejtësi dhe duke u ngjitur për të ngadalësuar për të qenë në gjendje të drejtonin aeroplanin, duke rezultuar në atë që njihet si lëvizje phugoid ose një lëkundje.
Por, pilotët dukej se nuk kishin zgjidhje për të ulur aeroplanin me butësi dhe atyre iu desh të tentonin një ulje në përplasje.
Azerbajxhani Airlines njoftoi se inspektimi i fundit teknik i plotë i aeroplanit u krye tetorin e kaluar.
Sipas linjës ajrore, Embraer 190, i regjistruar si 4K-AZ65 dhe i prodhuar në vitin 2013, kishte përfunduar gjithsej 9,949 ulje dhe kishte grumbulluar rreth 15,257 orë fluturimi para rrëzimit. /Telegrafi/
Kryeministri i Shqipërisë, Edi Rama u ka uruar të gjithëve një ditë të mbarë.
Përmes një postimi në Facebook, ai e bëri këtë me një video nga rruga për në Kolonjë, të cilën ai e quan magjike.
Petro Marko u lind në Dhërmi më 25 nëntor 1913 dhe vdiq në Tiranë më 27 dhjetor 1991, ku edhe është varrosur sipas amanetit pa ceremoni.
Ai ishte arsimtar, publicist, gazetar, interbrigadist e shkrimtar shqiptar. I lindur nga prindërit Marko e Zoica, Petro Marko u rrit nga gjyshja Mama Mille. I ati ishte pasuruar nëpërmjet tregtisë së qitros. Por e la të vogël sepse u sëmur gjatë internimit në ishujt e Tirenit nga italianët.
Pasi kreu shkollën filloren në fshatin e lindjes më 1924, shkoi në Shkollën Tregtare në Vlorë të cilën e mbaroi më 1932. Në atë shkollë pati, ndër të tjerë, si drejtor arsimtarin e studiuesin Kolë Kamsi dhe si mësues Ernest Koliqin; shkollë në të cilën jepnin mësim dhe shumë mësues italianë, njëri prej të cilëve i prezantoi me “Manifestin” e Marksit.
Pasi kreu shkollën i takon të sillet gjatë nëpër Tiranën e asaj kohe në kërkim të ndonjë pune, derisa takon një ditë Hilë Mosin, asokohe Ministër Arsimi, i cili e caktoi mësues në Dhërmi. Më pas transferohet për në Dhuvjan të Dropullit. Qëndron në kontakt të vazhdueshëm me shtypin e majtë, nëpërmjet gazetave greke, të cilat ia jepte Asim Vokshi. Nga një ngatërresë që pati, u gjet preteksti se Petrua i jepte nxënësve literaturë komuniste (akuzë e pavërtetë).
U detyrua të largohej për herë të parë në Greqi. Qëndron në Korfuz, ku bie në kontakt me emigrantët politik të atjeshëm me në krye dr. Omer Nishanin. Pastaj niset për n\’Athinë, ku kishte të vëllain Dhimitrin (Mimon), që ishte larguar që fëmijë nga Bregu. Atje hyn në fakultetin e letërsisë, ku i takoi të kishte fërkime me rektorin, i cili ia njehte për turp që Petroja si himarjot të ishte mësues i shqipes. Gjë për të cilën Petroja ia ktheu “turp për ju që ende jetoni në kohë të Bizantit!…”, replikë që i shkaktoi përjashtimin. Nëpërmjet punëdhënësit të të vëllait krijohet mundësia të hyjë në një shkollë jo shtetërore, në fakultetin ekonomiko-politik. Shqyrton mundësinë të shkojë në Bashkimin Sovjetik, ku në atë kohë ishte dhe Sejfulla Maleshova, Ali Kelmendi e Tajar Zavalani, por bie poshtë si mundësi.
