Author: ATVLive

Prokurorët në Kosovë kanë në duar mbi 20 raste në të cilat, Agjencia për Parandalimin e Korrupsionit beson se ka bazë për hetime që ndërlidhen me korrupsionin.

“Këtë vit nuk janë dërguar shumë raste. Nëse nuk gaboj është rreth 20 ose 25 si total sepse jemi kujdesur ose të paktën kemi besuar që ato që dërgojmë janë më mirë të përgatitura dhe ka bazë të mjaftueshme për t’u ngritur aktakuzë…Këto të gjitha janë në shqyrtim. Nuk e besoj që ndonjëra nga këto që janë dërguar këtë vit ka arritur fazën finale të hetimeve”, tha drejtori i APK-së, Yll Buleshkaj.

Në prokurori, Agjencia për Parandalimin e Korrupsionit ka dërguar edhe mbi 15 raste për mosdeklarim të saktë të pasurisë.

Drejtori i kësaj agjencie, Yll Buleshkaj tregon se kanë shqiptuar rreth 100 gjoba për vonesa në deklarimin e pasurisë.

“Kemi rreth 12 mijë zyrtarë publik të cilët janë të obliguar ta kryejnë deklarimin e pasurisë. Nga këta 12 mijë kemi pasur më pak se 100 të cilët nuk e kanë deklaruar në kohë dhe nuk e kemi asnjë që nuk e ka deklaruar brenda afatit shtesë që jep ligji prej 15 ditëve. Kemi pasur rreth 100 gjoba, më saktë 98 gjoba të cilat i kemi shqiptuar për vonesa”, tha Buleshkaj.

Ai thotë se rasti i ministres së Jashtme Donika Gërvalla, e cila u shpall e pafajshme në akuzat për mosdeklraim të pasurisë në nëntor të vitit të kaluar, ka qenë më kompleks.

“Ne kemi një trend të fundit që është jo shumë pozitiv për ne, ku zyrtarët e caktuar lirohen nga gjyqësori, nga përgjegjësia penale duke u thirrur në një bazë jo të qartë…Ky rast ka qenë pak më kompleks, sepse pasuria që është menduar që nuk është deklaruar plotësisht, nuk ka qenë në Kosovë dhe ka qenë verifikimi i saj jashtëzakonisht i vështirë, nëse jo i pamundur”, tha Buleshkaj.

Dënimet më të larta që i ka shqiptuar Gjykata në rastet e korrupsionit janë rreth 1 mijë e 200 euro dhe dënim me burg me kusht. /atvlive.tv

Përgatiti: Pranvera Krasniqi

Vetëm 54 mësimdhënës i janë nënshtruar vullnetarisht provimit për pajisje me licencë të avancuar, muajin e kaluar.

36 prej tyre ishin të ciklit klasor, 3 mësimdhënës të Gjuhës shqipe dhe 15 të Matematikës.

Kjo pjesëmarrje e vogël, sipas njohësit të arsimit, Rinor Qehaja, reflekton pasiguri.

“Vet frika se mos nuk po i arrijnë pikët e nevojshme i ka ngjallë mosbesim”, tha Qehaja.

Kriterin e kalueshmërisë prej 80% e arritën vetëm shtatë mësimdhënës, pesë nga cikli fillor, një i matematikës dhe një i gjuhës shqipe. Kjo i bie vetëm 13% e gjithë kandidatëve.

Në provim ishin gjithsej 38 pyetje, 20 të fushës profesionale dhe 18 të fushës pedagogjike. Më shumë se gjysma e tyre lidhej me kurrikulën.

Sindikata e Arsimit, në bazë të këtyre rezultateve, tash kërkon më shumë angazhim nga Ministria.

“Duhet me dalë ministria me i cek, këtu ka pas më pak pikë në këtë fushë dhe t’i spikatin ato duke krijuar rrethana në përmirësimin e tyre”, tha kryetari i SBASHK-ut, Rrahman Jashari.

ATV-ja kupton se gjatë janarit, kandidatët që tashmë janë pajisur me licencë të avancuar, do të vlerësohen edhe nga inspektorati i Arsimit ku përfshihen, Vlerësimin e portfolios profesionale me 42 përqind të pyetjeve dhe Vëzhgimin në klasë – Vlerësimin e orës mësimore, 58%.

Pasi ta kalojnë këtë fazë, kandidatëve do t’u rritet koeficienti i pagës për 1.2 njësi.

Përgatiti: Nora Luta

Janë fjalët e para që dalin nga Cymë Avdullahi, kur përmendet biri i saj Imeri, i cili u vra në masakrën e Mejës 25 vjet më parë.

78 vjeçares, shpresa për drejtësi nuk i është zbehur, derisa thotë se kryerësit e masakrës duhet të marrin dënimin e merituar.

ATV-ja mëson se Prokuroria Speciale e ka dorëzuar në Gjykatën e Prishtinës, aktakuzën e ndryshuar për masakrën e Mejës dhe rajonin e Rekës së Kuqe në fund të dhjetorit, disa muaj pasi kishte kërkuar afat shtesë për plotësim.