Kthehet pas vendosjes të qeverisë liberale të Mehdi beut – verë 1935. Planifikohet Kryengritja e Fieri, e cila dështon që në zanafillë e Riza Cerova vritet nga trupat e Hamit Matjanit, dhe ata që ngelën ikën nga Vlora për në Korfuz. Kthehet në nëntor pasi Branko Merxhani e Ismet Toto e thërrasin me rastin e hapjes së një gazete (“Koha e Re”) si organ i qeverisë. Gazeta mbyllet pas një artikulli bombastik mbi punëtorët e Kuçovës; që Ethem Toto, asokohe ministër i brendshëm e pa si reaksionar e komunist. Shëtiti nga një gazetë në tjetrën (“Illyria”, etj.), dhe më 1936 boton revistën “ABC” bashkë me Branko Merxhanin, Dhimitër Godellin, Zavalanin, Migjenin, e cila u mbyll pas numrit të 2-të; e internojnë në Porto Palermo (2 javë) e pastaj në Llogara, lirohet me interesimin te Merxhanit e I. Totos. Bashkëpunon në “Përpjekja shqiptare” e B. Merxhanit, të cilën Brankoja kishte me nijet t’ia vinte për antipod “Hyllit të Dritës”. Por largohet pasi Merxhani shkroi artikullin Pse nuk jam marksist i detyruar nga censura e kohës. Pasi në një gazetë tjetër del haptas me idetë e tij pro proletariatit, i hyn si halë në sy Musa Jukës, i cili për ta pajtuar i propozon postin e zv/prefektit në Himarë. Petro i jep fjalën se do e pranojë pasi të shkojë në Athinë e të japë ca provime, duke parë pas këtij propozimi.
Takohet me Migjenin para se të niset (1937), dhe me të arritur në Athinë merr anijen për në Marsejë; anija i ra përreth Mesdheut (Izmir, Xhafa, Aleksandri, Tripoli). Mbërrin në Marsejë, dhe gjen në Paris Llazar Fundon e Ali Kelmendin. Merr direktivat nga një “shok” serb që mbante si nofkë “Robert”. Dhe caktohet kryetari i grupit prej 113 vetash që u nis për në Albacete ku ishte qendra e Brigada ve Internacionale. Bashkohet me vullnetarët e brigadës “Garibaldi” në Spanjë, shkon për në Kuintanar de la Republica. Merr pjesë në Mbledhjen e Shkrimtarëve Antifashistë në Valencia, ku ishin dhe Ernest Hemingëay, Pablo Neruda, etj. Lëviz nga Estremadura, Aragona, Gondez e mandej prapë në Francë, ku herë në Paris e herë në Grenoble i financuar nga Ndihma e Kuqe Internacionale i veshur me petkun dhe karizmën e interbrigadistit u ngarkua me agjitacionin në rininë universitare të Grenoble.
Hyn në Itali nga fundi i 1939. Pas 1 mijë e ca ditësh kthehet në atdhe sepse Kominterni kishte porositë t’i çonte legalisht ose jo, të gjithë komunistët në vendet e tyre. Kthehet në Dhërmi dhe mendon pajtimin hasmërive me fshatrat e Dukatit. Në Vlorë nis e harton trakte, shqip e italisht, kundra fashizmit. E burgosin në Vlorë, në Tiranë (maj 1940)… mbas marsit 1942 e nisin për Itali, Palermo e Ustikë. Pas çlirimit të jugut të Italisë nga forcat aleate anglo-amerikane çan burgun së bashku me të burgosur të tjerë dhe kalon në zonat e çliruara Italiane. Më 1944 arrestohet nga gjermanët nga të cilët shpëton në sajë të mësuesit të gjimnazit, Ernest Koliqit dhe po atë vit kthehet në Shqipëri.
Në përfundim të Luftës Antifashiste në vitin 1944 kthehet ne Shqipëri duke organizuar edhe ardhjen e gati 300 shqiptarëve tjerë në kohen kur shqiptarët kishin mbetur pa kurrfarë organizimi. Gjendet në Shkodër në shtëpinë e Nush Topallit, kur Shkodra bastiset nga trupat serbe. Te “Retë dhe gurët” citon N.Spirun që i thoshte se Shqipëria kishte material të mjaftueshëm jo vetëm për të dhe për kushedi sa vjet, bollëk ky që bën të mundur tregtarët shqiptarë nën okupacionin italian e pastaj gjerman, ngaqë pushtuesit kishin nevojë për material. Kur kthehet në Shqipërinë e çliruar, ftohet që të qëndrojë në krye të gazetës “Bashkimi” në Tiranë nga 1945-1947, nga një kontroll i befasishëm i gjejnë shkrime jashtë vijës së partisë, (shkruan se Hysni Kapo e shpëton nga pushkatimi) lirohet më 15 maj 1950. 1957 mësues në teknikumin “8 Nëntori”. 1973 i hiqet e drejta për botim. Më 1975 i fusin në burg të birin, Jamarbërin. Romani “Çuka e shtegtarit” – 1980 si direktivë për autokritikë nga Partia; por s\’ia pranuan e nuk u botua. Kjo për të vetmin shkak se nuk mund të pajtohej që në ditët e para të pushtetit me fillimin e diktaturës, e sidomos kur provoi t\’i rezistojë diktatit që i vinte Shqipërisë asokohe nga jashtë, kryesisht nga Beogradi. 27 dhjetor 1991 vdes dhe varroset sipas amanetit pa ceremoni. Presidenti i Shqipërisë, Alfred Moisiu, në vitin 2003 dekoroi Petro Markon me Urdhrin “Nderi i Kombit”.
Vepra
Filloi të shkruajë poezi dhe proza të shkurtra qysh në kohët e shkollës në Vlorë. Ministri i Arsimit Mosi do t’i thoshte Të shkruesh vjersha. Vjersha asht shprehja ma njerëzore e mendimit dhe e zemrës. Shkruan “Një natë e dy agime”, poemat “Nase labi”, “Horizonti në kuletë”, “Parada e të uriturve”, romanet “Kodashi”, “Rrugëve të luftës”; “Nisja pa mbarim”, “Bija e kapitenit”… gjatë kohës kur ishte në Itali. Në kulturën dhe letërsinë kombëtare Petro Marko është personalitet i përmasave të mëdha me shpirt e mendje të pa luhatur para çdo stuhie. Ata që kanë njohur nga afër Petro Markon, kanë ndjerë se brenda tij rrezatonte një besim madhor ndaj njeriut dhe mirësisë. Vetëm një lartësi shpirti e tillë mund ta përballonte ndeshjen sy më sy me vdekjen, që ai përjetoi aq shumë herë gjatë jetës së tij. Dhe sa herë ngrihej në këmbë ai do ta niste nga e para luftën ndaj së keqes po me atë forcë besimi, po me atë rrezatim mirësie. Të tillë e ndjen lexuesi Petron në romanet “Hasta la vista” (1959) dhe “Qyteti i fundit” (1960), ku rruga e tij jetësore e asimiluar artistikisht, është aq e pranishme. Në vitet ’70-ta, ai do të shkruajë romanin “Një emër në katër rrugë”, ndërsa periudhën e vështirë të jetës së tij në ishullin e Ustikës do ta përjetësojë në romanin e tij të rëndësishëm “Nata e Ustikës”. Paraqitja e shkrimtarit Petro Marko me dy romanet e tij të parë “Hasta la vista” dhe “Qyteti i fundit” në vitet ’60 është një kthesë e vërtetë në historikun e shkurtër të romanit shqiptar. Dhe nuk është fjala për rrumbullakimin e një përvoje krijuese por përkundrazi, për ndërprerje dhe dalje nga një përvojë e shartuar jo natyrshëm në rrjedhat e letrare shqiptare, ishte një synim që rrëfimi romanor, pjesërisht në vitet ’40, ’50-ta, do të çlirohej dhe të hapej si vizion, univers krijues dhe si spektër tematik.
Krahas kësaj prirjeje të brendshme që kanë të dy romanet e përmendur përballë veprave të të njëjtit zhanër të deriatëhershëm, këto vepra qëndronin superiore edhe si artikulim artistik. Dhe pikërisht për natyrën e risive, për natyrën që pretendon ndryshime të vërteta të vlerave letrare. Të gjitha veprat e Petro Markos u pëlqyen dhe u kërkuan nga lexuesi.