53 persona akuzohen në mungesë, prej tyre 16 me pozita udhëheqëse.

Derisa thanë se është hap i vonuar, familjarët theksuan se zhvillimi i një gjykimi, ndonëse në mungesë është domethënës për ta.

Avdullahi thekson se dhimbja që e mbajnë mbi supe më shumë se dy dekada, do të lehtësohej me një aktgjykim dënues.

Sipas aktakuzës së, që u ngrit në dhjetor të 2023-s, më 27-29 prill të 1999-s, gjatë një operacioni të përbashkët nga grupe paramilitare serbe, UJ-së dhe MPB-së, u vranë 370 civilë.

Por, Gjykata e Prishtinës në prill të po të njëjtit vit ia ktheu aktakuzën në mungesë për përmirësim duke kërkuar ndër të tjera, që të identifikojë veprimet e të pandehurve, në raport me veprën penale për të cilën akuzohen.

Gjykata nuk ka kthyer përgjigjeje gjatë ditës se kur mund të fillojë procesi gjyqësor.

Përgatiti: Besmire Kluna

Razim Ahmeti, ka disa orë që nuk po arrin ta kryej punën e tij në këtë punëtori që merret me metal në fshatin Doganaj të Ferizajt. Ai ankohet se reduktimet e energjisë elektrike po iu shkakton telashe edhe me klientët.

‘’Është fabrikë e metalit, tash rrymë s’kena po na shkakton edhe në punë, po e sheh edhe vet çka me tregu po shihet edhe vet tu ndejt jam duart në xhepa qysh s’po na shkakton telashe po cka me ba, tash na me ta s’mujna mu shty’’, tha Razim Ahmeti, banor i fshatit Doganaj.

Hiq me mirë gjendja me energji elektrike nuk qëndron as në fshatin Greme.

Këtu, ndonëse ka energji elektrike, Besim Ahmeti nuk po arrin t’i përdor pajisjet për prodhimin e dritareve, për shkak të tensionit të ulët të rrymës.

‘’Për momentin rrymë ka problemin e kena me tensionin është I ulët nën 200 Kilovat dikun 290 unë e kam një biznes të vogël makineritë nuk funksionojnë se prej tensionit ka pjesë të makinerive që nuk funksionojnë kështu që si biznes jemi duke pushuar. Momente momente ndalen me reduktime 1 ore ose 1 orë e gjysmë ndërsa me herët ka pas deri në 7 orë. Banorëve ju kanë paraqit dëme të ndryshme si dhe bizneseve ka pas biznese që janë detyru me ble gjeneratorë për me punu’’, tha Ahmeti.

Ankesa të ngjashme ka edhe në fshatin Bibaj.

‘’Një lini ban dy lini nuk bajn, kemi reduktime 6 orë pa rrymë e 2 orë me rrymë, gjendja është kështu nja 3 javë ditë rregullisht është qishty. Kemi kërku edhe trafo me ndrru. Janë shumë kallabllak shpija edhe që janë shtu. Me shumë jena pa rrymë se me rrymë’’, tha Izahir Dernjani, banor i fshatit Bibaj.

Në anën tjetër, problemin me energji elektrike në këtë komunë, KEDS-i vazhdon ta arsyetoj me rritjen e konsumit, duke mohuar se bëhet fjalë për reduktime.

‘’Një numër shumë i vogël të konsumatorëve tanë në Ferizaj, nuk kanë furnizim me energji elektrike për shkak të mbingarkesës të shfaqur tash e disa ditë. Pra me rënien e temperaturave në vendin tonë tash e dy javë, është rritur shumë edhe konsumi i energjisë elektrike. Zakonisht kjo ka ndodhur edhe në dimrat paraprak megjithatë kësaj radhe kemi pasur një rritje të konsumit të paparë ndonjëherë me parë në qoftë se para 10 vjete kemi pasur në kohën e pikut një konsum prej 1000 Megavat, se fundi para vitit të ri janë regjistruar shifra deri në 1500 Megavat të konsumit të energjisë elektrike’’, tha zëdhënësi i KEDS-it, Lulzim Krasniqi.

Nga KEDS-i thonë se mbingarkesa ditë me parë ka pasur edhe në rajonin e Gjilanit, Prizrenit dhe të Gjakovës, por që tashmë gjendja është përmirësuar.

Përgatiti: Besmire Kluna

Me fillimin e stinës së dimrit, janë shtuar rastet e gripit sezonal. Sipas Institutit Kombëtar të Shëndetësisë Publike të Kosovës që nga muaji tetor e deri më tani janë konfirmuar gjithsej 52 raste më të rënda me grip.

Si rrjedhojë edhe interesimi për tu vaksinuar kundër gripit sezonal është rritur në Qendrën Kryesore të Mjekësisë Familjare në kryeqytet.

‘’Gjithsesi dominon grupmosha e moshës se shtyer 65 e mbi ku prej totalit të vaksinimit i kemi dikun mbi 6 mijë doza të dhëna për këtë grupmoshë e këto tjerat me numër pak me të vogël, po në total është 10 mijë deri me tani”, tha doktoresha e Mjekësisë Familjare, Florina Ushaku.

Ushaku thotë se edhe grupmoshtat tjera janë të rrezikuara nga gripi sezonal.

‘’Gjithmonë presim një përkeqësim prej sëmundjes se gripit mirëpo nuk përjashtohen edhe grup mosha tjera, s’do të thotë se mosha me qenë e shtyer mundet me qenë edhe person i ri i cili probleme shëndetësore duke përfshirë mushkëritë veshkët, ndonjë sëmundje kronike që duhet me marrë vaksinën, madje nuk përjashtohet mundësia për fëmijë të vegjël se kanë probleme shëndetësore’’, tha Ushaku.

Ndryshe nga Prishtina, në Komunën e Fushë Kosovës, numri i të vaksinuare është dukshëm më i ulët.

“2500 vaksina të cilat kanë qenë në dispozicion prej 1 tetorit të vitit 2024 për ofrim të pacientëve deri me tash me thanë numri I qytetarëve që kanë marrë vaksinën janë rreth 2100 qytetarë dhe janë në dispozicion edhe 400 vaksina’’, tha Mustafë Gashi, doktor i Mjekësisë Familjare.

Me qëllim të parandalimit të rasteve të gripit sezonal, Instituti kombëtar i shëndetësisë Publike vazhdimisht u ka bërë thirrje qytetarëve që të vaksinohen në qendrat e mjekësisë familjare në komunat ku jetojnë.

Kryetari i Zubin Potokut, Izmir Zeqiri, thotë se siguria në këtë komunë veriore është nën kontroll, pas sulmit terrorist të 29 nëntorit në kanalin e Ibër-Lepencit. Megjithatë, nuk përjashton mundësinë që diçka e tillë mund të përsëritet sërish.

Zeqiri i ka publikuar disa kërcënime gjatë vitit të kaluar, që i kanë shkuar në gjuhën serbe, por tregon se nuk ka të angazhuar mbrojtje të afërt.

Si kryetar që vjen nga pakica shqiptare në këtë komunë, thotë se deri tash ka tentuar ta respektojë diversitetin etnik, edhe në çështjet e punësimit.

‘’40 janë të punësuar në komunë në detyra të ndryshme. Mundet të jetë përqindja e serbëve më e madhe, mos të them 50-50,mirëpo i shqyrtojmë hapësirat e punësimit, jemi në trend të hapjes të konkurseve”, tha Zeqiri.

Ndërsa nuk ankohet ndaj pushtetit qendror, edhe pse thotë se nuk janë realizuar të gjitha premtimet.

“Derën hapur e kemi tek secili agjenci të qeverisë të Kosovës, nuk kemi diçka që anashkalohet, premtime kemi shumë, ndoshta realizime më pak”, tha Zeqiri.

Buxheti për komunën e Zubin Potokut për 2025 është rreth 3.4 milionë euro. /atvlive.tv

Në Gjermani, vendi me konsumin më të lartë të energjisë në Evropë, energjia diellore plotësoi afërsisht 14 për qind të konsumit të energjisë elektrike të vendit gjatë vitit të kaluar, tregon raporti i Shoqatës Gjermane të Energjisë Diellore (BSW).

Sipas raportit, kapaciteti i instaluar i Gjermanisë i bazuar në energjinë diellore është rritur me 10 për qind në vitin 2024 krahasuar me një vit më parë. Vitin e kaluar, më shumë se 1 milion sisteme të energjisë diellore me një fuqi prej më shumë se 17 gigavatësh filluan të sigurojnë energji elektrike në rrjetin e vendit.

Përderisa kapaciteti total i instaluar i vendit i bazuar në energjinë diellore tejkaloi kufirin historik prej 100 gigavatësh për herë të parë, afërsisht 14 për qind e konsumit të energjisë elektrike në Gjermani u plotësua nga energjia diellore vitin e kaluar.

Pjesën më të madhe në rritjen e energjisë e ka pasur tregu i instalimeve për banim, i cili është rritur me 40 për qind krahasuar me një vit më parë dhe është vënë në përdorim 6,3 gigavat energji.

Gjermania synon të arrijë një kapacitet të instaluar prej 215 gigavatësh në energjinë diellore deri në vitin 2030.

Kreu i BSW-së, Carsten Körnig tha se nëse rritja në tregun e energjisë diellore vazhdon në të njëjtin nivel në dy vitet e ardhshme, Gjermania do t’i afrohet objektivit të saj prej 215 gigavatësh.

“Ndërtimi i sistemeve të energjisë diellore dhe sistemeve të ruajtjes është shumë i rëndësishëm për sigurimin e energjisë elektrike të lirë në të ardhmen dhe uljen e kostove të ndryshimeve klimatike. Prandaj, qeveria e ardhshme federale duhet të heqë barrierat e tregut dhe të sigurojë një kornizë tërheqëse investimi”, tha ai. /AnadoluAgency