Faqet më të fuqishme të prozës së Petro Markos reflektojnë triumfin e dashurisë dhe të humanizmit njerëzor. Pas tërë atij ferri nëpër të cilin kalon njeriu në rrëfimin e Petro Markos, ai arrin të mbetet i pamposhtur nga mizoritë e botës. Këtë bërthamë të brendshme e rrezatojnë personazhet nga romanet e tij, këtë shkëlqim biblik reflekton Petro Marko njeri dhe Petro Marko shkrimtar në tërë veprat e tij. Nuk ka shembull në letërsinë shqiptare, ku të jetë gërshetuar dhe njehsuar aq shumë mes vetes njeriu dhe krijuesi – Petro Marko njeri dhe Petro Marko shkrimtar. Me romanet e tij Petro Marko hyri në personalitetet më të shquara të kulturës shqiptare që sollën risi të vërteta në traditën letrare shqiptare. Tek vepra e tij rrezaton bindja dhe besimi i lindur për dashurinë dhe humanizmin njerëzor, ndonëse sa rrojti ishte ndër personalitetet më të persekutuar dhe më të munduara. Në vitin 2000, e shoqja Safo me të bijën Amantia, botojnë “Retë dhe gurët – Intervistë me vetveten”, autobiografik ku Petro Marko plak merr në pyetje një version më të ri të vetvetes; libër ky që i kishte mbetur dorëshkrim dhe e kishte dëshirë ta botonte.
Tituj të veprave:
Hasta la vista (1958) [2]
Qyteti i fundit (1960) [2]
Një emër në katër rrugë
“Ara në mal” – roman [2][3]
Nata e Ustikës (1989) [2]
Shpella e piratëve- roman [2][4]
Vepra autobiografike
“Horizont” – roman [5]
Fantazma dhe plani 3+4
Çuka e shtegtarit
Një natë dhe dy agime
“Stina e armëve” – roman [6]
“Halimi” – roman [7]
Shpella e pirateve
“Tregime” – tregime [8]
“Gazetari, mbreti e uria” – – roman [9]
“Retë dhe gurët” – 2000
Ultimatumi – 2002
Tregime të zgjedhura – 2003
Mirënjohje
Mjeshtër i Madh i Punës – 1998
Penda e Artë – 2000
“Qytetar Nderi” i Vlorës – 2002
Urdhri “Nderi i Kombit” – 2003
Ka përfunduar periudha 120 ditore për regjistrimin e votuesve jashtë Kosovës. Kështu ka bërë te ditur zëdhënësi i Komisionit Qendror të Zgjedhjeve Valmir Elezi.
Sipas të dhënave preliminare, Elezi tha se numri i shtetasve të Kosovës që janë regjistruar si votues jashtë Kosovës në periudhën 29 gusht – 26 dhjetor 2024, deri në orën 23:59 është: 90,860, ndërkaq numri i aplikimeve që janë në shqyrtim është: 18,244.
“Ju njoftoj se shqyrtimi i aplikimeve të pranuara do të vazhdojë edhe gjatë ditës së premte dhe do të bëjmë përpjekje që në një kohë sa më të shpejtë të kemi një raport përfundimtar për numrin e shtetasve të regjistruar për të votuar nga jashtë Kosovës, të ndarë sipas mënyrës së votimit dhe sipas shteteve”, shtoi Elezi.
Qeveria e Kosovës sot mban mbledhjen e radhës në ora 10:00. Në rend dite do të bëhet shqyrtimi i propozim-vendimit për ndarjen e shtesave të njëhershme në vlerë prej 100 euro për fëmijët 0-16 vjeç dhe pensionmarrësit.
Poashtu në këtë mbledhje të qeverisë gjithsej në rend dite janë 9 pika.
Instituti Hidrometeorologjik i Kosovës ka njoftuar se të premten, moti do të jetë kryesisht i vranët.
Sipas IHMK temperaturat minimale do të jenë ndërmjet -3 deri -1°C dhe maksimale nga 0 deri 1°C.
“Do të fryjë erë e lehtë deri mesatare nga juglindja”, thuhet tutje.